ພະເຢໂຫວາເປັນຜູ້ນຳໜ້າປະຊາຊົນຂອງພະອົງ
“ພະເຢໂຫວາຈະນຳໜ້າເຈົ້າໄປເນື່ອງໆ [“ສະເໝີ,” ລ.ມ.].”—ເອຊາອີ 58:11
ເພງ: 152, 22
1, 2. (ກ) ພະຍານພະເຢໂຫວາແຕກຕ່າງຈາກສາສະໜາອື່ນແນວໃດ? (ຂ) ເຮົາຈະຮຽນຫຍັງໃນບົດຄວາມນີ້ແລະບົດຄວາມຕໍ່ໄປ?
ຄົນມັກຖາມພະຍານພະເຢໂຫວາເລື້ອຍໆວ່າ: “ໃຜເປັນຫົວໜ້າພວກເຈົ້າ?” ເຂົາເຈົ້າສົງໄສກ່ຽວກັບເລື່ອງນີ້ເພາະໃນຫຼາຍສາສະໜາຈະມີຜູ້ຊາຍຫຼືຜູ້ຍິງຄົນໜຶ່ງເຮັດໜ້າທີ່ເປັນຜູ້ນຳຫຼືເປັນຫົວໜ້າຂອງເຂົາເຈົ້າ. ເຮົາພູມໃຈທີ່ຈະບອກຄົນເຫຼົ່ານັ້ນວ່າ ຜູ້ນຳຂອງເຮົາບໍ່ແມ່ນມະນຸດທີ່ມີບາບ ແຕ່ແມ່ນພະເຍຊູຄລິດ. ພະອົງເຊື່ອຟັງພະເຢໂຫວາທີ່ເປັນພໍ່ແລະຜູ້ນຳຂອງພະອົງ.—ມັດທາຍ 23:10
2 ນອກຈາກນັ້ນຍັງມີຜູ້ຊາຍກຸ່ມໜຶ່ງທີ່ຖືກເອີ້ນວ່າ “ຂ້າໃຊ້ຜູ້ສັດຊື່ແລະສະຫຼາດ [“ສຸຂຸມ,” ລ.ມ.]” ເຊິ່ງນຳໜ້າປະຊາຊົນຂອງພະເຈົ້າຢູ່ໃນໂລກທຸກມື້ນີ້. (ມັດທາຍ 24:45) ແຕ່ເຮົາຈະຮູ້ແນວໃດວ່າແມ່ນພະເຢໂຫວາແທ້ໆທີ່ກຳລັງນຳໜ້າເຮົາຜ່ານທາງພະເຍຊູ? ເຮົາຈະເບິ່ງສາມເຫດຜົນທີ່ຊ່ວຍເຮົາໃຫ້ໝັ້ນໃຈໃນເລື່ອງນີ້. ເຖິງວ່າພະເຢໂຫວາກຳລັງໃຊ້ມະນຸດບາງຄົນໃຫ້ນຳໜ້າປະຊາຊົນຂອງພະອົງ ແຕ່ເຮົາຈະເຫັນຢ່າງຈະແຈ້ງວ່າພະເຢໂຫວາໄດ້ເປັນແລະຍັງເປັນຜູ້ນຳໜ້າທີ່ແທ້ຈິງຂອງປະຊາຊົນພະອົງ.—ເອຊາອີ 58:11
ໄດ້ຮັບພະລັງບໍລິສຸດຈາກພະເຈົ້າ
3. ສິ່ງໃດຊ່ວຍໂມເຊໃຫ້ນຳໜ້າຊາດອິດສະລາແອນ?
3 ຕົວແທນຂອງພະເຈົ້າໄດ້ຮັບພະລັງບໍລິສຸດຈາກພະອົງ. ພະເຈົ້າເລືອກໂມເຊໃຫ້ເປັນຜູ້ນຳຂອງຊາດອິດສະລາແອນ. ສິ່ງໃດຊ່ວຍລາວໃຫ້ເບິ່ງແຍງວຽກມອບໝາຍນີ້ທີ່ສຳຄັນຫຼາຍ? ພະເຢໂຫວາໃຫ້ “ພະວິນຍານແຫ່ງຄວາມບໍລິສຸດ” ເຊິ່ງກໍຄືພະລັງບໍລິສຸດແກ່ໂມເຊ. (ອ່ານເອຊາອີ 63:11-14) ໂດຍການເຮັດແບບນີ້ ພະເຢໂຫວາໄດ້ນຳໜ້າປະຊາຊົນຂອງພະອົງຕໍ່ໆໄປ.
