ຈົ່ງກ້າຫານແລະລົງມືເຮັດ
“ເຈົ້າຈົ່ງຊູແຮງຕົວຂຶ້ນ [“ກ້າຫານ,” ລ.ມ.] ແລະຕັ້ງໝັ້ນຄົງຢູ່ແລະຈົ່ງເຮັດການ. ຢ່າຊູ່ກົວຢ່າຊູ່ຢ້ານເຫດວ່າພະເຢໂຫວາ . . . ຈະສະຖິດຢູ່ຝ່າຍເຈົ້າ.”—1 ຂ່າວຄາວ 28:20
ເພງ: 38, 34
1, 2. (ກ) ຊາໂລໂມນໄດ້ຮັບວຽກມອບໝາຍຫຍັງທີ່ສຳຄັນ? (ຂ) ເປັນຫຍັງດາວິດເປັນຫ່ວງຊາໂລໂມນ?
ຊາໂລໂມນໄດ້ຮັບວຽກມອບໝາຍພິເສດ. ພະເຢໂຫວາໄດ້ເລືອກລາວໃຫ້ເປັນຜູ້ເບິ່ງແຍງການສ້າງວິຫານໃນເມືອງເຢຣຶຊາເລມ ເຊິ່ງເປັນໜຶ່ງໃນໂຄງການກໍ່ສ້າງທີ່ສຳຄັນທີ່ສຸດເທົ່າທີ່ເຄີຍມີມາ! ວິຫານນີ້ຈະ “ຍິ່ງໃຫຍ່ແລະສະຫງ່າງາມ” ແລະຄວາມງົດງາມຂອງວິຫານນີ້ຈະມີຊື່ສຽງໂດ່ງດັງ. ທີ່ສຳຄັນທີ່ສຸດ ວິຫານນີ້ຈະເປັນ “ວິຫານຂອງພະເຢໂຫວາພະເຈົ້າ [ທ່ຽງແທ້ ລ.ມ.].”—1 ຂ່າວຄາວ 22:1, 5, ລ.ມ., 9-11
2 ກະສັດດາວິດໝັ້ນໃຈວ່າພະເຈົ້າຈະຊ່ວຍເຫຼືອຊາໂລໂມນ. ແຕ່ລາວກໍເປັນຫ່ວງເພາະຊາໂລໂມນ “ອາຍຸຍັງນ້ອຍແລະບໍ່ມີປະສົບການ.” ລາວຈະກ້າຮັບວຽກມອບໝາຍທີ່ສຳຄັນນີ້ບໍ? ຫຼືລາວຈະຄິດວ່າລາວອາຍຸຍັງນ້ອຍແລະບໍ່ມີປະສົບການກໍເລີຍບໍ່ກ້າຮັບວຽກນີ້? ເພື່ອຈະເຮັດວຽກນີ້ສຳເລັດ ຊາໂລໂມນຕ້ອງກ້າຫານແລະລົງມືເຮັດວຽກ.
3. ຊາໂລໂມນໄດ້ຮຽນຮູ້ຫຍັງຈາກຄວາມກ້າຫານຂອງພໍ່ລາວ?
3 ຊາໂລໂມນຕ້ອງໄດ້ຮຽນຮູ້ເລື່ອງຄວາມກ້າຫານຫຼາຍຢ່າງຈາກດາວິດພໍ່ຂອງລາວ. ຕອນທີ່ດາວິດຍັງນ້ອຍ ລາວໄດ້ຕໍ່ສູ້ກັບສັດປ່າທີ່ມາໂຈມຕີແກະຂອງພໍ່ລາວ. (1 ຊາເມືອນ 17:34, 35) ລາວຍັງກ້າຫານຫຼາຍຕອນທີ່ຕໍ່ສູ້ກັບໂຄລີອາດທະຫານຮ່າງຍັກທີ່ທັງແຂງແຮງແລະເປັນຕາຢ້ານ. ຍ້ອນຄວາມຊ່ວຍເຫຼືອຈາກພະເຢໂຫວາ ດາວິດຈຶ່ງເອົາຊະນະໂຄລີອາດໄດ້ໂດຍໃຊ້ຫີນພຽງກ້ອນດຽວ.—1 ຊາເມືອນ 17:45, 49, 50
4. ເປັນຫຍັງຊາໂລໂມນຕ້ອງກ້າຫານ?
4 ເຮົາເຂົ້າໃຈໄດ້ວ່າເປັນຫຍັງດາວິດຈຶ່ງເປັນຄົນທີ່ເໝາະສົມແລ້ວທີ່ຈະກະຕຸ້ນຊາໂລໂມນໃຫ້ກ້າຫານແລະລົງມືສ້າງວິຫານ. (ອ່ານ 1 ຂ່າວຄາວ 28:20) ຖ້າຊາໂລໂມນບໍ່ກ້າຫານ ລາວກໍຈະຢ້ານຈົນບໍ່ກ້າທີ່ຈະເຮັດຫຍັງ ແລະອາດບໍ່ກ້າທີ່ຈະເລີ່ມວຽກກໍສ້າງ ນັ້ນກໍແຮ່ງຮ້າຍກວ່າການເຮັດວຽກບໍ່ສຳເລັດ.
