ຈຸດປະສົງຂອງພະເຢໂຫວາຈະສຳເລັດ!
“ເຮົາໄດ້ບອກແລ້ວແລະເຮົາຈະໃຫ້ການນັ້ນບັງເກີດມາ. ເຮົາໄດ້ໝາຍໃຈແລ້ວແລະເຮົາຈະໃຫ້ສຳເລັດ.”—ເອຊາອີ 46:11
ເພງ: 147, 149
1, 2. (ກ) ພະເຢໂຫວາບອກໃຫ້ເຮົາຮູ້ເລື່ອງຫຍັງ? (ຂ) ໃນເອຊາອີ 46:10, 11 ແລະ 55:11 ມີຄຳສັນຍາອັນໃດ?
ຄຳເວົ້າປະໂຫຍກທຳອິດໃນຄຳພີໄບເບິນເປັນຄຳເວົ້າທີ່ງ່າຍໆແຕ່ມີຄວາມໝາຍເລິກເຊິ່ງ ປະໂຫຍກນັ້ນເວົ້າວ່າ: “ເມື່ອຕົ້ນເດີມ ພະເຈົ້າໄດ້ນິລະມິດສ້າງຟ້າທັງຫຼາຍແລະແຜ່ນດິນໂລກ.” (ຕົ້ນເດີມ 1:1) ພະເຢໂຫວາສ້າງຫຼາຍສິ່ງໃນເອກະພົບ ແຕ່ເຮົາໄດ້ເຫັນພຽງບາງສ່ວນເທົ່ານັ້ນ ແລະເຮົາກໍເຂົ້າໃຈພຽງໜ້ອຍດຽວກ່ຽວກັບເລື່ອງອະວະກາດ ແສງ ແລະແຮງດຶງດູດ. (ຜູ້ເທສະໜາປ່າວປະກາດ 3:11) ແຕ່ພະເຢໂຫວາບອກໃຫ້ເຮົາຮູ້ເລື່ອງຈຸດປະສົງຂອງພະອົງສຳລັບໂລກນີ້ແລະມະນຸດ. ພະເຢໂຫວາໄດ້ສ້າງມະນຸດຕາມຮູບແບບຂອງພະອົງແລະຢາກໃຫ້ເຂົາເຈົ້າມີຊີວິດທີ່ມີຄວາມສຸກໃນໂລກນີ້. (ຕົ້ນເດີມ 1:26) ເຂົາເຈົ້າຈະເປັນລູກຂອງພະອົງ ແລະພະອົງຈະເປັນພໍ່ຂອງເຂົາເຈົ້າ.
2 ໃນຕົ້ນເດີມບົດທີ 3 ເຮົາໄດ້ຮູ້ວ່າຈຸດປະສົງຂອງພະເຢໂຫວາຖືກທ້າທາຍ. (ຕົ້ນເດີມ 3:1-7) ຢ່າງໃດກໍຕາມ ພະອົງສາມາດແກ້ໄຂບັນຫາທຸກຢ່າງໄດ້ ແລະບໍ່ມີໃຜຈະຂັດຂວາງພະອົງໄດ້. (ເອຊາອີ 46:10, 11; 55:11) ເຮົາໝັ້ນໃຈໄດ້ເລີຍວ່າຈຸດປະສົງດັ້ງເດີມຂອງພະເຢໂຫວາຈະສຳເລັດແທ້ໆໃນເວລາທີ່ເໝາະສົມ!
3. (ກ) ຄຳສອນເລື່ອງໃດທີ່ສຳຄັນເຊິ່ງຊ່ວຍເຮົາໃຫ້ເຂົ້າໃຈຂ່າວສານໃນຄຳພີໄບເບິນ? (ຂ) ເປັນຫຍັງເຮົາຈຶ່ງພິຈາລະນາຄຳສອນເຫຼົ່ານີ້ໃນຕອນນີ້? (ຄ) ເຮົາຈະເບິ່ງຄຳຖາມຫຍັງແດ່?
ລືກາ 22:19, 20) ຖ້າຄົນເຫຼົ່ານັ້ນເຂົ້າຮ່ວມໃນງານທີ່ສຳຄັນນີ້ ເຂົາເຈົ້າກໍຈະຮຽນຮູ້ຫຼາຍຂຶ້ນກ່ຽວກັບຈຸດປະສົງທີ່ດີເລີດຂອງພະເຈົ້າ. ດັ່ງນັ້ນ ຕອນນີ້ຈຶ່ງເປັນເວລາເໝາະສົມທີ່ຈະຄິດເຖິງຄຳຖາມທີ່ສະເພາະເຈາະຈົງເຊິ່ງເຮົາສາມາດໃຊ້ເພື່ອກະຕຸ້ນຄົນອື່ນໃຫ້ເຂົ້າຮ່ວມງານນີ້. ໃນບົດຄວາມນີ້ ເຮົາຈະເບິ່ງສາມຄຳຖາມ ນັ້ນຄື ພະເຢໂຫວາມີຈຸດປະສົງແນວໃດສຳລັບໂລກນີ້ແລະມະນຸດ? ມີຫຍັງຜິດພາດບໍ? ແລະເປັນຫຍັງຄ່າໄຖ່ຂອງພະເຍຊູຈຶ່ງເປັນສິ່ງສຳຄັນເພື່ອເປີດໂອກາດໃຫ້ຈຸດປະສົງຂອງພະເຈົ້າສຳເລັດເປັນຈິງ?
