ຝຶກຄວບຄຸມຕົວເອງ
“ຜົນທີ່ເກີດຈາກພະລັງຂອງພະເຈົ້າຄື . . . ການຄວບຄຸມຕົວເອງ.”—ຄາລາຊີ 5:22, 23, ລ.ມ.
ເພງ: 121, 36
1, 2. (ກ) ການບໍ່ຄວບຄຸມຕົວເອງເຮັດໃຫ້ເກີດບັນຫາຫຍັງແດ່? (ຂ) ເປັນຫຍັງເຮົາຕ້ອງຮຽນເລື່ອງການຄວບຄຸມຕົວເອງ?
ການຄວບຄຸມຕົວເອງເປັນຄຸນລັກສະນະໜຶ່ງທີ່ພະເຢໂຫວາສາມາດຊ່ວຍເຮົາໃຫ້ຝຶກຝົນໄດ້. (ຄາລາຊີ 5:22, 23) ພະເຢໂຫວາຄວບຄຸມຕົວເອງໄດ້ຢ່າງສົມບູນແບບ ແຕ່ເຮົາເຮັດບໍ່ໄດ້ເພາະເຮົາບໍ່ສົມບູນ. ທີ່ຈິງ ບັນຫາຫຼາຍຢ່າງທີ່ຜູ້ຄົນປະສົບໃນທຸກມື້ນີ້ສ່ວນຫຼາຍເກີດຈາກການບໍ່ຄວບຄຸມຕົວເອງ ເພາະເຮັດໃຫ້ບາງຄົນຜັດວັນຜັດຍາມ ຮຽນຫຼືເຮັດວຽກໄດ້ບໍ່ດີ. ນອກຈາກນີ້ ການບໍ່ຄວບຄຸມຕົວເອງຍັງອາດເຮັດໃຫ້ເຮົາເປັນຄົນມັກຮ້າຍຫຼືດ່າ ເມົາເຫຼົ້າ ໃຊ້ຄວາມຮຸນແຮງ ຢ່າຮ້າງ ເປັນໜີ້ ຕິດຢາ ຕິດຄຸກ ມີບັນຫາທາງດ້ານອາລົມ ເປັນພະຍາດຕິດຕໍ່ທາງເພດແລະຖືພາໂດຍທີ່ບໍ່ຕັ້ງໃຈ.—ຄຳເພງ 34:11-14
2 ຄົນທີ່ບໍ່ຄວບຄຸມຕົວເອງຈະສ້າງບັນຫາໃຫ້ຕົວເອງແລະຄົນອື່ນ ແລະເມື່ອເວລາຜ່ານໄປ ເຂົາເຈົ້າກໍຈະຄວບຄຸມຕົວເອງໄດ້ໜ້ອຍລົງເລື້ອຍໆ. ແຕ່ເຮົາບໍ່ແປກໃຈໃນເລື່ອງນີ້ ເພາະຄຳພີໄບເບິນບອກໄວ້ລ່ວງໜ້າວ່າ ການບໍ່ຄວບຄຸມຕົວເອງເປັນຫຼັກຖານຢ່າງໜຶ່ງທີ່ຢືນຢັນວ່າເຮົາຢູ່ໃນ “ສະໄໝສຸດທ້າຍ.”—2 ຕີໂມເຕ 3:1-3, ລ.ມ.
3. ເປັນຫຍັງເຮົາຕ້ອງຄວບຄຸມຕົວເອງ?
3 ເປັນຫຍັງເຮົາຕ້ອງຄວບຄຸມຕົວເອງ? ມີ 2 ເຫດຜົນທີ່ສຳຄັນ. ທຳອິດ ຄົນທີ່ຄວບຄຸມອາລົມຄວາມຮູ້ສຶກຂອງຕົວເອງໄດ້ຈະມີບັນຫາໜ້ອຍກວ່າ ລາວຈະສ້າງສາຍສຳພັນທີ່ດີກັບຄົນອື່ນໄດ້ງ່າຍກວ່າແລະຍັງຫຼີກລ່ຽງຄວາມຮູ້ສຶກໃຈຮ້າຍ ກັງວົນ ແລະທໍ້ໃຈ. ທີສອງ ເພື່ອທີ່ເຮົາຈະເປັນເພື່ອນທີ່ດີກັບພະເຈົ້າຕໍ່ໆໄປ ເຮົາຕ້ອງເອົາຊະນະການລໍ້ໃຈແລະຄວບຄຸມຄວາມຕ້ອງການທີ່ຜິດໆ ເຊິ່ງເປັນສິ່ງທີ່ອາດາມແລະເອວາບໍ່ໄດ້ເຮັດ. (ຕົ້ນເດີມ 3:6) ຄືກັບອາດາມແລະເອວາ ຫຼາຍຄົນໃນທຸກມື້ນີ້ມີບັນຫາຮ້າຍແຮງຍ້ອນເຂົາເຈົ້າບໍ່ໄດ້ຄວບຄຸມຕົວເອງ.
