ເຈົ້າຈະຕັດສິນໃຈແນວໃດໃນເລື່ອງສ່ວນຕົວ?
‘ຈົ່ງເຂົ້າໃຈວ່ານໍ້າໃຈຂອງພະເຢໂຫວາເປັນຢ່າງໃດ.’—ເອເຟດ 5:17
ເພງ: 69, 57
1. ກົດໝາຍໃນຄຳພີໄບເບິນມີເລື່ອງຫຍັງແດ່ ແລະເມື່ອເຮັດຕາມກົດໝາຍເຫຼົ່ານັ້ນເຮົາໄດ້ຮັບປະໂຫຍດຄືແນວໃດ?
ໃນຄຳພີໄບເບິນ ພະເຢໂຫວາໄດ້ຈັດໃຫ້ມີກົດໝາຍຕ່າງໆເຊິ່ງບອກເຮົາຢ່າງຈະແຈ້ງໃນສິ່ງທີ່ພະອົງຕ້ອງການໃຫ້ເຮົາເຮັດ. ຕົວຢ່າງເຊັ່ນ: ພະອົງບອກເຮົາວ່າເຮົາຕ້ອງບໍ່ນະມັດສະການຮູບປັ້ນ ບໍ່ລັກ ບໍ່ເມົາເຫຼົ້າ ຫຼືບໍ່ເຮັດສິ່ງທີ່ຜິດສິນລະທຳທາງເພດ. (1 ໂກລິນໂທ 6:9, 10) ນອກຈາກນັ້ນ ພະເຍຊູຍັງໄດ້ໃຫ້ຄຳສັ່ງທີ່ເຈາະຈົງແກ່ພວກລູກສິດວ່າ: “[ຈົ່ງ] ກະທຳໃຫ້ພວກຕ່າງປະເທດທັງປວງເຂົ້າເປັນລູກສິດ ໃຫ້ເຂົາຮັບສິນບັບເຕມາໃນນາມຊື່ແຫ່ງພະບິດາແລະພະບຸດແລະພະວິນຍານບໍລິສຸດ ຈົ່ງສັ່ງສອນເຂົາໃຫ້ຖືຮັກສາສິ່ງທັງປວງທີ່ເຮົາໄດ້ສັ່ງໄວ້ແກ່ທ່ານທັງຫຼາຍແລ້ວ. ແລະຈົ່ງເບິ່ງ ຝ່າຍເຮົາເຮົາສະຖິດຢູ່ກັບທ່ານທັງຫຼາຍທຸກວັນທຸກວັນຈົນເຖິງທີ່ສຸດໂລກ.” (ມັດທາຍ 28:19, 20) ທຸກໆສິ່ງທີ່ພະເຢໂຫວາແລະພະເຍຊູບອກໃຫ້ເຮົາເຮັດລ້ວນແຕ່ເປັນສິ່ງທີ່ດີສຳລັບເຮົາເອງ. ກົດໝາຍຂອງພະເຢໂຫວາສອນເຮົາໃຫ້ຮູ້ວິທີທີ່ຈະເບິ່ງແຍງຕົວເອງ ເບິ່ງແຍງຄອບຄົວ ແລະຊ່ວຍເຮົາໃຫ້ມີຄວາມສຸກແລະມີສຸຂະພາບທີ່ດີຂຶ້ນ. ສິ່ງທີ່ສຳຄັນກວ່ານັ້ນ ເມື່ອເຮົາເຊື່ອຟັງຄຳສັ່ງຂອງພະເຢໂຫວາເຊິ່ງລວມເຖິງຄຳສັ່ງທີ່ໃຫ້ປະກາດ ພະອົງກໍພໍໃຈໃນຕົວເຮົາແລະພະອົງຈະອວຍພອນເຮົາ.
2, 3. (ກ) ເປັນຫຍັງຄຳພີໄບເບິນຈຶ່ງບໍ່ມີກົດຕາຍຕົວສຳລັບທຸກໆສະຖານະການໃນຊີວິດ? (ຂ) ມີຄຳຖາມຫຍັງແດ່ທີ່ຈະພິຈາລະນາໃນບົດຄວາມນີ້? (ເບິ່ງຮູບທຳອິດ)
2 ໃນຂະນະດຽວກັນ ຄຳພີໄບເບິນກໍບໍ່ໄດ້ມີກົດຕ່າງໆກ່ຽວກັບທຸກໆສະຖານະການໃນຊີວິດຂອງເຮົາ. ຕົວຢ່າງເຊັ່ນ: ໃນຄຳພີໄບເບິນ ເຮົາບໍ່ພົບຄຳແນະນຳທີ່ເຈາະຈົງໃນເລື່ອງການນຸ່ງຖື. ເລື່ອງນີ້ສະແດງເຖິງສະຕິປັນຍາຂອງພະເຢໂຫວາ. ເຖິງວ່າຄວາມນິຍົມປ່ຽນໄປຕາມການເວລາແລະຜູ້ຄົນໃນທົ່ວໂລກມີຮູບແບບການນຸ່ງຖືທີ່ແຕກຕ່າງກັນ ແຕ່ຄຳພີໄບເບິນບໍ່ເຄີຍຫຼ້າສະໄໝ. ນອກຈາກນັ້ນ ຄຳພີໄບເບິນບໍ່ໄດ້ມີກົດຈຳນວນຫຼາຍໃນເລື່ອງວຽກ ຫຼືຄວາມບັນເທີງທີ່ເຮົາຄວນເລືອກ ຫຼືສິ່ງທີ່ເຮົາຄວນເຮັດແທ້ໆເພື່ອຮັກສາສຸຂະພາບໃຫ້ແຂງແຮງຢູ່ສະເໝີ. ພະເຢໂຫວາເປີດໂອກາດໃຫ້ແຕ່ລະຄົນແລະຜູ້ທີ່ເປັນຫົວໜ້າຄອບຄົວທີ່ຈະຕັດສິນໃຈເອງໃນເລື່ອງເຫຼົ່ານີ້.
