‘ຢ່າໃຫ້ມືຂອງເຈົ້າອ່ອນແຮງລົງ’
‘ຢ່າໃຫ້ມືຂອງເຈົ້າອ່ອນແຮງລົງ.’—ໂຊໂຟນີ 3:16
ເພງ: 81, 32
1, 2. (ກ) ໃນທຸກມື້ນີ້ຫຼາຍຄົນມີບັນຫາແບບໃດແດ່ ແລະຜົນເປັນແນວໃດ? (ຂ) ເອຊາອີ 41:10, 13 ໃຫ້ຄວາມຫວັງທີ່ແນ່ນອນໃນເລື່ອງໃດ?
ພີ່ນ້ອງຍິງຄົນໜຶ່ງທັງເປັນໄພໂອເນຍປະຈຳແລະແຕ່ງດອງກັບຜູ້ເຖົ້າແກ່ ລາວເວົ້າວ່າ: “ເຖິງວ່າຂ້ອຍເຮັດກິດຈະກຳຕ່າງໆຂອງຄລິດສະຕຽນເປັນປະຈຳ ແຕ່ເປັນເວລາຫຼາຍປີທີ່ຂ້ອຍຕ້ອງຕໍ່ສູ້ກັບຄວາມກັງວົນ. ສິ່ງນີ້ກະທົບໃສ່ວິທີທີ່ຂ້ອຍປະຕິບັດຕໍ່ຄົນອື່ນ ເຮັດໃຫ້ຂ້ອຍນອນບໍ່ຫຼັບ ມີບັນຫາສຸຂະພາບ ແລະບາງຄັ້ງມັນກໍເຮັດໃຫ້ຂ້ອຍບໍ່ຢາກສູ້ອີກຕໍ່ໄປ.”
2 ເຈົ້າເຂົ້າໃຈຄວາມຮູ້ສຶກຂອງພີ່ນ້ອງຍິງຄົນນີ້ບໍ? ໜ້າເສົ້າໃຈ ເນື່ອງຈາກເຮົາມີຊີວິດຢູ່ໃນໂລກຊົ່ວທີ່ຊາຕານປົກຄອງ ດັ່ງນັ້ນ ເຮົາຈຶ່ງປະສົບກັບຄວາມກົດດັນຢ່າງຫຼວງຫຼາຍ. ຄືກັບສະໝໍເຮືອຈັບເຮືອໄວ້ບໍ່ໃຫ້ເຄື່ອນທີ່ ຄວາມກັງວົນສາມາດເຮັດໃຫ້ເຮົາໜັກໃຈຫຼືທໍ້ໃຈໄດ້. (ສຸພາສິດ 12:25) ເປັນຫຍັງເຈົ້າອາດຮູ້ສຶກກັງວົນ? ບາງທີເຈົ້າອາດເສົ້າໃຈຍ້ອນຄົນທີ່ເຈົ້າຮັກເສຍຊີວິດ ຫຼືເຈົ້າອາດກຳລັງອົດທົນກັບຄວາມເຈັບປ່ວຍຮ້າຍແຮງຫຼືການຂົ່ມເຫງທີ່ໜັກໜ່ວງ ຫຼືເຈົ້າອາດກຳລັງພະຍາຍາມທີ່ຈະລ້ຽງດູຄອບຄົວໃນສະພາບເສດຖະກິດທີ່ຫຍຸ້ງຍາກຫຼາຍ. ເມື່ອເວລາຜ່ານໄປ ຄວາມເຄັ່ງຕຶງທາງດ້ານອາລົມສາມາດເຮັດໃຫ້ກຳລັງຂອງເຈົ້າອ່ອນລົງແລະເຖິງຂັ້ນເຮັດໃຫ້ເຈົ້າສູນເສຍຄວາມຍິນດີ. ແຕ່ເຈົ້າສາມາດໝັ້ນໃຈໄດ້ວ່າພະເຈົ້າພ້ອມທີ່ຈະຊ່ວຍເຫຼືອເຈົ້າ.—ອ່ານເອຊາອີ 41:10, 13
3, 4. (ກ) ຄຳພີໄບເບິນໃຊ້ຄຳວ່າ “ມື” ແນວໃດ? (ຂ) ສິ່ງໃດທີ່ອາດເຮັດໃຫ້ມືຂອງເຮົາອ່ອນແຮງລົງ?