4. ສິ່ງໃດທີ່ພິສູດວ່າໂມເຊໄດ້ຮັບພະລັງບໍລິສຸດຈາກພະເຈົ້າ? (ເບິ່ງຮູບທຳອິດ)
4 ປະຊາຊົນເຫັນບໍວ່າໂມເຊໄດ້ຮັບພະລັງບໍລິສຸດຈາກພະເຈົ້າ? ເຫັນແທ້! ເພາະພະລັງບໍລິສຸດເຮັດໃຫ້ໂມເຊສາມາດເຮັດການອັດສະຈັນແລະເຮັດໃຫ້ຟາໂລເຊິ່ງເປັນຜູ້ປົກຄອງທີ່ມີອຳນາດຫຼາຍທີ່ສຸດໃນເອຢິບໄດ້ຮູ້ຈັກຊື່ຂອງພະເຈົ້າ. (ອົບພະຍົບ 7:1-3) ພະລັງບໍລິສຸດຍັງຊ່ວຍໂມເຊໃຫ້ເປັນຜູ້ນຳທີ່ມີຄວາມຮັກແລະຄວາມອົດທົນ ເຊິ່ງລາວແຕກຕ່າງຫຼາຍຈາກພວກຜູ້ນຳຂອງຊາດອື່ນໆທີ່ມັກຄວາມຮຸນແຮງແລະເຫັນແກ່ຕົວ. (ອົບພະຍົບ 5:2, 6-9) ເຫັນໄດ້ແຈ້ງວ່າພະເຢໂຫວາໄດ້ເລືອກໂມເຊໃຫ້ເປັນຜູ້ນຳໜ້າປະຊາຊົນຂອງພະອົງ.
5. ພະເຢໂຫວາໄດ້ໃຫ້ພະລັງບໍລິສຸດກັບໃຜອີກເພື່ອນຳໜ້າປະຊາຊົນຂອງພະອົງ?
5 ພະເຢໂຫວາໄດ້ໃຫ້ພະລັງບໍລິສຸດກັບໃຜອີກເພື່ອນຳໜ້າປະຊາຊົນຂອງພະອົງ? ຄຳພີໄບເບິນບອກວ່າ: “ໂຢຊວຍລູກຊາຍຂອງນູນໄດ້ຮັບພະລັງຈາກພະເຈົ້າເຊິ່ງເຮັດໃຫ້ລາວມີສະຕິປັນຍາ.” (ພະບັນຍັດ 34:9, ລ.ມ.) ພະຄຳພີອີກຂໍ້ໜຶ່ງບອກວ່າ: ‘ພະວິນຍານແຫ່ງພະເຢໂຫວາໄດ້ລົງມາເທິງທ່ານເຄເດໂອນ.’ (ຜູ້ຕັດສິນ 6:34) ແລະອີກຂໍ້ໜຶ່ງບອກວ່າ: ‘ພະວິນຍານແຫ່ງພະເຢໂຫວາໄດ້ຢູ່ກັບດາວິດ’ (1 ຊາເມືອນ 16:13) ຜູ້ຊາຍເຫຼົ່ານີ້ໝາຍເພິ່ງພະລັງບໍລິສຸດຂອງພະເຈົ້າເພື່ອຊ່ວຍໃນການເຮັດສິ່ງທີ່ເຂົາເຈົ້າບໍ່ສາມາດເຮັດໄດ້ດ້ວຍກຳລັງຂອງຕົວເອງ. (ໂຢຊວຍ 11:16, 17; ຜູ້ຕັດສິນ 7:7, 22; 1 ຊາເມືອນ 17:37, 50) ເຫັນໄດ້ແຈ້ງວ່າພະເຢໂຫວາເປັນຜູ້ໃຫ້ກຳລັງເຂົາເຈົ້າເພື່ອເຮັດສິ່ງຕ່າງໆທີ່ຍິ່ງໃຫຍ່ ດັ່ງນັ້ນ ພະອົງພຽງຜູ້ດຽວເທົ່ານັ້ນທີ່ສົມຄວນໄດ້ຮັບຄຳສັນລະເສີນ.
ເມື່ອປະຊາຊົນຂອງພະເຈົ້າເຊື່ອຟັງໂມເຊ ໂຢຊວຍ ເຄເດໂອນ ແລະ ດາວິດ ທີ່ຈິງແລ້ວເຂົາເຈົ້າກໍກຳລັງຕິດຕາມພະເຢໂຫວາທີ່ເປັນຜູ້ນຳໜ້າເຂົາເຈົ້າ
6. ເປັນຫຍັງພະເຢໂຫວາຢາກໃຫ້ປະຊາຊົນນັບຖືຜູ້ທີ່ນຳໜ້າໃນຊາດອິດສະລາແອນ?
6 ຊາວອິດສະລາແອນຄວນເຮັດຫຍັງເມື່ອເຫັນວ່າໂມເຊ ໂຢຊວຍ ເຄເດໂອນ ແລະດາວິດໄດ້ຮັບພະລັງບໍລິສຸດຈາກພະເຈົ້າ? ເຂົາເຈົ້າຄວນນັບຖືຄົນເຫຼົ່ານີ້. ເມື່ອປະຊາຊົນຈົ່ມໃຫ້ໂມເຊ ໃຫ້ສັງເກດສິ່ງທີ່ພະເຢໂຫວາໄດ້ຖາມທີ່ວ່າ: “ພວກນີ້ຈະປະໝາດເຮົາຍັງດົນປານໃດ?” (ຈົດເຊັນບັນຊີ 14:2, 11) ເຫັນໄດ້ແຈ້ງວ່າພະເຢໂຫວາເລືອກຜູ້ຊາຍເຫຼົ່ານີ້ໃຫ້ນຳໜ້າປະຊາຊົນຂອງພະອົງ ແລະເມື່ອປະຊາຊົນເຊື່ອຟັງຄົນເຫຼົ່ານີ້ ທີ່ຈິງແລ້ວເຂົາເຈົ້າກໍກຳລັງຕິດຕາມພະເຢໂຫວາທີ່ເປັນຜູ້ນຳໜ້າຂອງເຂົາເຈົ້າ.
