ສູ້ຕໍ່ໄປເພື່ອຈະໄດ້ຮັບການອວຍພອນຈາກພະເຢໂຫວາ
‘ເຈົ້າໄດ້ເລວຕໍ່ສູ້ພະເຈົ້າແລະຕໍ່ສູ້ມະນຸດ ແລະໄດ້ໄຊຊະນະ.’—ຕົ້ນເດີມ 32:28
ເພງ: 60, 38
1, 2. ຜູ້ຮັບໃຊ້ຂອງພະເຢໂຫວາຕ້ອງຕໍ່ສູ້ກັບອັນໃດ?
ນັບຈາກອາເບນຜູ້ຊອບທຳຈົນມາເຖິງສະໄໝຂອງເຮົາ ຜູ້ຮັບໃຊ້ທີ່ສັດຊື່ທຸກຄົນຂອງພະເຢໂຫວາຕ້ອງຕໍ່ສູ້. ອັກຄະສາວົກໂປໂລບອກຄລິດສະຕຽນຊາວເຫບເລີວ່າ ເຂົາເຈົ້າ ‘ໄດ້ອົດທົນການຍາກລຳບາກຢ່າງໜັກ’ ໃນຂະນະທີ່ເຂົາເຈົ້າພະຍາຍາມໄດ້ຮັບຄວາມພໍໃຈແລະການອວຍພອນຈາກພະເຢໂຫວາ. (ເຫບເລີ 10:32-34) ໂປໂລສົມທຽບການຕໍ່ສູ້ຂອງຄລິດສະຕຽນກັບນັກກິລາທີ່ແຂ່ງຂັນກັນໃນກິລາຂອງປະເທດເກັຣກ ເຊັ່ນ: ການແລ່ນ ມວຍປໍ້າ ແລະຕີມວຍ. (ເຫບເລີ 12:1, 4) ໃນທຸກມື້ນີ້ ເຮົາຢູ່ໃນການແລ່ນແຂ່ງເພື່ອຈະໄດ້ຮັບຊີວິດ ແຕ່ເຮົາມີສັດຕູທີ່ຢາກຂັດຂວາງເຮົາແລະເຮັດໃຫ້ເຮົາສູນເສຍຄວາມຍິນດີໃນຕອນນີ້ແລະການໄດ້ຮັບລາງວັນໃນອະນາຄົດ.
2 ການຕໍ່ສູ້ທີ່ຍາກທີ່ສຸດສຳລັບເຮົາແມ່ນການຕໍ່ສູ້ກັບຊາຕານແລະໂລກທີ່ມັນປົກຄອງ. (ເອເຟດ 6:12) ເປັນເລື່ອງສຳຄັນຫຼາຍທີ່ເຮົາຈະຕ້ານທານຜົນກະທົບຈາກຄຳສອນ ຫຼັກປັດຊະຍາ ແລະການປະພຶດທີ່ບໍ່ດີຂອງໂລກນີ້ ເຊັ່ນ: ການເຮັດຜິດສິນລະທຳທາງເພດ ການສູບຢາ ການດື່ມເຫຼົ້າ ແລະການໃຊ້ຢາເສບຕິດ. ນອກຈາກນັ້ນ ເຮົາຍັງຕ້ອງຕໍ່ສູ້ກັບຄວາມທໍ້ໃຈແລະຂໍ້ອ່ອນແອຂອງຕົວເຮົາເອງ.—2 ໂກລິນໂທ 10:3-6; ໂກໂລດ 3:5-9
3. ພະເຢໂຫວາຝຶກສອນເຮົາໂດຍທາງໃດເພື່ອຕໍ່ສູ້ກັບສັດຕູຂອງເຮົາ?
1 ໂກລິນໂທ 9:26) ຄືກັບທີ່ນັກມວຍຄົນໜຶ່ງຊົກຄູ່ຕໍ່ສູ້ຂອງຕົນ ເຮົາກໍຕ້ອງຊົກສັດຕູຂອງເຮົາ. ພະເຢໂຫວາຊ່ວຍແລະຝຶກສອນເຮົາໃຫ້ເຮັດເຊັ່ນນັ້ນໂດຍທາງຄຳພີໄບເບິນ. ນອກຈາກນັ້ນ ພະອົງຍັງຊ່ວຍເຮົາໂດຍທາງສັບພະໜັງສືຕ່າງໆທີ່ອາໄສຄຳພີໄບເບິນເປັນຫຼັກ ການປະຊຸມປະຈຳປະຊາຄົມ ການປະຊຸມໝວດ ແລະການປະຊຸມພາກ. ເຈົ້າໃຊ້ຄຳແນະນຳທຸກຢ່າງທີ່ເຈົ້າກຳລັງໄດ້ຮັບບໍ? ຖ້າຍັງ ເຈົ້າອາດບໍ່ໄດ້ຕໍ່ສູ້ກັບສັດຕູຂອງເຈົ້າຢ່າງເຕັມທີ ແລະນັ້ນເປັນຄືກັບນັກມວຍທີ່ຊົກລົມ.
