ເຄື່ອງນຸ່ງທີ່ເຈົ້ານຸ່ງສັນລະເສີນພະເຈົ້າບໍ?
“ຈົ່ງກະທຳທຸກສິ່ງໃຫ້ເປັນທີ່ຖວາຍລັດສະໝີແກ່ພະເຈົ້າ.”—1 ໂກລິນໂທ 10:31
ເພງ: 34, 61
1, 2. ເປັນຫຍັງພະຍານພະເຢໂຫວາຈຶ່ງມີມາດຕະຖານທີ່ເໝາະສົມໃນເລື່ອງການແຕ່ງຕົວ? (ເບິ່ງຮູບທຳອິດ)
ໜັງສືພິມສະບັບໜຶ່ງຂອງປະເທດໂຮນລັງໄດ້ເວົ້າເຖິງວິທີການແຕ່ງຕົວຂອງພວກຜູ້ນຳຂອງໂບດຢູ່ທີ່ການປະຊຸມໜຶ່ງຂອງເຂົາເຈົ້າ. ໜັງສືພິມສະບັບນັ້ນເວົ້າວ່າ: “ເຮົາເຫັນວ່າສ່ວນຫຼາຍມີການນຸ່ງເຄື່ອງແບບສະບາຍໆ ໂດຍສະເພາະເມື່ອອາກາດຮ້ອນ.” ແຕ່ໜັງສືພິມສະບັບດຽວກັນນັ້ນໄດ້ເວົ້າວ່າພະຍານພະເຢໂຫວາບໍ່ໄດ້ນຸ່ງເຄື່ອງແບບນີ້ຢູ່ທີ່ການປະຊຸມໃຫຍ່ຂອງເຂົາເຈົ້າ. ໜັງສືພິມນັ້ນລາຍງານວ່າຜູ້ຊາຍທັງເດັກນ້ອຍແລະຜູ້ໃຫຍ່ໄດ້ໃສ່ຊຸດແວັດແລະກາລະວັດ ສ່ວນຜູ້ຍິງທັງເດັກນ້ອຍແລະຜູ້ໃຫຍ່ກໍໃສ່ກະໂປ່ງທີ່ຍາວພໍສົມຄວນ ແຕ່ກໍທັນສະໄໝ. ພະຍານພະເຢໂຫວາຖືກຍ້ອງເລື້ອຍໆໃນວິທີທີ່ເຂົາເຈົ້າແຕ່ງຕົວ. ອັກຄະສາວົກໂປໂລເວົ້າວ່າເຄື່ອງນຸ່ງຂອງຄລິດສະຕຽນຄວນສະແດງເຖິງ ‘ຄວາມລັກອາຍ [“ສຸພາບຮຽບຮ້ອຍ, ທ.ປ.”] ແລະສະຕິອັນດີ.’ (1 ຕີໂມເຕ 2:9, 10) ເຖິງວ່າໂປໂລກຳລັງເວົ້າເຖິງເຄື່ອງນຸ່ງຂອງຜູ້ຍິງ ແຕ່ມາດຕະຖານນີ້ກໍໃຊ້ໄດ້ສຳລັບຜູ້ຊາຍເຊັ່ນກັນ.
2 ເນື່ອງຈາກເປັນພະຍານພະເຢໂຫວາ ດັ່ງນັ້ນ ມາດຕະຖານທີ່ດີໃນເລື່ອງການແຕ່ງຕົວຈຶ່ງສຳຄັນຫຼາຍສຳລັບເຮົາ ແລະກໍສຳຄັນຕໍ່ພະເຈົ້າທີ່ເຮົານະມັດສະການ. (ຕົ້ນເດີມ 3:21) ຄຳພີໄບເບິນບອກໃຫ້ຮູ້ແຈ້ງວ່າພະເຢໂຫວາຜູ້ມີສິດທິສູງສຸດໃນເອກະພົບ ພະອົງມີມາດຕະຖານໃນເລື່ອງການແຕ່ງຕົວສຳລັບຜູ້ຮັບໃຊ້ຂອງພະອົງ. ດັ່ງນັ້ນ ເຄື່ອງນຸ່ງທີ່ເຮົາເລືອກນຸ່ງບໍ່ຄວນມີແຕ່ເຮົາເທົ່ານັ້ນທີ່ພໍໃຈ ແຕ່ສຳຄັນກວ່າອີກ ພະເຢໂຫວາພະເຈົ້າຜູ້ມີສິດທິສູງສຸດຄວນພໍໃຈນຳ.
3. ເຮົາຮຽນຮູ້ຫຍັງຈາກກົດໝາຍທີ່ພະເຈົ້າໃຫ້ແກ່ຊາວອິດສະລາແອນ?