3 ຫຼາຍຄັ້ງຄຳພີໄບເບິນມັກໃຊ້ອະໄວຍະວະສ່ວນຕ່າງໆຂອງຮ່າງກາຍເພື່ອພັນລະນາເຖິງຄຸນລັກສະນະແລະການກະທຳຂອງຄົນເຮົາ. ຕົວຢ່າງເຊັ່ນ: ມີການໃຊ້ຄຳວ່າມືຫຼາຍຮ້ອຍຄັ້ງ. ເມື່ອຄຳພີໄບເບິນກ່າວວ່າມືຂອງບາງຄົນໄດ້ຮັບການເສີມກຳລັງ ສິ່ງນີ້ໝາຍຄວາມວ່າຄົນນັ້ນໄດ້ຮັບກຳລັງໃຈ ລາວເຂັ້ມແຂງຂຶ້ນ ແລະພ້ອມທີ່ຈະລົງມືເຮັດ. (1 ຊາເມືອນ 23:16; ເອເຊດຣາເຊ 1:6) ນອກຈາກນັ້ນຍັງໝາຍຄວາມວ່າຄົນນັ້ນມີຄວາມຄິດໃນແງ່ບວກແລະລາວມີຄວາມຫວັງສຳລັບອະນາຄົດ.
4 ບາງຄັ້ງຄຳພີໄບເບິນອາດພັນລະນາວ່າມືຂອງຄົນຜູ້ໜຶ່ງອ່ອນແຮງລົງ ສິ່ງນີ້ໝາຍຄວາມວ່າລາວທໍ້ໃຈຫຼືສູນເສຍຄວາມຫວັງ. (2 ຂ່າວຄາວ 15:7; ເຫບເລີ 12:12) ເມື່ອເຈົ້າເຄັ່ງຕຶງ ຫຼືເມື່ອຍຫຼາຍ ຫຼືຮູ້ສຶກວ່າສາຍສຳພັນຂອງເຈົ້າກັບພະເຢໂຫວາອ່ອນແອລົງ ເຈົ້າອາດບໍ່ຢາກສູ້ຕໍ່ໄປ. ເຈົ້າຈະພົບກຳລັງໃຈໄດ້ຈາກໃສ? ເຈົ້າຈະໄດ້ຮັບການກະຕຸ້ນແລະການເສີມກຳລັງໃຫ້ອົດທົນແລະມີຄວາມຊົມຊື່ນຍິນດີໄດ້ແນວໃດ?
‘ມືຂອງພະເຢໂຫວາບໍ່ໄດ້ສັ້ນຈຶ່ງຊ່ອຍໃຫ້ພົ້ນບໍ່ໄດ້’
5. (ກ) ເມື່ອມີບັນຫາເຮົາອາດຮູ້ສຶກແນວໃດ ແຕ່ເຮົາຄວນຈື່ສິ່ງໃດໄວ້? (ຂ) ໃນບົດຄວາມນີ້ເຮົາຈະພິຈາລະນາຫຍັງ?
5 ອ່ານໂຊໂຟນີ 3:16, 17. ເມື່ອມີບັນຫາ ເຮົາບໍ່ຄວນຢ້ານແລະທໍ້ໃຈ ຫຼືປ່ອຍໃຫ້ມືຂອງເຮົາອ່ອນແຮງລົງ. ພະເຢໂຫວາເປັນພໍ່ທີ່ມີຄວາມຮັກ ດັ່ງນັ້ນ ພະອົງຈຶ່ງເຊີນເຮົາໃຫ້ຝາກຄວາມກັງວົນໃຈທັງໝົດໄວ້ກັບພະອົງ. (1 ເປໂຕ 5:7) ພະເຢໂຫວາຫ່ວງໃຍເຮົາຄືກັບທີ່ພະອົງໄດ້ຫ່ວງໃຍຊາດອິດສະລາແອນ. ພະອົງບອກເຂົາເຈົ້າວ່າ ມືຂອງພະອົງ ‘ບໍ່ໄດ້ສັ້ນຈຶ່ງຊ່ອຍໃຫ້ພົ້ນບໍ່ໄດ້.’ ພະອົງພ້ອມສະເໝີທີ່ຈະຊ່ວຍຜູ້ຮັບໃຊ້ທີ່ພັກດີ. (ເອຊາອີ 59:1) ໃນບົດຄວາມນີ້ ເຮົາຈະພິຈາລະນາສາມຕົວຢ່າງທີ່ເດັ່ນໃນຄຳພີໄບເບິນເຊິ່ງສະແດງເຖິງຄວາມປາຖະໜາແລະຄວາມສາມາດຂອງພະເຢໂຫວາທີ່ຈະເສີມກຳລັງປະຊາຊົນຂອງພະອົງໃນການເຮັດຕາມຈຸດປະສົງຂອງພະອົງເຖິງວ່າຈະມີຄວາມຫຍຸ້ງຍາກຫຼາຍ. ຂໍໃຫ້ເບິ່ງວິທີທີ່ຕົວຢ່າງເຫຼົ່ານີ້ກໍສາມາດເສີມກຳລັງເຈົ້າ.
6, 7. ເຮົາຮຽນຮູ້ຫຍັງຈາກໄຊຊະນະຂອງຊາວອິດສະລາແອນຕໍ່ກັບພວກອາມາເລກ?