3 ເຮົາຮູ້ວ່າພະເຢໂຫວາມີຈຸດປະສົງແນວໃດສຳລັບໂລກນີ້ແລະມະນຸດ ແລະທັງຮູ້ວ່າພະເຍຊູມີບົດບາດແນວໃດໃນຈຸດປະສົງນັ້ນ. ເລື່ອງນີ້ເປັນຄວາມຈິງທີ່ສຳຄັນຫຼາຍໃນຄຳພີໄບເບິນ ແລະເບິ່ງຄືວ່າເປັນຄວາມຈິງເລື່ອງທຳອິດທີ່ເຮົາໄດ້ຮຽນເມື່ອເລີ່ມສຶກສາ. ຕອນນີ້ເຮົາຢາກຊ່ວຍຄົນອື່ນໃຫ້ຮຽນຮູ້ຄຳສອນທີ່ສຳຄັນເຫຼົ່ານີ້. ເຮົາມີໂອກາດພິເສດທີ່ຈະເຮັດເຊັ່ນນັ້ນໃນໄລຍະນີ້ຂອງທຸກໆປີ ເມື່ອເຮົາເຊີນຄົນອື່ນໃຫ້ເຂົ້າຮ່ວມການລະນຶກເຖິງການຕາຍຂອງພະເຍຊູ. (ຜູ້ສ້າງມີຈຸດປະສົງແນວໃດ?
4. ສິ່ງທີ່ພະເຢໂຫວາສ້າງ ‘ເລົ່າເລື່ອງລັດສະໝີຂອງພະອົງ’ ແນວໃດ?
4 ພະເຢໂຫວາເປັນຜູ້ສ້າງທີ່ໜ້າອັດສະຈັນໃຈ ເພາະທຸກສິ່ງທີ່ພະອົງສ້າງແມ່ນດີທີ່ສຸດ. (ຕົ້ນເດີມ 1:31; ເຢເຣມີ 10:12) ເຮົາຮຽນຮູ້ຫຍັງຈາກຄວາມສວຍງາມແລະຄວາມເປັນລະບຽບໃນສິ່ງທີ່ພະອົງສ້າງ? ເຮົາຮຽນຮູ້ວ່າທຸກສິ່ງທີ່ພະເຢໂຫວາສ້າງ ນັບແຕ່ສິ່ງນ້ອຍໆໄປເຖິງສິ່ງທີ່ໃຫຍ່ທີ່ສຸດ ແມ່ນມີປະໂຫຍດ. ນອກຈາກນັ້ນ ເມື່ອຄິດເຖິງຈຸລັງຂອງມະນຸດເຊິ່ງໜ້າອັດສະຈັນໃຈ ຫຼືເຫັນແອນ້ອຍເກີດໃໝ່ ຫຼືເບິ່ງຕາເວັນຕົກດິນທີ່ສວຍງາມ ເຮົາຮູ້ສຶກແນວໃດ? ເຮົາຊື່ນຊົມໃນສິ່ງເຫຼົ່ານີ້ເພາະພະເຢໂຫວາສ້າງເຮົາໃຫ້ມີຄວາມສາມາດທີ່ຈະຮູ້ຈັກສິ່ງທີ່ສວຍງາມແທ້ໆ.—ອ່ານຄຳເພງ 19:1; 104:24
5. ພະເຢໂຫວາເຮັດຫຍັງເພື່ອໃຫ້ທຸກສິ່ງທີ່ພະອົງສ້າງເຮັດວຽກຮ່ວມກັນໄດ້ດີ?