3 ໃນກົດໝາຍທີ່ໃຫ້ຜ່ານທາງໂມເຊ ມີກົດຕ່າງໆທີ່ປົກປ້ອງຊາວອິດສະລາແອນໄວ້ຈາກຮູບແບບຊີວິດທີ່ເຮັດຜິດສິນລະທຳຂອງຊາດຕ່າງໆທີ່ຢູ່ອ້ອມຂ້າງເຂົາເຈົ້າ. ກົດໝາຍນັ້ນສະແດງໃຫ້ເຫັນວ່າພະເຢໂຫວາກຽດຊັງການແຕ່ງຕົວທີ່ເຮັດໃຫ້ເບິ່ງບໍ່ອອກວ່າຄົນນັ້ນເປັນຜູ້ຊາຍຫຼືເປັນຜູ້ຍິງ ເຊິ່ງໃນທຸກມື້ນີ້ມີຫຼາຍຄົນທີ່ແຕ່ງຕົວແບບນັ້ນ. (ອ່ານພະບັນຍັດ 22:5) ຈາກກົດໝາຍນັ້ນ ເຮົາຮຽນຮູ້ວ່າພະເຢໂຫວາບໍ່ມັກເຄື່ອງນຸ່ງທີ່ເຮັດໃຫ້ຜູ້ຊາຍເບິ່ງຄືຜູ້ຍິງ ແລະເຮັດໃຫ້ຜູ້ຍິງເບິ່ງຄືຜູ້ຊາຍ ຫຼືໄຈ້ແຍກໄດ້ຍາກລະຫວ່າງຜູ້ຊາຍກັບຜູ້ຍິງ.
4. ສິ່ງໃດຈະຊ່ວຍຄລິດສະຕຽນໃຫ້ຕັດສິນໃຈຢ່າງຖືກຕ້ອງໃນເລື່ອງການແຕ່ງຕົວ?
4 ຫຼັກການຕ່າງໆທີ່ຢູ່ໃນຄຳພີໄບເບິນສາມາດຊ່ວຍເຮົາໃຫ້ຕັດສິນໃຈຢ່າງຖືກຕ້ອງໃນເລື່ອງການແຕ່ງຕົວ. ຫຼັກການເຫຼົ່ານີ້ໃຊ້ໄດ້ບໍ່ວ່າເຮົາຈະຢູ່ໃນປະເທດໃດ ວັດທະນະທຳໃດ ຫຼືສະພາບອາກາດແບບໃດກໍຕາມ. ເຮົາບໍ່ຈຳເປັນຕ້ອງມີລາຍການທີ່ຍາວໆເພື່ອບອກວ່າເຄື່ອງນຸ່ງແບບໃດທີ່ເໝາະສົມແລະບໍ່ເໝາະສົມ. ເຮົາພຽງແຕ່ຕ້ອງເຮັດຕາມຫຼັກການຕ່າງໆໃນພະຄຳພີ ເຊິ່ງຍັງເປີດໂອກາດໃຫ້ເຮົາໄດ້ນຸ່ງເຄື່ອງໃນແບບທີ່ເຮົາມັກ. ຂໍໃຫ້ເຮົາພິຈາລະນາບາງຫຼັກການໃນຄຳພີໄບເບິນເຊິ່ງຈະຊ່ວຍເຮົາໃຫ້ກຳນົດໄດ້ວ່າ: “ອັນໃດຄືສິ່ງທີ່ພະເຈົ້າຕ້ອງການໃຫ້ເຮົາເຮັດເຊິ່ງເປັນສິ່ງທີ່ດີ ສົມບູນ ແລະເຮັດໃຫ້ພະອົງພໍໃຈ” ເມື່ອເຮົາຕັດສິນໃຈໃນເລື່ອງເຄື່ອງນຸ່ງ.—ໂລມ 12:1, 2, ລ.ມ..
‘ເຮົາຍົກຍໍ [ສະແດງ] ວ່າເຮົາເປັນຂ້າໃຊ້ຂອງພະເຈົ້າ’
5, 6. ເຄື່ອງນຸ່ງຂອງເຮົາມີຜົນກະທົບແນວໃດຕໍ່ຄົນອື່ນ?