ໄດ້ຮັບຄວາມຊ່ວຍເຫຼືອຈາກທູດສະຫວັນ
7. ທູດສະຫວັນໄດ້ຊ່ວຍເຫຼືອໂມເຊແນວໃດ?
7 ຕົວແທນຂອງພະເຈົ້າໄດ້ຮັບຄວາມຊ່ວຍເຫຼືອຈາກທູດສະຫວັນ. (ອ່ານເຫບເລີ 1:7, 14) ພະເຈົ້າໃຊ້ທູດສະຫວັນໃຫ້ຊີ້ນຳໂມເຊ. ທຳອິດ ທູດສະຫວັນອົງໜຶ່ງ ‘ໄດ້ມາປາກົດແກ່ທ່ານທີ່ພຸ່ມໄມ້’ ແລະມອບໝາຍໃຫ້ລາວໄປປົດປ່ອຍຊາວອິດສະລາແອນແລະນຳໜ້າເຂົາເຈົ້າ. (ກິດຈະການ 7:35) ຕໍ່ມາພະເຈົ້າໃຊ້ທູດສະຫວັນໃຫ້ມອບກົດໝາຍແກ່ໂມເຊເພື່ອສອນຊາວອິດສະລາແອນ. (ຄາລາຊີ 3:19) ສຸດທ້າຍ ພະເຢໂຫວາບອກໂມເຊວ່າ: “ຈົ່ງພາພວກນັ້ນໄປເຖິງບ່ອນທີ່ເຮົາໄດ້ບອກເຈົ້າແລ້ວ. ນີ້ແນະ ທູດຂອງເຮົາຈະໄປຕໍ່ໜ້າເຈົ້າ.” (ອົບພະຍົບ 32:34) ຄຳພີໄບເບິນບໍ່ໄດ້ບອກວ່າຊາວອິດສະລາແອນເຫັນທູດສະຫວັນເຮັດສິ່ງເຫຼົ່ານີ້ ແຕ່ຈາກວິທີທີ່ໂມເຊສອນແລະຊີ້ນຳປະຊາຊົນ ນັ້ນເຮັດໃຫ້ເຫັນແຈ້ງວ່າທູດສະຫວັນໄດ້ຊ່ວຍເຫຼືອລາວ.
8. ທູດສະຫວັນໄດ້ຊ່ວຍເຫຼືອໂຢຊວຍແລະເອເຊເກຍເຊແນວໃດ?
8 ທູດສະຫວັນໄດ້ຊ່ວຍເຫຼືອໃຜອີກ? ຄຳພີໄບເບິນບອກວ່າ: “ຫົວໜ້າແຫ່ງກອງທັບຂອງພະເຢໂຫວາ” ເຊິ່ງແມ່ນທູດສະຫວັນອົງໜຶ່ງໄດ້ຊ່ວຍໂຢຊວຍໃຫ້ສູ້ຮົບຊະນະພວກການາອານ. (ໂຢຊວຍ 5:13-15; 6:2, 21) ຕໍ່ມາເມື່ອກະສັດເອເຊເກຍເຊໄດ້ນຳໜ້າປະຊາຊົນຂອງພະເຈົ້າ ກອງທັບໃຫຍ່ຂອງພວກອາຊີລີໄດ້ຂູ່ວ່າຈະທຳລາຍເມືອງເຢຣຶຊາເລມ. ພາຍໃນຄືນດຽວ “ທູດຂອງພະເຢໂຫວາໄດ້ອອກໄປແລະໄດ້ຂ້າຄົນ 185.000 ຄົນໃນຢຸດພັກພວກອາຊີລີ.”—2 ກະສັດ 19:35
9. ເຖິງວ່າຄົນທີ່ເປັນຕົວແທນຂອງພະເຢໂຫວາບໍ່ສົມບູນແບບ ແຕ່ພະອົງຄາດໝາຍໃຫ້ຊາວອິດສະລາແອນເຮັດຫຍັງ?
9 ທູດສະຫວັນສົມບູນແບບ ແຕ່ພວກຜູ້ຊາຍທີ່ເຂົາເຈົ້າຊ່ວຍເຫຼືອບໍ່ໄດ້ເປັນແບບນັ້ນ. ຕົວຢ່າງເຊັ່ນ: ມີຄັ້ງໜຶ່ງທີ່ໂມເຊບໍ່ໄດ້ໃຫ້ກຽດພະເຢໂຫວາ. (ຈົດເຊັນບັນຊີ 20:12) ໂຢຊວຍບໍ່ໄດ້ຖາມພະເຢໂຫວາເມື່ອຊາວຄາບາໂອນຢາກເຮັດສັນຍາເປັນມິດກັບລາວ. (ໂຢຊວຍ 9:14, 15) ເມື່ອຮອດຈຸດໜຶ່ງ ເອເຊເກຍເຊກາຍເປັນຄົນຍິ່ງ. (2 ຂ່າວຄາວ 32:25, 26) ເຖິງວ່າພວກຜູ້ຊາຍເຫຼົ່ານີ້ບໍ່ສົມບູນແບບ ແຕ່ກໍມີການຄາດໝາຍໃຫ້ຊາວອິດສະລາແອນເຮັດຕາມການຊີ້ນຳຂອງເຂົາເຈົ້າ. ຊາວອິດສະລາແອນສາມາດເຫັນວ່າພະເຢໂຫວາກຳລັງໃຊ້ທູດສະຫວັນເພື່ອຊ່ວຍເຫຼືອຜູ້ຊາຍເຫຼົ່ານີ້. ເຫັນໄດ້ແຈ້ງວ່າພະເຢໂຫວາກຳລັງນຳໜ້າປະຊາຊົນຂອງພະອົງ.