ເຮົາຕ້ອງໃຫ້ພະເຢໂຫວາຊ່ວຍເຮົາໃຫ້ເປັນຄົນກ້າຫານແລະລົງມືເຮັດວຽກທີ່ພະອົງມອບໝາຍໃຫ້ເຮົາ
5. ເປັນຫຍັງເຮົາຕ້ອງກ້າຫານ?
5 ຄືກັບຊາໂລໂມນ ເຮົາຕ້ອງໃຫ້ພະເຢໂຫວາຊ່ວຍເຮົາໃຫ້ເປັນຄົນກ້າຫານແລະລົງມືເຮັດວຽກທີ່ພະອົງມອບໝາຍໃຫ້ເຮົາ. ດັ່ງນັ້ນ ໃຫ້ເຮົາມາຮຽນຕົວຢ່າງຂອງບາງຄົນໃນອະດີດທີ່ສະແດງຄວາມກ້າຫານ ເພາະນີ້ຈະຊ່ວຍເຮົາໃຫ້ຄິດກ່ຽວກັບວິທີທີ່ເຮົາຈະສະແດງຄວາມກ້າຫານແລະເຮັດວຽກມອບໝາຍໃຫ້ສຳເລັດ.
ຕົວຢ່າງຂອງຄົນທີ່ກ້າຫານ
6. ເຈົ້າປະທັບໃຈຫຍັງກ່ຽວກັບຄວາມກ້າຫານຂອງໂຢເຊບ?
6 ໂຢເຊບສະແດງຄວາມກ້າຫານຕອນທີ່ເມຍຂອງໂປຕີຟາຍົວະເຍົ້າລາວໃຫ້ນອນນຳ. ລາວຮູ້ດີວ່າຖ້າລາວປະຕິເສດເມຍຂອງໂປຕີຟາຊີວິດລາວຈະຕົກຢູ່ໃນອັນຕະລາຍ. ແຕ່ລາວກໍບໍ່ຍອມແພ້ ລາວໄດ້ສະແດງຄວາມກ້າຫານແລະປະຕິເສດທັນທີ.—ຕົ້ນເດີມ 39:10, 12
7. ລາຫາບສະແດງຄວາມກ້າຫານແນວໃດ? (ເບິ່ງຮູບທຳອິດ)
7 ລາຫາບເປັນອີກຕົວຢ່າງໜຶ່ງຂອງຄົນທີ່ກ້າຫານ. ຕອນທີ່ຄົນສອດແນມໄປເຮືອນຂອງລາວໃນເມືອງເຢລິໂກ ລາຫາບອາດຢ້ານຫຼາຍຈົນບໍ່ກ້າຊ່ວຍເຂົາເຈົ້າກໍໄດ້. ແຕ່ຍ້ອນລາວວາງໃຈພະເຢໂຫວາ ລາວຈຶ່ງກ້າເຊື່ອງຄົນສອດແນມ 2 ຄົນແລະຊ່ວຍເຂົາເຈົ້າໃຫ້ຫຼົບໜີໄດ້ຢ່າງປອດໄພ. (ໂຢຊວຍ 2:4, 5, 9, 12-16) ລາຫາບເຊື່ອວ່າພະເຢໂຫວາເປັນພະເຈົ້າທ່ຽງແທ້ ແລະລາວໝັ້ນໃຈວ່າພະເຢໂຫວາຈະໃຫ້ແຜ່ນດິນນີ້ກັບຊາດອິດສະລາແອນແນ່ນອນ. ລາວບໍ່ຍອມໃຫ້ການຢ້ານຄົນອື່ນໆລວມທັງການຢ້ານກະສັດເມືອງເຢລິໂກແລະຄົນຂອງກະສັດມາຢຸດລາວໄວ້. ລາວລົງມືເຮັດຢ່າງກ້າຫານ ເຊິ່ງນັ້ນໄດ້ຊ່ວຍຊີວິດລາວແລະຄອບຄົວໃຫ້ປອດໄພ.—ໂຢຊວຍ 6:22, 23
8. ຄວາມກ້າຫານຂອງພະເຍຊູມີຜົນຕໍ່ພວກອັກຄະສາວົກແນວໃດ?