4. ຄົນທີ່ມີບັນຫາເລື່ອງການຄວບຄຸມຕົວເອງໄດ້ຮັບກຳລັງໃຈຈາກການຮູ້ເລື່ອງຫຍັງ?
4 ພະເຢໂຫວາຮູ້ວ່າເຮົາບໍ່ສົມບູນແບບຈຶ່ງເປັນເລື່ອງຍາກທີ່ເຮົາຈະຄວບຄຸມຕົວເອງ. ແຕ່ພະອົງຢາກຊ່ວຍເຮົາໃຫ້ເອົາຊະນະຄວາມຕ້ອງການທີ່ຜິດໆ. (1 ກະສັດ 8:46-50) ພະເຢໂຫວາເປັນໝູ່ທີ່ຮັກເຮົາ ພະອົງໃຫ້ກຳລັງໃຈທຸກຄົນທີ່ບາງຄັ້ງມີບັນຫາໃນການຄວບຄຸມຄວາມຮູ້ສຶກແລະຄວາມຕ້ອງການຂອງຕົວເອງ. ໃນບົດຄວາມນີ້ເຮົາຈະຮຽນຈາກຕົວຢ່າງຂອງພະເຢໂຫວາໃນເລື່ອງການຄວບຄຸມຕົວເອງ. ຈາກນັ້ນ ເຮົາຈະມາເບິ່ງຕົວຢ່າງທີ່ດີແລະບໍ່ດີຈາກຄຳພີໄບເບິນ ແລະຈະມາເບິ່ງຄຳແນະນຳທີ່ຊ່ວຍເຮົາໃຫ້ຄວບຄຸມຕົວເອງໄດ້ດີຂຶ້ນ.
ພະເຢໂຫວາວາງຕົວຢ່າງທີ່ດີໃຫ້ເຮົາ
5, 6. ພະເຢໂຫວາວາງຕົວຢ່າງເລື່ອງການຄວບຄຸມຕົວເອງແນວໃດ?
5 ພະເຢໂຫວາຄວບຄຸມຕົວເອງໄດ້ຢ່າງສົມບູນເພາະພະອົງສົມບູນແບບໃນທຸກໆດ້ານ. (ພະບັນຍັດ 32:4) ແຕ່ພວກເຮົາບໍ່ສົມບູນແບບ ດັ່ງນັ້ນ ເພື່ອຈະຮຽນແບບພະອົງໄດ້ດີຂຶ້ນເຮົາຕ້ອງຮຽນກ່ຽວກັບຕົວຢ່າງຂອງພະເຢໂຫວາໃນເລື່ອງການຄວບຄຸມຕົວເອງ. ສິ່ງນີ້ຈະຊ່ວຍເຮົາໃຫ້ເຮັດສິ່ງທີ່ຖືກຕ້ອງເມື່ອປະສົບກັບສະພາບການທີ່ເຮັດໃຫ້ເຮົາຮູ້ສຶກຜິດຫວັງ. ມີຕົວຢ່າງຫຍັງແດ່ທີ່ພະເຢໂຫວາວາງໄວ້ໃນເລື່ອງການຄວບຄຸມຕົວເອງ?
ພະເຢໂຫວາຄວບຄຸມຕົວເອງໄດ້ຢ່າງສົມບູນແບບເພາະພະອົງສົມບູນແບບໃນທຸກໆດ້ານ
6 ລອງຄິດເຖິງສິ່ງທີ່ພະເຢໂຫວາເຮັດເມື່ອຊາຕານກະບົດໃນສວນເອເດນ. ເປັນໄປໄດ້ວ່າການກ່າວຫາຂອງຊາຕານເຮັດໃຫ້ທູດສະຫວັນທີ່ພັກດີຮູ້ສຶກຕົກໃຈ ໃຈຮ້າຍ ແລະກຽດຊັງສິ່ງທີ່ມັນເຮັດ. ເຮົາກໍອາດຮູ້ສຶກແບບນັ້ນຄືກັນເມື່ອຄິດເຖິງຄວາມທຸກຕ່າງໆທີ່ຊາຕານເປັນຕົ້ນເຫດ. ແຕ່ພະເຢໂຫວາບໍ່ໄດ້ຟ້າວເຮັດຫຍັງແບບບໍ່ຄິດ ພະອົງຕອບສະໜອງໃນວິທີທີ່ຖືກຕ້ອງ. ພະເຢໂຫວາບໍ່ຄຽດງ່າຍ ແລະພະອົງຈັດການກັບການກະບົດຂອງຊາຕານຢ່າງຍຸຕິທຳ. (ອົບພະຍົບ 34:6; ໂຢບ 2:2-6) ເປັນຫຍັງພະເຢໂຫວາຍອມປ່ອຍໃຫ້ເວລາຜ່ານໄປ? ເພາະພະອົງບໍ່ຕ້ອງການໃຫ້ໃຜຖືກທຳລາຍ ແຕ່ຢາກ “ໃຫ້ຄົນທັງປວງປະໃຈເກົ່າເອົາໃຈໃໝ່.”—2 ເປໂຕ 3:9
7. ເຮົາໄດ້ຮຽນຫຍັງຈາກຕົວຢ່າງຂອງພະເຢໂຫວາ?