5 ພະເຢໂຫວາໄດ້ວາງຂອບເຂດຢ່າງດີສຳລັບທຸກສິ່ງທີ່ພະອົງສ້າງ. ພະອົງສ້າງກົດຕ່າງໆໃນທຳມະຊາດແລະກົດທາງສິນລະທຳ. ພະອົງສ້າງກົດເຫຼົ່ານີ້ເພື່ອທຸກສິ່ງໃນເອກະພົບຈະເຮັດວຽກຮ່ວມກັນໄດ້ດີ. (ຄຳເພງ 19:7-9) ທຸກສິ່ງໃນເອກະພົບມີທີ່ຕັ້ງແລະໜ້າທີ່ຂອງມັນ. ຕົວຢ່າງເຊັ່ນ: ກົດແຮງດຶງດູດເຮັດໃຫ້ຊັ້ນບັນຍາກາດຢູ່ໃກ້ກັບໂລກ ແລະມັນຄວບຄຸມມະຫາສະໝຸດແລະກະແສນໍ້າ. ຖ້າບໍ່ມີແຮງດຶງດູດ ສິ່ງທີ່ມີຊີວິດກໍຈະບໍ່ສາມາດຢູ່ໃນໂລກນີ້ໄດ້. ຂອບເຂດຕ່າງໆທີ່ພະເຢໂຫວາວາງໄວ້ໃນທຳມະຊາດສົ່ງຜົນໃຫ້ເກີດຄວາມເປັນລະບຽບທີ່ດີໃນເອກະພົບ. ເລື່ອງນີ້ສະແດງໃຫ້ເຫັນວ່າພະອົງມີຈຸດປະສົງສຳລັບໂລກນີ້ແລະມະນຸດ. ໃນການປະກາດ ເຮົາສາມາດຊ່ວຍຄົນອື່ນໃຫ້ຮູ້ຈັກຜູ້ສ້າງເອກະພົບທີ່ໜ້າອັດສະຈັນນີ້.—ຄຳປາກົດ 4:11
6, 7. ພະເຢໂຫວາໃຫ້ອາດາມແລະເອວາມີສິ່ງທີ່ດີອັນໃດແດ່?
6 ພະເຢໂຫວາມີຈຸດປະສົງໃຫ້ມະນຸດມີຊີວິດຕະຫຼອດໄປໃນໂລກນີ້. (ຕົ້ນເດີມ 1:28; ຄຳເພງ 37:29) ພະອົງໃຈກວ້າງແລະໄດ້ໃຫ້ອາດາມແລະເອວາມີສິ່ງທີ່ດີຫຼາຍຢ່າງ. (ອ່ານຢາໂກໂບ 1:17) ພະອົງໃຫ້ເຂົາເຈົ້າມີສິດໃນການເລືອກແລະມີຄວາມສາມາດທີ່ຈະຮັກ ຫາເຫດຜົນ ແລະມີຄວາມສຸກໃນສາຍສຳພັນກັບຄົນອື່ນ. ພະເຢໂຫວາເວົ້າກັບອາດາມແລະສັ່ງລາວໃຫ້ເຮັດສິ່ງທີ່ດີ. ອາດາມຍັງຮຽນຮູ້ວິທີເບິ່ງແຍງຕົວເອງ ສັດ ແລະແຜ່ນດິນໂລກ. (ຕົ້ນເດີມ 2:15-17, 19, 20) ນອກຈາກນັ້ນ ພະເຢໂຫວາໄດ້ໃຫ້ອາດາມແລະເອວາມີຄວາມສາມາດໃນການຊີມລົດຊາດ ການສຳພັດ ການເບິ່ງເຫັນ ການໄດ້ຍິນ ແລະການດົມກິ່ນສິ່ງດີໆທີ່ພະອົງສ້າງເພື່ອເຂົາເຈົ້າ. ໂດຍວິທີນີ້ ທັງ ສອງຈະມີຄວາມສຸກກັບຊີວິດໃນບ້ານທີ່ສວຍງາມຂອງຕົວເອງ. ອາດາມກັບເອວາມີວຽກທີ່ໜ້າພໍໃຈມາກມາຍໃຫ້ເຮັດ ແລະເຂົາເຈົ້າສາມາດຮຽນຮູ້ແລະຄົ້ນພົບສິ່ງໃໝ່ໆຕະຫຼອດໄປ.
7 ມີສິ່ງໃດອີກທີ່ເປັນຈຸດປະສົງຂອງພະເຢໂຫວາ? ພະອົງໃຫ້ອາດາມແລະເອວາສາມາດມີລູກທີ່ສົມບູນແບບ ແລະລູກຫຼານຂອງເຂົາເຈົ້າກໍຈະມີລູກທີ່ສົມບູນແບບຕໍ່ໆໄປຈົນໃຫ້ມະນຸດເຕັມໂລກນີ້. ພະເຢໂຫວາຢາກໃຫ້ພໍ່ແມ່ຮັກລູກຂອງຕົນຄືກັບທີ່ພະອົງຮັກອາດາມແລະເອວາ. ພະອົງມອບໂລກນີ້ ພ້ອມທັງທຸກສິ່ງທີ່ມີຄ່າແລະສວຍງາມໃນນັ້ນໃຫ້ກັບຄອບຄົວມະນຸດ ດັ່ງນັ້ນ ໂລກນີ້ຈະເປັນບ້ານຂອງເຂົາເຈົ້າຕະຫຼອດໄປ.—ຄຳເພງ 115:16
ມີຫຍັງຜິດພາດບໍ?