3 ເປັນໄປໄດ້ແທ້ໆບໍທີ່ເຮົາຈະເອົາຊະນະການຕໍ່ສູ້ກັບສັດຕູທີ່ມີລິດເດດເຊັ່ນນັ້ນ? ເປັນໄປໄດ້ ແຕ່ມັນຈະຍາກ! ໂປໂລສົມທຽບຕົວເອງວ່າເປັນຄືກັບນັກມວຍ ເມື່ອລາວເວົ້າວ່າ: “ເຮົາຊົກມວຍບໍ່ໃຊ່ເໝືອນຄົນທີ່ຊົກລົມ.” (4. ເຮົາຈະເຮັດແນວໃດເພື່ອບໍ່ໃຫ້ຊາຕານຊະນະເຮົາ?
4 ເຮົາຕ້ອງຕື່ນຕົວທຸກເວລາ. ຍ້ອນຫຍັງ? ກໍຍ້ອນວ່າສັດຕູຂອງເຮົາອາດໂຈມຕີໃນເວລາທີ່ເຮົາບໍ່ຄາດຄິດຫຼືໃນເວລາທີ່ເຮົາອ່ອນແອ. ຄຳພີໄບເບິນໃຫ້ທັງຄຳເຕືອນແລະການກະຕຸ້ນໃຈເມື່ອກ່າວວ່າ: “ຢ່າໃຫ້ຄວາມຊົ່ວແພ້ [ຊະນະ] ຕົວ ແຕ່ວ່າຈົ່ງແພ້ [ຊະນະ] ຄວາມຊົ່ວດ້ວຍຄວາມດີ.” (ໂລມ 12:21) ຖ້າເຮົາຕໍ່ສູ້ພະຍາມານຕໍ່ໆໄປ ເຮົາກໍສາມາດເອົາຊະນະມັນໄດ້! ແຕ່ຖ້າເຮົາບໍ່ລະວັງຕົວແລະເຊົາຕໍ່ສູ້ ຈາກນັ້ນຊາຕານ ໂລກທີ່ມັນປົກຄອງ ແລະຂໍ້ອ່ອນແອຂອງເຮົາກໍຈະມີອຳນາດເໜືອເຮົາ. ດັ່ງນັ້ນ ຢ່າຍອມແພ້ ຢ່າທໍ້ໃຈ ແລະຢ່າປ່ອຍໃຫ້ມືຂອງເຈົ້າອ່ອນແຮງລົງ!—1 ເປໂຕ 5:9
5. (ກ) ເພື່ອຈະໄດ້ຮັບຄວາມພໍໃຈແລະການອວຍພອນຈາກພະເຢໂຫວາ ເຮົາຕ້ອງຈື່ຫຍັງໄວ້? (ຂ) ເຮົາຈະພິຈາລະນາເລື່ອງຂອງໃຜທີ່ຢູ່ໃນຄຳພີໄບເບິນ?
5 ເພື່ອຈະຊະນະຊາຕານ ເຮົາຕ້ອງຈື່ໄວ້ວ່າເປັນຫຍັງເຮົາຈຶ່ງຕໍ່ສູ້. ເຮົາຕໍ່ສູ້ກໍຍ້ອນວ່າເຮົາຢາກໄດ້ຮັບຄວາມພໍໃຈແລະການອວຍພອນຈາກພະເຢໂຫວາ. ເຫບເລີ 11:6 ກ່າວວ່າ: “ຜູ້ທີ່ຫຍັບເຂົ້າມາຫາພະເຈົ້າຕ້ອງເຊື່ອວ່າພະອົງເປັນຢູ່ ແລະພະອົງຈະປະທານບຳເໜັດໃຫ້ແກ່ຄົນທັງຫຼາຍທີ່ປົງໃຈຊອກຫາພະອົງ.” ການຊອກຫາພະເຢໂຫວາຢ່າງຈິງຈັງໝາຍຄວາມວ່າເຮົາຕ້ອງອອກຄວາມພະຍາຍາມຢ່າງໜັກຖ້າເຮົາຢາກໄດ້ການຍອມຮັບຈາກພະອົງ. (ກິດຈະການ 15:17) ຄຳພີໄບເບິນມີຕົວຢ່າງທີ່ດີຂອງຊາຍຍິງຫຼາຍຄົນທີ່ໄດ້ເຮັດແບບນັ້ນ. ຢາໂຄບ ລາເຊນ ໂຢເຊບ ແລະໂປໂລລ້ວນແຕ່ປະສົບກັບສະພາບການຕ່າງໆທີ່ຍາກສຳລັບເຂົາເຈົ້າໃນດ້ານອາລົມຄວາມຮູ້ສຶກແລະດ້ານຮ່າງກາຍ. ແຕ່ເຂົາເຈົ້າກໍສາມາດປະສົບຜົນສຳເລັດໄດ້. ຕົວຢ່າງຂອງເຂົາເຈົ້າພິສູດໃຫ້ເຫັນວ່າຖ້າເຮົາພະຍາຍາມຢ່າງໜັກ ເຮົາເອງກໍຈະໄດ້ຮັບການອວຍພອນຈາກພະເຢໂຫວາ. ໃຫ້ເຮົາມາເບິ່ງວ່າເປັນເຊັ່ນນັ້ນໄດ້ແນວໃດ.
