ຄຳຖາມຈາກຜູ້ອ່ານ
ໃນຜູ້ເທສະໜາປ່າວປະກາດ 5:8 ເວົ້າເຖິງຜູ້ປົກຄອງທີ່ເປັນມະນຸດຫຼືເວົ້າເຖິງພະເຢໂຫວາ?
ຂໍ້ນີ້ອ່ານວ່າ: “ຖ້າເຈົ້າເຫັນຄົນທີ່ມີຕຳແໜ່ງສູງຂົ່ມເຫງຄົນທຸກ ແລະເຫັນຄວາມບໍ່ຍຸຕິທຳແລະຄວາມບໍ່ຖືກຕ້ອງໃນເຂດທີ່ເຈົ້າຢູ່ກໍຢ່າແປກໃຈ ເພາະມີອີກຜູ້ໜຶ່ງທີ່ຕຳແໜ່ງສູງກວ່າ ລາວເຝົ້າເບິ່ງຜູ້ນັ້ນຢູ່ ແລະຍັງມີຜູ້ອື່ນທີ່ຕຳແໜ່ງສູງກວ່ານັ້ນອີກ.”—ຜູ້ປ. 5:8, ລ.ມ.
ເມື່ອອ່ານຂໍ້ນີ້ແລະບໍ່ໄດ້ຄິດເຖິງພະເຢໂຫວາ ເບິ່ງຄືວ່າຂໍ້ນີ້ໝາຍເຖິງອຳນາດການປົກຄອງຂອງມະນຸດເທົ່ານັ້ນ. ແຕ່ຖ້າຄິດເລິກເຊິ່ງ ຂໍ້ນີ້ໝາຍເຖິງພະເຢໂຫວາ ແລະການຮູ້ແບບນີ້ຈະເຮັດໃຫ້ເຮົາສະບາຍໃຈຂຶ້ນ.
ຜູ້ເທສະໜາປ່າວປະກາດ 5:8 ເວົ້າເຖິງຜູ້ທີ່ມີຕຳແໜ່ງສູງທີ່ຂົ່ມເຫງຄົນທຸກຍາກແລະບໍ່ໃຫ້ຄວາມຍຸຕິທຳກັບເຂົາເຈົ້າ. ຜູ້ທີ່ມີຕຳແໜ່ງສູງຄວນຈື່ໄວ້ວ່າ ມີຜູ້ໜຶ່ງທີ່ມີຕຳແໜ່ງສູງກວ່າແລະມີສິດອຳນາດຫຼາຍກວ່າກຳລັງເຝົ້າເບິ່ງລາວຢູ່ ນີ້ໝາຍຄວາມວ່າມີຜູ້ໜຶ່ງອີກທີ່ມີຕຳແໜ່ງສູງກວ່າລາວ. ເປັນຕາໜ້າເສຍດາຍ ໃນການປົກຄອງຂອງມະນຸດ ຄົນທີ່ມີຕຳແໜ່ງສູງເຫຼົ່ານີ້ອາດສໍ້ໂກງແລະເຮັດໃຫ້ປະຊາຊົນເຈິຄວາມຍາກລຳບາກຍ້ອນການສໍ້ໂກງນີ້.
ເຖິງແມ່ນເບິ່ງຄືວ່າບໍ່ມີຫຍັງດີຂຶ້ນ ແຕ່ເຮົາໄດ້ກຳລັງໃຈທີ່ຮູ້ວ່າພະເຢໂຫວາ ‘ກຳລັງເຝົ້າເບິ່ງຄົນທີ່ມີຕຳແໜ່ງສູງ’ ໃນການປົກຄອງຂອງມະນຸດ. ເຮົາສາມາດອ້ອນວອນເຖິງພະເຢໂຫວາແລະຝາກຄວາມອຸກໃຈໄວ້ນຳເພິ່ນ. (ເພງ. 55:22; ຟລປ. 4:6, 7) ເຮົາຮູ້ວ່າ “ພະເຢໂຫວາແນມເບິ່ງທົ່ວໂລກເພື່ອຈະໃຊ້ລິດເດດຂອງເພິ່ນຊ່ວຍເຫຼືອຄົນທີ່ຮັບໃຊ້ເພິ່ນສຸດຫົວໃຈ.”—2 ຂ່າວ. 16:9, ລ.ມ.
ດັ່ງນັ້ນ ຜູ້ເທສະໜາປ່າວປະກາດ 5:8 ເຕືອນວ່າ ໃນໂລກທີ່ເຮົາຢູ່ນີ້ຈະມີຜູ້ໜຶ່ງທີ່ມີຕຳແໜ່ງແລະສິດອຳນາດຫຼາຍກວ່າສະເໝີ. ສຳຄັນກວ່ານັ້ນ ຂໍ້ນີ້ເຕືອນເຮົາວ່າ ພະເຢໂຫວາເປັນຜູ້ທີ່ມີອຳນາດສູງສຸດ ແລະຕອນນີ້ເພິ່ນກຳລັງປົກຄອງໂດຍຜ່ານທາງພະເຢຊູຄລິດລູກຊາຍຂອງເພິ່ນທີ່ເປັນກະສັດປົກຄອງຢູ່. ພະເຢໂຫວາເປັນຜູ້ມີລິດເດດສູງສຸດກຳລັງເບິ່ງທຸກສິ່ງທຸກຢ່າງແລະທຸກຄົນຢູ່ ເພິ່ນຍຸຕິທຳແທ້ໆແລະລູກຊາຍຂອງເພິ່ນກໍຄືກັນ.