8. ເປັນຫຍັງພະເຈົ້າຈຶ່ງຕັ້ງກົດທີ່ກ່າວໃນຕົ້ນເດີມ 2:16, 17 ໃຫ້ອາດາມແລະເອວາ?
8 ສິ່ງຕ່າງໆບໍ່ໄດ້ເກີດຜົນທັນທີຕາມທີ່ພະເຢໂຫວາຕ້ອງການ. ມີຫຍັງເກີດຂຶ້ນ? ພະເຢໂຫວາຕັ້ງກົດງ່າຍໆຂໍ້ໜຶ່ງໃຫ້ອາດາມແລະເອວາເພື່ອເຂົາເຈົ້າຈະຮູ້ຈັກຂີດຈຳກັດໃນອິດສະຫຼະພາບຂອງຕົວເອງ. ພະອົງບອກວ່າ: ‘ໝາກໄມ້ທຸກຢ່າງໃນສວນນີ້ເຈົ້າກິນໄດ້. ແຕ່ວ່າຕົ້ນໄມ້ແຫ່ງຄວາມຮູ້ການດີແລະຊົ່ວ ເຈົ້າຢ່າຊູ່ກິນ ເຫດວ່າໃນວັນໃດທີ່ເຈົ້າກິນແຕ່ໝາກໄມ້ນັ້ນ ເຈົ້າຈະຕາຍໄປເປັນແທ້.’ (ຕົ້ນເດີມ 2:16, 17) ເຂົາເຈົ້າສາມາດເຂົ້າໃຈກົດຂໍ້ນີ້ໄດ້ງ່າຍໆ ແລະມັນກໍບໍ່ຍາກທີ່ຈະເຊື່ອຟັງ ເພາະໃນສວນນັ້ນມີອາຫານຫຼາຍຢ່າງທີ່ແຊບໆໃຫ້ກິນ.
9, 10. (ກ) ຊາຕານກ່າວຫາພະເຢໂຫວາແນວໃດ? (ຂ) ອາດາມແລະເອວາໄດ້ຕັດສິນໃຈເຮັດຫຍັງ? (ເບິ່ງຮູບທຳອິດ)
9 ຊາຕານພະຍາມານໃຊ້ງູເພື່ອຕົວະເອວາບໍ່ໃຫ້ເຊື່ອຟັງພະເຢໂຫວາພໍ່ຂອງລາວ. (ອ່ານຕົ້ນເດີມ 3:1-5; ຄຳປາກົດ 12:9) ມັນຕັ້ງຂໍ້ສົງໄສກ່ຽວກັບຄວາມຈິງທີ່ວ່າພະເຈົ້າບໍ່ອະນຸຍາດໃຫ້ລູກຂອງພະອົງທີ່ເປັນມະນຸດກິນ “ໝາກໄມ້ທຸກຢ່າງໃນສວນ.” ນັ້ນເປັນຄືກັບມັນກຳລັງເວົ້າວ່າ: ‘ເຈົ້າໝາຍຄວາມວ່າເຈົ້າບໍ່ສາມາດເຮັດໃນສິ່ງທີ່ຕົວເອງຕ້ອງການບໍ?’ ຕໍ່ມາມັນບອກເອວາວ່າ: “ພວກເຈົ້າຈະບໍ່ຕາຍດອກ.” ນັ້ນເປັນຄຳຕົວະ. ຈາກນັ້ນຊາຕານພະຍາຍາມລໍ້ລວງເອວາວ່າ ລາວບໍ່ຕ້ອງເຊື່ອຟັງພະເຈົ້າ. ມັນເວົ້າວ່າ: “ພະເຈົ້າຮູ້ຢູ່ວ່າພວກເຈົ້າຫາກກິນໝາກໄມ້ນັ້ນໃນວັນໃດ ຕາຂອງພວກເຈົ້າຈະມືນແຈ້ງຂຶ້ນ.” ຊາຕານກຳລັງໝາຍຄວາມວ່າ ພະເຢໂຫວາບໍ່ຢາກໃຫ້ເຂົາເຈົ້າກິນໝາກໄມ້ນັ້ນເພາະຈະເຮັດໃຫ້ເຂົາເຈົ້າມີຄວາມຮູ້ບາງຢ່າງທີ່ພິເສດ. ໃນທີ່ສຸດ ຊາຕານໃຫ້ຄຳສັນຍາຕົວະທີ່ວ່າ: “ພວກເຈົ້າຈະເປັນເໝືອນພະເຈົ້າ ຮູ້ຈັກການດີແລະຊົ່ວ.”