ໄດ້ຮັບການຊີ້ນຳຈາກພະຄຳຂອງພະເຈົ້າ
10. ພະຄຳຂອງພະເຈົ້າຊີ້ນຳໂມເຊແນວໃດ?
10 ຕົວແທນຂອງພະເຈົ້າໄດ້ຮັບການຊີ້ນຳຈາກພະຄຳຂອງພະເຈົ້າ. ຄຳພີໄບເບິນກ່າວເຖິງກົດໝາຍທີ່ໃຫ້ແກ່ຊາດອິດສະລາແອນວ່າເປັນ “ກົດໝາຍຂອງທ່ານໂມເຊ.” (1 ກະສັດ 2:3) ແຕ່ຄຳພີໄບເບິນກໍເຮັດໃຫ້ເຫັນແຈ້ງວ່າພະເຢໂຫວາເປັນຜູ້ໃຫ້ກົດໝາຍນັ້ນແກ່ຊາດນີ້ ແລະໂມເຊເອງກໍຕ້ອງເຊື່ອຟັງເຊັ່ນກັນ. (2 ຂ່າວຄາວ 34:14) ຕົວຢ່າງເຊັ່ນ: ຫຼັງຈາກທີ່ພະເຢໂຫວາບອກລາວກ່ຽວກັບວິທີຕັ້ງທັບອາໄສ “ໂມເຊໄດ້ກະທຳຕາມທີ່ພະເຢໂຫວາໄດ້ສັ່ງແກ່ທ່ານແລ້ວທຸກປະການ. ທ່ານໄດ້ກະທຳຢ່າງນັ້ນ.”—ອົບພະຍົບ 40:1-16
11, 12. (ກ) ໂຢຊວຍແລະກະສັດຄົນອື່ນໆທີ່ປົກຄອງປະຊາຊົນຂອງພະເຈົ້າຕ້ອງເຮັດຫຍັງ? (ຂ) ພະຄຳຂອງພະເຈົ້າຊີ້ນຳຜູ້ຊາຍທີ່ນຳໜ້າແນວໃດ?
11 ຕອນທີ່ໂຢຊວຍເປັນຜູ້ນຳ ລາວມີບັນທຶກພະຄຳຂອງພະເຈົ້າສ່ວນໜຶ່ງ ແລະພະເຢໂຫວາບອກລາວວ່າ: “ຈົ່ງ [ອ່ານແລະ] ຄຶດຕຶກຕອງພະບັນຍັດນີ້ທັງກາງເວັນທັງກາງຄືນເພື່ອເຈົ້າຈະລະວັງໃຫ້ດີຈະກະທຳຕາມສັບພະຄຳທີ່ຂຽນໄວ້ໃນໜັງສືນີ້.” (ໂຢຊວຍ 1:8) ກະສັດອົງອື່ນໆທີ່ປົກຄອງປະຊາຊົນຂອງພະເຈົ້າຕໍ່ຈາກນັ້ນກໍຕ້ອງອ່ານກົດໝາຍນີ້ທຸກໆມື້ ຄັດລອກ ແລະເຊື່ອຟັງ “ຄຳທັງປວງແຫ່ງພະບັນຍັດນີ້ກັບຂໍ້ກຳນົດກົດໝາຍທັງຫຼາຍນີ້ເພື່ອຈະຂັບຕາມຂໍ້ທັງຫຼາຍນີ້.”—ອ່ານພະບັນຍັດ 17:18-20
12 ພະຄຳຂອງພະເຈົ້າຊີ້ນຳຜູ້ຊາຍທີ່ນຳໜ້າແນວໃດ? ໃຫ້ຄິດເຖິງຕົວຢ່າງຂອງກະສັດໂຢເຊຍເຊ. ຫຼັງຈາກພົບບັນທຶກກົດໝາຍຂອງໂມເຊ ເລຂາຂອງໂຢເຊຍເຊກໍເລີ່ມອ່ານກົດໝາຍນັ້ນໃຫ້ລາວຟັງ. * (ເບິ່ງໄຂເງື່ອນ) “ເມື່ອກະສັດໄດ້ຍິນຄວາມໃນໜັງສືພະບັນຍັດແລ້ວ ທ່ານໄດ້ຈີກເສື້ອຜ້າຂອງຕົນ.” ພະຄຳຂອງພະເຈົ້າກະຕຸ້ນໂຢເຊຍເຊໃຫ້ທຳລາຍຮູບພະທັງໝົດທີ່ມີໃນປະເທດ ແລະໃຫ້ຈັດການສະຫຼອງປັດສະຄາທີ່ຍິ່ງໃຫຍ່ທີ່ສຸດເຊິ່ງບໍ່ເຄີຍຈັດມາກ່ອນ. (2 ກະສັດ 22:11; 23:1-23) ຍ້ອນວ່າໂຢເຊຍເຊແລະຜູ້ນຳຄົນອື່ນໆທີ່ສັດຊື່ໄດ້ເຮັດຕາມພະຄຳຂອງພະເຈົ້າ ດັ່ງນັ້ນ ເຂົາເຈົ້າຈຶ່ງເຕັມໃຈປັບປ່ຽນການຊີ້ນຳທີ່ໃຫ້ແກ່ປະຊາຊົນ. ການປ່ຽນແປງເຫຼົ່ານີ້ຊ່ວຍປະຊາຊົນໃຫ້ເຊື່ອຟັງພະເຈົ້າ.