5 ອັກຄະສາວົກໂປໂລໄດ້ຮັບການດົນໃຈໃຫ້ກ່າວເຖິງຫຼັກການສຳຄັນທີ່ຢູ່ໃນ 2 ໂກລິນໂທ 6:4 (ອ່ານ). ການແຕ່ງຕົວຂອງເຮົາບອກໃຫ້ຄົນອື່ນຮູ້ວ່າເຮົາເປັນຄົນແນວໃດ ແລະຫຼາຍຄົນຈະສະຫຼຸບກ່ຽວກັບຕົວເຮົາໂດຍອີງໃສ່ສິ່ງທີ່ເຂົາເຈົ້າເຫັນ. (1 ຊາເມືອນ 16:7) ເນື່ອງຈາກວ່າເຮົາເປັນຜູ້ຮັບໃຊ້ຂອງພະເຢໂຫວາ ເຮົາຕ້ອງເຂົ້າໃຈວ່າການແຕ່ງຕົວຂອງເຮົາບໍ່ໄດ້ເປັນພຽງການໃສ່ບາງສິ່ງທີ່ສະບາຍໆເຊິ່ງເຮົາມັກ. ເມື່ອເຮົາໃຊ້ຫຼັກການໃນຄຳພີໄບເບິນ ສິ່ງນັ້ນຄວນຊ່ວຍເຮົາໃຫ້ຫຼີກລ່ຽງການໃສ່ເຄື່ອງນຸ່ງທີ່ຮັດຮູບ ໂຊສັດສ່ວນ ຫຼືເຊັກຊີ. ເລື່ອງນີ້ໝາຍຄວາມວ່າເຮົາບໍ່ຄວນໃສ່ເຄື່ອງນຸ່ງທີ່ສະແດງຫຼືເນັ້ນໃຫ້ເຫັນສັດສ່ວນລັບຕ່າງໆຂອງຮ່າງກາຍ. ຄົນອື່ນບໍ່ຄວນຮູ້ສຶກອຶດອັດໃຈຫຼືບໍ່ຄວນຖືກບັງຄັບໃຫ້ຫຼຽວໜ້າໄປເບິ່ງທາງອື່ນເມື່ອເຂົາເຈົ້າເຫັນການແຕ່ງຕົວຂອງເຮົາ.
ເມື່ອເຮົາແຕ່ງຕົວດີ ສະອາດ ຮຽບຮ້ອຍ ແລະເຄື່ອງນຸ່ງຂອງເຮົາກໍສຸພາບ ຜູ້ຄົນອາດມີຄວາມນັບຖືຕໍ່ເຮົາຫຼາຍຂຶ້ນໃນຖານະເປັນຜູ້ຮັບໃຊ້ຂອງພະເຢໂຫວາພະເຈົ້າຜູ້ມີສິດທິສູງສຸດ
6 ເມື່ອເຮົາແຕ່ງຕົວດີ ສະອາດ ຮຽບຮ້ອຍ ແລະເຄື່ອງນຸ່ງຂອງເຮົາກໍສຸພາບ ຜູ້ຄົນອາດນັບຖືເຮົາຫຼາຍຂຶ້ນໃນຖານະເປັນຜູ້ຮັບໃຊ້ຂອງພະເຢໂຫວາພະເຈົ້າຜູ້ມີສິດທິສູງສຸດ. ເຂົາເຈົ້າອາດສົນໃຈຫຼາຍຂຶ້ນໃນພະເຈົ້າທີ່ເຮົານະມັດສະການ ມີຄວາມນັບຖືຫຼາຍຂຶ້ນຕໍ່ອົງການຂອງເຮົາ ແລະຢາກຟັງຫຼາຍຂຶ້ນກ່ຽວກັບຂ່າວສານທີ່ຊ່ວຍຊີວິດໃຫ້ລອດ.
7, 8. ໃນໂອກາດໃດທີ່ເຮົາຕ້ອງນຸ່ງເຄື່ອງສຸພາບເປັນພິເສດ?
7 ເພື່ອສະແດງຄວາມນັບຖືຕໍ່ພະເຈົ້າອົງບໍລິສຸດ ພີ່ນ້ອງຮ່ວມຄວາມເຊື່ອ ແລະຜູ້ຄົນໃນເຂດປະກາດ ເຮົາຄວນນຸ່ງເຄື່ອງໃນແບບໃຫ້ກຽດພະເຢໂຫວາແລະຂ່າວສານທີ່ເຮົາປະກາດ. (ໂລມ 13:8-10) ເຄື່ອງນຸ່ງຂອງເຮົາມີຄວາມສຳຄັນເປັນພິເສດ ເມື່ອເຮົາໄປການປະຊຸມຂອງຄລິດສະຕຽນຫຼືເມື່ອເຮົາໄປປະກາດ. ເຮົາຄວນນຸ່ງເຄື່ອງໃນແບບທີ່ເໝາະສົມກັບຜູ້ທີ່ນະມັດສະການພະເຢໂຫວາ. (1 ຕີໂມເຕ 2:10) ແນ່ນອນວ່າເຄື່ອງນຸ່ງບາງປະເພດໃສ່ໄດ້ໃນບາງຂົງເຂດ ແຕ່ອາດບໍ່ເໝາະສົມທີ່ຈະໃສ່ໃນຂົງເຂດອື່ນ. ດັ່ງນັ້ນ ບໍ່ວ່າເຮົາຈະຢູ່ບ່ອນໃດກໍຕາມ ເນື່ອງຈາກເປັນພະຍານພະເຢໂຫວາ ເຮົາຈຶ່ງຄວນຫຼີກລ່ຽງການເຮັດໃຫ້ຄົນອື່ນຮູ້ສຶກບໍ່ພໍໃຈຍ້ອນເຄື່ອງນຸ່ງຂອງເຮົາ.