10 ອາດາມແລະເອວາຕ້ອງຕັດສິນໃຈວ່າຈະເຮັດແນວໃດ. ຈະເຊື່ອຟັງພະເຈົ້າບໍ ຫຼືເຊື່ອຟັງງູ? ໜ້າເສົ້າໃຈ ທັງສອງຕັດສິນໃຈທີ່ຈະບໍ່ເຊື່ອຟັງພະເຈົ້າ ເຊິ່ງຖືວ່າເປັນການປະຕິເສດພະອົງທີ່ເປັນພໍ່ຂອງເຂົາເຈົ້າແລະໄປຢູ່ຝ່າຍຊາຕານ. ຕອນນີ້ເຂົາເຈົ້າຢູ່ດ້ວຍຕົວເອງ ນັ້ນຄືບໍ່ໄດ້ຮັບການປົກປ້ອງຈາກພະເຢໂຫວາ.—ຕົ້ນເດີມ 3:6-13
11. ເປັນຫຍັງພະເຢໂຫວາບໍ່ສາມາດເມີນເສີຍຕໍ່ຄວາມຜິດຂອງອາດາມແລະເອວາ?
11 ເມື່ອອາດາມແລະເອວາລະເມີດກົດໝາຍຂອງພະເຈົ້າ ທັງສອງຈຶ່ງບໍ່ສົມບູນແບບອີກຕໍ່ໄປ. ຍິ່ງກວ່ານັ້ນ ເຂົາເຈົ້າກາຍເປັນສັດຕູຂອງພະເຈົ້າເພາະພະອົງກຽດຊັງຄວາມຊົ່ວຮ້າຍ ແລະ ‘ຕາຂອງພະອົງບໍລິສຸດໂພດທີ່ຈະເຫັນການຊົ່ວຮ້າຍ.’ (ຫາບາກຸກ 1:13) ຖ້າພະເຢໂຫວາບໍ່ໄດ້ເຮັດບາງສິ່ງກ່ຽວກັບຄວາມຜິດຂອງອາດາມແລະເອວາ ສິ່ງຕ່າງໆທີ່ພະອົງສ້າງກໍຈະຖືກຄຸກຄາມ. ທັງທູດສະຫວັນແລະມະນຸດກໍຈະສົງໄສວ່າເຂົາເຈົ້າສາມາດໄວ້ວາງໃຈຄຳເວົ້າຂອງພະອົງໄດ້ແທ້ໆຫຼືບໍ່. ແຕ່ພະເຢໂຫວາສັດຊື່ຕໍ່ມາດຕະຖານຂອງພະອົງ ແລະບໍ່ເຄີຍລະເມີດມາດຕະຖານເຫຼົ່ານັ້ນ. (ຄຳເພງ ) ເຖິງວ່າອາດາມແລະເອວາມີສິດໃນການເລືອກ ແຕ່ເຂົາເຈົ້າບໍ່ສາມາດຫຼີກລ່ຽງຜົນໄດ້ຮັບຈາກການຂັດຂືນພະເຢໂຫວາ. ໃນທີ່ສຸດທັງສອງກໍຕາຍແລະກັບໄປເປັນຂີ້ຝຸ່ນດິນທີ່ເຂົາເຈົ້າຖືກສ້າງຂຶ້ນມາ.— 119:142ຕົ້ນເດີມ 3:19
12. ມີຫຍັງເກີດຂຶ້ນກັບລູກຫຼານຂອງອາດາມ?
12 ເມື່ອອາດາມແລະເອວາກິນໝາກໄມ້ ພະເຢໂຫວາບໍ່ສາມາດຍອມຮັບເຂົາເຈົ້າອີກຕໍ່ໄປວ່າເປັນສ່ວນໜຶ່ງໃນຄອບຄົວພະອົງ. ພະອົງໃຫ້ເຂົາເຈົ້າໄປຢູ່ນອກສວນເອເດນໂດຍທີ່ບໍ່ສາມາດກັບເຂົ້າມາໃນສວນນັ້ນໄດ້ອີກ. (ຕົ້ນເດີມ 3:23, 24) ພະເຢໂຫວາໃຫ້ທັງສອງປະສົບກັບຜົນໄດ້ຮັບຈາກການຕັດສິນໃຈຂອງເຂົາເຈົ້າ. (ອ່ານພະບັນຍັດ 32:4, 5) ຜົນກໍຄື ເຂົາເຈົ້າບໍ່ສາມາດຮຽນແບບຄຸນລັກສະນະທີ່ດີພ້ອມຂອງພະເຢໂຫວາໄດ້ອີກຕໍ່ໄປ. ອາດາມສູນເສຍອະນາຄົດທີ່ດີເລີດບໍ່ແມ່ນສຳລັບຕົວເອງເທົ່ານັ້ນ ແຕ່ລວມເຖິງລູກຫຼານຂອງລາວນຳອີກ. ລາວໃຫ້ໄດ້ແຕ່ຄວາມບໍ່ສົມບູນແບບ ບາບ ແລະຄວາມຕາຍເທົ່ານັ້ນ. (ໂລມ 5:12) ອາດາມເຮັດໃຫ້ເຂົາເຈົ້າພາດໂອກາດທີ່ຈະມີຊີວິດຕະຫຼອດໄປ. ອາດາມແລະເອວາບໍ່ສາມາດມີລູກທີ່ເປັນຄົນສົມບູນແບບ ແລະລູກຫຼານຂອງເຂົາເຈົ້າກໍເຊັ່ນດຽວກັນ. ນັບຕັ້ງແຕ່ຊາຕານເຮັດໃຫ້ທັງສອງເປັນສັດຕູກັບພະເຈົ້າ ມັນກໍພະຍາຍາມຊັກຈູງມະນຸດທຸກຄົນໃຫ້ເຮັດແບບດຽວກັນນັ້ນ.—ໂຢຮັນ 8:44
ຄ່າໄຖ່ເຮັດໃຫ້ເປັນໄປໄດ້ທີ່ເຮົາຈະມີສາຍສຳພັນກັບພະເຈົ້າ
13. ພະເຢໂຫວາຢາກໃຫ້ມະນຸດມີສິ່ງໃດ?