7 ຕົວຢ່າງຂອງພະເຢໂຫວາສອນວ່າ ເຮົາຕ້ອງຄິດໃຫ້ດີກ່ອນຈະເວົ້າແລະບໍ່ຕອບໂຕ້ທັນທີ. ດັ່ງນັ້ນ ເມື່ອເຈົ້າຕ້ອງຕັດສິນໃຈເລື່ອງທີ່ສຳຄັນ ໃຫ້ໃຊ້ເວລາຄິດຢ່າງຮອບຄອບກ່ອນ ອະທິດຖານຂໍສະຕິປັນຍາເພື່ອຈະເວົ້າແລະເຮັດໃນສິ່ງທີ່ຖືກຕ້ອງ. (ຄຳເພງ 141:3) ຕອນທີ່ເຮົາໃຈຮ້າຍ ຮູ້ສຶກບໍ່ດີ ຫຼືຜິດຫວັງ ນັ້ນກໍເປັນເລື່ອງງ່າຍທີ່ເຮົາຈະເວົ້າຫຼືເຮັດແບບທີ່ໃຊ້ແຕ່ອາລົມ. ນີ້ເປັນເຫດຜົນທີ່ເຮັດໃຫ້ຫຼາຍຄົນຕ້ອງເສຍໃຈພາຍຫຼັງຍ້ອນເວົ້າແລະເຮັດແບບບໍ່ຄິດ.—ສຸພາສິດ 14:29; 15:28; 19:2
ຕົວຢ່າງທີ່ດີແລະບໍ່ດີຂອງຜູ້ຮັບໃຊ້ພະເຈົ້າ
8. (ກ) ເຮົາຈະພົບຕົວຢ່າງທີ່ດີໃນເລື່ອງການຄວບຄຸມຕົວເອງໄດ້ຈາກໃສ? (ຂ) ອັນໃດຊ່ວຍໂຢເຊບໃຫ້ຕ້ານທານການລໍ້ໃຈໄດ້? (ເບິ່ງຮູບທຳອິດ.)
8 ມີຕົວຢ່າງຂອງໃຜແດ່ໃນຄຳພີໄບເບິນທີ່ຊ່ວຍເຮົາໃຫ້ຮູ້ວ່າການຄວບຄຸມຕົວເອງມີຄ່າຫຼາຍ? ຕົວຢ່າງໜຶ່ງທີ່ເຮົາອາດຄິດເຖິງແມ່ນໂຢເຊບລູກຊາຍຢາໂຄບ ລາວຕ້ານທານການລໍ້ໃຈເມື່ອຮັບໃຊ້ຢູ່ໃນເຮືອນຂອງໂປຕີຟາຫົວໜ້າທະຫານຮັກສາຂອງກະສັດຟາໂລ. ເມຍຂອງໂປຕີຟາມັກໂຢເຊບຫຼາຍຍ້ອນລາວ “ເປັນຄົນຮູບງາມໜ້າຊົມ.” ນາງພະຍາຍາມຊັກຊວນໂຢເຊບໄປນອນນຳຫຼາຍຕໍ່ຫຼາຍເທື່ອ. ແຕ່ອັນໃດຊ່ວຍໂຢເຊບໃຫ້ຕ້ານທານການລໍ້ໃຈໄດ້? ລາວອາດຄິດລ່ວງໜ້າຢ່າງຮອບຄອບເຖິງຜົນເສຍທີ່ຈະເກີດຂຶ້ນຖ້າລາວເຮັດຕາມໃຈຜູ້ຍິງຄົນນີ້ ແລະເມື່ອເມຍຂອງໂປຕີຟາດຶງເສື້ອຂອງໂຢເຊບ ລາວກໍແລ່ນໜີທັນທີ. ໂຢເຊບບອກວ່າ: “ຜູ້ຂ້າຈະກະທຳບາບໃຫຍ່ດັ່ງນີ້ ແລະທຳຜິດພະເຈົ້າໄດ້ຫຼື?”—ຕົ້ນເດີມ 39:6, 9; ອ່ານສຸພາສິດ 1:10
ໃຫ້ອະທິດຖານຂໍພະເຢໂຫວາຊ່ວຍໃຫ້ເຈົ້າມີສະຕິປັນຍາແລະການຄວບຄຸມຕົວເອງເພື່ອຈະເອົາຊະນະການລໍ້ໃຈນັ້ນໄດ້
9. ເຈົ້າຈະກຽມຕົວແນວໃດເພື່ອເອົາຊະນະການລໍ້ໃຈ?