13. ຜູ້ທີ່ນຳໜ້າປະຊາຊົນຂອງພະເຈົ້າແຕກຕ່າງຈາກພວກຜູ້ນຳຂອງຊາດອື່ນໆແນວໃດ?
13 ຜູ້ນຳຂອງຊາດອື່ນໆໄດ້ຮັບການຊີ້ນຳຈາກມະນຸດທີ່ມີຂີດຈຳກັດທາງດ້ານສະຕິປັນຍາ. ຕົວຢ່າງເຊັ່ນ: ພວກຜູ້ນຳຂອງການາອານແລະປະຊາຊົນຂອງເຂົາເຈົ້າເຮັດສິ່ງທີ່ຊົ່ວຮ້າຍຫຼາຍ ເຊິ່ງລວມເຖິງການຮ່ວມເພດລະຫວ່າງຍາດພີ່ນ້ອງ ການມັກຄົນເພດດຽວກັນ ການຮ່ວມເພດກັບສັດ ການບູຊາເດັກນ້ອຍ ແລະການບູຊາຮູບປັ້ນ. (ພວກເລວີ 18:6, 21-25) ນອກຈາກນັ້ນພວກຜູ້ນຳຂອງບາບີໂລນແລະເອຢິບບໍ່ມີລະບຽບການເລື່ອງຄວາມສະອາດແບບທີ່ປະຊາຊົນຂອງພະເຈົ້າມີ. (ຈົດເຊັນບັນຊີ 19:13) ປະຊາຊົນຂອງພະເຈົ້າສາມາດເຫັນເຫດຜົນວ່າເປັນຫຍັງຜູ້ນຳທີ່ສັດຊື່ຂອງເຂົາເຈົ້າຈຶ່ງກະຕຸ້ນເຂົາເຈົ້າໃຫ້ຮັກສາການນະມັດສະການໃຫ້ສະອາດ ເປັນຄົນສະອາດທາງຮ່າງກາຍ ແລະຫຼີກລ່ຽງຄວາມບໍ່ສະອາດທາງເພດສຳພັນ. ເຫັນໄດ້ແຈ້ງວ່າພະເຢໂຫວາກຳລັງນຳໜ້າເຂົາເຈົ້າ.
14. ເປັນຫຍັງພະເຢໂຫວາຕີສອນບາງຄົນທີ່ນຳໜ້າປະຊາຊົນຂອງພະອົງ?
14 ບໍ່ແມ່ນກະສັດທຸກອົງທີ່ປົກຄອງປະຊາຊົນຂອງພະເຈົ້າຈະເຮັດຕາມການຊີ້ນຳຈາກພະເຈົ້າ. ກະສັດເຫຼົ່ານັ້ນທີ່ບໍ່ສັດຊື່ໄດ້ປະຕິເສດທີ່ຈະເຮັດຕາມການຊີ້ນຳຈາກພະລັງບໍລິສຸດ ທູດສະຫວັນ ແລະພະຄຳຂອງພະອົງ. ໃນບາງກໍລະນີ ພະເຢໂຫວາໄດ້ຕີສອນຫຼືປ່ຽນຜູ້ນຳເຫຼົ່ານີ້. (1 ຊາເມືອນ 13:13, 14) ໃນເວລາຕໍ່ມາພະເຢໂຫວາໄດ້ແຕ່ງຕັ້ງບຸກຄົນໜຶ່ງເຊິ່ງຈະມາເປັນຜູ້ນຳທີ່ດີພ້ອມ.
ພະເຢໂຫວາແຕ່ງຕັ້ງຜູ້ນຳທີ່ດີພ້ອມ
15. (ກ) ພວກຜູ້ພະຍາກອນບອກແນວໃດກ່ຽວກັບຜູ້ນຳທີ່ດີພ້ອມເຊິ່ງກຳລັງຈະມາ? (ຂ) ໃຜເປັນຜູ້ນຳທີ່ດີພ້ອມ?