6 ບໍ່ດົນຫຼັງຈາກທີ່ຊາວອິດສະລາແອນຖືກປົດປ່ອຍອອກຈາກການເປັນທາດຢູ່ປະເທດເອຢິບ ພວກອາມາເລກກໍໂຈມຕີເຂົາເຈົ້າ. ໂມເຊບອກໂຢຊວຍຊາຍຜູ້ກ້າຫານໃຫ້ນຳພາປະຊາຊົນໃນການສູ້ຮົບ. ຈາກນັ້ນ ໂມເຊ ອາໂລນ ແລະຫູລກໍຂຶ້ນໄປເທິງພູເຂົາທີ່ຢູ່ໃກ້ບໍລິເວນນັ້ນ ເພາະຈາກທີ່ນັ້ນເຂົາເຈົ້າສາມາດແນມເຫັນການສູ້ຮົບໄດ້. ຜູ້ຊາຍທັງສາມຄົນນີ້ຢ້ານບໍຈຶ່ງປົບໜີຈາກການສູ້ຮົບ? ບໍ່ໄດ້ເປັນແບບນັ້ນ!
7 ໂມເຊໄດ້ເຮັດຕາມແຜນການທີ່ວາງໄວ້ເພື່ອຊ່ວຍຊາວອິດສະລາແອນໃຫ້ຊະນະການສູ້ຮົບກັບພວກອາມາເລກ. ໂມເຊຖືໄມ້ຄ້ອນເທົ້າຂອງພະເຈົ້າອົງທ່ຽງໄວ້ໃນມືແລະຍົກມັນຂຶ້ນເທິງຟ້າ. ເມື່ອລາວເຮັດແບບນັ້ນ ພະເຢໂຫວາໄດ້ໃຫ້ຊາວອິດສະລາແອນມີກຳລັງທີ່ຈະຕໍ່ສູ້ກັບພວກອາມາເລກ. ແຕ່ເມື່ອແຂນທັງສອງຂ້າງຂອງໂມເຊເລີ່ມເມື່ອຍແລະອ່ອນແຮງລົງ ພວກອາມາເລກກໍເລີ່ມເປັນຝ່າຍໄດ້ປຽບ. ດັ່ງນັ້ນ ອາໂລນແລະຫູລຈຶ່ງຟ້າວຊ່ວຍໂມເຊທັນທີ. “ເຂົາ [ເຈົ້າ] ໄດ້ເອົາກ້ອນຫີນມາວາງລົງແລະທ່ານໂມເຊໄດ້ນັ່ງເທິງຫີນນັ້ນ ແລະທ່ານອາໂລນກັບທ່ານຫູລໄດ້ຄໍ້າມືທ່ານ ຜູ້ໜຶ່ງເບື້ອງນີ້ຜູ້ໜຶ່ງເບື້ອງນັ້ນ ແລະມືຂອງທ່ານຍໍຊູຢູ່ຈົນເຖິງຕາເວັນຕົກ.” ແມ່ນແລ້ວ ເນື່ອງຈາກມືທີ່ມີລິດເດດຂອງພະເຢໂຫວາ ຊາວອິດສະລາແອນຈຶ່ງໄດ້ໄຊຊະນະໃນການສູ້ຮົບ.—ອົບພະຍົບ 17:8-13
8. (ກ) ອາຊາເຮັດແນວໃດເມື່ອພວກເອທິໂອເປຍຂົ່ມຂູ່ຊາວຢູດາ? (ຂ) ເຮົາຈະຮຽນແບບຕົວຢ່າງຂອງອາຊາໄດ້ແນວໃດ?
8 ພະເຢໂຫວາພ້ອມສະເໝີທີ່ຈະໃຊ້ມືທີ່ມີລິດເດດຂອງພະອົງເພື່ອຊ່ວຍປະຊາຊົນໃນສະໄໝຂອງກະສັດອາຊາ. ຄຳພີໄບເບິນເວົ້າເຖິງກອງທະຫານຫຼາຍກອງ ແຕ່ກອງທະຫານທີ່ໃຫຍ່ທີ່ສຸດແມ່ນກອງທະຫານເຊຣາກຂອງພວກເອທຽວປຽນຫຼືເອທິໂອເປຍ ເຊິ່ງມີທະຫານທີ່ຊຳນານເຖິງ 1.000.000 ຄົນ. ທະຫານຂອງພວກເອທິໂອເປຍມີຈຳນວນຫຼາຍກວ່າທະຫານຂອງອາຊາເຖິງສອງເທົ່າ. ອາຊາກັງວົນ ຢ້ານ ຫຼືທໍ້ໃຈບໍ? ລາວປ່ອຍໃຫ້ມືຂອງຕົວເອງອ່ອນແຮງລົງບໍ? ບໍ່ໄດ້ເປັນແບບນັ້ນ! ອາຊາໄດ້ຂໍຄວາມຊ່ວຍເຫຼືອຈາກພະເຢໂຫວາທັນທີ. ຖ້າເບິ່ງໃນແງ່ດ້ານການທະຫານ ເລື່ອງນີ້ອາດເບິ່ງຄືວ່າເປັນໄປບໍ່ໄດ້ທີ່ຈະຊະນະການສູ້ຮົບກັບພວກເອທິໂອເປຍ. ແຕ່ ‘ພະເຈົ້າກະທຳສັບພະທຸກສິ່ງໄດ້.’ (ມັດທາຍ 19:26) ພະເຈົ້າໄດ້ໃຊ້ລິດເດດທີ່ຍິ່ງໃຫຍ່ຂອງພະອົງ ແລະໄດ້ “ຕີແພ້ [ຊະນະ] ພວກເອທຽວປຽນຕໍ່ໜ້າອາຊາ” ເຊິ່ງລາວເປັນຄົນທີ່ມີ ‘ໃຈສັດຊື່ຕໍ່ພະເຢໂຫວາຈົນສິ້ນຊີວິດ.’—2 ຂ່າວຄາວ 14:8-13; 1 ກະສັດ 15:14
9. (ກ) ເນເຫມີເຫັນຫຍັງເມື່ອໄປເມືອງເຢຣຶຊາເລມ ແລະລາວຮູ້ສຶກແນວໃດ? (ຂ) ພະເຈົ້າຕອບຄຳອະທິດຖານຂອງເນເຫມີແນວໃດ?