ເຄື່ອງນຸ່ງຂອງເຈົ້າຈະເຮັດໃຫ້ຄົນອື່ນນັບຖືພະເຈົ້າຜູ້ທີ່ເຈົ້າເປັນຕົວແທນບໍ? (ເບິ່ງຂໍ້ 7, 8)
8 ອ່ານ 1 ໂກລິນໂທ 10:31. ເມື່ອເຮົາໄປການປະຊຸມໝວດແລະການປະຊຸມພາກ ເຄື່ອງນຸ່ງຂອງເຮົາຕ້ອງສຸພາບແລະເໝາະສົມ ແທນທີ່ເຮົາຈະສະທ້ອນເຖິງການນຸ່ງເຄື່ອງແບບເລີຍເຖີດທີ່ຄົນໃນໂລກນີ້ມັກນຸ່ງ. ແມ່ນແຕ່ກ່ອນຫຼືພາຍຫຼັງການປະຊຸມ ແລະເມື່ອເຮົາແຈ້ງເຂົ້າຫຼືແຈ້ງອອກຢູ່ໂຮງແຮມ ເຮົາຄວນແນ່ໃຈວ່າເຄື່ອງນຸ່ງຂອງເຮົາບໍ່ເປັນແບບສະບາຍໆຈົນເກີນໄປຫຼືຫຼົມຕ່າມຍາມໂພດ. ເມື່ອເຮົານຸ່ງເຄື່ອງແບບສຸພາບແລະເໝາະສົມ ເຮົາກໍພູມໃຈທີ່ຈະບອກວ່າເຮົາເປັນພະຍານພະເຢໂຫວາ ແລະເຮົາກໍຮູ້ສຶກວ່າພ້ອມທີ່ຈະປະກາດໃນທຸກເວລາ.
9, 10. ເປັນຫຍັງຄຳເວົ້າໃນຟີລິບ 2:4 ຄວນມີຜົນກະທົບຕໍ່ເຄື່ອງນຸ່ງທີ່ເຮົານຸ່ງ?
9 ອ່ານຟີລິບ 2:4. ເປັນຫຍັງເຮົາຄວນຄິດວ່າເຄື່ອງນຸ່ງຂອງເຮົາມີຜົນກະທົບຕໍ່ພີ່ນ້ອງຮ່ວມຄວາມເຊື່ອ? ເຫດຜົນໜຶ່ງກໍຍ້ອນວ່າປະຊາຊົນຂອງພະເຈົ້າອອກຄວາມພະຍາຍາມຢ່າງໜັກທີ່ຈະເຮັດຕາມຄຳແນະນຳທີ່ວ່າ: “ເຫດສັນນີ້ສ່ວນອາການຂອງທ່ານທັງຫຼາຍທີ່ຢູ່ເທິງແຜ່ນດິນໂລກຈົ່ງກະທຳໃຫ້ຕາຍເຖີ້ນ ຄືວ່າການຜິດຊາຍຍິງ ການຂີ້ດຽດ ຄວາມຕັນຫາ ຄວາມຄຶດຢາກໄດ້ອັນຊົ່ວ.” (ໂກໂລດ 3:2, 5) ພີ່ນ້ອງຊາຍຍິງບາງຄົນໄດ້ເຊົາໃຊ້ຊີວິດທີ່ຜິດສິນລະທຳທາງເພດ ແຕ່ເຂົາເຈົ້າອາດຍັງຕ້ອງຕໍ່ສູ້ກັບຄວາມປາຖະໜາທີ່ຜິດໆນັ້ນຢູ່. ຖ້າເຮົາບໍ່ລະວັງ ວິທີທີ່ເຮົາແຕ່ງຕົວອາດເຮັດໃຫ້ເປັນເລື່ອງຍາກຫຼາຍຂຶ້ນສຳລັບເຂົາເຈົ້າທີ່ຈະເຮັດຕາມຄຳແນະນຳທີ່ຢູ່ໃນຄຳພີໄບເບິນແລະຕໍ່ສູ້ກັບຄວາມປາຖະໜາເຫຼົ່ານັ້ນ. (1 ໂກລິນໂທ 6:9, 10) ເຮົາຄົງບໍ່ຢາກເຮັດໃຫ້ການຕໍ່ສູ້ຂອງເຂົາເຈົ້າຍາກຂຶ້ນກວ່າເກົ່າແມ່ນບໍ?
