ຄຳຖາມຈາກຜູ້ອ່ານ
ເຫບເລີ 4:12 ບອກວ່າ: “ພະຄຳຂອງພະເຈົ້າປະກອບດ້ວຍຊີວິດແລະດ້ວຍລິດເດດ [“ພະລັງ, ລ.ມ.”].” ພະຄຳຂອງພະເຈົ້າໃນຂໍ້ນີ້ໝາຍເຖິງຫຍັງ?
ແວດບົດຊ່ວຍເຮົາໃຫ້ເຂົ້າໃຈວ່າໂປໂລກຳລັງເວົ້າເຖິງສິ່ງທີ່ພະເຈົ້າບອກກ່ຽວກັບຈຸດປະສົງຂອງພະອົງ ເຊິ່ງເຮົາຊອກອ່ານໄດ້ໃນຄຳພີໄບເບິນ.
ໜັງສືຕ່າງໆຂອງອົງການມັກກ່າວເຖິງເຫບເລີ 4:12 ເພື່ອສະແດງໃຫ້ເຫັນວ່າຄຳພີໄບເບິນມີພະລັງທີ່ຈະປ່ຽນແປງຊີວິດຂອງຄົນໄດ້ ແລະການອະທິບາຍແບບນັ້ນກໍຖືກຕ້ອງ. ແຕ່ເຮົາຈະໄດ້ຮັບປະໂຫຍດເຊັ່ນກັນ ຖ້າເຮົາເຂົ້າໃຈສິ່ງທີ່ໂປໂລກຳລັງເວົ້າເຖິງເມື່ອຂຽນເຫບເລີ 4:12. ລາວກຳລັງພະຍາຍາມກະຕຸ້ນຄລິດສະຕຽນຊາວເຫບເລີໃຫ້ເຮັດສອດຄ່ອງກັບຈຸດປະສົງຂອງພະເຈົ້າ ເຊິ່ງຈຸດປະສົງຫຼາຍຢ່າງແມ່ນຢູ່ໃນສ່ວນຕ່າງໆຂອງພະຄຳພີ. ໂປໂລໃຊ້ຕົວຢ່າງຂອງຊາວອິດສະລາແອນທີ່ພະເຈົ້າໄດ້ປົດປ່ອຍອອກຈາກເອຢິບ. ເຂົາເຈົ້າມີຄວາມຫວັງທີ່ຈະເຂົ້າໄປໃນແຜ່ນດິນທີ່ມີ ‘ນໍ້ານົມແລະນໍ້າເຜີ້ງບໍລິບູນ’ ເຊິ່ງຢູ່ທີ່ນັ້ນເຂົາເຈົ້າຈະມີຄວາມສຸກກັບການຢຸດພັກທີ່ແທ້ຈິງ.—ອົບພະຍົບ 3:8; ພະບັນຍັດ 12:9, 10
ນີ້ເປັນຈຸດປະສົງຂອງພະເຈົ້າ. ແຕ່ຊາວອິດສະລາແອນບໍ່ໄດ້ສະແດງຄວາມເຊື່ອແລະບໍ່ໄດ້ເຮັດຕາມທີ່ພະເຢໂຫວາບອກ ດັ່ງນັ້ນ ເຂົາເຈົ້າສ່ວນຫຼາຍຈຶ່ງບໍ່ໄດ້ເຂົ້າໄປໃນບ່ອນຢຸດພັກ. (ຈົດເຊັນບັນຊີ 14:30; ໂຢຊວຍ 14:6-10) ແຕ່ໂປໂລຍັງເວົ້າຕື່ມອີກວ່າ: “ຍັງມີຄຳສັນຍາທີ່ຈະໃຫ້ເຂົ້າໄປໃນທີ່ຢຸດພັກຂອງພະເຈົ້າ, ລ.ມ.” (ເຫບເລີ 3:16-19; 4:1) ເຫັນໄດ້ແຈ້ງວ່າ “ຄຳສັນຍາ” ນັ້ນເປັນສ່ວນໜຶ່ງໃນສິ່ງທີ່ພະເຈົ້າເປີດເຜີຍກ່ຽວກັບຈຸດປະສົງຂອງພະອົງ. ຄືກັບຄລິດສະຕຽນຊາວເຫບເລີ ເຮົາຄວນຮຽນຮູ້ແລະເຮັດສອດຄ່ອງກັບຈຸດປະສົງນັ້ນ. ເພື່ອເນັ້ນວ່າຄຳສັນຍານີ້ມີພື້ນຖານມາຈາກພະຄຳພີ ໂປໂລຈຶ່ງຍົກບາງສ່ວນຈາກຕົ້ນເດີມ 2:2 ແລະຄຳເພງ 95:11.