9 ເຮົາໄດ້ຮຽນຫຍັງຈາກຕົວຢ່າງຂອງໂຢເຊບ? ຖ້າເຮົາຖືກລໍ້ໃຈໃຫ້ຝ່າຝືນກົດໝາຍຂອງພະເຈົ້າ ເຮົາຕ້ອງເອົາຊະນະໃຫ້ໄດ້. ກ່ອນມາເປັນພະຍານພະເຢໂຫວາ ພີ່ນ້ອງບາງຄົນເຄີຍມີບັນຫາເລື່ອງການກິນຫຼາຍໂພດ ດື່ມເຫຼົ້າຫຼາຍ ສູບຢາ ຕິດຢາ ຜິດສິນລະທຳທາງເພດ ຫຼືມີບັນຫາອື່ນໆ. ແມ່ນແຕ່ຫຼັງຈາກຮັບບັບເຕມາແລ້ວ ບາງຄັ້ງເຂົາເຈົ້າກໍຖືກລໍ້ໃຈໃຫ້ກັບໄປເຮັດສິ່ງເຫຼົ່ານັ້ນອີກ. ຖ້າເລື່ອງນີ້ເກີດຂຶ້ນກັບເຈົ້າ ຂໍໃຫ້ຢຸດແລະຄິດເຖິງສາຍສຳພັນຂອງເຈົ້າກັບພະເຢໂຫວາວ່າຈະມີຜົນເສຍແນວໃດຖ້າເຈົ້າຍອມແພ້ການລໍ້ໃຈ. ເຈົ້າອາດຄິດລ່ວງໜ້າເຖິງສະພາບການທີ່ຈະເກີດຂຶ້ນແລະຕັດສິນໃຈໄວ້ວ່າຈະຫຼີກລ່ຽງແນວໃດ. (ຄຳເພງ 26:4, 5; ສຸພາສິດ 22:3) ຖ້າເຈົ້າຖືກທົດສອບແບບນັ້ນ ໃຫ້ອະທິດຖານຂໍພະເຢໂຫວາຊ່ວຍໃຫ້ເຈົ້າມີສະຕິປັນຍາແລະການຄວບຄຸມຕົວເອງເພື່ອຈະເອົາຊະນະການລໍ້ໃຈນັ້ນໄດ້.
10, 11. (ກ) ໜຸ່ມສາວຫຼາຍຄົນຕ້ອງປະສົບກັບຫຍັງຢູ່ໂຮງຮຽນ? (ຂ) ອັນໃດຊ່ວຍພີ່ນ້ອງໜຸ່ມສາວໃຫ້ເອົາຊະນະການລໍ້ໃຈທີ່ໃຫ້ຝ່າຝືນກົດໝາຍຂອງພະເຈົ້າ?
10 ສະພາບການທີ່ເກີດຂຶ້ນກັບໂຢເຊບກໍຄ້າຍກັບສະພາບການທີ່ໜຸ່ມສາວຄລິດສະຕຽນໃນທຸກມື້ນີ້. ຂໍໃຫ້ເບິ່ງຕົວຢ່າງຂອງຄິມ ໝູ່ໃນຫ້ອງຮຽນມັກເວົ້າໂອ້ອວດເລື່ອງການມີເພດສຳພັນໃນຕອນທ້າຍອາທິດທີ່ຜ່ານມາ ຄິມບໍ່ມີເລື່ອງແບບນີ້ມາເລົ່າກັບເຂົາເຈົ້າ. ລາວຍອມຮັບວ່າການແຕກຕ່າງຈາກຄົນອື່ນ ບາງເທື່ອກໍເຮັດໃຫ້ລາວຮູ້ສຶກ “ຖືກຖິ້ມແລະເຫງົາ” ແລະໝູ່ຢູ່ໂຮງຮຽນຄິດວ່າລາວໂງ່ທີ່ບໍ່ມີແຟນ ແຕ່ແທ້ໆແລ້ວຄິມສະຫຼາດ. ລາວຮູ້ວ່າການລໍ້ໃຈໃຫ້ມີເພດສຳພັນນັ້ນຮຸນແຮງຫຼາຍແທ້ໆຕອນທີ່ເປັນໄວໜຸ່ມ. (2 ຕີໂມເຕ 2:22) ນັກຮຽນຄົນອື່ນໆມັກຖາມລາວວ່າຍັງບໍລິສຸດຢູ່ບໍ ນີ້ເຮັດໃຫ້ລາວມີໂອກາດອະທິບາຍວ່າເປັນຫຍັງລາວຈຶ່ງຍັງບໍລິສຸດຢູ່. ພວກເຮົາພູມໃຈທີ່ພີ່ນ້ອງໜຸ່ມສາວທຸກຄົນຕັ້ງໃຈແນ່ວແນ່ທີ່ຈະຕ້ານທານແຮງກົດດັນໃຫ້ເຮັດຜິດສິນລະທຳທາງເພດ ແລະພະເຢໂຫວາກໍພູມໃຈໃນຕົວເຂົາເຈົ້າຄືກັນ!