ຖ້າເຈົ້າບໍ່ຍອມແພ້ ເຈົ້າຈະໄດ້ຮັບການອວຍພອນ
6. ສິ່ງໃດທີ່ຊ່ວຍຢາໂຄບບໍ່ໃຫ້ຍອມແພ້ ແລະລາວໄດ້ຮັບລາງວັນຫຍັງ? (ເບິ່ງຮູບທຳອິດ)
6 ຢາໂຄບຊາຍຜູ້ສັດຊື່ໄດ້ຕໍ່ສູ້ແລະອົດທົນກໍຍ້ອນວ່າລາວຮັກພະເຢໂຫວາແລະຖືວ່າສາຍສຳພັນຂອງລາວກັບພະອົງມີຄ່າ. ລາວເຊື່ອຢ່າງເຕັມທີໃນຄຳສັນຍາຂອງພະເຢໂຫວາທີ່ຈະອວຍພອນໃຫ້ລູກຫຼານຂອງລາວ. (ຕົ້ນເດີມ 28:3, 4) ເມື່ອຢາໂຄບອາຍຸເກືອບຮອດ 100 ປີ ລາວໄດ້ປໍ້າສູ້ກັບທູດສະຫວັນອົງໜຶ່ງເພື່ອຈະໄດ້ຮັບການອວຍພອນຈາກພະເຢໂຫວາ. (ອ່ານຕົ້ນເດີມ 32:24-28) ຢາໂຄບມີກຳລັງແທ້ໆບໍທີ່ຈະຕໍ່ສູ້ກັບທູດສະຫວັນອົງນີ້ທີ່ມີລິດເດດ? ລາວບໍ່ມີກຳລັງປານນັ້ນ! ແຕ່ລາວມີຄວາມຕັ້ງໃຈແນ່ວແນ່ ແລະລາວສະແດງໃຫ້ເຫັນວ່າລາວຈະອອກຄວາມພະຍາຍາມຢ່າງໜັກເພື່ອໃຫ້ໄດ້ຮັບການອວຍພອນ. ພະເຢໂຫວາອວຍພອນໃຫ້ຢາໂຄບທີ່ບໍ່ຍອມແພ້ ແລະຕັ້ງຊື່ໃຫ້ລາວວ່າອິດສະລາແອນ ເຊິ່ງໝາຍຄວາມວ່າ “ຜູ້ທີ່ຕໍ່ສູ້ກັບພະເຈົ້າ ຜູ້ທີ່ບໍ່ຍອມແພ້ພະເຈົ້າ.” ຢາໂຄບໄດ້ຮັບລາງວັນທີ່ເຮົາເອງກໍກຳລັງຊອກຫາ ເຊັ່ນກັນ ນັ້ນຄືໄດ້ຮັບການຍອມຮັບຈາກພະເຢໂຫວາແລະການອວຍພອນຈາກພະອົງ.
7. (ກ) ລາເຊນຕົກຢູ່ໃນສະພາບການອັນໃດທີ່ເປັນຕາໜ້າທໍ້ໃຈ? (ຂ) ລາເຊນໄດ້ເຮັດຫຍັງ ແລະລາວໄດ້ຮັບການອວຍພອນແນວໃດ?