9 ເມື່ອເນເຫມີໄປເມືອງເຢຣຶຊາເລມ ລາວເຫັນຫຍັງ? ລາວເຫັນວ່າພວກສັດຕູຈາກດິນແດນຕ່າງໆກຳລັງຂົ່ມຂູ່ຊາວຢິວ ດັ່ງນັ້ນ ເຂົາເຈົ້າຈຶ່ງເຊົາກໍ່ສ້າງກຳແພງເມືອງເຢຣຶຊາເລມ. ເມືອງບໍ່ໄດ້ຮັບການປົກປ້ອງແລະຊາວຢິວກໍຮູ້ສຶກທໍ້ໃຈ. ເນເຫມີຮູ້ສຶກແນວໃດ? ລາວທໍ້ໃຈແລະປ່ອຍໃຫ້ມືຂອງລາວອ່ອນແຮງລົງບໍ? ບໍ່ໄດ້ເປັນແບບນັ້ນ! ຄືກັບໂມເຊ ອາຊາ ແລະຜູ້ຮັບໃຊ້ທີ່ສັດຊື່ຄົນອື່ນໆຂອງພະເຢໂຫວາ ເນເຫມີໝາຍເພິ່ງໃນພະເຢໂຫວາສະເໝີ. ໃນສະຖານະການນີ້ກໍເຊັ່ນກັນ ເນເຫມີອະທິດຖານຂໍຄວາມຊ່ວຍເຫຼືອຈາກພະເຢໂຫວາ ແລະພະອົງກໍຕອບຄຳອະທິດຖານຂອງລາວ. ພະເຢໂຫວາໃຊ້ “ລິດເດດອັນໃຫຍ່” ແລະ “ມືອັນມີແຮງ” ຂອງພະອົງເພື່ອເສີມກຳລັງຊາວຢິວ. (ອ່ານເນເຫມີ 1:10; 2:17-20; 6:9) ໃນທຸກມື້ນີ້ ເຈົ້າເຊື່ອບໍວ່າພະເຢໂຫວາກໍໃຊ້ “ລິດເດດອັນໃຫຍ່” ແລະ “ມືອັນມີແຮງ” ເພື່ອເສີມກຳລັງຜູ້ຮັບໃຊ້ຂອງພະອົງ?
ພະເຢໂຫວາຈະເສີມກຳລັງມືຂອງເຈົ້າ
10, 11. (ກ) ຊາຕານພະຍາຍາມໃຊ້ວິທີໃດແດ່ເພື່ອເຮັດໃຫ້ມືຂອງເຮົາອ່ອນແຮງລົງ? (ຂ) ພະເຢໂຫວາໃຊ້ຫຍັງເພື່ອຊ່ວຍເຮົາໃຫ້ເຂັ້ມແຂງແລະມີກຳລັງ? (ຄ) ເຈົ້າໄດ້ຮັບປະໂຫຍດແນວໃດຈາກຄຳແນະນຳຂອງພະເຢໂຫວາ?