11 ຄຳພີໄບເບິນຍັງມີຕົວຢ່າງຂອງຄົນທີ່ຄວບຄຸມຕົວເອງບໍ່ໄດ້ເມື່ອຖືກລໍ້ໃຈໃຫ້ເຮັດຜິດສິນລະທຳທາງເພດ ແລະນັ້ນກໍ່ໃຫ້ເກີດຜົນເສຍຫາຍ. ຖ້າເຈົ້າຕົກຢູ່ໃນສະຖານະການດຽວກັນກັບຄິມ ຂໍໃຫ້ຄິດເຖິງຊາຍໂງ່ທີ່ຢູ່ໃນພະທຳສຸພາສິດບົດ 7. ນອກຈາກນັ້ນໃຫ້ຄິດເຖິງອາມນອນແລະຜົນເສຍຫາຍຮ້າຍແຮງທີ່ເກີດຈາກສິ່ງທີ່ລາວເຮັດ. (2 ຊາເມືອນ 13:1, 2, 10-15, 28-32) ພໍ່ແມ່ສາມາດຊ່ວຍລູກໃຫ້ຄວບຄຸມຕົວເອງໄດ້ດີຂຶ້ນແລະສອນເຂົາເຈົ້າໃຫ້ສະຫຼາດຂຶ້ນໂດຍການພິຈາລະນາຕົວຢ່າງເຫຼົ່ານີ້ໃນການນະມັດສະການຄອບຄົວ.
12. (ກ) ໂຢເຊບຄວບຄຸມຄວາມຮູ້ສຶກຂອງຕົວເອງແນວໃດເມື່ອຢູ່ຕໍ່ໜ້າພວກອ້າຍ? (ຂ) ມີສະພາບການອັນໃດແດ່ທີ່ເຮົາຕ້ອງຄວບຄຸມຄວາມຮູ້ສຶກ?
12 ອີກຄັ້ງໜຶ່ງທີ່ໂຢເຊບເປັນຕົວຢ່າງທີ່ດີໃນການຄວບຄຸມຕົວເອງ. ຕອນທີ່ໂຢເຊບພົບພວກອ້າຍທີ່ໄປຊື້ອາຫານຢູ່ເອຢິບ ລາວບໍ່ໄດ້ບອກພວກອ້າຍວ່າລາວແມ່ນໃຜເພື່ອຈະຮູ້ວ່າພວກອ້າຍຄິດແນວໃດແທ້ໆ. ເມື່ອລາວຮູ້ສຶກວ່າຈະທົນບໍ່ໄຫວ ລາວກໍອອກໄປຮ້ອງໄຫ້ໃນຫ້ອງຄົນດຽວ. (ຕົ້ນເດີມ 43:30, 31; 45:1) ຖ້າພີ່ນ້ອງເຮັດບາງຢ່າງໃຫ້ເຈົ້າຮູ້ສຶກເສຍໃຈ ການຮຽນແບບຕົວຢ່າງຂອງໂຢເຊບຈະຊ່ວຍເຈົ້າບໍ່ໃຫ້ເວົ້າຫຼືເຮັດສິ່ງທີ່ອາດເຮັດໃຫ້ເຈົ້າເສຍໃຈພາຍຫຼັງ. (ສຸພາສິດ 16:32; 17:27) ຫຼືເຈົ້າອາດມີຍາດຕິພີ່ນ້ອງທີ່ຖືກຕັດສຳພັນ. ຖ້າເປັນແນວນັ້ນ ເຈົ້າຕ້ອງຄວບຄຸມຄວາມຮູ້ສຶກຂອງເຈົ້າເພື່ອຫຼີກລ່ຽງການພົວພັນກັບເຂົາເຈົ້າໂດຍບໍ່ຈຳເປັນ. ນີ້ອາດເປັນເລື່ອງຍາກ ແຕ່ສິ່ງທີ່ຊ່ວຍເຈົ້າໄດ້ຄືການຈື່ໄວ້ວ່າເຈົ້າກຳລັງຮຽນແບບພະເຢໂຫວາແລະເຮັດຕາມຄຳສັ່ງພະອົງ.