3 ດັ່ງນັ້ນ ເມື່ອເຮົາຕ້ອງຕັດສິນໃຈໃນເລື່ອງທີ່ສຳນເຊິ່ງຈະສົ່ງຜົນກະທົບຕໍ່ຊີວິດຂອງເຮົາ ແລະເຮົາເຫັນວ່າໃນຄຳພີໄບເບິນບໍ່ມີກົດໝາຍກ່ຽວກັບເລື່ອງນັ້ນ ເຮົາອາດຈະສົງໄສວ່າ: ‘ພະເຢໂຫວາສົນໃຈບໍໃນສິ່ງທີ່ຂ້ອຍຈະຕັດສິນໃຈ? ພະອົງຈະພໍໃຈບໍກັບສິ່ງໃດກໍຕາມທີ່ຂ້ອຍເລືອກຈະເຮັດຕາບໃດທີ່ຂ້ອຍບໍ່ໄດ້ເຮັດຜິດກົດໝາຍໃນຄຳພີໄບເບິນ? ຂ້ອຍຈະແນ່ໃຈໄດ້ແນວໃດວ່າພະອົງພໍໃຈກັບສິ່ງທີ່ຂ້ອຍເລືອກ?’
ການຕັດສິນໃຈຂອງເຮົາສົ່ງຜົນກະທົບຕໍ່ເຮົາແລະຕໍ່ຄົນອື່ນ
4, 5. ການຕັດສິນໃຈຂອງເຮົາສາມາດສົ່ງຜົນກະທົບຕໍ່ເຮົາແລະຕໍ່ຄົນອື່ນໄດ້ແນວໃດ?
4 ບາງຄົນຮູ້ສຶກວ່າເຂົາເຈົ້າສາມາດເຮັດສິ່ງໃດກໍໄດ້ທີ່ເຂົາເຈົ້າຕ້ອງການຈະເຮັດ. ແຕ່ເຮົາຕ້ອງການເຮັດໃນສິ່ງທີ່ເຮັດໃຫ້ພະເຢໂຫວາມີຄວາມສຸກ. ດັ່ງນັ້ນ ກ່ອນທີ່ເຮົາຈະຕັດສິນໃຈ ເຮົາຕ້ອງຄິດເຖິງສິ່ງທີ່ຄຳພີໄບເບິນບອກໄວ້ ແລະຈາກນັ້ນກໍເຮັດຕາມສິ່ງທີ່ໄດ້ບອກໄວ້ນັ້ນ. ຕົວຢ່າງເຊັ່ນ: ຄຳພີໄບເບິນບອກເຮົາວ່າພະເຈົ້າຮູ້ສຶກແນວໃດກ່ຽວກັບການໃຊ້ເລືອດ ດັ່ງນັ້ນ ເຮົາຈຶ່ງເຮັດຕາມສິ່ງທີ່ໄດ້ບອກໄວ້ນັ້ນ. (ຕົ້ນເດີມ 9:4; ກິດຈະການ 15:28, 29) ເຮົາສາມາດອະທິດຖານເຖິງພະເຢໂຫວາເພື່ອຊ່ວຍເຮົາໃຫ້ຕັດສິນໃຈໃນແບບທີ່ຈະເຮັດໃຫ້ພະອົງພໍໃຈ.
5 ການຕັດສິນໃຈຂອງເຮົາສົ່ງຜົນກະທົບຕໍ່ເຮົາ. ການຕັດສິນໃຈທີ່ດີສາມາດຊ່ວຍເຮົາໃຫ້ໃກ້ຊິດກັບພະເຢໂຫວາ ແຕ່ການຕັດສິນໃຈທີ່ບໍ່ດີສາມາດທຳລາຍສາຍສຳພັນຂອງເຮົາກັບພະອົງ. ການຕັດສິນໃຈຂອງເຮົາສາມາດສົ່ງຜົນກະທົບຕໍ່ຄົນອື່ນໄດ້ເຊັ່ນກັນ. ເຮົາບໍ່ຕ້ອງການເຮັດສິ່ງທີ່ອາດເຮັດໃຫ້ພີ່ນ້ອງຂອງເຮົາເສຍໃຈ ຫຼືເຮັດໃຫ້ຄວາມເຊື່ອຂອງເຂົາເຈົ້າອ່ອນລົງ. ນອກຈາກນັ້ນ ເຮົາກໍບໍ່ຕ້ອງການເປັນສາເຫດທີ່ກໍ່ບັນຫາລະຫວ່າງພີ່ນ້ອງໃນປະຊາຄົມ. ດັ່ງນັ້ນຈຶ່ງເປັນເລື່ອງສຳຄັນທີ່ເຮົາຈະຕັດສິນໃຈຢ່າງດີ.—ອ່ານໂລມ 14:19; ຄາລາຊີ 6:7
6. ສິ່ງໃດຄວນຊີ້ນຳການຕັດສິນໃຈຂອງເຮົາ?