13 ເຖິງວ່າອາດາມແລະເອວາໄດ້ປະຖິ້ມພະເຢໂຫວາ ແຕ່ພະອົງຍັງຮັກມະນຸດແລະຢາກໃຫ້ເຂົາເຈົ້າມີສາຍສຳພັນທີ່ດີກັບພະອົງ. ພະເຢໂຫວາບໍ່ຢາກໃຫ້ຄົນໃດຄົນໜຶ່ງຕາຍ. (2 ເປໂຕ 3:9) ດັ່ງນັ້ນ ພະອົງຈຶ່ງຈັດຕຽມທັນທີເພື່ອໃຫ້ມະນຸດສາມາດມີສາຍສຳພັນກັບພະອົງອີກຄັ້ງໜຶ່ງ. ພະເຢໂຫວາຈະເຮັດແບບນັ້ນໄດ້ແນວໃດໂດຍທີ່ບໍ່ຂັດກັບມາດຕະຖານຂອງພະອົງ? ໃຫ້ເຮົາມາເບິ່ງນຳກັນ.
ຫຼັງຈາກອາດາມແລະເອວາໄດ້ປະຖິ້ມພະເຢໂຫວາ ພະອົງຈຶ່ງຈັດຕຽມທັນທີເພື່ອໃຫ້ມະນຸດສາມາດມີສາຍສຳພັນກັບພະອົງອີກຄັ້ງໜຶ່ງ
14. (ກ) ໃນໂຢຮັນ 3:16 ພະເຈົ້າໄດ້ເຮັດຫຍັງເພື່ອຊ່ວຍມະນຸດໃຫ້ພົ້ນຈາກບາບ ແລະຄວາມຕາຍ? (ຂ) ເຮົາສາມາດລົມກັບຜູ້ຄົນໂດຍໃຊ້ຄຳຖາມໃດ?
14 ອ່ານໂຢຮັນ 3:16. ຫຼາຍຄົນທີ່ເຮົາເຊີນມາການປະຊຸມອະນຸສອນຮູ້ຈັກພະຄຳພີຂໍ້ນີ້ດີ. ແຕ່ເປັນໄປໄດ້ແນວໃດທີ່ຄ່າໄຖ່ຂອງພະເຍຊູຈະເຮັດໃຫ້ມີຊີວິດຕະຫຼອດໄປ? ເຮົາມີໂອກາດຊ່ວຍຄົນອື່ນໃຫ້ເຂົ້າໃຈຄຳຕອບຂອງຄຳຖາມຂໍ້ນີ້ເມື່ອເຮົາເຊີນຄົນເຫຼົ່ານີ້ມາການປະຊຸມອະນຸສອນ ເມື່ອຢູ່ກັບເຂົາເຈົ້າໃນການປະຊຸມອະນຸສອນ ແລະເມື່ອໄປຢາມເຂົາເຈົ້າຫຼັງຈາກນັ້ນ. ແຮ່ງເຂົາເຈົ້າເຂົ້າໃຈເລື່ອງຄ່າໄຖ່ຫຼາຍເທົ່າໃດ ເຂົາເຈົ້າກໍຈະສຳນຶກຫຼາຍຂຶ້ນວ່າພະເຢໂຫວາຮັກມະນຸດຫຼາຍແລະພະອົງສະຫຼາດສຸຂຸມແທ້ໆ. ມີຈຸດໃດແດ່ກ່ຽວກັບຄ່າໄຖ່ທີ່ເຮົາຈະລົມກັບເຂົາເຈົ້າ?