ເຮົາບໍ່ຄວນໝັ້ນໃຈໃນຕົວເອງຫຼາຍເກີນໄປແລະຄິດວ່າເຮົາຈະບໍ່ມີທາງຍອມແພ້ການລໍ້ໃຈ
13. ເຮົາໄດ້ບົດຮຽນຫຍັງຈາກສິ່ງທີ່ເກີດຂຶ້ນກັບດາວິດ?
13 ເຮົາຍັງໄດ້ຮັບປະໂຫຍດຈາກຕົວຢ່າງຂອງກະສັດດາວິດ. ເມື່ອຊາອຶລແລະຊີມີເຮັດໃຫ້ດາວິດໃຈຮ້າຍ ແຕ່ລາວກໍບໍ່ໄດ້ໃຈຮ້າຍຫຼືໃຊ້ອຳນາດຕໍ່ສູ້ເຂົາເຈົ້າ. (1 ຊາເມືອນ 26:9-11; 2 ຊາເມືອນ 16:5-10) ຢ່າງໃດກໍຕາມ ດາວິດບໍ່ສາມາດຄວບຄຸມຕົວເອງໄດ້ຕະຫຼອດ ຄຳພີໄບເບິນເວົ້າເຖິງບາບທີ່ລາວເຮັດກັບບາດເຊບາ ແລະສິ່ງທີ່ລາວເຮັດກັບນາບາລເຊິ່ງເປັນຄົນເຫັນແກ່ຕົວ. (1 ຊາເມືອນ 25:10-13; 2 ຊາເມືອນ 11:2-4) ເຮົາໄດ້ບົດຮຽນທີ່ມີຄ່າຫຍັງຈາກດາວິດ? ທຳອິດ ພີ່ນ້ອງທີ່ເປັນຜູ້ເຖົ້າແກ່ຕ້ອງຄວບຄຸມຕົວເອງເພື່ອຈະບໍ່ໃຊ້ອຳນາດໃນທາງທີ່ຜິດ. ທີສອງ ເຮົາບໍ່ຄວນໝັ້ນໃຈໃນຕົວເອງຫຼາຍເກີນໄປແລະຄິດວ່າເຮົາຈະບໍ່ມີທາງຍອມແພ້ການລໍ້ໃຈ.—1 ໂກລິນໂທ 10:12
ສິ່ງທີ່ເຈົ້າສາມາດເຮັດໄດ້
14. ລຸຍຈິປະສົບກັບເຫດການຫຍັງ? ແລະເປັນຫຍັງເຮົາຄວນຮຽນແບບລາວເມື່ອປະສົບເຫດການແບບນີ້?
14 ເຈົ້າຈະເຮັດຫຍັງໄດ້ແດ່ເພື່ອຄວບຄຸມຕົວເອງໄດ້ດີຂຶ້ນ? ຂໍໃຫ້ຄິດເຖິງເລື່ອງທີ່ເກີດຂຶ້ນກັບລຸຍຈິ. ມີຊາຍຄົນໜຶ່ງຂັບລົດມາຕຳກົ້ນລົດຂອງລາວ. ເຖິງວ່າຊາຍຄົນນັ້ນເປັນຝ່າຍຜິດ ແຕ່ລາວກໍເລີ່ມດ່າລຸຍຈິແລະພະຍາຍາມຫາເລື່ອງຜິດກັນ. ລຸຍຈິໄດ້ອະທິດຖານຂໍພະເຢໂຫວາຊ່ວຍໃຫ້ໃຈເຢັນແລະພະຍາຍາມເຮັດໃຫ້ຊາຍຄົນນັ້ນໃຈເຢັນລົງ ແຕ່ຊາຍຄົນນັ້ນກໍຍັງດ່າລາວບໍ່ຢຸດ. ເຖິງວ່າຈະຢູ່ໃນສະຖານະການທີ່ເຄັ່ງຕຶງແບບນີ້ລຸຍຈິກໍຍັງຄວບຄຸມອາລົມຕົວເອງໄດ້. ອາທິດຕໍ່ມາ ລຸຍຈິໄປກັບຢ້ຽມຍິງຄົນໜຶ່ງ ແລະຜົວຂອງລາວກໍແມ່ນເຈົ້າຂອງລົດຄັນນັ້ນ ຊາຍຄົນນັ້ນອາຍຫຼາຍແລະຂໍໂທດທີ່ເຮັດແບບນັ້ນ. ລາວສະເໜີທີ່ຈະຕິດຕໍ່ບໍລິສັດປະກັນໄພໃຫ້ເພື່ອຈະສ້ອມແປງລົດຂອງລຸຍຈິໄວຂຶ້ນ. ຊາຍຄົນນີ້ຍັງໄດ້ຮ່ວມສົນທະນາເລື່ອງຄຳພີໄບເບິນແລະລາວກໍມັກຫຼາຍ. ເລື່ອງທີ່ເກີດຂຶ້ນເຮັດໃຫ້ລຸຍຈິເຫັນເຖິງຄວາມສຳຄັນຂອງການໃຈເຢັນແລະບໍ່ໂຕ້ຕອບຕອນເກີດອຸບັດເຫດ. ຖ້າລາວໃຈຮ້າຍອາດຈະເກີດຜົນເສຍຫາຍແທ້ໆ.—ອ່ານ 2 ໂກລິນໂທ 6:3, 4
ວິທີທີ່ເຮົາຕອບໂຕ້ສາມາດສົ່ງຜົນຕໍ່ວຽກຮັບໃຊ້ຂອງເຮົາ (ເບິ່ງຂໍ້ 14)
15, 16. ການສຶກສາຄຳພີໄບເບິນຈະຊ່ວຍເຈົ້າກັບຄອບຄົວແນວໃດໃຫ້ຄວບຄຸມຕົວເອງໄດ້ດີຂຶ້ນ?