7 ລາເຊນເມຍສຸດທີ່ຮັກຂອງຢາໂຄບກໍຢາກເຫັນວ່າພະເຢໂຫວາຈະເຮັດໃຫ້ຄຳສັນຍາທີ່ໃຫ້ກັບຜົວຂອງລາວສຳເລັດເປັນຈິງແນວໃດ. ແຕ່ບັນຫາຢ່າງໜຶ່ງກໍຄື ລາເຊນບໍ່ສາມາດມີລູກໄດ້. ໃນສະໄໝທີ່ຂຽນຄຳພີໄບເບິນ ເລື່ອງນີ້ເຮັດໃຫ້ຜູ້ຍິງຮູ້ສຶກເຈັບປວດຫຼາຍ. ລາເຊນສູ້ຕໍ່ໄປໄດ້ແນວໃດເຖິງວ່າສະພາບການຂອງລາວຈະເປັນຕາໜ້າທໍ້ໃຈ? ລາວບໍ່ເຄີຍສູນເສຍຄວາມຫວັງ. ແທນທີ່ຈະເປັນແບບນັ້ນ ລາວສູ້ຕໍ່ໄປໂດຍອະທິດຖານເຖິງພະເຢໂຫວາໃຫ້ຫຼາຍຂຶ້ນ. ພະເຢໂຫວາໄດ້ຍິນຄຳອະທິດຖານທີ່ຈິງໃຈຂອງລາເຊນ ແລະລາເຊນຮູ້ສຶກວ່າໄດ້ຮັບການອວຍພອນຈາກພະອົງເມື່ອໃນທີ່ສຸດລາວກໍມີລູກ. ດ້ວຍເຫດນັ້ນ ລາວຈຶ່ງເວົ້າວ່າ: “ດ້ວຍການຕໍ່ສູ້ອັນແສນລຳບາກ ແຕ່ຂ້ອຍໄດ້ຊະນະແລ້ວ, ທ.ປ.”—ຕົ້ນເດີມ 30:8, 20-24
8. ໂຢເຊບປະສົບກັບຄວາມຫຍຸ້ງຍາກອັນໃດ ແລະລາວເປັນຕົວຢ່າງທີ່ດີແນວໃດສຳລັບເຮົາ?
8 ຕົວຢ່າງເລື່ອງຄວາມສັດຊື່ຂອງຢາໂຄບແລະລາເຊນອາດມີຜົນກະທົບຕໍ່ໂຢໂຊບລູກຊາຍຂອງເຂົາເຈົ້າ ແລະສິ່ງນີ້ໄດ້ຊ່ວຍໂຢເຊບເມື່ອພົບຄວາມຫຍຸ້ງຍາກໃນຊີວິດ. ຕອນອາຍຸ 17 ປີ ຊີວິດຂອງໂຢເຊບໄດ້ປ່ຽນແປງຈາກໜ້າມືເປັນຫຼັງມື. ພວກອ້າຍທີ່ອິດສາໂຢເຊບໄດ້ຂາຍລາວໃຫ້ໄປເປັນຂ້າທາດ. ຕໍ່ມາ ລາວກໍຖືກຂັງຄຸກເປັນເວລາຫຼາຍປີຢູ່ປະເທດເອຢິບ ເຖິງວ່າລາວບໍ່ໄດ້ເຮັດຫຍັງຜິດກໍຕາມ. (ຕົ້ນເດີມ 37:23-28; 39:7-9, 20, 21) ແຕ່ໂຢເຊບບໍ່ໄດ້ຮູ້ສຶກທໍ້ໃຈຫຼືຂົມຂື່ນ ແລະລາວກໍບໍ່ໄດ້ພະຍາຍາມຫາທາງແກ້ແຄ້ນ. ຍ້ອນຫຍັງ? ກໍຍ້ອນໂຢເຊບຖືວ່າສາຍສຳພັນຂອງລາວກັບພະເຢໂຫວາມີຄ່າ ແລະລາວໄດ້ສຸມໃຈໃສ່ໃນເລື່ອງນີ້. (ພວກເລວີ 19:18; ໂລມ 12:17-21) ເຮົາສາມາດຮຽນແບບຕົວຢ່າງຂອງໂຢເຊບໄດ້. ເຖິງວ່າຕອນເປັນເດັກນ້ອຍເຮົາມີຊີວິດທີ່ຫຍຸ້ງຍາກ ຫຼືຖ້າໃນຕອນນີ້ຊີວິດຂອງເຮົາເບິ່ງຄືວ່າໝົດຄວາມຫວັງ ແຕ່ເຮົາຕ້ອງສູ້ຕໍ່ໄປແລະບໍ່ຍອມແພ້. ເມື່ອເຮັດແບບນັ້ນ ເຮົາກໍໝັ້ນໃຈໄດ້ເລີຍວ່າພະເຢໂຫວາຈະອວຍພອນເຮົາ.—ອ່ານຕົ້ນເດີມ 39:21-23
9. ເຮົາຈະຮຽນແບບຢາໂຄບ ລາເຊນ ແລະໂຢເຊບໄດ້ແນວໃດ?