10 ເມື່ອຢູ່ກັບພີ່ນ້ອງຮ່ວມຄວາມເຊື່ອ ເຮົາກໍປອດໄພຈາກຄົນທີ່ສົ່ງເສີມເລື່ອງທີ່ຜິດສິນລະທຳທາງເພດ. ວິທີທີ່ເຮົາແຕ່ງຕົວຄວນຊ່ວຍເສີມສ້າງສະພາບແວດລ້ອມທີ່ສະອາດແບບນີ້ ບໍ່ວ່າເຮົາຈະຢູ່ການປະຊຸມຫຼືຢູ່ບ່ອນອື່ນ. ເຖິງວ່າເຮົາມີອິດສະລະໃນການເລືອກເຄື່ອງນຸ່ງ ແຕ່ເຮົາກໍມີຄວາມຮັບຜິດຊອບທີ່ຈະນຸ່ງເຄື່ອງໃນແບບທີ່ເຮັດໃຫ້ງ່າຍຂຶ້ນສຳລັບຄົນອື່ນເພື່ອຈະຮັກສາຄວາມຄິດ ຄຳເວົ້າ ແລະການປະພຶດທີ່ສະອາດໃນສາຍຕາຂອງພະເຈົ້າ. (1 ເປໂຕ 1:15, 16) ຮັກແທ້ “ບໍ່ເຮັດໃຫ້ເກີດຄວາມອັບອາຍ ບໍ່ເຫັນແກ່ຕົວ.”—1 ໂກລິນໂທ 13:4, 5, ທ.ປ.
ເຄື່ອງນຸ່ງທີ່ເໝາະກັບເວລາແລະສະຖານທີ່
11, 12. ຄຳເວົ້າໃນຜູ້ເທສະໜາປ່າວປະກາດ 3:1, 17 ຊ່ວຍເຮົາແນວໃດໃຫ້ເປັນຄົນມີເຫດຜົນ?
11 ເມື່ອຕັດສິນໃຈໃນເລື່ອງເຄື່ອງນຸ່ງ ຜູ້ຮັບໃຊ້ຂອງພະເຈົ້າສຳນຶກວ່າ: “ມີເວລາກຳນົດໄວ້ສຳລັບ . . . ກິດຈະການທຸກຢ່າງ.” (ຜູ້ເທສະໜາປ່າວປະກາດ 3:1, 17) ເປັນເລື່ອງທີ່ເຂົ້າໃຈໄດ້ວ່າ ສະພາບອາກາດ ລະດູການ ສະພາບຄວາມເປັນຢູ່ ແລະສະພາບການທີ່ແຕກຕ່າງກັນໄປອາດມີຜົນກະທົບຕໍ່ເຄື່ອງນຸ່ງຂອງເຮົາ. ແຕ່ມາດຕະຖານຂອງພະເຢໂຫວາບໍ່ເຄີຍປ່ຽນແປງໄປຕາມສິ່ງໃດໆ.—ມາລາກີ 3:6
ມາດຕະຖານຂອງພະເຢໂຫວາບໍ່ເຄີຍປ່ຽນແປງ
12 ໃນລະດູຮ້ອນ ເປັນເລື່ອງທ້າທາຍເປັນພິເສດທີ່ຈະເຮັດໃຫ້ແນ່ໃຈວ່າເຄື່ອງນຸ່ງຂອງເຮົາສຸພາບແລະຮຽບຮ້ອຍ. ພີ່ນ້ອງຮ່ວມຄວາມເຊື່ອຈະຮູ້ຄຸນຄ່າເມື່ອເຮົາບໍ່ນຸ່ງເຄື່ອງທີ່ຮັດຫຼືຫຼົມເກີນໄປເຊິ່ງເປັນແບບໂປ້ໆ. (ໂຢບ 31:1) ນອກຈາກນັ້ນ ເມື່ອໄປພັກຜ່ອນຢູ່ແຄມທະເລຫຼືຢູ່ສະລອຍນໍ້າ ຊຸດລອຍນໍ້າຂອງເຮົາກໍຄວນສຸພາບ. (ສຸພາສິດ 11:2, 20) ເຖິງວ່າຫຼາຍຄົນໃນໂລກນີ້ໃສ່ຊຸດລອຍນໍ້າທີ່ໂປ້ ແຕ່ເຮົາຄວນແນ່ໃຈວ່າການເລືອກຂອງເຮົານຳຄຳສັນລະເສີນມາສູ່ພະເຢໂຫວາພະເຈົ້າອົງບໍລິສຸດ.
13. ເປັນຫຍັງຄຳແນະນຳໃນ 1 ໂກລິນໂທ 10:32, 33 ຄວນມີຜົນກະທົບຕໍ່ການເລືອກເຄື່ອງນຸ່ງຂອງເຮົາ?