15 ການສຶກສາຄຳພີໄບເບິນເປັນປະຈຳຢ່າງດີຈະຊ່ວຍເຮົາຄວບຄຸມຕົວເອງໄດ້ດີຂຶ້ນ. ຂໍໃຫ້ຄິດເຖິງສິ່ງທີ່ພະເຈົ້າບອກກັບໂຢຊວຍວ່າ: “ຢ່າໃຫ້ໜັງສືພະບັນຍັດນີ້ຢູ່ຫ່າງໄກຈາກປາກຂອງເຈົ້າ ແລະຈົ່ງຄຶດຕຶກຕອງພະບັນຍັດນີ້ທັງກາງເວັນທັງກາງຄືນເພື່ອເຈົ້າຈະລະວັງໃຫ້ດີຈະກະທຳຕາມສັບພະຄຳທີ່ຂຽນໄວ້ໃນໜັງສືນີ້ ເຫດວ່າເມື່ອນັ້ນເຈົ້າຈະຊະນະໃນທາງທັງຫຼາຍຂອງເຈົ້າ ແລະເມື່ອນັ້ນເຈົ້າຈະຈຳເລີນຂຶ້ນ.” (ໂຢຊວຍ 1:8) ການສຶກສາຄຳພີໄບເບິນຈະຊ່ວຍຝຶກເຈົ້າໃຫ້ຄວບຄຸມຕົວເອງໄດ້ດີຂຶ້ນແນວໃດ?
ການສຶກສາຄຳພີໄບເບິນເປັນປະຈຳຢ່າງດີຈະຊ່ວຍເຮົາຄວບຄຸມຕົວເອງໄດ້ດີຂຶ້ນ
16 ຄຳພີໄບເບິນມີຕົວຢ່າງທີ່ຊ່ວຍໃຫ້ເຮົາຮູ້ວ່າຈະໄດ້ຮັບປະໂຫຍດແນວໃດເມື່ອເຮົາຄວບຄຸມຕົວເອງ ແລະຜົນເສຍທີ່ເກີດຈາກການບໍ່ໄດ້ເຮັດແນວນັ້ນ. ພະເຢໂຫວາໃຫ້ມີຕົວຢ່າງເຫຼົ່ານີ້ເພື່ອພວກເຮົາຈະໄດ້ຮັບປະໂຫຍດ. (ໂລມ 15:4) ດັ່ງນັ້ນ ເປັນເລື່ອງສະຫຼາດທີ່ເຮົາຈະອ່ານ ສຶກສາ ແລະຄິດຢ່າງຖີ່ຖ້ວນກ່ຽວກັບຕົວຢ່າງເຫຼົ່ານັ້ນ ໃຫ້ພະຍາຍາມຮຽນຮູ້ວ່າຈະນຳມາໃຊ້ກັບຕົວເອງແລະຄອບຄົວແນວໃດ ແລະອະທິດຖານຂໍພະເຢໂຫວາຊ່ວຍເຈົ້າໃຫ້ເຮັດຕາມຄຳແນະນຳຈາກຄຳພີໄບເບິນ. ຖ້າຮູ້ວ່າເຈົ້າບໍ່ສາມາດຄວບຄຸມຕົວເອງໄດ້ໃນບາງເລື່ອງກໍໃຫ້ຍອມຮັບມັນ ແລ້ວອະທິດຖານກ່ຽວກັບເລື່ອງນັ້ນ ແລະພະຍາຍາມຊອກວິທີທີ່ຈະປັບປຸງຕົວເອງໃຫ້ດີຂຶ້ນ. (ຢາໂກໂບ 1:5) ນອກຈາກນັ້ນ ໃຫ້ຄົ້ນຄວ້າຄຳແນະນຳໃນໜັງສືຂອງອົງການທີ່ຈະຊ່ວຍເຈົ້າໄດ້.