6 ເຮົາຈະເຮັດການຕັດສິນໃຈທີ່ດີໄດ້ແນວໃດ ເມື່ອຄຳພີໄບເບິນບໍ່ໄດ້ບອກເຮົາຢ່າງເຈາະຈົງໃນສິ່ງທີ່ເຮົາຄວນເຮັດ? ແທນທີ່ຈະເຮັດໃນສິ່ງທີ່ເຮົາມັກ ເຮົາຕ້ອງຄິດຢ່າງຄັກແນ່ກ່ຽວກັບສະຖານະການຂອງເຮົາແລະຕັດສິນໃຈໃນແບບທີ່ຈະເຮັດໃຫ້ພະເຢໂຫວາພໍໃຈ. ເມື່ອເຮັດເຊັ່ນນັ້ນ ເຮົາກໍສາມາດໝັ້ນໃຈໄດ້ວ່າພະອົງຈະຊ່ວຍເຮົາໃຫ້ເຮັດການຕັດສິນໃຈທີ່ດີ.—ອ່ານຄຳເພງ 37:5
ພະເຢໂຫວາຕ້ອງການໃຫ້ຂ້ອຍເຮັດຫຍັງ?
7. ເມື່ອບໍ່ມີກົດໝາຍທີ່ກ່າວໄວ້ໃນຄຳພີໄບເບິນ ເຮົາຈະຊອກຮູ້ໄດ້ແນວໃດໃນສິ່ງທີ່ພະເຢໂຫວາຕ້ອງການໃຫ້ເຮົາເຮັດໃນສະຖານະການໃດໜຶ່ງ?
7 ເຮົາຈະຮູ້ໄດ້ແນວໃດໃນສິ່ງທີ່ຈະເຮັດໃຫ້ພະເຢໂຫວາພໍໃຈ? ເອເຟດ 5:17 ບອກເຮົາວ່າ: ‘ຈົ່ງເຂົ້າໃຈວ່ານໍ້າໃຈຂອງພະເຢໂຫວາເປັນຢ່າງໃດ.’ ເມື່ອບໍ່ມີກົດໝາຍທີ່ເຈາະຈົງໃນຄຳພີໄບເບິນ ເຮົາຈຳເປັນຕ້ອງເບິ່ງເຫັນຫຼືເຂົ້າໃຈໃນສິ່ງທີ່ພະ ເຢໂຫວາຕ້ອງການໃຫ້ເຮົາເຮັດໃນສະຖານະການຂອງເຮົາ. ເຮົາຈະເຮັດເຊັ່ນນັ້ນໄດ້ແນວໃດ? ເຮົາຕ້ອງອະທິດຖານເຖິງພະອົງແລະຍອມໃຫ້ພະລັງບໍລິສຸດຂອງພະອົງຊີ້ນຳເຮົາ.
8. ພະເຍຊູເບິ່ງເຫັນແນວໃດໃນສິ່ງທີ່ພະເຢໂຫວາຕ້ອງການໃຫ້ພະອົງເຮັດ? ຂໍໃຫ້ຍົກຕົວຢ່າງ.
8 ພະເຍຊູເບິ່ງເຫັນສະເໝີໃນສິ່ງທີ່ພະເຢໂຫວາຕ້ອງການໃຫ້ພະອົງເຮັດ. ຕົວຢ່າງເຊັ່ນ: ມີຢູ່ສອງຄັ້ງເມື່ອຝູງຄົນຫິວອາຫານ ພະເຍຊູໄດ້ອະທິດຖານ ຈາກນັ້ນກໍໄດ້ລ້ຽງອາຫານເຂົາເຈົ້າໂດຍການເຮັດການອັດສະຈັນ. (ມັດທາຍ 14:17-20; 15:34-37) ແຕ່ເມື່ອພະອົງຫິວອາຫານຕອນທີ່ຢູ່ໃນປ່າກັນດານ ແລະພະຍາມານຕ້ອງການໃຫ້ພະອົງເຮັດໃຫ້ກ້ອນຫີນກາຍເປັນເຂົ້າຈີ່ ພະອົງບໍ່ໄດ້ເຮັດຕາມນັ້ນ. (ອ່ານມັດທາຍ 4:2-4) ພະເຍຊູຮູ້ຈັກພໍ່ຂອງພະອົງເປັນຢ່າງດີ ດັ່ງນັ້ນ ພະອົງຈຶ່ງຮູ້ວ່າພະເຢໂຫວາບໍ່ຕ້ອງການໃຫ້ພະອົງໃຊ້ພະລັງບໍລິສຸດເພື່ອສະໜອງຄວາມຈຳເປັນຂອງຕົນເອງ. ພະເຍຊູໝັ້ນໃຈວ່າຜູ້ເປັນພໍ່ຈະຊີ້ນຳພະອົງແລະຈັດໃຫ້ມີອາຫານເມື່ອພະເຍຊູຕ້ອງການ.