9 ໃນທຸກມື້ນີ້ ເຮົາກໍເຊັ່ນກັນອາດຕ້ອງພົບກັບບັນຫາຕ່າງໆທີ່ຫຍຸ້ງຍາກ. ບາງທີເຈົ້າອາດອົດທົນກັບຄວາມບໍ່ຍຸຕິທຳ ອະຄະຕິ ການເຍາະເຍີ້ຍ ຫຼືຍ້ອນບາງຄົນອິດສາເຈົ້າ. ແທນທີ່ຈະຮູ້ສຶກທໍ້ໃຈ ຂໍໃຫ້ຈື່ສິ່ງທີ່ຊ່ວຍຢາໂຄບ ລາເຊນ ແລະໂຢເຊບໃຫ້ຮັບໃຊ້ພະເຢໂຫວາຕໍ່ໄປດ້ວຍຄວາມຍິນດີ. ພະອົງໄດ້ເສີມກຳລັງແລະອວຍພອນໃຫ້ທັງສາມຄົນ ເພາະເຂົາເຈົ້າຮູ້ຄຸນຄ່າຢ່າງແທ້ຈິງຕໍ່ສາຍສຳພັນທີ່ມີກັບພະອົງ. ເຂົາເຈົ້າສູ້ຕໍ່ໄປ ບໍ່ຍອມແພ້ ແລະເຮັດສອດຄ່ອງກັບຄຳອະທິດຖານຂອງຕົນເອງ. ເນື່ອງຈາກເຮົາກຳລັງມີຊີວິດຢູ່ໃນສະໄໝສຸດທ້າຍຈຶ່ງເປັນເລື່ອງສຳຄັນທີ່ເຮົາຈະຮັກສາຄວາມຫວັງສຳລັບອະນາຄົດໃຫ້ເຂັ້ມແຂງຢູ່ສະເໝີ. ເຈົ້າເຕັມໃຈທີ່ຈະຕໍ່ສູ້ບໍ ເຊິ່ງກໍໝາຍເຖິງການພະຍາຍາມຢ່າງໜັກເພື່ອໄດ້ຮັບຄວາມພໍໃຈຈາກພະເຢໂຫວາ?
ເຕັມໃຈຕໍ່ສູ້ເພື່ອຈະໄດ້ຮັບການອວຍພອນ
10, 11. (ກ) ເປັນຫຍັງເຮົາອາດຕ້ອງຕໍ່ສູ້ເພື່ອຈະໄດ້ຮັບການອວຍພອນຈາກພະເຈົ້າ? (ຂ) ສິ່ງໃດຈະຊ່ວຍເຮົາໃຫ້ເລືອກຢ່າງຖືກຕ້ອງ?
10 ເປັນຫຍັງເຮົາຕ້ອງຕໍ່ສູ້ເພື່ອຈະໄດ້ຮັບການອວຍພອນຈາກພະເຈົ້າ? ເຫດຜົນຢ່າງໜຶ່ງກໍຍ້ອນວ່າເຮົາເປັນມະນຸດທີ່ມີບາບ ເຮົາອາດຕ້ອງຕໍ່ສູ້ກັບຄວາມປາຖະໜາບາງຢ່າງທີ່ຜິດ. ບາງຄົນຕ້ອງຕໍ່ສູ້ເພື່ອຈະມີຄວາມຄິດໃນແງ່ບວກກ່ຽວກັບວຽກປະກາດ ແລະບາງຄົນຕ້ອງຕໍ່ສູ້ຍ້ອນມີບັນຫາສຸຂະພາບຫຼືຍ້ອນຮູ້ສຶກເຫງົາ. ນອກຈາກນັ້ນ ບາງຄົນຍັງຮູ້ສຶກວ່າເປັນເລື່ອງຍາກທີ່ຈະໃຫ້ອະໄພຜູ້ໃດຜູ້ໜຶ່ງທີ່ເຮັດໃຫ້ເຂົາເຈົ້າເສຍໃຈ. ບໍ່ວ່າເຮົາຈະຮັບໃຊ້ພະເຢໂຫວາໄດ້ດົນເທົ່າໃດແລ້ວກໍຕາມ ເຮົາທຸກຄົນຕ້ອງຕໍ່ສູ້ກັບສິ່ງຕ່າງໆທີ່ເປັນອຸປະສັກຂັດຂວາງເຮົາໃນການຮັບໃຊ້ພະເຢໂຫວາຜູ້ທີ່ໃຫ້ລາງວັນແກ່ຄົນທີ່ສັດຊື່.