17. ພໍ່ແມ່ຈະຊ່ວຍລູກແນວໃດໃຫ້ຄວບຄຸມຕົວເອງໄດ້ດີຂຶ້ນ?
17 ເຈົ້າຈະຊ່ວຍລູກແນວໃດໃຫ້ຄວບຄຸມຕົວເອງໄດ້ດີຂຶ້ນ? ພໍ່ແມ່ຮູ້ວ່າລູກບໍ່ໄດ້ເກີດມາພ້ອມກັບຄຸນລັກສະນະນີ້. ດັ່ງນັ້ນ ເຂົາເຈົ້າຕ້ອງສອນລູກໂດຍການວາງຕົວຢ່າງທີ່ດີ. (ເອເຟດ 6:4) ຖ້າເຈົ້າເຫັນວ່າລູກຂາດການຄວບຄຸມຕົວເອງ ຂໍໃຫ້ຖາມຕົວເອງກ່ອນວ່າເຈົ້າໄດ້ວາງຕົວຢ່າງທີ່ດີແລ້ວບໍ? ເຈົ້າສາມາດເປັນຕົວຢ່າງທີ່ດີໄດ້ໂດຍການໄປຮັບໃຊ້ເປັນປະຈຳ ເຂົ້າຮ່ວມການປະຊຸມແລະເຮັດນະມັດສະການຄອບຄົວເປັນປະຈຳ. ນອກຈາກນັ້ນ ຢ່າຢ້ານທີ່ຈະເວົ້າຄຳວ່າ: ‘ບໍ່’ ກັບລູກເມື່ອເຫັນວ່າຈຳເປັນ! ພະເຢໂຫວາວາງຂອບເຂດໃຫ້ອາດາມແລະເອວາ. ຂອບເຂດເຫຼົ່ານັ້ນຊ່ວຍເຂົາເຈົ້າໃຫ້ນັບຖືອຳນາດຂອງພະເຢໂຫວາ. ຄ້າຍກັນ ເມື່ອພໍ່ແມ່ສັ່ງສອນແລະເປັນຕົວຢ່າງທີ່ດີໃຫ້ລູກ ເຂົາເຈົ້າກໍກຳລັງຝຶກລູກໃຫ້ຄວບຄຸມຕົວເອງໄດ້ດີຂຶ້ນ. ອີກສິ່ງໜຶ່ງທີ່ສຳຄັນທີ່ສຸດສຳລັບລູກຄື ເຈົ້າຕ້ອງສອນລູກໃຫ້ນັບຖືມາດຕະຖານຂອງພະເຈົ້າແລະເຕັມໃຈຢູ່ໃຕ້ອຳນາດຂອງພະອົງ.—ອ່ານສຸພາສິດ 1:5, 7, 8
18. ເປັນຫຍັງເຮົາຕ້ອງເລືອກໝູ່ຢ່າງສະຫຼາດ?
18 ບໍ່ວ່າເຮົາຈະເປັນພໍ່ແມ່ຫຼືບໍ່ກໍຕາມ ເຮົາທຸກຄົນຕ້ອງເລືອກໝູ່ຢ່າງສະຫຼາດ. ຖ້າໝູ່ຂອງເຈົ້າຮັກພະເຢໂຫວາ ເຂົາເຈົ້າຈະສະໜັບສະໜູນເຈົ້າໃຫ້ມີເປົ້າໝາຍທີ່ດີແລະຫຼີກລ່ຽງບັນຫາ. (ສຸພາສິດ 13:20) ຕົວຢ່າງທີ່ດີໃນເລື່ອງການຄວບຄຸມຕົວເອງຂອງໝູ່ຈະຊ່ວຍເຈົ້າໃຫ້ຢາກຮຽນແບບ ແລະຕົວຢ່າງທີ່ດີຂອງເຈົ້າກໍຈະຊ່ວຍໝູ່ໃຫ້ຢາກຮຽນແບບຄືກັນ. ຖ້າເຮົາຄວບຄຸມຕົວເອງໄດ້ ເຮົາຈະເປັນທີ່ຍອມຮັບຂອງພະເຈົ້າ ມີຊີວິດທີ່ມີຄວາມສຸກ ແລະມີຄວາມສຳພັນທີ່ດີກັບຄົນທີ່ເຮົາຮັກ.