15 ເປັນເວລາຫຼາຍຮ້ອຍປີແລ້ວທີ່ພະເຢໂຫວາສັນຍາໄວ້ວ່າຈະແຕ່ງຕັ້ງຜູ້ນຳຄົນໜຶ່ງທີ່ດີພ້ອມໃຫ້ແກ່ປະຊາຊົນຂອງພະອົງ. ຕົວຢ່າງເຊັ່ນ: ໂມເຊໄດ້ບອກກັບຊາວອິດສະລາແອນວ່າ: “ພະເຢໂຫວາພະເຈົ້າຂອງເຈົ້າຈະໃຫ້ຜູ້ທຳນວາຍຜູ້ໜຶ່ງເໝືອນດັ່ງເຮົາອອກມາຈາກທ່າມກາງເຈົ້າ ຈາກພວກພີ່ນ້ອງຂອງເຈົ້າຕັ້ງໄວ້ສຳລັບເຈົ້າ ພວກທ່ານຈົ່ງຟັງຜູ້ທຳນວາຍນີ້.” (ພະບັນຍັດ 18:15) ເອຊາອີບອກວ່າທ່ານຜູ້ນີ້ຈະເປັນ “ຜູ້ນຳແລະເປັນຜູ້ບັນຊາການ.” (ເອຊາອີ 55:4, ລ.ມ.) ດານຽນໄດ້ຂຽນກ່ຽວກັບເມຊີເຊິ່ງຈະເປັນ “ຜູ້ນຳ.” (ດານຽນ 9:25, ລ.ມ.) ໃນທີ່ສຸດພະເຍຊູຄລິດໄດ້ລະບຸຕົວເອງວ່າເປັນ “ເຈົ້ານາຍ” ຫຼືຜູ້ທີ່ນຳໜ້າປະຊາຊົນຂອງພະເຈົ້າ. (ອ່ານມັດທາຍ 23:10) ພວກລູກສິດຂອງພະເຍຊູເຕັມໃຈທີ່ຈະຕິດຕາມພະອົງ ແລະເຂົາເຈົ້າເຊື່ອວ່າພະເຍຊູເປັນຄົນທີ່ພະເຢໂຫວາເລືອກ. (ໂຢຮັນ 6:68, 69) ສິ່ງໃດເຮັດໃຫ້ເຂົາເຈົ້າໝັ້ນໃຈວ່າພະເຍຊູຄລິດເປັນຜູ້ທີ່ພະເຢໂຫວາຈະໃຊ້ເພື່ອນຳໜ້າປະຊາຊົນຂອງພະອົງ?
ພະເຢໂຫວາໄດ້ແຕ່ງຕັ້ງພະເຍຊູໃຫ້ເປັນຜູ້ນຳທີ່ດີພ້ອມ
16. ສິ່ງໃດເຮັດໃຫ້ເຮົາຮູ້ວ່າພະເຍຊູໄດ້ຮັບພະລັງບໍລິສຸດຈາກພະເຈົ້າ?
16 ພະເຍຊູໄດ້ຮັບພະລັງບໍລິສຸດຈາກພະເຈົ້າ. ເມື່ອພະເຍຊູຮັບບັບເຕມາ ໂຢຮັນເຫັນ “ຟ້າສະຫວັນແຫວກອອກ ແລະພະວິນຍານ [“ພະລັງຂອງພະເຈົ້າ,” ລ.ມ.] ມີລັກສະນະເໝືອນດັ່ງນົກເຂົາລົງມາເທິງພະອົງ.” ບໍ່ດົນຫຼັງຈາກນັ້ນ “ພະວິນຍານ [“ພະລັງຂອງພະເຈົ້າ,” ລ.ມ.] ນຳເອົາພະອົງເຂົ້າໄປໃນປ່າ.” (ມາລະໂກ 1:10-12) ຕອນທີ່ຮັບໃຊ້ຢູ່ໂລກນີ້ ພະລັງບໍລິສຸດຂອງພະເຈົ້າຊ່ວຍພະເຍຊູໃຫ້ສອນແລະເຮັດການອັດສະຈັນຕ່າງໆໄດ້. (ກິດຈະການ 10:38) ນອກຈາກນັ້ນພະລັງບໍລິສຸດຍັງຊ່ວຍພະເຍຊູໃຫ້ສະແດງຄຸນລັກສະນະອື່ນໆເຊັ່ນ: ຄວາມຮັກ ຄວາມຍິນດີ ແລະຄວາມເຊື່ອທີ່ເຂັ້ມແຂງ. (ໂຢຮັນ 15:9; ເຫບເລີ 12:2) ບໍ່ມີຜູ້ນຳຄົນໃດອີກແລ້ວທີ່ມີຫຼັກຖານເຊັ່ນນີ້ເພື່ອພິສູດວ່າໄດ້ຮັບພະລັງບໍລິສຸດຈາກພະເຈົ້າ. ເຫັນໄດ້ແຈ້ງວ່າພະເຢໂຫວາໄດ້ເລືອກພະເຍຊູໃຫ້ເປັນຜູ້ນຳໜ້າ.
ຫຼັງຈາກທີ່ພະເຍຊູຮັບບັບເຕມາ ທູດສະຫວັນຊ່ວຍພະອົງແນວໃດ? (ເບິ່ງຂໍ້ 17)
17. ທູດສະຫວັນໄດ້ເຮັດຫຍັງເພື່ອຊ່ວຍພະເຍຊູ?