15. ພະເຍຊູຕ່າງຈາກອາດາມແນວໃດ?
15 ພະເຢໂຫວາໄດ້ຈັດຕຽມມະນຸດຄົນໜຶ່ງທີ່ສົມບູນແບບເຊິ່ງສາມາດມອບຊີວິດເພື່ອເປັນຄ່າໄຖ່. ມະນຸດທີ່ສົມບູນແບບຄົນນີ້ຕ້ອງພັກດີຕໍ່ພະເຢໂຫວາແລະເຕັມໃຈເສຍສະລະຊີວິດເພື່ອມະນຸດ. (ໂລມ 5:17-19) ພະເຍຊູ ເປັນສິ່ງທຳອິດທີ່ພະເຢໂຫວາສ້າງ ແລະພະອົງໄດ້ຍ້າຍຊີວິດຂອງພະເຍຊູຈາກສະຫວັນໃຫ້ມາຢູ່ໂລກນີ້. (ໂຢຮັນ 1:14) ດັ່ງນັ້ນ ພະເຍຊູຈຶ່ງເປັນມະນຸດສົມບູນແບບຄືກັບທີ່ອາດາມເຄີຍເປັນ. ແຕ່ພະເຍຊູບໍ່ຄືກັບອາດາມໃນຈຸດທີ່ວ່າພະອົງເຮັດຕາມມາດຕະຖານທີ່ພະເຢໂຫວາຄາດໝາຍຈາກມະນຸດສົມບູນແບບ. ແມ່ນແຕ່ເມື່ອປະສົບກັບການທົດລອງທີ່ຮ້າຍແຮງທີ່ສຸດ ພະອົງກໍບໍ່ເຄີຍລະເມີດກົດໝາຍຂອງພະເຈົ້າ?
16. ເປັນຫຍັງຄ່າໄຖ່ຈຶ່ງເປັນຂອງຂວັນທີ່ມີຄ່າ?
16 ການທີ່ພະເຍຊູຕາຍໃນຖານະເປັນຄົນສົມບູນແບບ ພະອົງສາມາດຊ່ວຍມະນຸດທຸກຄົນຈາກບາບແລະຄວາມຕາຍ. ພະເຍຊູທຽບເທົ່າພໍດີກັບທຸກສິ່ງທີ່ອາດາມຄວນຈະເປັນ ນັ້ນຄື ພະອົງເປັນຄົນສົມບູນແບບ ເຊື່ອຟັງແລະພັກດີຕໍ່ພະເຈົ້າຢ່າງແທ້ຈິງ. (1 ຕີໂມເຕ 2:6) ພະອົງຕາຍເພື່ອເຮົາ ແລະການເສຍສະລະແບບນັ້ນເຮັດໃຫ້ມະນຸດທຸກຄົນມີໂອກາດໄດ້ຮັບຊີວິດຕະຫຼອດໄປ. (ມັດທາຍ 20:28) ຄ່າໄຖ່ເປັນສິ່ງສຳຄັນເພື່ອເຮັດໃຫ້ຈຸດປະສົງຂອງພະເຈົ້າສຳເລັດ.—2 ໂກລິນໂທ 1:19, 20
ພະເຢໂຫວາໄດ້ເປີດໂອກາດໃຫ້ເຮົາກັບຄືນມາ
17. ຄ່າໄຖ່ເຮັດໃຫ້ສິ່ງໃດເປັນໄປໄດ້?
17 ການທີ່ພະເຢໂຫວາຈັດຕຽມຄ່າໄຖ່ເປັນການເສຍສະລະທີ່ຍິ່ງໃຫຍ່. (1 ເປໂຕ 1:19) ພະອົງເຫັນວ່າເຮົາມີຄ່າຫຼາຍຈົນເຕັມໃຈໃຫ້ລູກຊາຍສຸດທີ່ຮັກຂອງພະອົງຕາຍເພື່ອເຮົາ. (1 ໂຢຮັນ 4:9, 10) ໃນແງ່ໜຶ່ງ ພະເຍຊູໄດ້ກາຍເປັນພໍ່ຂອງເຮົາແທນທີ່ຈະແມ່ນອາດາມ. (1 ໂກລິນໂທ 15:45) ພະອົງບໍ່ພຽງແຕ່ເຮັດໃຫ້ເປັນໄປໄດ້ສຳລັບເຮົາທີ່ຈະໄດ້ຮັບຊີວິດຕະຫຼອດໄປ ແຕ່ຍັງເຮັດໃຫ້ເຮົາໄດ້ກັບເຂົ້າມາໃນຄອບຄົວຂອງພະເຈົ້າໃນອະນາຄົດ. ໂດຍທາງຄ່າໄຖ່ ມະນຸດຈະກາຍເປັນຄົນສົມບູນແບບ ແລະພະເຢໂຫວາຈະຮັບເອົາເຂົາເຈົ້າກັບເຂົ້າມາໃນຄອບຄົວຂອງພະອົງ ໂດຍບໍ່ໄດ້ລະເມີດກົດໝາຍຂອງພະອົງເອງ. ໃຫ້ນຶກພາບເບິ່ງວ່ານັ້ນຈະດີຫຼາຍສໍ່າໃດເມື່ອທຸກຄົນທີ່ພັກດີຕໍ່ພະເຢໂຫວາກາຍເປັນຄົນສົມບູນແບບ! ໃນທີ່ສຸດ ທຸກສິ່ງທີ່ຢູ່ໃນສະຫວັນແລະໃນໂລກນີ້ຈະກົມກຽວກັນຄືຄອບຄົວດຽວ ແລະເຮົາທຸກຄົນຈະເປັນລູກຂອງພະເຈົ້າ.—ໂລມ 8:21
18. ເມື່ອໃດທີ່ພະເຢໂຫວາຈະກາຍເປັນ “ທຸກສິ່ງທຸກຢ່າງສຳລັບທຸກຄົນ”?