10 ເຮົາໝັ້ນໃຈໄດ້ເລີຍວ່າພະຍາມານຈະບໍ່ປ່ອຍໃຫ້ມືຂອງມັນອ່ອນແຮງລົງ. ມັນຍັງຈະໂຈມຕີເຮົາຕໍ່ໆໄປ ແລະພະຍາຍາມທີ່ຈະຢຸດວຽກງານຂອງເຮົາ. ມັນໃຊ້ຄຳຕົວະແລະການຂົ່ມຂູ່ຈາກຜູ້ອອກຫາກ ລັດຖະບານ ແລະຫົວໜ້າສາສະໜາ. ມັນມີເປົ້າໝາຍຫຍັງ? ມັນຢາກໃຫ້ເຮົາເຊົາປະກາດຂ່າວດີເລື່ອງລາຊະອານາຈັກ. ແຕ່ພະເຢໂຫວາມີຄວາມສາມາດແລະເຕັມໃຈທີ່ຈະຊ່ວຍເຫຼືອເຮົາ ແລະພະອົງເສີມກຳລັງເຮົາໂດຍທາງພະລັງບໍລິສຸດຂອງພະອົງ. (1 ຂ່າວຄາວ 29:12) ເປັນສິ່ງສຳຄັນຫຼາຍທີ່ເຮົາຈະຂໍພະລັງບໍລິສຸດຈາກພະອົງເພື່ອເຮົາຈະສາມາດຕໍ່ສູ້ກັບຊາຕານແລະໂລກຊົ່ວທີ່ມັນປົກຄອງ. (ຄຳເພງ 18:39; 1 ໂກລິນໂທ 10:13) ນອກຈາກນັ້ນ ເຮົາຍັງຮູ້ສຶກຂອບໃຈສຳລັບການຊ່ວຍເຫຼືອທີ່ເຮົາໄດ້ຮັບຈາກຄຳພີໄບເບິນ. ໃຫ້ຄິດເຊັ່ນກັນວ່າໃນແຕ່ລະເດືອນເຮົາຮຽນຮູ້ຫຼາຍຢ່າງແທ້ໆຈາກສັບພະໜັງສືຂອງອົງການ. ມີການເວົ້າຖ້ອຍຄຳໃນຊາກາລີ 8:9, 13 (ອ່ານ) ຕອນທີ່ກຳລັງສ້າງວິຫານໃນເມືອງເຢຣຶຊາເລມ ແຕ່ຖ້ອຍຄຳເຫຼົ່ານີ້ກໍສາມາດຊ່ວຍເຮົາໄດ້ໃນທຸກມື້ນີ້.
ເປັນສິ່ງສຳຄັນຫຼາຍທີ່ເຮົາຈະຂໍພະລັງບໍລິສຸດຈາກພະເຈົ້າເພື່ອເຮົາຈະສາມາດຕໍ່ສູ້ກັບຊາຕານແລະໂລກຊົ່ວທີ່ມັນປົກຄອງ
11 ພະເຢໂຫວາຍັງເສີມກຳລັງເຮົາໂດຍທາງຄຳແນະນຳທີ່ເຮົາໄດ້ຮັບຢູ່ການປະຊຸມປະຈຳປະຊາຄົມ ການປະຊຸມໝວດ ແລະການປະຊຸມພາກ ລວມເຖິງຄຳແນະນຳໃນໂຮງຮຽນຕາມລະບອບຂອງພະເຈົ້າ. ຄຳແນະນຳນັ້ນຊ່ວຍເຮົາໃຫ້ຮັບໃຊ້ພະເຢໂຫວາດ້ວຍແຮງກະຕຸ້ນທີ່ຖືກຕ້ອງ ໃຫ້ຕັ້ງເປົ້າໝາຍຕ່າງໆ ແລະເພື່ອເບິ່ງແຍງໜ້າທີ່ຮັບຜິດຊອບຫຼາຍຢ່າງຂອງເຮົາໃນຖານະເປັນຄລິດສະຕຽນ. (ຄຳເພງ 119:32) ເຈົ້າຢາກໄດ້ຮັບກຳລັງຈາກຄຳແນະນຳຂອງພະເຢໂຫວາບໍ?
12. ເຮົາຕ້ອງເຮັດຫຍັງເພື່ອຈະເຂັ້ມແຂງຢູ່ສະເໝີ?
12 ພະເຢໂຫວາຊ່ວຍປະຊາຊົນຂອງພະອົງໃຫ້ເອົາຊະນະພວກອາມາເລກແລະພວກເອທິໂອເປຍ ແລະພະອົງກໍໃຫ້ກຳລັງແກ່ເນເຫມີແລະຊາວຢິວເພື່ອສ້າງກຳແພງເມືອງໃຫ້ສຳເລັດ. ຄ້າຍຄືກັນ ພະອົງກໍຈະໃຫ້ກຳລັງແກ່ເຮົາເພື່ອເຮັດວຽກປະກາດຕໍ່ໆໄປເຖິງວ່າເຮົາມີຄວາມກັງວົນ ຖືກຕໍ່ຕ້ານ ແລະຜູ້ຄົນບໍ່ສົນໃຈໃນຂ່າວສານຂອງເຮົາກໍຕາມ. (1 ເປໂຕ 5:10) ພະເຢໂຫວາຈະບໍ່ເຮັດໃຫ້ບັນຫາຕ່າງໆຂອງເຮົາຫາຍໄປຢ່າງອັດສະຈັນ. ແທນທີ່ຈະເປັນແບບນັ້ນ ເຮົາຕ້ອງເຮັດໃນສ່ວນຂອງເຮົາ. ໂດຍວິທີໃດ? ເຮົາຕ້ອງອ່ານຄຳພີໄບເບິນທຸກໆມື້ ກຽມສຳລັບການປະຊຸມແລະໄປປະຊຸມທຸກໆອາທິດ ສຶກສາສ່ວນຕົວແລະເຮັດການນະມັດສະການປະຈຳຄອບຄົວຕໍ່ໆໄປ ແລະໝາຍເພິ່ງພະເຢໂຫວາໂດຍການອະທິດຖານ. ຢ່າປ່ອຍໃຫ້ສິ່ງໃດໆກໍຕາມມາຂັດຂວາງເຮົາໄວ້ຈາກການໄດ້ຮັບສິ່ງທີ່ພະເຢໂຫວາຈັດຕຽມໄວ້ເພື່ອເສີມກຳລັງແລະໃຫ້ກຳລັງໃຈເຮົາ. ຖ້າເຮົາຮູ້ສຶກວ່າມືຂອງເຮົາອ່ອນແຮງລົງໃນຂອບເຂດເຫຼົ່ານີ້ ໃຫ້ເຮົາຂໍຄວາມຊ່ວຍເຫຼືອຈາກພະເຢໂຫວາ. ຈາກນັ້ນກໍໃຫ້ເບິ່ງວິທີທີ່ພະລັງຂອງພະອົງ ‘ກະຕຸ້ນພວກເຮົາໃຫ້ມີທັງຄວາມຕ້ອງການແລະກຳລັງເພື່ອຈະເຮັດສິ່ງທີ່ພະອົງພໍໃຈ.’ (ຟີລິບ 2:13, ລ.ມ) ແຕ່ເຈົ້າສາມາດເສີມກຳລັງຄົນອື່ນໄດ້ບໍ?
ເສີມກຳລັງມືທີ່ອ່ອນແຮງລົງ
13, 14. (ກ) ຫຼັງຈາກທີ່ເມຍຂອງພີ່ນ້ອງຊາຍຄົນໜຶ່ງຕາຍ ລາວໄດ້ຮັບການເສີມກຳລັງແນວໃດ? (ຂ) ເຮົາຈະເສີມກຳລັງຄົນອື່ນແນວໃດ?
13 ພະເຢໂຫວາໃຫ້ເຮົາມີສັງຄົມພີ່ນ້ອງຢູ່ທົ່ວໂລກທີ່ປະກອບດ້ວຍຊາຍຍິງທີ່ມີຄວາມຫ່ວງໃຍເຊິ່ງສາມາດໃຫ້ກຳລັງໃຈເຮົາໄດ້. ອັກຄະສາວົກໂປໂລເວົ້າວ່າ: “ມືທີ່ຫ້ອຍຢູ່ [ມືທີ່ອ່ອນແຮງລົງ] ນັ້ນ ແລະຫົວເຂົ່າທີ່ອ່ອນແຮງ ຈົ່ງຍົກໃຫ້ແຂງຂຶ້ນ ແລະທາງເດີນຈົ່ງກະທຳໃຫ້ຊື່ໄປ.” (ເຫບເລີ 12:12, 13) ພີ່ນ້ອງຄລິດສະຕຽນຫຼາຍຄົນໃນສະຕະວັດທຳອິດໄດ້ຮັບຄວາມຊ່ວຍເຫຼືອແບບນີ້ຈາກພີ່ນ້ອງຊາຍຍິງຂອງເຂົາເຈົ້າ ແລະໃນທຸກມື້ນີ້ກໍຄ້າຍຄືກັນ. ຂໍໃຫ້ພິຈາລະນາຕົວຢ່າງໜຶ່ງ. ຫຼັງຈາກທີ່ເມຍຂອງພີ່ນ້ອງຊາຍຄົນໜຶ່ງຕາຍແລະລາວຕ້ອງອົດທົນກັບສະພາບການອື່ນໆອີກທີ່ເຮັດໃຫ້ເຈັບປວດໃຈ ພີ່ນ້ອງຄົນນີ້ເວົ້າວ່າ: “ຂ້ອຍຮຽນຮູ້ວ່າເຮົາບໍ່ສາມາດເລືອກໄດ້ວ່າຈະໃຫ້ການທົດລອງແບບໃດເກີດຂຶ້ນກັບເຮົາ ທັງເລືອກບໍ່ໄດ້ວ່າຈະໃຫ້ມັນເກີດຂຶ້ນໃນເວລາໃດແລະເລື້ອຍປານໃດ. ແຕ່ການອະທິດຖານແລະການສຶກສາສ່ວນຕົວເປັນຄືກັບເສື້ອຊູຊີບທີ່ຊ່ວຍໃຫ້ຫົວຂອງຂ້ອຍບໍ່ຈົມນໍ້າ. ນອກຈາກນັ້ນ ການຊ່ວຍເຫຼືອຈາກພີ່ນ້ອງຮ່ວມຄວາມເຊື່ອກໍຊ່ວຍປອບໃຈຂ້ອຍໄດ້ຫຼາຍ. ຂ້ອຍສຳນຶກວ່າເປັນເລື່ອງສຳຄັນທີ່ຈະປູກຝັງສາຍສຳພັນທີ່ດີກັບພະເຢໂຫວາແບບເປັນສ່ວນຕົວ ກ່ອນທີ່ສະພາບການຫຍຸ້ງຍາກຕ່າງໆຈະເກີດຂຶ້ນ.”