17 ພະເຍຊູໄດ້ຮັບການຊ່ວຍເຫຼືອຈາກທູດສະຫວັນ. ຫຼັງຈາກທີ່ພະເຍຊູຮັບບັບເຕມາໄດ້ບໍ່ດົນ “ທູດສະຫວັນໄດ້ມາບົວລະບັດພະອົງ.” (ມັດທາຍ 4:11) ຫຼາຍຊົ່ວໂມງກ່ອນພະເຍຊູຈະເສຍຊີວິດ ‘ທູດສະຫວັນອົງໜຶ່ງໄດ້ປາກົດແກ່ພະອົງແລະຊູແຮງ [“ໃຫ້ກຳລັງໃຈ,” ລ.ມ.] ພະອົງ.’ (ລືກາ 22:43) ພະເຍຊູຮູ້ວ່າພະເຢໂຫວາຈະສົ່ງທູດສະຫວັນມາຊ່ວຍໃນເວລາທີ່ພະອົງຕ້ອງການ.—ມັດທາຍ 26:53
18, 19. ພະຄຳຂອງພະເຈົ້າຊີ້ນຳຊີວິດແລະການສອນຂອງພະເຍຊູແນວໃດ?
18 ພະເຢຊູໄດ້ຮັບການຊີ້ນຳຈາກພະຄຳຂອງພະເຈົ້າ. ນັບຕັ້ງແຕ່ພະເຍຊູເລີ່ມຕົ້ນວຽກຮັບໃຊ້ຈົນເຖິງພະອົງເສຍຊີວິດເທິງເສົາທໍລະມານ ພະເຍຊູຍອມໃຫ້ພະຄຳຂອງພະເຈົ້າຊີ້ນຳພະອົງ. ແມ່ນແຕ່ຕອນທີ່ກຳລັງຈະຕາຍ ພະອົງຍັງເວົ້າເຖິງຄຳພະຍາກອນຕ່າງໆກ່ຽວກັບເມຊີ. (ມັດທາຍ 4:4; 27:46; ລືກາ 23:46) ແຕ່ພວກຫົວໜ້າສາສະໜາໃນສະໄໝນັ້ນແຕກຕ່າງຈາກພະເຍຊູຫຼາຍ. ເຂົາເຈົ້າເລືອກທີ່ຈະບໍ່ສົນໃຈພະຄຳຂອງພະເຈົ້າເມື່ອເລື່ອງນັ້ນຂັດກັບຄຳສອນຂອງເຂົາເຈົ້າ. ເມື່ອເວົ້າເຖິງຄົນເຫຼົ່ານີ້ ພະເຍຊູຍົກເອົາພະຄຳຂອງພະເຈົ້າທີ່ບອກວ່າ: “ພວກນີ້ນັບຖືເຮົາດ້ວຍສົບປາກ ແຕ່ວ່າໃຈຂອງເຂົາກໍຫ່າງໄກຈາກເຮົາຫຼາຍ. ແຕ່ວ່າເຂົາຂາບໄຫວ້ເຮົາເປັນການເປົ່າໆ ເຂົາເອົາຄຳສັ່ງແຫ່ງມະນຸດສອນວ່າເປັນຄຳໂອວາດ [“ກົດເກນ,” ລ.ມ.].” (ມັດທາຍ 15:7-9) ພະເຢໂຫວາຈະບໍ່ມີວັນເລືອກຜູ້ຊາຍແບບນີ້ໃຫ້ນຳໜ້າປະຊາຊົນຂອງພະອົງ.
19 ເມື່ອສອນຜູ້ຄົນ ພະເຍຊູຍັງໃຊ້ພະຄຳຂອງພະເຈົ້າ. ໃນຕອນທີ່ຖືກພວກຫົວໜ້າສາສະໜາທ້າທາຍ ພະເຍຊູບໍ່ໄດ້ໃຊ້ສະຕິປັນຍາຫຼືປະສົບການຊີວິດຂອງຕົວເອງເພື່ອຕອບຄຳຖາມຂອງເຂົາເຈົ້າ. ແຕ່ພະອົງໃຊ້ພະຄຳພີເພື່ອສອນຄົນອື່ນ. (ມັດທາຍ 22:33-40) ນອກຈາກນັ້ນ ພະເຍຊູຍັງສາມາດເຮັດໃຫ້ຄົນອື່ນປະທັບໃຈດ້ວຍເລື່ອງຕ່າງໆກ່ຽວກັບຊີວິດຂອງພະອົງໃນສະຫວັນຫຼືສິ່ງທີ່ຖືກສ້າງໃນເອກະພົບ. ແຕ່ຍ້ອນພະເຍຊູຮັກພະຄຳຂອງພະເຈົ້າ ພະອົງຈຶ່ງກະຕືລືລົ້ນທີ່ຈະບອກສິ່ງນີ້ກັບຄົນອື່ນ ແລະ “ພະອົງໄດ້ເປີດຈິດເປີດໃຈຂອງເຂົາເພື່ອເຂົາຈະໄດ້ເຂົ້າໃຈພະຄຳພີ [ຢ່າງຈະແຈ້ງ].”—ລືກາ 24:32, 45
20. (ກ) ພະເຍຊູໃຫ້ກຽດພະເຢໂຫວາແນວໃດ? (ຂ) ເຫໂລດອັກລີປາແລະພະເຍຊູມີແນວຄິດແຕກຕ່າງກັນແນວໃດ?