11 ທີ່ຈິງແລ້ວບໍ່ງ່າຍເລີຍທີ່ຈະເປັນຄລິດສະຕຽນແລະທີ່ຈະເລືອກຢ່າງຖືກຕ້ອງ ໂດຍສະເພາະເມື່ອເຮົາກຳລັງຕໍ່ສູ້ກັບຄວາມປາຖະໜາທີ່ຜິດໆຂອງເຮົາເອງ. (ເຢເຣມີ 17:9) ຖ້າເຈົ້າຮູ້ສຶກແບບນັ້ນ ໃຫ້ອະທິດຖານເຖິງພະເຢໂຫວາແລະຂໍພະລັງບໍລິສຸດຈາກພະອົງ. ຄຳອະທິດຖານແລະພະລັງບໍລິສຸດສາມາດຊ່ວຍເຈົ້າໃຫ້ມີກຳລັງທີ່ຈະເຮັດໃນສິ່ງທີ່ຖືກຕ້ອງ ແລະຈາກນັ້ນເຈົ້າກໍຈະໄດ້ຮັບການອວຍພອນຈາກພະເຢໂຫວາ. ໃຫ້ຕັ້ງໃຈແນ່ວແນ່ທີ່ຈະໃຊ້ຊີວິດໃຫ້ສອດຄ່ອງກັບຄຳອະທິດຖານຂອງເຈົ້າ. ພະຍາຍາມອ່ານພະຄຳພີທຸກໆມື້ ແລະຈັດເວລາໄວ້ສຳລັບການສຶກສາສ່ວນຕົວແລະການນະມັດສະການປະຈຳຄອບຄົວ.—ອ່ານຄຳເພງ 119:32
12, 13. ຄລິດສະຕຽນສອງຄົນໄດ້ຮັບການຊ່ວຍເຫຼືອແນວໃດໃຫ້ຄວບຄຸມຄວາມປາຖະໜາທີ່ຜິດໆ?
12 ມີຫຼາຍຕົວຢ່າງທີ່ສະແດງໃຫ້ເຫັນວ່າຄຳພີໄບເບິນ ພະລັງບໍລິສຸດຈາກພະເຈົ້າ ແລະສັບພະໜັງສືຕ່າງໆຂອງອົງການໄດ້ຊ່ວຍພີ່ນ້ອງຊາຍຍິງໃຫ້ເອົາຊະນະຄວາມປາຖະໜາທີ່ຜິດໆໄດ້. ໄວຮຸ່ນຄົນໜຶ່ງໄດ້ອ່ານບົດຄວາມທີ່ຊື່ວ່າ: “ເຈົ້າຈະຕ້ານທານຄວາມປາຖະໜາຜິດໆໄດ້ແນວໃດ” ໃນວາລະສານຕື່ນເຖີດ! ສະບັບວັນທີ 8 ທັນວາ 2003. ລາວຮູ້ສຶກແນວໃດ? ລາວເວົ້າວ່າ: “ຂ້ອຍກຳລັງຕໍ່ສູ້ເພື່ອຄວບຄຸມຄວາມປາຖະໜາທີ່ບໍ່ຖືກຕ້ອງ. ເມື່ອຂ້ອຍອ່ານບົດຄວາມນັ້ນທີ່ບອກວ່າ: ‘ສຳລັບຫຼາຍຄົນ ເຂົາເຈົ້າຕ້ອງຕໍ່ສູ້ເພື່ອເອົາຊະນະກັບຄວາມປາຖະໜາທີ່ຜິດຫຼາຍກວ່າຕໍ່ສູ້ກັບເລື່ອງອື່ນ’ ນັ້ນເຮັດໃຫ້ຂ້ອຍຮູ້ສຶກວ່າຂ້ອຍເປັນສ່ວນໜຶ່ງຂອງສັງຄົມພີ່ນ້ອງ. ຂ້ອຍຮູ້ສຶກວ່າຂ້ອຍບໍ່ໄດ້ເປັນຄົນດຽວເທົ່ານັ້ນທີ່ກຳລັງຕໍ່ສູ້ກັບເລື່ອງແບບນີ້.” ໄວຮຸ່ນຄົນນີ້ຍັງໄດ້ຮັບປະໂຫຍດຈາກບົດຄວາມທີ່ຊື່ວ່າ: “ຮູບແບບຊີວິດອື່ນທີ່ເລືອກເອງ—ພະເຈົ້າເຫັນດີບໍ?” ໃນຕື່ນເຖີດ! ສະບັບວັນທີ 8 ຕຸລາ 2006. ລາວສັງເກດເຫັນວ່າບົດຄວາມນັ້ນເວົ້າວ່າ ສຳລັບບາງຄົນຕ້ອງຕໍ່ສູ້ກັບສິ່ງນີ້ເລື້ອຍໆເພາະມັນເປັນຄືກັບ ‘ສ້ຽນໜາມໃນເນື້ອໜັງ.’ (2 ໂກລິນໂທ 12:7) ແຕ່ໃນຂະນະ ທີ່ເຂົາເຈົ້າສູ້ຕໍ່ໄປເພື່ອຮັກສາການປະພຶດທີ່ສະອາດ ຄົນເຫຼົ່ານັ້ນກໍມີຄວາມຄິດໃນແງ່ບວກກ່ຽວກັບອະນາຄົດ. ລາວເວົ້າວ່າ: “ດ້ວຍເຫດຜົນນີ້ ຂ້ອຍຈຶ່ງຄິດວ່າໃນແຕ່ລະມື້ທີ່ຜ່ານໄປ ຂ້ອຍກໍສາມາດຮັກສາຄວາມສັດຊື່ໄວ້ໄດ້. ຂ້ອຍຂອບໃຈພະເຢໂຫວາແທ້ໆທີ່ໃຊ້ອົງການຂອງພະອົງເພື່ອຊ່ວຍເຮົາໃຫ້ລອດຊີວິດໃນແຕ່ລະມື້ໃນລະບົບທີ່ຊົ່ວຮ້າຍນີ້.”