ເຮົາດີໃຈຫຼາຍທີ່ “ຍັງມີຄຳສັນຍາທີ່ຈະໃຫ້ເຂົ້າໄປໃນທີ່ຢຸດພັກຂອງພະເຈົ້າ.” ເຮົາໝັ້ນໃຈວ່າສິ່ງທີ່ຄຳພີໄບເບິນສອນກ່ຽວກັບການເຂົ້າໄປໃນບ່ອນຢຸດພັກຂອງພະເຈົ້າແມ່ນເປັນໄປໄດ້ແທ້ໆ ແລະເຮົາໄດ້ເຮັດຕາມຂັ້ນຕອນຕ່າງໆເພື່ອຈະເຂົ້າໄປທີ່ນັ້ນ. ເຮົາພະຍາຍາມເຮັດສິ່ງຕ່າງໆເພື່ອຈະໄດ້ເຂົ້າໄປ ແຕ່ບໍ່ໄດ້ໝາຍຄວາມວ່າເຮົາຕ້ອງເຮັດຕາມກົດໝາຍຂອງໂມເຊ ຫຼືເຮັດສິ່ງດີໆພຽງເພື່ອຈະໃຫ້ພະເຢໂຫວາຍອມຮັບ. ແຕ່ຍ້ອນເຮົາມີຄວາມເຊື່ອໃນພະເຢໂຫວາ ເຮົາຈຶ່ງຍິນດີເຮັດສອດຄ່ອງກັບຈຸດປະສົງຂອງພະອົງແລະຈະພະຍາຍາມເຮັດຕໍ່ໆໄປ. ຫຼາຍລ້ານຄົນໃນທົ່ວໂລກໄດ້ເລີ່ມສຶກສາຄຳພີໄບເບິນ ແລະຮຽນຮູ້ໃນສິ່ງທີ່ພະເຈົ້າເປີດເຜີຍກ່ຽວກັບຈຸດປະສົງຂອງພະອົງ. ການຮຽນຮູ້ນີ້ໄດ້ກະຕຸ້ນຫຼາຍຄົນໃຫ້ປ່ຽນແປງຊີວິດຂອງເຂົາເຈົ້າ ສະແດງຄວາມເຊື່ອ ແລະຮັບບັບເຕມາ. ການປ່ຽນແປງແບບນີ້ເປັນຫຼັກຖານພິສູດຢ່າງຊັດເຈນວ່າ: “ພະຄຳຂອງພະເຈົ້າປະກອບດ້ວຍຊີວິດແລະດ້ວຍລິດເດດ [“ພະລັງ, ລ.ມ.”].” ສິ່ງທີ່ພະເຈົ້າເປີດເຜີຍໃນຄຳພີໄບເບິນກ່ຽວກັບຈຸດປະສົງຂອງພະອົງໄດ້ມີຜົນກະທົບຕໍ່ຊີວິດຂອງເຮົາ ແລະສິ່ງນີ້ຈະມີພະລັງກະຕຸ້ນຊີວິດເຮົາຕໍ່ໆໄປ.