13 ມີຫຼັກການໜຶ່ງອີກທີ່ສຳຄັນເຊິ່ງຄວນມີຜົນກະທົບຕໍ່ການເລືອກເຄື່ອງນຸ່ງຂອງເຮົາ. ເຮົາຕ້ອງລະວັງທີ່ຈະບໍ່ເຮັດຜິດຕໍ່ສະຕິຮູ້ສຶກຜິດຊອບຂອງຄົນອື່ນ. (ອ່ານ 1 ໂກລິນໂທ 10:32, 33) ເປັນຄວາມຮັບຜິດຊອບຂອງເຮົາທີ່ຈະຫຼີກລ່ຽງການໃສ່ເຄື່ອງນຸ່ງທີ່ອາດເຮັດໃຫ້ພີ່ນ້ອງຮ່ວມຄວາມເຊື່ອແລະລວມເຖິງຄົນທີ່ບໍ່ໄດ້ຮັບໃຊ້ພະເຢໂຫວາຮູ້ສຶກບໍ່ພໍໃຈ. ອັກຄະສາວົກໂປໂລຂຽນວ່າ: “ເຮົາທຸກຄົນຈົ່ງຊອກຫາເປັນທີ່ຊອບແກ່ເພື່ອນບ້ານໃນການດີເພື່ອຈະໃຫ້ເຂົາຈຳເລີນຂຶ້ນ.” ໂປໂລຍັງເວົ້າຕື່ມອີກວ່າ: “ເພາະວ່າພະຄລິດບໍ່ໄດ້ກະທຳຕາມຊອບໃຈຂອງພະອົງເອງ.” (ໂລມ 15:2, 3) ເຊັ່ນດຽວກັບພະເຍຊູ ເຮົາຄວນຖືວ່າການເຮັດຕາມຈຸດປະສົງຂອງພະເຈົ້າແລະການຊ່ວຍຄົນອື່ນມີຄວາມສຳຄັນຫຼາຍກວ່າຄວາມມັກສ່ວນຕົວ. ດັ່ງນັ້ນ ເຮົາຈະບໍ່ເລືອກໃສ່ເຄື່ອງນຸ່ງທີ່ເຮົາມັກແຕ່ອາດຂັດຂວາງຜູ້ຄົນໄວ້ຈາກການຟັງຂ່າວສານຂອງເຮົາ.
14. ພໍ່ແມ່ຈະຝຶກສອນລູກແນວໃດໃຫ້ສັນລະເສີນພະເຈົ້າດ້ວຍວິທີທີ່ເຂົາເຈົ້ານຸ່ງເຄື່ອງ?
14 ພໍ່ແມ່ທີ່ເປັນຄລິດສະຕຽນມີຄວາມຮັບຜິດຊອບທີ່ຈະສອນລູກໃຫ້ເຮັດຕາມຫຼັກການໃນຄຳພີໄບເບິນ. ສິ່ງນີ້ໝາຍເຖິງການເຮັດໃຫ້ແນ່ໃຈວ່າທັງພໍ່ແມ່ແລະລູກພະຍາຍາມເຮັດໃຫ້ພະເຈົ້າຍິນດີດ້ວຍເຄື່ອງນຸ່ງແລະການແຕ່ງຕົວທີ່ສຸພາບຂອງເຂົາເຈົ້າ. (ສຸພາສິດ 22:6; 27:11) ພໍ່ແມ່ຈະຝຶກສອນລູກແນວໃດໃຫ້ສະແດງຄວາມນັບຖືຕໍ່ພະເຈົ້າອົງບໍລິສຸດແລະຕໍ່ມາດຕະຖານຕ່າງໆຂອງພະອົງ? ພໍ່ແມ່ຄວນວາງຕົວຢ່າງທີ່ດີໃຫ້ລູກ. ນອກຈາກນັ້ນ ພໍ່ແມ່ຄວນສອນລູກດ້ວຍຄວາມຮັກວ່າຈະຊອກເຄື່ອງນຸ່ງທີ່ເໝາະສົມໄດ້ຢູ່ໃສແລະໂດຍວິທີໃດ. ລູກບໍ່ຄວນເລືອກເຄື່ອງນຸ່ງພຽງຍ້ອນວ່າເຂົາເຈົ້າມັກເຄື່ອງເຫຼົ່ານັ້ນ ແຕ່ສຳຄັນຫຼາຍກວ່າອີກ ເຂົາເຈົ້າຄວນເລືອກເຄື່ອງນຸ່ງທີ່ສັນລະເສີນພະເຢໂຫວາພະເຈົ້າທີ່ເຂົາເຈົ້າເປັນຕົວແທນ.
ໃຊ້ອິດສະລະຂອງເຈົ້າຢ່າງສຸຂຸມ
15. ສິ່ງໃດຈະຊ່ວຍເຮົາໃຫ້ເລືອກຢ່າງສຸຂຸມ?