8 ພວກອັກຄະສາວົກຂອງພະເຍຊູກໍສະແດງຄວາມກ້າຫານຄືກັນ. ເຂົາເຈົ້າໄດ້ເຫັນຄວາມກ້າຫານຂອງພະເຍຊູແລະຮຽນແບບເພິ່ນ. (ມັດທາຍ 8:28-32; ໂຢຮັນ 2:13-17; 18:3-5) ຕອນທີ່ພວກຊາດຶເຊເອນພະຍາຍາມຫ້າມພວກອັກຄະສາວົກບໍ່ໃຫ້ສອນເລື່ອງພະເຍຊູ ເຂົາເຈົ້າກໍບໍ່ຍອມເຮັດຕາມສິ່ງທີ່ພວກນັ້ນຕ້ອງການ.—ກິດຈະການ 5:17, 18, 27-29
9. ໃນ 2 ຕີໂມເຕ 1:7 ອັນໃດຊ່ວຍເຮົາໃຫ້ກ້າຫານ?
9 ໂຢເຊບ ລາຫາບ ພະເຍຊູ ແລະພວກອັກຄະສາວົກຕັ້ງໃຈເຮັດສິ່ງທີ່ຖືກຕ້ອງ. ເຂົາເຈົ້າສະແດງຄວາມກ້າຫານບໍ່ແມ່ນຍ້ອນໝັ້ນໃຈໃນຄວາມສາມາດຂອງຕົວເອງ ແຕ່ຍ້ອນເຂົາເຈົ້າວາງໃຈພະເຢໂຫວາ. ບາງຄັ້ງເຮົາຕ້ອງພົບກັບສະຖານະການທີ່ຕ້ອງມີຄວາມກ້າຫານ ເຮົາກໍຈຳເປັນຕ້ອງເພິ່ງພະເຈົ້າບໍ່ແມ່ນເພິ່ງຕົວເອງ. (ອ່ານ 2 ຕີໂມເຕ 1:7) ໃຫ້ເຮົາມາເບິ່ງວິທີສະແດງຄວາມກ້າຫານໃນ 2 ດ້ານຂອງຊີວິດພວກເຮົາຄື: ໃນຄອບຄົວຂອງເຮົາແລະໃນປະຊາຄົມ.
ສະພາບການຕ່າງໆທີ່ເຮົາຕ້ອງສະແດງຄວາມກ້າຫານ
10. ເປັນຫຍັງໜຸ່ມສາວຄລິດສະຕຽນຕ້ອງກ້າຫານ?
10 ມີຫຼາຍສະພາບການທີ່ໜຸ່ມສາວຄລິດສະຕຽນຕ້ອງສະແດງຄວາມກ້າຫານເພື່ອຈະຮັບໃຊ້ພະເຢໂຫວາ. ເຂົາເຈົ້າສາມາດຮຽນແລະເຮັດຕາມຕົວຢ່າງຄວາມກ້າຫານຂອງຊາໂລໂມນທີ່ໄດ້ຕັດສິນໃຈຢ່າງສະຫຼາດແລະເຮັດວຽກສ້າງວິຫານຈົນສຳເລັດ. ເຖິງວ່າຄົນໜຸ່ມສາວຕ້ອງໃຫ້ພໍ່ແມ່ສອນແລະແນະນຳ ແຕ່ເຂົາເຈົ້າກໍມີເລື່ອງສຳຄັນໆທີ່ຕ້ອງຕັດສິນໃຈດ້ວຍຕົວເອງ. (ສຸພາສິດ 27:11) ຕົວຢ່າງເຊັ່ນ: ເຂົາເຈົ້າຕ້ອງກ້າຕັດສິນໃຈຢ່າງສະຫຼາດໃນການເລືອກໝູ່ ການເລືອກຄວາມບັນເທິງ ການຮັກສາຄວາມສະອາດທາງດ້ານສິນລະທຳ ແລະຕ້ອງຕັດສິນໃຈວ່າຈະຮັບບັບເຕມາເມື່ອໃດ. ເຂົາເຈົ້າຕ້ອງກ້າຫານເພາະເຂົາເຈົ້າບໍ່ຢາກເຮັດຕາມຄວາມຕ້ອງການຂອງຊາຕານຜູ້ທີ່ເຍາະເຍີ້ຍພະເຢໂຫວາ.
11, 12. (ກ) ໂມເຊສະແດງຄວາມກ້າຫານແນວໃດ? (ຂ) ໜຸ່ມສາວຈະຮຽນແບບຕົວຢ່າງຂອງໂມເຊແນວໃດ?