13 ຂໍໃຫ້ພິຈາລະນາປະສົບການຂອງພີ່ນ້ອງຍິງຄົນໜຶ່ງທີ່ຢູ່ປະເທດອາເມຣິກາ. ລາວຂຽນວ່າ: “ຂ້ອຍຢາກຂອບໃຈພີ່ນ້ອງທີ່ລ້ຽງດູເຮົາສະເໝີໃນສິ່ງທີ່ເຮົາຕ້ອງການແທ້ໆແລະກໍຈັດໃຫ້ມີສິ່ງນັ້ນໃນເວລາທີ່ເໝາະສົມ. ຫຼາຍຄັ້ງຂ້ອຍຮູ້ສຶກວ່າບົດຄວາມເຫຼົ່ານັ້ນຂຽນສຳລັບຂ້ອຍ. ເປັນເວລາຫຼາຍປີແລ້ວທີ່ຂ້ອຍໄດ້ຕໍ່ສູ້ກັບຄວາມປາຖະໜາທີ່ຮຸນແຮງເຊິ່ງເປັນສິ່ງທີ່ພະເຢໂຫວາກຽດຊັງ. ບາງຄັ້ງ ຂ້ອຍຢາກຍອມແພ້ແລະເຊົາຕໍ່ສູ້. ຂ້ອຍຮູ້ວ່າພະເຢໂຫວາມີຄວາມເມດຕາແລະພ້ອມທີ່ຈະໃຫ້ອະໄພ ແຕ່ຍ້ອນວ່າຂ້ອຍມີຄວາມປາຖະໜາທີ່ຜິດນີ້ ແລະໃນສ່ວນເລິກໆແລ້ວຂ້ອຍບໍ່ໄດ້ກຽດຊັງມັນເລີຍ ຂ້ອຍຈຶ່ງຮູ້ສຶກວ່າຂ້ອຍບໍ່ສາມາດໄດ້ຮັບຄວາມຊ່ວຍເຫຼືອຈາກພະອົງ. ການຕໍ່ສູ້ນີ້ທີ່ຍັງດຳເນີນຢູ່ໄດ້ກະທົບໃສ່ທຸກແງ່ມຸມໃນຊີວິດຂອງຂ້ອຍ. . . . ຫຼັງຈາກທີ່ໄດ້ອ່ານບົດຄວາມ ‘ເຈົ້າມີ “ໃຈຢາກຮູ້ຈັກ” ພະເຢໂຫວາບໍ?’ ໃນວາລະສານຫໍສັງເກດການ ສະບັບວັນທີ 15 ມີນາ 2013 ຂ້ອຍຈຶ່ງຮູ້ສຶກແທ້ໆວ່າພະເຢໂຫວາຕ້ອງການຊ່ວຍຂ້ອຍ.”
14. (ກ) ໂປໂລຮູ້ສຶກແນວໃດກ່ຽວກັບການຕໍ່ສູ້ຂອງລາວ? (ຂ) ເຮົາຈະເອົາຊະນະການຕໍ່ສູ້ກັບຂໍ້ອ່ອນແອຂອງເຮົາໄດ້ແນວໃດ?