18 ເຖິງວ່າພໍ່ແມ່ຄູ່ທຳອິດຂອງເຮົາປະຕິເສດພະເຢໂຫວາ ແຕ່ພະອົງຍັງຮັກມະນຸດແລະໄດ້ຈັດຕຽມໃຫ້ມີຄ່າໄຖ່. ເປັນຄວາມຈິງທີ່ເຮົາບໍ່ສົມບູນແບບ ແຕ່ຊາຕານກໍບໍ່ສາມາດຂັດຂວາງເຮົາຈາກການເປັນຄົນທີ່ພັກດີຕໍ່ພະເຢໂຫວາ. ໂດຍທາງຄ່າໄຖ່ ພະເຢໂຫວາຈະຊ່ວຍເຮົາໃຫ້ກາຍເປັນຄົນຊອບທຳຢ່າງຄົບຖ້ວນ. ໃຫ້ນຶກພາບເບິ່ງວ່າຊີວິດຈະເປັນແນວໃດເມື່ອທຸກຄົນ ‘ເຫັນ [“ຍອມຮັບ,” ລ.ມ.] ພະບຸດແລະສະແດງຄວາມເຊື່ອໃນພະບຸດ’ ຈະມີຊີວິດຕະຫຼອດໄປ. (ໂຢຮັນ 6:40) ພໍ່ທີ່ຮັກແລະສຸຂຸມຂອງເຮົາຈະເຮັດໃຫ້ຈຸດປະສົງຂອງພະອົງສຳເລັດແລະຊ່ວຍມະນຸດໃຫ້ກາຍເປັນຄົນສົມບູນແບບ. ຈາກນັ້ນພະເຢໂຫວາຈະກາຍເປັນ “ທຸກສິ່ງທຸກຢ່າງສຳລັບທຸກຄົນ.”—1 ໂກລິນໂທ 15:28, ລ.ມ.
19. (ກ) ຄວາມຮູ້ຄຸນຄ່າຕໍ່ຄ່າໄຖ່ຄວນກະຕຸ້ນເຮົາໃຫ້ເຮັດຫຍັງ? (ເບິ່ງຂອບ “ ໃຫ້ເຮົາໄປຊອກຫາຄົນທີ່ສົນໃຈຟັງ”) (ຂ) ໃນບົດຄວາມຕໍ່ໄປເຮົາຈະເບິ່ງເລື່ອງຫຍັງ?
19 ຄວາມຮູ້ຄຸນຄ່າຕໍ່ຄ່າໄຖ່ຄວນກະຕຸ້ນເຮົາໃຫ້ບອກຄົນອື່ນກ່ຽວກັບຂອງຂວັນນີ້ທີ່ມີຄ່າ. ຜູ້ຄົນຈຳເປັນຕ້ອງຮູ້ວ່າໂດຍທາງຄ່າໄຖ່ ພະເຢໂຫວາໄດ້ສະເໜີດ້ວຍຄວາມຮັກທີ່ຈະໃຫ້ມະນຸດທຸກຄົນມີໂອກາດໄດ້ຮັບຊີວິດຕະຫຼອດໄປ. ແຕ່ຄ່າໄຖ່ມີຄຸນຄ່າຫຼາຍກວ່ານັ້ນ ເພາະຄ່າໄຖ່ແກ້ໄຂຂໍ້ສົງໄສຕ່າງໆທີ່ຊາຕານຕັ້ງຂຶ້ນໃນສວນເອເດນ. ໃນບົດຄວາມຕໍ່ໄປເຮົາຈະເບິ່ງວ່າຄ່າໄຖ່ເຮັດເຊັ່ນນັ້ນໄດ້ແນວໃດ.