9, 10. ສິ່ງໃດຈະຊ່ວຍເຮົາໃຫ້ຕັດສິນໃຈຢ່າງສຸຂຸມ? ຂໍໃຫ້ຍົກຕົວຢ່າງ.
9 ຄືກັບພະເຍຊູ ເຮົາສາມາດເຮັດການຕັດສິນໃຈທີ່ດີຖ້າເຮົາໝາຍເພິ່ງການຊີ້ນຳຈາກພະເຢໂຫວາ. ຄຳພີໄບເບິນກ່າວວ່າ: “ຈົ່ງປົງໃຈໃນພະເຢໂຫວາດ້ວຍສຸດຈິດ ແລະຢ່າວາງໃຈໃນສະຕິປັນຍາຂອງເຈົ້າ. ໃນຮີດຄອງທັງຫຼາຍຂອງເຈົ້າ ຈົ່ງຍອມຮູ້ຈັກພະເຈົ້າ ແລະພະອົງຈະນຳໜ້າເຈົ້າໄປໃນຫົນທາງທັງຫຼາຍຂອງເຈົ້າ. ຢ່າເປັນຄົນປັນຍາແກ່ຕາເອງ. ຈົ່ງຢ້ານຢຳພະເຢໂຫວາແລະຈົ່ງຖອຍໜີຈາກການຊົ່ວ.” (ສຸພາສິດ 3:5-7) ເມື່ອເຮົາສຶກສາຄຳພີໄບເບິນແລະຮຽນຮູ້ກ່ຽວກັບວິທີທີ່ພະເຢໂຫວາຄິດ ເຮົາຈະເຂົ້າໃຈໃນສິ່ງທີ່ພະອົງຕ້ອງການໃຫ້ເຮົາເຮັດໃນສະຖານະການໃດໜຶ່ງສະເພາະ. ແຮ່ງເຮົາຮຽນຮູ້ຫຼາຍຂຶ້ນກ່ຽວກັບວິທີທີ່ພະເຢໂຫວາຄິດ ກໍແຮ່ງງ່າຍຂຶ້ນທີ່ເຮົາຈະຕັດສິນໃຈໃນແບບທີ່ເຮັດໃຫ້ພະອົງພໍໃຈ. ໂດຍວິທີນີ້ ເຮົາກໍຈະມີ “ຫົວໃຈທີ່ຕອບຮັບຄຳແນະນຳຂອງພະເຈົ້າ” ຫຼາຍຂຶ້ນ.—ເອເຊກຽນ 11:19, ລ.ມ. ໄຂເງື່ອນ
10 ໃຫ້ນຶກພາບວ່າຜູ້ຍິງຄົນໜຶ່ງກຳລັງໄປຊື້ເຄື່ອງແລະເຫັນເກີບຄູ່ໜຶ່ງທີ່ງາມແທ້ໆ ແຕ່ເກີບຄູ່ນັ້ນກໍແພງຫຼາຍ. ຜູ້ຍິງຄົນນີ້ແຕ່ງດອງແລ້ວ ແລະເຖິງວ່າຜົວບໍ່ໄດ້ຢູ່ນຳລາວໃນຕອນນັ້ນ ແຕ່ລາວກໍຮູ້ວ່າຜົວຈະຄິດແນວໃດຖ້າລາວໃຊ້ຈ່າຍເງິນຫຼາຍຂະໜາດນັ້ນ. ຜູ້ຍິງຄົນນີ້ຮູ້ໄດ້ແນວໃດ? ເຂົາເຈົ້າແຕ່ງດອງກັນມາຫຼາຍປີແລ້ວ ດັ່ງນັ້ນ ລາວຈຶ່ງຮູ້ວ່າຜົວຕ້ອງການໃຫ້ລາວໃຊ້ຈ່າຍເງິນຂອງຄອບຄົວແນວໃດ. ຄ້າຍຄືກັນ ເມື່ອເຮົາຮຽນຮູ້ກ່ຽວກັບວິທີທີ່ພະເຢໂຫວາຄິດແລະຮຽນຮູ້ສິ່ງທີ່ພະອົງໄດ້ເຮັດໃນອະດີດ ເຮົາກໍຈະຮູ້ໃນສິ່ງທີ່ພະອົງຕ້ອງການໃຫ້ເຮົາເຮັດໃນແຕ່ລະສະຖານະການທີ່ແຕກຕ່າງກັນໄປ.
ເຮົາຈະຮູ້ສິ່ງທີ່ເປັນຄວາມຄິດຂອງພະເຢໂຫວາໄດ້ແນວໃດ?