ແຕ່ລະຄົນໃນປະຊາຄົມສາມາດເສີມກຳລັງໃຈຄົນອື່ນ (ເບິ່ງຂໍ້ 14)
14 ອາໂລນແລະຫູລໄດ້ເສີມກຳລັງມືຂອງໂມເຊໂດຍທີ່ຊ່ວຍຈັບແຂນທັງສອງຂ້າງຂອງລາວໄວ້ໃນລະຫວ່າງການສູ້ຮົບກັບພວກອາມາເລກ. ໃນທຸກມື້ນີ້ ເຮົາກໍເຊັ່ນກັນສາມາດຊອກວິທີການຕ່າງໆເພື່ອສະໜັບສະໜູນແລະຊ່ວຍເຫຼືອຄົນອື່ນ. ພີ່ນ້ອງຮ່ວມຄວາມເຊື່ອບາງຄົນປະສົບກັບຄວາມຍາກລຳບາກຍ້ອນຄວາມເຖົ້າແກ່ ບັນຫາສຸຂະພາບ ການຂົ່ມເຫງຈາກຄົນໃນຄອບຄົວ ຄວາມເຫງົາ ຫຼືການສູນເສຍຄົນທີ່ເຂົາເຈົ້າຮັກ. ນອກຈາກນັ້ນ ເຮົາຍັງສາມາດເສີມກຳລັງຄົນໃນໄວໜຸ່ມທີ່ຖືກກົດດັນເລື້ອຍໆໃຫ້ເຮັດສິ່ງທີ່ຜິດຫຼືໃຫ້ປະສົບຜົນສຳເລັດໃນໂລກນີ້. (1 ເທຊະໂລນີກ 3:1-3; 5:11, 14) ໃຫ້ເຮົາຊອກໂອກາດຕ່າງໆທີ່ຈະສະແດງຄວາມສົນໃຈຢ່າງແທ້ຈິງຕໍ່ຄົນອື່ນໆເມື່ອຢູ່ຫໍປະຊຸມ ເຂດປະກາດ ໃນລະຫວ່າງກິນເຂົ້ານຳກັນ ແລະເມື່ອລົມໂທລະສັບ.
15. ຄຳເວົ້າໃນແງ່ບວກມີຜົນກະທົບແນວໃດຕໍ່ພີ່ນ້ອງຊາຍຍິງ?
15 ພາຍຫຼັງໄຊຊະນະທີ່ໜ້າປະທັບໃຈຂອງອາຊາຕໍ່ກັບກອງທະຫານໃຫຍ່ຂອງພວກເອທິໂອເປຍ ຜູ້ພະຍາກອນອາຊາເຣຍໄດ້ກະຕຸ້ນໃຈອາຊາແລະປະຊາຊົນວ່າ: “ເຫດສັນນີ້ທ່ານທັງຫຼາຍຈົ່ງຊູແຮງຕົວຂຶ້ນ ຢ່າໃຫ້ມືຂອງທ່ານຢູ່ເປົ່າໆ [“ຢ່າທໍ້ໃຈ, ລ.ມ.”] ເຫດວ່າມີບຳເໜັດແກ່ການທີ່ທ່ານທັງຫຼາຍຈະເຮັດນັ້ນ.” (2 ຂ່າວຄາວ 15:7) ຄຳເວົ້ານີ້ກະຕຸ້ນອາຊາໃຫ້ເຮັດການປ່ຽນແປງຫຼາຍຢ່າງເພື່ອຟື້ນຟູການນະມັດສະການແທ້. ຄ້າຍຄືກັນ ຄຳເວົ້າຂອງເຈົ້າໃນແງ່ບວກກໍສາມາດໃຫ້ກຳລັງໃຈຄົນອື່ນແລະຊ່ວຍເຂົາເຈົ້າໃຫ້ຮັບໃຊ້ພະເຢໂຫວາຕໍ່ໆໄປ. (ສຸພາສິດ 15:23) ເຈົ້າຄວນຈື່ໄວ້ສະເໝີວ່າພີ່ນ້ອງໄດ້ຮັບກຳລັງໃຈຫຼາຍແທ້ໆເມື່ອເຈົ້າອອກຄວາມຄິດເຫັນທີ່ກະຕຸ້ນໃຈຢູ່ການປະຊຸມຕ່າງໆ.
ເນເຫມີບໍ່ໄດ້ຢືນເບິ່ງ ແຕ່ລາວໄດ້ຊ່ວຍສ້າງກຳແພງ
16. ຜູ້ເຖົ້າແກ່ຈະຮຽນແບບເນເຫມີໄດ້ແນວໃດ? ພີ່ນ້ອງຊາຍຍິງໄດ້ຊ່ວຍເຫຼືອເຈົ້າເປັນສ່ວນຕົວແນວໃດ?