11 ເລື່ອງໜຶ່ງທີ່ສຳຄັນທີ່ໜຸ່ມສາວຕ້ອງຕັດສິນໃຈຄື ເປົ້າໝາຍໃນຊີວິດ. ບາງປະເທດ ໄວໜຸ່ມຫຼາຍຄົນຖືກກົດດັນໃຫ້ຮຽນສູງໆເພື່ອຈະໄດ້ວຽກທີ່ໄດ້ເງິນເດືອນຫຼາຍ. ສ່ວນປະເທດອື່ນໆທີ່ມີສະພາບເສດຖະກິດທີ່ບໍ່ຄ່ອຍດີ ຄົນໜຸ່ມສາວອາດຮູ້ສຶກວ່າຕ້ອງທຸ່ມເທເຮັດວຽກເພື່ອຊ່ວຍຄອບຄົວ. ຖ້າເຈົ້າຕົກຢູ່ໃນສະພາບການແບບນີ້ ໃຫ້ຄິດເຖິງຕົວຢ່າງຂອງໂມເຊ. ລາວໄດ້ຮັບການລ້ຽງດູໂດຍລູກສາວຂອງຟາໂລ ດັ່ງນັ້ນ ລາວອາດມີເປົ້າໝາຍທີ່ຈະເປັນຄົນທີ່ຮັ່ງມີຫຼືເປັນຄົນສຳຄັນກໍໄດ້. ລອງຄິດເບິ່ງວ່າໂມເຊຈະຖືກກົດດັນຫຼາຍສໍ່າໃດຈາກຄອບຄົວ ອາຈານ ແລະທີ່ປຶກສາຂອງລາວທີ່ເປັນຄົນເອຢິບ! ແຕ່ໂມເຊກ້າຫານແລະເລືອກທີ່ຈະຢູ່ກັບປະຊາຊົນຂອງພະເຈົ້າ. ຫຼັງຈາກໂມເຊອອກຈາກເອຢິບແລະປະຖິ້ມຊີວິດທີ່ຫຼູຫຼາຮັ່ງມີ ລາວກໍສະແດງຄວາມກ້າຫານແລະໝາຍເພິ່ງພະເຢໂຫວາ. (ເຫບເລີ 11:24-26) ຜົນກໍຄື ພະເຢໂຫວາໄດ້ອວຍພອນລາວຢ່າງລົ້ນເຫຼືອ ແລະພະອົງຍັງຈະອວຍພອນລາວຫຼາຍກວ່ານັ້ນອີກໃນອະນາຄົດ.
12 ຖ້າຄົນໜຸ່ມສາວສະແດງຄວາມກ້າຫານໂດຍຕັ້ງເປົ້າໝາຍຮັບໃຊ້ພະເຢໂຫວາແລະໃຫ້ລາຊະອານາຈັກຂອງພະອົງມາເປັນສິ່ງສຳຄັນທີ່ສຸດໃນຊີວິດ ພະອົງກໍຈະອວຍພອນແລະຊ່ວຍເຂົາເຈົ້າໃຫ້ມີສິ່ງຈຳເປັນສຳລັບຄອບຄົວ. ໃນສະຕະວັດທຳອິດ ຊາຍໜຸ່ມຕີໂມເຕຈັດໃຫ້ວຽກຮັບໃຊ້ພະເຈົ້າມາເປັນອັນດັບທຳອິດ ແລະເຈົ້າເອງກໍເຮັດໄດ້ຄືກັນ. * (ເບິ່ງໄຂເງື່ອນ)—ອ່ານຟີລິບ 2:19-22
ເຈົ້າຕັ້ງໃຈທີ່ຈະສະແດງຄວາມກ້າຫານໃນທຸກແງ່ມຸມຂອງຊີວິດເຈົ້າບໍ? (ເບິ່ງຂໍ້ 13-17)
13. ຄວາມກ້າຫານຊ່ວຍພີ່ນ້ອງຍິງຄົນໜຶ່ງໃຫ້ເຮັດຕາມເປົ້າໝາຍຂອງລາວແນວໃດ?
13 ພີ່ນ້ອງຍິງຄົນໜຶ່ງໃນລັດແອລະແບມາ ສະຫະລັດອາເມຣິກາຕ້ອງມີຄວາມກ້າຫານເພື່ອຈະຕັ້ງເປົ້າໝາຍຮັບໃຊ້ພະເຈົ້າ. ລາວເລົ່າວ່າ: “ເມື່ອໃຫຍ່ຂຶ້ນ ຂ້ອຍເປັນຄົນຂີ້ອາຍຫຼາຍ. ຂ້ອຍເກືອບຈະບໍ່ກ້າລົມກັບໃຜຢູ່ຫໍປະຊຸມຊໍ້າ ແລະແຮ່ງໄປເຄາະປະຕູເຮືອນລົມກັບຄົນແປກໜ້າຕາມບ້ານຂ້ອຍກໍແຮ່ງບໍ່ກ້າ.” ແຕ່ພໍ່ແມ່ແລະພີ່ນ້ອງໃນປະຊາຄົມຊ່ວຍລາວໃຫ້ມີຄວາມກ້າຫຼາຍຂຶ້ນ ລາວຈຶ່ງສາມາດເປັນໄພໂອເນຍປະຈຳຕາມທີ່ລາວໄດ້ຕັ້ງເປົ້າໝາຍໄວ້. ລາວບອກວ່າ: “ໂລກຂອງຊາຕານສົ່ງເສີມໃຫ້ເຮົາມີເປົ້າໝາຍທີ່ຈະຮຽນສູງໆ ມີຊື່ສຽງ ເງິນຄຳ ແລະມີວັດຖຸສິ່ງຂອງຫຼາຍໆ.” ລາວຮູ້ວ່າຄົນສ່ວນຫຼາຍບໍ່ສາມາດເຮັດຕາມເປົ້າໝາຍເຫຼົ່ານັ້ນໄດ້ແລະການພະຍາຍາມເຮັດແບບນັ້ນມີແຕ່ຈະເຮັດໃຫ້ຕຶງຄຽດແລະບໍ່ມີຄວາມສຸກ. ລາວບອກອີກວ່າ: “ການຮັບໃຊ້ພະເຢໂຫວາເຮັດໃຫ້ຂ້ອຍມີຄວາມສຸກຫຼາຍທີ່ສຸດແລະຮູ້ສຶກປະສົບຜົນສຳເລັດ.”