11. ມີຄຳຖາມໃດແດ່ທີ່ເຮົາສາມາດຖາມຕົວເອງເມື່ອເຮົາອ່ານຫຼືສຶກສາຄຳພີໄບເບິນ? (ເບິ່ງຂອບ “ ເມື່ອສຶກສາຄຳພີໄບເບິນ ໃຫ້ຖາມຕົວເອງວ່າ”)
11 ເຮົາຈະຮູ້ສິ່ງທີ່ເປັນຄວາມຄິດຂອງພະເຢໂຫວາໄດ້ແນວໃດ? ສິ່ງທີ່ສຳຄັນທີ່ສຸດເຊິ່ງເຮົາສາມາດເຮັດໄດ້ແມ່ນການອ່ານແລະການສຶກສາຄຳພີໄບເບິນເປັນປະຈຳ. ໃນຂະນະທີ່ເຮົາກຳລັງເຮັດແນວນີ້ ເຮົາສາມາດຖາມຕົວເອງວ່າ: ‘ສິ່ງນີ້ຄຳເພງ 25:4, 5) ເມື່ອເຮົາຮຽນຮູ້ບາງສິ່ງກ່ຽວກັບພະເຢໂຫວາ ເຮົາສາມາດຄິດເຖິງສະຖານະການຕ່າງໆທີ່ເຮົາຈະໃຊ້ເລື່ອງທີ່ໄດ້ຮຽນຮູ້ນັ້ນ. ເຮົາສາມາດໃຊ້ຄວາມຮູ້ນັ້ນໃນຄອບຄົວ ໃນບ່ອນເຮັດວຽກ ໃນໂຮງຮຽນ ຫຼືໃນການປະກາດໄດ້ບໍ? ເມື່ອເຮົາຄິດເຖິງສະຖານະການໃດໜຶ່ງສະເພາະ ນັ້ນຈະເຮັດໃຫ້ງ່າຍຂຶ້ນທີ່ເຮົາຈະຮູ້ວ່າພະເຢໂຫວາຕ້ອງການໃຫ້ເຮົາໃຊ້ຄວາມຮູ້ນັ້ນແນວໃດ.
ສອນຫຍັງຂ້ອຍກ່ຽວກັບພະເຢໂຫວາ? ເປັນຫຍັງພະອົງຈຶ່ງປະຕິບັດແບບນີ້?’ ຄືກັບດາວິດ ເຮົາຍັງຈຳເປັນຕ້ອງຂໍໃຫ້ພະເຢໂຫວາຊ່ວຍເຮົາໃຫ້ຮູ້ຈັກພະອົງຫຼາຍຂຶ້ນ. ດາວິດຂຽນວ່າ: “ໂອ້ພະເຢໂຫວາ ຂໍໂຜດສອນຂ້ານ້ອຍໃຫ້ຮູ້ຈັກທາງທັງຫຼາຍຂອງພະອົງ ຂໍໂຜດສັ່ງສອນຂ້ານ້ອຍໃຫ້ຮູ້ຈັກຫົນທາງທັງຫຼາຍຂອງພະອົງ. ຂໍໂຜດພາຂ້ານ້ອຍທຽວໄປໃນຄວາມຈິງຂອງພະອົງ ແລະຂໍສັ່ງສອນຂ້ານ້ອຍເຫດວ່າພະອົງແມ່ນພະເຈົ້າທີ່ຊ່ອຍຂ້ານ້ອຍ. ຂ້ານ້ອຍຄອງຫາພະອົງໝົດວັນ.” (ເພື່ອຈະຮູ້ວ່າພະເຢໂຫວາຄິດແນວໃດ ເຮົາຄວນອ່ານແລະສຶກສາຄຳພີໄບເບິນເປັນປະຈຳ
12. ໜັງສືຕ່າງໆຂອງເຮົາແລະການປະຊຸມສາມາດຊ່ວຍເຮົາແນວໃດໃຫ້ຮູ້ກ່ຽວກັບຄວາມຄິດຂອງພະເຢໂຫວາຕໍ່ກັບຫຼາຍໆເລື່ອງ?
12 ອີກວິທີໜຶ່ງທີ່ເຮົາຈະຮຽນຮູ້ກ່ຽວກັບວິທີທີ່ພະເຢໂຫວາຄິດແມ່ນການເອົາໃຈໃສ່ໃນສິ່ງທີ່ອົງການຂອງພະອົງສອນເຮົາຈາກຄຳພີໄບເບິນ. ຕົວຢ່າງເຊັ່ນ: ເມື່ອເຮົາຕ້ອງຕັດສິນໃຈໃນເລື່ອງໃດເລື່ອງໜຶ່ງ ດັດສະນີຂອງໜັງສືຕ່າງໆຂອງອົງການຂອງເຮົາ (Watch Tower Publications
Index) ແລະຄູ່ມືການຄົ້ນຄວ້າຂອງພະຍານພະເຢໂຫວາສາມາດຊ່ວຍເຮົາໃຫ້ຮູ້ວ່າພະເຢໂຫວາຄິດແນວໃດ. ນອກຈາກນັ້ນ ເຮົາຍັງສາມາດໄດ້ຮັບປະໂຫຍດຈາກການປະຊຸມຕ່າງໆເມື່ອເຮົາຕັ້ງໃຈຟັງ ອອກຄວາມຄິດເຫັນ ແລະຄິດຕຶກຕອງໃນສິ່ງທີ່ກຳລັງໄດ້ຮັບການສອນ. ສິ່ງນີ້ຈະຊ່ວຍເຮົາໃຫ້ຮຽນຮູ້ທີ່ຈະຄິດໃນແບບທີ່ພະເຢໂຫວາຄິດ. ຜົນກໍຄື ເຮົາກໍຈະສາມາດຕັດສິນໃຈໃນແບບທີ່ເຮັດໃຫ້ພະອົງພໍໃຈແລະພະອົງກໍຈະອວຍພອນເຮົາ.ຄິດຕຶກຕອງເຖິງສິ່ງທີ່ພະເຢໂຫວາຄິດ ກ່ອນທີ່ເຈົ້າຈະຕັດສິນໃຈ
13. ຂໍໃຫ້ຍົກຕົວຢ່າງໜຶ່ງກ່ຽວກັບວິທີທີ່ເຮົາສາມາດຕັດສິນໃຈຢ່າງສຸຂຸມເມື່ອເຮົາພິຈາລະນາວ່າພະເຢໂຫວາຄິດແນວໃດ.