14 ອ່ານໂລມ 7:21-25. ໂປໂລຮູ້ດ້ວຍຕົວເອງວ່າເປັນເລື່ອງຍາກແທ້ໆທີ່ຈະຕໍ່ສູ້ກັບຄວາມປາຖະໜາທີ່ຜິດໆແລະຂໍ້ອ່ອນແອຂອງຕົວເອງ. ແຕ່ໂປໂລກໍໝັ້ນໃຈວ່າລາວຈະຊະນະການຕໍ່ສູ້ ຖ້າລາວອະທິດຖານເຖິງພະເຢໂຫວາ ໝາຍເພິ່ງພະອົງສຳລັບການຊ່ວຍເຫຼືອ ແລະສະແດງຄວາມເຊື່ອໃນຄ່າໄຖ່ຂອງພະເຍຊູ. ສຳລັບເຮົາເດ? ເຮົາຈະເອົາຊະນະການຕໍ່ສູ້ກັບຂໍ້ອ່ອນແອຂອງຕົວເອງໄດ້ບໍ? ເຮົາເຮັດໄດ້ ຖ້າເຮົາຮຽນແບບໂປໂລແລະໝາຍເພິ່ງພະເຢໂຫວາຢ່າງເຕັມທີ ບໍ່ອາໄສກຳລັງຂອງເຮົາເອງ ແລະມີຄວາມເຊື່ອໃນຄ່າໄຖ່.
15. ພະເຢໂຫວາສາມາດຊ່ວຍເຮົາໄດ້ແນວໃດໃຫ້ຮັກສາຄວາມສັດຊື່ແລະອົດທົນກັບບັນຫາຕ່າງໆ?
15 ບາງຄັ້ງພະເຢໂຫວາອາດປ່ອຍໃຫ້ເຮົາສະແດງໃຫ້ເຫັນວ່າເຮົາກັງວົນແທ້ໆຕໍ່ເລື່ອງໃດເລື່ອງໜຶ່ງ. ຕົວຢ່າງເຊັ່ນ: ຖ້າເຮົາຫຼືຄົນໃນຄອບຄົວປະສົບກັບຄວາມເຈັບປ່ວຍທີ່ຮ້າຍແຮງຫຼືຄວາມບໍ່ຍຸຕິທຳ ເຮົາຈະມີທ່າທີແນວໃດ? ຖ້າເຮົາໄວ້ວາງໃຈໃນພະເຢໂຫວາຢ່າງເຕັມທີ ເຮົາຈະຂໍກຳລັງທີ່ເຮົາຈຳເປັນຕ້ອງມີເພື່ອຈະຮັກສາຄວາມສັດຊື່ ຄວາມຍິນດີ ແລະສາຍສຳພັນທີ່ແໜ້ນແຟ້ນກັບພະອົງ. (ຟີລິບ 4:13) ຕົວຢ່າງຂອງຄລິດສະຕຽນຫຼາຍຄົນທັງທີ່ມີຊີວິດຢູ່ໃນອະດີດແລະໃນປັດຈຸບັນ ເຂົາເຈົ້າໄດ້ສະແດງໃຫ້ເຫັນວ່າການອະທິດຖານສາມາດເສີມກຳລັງເຮົາແລະເຮັດໃຫ້ເຮົາມີຄວາມກ້າເພື່ອຈະອົດທົນຕໍ່ໄປ.
ສູ້ຕໍ່ໄປເພື່ອໄດ້ຮັບການອວຍພອນຈາກພະເຢໂຫວາ
16, 17. ເຈົ້າຕັ້ງໃຈແນ່ວແນ່ທີ່ຈະເຮັດຫຍັງ?
16 ພະຍາມານຢາກເຫັນມືຂອງເຈົ້າອ່ອນແຮງລົງ ຮູ້ສຶກທໍ້ໃຈ ແລະຍອມແພ້. ດັ່ງນັ້ນ ຂໍໃຫ້ເຈົ້າຕັ້ງໃຈແນ່ວແນ່ທີ່ຈະ ‘ຍຶດຖືສິ່ງດີເອົາໄວ້.’ (1 ເທຊະໂລນີກ 5:21) ເຈົ້າສາມາດເອົາຊະນະການຕໍ່ສູ້ກັບຊາຕານ ໂລກຊົ່ວທີ່ມັນປົກຄອງ ແລະຄວາມປາຖະໜາທີ່ຜິດໆໄດ້! ເຈົ້າຈະເອົາຊະນະໄດ້ຖ້າເຈົ້າໄວ້ວາງໃຈຢ່າງເຕັມທີວ່າພະເຢໂຫວາຈະເສີມກຳລັງເຈົ້າແລະຊ່ວຍເຫຼືອເຈົ້າ.—2 ໂກລິນໂທ 4:7-9; ຄາລາຊີ 6:9
17 ຂໍໃຫ້ສູ້ຕໍ່ໄປ ສູ້ກັບບັນຫາທີ່ປະເຊີນຢູ່ ພະຍາຍາມຕໍ່ໄປ ຢ່າຍອມແພ້ ແລະເຈົ້າກໍໝັ້ນໃຈໄດ້ເລີຍວ່າພະເຢໂຫວາຈະ ‘ຖອກຄວາມພອນໃຫ້ຈົນເຫຼືອລົ້ນ.’—ມາລາກີ 3:10