14. ພໍ່ແມ່ຕ້ອງມີຄວາມກ້າຫານຕອນໃດແດ່?
14 ພໍ່ແມ່ກໍຕ້ອງມີຄວາມກ້າຫານຄືກັນ. ຕົວຢ່າງ: ຫຼາຍຄັ້ງຫົວໜ້າອາດຂໍເຈົ້າໃຫ້ເຮັດວຽກລ່ວງເວລາໃນມື້ທີ່ເຈົ້າມີການນະມັດສະການປະຈຳຄອບຄົວ ໄປປະກາດຫຼືໄປປະຊຸມ. ເຈົ້າຕ້ອງກ້າທີ່ຈະປະຕິເສດຫົວໜ້າເພື່ອເປັນຕົວຢ່າງທີ່ດີໃຫ້ລູກ. ໃນອີກສະພາບການໜຶ່ງ ພໍ່ແມ່ບາງຄົນໃນປະຊາຄົມອາດຍອມໃຫ້ລູກຂອງເຂົາເຈົ້າເຮັດບາງສິ່ງທີ່ເຈົ້າບໍ່ອະນຸຍາດໃຫ້ລູກຂອງເຈົ້າເຮັດ. ຖ້າພໍ່ແມ່ເຫຼົ່ານັ້ນມາຖາມເຫດຜົນທີ່ເຈົ້າຫ້າມ ເຈົ້າຈະກ້າອະທິບາຍເຫດຜົນກັບເຂົາເຈົ້າໃນແບບທີ່ໃຫ້ກຽດບໍ?
15. ໃນຄຳເພງ 37:25 ແລະ ເຫບເລີ 13:5 ຊ່ວຍພໍ່ແມ່ແນວໃດ?
15 ພໍ່ແມ່ຕ້ອງມີຄວາມກ້າຫານເພື່ອຈະຊ່ວຍລູກໃຫ້ຕັ້ງເປົ້າໝາຍໃນການຮັບໃຊ້ພະເຈົ້າແລະເຮັດຕາມເປົ້າໝາຍນັ້ນ. ຕົວຢ່າງ: ພໍ່ແມ່ບາງຄົນອາດຢ້ານທີ່ຈະສະໜັບສະໜູນລູກໃຫ້ເອົາວຽກໄພໂອເນຍເປັນວຽກຫຼັກໃນຊີວິດ ຫຼືໃຫ້ລູກໄປຮັບໃຊ້ໃນເຂດທີ່ມີຄວາມຕ້ອງການຜູ້ປະກາດຫຼາຍກວ່າ ຮັບໃຊ້ໃນເບເທນ ຫຼືຊ່ວຍວຽກໂຄງການກໍ່ສ້າງຫໍປະຊຸມ. ບາງເທື່ອເຂົາເຈົ້າຢ້ານວ່າລູກຈະເບິ່ງແຍງເຂົາເຈົ້າຕອນເຖົ້າບໍ່ໄດ້. ແຕ່ພໍ່ແມ່ທີ່ສະຫຼາດຈະສະແດງຄວາມກ້າຫານແລະເຊື່ອໝັ້ນວ່າພະເຢໂຫວາຈະຮັກສາສັນຍາ. (ອ່ານຄຳເພງ 37:25; ເຫບເລີ 13:5) ພໍ່ແມ່ທີ່ສະແດງຄວາມກ້າຫານແລະໝາຍເພິ່ງໃນພະເຢໂຫວາກໍຈະຊ່ວຍລູກໃຫ້ເຮັດແບບນັ້ນຄືກັນ.—1 ຊາເມືອນ 1:27, 28; 2 ຕີໂມເຕ 3:14, 15
16. ພໍ່ແມ່ບາງຄົນໄດ້ຊ່ວຍລູກແນວໃດໃຫ້ຕັ້ງເປົ້າໝາຍໃນການຮັບໃຊ້ພະເຈົ້າ ແລະສິ່ງນີ້ເຮັດໃຫ້ລູກຂອງເຂົາເຈົ້າໄດ້ຮັບປະໂຫຍດແນວໃດ?