13 ຂໍໃຫ້ເຮົາເບິ່ງຕົວຢ່າງໜຶ່ງກ່ຽວກັບວິທີທີ່ເຮົາສາມາດຕັດສິນໃຈຢ່າງສຸຂຸມເມື່ອເຮົາພິຈາລະນາວ່າພະເຢໂຫວາຄິດແນວໃດ. ບາງທີເຈົ້າອາດຈະຢາກເປັນໄພໂອເນຍ. ເຈົ້າຄົງໄດ້ປ່ຽນແປງບາງຢ່າງໃນຊີວິດເພື່ອຈະມີເວລາຫຼາຍຂຶ້ນໃນວຽກປະກາດ. ແຕ່ເຈົ້າກໍຍັງບໍ່ໝັ້ນໃຈວ່າຈະມີຄວາມສຸກຫຼືບໍ່ກັບການມີເງິນພຽງແຕ່ໜ້ອຍດຽວແລະມີສິ່ງຂອງບໍ່ເທົ່າໃດຢ່າງ. ແນ່ນອນ ຄຳພີໄບເບິນບໍ່ໄດ້ບອກວ່າເຮົາຕ້ອງເປັນໄພໂອເນຍເພື່ອຈະຮັບໃຊ້ພະເຢໂຫວາໄດ້. ເຮົາສາມາດຮັບໃຊ້ພະອົງຢ່າງສັດຊື່ຕໍ່ໆໄປໃນການເປັນຜູ້ປະກາດ. ແຕ່ໃນອີກດ້ານໜຶ່ງ ພະເຍຊູກໍກ່າວວ່າພະເຢໂຫວາອວຍພອນຄົນທີ່ໄດ້ເສຍສະລະເພື່ອລາຊະອານາຈັກ. (ອ່ານລືກາ 18:29, 30) ນອກຈາກນັ້ນ ຄຳພີໄບເບິນຍັງກ່າວວ່າ ພະເຢໂຫວາມີຄວາມຍິນດີເມື່ອເຮົາເຮັດສຸດຄວາມສາມາດເພື່ອສັນລະເສີນພະອົງ ແລະພະອົງກໍຕ້ອງການໃຫ້ເຮົາມີຄວາມສຸກໃນການຮັບໃຊ້ພະອົງ. (ຄຳເພງ 119:108; 2 ໂກລິນໂທ 9:7) ການອະທິດຖານກ່ຽວກັບເລື່ອງນີ້ແລະຄິດຕຶກຕອງເຖິງສິ່ງເຫຼົ່ານີ້ ເຮົາຈະສາມາດຕັດສິນໃຈໃນແບບທີ່ໃຊ້ໄດ້ແທ້ກັບສະພາບການຂອງເຮົາແລະພະເຢໂຫວາກໍຈະອວຍພອນເຮົາໃນການຕັດສິນໃຈແບບນັ້ນ.
14. ເຈົ້າສາມາດກຳນົດໄດ້ແນວໃດວ່າການນຸ່ງຖືໃນຮູບແບບໃດຮູບແບບໜຶ່ງກຳລັງເຮັດໃຫ້ພະເຢໂຫວາພໍໃຈຫຼືບໍ?
14 ອີກຕົວຢ່າງໜຶ່ງແມ່ນ: ເຈົ້າມັກການນຸ່ງຖືໃນຮູບແບບໃດຮູບແບບໜຶ່ງຫຼາຍແທ້ໆ ແຕ່ເຈົ້າກໍຮູ້ວ່າບາງຄົນໃນປະຊາຄົມອາດຈະບໍ່ພໍໃຈຖ້າເຈົ້ານຸ່ງເຄື່ອງແບບນັ້ນ. ຄຳພີໄບເບິນບໍ່ໄດ້ບອກເຈາະຈົງໃນເລື່ອງຮູບແບບຂອງເຄື່ອງນຸ່ງ. ດັ່ງນັ້ນ ເຈົ້າຈະຮູ້ສິ່ງທີ່ເປັນຄວາມຄິດຂອງພະເຢໂຫວາໄດ້ແນວໃດ? ຄຳພີໄບເບິນບອກເຮົາວ່າ: ‘ພວກຜູ້ຍິງທັງມວນກໍເໝືອນກັນຕ້ອງແຕ່ງຕົວດ້ວຍເຄື່ອງນຸ່ງຫົ່ມທີ່ເໝາະສົມ ສຸພາບຮຽບຮ້ອຍ ແລະດ້ວຍສະຕິອັນດີ ບໍ່ໃຊ່ແຕ່ງຕົວດ້ວຍຖັກຜົມເກົ້າ ແລະເຄື່ອງເງິນຄຳ ຫຼືແກ້ວຫອຍ ຫຼືເຄື່ອງນຸ່ງຫົ່ມມີລາຄາແພງຫຼາຍ ແຕ່ວ່າດ້ວຍການດີຫຼາຍປະການ ອັນນີ້ເປັນສົມຄວນກັບຜູ້ຍິງທີ່ປະກາດຕົວວ່າເປັນຄົນນັບຖືພະເຈົ້າ.’ (1 ຕີໂມເຕ 2:9, 10) ແນ່ນອນວ່າຜູ້ຮັບໃຊ້ຂອງພະເຢໂຫວາທຸກຄົນເຊິ່ງກໍລວມເຖິງຜູ້ຊາຍນຳສາມາດຮຽນຮູ້ຈາກຖ້ອຍຄຳເຫຼົ່ານີ້. ເມື່ອເຮົາແຕ່ງຕົວແບບສຸພາບຮຽບຮ້ອຍ ເຮົາກໍກຳລັງຄິດເຖິງຄວາມຮູ້ສຶກຂອງຄົນອື່ນທີ່ມີຕໍ່ກັບເຄື່ອງນຸ່ງທີ່ເຮົາເລືອກນຸ່ງຖື. ເນື່ອງຈາກວ່າເຮົາຮັກພີ່ນ້ອງຂອງເຮົາ ເຮົາຈຶ່ງຫຼີກລ່ຽງການເຮັດໃຫ້ເຂົາເຈົ້າເສຍໃຈຫຼືບໍ່ພໍໃຈ. (1 ໂກລິນໂທ 10:23, 24; ຟີລິບ 3:17) ຖ້າເຮົາພິຈາລະນາເບິ່ງວ່າຄຳພີໄບເບິນບອກຫຍັງແລະພະເຢໂຫວາຄິດແນວໃດ ເຮົາກໍຈະສາມາດຕັດສິນໃຈໃນແບບທີ່ພະອົງພໍໃຈໄດ້.
15, 16. (ກ) ພະເຢໂຫວາຮູ້ສຶກແນວໃດຖ້າເຮົາຄິດຕໍ່ໄປໆໃນເລື່ອງຕ່າງໆທີ່ຜິດສິນລະທຳທາງເພດ (ຂ) ເມື່ອເລືອກຄວາມບັນເທີງ ເຮົາຈະຮູ້ໄດ້ແນວໃດໃນສິ່ງທີ່ພະເຢໂຫວາພໍໃຈ? (ຄ) ຄວນຕັດສິນໃຈໃນເລື່ອງໃຫຍ່ແນວໃດ?
15 ເຮົາສາມາດຮຽນຮູ້ຈາກຄຳພີໄບເບິນວ່າພະເຢໂຫວາຮູ້ສຶກເຈັບປວດໃຈຫຼາຍແທ້ໆແລະທຸກໃຈຫຼາຍເມື່ອຜູ້ຄົນເຮັດສິ່ງທີ່ຊົ່ວແລະຄິດໃນເລື່ອງທີ່ຊົ່ວ. (ອ່ານຕົ້ນເດີມ 6:5, 6) ເຫັນໄດ້ແຈ້ງວ່າພະເຢໂຫວາບໍ່ຕ້ອງການໃຫ້ເຮົາເພີ້ຝັນເຖິງເລື່ອງຕ່າງໆທີ່ຜິດສິນລະທຳທາງເພດ. ທີ່ຈິງ ຖ້າເຮົາຄິດເຖິງເລື່ອງເຫຼົ່ານີ້ຕໍ່ໆໄປ ເຮົາອາດຈະເຮັດສິ່ງເຫຼົ່ານີ້ແທ້ໆ. ແຕ່ພະເຢໂຫວາຕ້ອງການໃຫ້ເຮົາຄິດໃນເລື່ອງທີ່ດີແລະສະອາດ. ສາວົກຢາໂກໂບໄດ້ຂຽນກ່ຽວກັບສະຕິປັນຍາຂອງພະເຢໂຫວາວ່າ: ‘ກ່ອນອື່ນໝົດກໍບໍລິສຸດ ແລ້ວເປັນທີ່ເກີດຄວາມສຸກສຳລານ ມີເຫດຜົນ ແລະພ້ອມຈະເຊື່ອຟັງ ເຕັມໄປດ້ວຍຄວາມອີ່ດູ ແລະໝາກອັນດີ ບໍ່ເລືອກໜ້າຜູ້ໃດ ປາສະຈາກໜ້າຊື່ໃຈຄົດ.’ (ຢາໂກໂບ 3:17) ດັ່ງນັ້ນ ຄຳພີໄບເບິນສອນເຮົາວ່າເຮົາຕ້ອງຫຼີກລ່ຽງຄວາມບັນເທີງປະເພດທີ່ອາດເຮັດໃຫ້ເຮົາຈິນຕະນາການຫຼືມີຄວາມປາຖະໜາໃນສິ່ງທີ່ບໍ່ດີແລະບໍ່ສະອາດ. ຖ້າເຮົາເຂົ້າໃຈຢ່າງຈະແຈ້ງວ່າພະເຢໂຫວາຮັກສິ່ງໃດແລະກຽດຊັງສິ່ງໃດ ກໍຈະງ່າຍທີ່ເຮົາຈະຮູ້ວ່າປຶ້ມເລື່ອງແບບໃດ ໜັງແບບໃດ ຫຼືເກມແບບໃດທີ່ເຮົາຄວນຈະເລືອກ. ເມື່ອເປັນແນວນັ້ນ ເຮົາກໍບໍ່ຈຳເປັນຕ້ອງຖາມຄົນອື່ນໃນສິ່ງທີ່ເຮົາຄວນຈະເລືອກ.