15 ຄຳພີໄບເບິນມີຄຳແນະນຳທີ່ໃຊ້ການໄດ້ແທ້ເຊິ່ງສາມາດຊ່ວຍເຮົາໃຫ້ເລືອກຢ່າງສຸຂຸມເພື່ອຈະນຳຄຳສັນລະເສີນມາສູ່ພະເຢໂຫວາ. ເຖິງຢ່າງນັ້ນກໍຕາມ ເຄື່ອງນຸ່ງຂອງເຮົາກໍສະທ້ອນເຖິງຄວາມມັກສ່ວນຕົວຂອງເຮົາ. ເຄື່ອງນຸ່ງທີ່ເຮົາມັກແລະສາມາດຊື້ໄດ້ອາດແຕກຕ່າງຈາກຄົນອື່ນ ແຕ່ເຄື່ອງນຸ່ງນັ້ນຄວນສະອາດ ຮຽບຮ້ອຍ ສຸພາບ ເໝາະສົມກັບກາລະເທສະ ແລະເປັນທີ່ຍອມຮັບໄດ້ໃນທ້ອງຖິ່ນ.
16. ເປັນຫຍັງຈຶ່ງຄຸ້ມຄ່າທີ່ຈະພະຍາຍາມນຸ່ງເຄື່ອງໃນແບບທີ່ເໝາະສົມ?
16 ບໍ່ງ່າຍສະເໝີໄປທີ່ຈະຊອກຫາເຄື່ອງນຸ່ງທີ່ສຸພາບແລະເໝາະສົມ ເພາະຫຼາຍຮ້ານຂາຍສະເພາະເຄື່ອງນຸ່ງທີ່ຜູ້ຄົນນິຍົມເທົ່ານັ້ນ. ດັ່ງນັ້ນອາດຕ້ອງໄດ້ໃຊ້ເວລາແລະຄວາມພະຍາມຫຼາຍເພື່ອຈະຊອກຊື້ກະໂປ່ງ ເສື້ອ ຊຸດກະໂປ່ງ ຫຼືເພື່ອເລືອກຊຸດແວັດແລະໂສ້ງທີ່ບໍ່ຮັດເກີນໄປ. ແຕ່ພີ່ນ້ອງຮ່ວມຄວາມເຊື່ອຈະສັງເກດເຫັນແລະຮູ້ຄຸນຄ່າໃນຄວາມພະຍາຍາມຂອງເຮົາທີ່ຈະນຸ່ງເຄື່ອງທີ່ງາມແລະເໝາະສົມ. ຄຸ້ມຄ່າແທ້ໆທີ່ເຮົາເສຍສະລະຄວາມມັກຂອງເຮົາໃນເລື່ອງການແຕ່ງຕົວ ເພາະການເຮັດແບບນີ້ຈະນຳຄຳສັນລະເສີນມາສູ່ພໍ່ທີ່ຮັກຂອງເຮົາ.
17. ສິ່ງໃດອາດມີຜົນຕໍ່ການເລືອກຂອງພີ່ນ້ອງຊາຍວ່າຈະຈົ່ງໜວດຫຼືບໍ່?
17 ເປັນເລື່ອງເໝາະສົມບໍທີ່ພີ່ນ້ອງຊາຍຈະຈົ່ງໜວດ? ກົດໝາຍທີ່ໃຫ້ຜ່ານທາງໂມເຊຮຽກຮ້ອງໃຫ້ຜູ້ຊາຍຈົ່ງໜວດ. ແຕ່ຄລິດສະຕຽນບໍ່ໄດ້ຢູ່ພາຍໃຕ້ກົດໝາຍນັ້ນຫຼືບໍ່ໄດ້ຖືກຮຽກຮ້ອງໃຫ້ເຮັດຕາມກົດໝາຍນັ້ນ. (ພວກເລວີ 19:27; 21:5; ຄາລາຊີ 3:24, 25) ໃນບາງວັດທະນະທຳ ການຈົ່ງໜວດທີ່ຕັດເປັນລະບຽບຮຽບຮ້ອຍອາດເປັນສິ່ງທີ່ເໝາະສົມແລະຍອມຮັບໄດ້ ແລະອາດບໍ່ໄດ້ຂັດຂວາງຜູ້ຄົນຈາກການຟັງຂ່າວສານຂອງເຮົາ. ທີ່ຈິງແລ້ວ ພີ່ນ້ອງຊາຍບາງຄົນທີ່ໄດ້ຮັບແຕ່ງຕັ້ງໃຫ້ມີຄວາມຮັບຊອບໃນປະຊາຄົມ ເຂົາເຈົ້າກໍຈົ່ງໜວດ ແຕ່ບາງຄົນອາດຕັດສິນໃຈທີ່ຈະບໍ່ຈົ່ງເລີຍ. (1 ໂກລິນໂທ 8:9, 13; 10:32) ໃນວັດທະນະທຳອື່ນຫຼືສະຖານທີ່ອື່ນ ບໍ່ມີທຳນຽມເລື່ອງການຈົ່ງໜວດແລະຖືວ່າບໍ່ເໝາະສົມທີ່ພະຍານພະເຢໂຫວາຈະເຮັດແບບນັ້ນ. ທີ່ຈິງ ການຈົ່ງໜວດອາດຂັດຂວາງພີ່ນ້ອງຊາຍຄົນໜຶ່ງຈາກການນຳຄຳສັນລະເສີນມາສູ່ພະເຈົ້າແລະຈາກການເປັນຄົນ “ປາສະຈາກຕິຕຽນ.”—1 ຕີໂມເຕ 3:2, 7; ໂລມ 15:1-3
18, 19. ມີເກ 6:8 ຊ່ວຍເຮົາແນວໃດ?