16 ດ້ວຍຄວາມຊ່ວຍເຫຼືອຈາກພະເຢໂຫວາ ເນເຫມີແລະຊາວຢິວຈຶ່ງເສີມກຳລັງມືຂອງເຂົາເຈົ້າ ແລະໄດ້ສ້າງກຳແພງເມືອງເຢຣຶຊາເລມສຳເລັດພາຍໃນ 52 ມື້ເທົ່ານັ້ນ! (ເນເຫມີ 2:18; 6:15, 16) ເມື່ອປະຊາຊົນສ້າງກຳແພງ ເນເຫມີບໍ່ໄດ້ຢືນເບິ່ງ ແຕ່ລາວໄດ້ຊ່ວຍໃນວຽກນັ້ນ. (ເນເຫມີ 5:16) ຄ້າຍຄືກັນ ຜູ້ເຖົ້າແກ່ຫຼາຍຄົນຮຽນແບບເນເຫມີເມື່ອເຂົາເຈົ້າຊ່ວຍໃນໂຄງການກໍ່ສ້າງ ບຳລຸງຮັກສາ ຫຼືອະນາໄມຫໍປະຊຸມ. ນອກຈາກນັ້ນ ພີ່ນ້ອງຊາຍເຫຼົ່ານີ້ທີ່ມີຄວາມຮັກຍັງໄດ້ເສີມກຳລັງໃຈພີ່ນ້ອງຊາຍຍິງທີ່ຮູ້ສຶກກັງວົນໃຈ ໂດຍການໄປຢາມແລະໄປປະກາດກັບເຂົາເຈົ້າ.—ອ່ານເອຊາອີ 35:3, 4
‘ຢ່າໃຫ້ມືຂອງເຈົ້າອ່ອນແຮງລົງ’
17, 18. ເມື່ອເຮົາມີບັນຫາຫຼືຮູ້ສຶກກັງວົນ ເຮົາສາມາດໝັ້ນໃຈໃນເລື່ອງໃດ?
17 ເມື່ອເຮົາເຮັດວຽກຮ່ວມກັບພີ່ນ້ອງຮ່ວມຄວາມເຊື່ອ ສິ່ງນີ້ຈະເສີມສ້າງຄວາມເປັນອັນໜຶ່ງອັນດຽວກັນຂອງເຮົາ. ນອກຈາກນັ້ນກໍຍັງຊ່ວຍເຮົາໃຫ້ເສີມສ້າງມິດຕະພາບທີ່ຖາວອນແລະເສີມຄວາມເຊື່ອໝັ້ນຂອງເຮົາໃນສິ່ງດີຕ່າງໆທີ່ຈະເກີດຂຶ້ນໃນອີກບໍ່ດົນນີ້ໂດຍທາງລາຊະອານາຈັກຂອງພະເຈົ້າ. ເມື່ອເຮົາເສີມກຳລັງຄົນອື່ນ ເຮົາກໍຊ່ວຍເຂົາເຈົ້າໃຫ້ອົດທົນກັບສະພາບການຕ່າງໆທີ່ຫຍຸ້ງຍາກແລະໃຫ້ຮັກສາຄວາມຫວັງໃນແງ່ບວກສຳລັບອະນາຄົດ. ນອກຈາກນັ້ນ ເມື່ອເຮົາຊ່ວຍຄົນອື່ນ ສິ່ງນັ້ນກໍເສີມກຳລັງເຮົາແລະຊ່ວຍເຮົາໃຫ້ຈົດຈໍ່ຢູ່ທີ່ອະນາຄົດ.
18 ເມື່ອເຮົາຄິດເຖິງວິທີທີ່ພະເຢໂຫວາຊ່ວຍແລະປົກປ້ອງຜູ້ຮັບໃຊ້ຂອງພະອົງໃນອະດີດ ຄວາມເຊື່ອແລະຄວາມໄວ້ວາງໃຈທີ່ເຮົາມີຕໍ່ພະອົງກໍຈະເຂັ້ມແຂງຂຶ້ນ. ດັ່ງນັ້ນ ເມື່ອເຈົ້າມີບັນຫາແລະຮູ້ສຶກກັງວົນ ‘ຢ່າໃຫ້ມືຂອງເຈົ້າອ່ອນແຮງລົງ’! ເຈົ້າໝັ້ນໃຈໄດ້ເລີຍວ່າຖ້າເຈົ້າອະທິດຖານຂໍຄວາມຊ່ວຍເຫຼືອຈາກພະເຢໂຫວາ ມືທີ່ມີລິດເດດຂອງພະອົງກໍຈະເຮັດໃຫ້ເຈົ້າເຂັ້ມແຂງຂຶ້ນແລະນຳເຈົ້າໄປເຖິງພະພອນຕ່າງໆທີ່ລາຊະອານາຈັກຈະເຮັດໃຫ້ເກີດຂຶ້ນໃນອະນາຄົດ.—ຄຳເພງ 73:23, 24