16 ພໍ່ແມ່ຄູ່ໜຶ່ງໃນປະເທດອາເມຣິກາໄດ້ຊ່ວຍລູກໃຫ້ຈົດຈໍ່ໃນການຮັບໃຊ້ພະເຢໂຫວາ. ຜູ້ເປັນຜົວບອກວ່າ: “ກ່ອນທີ່ລູກຂອງເຮົາຈະເວົ້າຫຼືຍ່າງເປັນ ເຮົາມັກຈະເວົ້າກັບລູກກ່ຽວກັບຄວາມສຸກຈາກການຮັບໃຊ້ເປັນໄພໂອເນຍແລະໃນປະຊາຄົມ. ແລະຕອນນີ້ ສິ່ງເຫຼົ່ານີ້ກໍເປັນເປົ້າໝາຍໃນຊີວິດຂອງເຂົາເຈົ້າ.” ລາວເວົ້າອີກວ່າຍ້ອນລູກໄດ້ຕັ້ງເປົ້າໝາຍແລະເຮັດຕາມເປົ້າໝາຍນັ້ນ ສິ່ງນີ້ໄດ້ຊ່ວຍລູກໃຫ້ຕໍ່ສູ້ກັບການລໍ້ໃຈຂອງໂລກຊາຕານແລະຈົດຈໍ່ໃນການຮັບໃຊ້ພະເຢໂຫວາ. ພີ່ນ້ອງຊາຍຄົນໜຶ່ງທີ່ມີລູກ 2 ຄົນເລົ່າວ່າ: “ພໍ່ແມ່ຫຼາຍຄົນໃຊ້ຄວາມພະຍາຍາມແລະຊັບສິນເພື່ອຊ່ວຍລູກໃຫ້ເຮັດຕາມເປົ້າໝາຍຕ່າງໆເຊັ່ນ: ກິລາ ການສຶກສາ ແລະການພັກຜ່ອນຢ່ອນໃຈ. ແຕ່ດີກວ່າຫຼາຍທີ່ເຮົາຈະໃຊ້ຄວາມພະຍາຍາມແລະຊັບສິນເພື່ອຊ່ວຍລູກໃຫ້ເຮັດຕາມເປົ້າໝາຍທີ່ຈະຊ່ວຍເຂົາເຈົ້າໃຫ້ມີສາຍສຳພັນທີ່ດີກັບພະເຢໂຫວາ. ນັ້ນເປັນເລື່ອງທີ່ເຮັດໃຫ້ເຮົາມີຄວາມສຸກແທ້ໆທີ່ໄດ້ເຫັນລູກເຮັດຕາມເປົ້າໝາຍໃນວຽກຮັບໃຊ້ແລະເຮົາຍັງໄດ້ເປັນສ່ວນໜຶ່ງໃນຄວາມສຳເລັດຂອງລູກນຳ. ເຈົ້າສາມາດໝັ້ນໃຈໄດ້ວ່າພໍ່ແມ່ທີ່ຊ່ວຍລູກໃຫ້ມີເປົ້າໝາຍໃນວຽກຮັບໃຊ້ພະເຈົ້າແລະເຮັດຕາມເປົ້າໝາຍນັ້ນຈະໄດ້ຮັບການອວຍພອນຈາກພະເຢໂຫວາ.
ສະແດງຄວາມກ້າຫານໃນປະຊາຄົມ
17. ຂໍໃຫ້ຍົກຕົວຢ່າງວິທີທີ່ພີ່ນ້ອງສະແດງຄວາມກ້າຫານໃນປະຊາຄົມ.
17 ເຮົາຍັງຕ້ອງສະແດງຄວາມກ້າຫານໃນປະຊາຄົມຄືກັນ. ຕົວຢ່າງ: ຜູ້ເຖົ້າແກ່ຕ້ອງກ້າຫານເມື່ອຕ້ອງຈັດການກັບການເຮັດຜິດຮ້າຍແຮງ ຫຼືຕອນຊ່ວຍພີ່ນ້ອງທີ່ ຕ້ອງໄດ້ຮັບການປິ່ນປົວຢ່າງຮີບດ່ວນ. ຜູ້ເຖົ້າແກ່ບາງຄົນຍັງຕ້ອງໄປສຶກສາກັບຄົນທີ່ສົນໃຈຫຼືຈັດການປະຊຸມຢູ່ໃນຄຸກ. ແລ້ວພີ່ນ້ອງຍິງໂສດເດ? ເຂົາເຈົ້າກໍມີຫຼາຍໂອກາດທີ່ຈະສະແດງຄວາມກ້າຫານແລະຮັບໃຊ້ພະເຢໂຫວາໄດ້ ເຊັ່ນ: ເປັນໄພໂອເນຍ ຍ້າຍໄປຮັບໃຊ້ໃນເຂດທີ່ມີຄວາມຈຳເປັນຫຼາຍກວ່າ ເຮັດວຽກໃນພະແນກອອກແບບກໍ່ສ້າງທ້ອງຖິ່ນ ແລະສະໝັກເຂົ້າໂຮງຮຽນຜູ້ປະກາດລາຊະອານາຈັກ ສ່ວນບາງຄົນກໍຖືກເຊີນໃຫ້ເຂົ້າຮ່ວມໂຮງຮຽນກິລຽດ.
18. ພີ່ນ້ອງຍິງທີ່ສູງອາຍຸສະແດງຄວາມກ້າຫານແນວໃດ?
18 ເຮົາຮັກພີ່ນ້ອງຍິງສູງອາຍຸ ແລະເຮົາຍັງຮູ້ສຶກຂອບໃຈທີ່ມີເຂົາເຈົ້າຢູ່ໃນປະຊາຄົມຂອງເຮົາ! ເຖິງວ່າເຂົາເຈົ້າບາງຄົນອາດຮັບໃຊ້ບໍ່ໄດ້ຫຼາຍຄືແຕ່ກ່ອນ ແຕ່ເຂົາເຈົ້າກໍຍັງສະແດງຄວາມກ້າຫານແລະລົງມືເຮັດ. (ອ່ານຕິໂຕ 2:3-5) ຕົວຢ່າງ: ພີ່ນ້ອງຍິງສູງອາຍຸຈຳເປັນຕ້ອງມີຄວາມກ້າຫານຖ້າຜູ້ເຖົ້າແກ່ຂໍໃຫ້ລາວໄປລົມກັບພີ່ນ້ອງຍິງທີ່ອາຍຸນ້ອຍກວ່າໃນເລື່ອງການແຕ່ງຕົວ. ລາວຈະບໍ່ຮ້າຍພີ່ນ້ອງທີ່ນຸ່ງເຄື່ອງແບບນັ້ນ ແຕ່ຈະເວົ້າດີໆເພື່ອໃຫ້ເຫັນວ່າການເລືອກເຄື່ອງນຸ່ງສົ່ງຜົນກະທົບຕໍ່ຄົນອື່ນແນວໃດ. (1 ຕີໂມເຕ 2:9, 10) ເມື່ອພີ່ນ້ອງສູງອາຍຸສະແດງຄວາມຮັກແບບນີ້ ເຂົາເຈົ້າກໍກຳລັງຊ່ວຍປະຊາຄົມໃຫ້ເຂັ້ມແຂງ.
19. (ກ) ພີ່ນ້ອງຊາຍທີ່ຮັບບັບເຕມາແລ້ວຈະສະແດງຄວາມກ້າຫານໄດ້ແນວໃດ? (ຂ) ຟີລິບ 2:13 ແລະ 4:13 ຊ່ວຍພີ່ນ້ອງຊາຍໃຫ້ເປັນຄົນກ້າຫານແນວໃດ?
19 ພີ່ນ້ອງຊາຍທີ່ຮັບບັບເຕມາແລ້ວກໍຕ້ອງສະແດງຄວາມກ້າຫານແລະລົງມືເຮັດຄືກັນ. ຖ້າເຂົາເຈົ້າເຕັມໃຈເຮັດວຽກໃນປະຊາຄົມຫຼາຍຂຶ້ນໂດຍເປັນຜູ້ຊ່ວຍງານຮັບໃຊ້ຫຼືຜູ້ເຖົ້າແກ່ ປະຊາຄົມກໍຈະໄດ້ຮັບປະໂຫຍດຫຼາຍ. (1 ຕີໂມເຕ 3:1) ຢ່າງໃດກໍຕາມ ບາງຄົນອາດລັງເລທີ່ຈະເຮັດໜ້າທີ່ເຫຼົ່ານີ້ ຍ້ອນເຂົາເຈົ້າອາດເຄີຍເຮັດຜິດພາດມາກ່ອນເລີຍຮູ້ສຶກວ່າຕົວເອງບໍ່ຄູ່ຄວນທີ່ຈະເປັນຜູ້ຊ່ວຍງານຮັບໃຊ້ຫຼືຜູ້ເຖົ້າແກ່. ສ່ວນບາງຄົນອາດຮູ້ສຶກວ່າບໍ່ມີຄວາມສາມມາດທີ່ຈະເປັນໄດ້ ຖ້າເຈົ້າຮູ້ສຶກແບບນີ້ ພະເຢໂຫວາຈະຊ່ວຍເຈົ້າໃຫ້ມີຄວາມກ້າຫານໄດ້. (ອ່ານຟີລິບ 2:13; 4:13) ຂໍໃຫ້ຈື່ຕົວຢ່າງຂອງໂມເຊ ລາວກໍຮູ້ສຶກວ່າຕົວເອງບໍ່ມີຄວາມສາມາດທີ່ຈະເຮັດສິ່ງທີ່ພະເຢໂຫວາບອກໃຫ້ເຮັດ. (ອົບພະຍົບ 