16 ເມື່ອເຮົາຕ້ອງຕັດສິນໃຈໃນເລື່ອງໃດເລື່ອງໜຶ່ງ ຫຼາຍຄັ້ງມີຫຼາຍທາງເລືອກທີ່ເຮົາສາມາດເລືອກໄດ້ເຊິ່ງຈະເຮັດໃຫ້ພະເຢໂຫວາຍິນດີ. ແຕ່ເມື່ອເຮົາຈຳເປັນຕ້ອງຕັດສິນໃຈໃນເລື່ອງທີ່ສຳຄັນຫຼາຍ ເປັນເລື່ອງທີ່ດີທີ່ຈະຖາມຜູ້ເຖົ້າແກ່ ຫຼືຖາມພີ່ນ້ອງຊາຍຫຼືພີ່ນ້ອງຍິງທີ່ມີປະສົບການເພື່ອຈະໃຫ້ຄຳແນະນຳບາງຢ່າງແກ່ເຮົາ. (ຕິໂຕ 2:3-5; ຢາໂກໂບ 5:13-15) ແນ່ນອນວ່າເຮົາບໍ່ຄວນຂໍໃຫ້ພີ່ນ້ອງຄົນນັ້ນຕັດສິນໃຈແທນເຮົາ. ແທນທີ່ຈະເຮັດແບບນັ້ນ ເຮົາຕ້ອງຄິດໃຫ້ຄັກແນ່ກ່ຽວກັບສິ່ງທີ່ເຮົາຮູ້ຈາກຄຳພີໄບເບິນແລະຈາກນັ້ນກໍຕັດສິນໃຈດ້ວຍຕົວເອງ. (ເຫບເລີ 5:14) ອັກຄະສາວົກໂປໂລເວົ້າວ່າ: ‘ທຸກຄົນຈະແບກພາລະຂອງຕົນເອງ.’—ຄາລາຊີ 6:5
17. ເຮົາໄດ້ຮັບປະໂຫຍດຄືແນວໃດຈາກການຕັດສິນໃຈໃນແບບທີ່ພະເຢໂຫວາພໍໃຈ?
17 ເມື່ອເຮົາຕັດສິນໃຈໃນແບບທີ່ເຮັດໃຫ້ພະເຢໂຫວາຍິນດີ ເຮົາກໍຈະໃກ້ຊິດກັບພະອົງຫຼາຍຂຶ້ນ ແລະພະອົງກໍຈະພໍໃຈໃນຕົວເຮົາແລະອວຍພອນໃຫ້ເຮົາ. (ຢາໂກໂບ 4:8) ຈາກນັ້ນ ຄວາມເຊື່ອຂອງເຮົາໃນພະເຢໂຫວາກໍຈະເຂັ້ມແຂງຂຶ້ນ. ດັ່ງນັ້ນ ຂໍໃຫ້ຄິດຕຶກຕອງໃນສິ່ງທີ່ເຮົາອ່ານໃນຄຳພີໄບເບິນເພື່ອເຮົາຈະເຂົ້າໃຈວ່າພະເຢໂຫວາຄິດແນວໃດ. ແນ່ນອນ ເຮົາຈະມີສິ່ງໃໝ່ໆຢູ່ສະເໝີເພື່ອຮຽນຮູ້ກ່ຽວກັບພະເຢໂຫວາ. (ໂຢບ 26:14) ແຕ່ຖ້າເຮົາອອກຄວາມພະຍາຍາມເພື່ອຮຽນຮູ້ກ່ຽວກັບພະອົງຕັ້ງແຕ່ຕອນນີ້ ເຮົາກໍຈະເປັນຄົນສຸຂຸມແລະຈະສາມາດເຮັດການຕັດສິນໃຈທີ່ດີໄດ້. (ສຸພາສິດ 2:1-5) ຄວາມຄິດແລະແຜນການຕ່າງໆຂອງມະນຸດປ່ຽນແປງໄດ້ ແຕ່ພະເຢໂຫວາບໍ່ເຄີຍປ່ຽນ. ຜູ້ຂຽນຄຳເພງເວົ້າວ່າ: “ຄວາມເຕືອນສະຕິ [ຄຳຕັດສິນ] ຂອງພະເຢໂຫວາກໍຕັ້ງຢູ່ສືບໆໄປເປັນນິດ ຄວາມຕັ້ງໃຈໄວ້ຂອງພະອົງກໍຕັ້ງຢູ່ແຕ່ຊົ່ວອາຍຸນີ້ສືບໄປຊົ່ວອາຍຸນັ້ນ.” (ຄຳເພງ 33:11) ເຫັນໄດ້ແຈ້ງວ່າ ເຮົາສາມາດຕັດສິນໃຈໃນແບບທີ່ດີທີ່ສຸດ ເມື່ອເຮົາຮຽນຮູ້ທີ່ຈະຄິດຄືກັບທີ່ພະເຢໂຫວາຄິດ ແລ້ວຈາກນັ້ນກໍໃຫ້ເຮົາເຮັດໃນສິ່ງທີ່ເຮັດໃຫ້ພະອົງຍິນດີ.