20 ເຖິງວ່າຜູ້ທີ່ຟັງພະເຍຊູຮູ້ສຶກອັດສະຈັນໃຈໃນວິທີທີ່ພະອົງເວົ້າ ແຕ່ພະເຍຊູກໍໃຫ້ກຽດພະເຢໂຫວາສະເໝີເຊິ່ງເປັນອາຈານຂອງພະອົງ. (ລືກາ 4:22) ເມື່ອຊາຍທີ່ຮັ່ງມີຄົນໜຶ່ງພະຍາຍາມໃຫ້ກຽດພະເຍຊູໂດຍເອີ້ນເພິ່ນວ່າ: “ອາຈານຜູ້ດີ” ພະອົງຖ່ອມຕົວແລະເວົ້າວ່າ: “ເຫດສັນໃດທ່ານເອີ້ນເຮົາວ່າຜູ້ດີ? ບໍ່ມີຜູ້ດີເທົ່າເວັ້ນໄວ້ແຕ່ພະເຈົ້າອົງດຽວ.” (ມາລະໂກ 10:17, 18) ແຕ່ເຫໂລດອັກລີປາທີ 1 ເຊິ່ງໄດ້ກາຍເປັນຜູ້ນຳຂອງຢູດາປະມານແປດປີຕໍ່ມາ ລາວແຕກຕ່າງຫຼາຍແທ້ໆຈາກພະເຍຊູ. ມື້ໜຶ່ງໃນການປະຊຸມພິເສດ ເຫໂລດໃສ່ຊຸດກະສັດແບບເຕັມຍົດ ແລະເມື່ອປະຊາຊົນເຫັນແລະໄດ້ຍິນສຽງລາວ ເຂົາເຈົ້າກໍພາກັນຮ້ອງຂຶ້ນວ່າ: ‘ເປັນສຽງປາກຂອງພະເຈົ້າ ບໍ່ແມ່ນສຽງປາກຂອງຄົນ.’ ເຫໂລດມັກການຍ້ອງຍໍ. ແຕ່ຈາກນັ້ນເກີດຫຍັງຂຶ້ນ? “ທູດຂອງພະເຢໂຫວາກໍລົງໂທດເຫໂລດເພາະລາວບໍ່ໄດ້ໃຫ້ກຽດພະເຈົ້າ ລາວຈຶ່ງເຈັບປ່ວຍແລະຖືກໜອນກັດກິນຈົນຕາຍ.” (ກິດຈະການ 12:21-23, ລ.ມ.) ເຫັນໄດ້ແຈ້ງວ່າພະເຢໂຫວາບໍ່ໄດ້ເລືອກເຫໂລດໃຫ້ເປັນຜູ້ນຳ. ແຕ່ພະເຍຊູໄດ້ພິສູດໃຫ້ເຫັນວ່າພະເຈົ້າເລືອກພະອົງ ແລະພະເຍຊູໃຫ້ກຽດພະເຢໂຫວາສະເໝີວ່າເປັນຜູ້ນຳທີ່ສູງສຸດຂອງປະຊາຊົນພະອົງ.
21. ໃນບົດຄວາມຕໍ່ໄປເຮົາຈະເວົ້າເຖິງເລື່ອງຫຍັງ?
21 ພະເຢໂຫວາຢາກໃຫ້ພະເຍຊູເປັນຜູ້ນຳບໍ່ແມ່ນພຽງແຕ່ສອງສາມປີເທົ່ານັ້ນ. ຫຼັງຈາກຟື້ນຂຶ້ນຈາກຕາຍ ພະເຍຊູບອກພວກລູກສິດວ່າ: ‘ອຳນາດທຸກສິ່ງເປັນທີ່ປະທານໃຫ້ແກ່ເຮົາແລ້ວທັງໃນສະຫວັນແລະທີ່ແຜ່ນດິນໂລກ.’ ພະອົງເວົ້າຕື່ມອີກວ່າ: “ຈົ່ງເບິ່ງ ຝ່າຍເຮົາ ເຮົາສະຖິດຢູ່ກັບທ່ານທັງຫຼາຍທຸກວັນທຸກວັນຈົນເຖິງທີ່ສຸດໂລກ [“ສະໄໝສຸດທ້າຍຂອງໂລກນີ້,” ລ.ມ.].” (ມັດທາຍ 28:18-20) ແຕ່ພະເຍຊູຈະນຳໜ້າປະຊາຊົນຂອງພະເຈົ້າໄດ້ແນວໃດ ເມື່ອພະອົງເປັນບຸກຄົນທີ່ເຮົາເບິ່ງບໍ່ເຫັນເຊິ່ງມີຊີວິດຢູ່ໃນສະຫວັນ? ພະເຢໂຫວາຈະໃຊ້ໃຜໃຫ້ເປັນຕົວແທນຂອງພະເຍຊູຢູ່ໂລກນີ້? ແລະເຮົາຈະລະບຸຕົວແທນຂອງພະເຈົ້າໄດ້ແນວໃດ? ບົດຄວາມຕໍ່ໄປຈະເວົ້າເຖິງຄຳຕອບຂອງຄຳຖາມເຫຼົ່ານີ້.
^ ຂໍ້ 12 ນີ້ອາດເປັນບັນທຶກຕົ້ນສະບັບທີ່ຂຽນໂດຍໂມເຊ.