3:11) ແຕ່ພະເຢໂຫວາຊ່ວຍລາວໃຫ້ກ້າຫານແລະເຮັດສິ່ງທີ່ຕ້ອງເຮັດ. ພີ່ນ້ອງຊາຍທີ່ຮັບບັບເຕມາແລ້ວຈະໄດ້ຄວາມກ້າຫານແບບນັ້ນຈາກໃສ? ໂດຍການອະທິດຖານຂໍຄວາມຊ່ວຍເຫຼືອຈາກພະເຢໂຫວາ ອ່ານຄຳພີໄບເບິນທຸກມື້ ຄິດຕຶກຕອງຕົວຢ່າງຂອງບຸກຄົນໃນຄຳພີໄບເບິນທີ່ສະແດງຄວາມກ້າຫານ ລາວຕ້ອງຖ່ອມໃຈຂໍຜູ້ເຖົ້າແກ່ໃຫ້ຝຶກລາວແລະສະເໜີຊ່ວຍວຽກໃນປະຊາຄົມ. ເຮົາຂໍສະໜັບສະໜູນພີ່ນ້ອງຊາຍທີ່ຮັບບັບເຕມາແລ້ວທຸກຄົນໃຫ້ກ້າຫານແລະລົງມືເຮັດວຽກໜັກເພື່ອປະຊາຄົມ!
“ພະເຢໂຫວາ . . . ຈະສະຖິດຢູ່ຝ່າຍເຈົ້າ”
20, 21. (ກ) ດາວິດເຕືອນໃຈຊາໂລໂມນກ່ຽວກັບເລື່ອງຫຍັງ? (ຂ) ເຮົາສາມາດໝັ້ນໃຈໃນເລື່ອງໃດ?
20 ກະສັດດາວິດເຕືອນໃຈຊາໂລໂມນວ່າພະເຢໂຫວາຈະຢູ່ກັບລາວຈົນກວ່າລາວຈະສ້າງວິຫານແລ້ວ. (1 ຂ່າວຄາວ 28:20) ຊາໂລໂມນຄົງຄິດຕຶກຕອງໃນຄຳເວົ້າເຫຼົ່ານັ້ນຢ່າງແນ່ນອນ ລາວຈຶ່ງບໍ່ຍອມໃຫ້ອາຍຸທີ່ຍັງນ້ອຍແລະຄວາມບໍ່ມີປະສົບການມາຂັດຂວາງລາວບໍ່ໃຫ້ເຮັດວຽກນີ້. ລາວໄດ້ສະແດງຄວາມກ້າຫານຫຼາຍ ແລະດ້ວຍຄວາມຊ່ວຍເຫຼືອຈາກພະເຢໂຫວາ ວິຫານທີ່ສະຫງ່າງາມນີ້ກໍສ້າງສຳເລັດພາຍໃນເຈັດປີເຄິ່ງເທົ່ານັ້ນ.
21 ຄືກັບທີ່ພະເຢໂຫວາໄດ້ຊ່ວຍຊາໂລໂມນ ພະອົງກໍຈະຊ່ວຍເຮົາໃຫ້ມີຄວາມກ້າຫານແລະປະສົບຜົນສຳເລັດໃນການເຮັດວຽກງານຕ່າງໆຄືກັນທັງໃນຄອບຄົວແລະໃນປະຊາຄົມ. (ເອຊາອີ 41:10, 13) ຖ້າເຮົາສະແດງຄວາມກ້າຫານຕອນທີ່ຮັບໃຊ້ພະເຢໂຫວາ ເຮົາກໍໝັ້ນໃຈໄດ້ວ່າພະອົງຈະອວຍພອນເຮົາໃນຕອນນີ້ແລະໃນອະນາຄົດ. ດັ່ງນັ້ນ ຂໍໃຫ້ເຮົາ “ຈົ່ງຊູແຮງຕົວຂຶ້ນ [“ກ້າຫານ,” ລ.ມ.] ແລະ . . . ຈົ່ງເຮັດການ.”
^ ຂໍ້ 12 ເຈົ້າສາມາດເບິ່ງຄຳແນະນຳເລື່ອງການຕັ້ງເປົ້າໝາຍເພື່ອຈະຮັບໃຊ້ພະເຈົ້າໄດ້ໃນບົດຄວາມ “ຈົ່ງຕັ້ງເປົ້າໝາຍຝ່າຍວິນຍານເພື່ອສັນລະເສີນພະຜູ້ສ້າງຂອງເຈົ້າ” ໃນຫໍສັງເກດການ (ພາສາໄທ) 15 ກໍລະກົດ 2004.