18 ເຮົາຮູ້ສຶກຂອບໃຈແທ້ໆທີ່ພະເຢໂຫວາບໍ່ໄດ້ຈັດໃຫ້ມີລາຍການທີ່ຍາວໆເພື່ອບອກວ່າເຄື່ອງນຸ່ງແລະການແຕ່ງຕົວແບບໃດທີ່ເໝາະສົມແລະບໍ່ເໝາະສົມ. ແທນທີ່ຈະເປັນແບບນັ້ນ ພະອົງໃຫ້ເຮົາມີອິດສະລະທີ່ຈະຕັດສິນໃຈຢ່າງມີເຫດຜົນໂດຍອີງໃສ່ຫຼັກການໃນຄຳພີໄບເບິນ. ດັ່ງນັ້ນ ເມື່ອເຮົາຕັດສິນໃຈໃນເລື່ອງເຄື່ອງນຸ່ງແລະການແຕ່ງຕົວ ເຮົາສາມາດສະແດງໃຫ້ເຫັນວ່າເຮົາຢາກເປັນຄົນຖ່ອມຕົວໃນຂະນະທີ່ຮັບໃຊ້ພະເຈົ້າຂອງເຮົາ.—ມີເກ 6:8
19 ເຮົາຍອມຮັບຢ່າງຖ່ອມໃຈວ່າພະເຢໂຫວາສະອາດແລະບໍລິສຸດ ແລະມາດຕະຖານຕ່າງໆຂອງພະອົງເປັນສິ່ງຊີ້ນຳທີ່ດີທີ່ສຸດສຳລັບເຮົາ. ຖ້າເຮົາຢາກເປັນຄົນສຸພາບແລະຖ່ອມຕົວ ເຮົາກໍຈະເຮັດຕາມມາດຕະຖານຕ່າງໆຂອງພະອົງໃນຊີວິດຂອງເຮົາ. ນອກຈາກນັ້ນ ຄວາມຖ່ອມຕົວຈະຊ່ວຍເຮົາໃຫ້ນັບຖືຄວາມຮູ້ສຶກແລະຄວາມຄິດເຫັນຂອງຄົນອື່ນ.
20. ເຄື່ອງນຸ່ງແລະການແຕ່ງຕົວຂອງເຮົາມີຜົນກະທົບແນວໃດຕໍ່ຄົນອື່ນ?
20 ເຄື່ອງນຸ່ງຂອງເຮົາຄວນສະແດງໃຫ້ເຫັນຢ່າງຊັດເຈນວ່າເຮົາເປັນຜູ້ຮັບໃຊ້ຂອງພະເຢໂຫວາ. ພະອົງມີມາດຕະຖານທີ່ສູງ ແລະເຮົາກໍຍິນດີທີ່ຈະເຮັດຕາມມາດຕະຖານເຫຼົ່ານັ້ນ. ໂດຍທົ່ວໄປແລ້ວ ພີ່ນ້ອງຊາຍຍິງຂອງເຮົາໄດ້ຮັບຄຳຊົມເຊີຍສຳລັບການນຸ່ງເຄື່ອງແລະການປະພຶດທີ່ດີຂອງເຂົາເຈົ້າ ເຊິ່ງດຶງດູດຄົນທີ່ມີຫົວໃຈສັດຊື່ໃຫ້ມາຮູ້ຈັກຂ່າວສານທີ່ຊ່ວຍຊີວິດເຊິ່ງມີໃນຄຳພີໄບເບິນ ແລະນຳຄຳສັນລະເສີນແລະຄວາມຍິນດີມາສູ່ພະເຢໂຫວາ. ເມື່ອເຮົາຕັດສິນໃຈຢ່າງສຸຂຸມໃນເລື່ອງເຄື່ອງນຸ່ງຂອງເຮົາ ເຮົາຈະນຳຄຳສັນລະເສີນຕໍ່ໆໄປມາສູ່ພະເຢໂຫວາຜູ້ທີ່ນຸ່ງຫົ່ມດ້ວຍ “ອານຸພາບ [“ກຽດຕິຍົດ, ທ.ປ.”] ກັບລັດສະໝີອັນຮຸ່ງເຮືອງ.”—ຄຳເພງ 104:1, 2
