ຄຳຖາມຈາກຜູ້ອ່ານ
ໃນນິມິດຂອງເອເຊກຽນ ຜູ້ຊາຍຄົນໜຶ່ງທີ່ມີກ່ອງນໍ້າໝຶກຂອງເລຂານຸການແລະຜູ້ຊາຍຫົກຄົນທີ່ຖືເຄື່ອງອາວຸດທຸບທຳລາຍ ຄົນເຫຼົ່ານັ້ນໝາຍເຖິງໃຜ?
ຜູ້ຊາຍຫົກຄົນນັ້ນໝາຍເຖິງກອງທັບທູດສະຫວັນເຊິ່ງກ່ຽວຂ້ອງກັບການທຳລາຍເມືອງເຢຣຶຊາເລມແລະຍັງຈະກ່ຽວຂ້ອງກັບການທຳລາຍໂລກຊົ່ວຂອງຊາຕານໃນສົງຄາມອະລະມະເຄໂດນ. ນີ້ເປັນການປັບຄວາມເຂົ້າໃຈໃໝ່. ເປັນຫຍັງເລື່ອງນີ້ຈຶ່ງຈຳເປັນ?
ກ່ອນປີ 607 ກ່ອນ ຄ.ສ. ພະເຢໂຫວາໄດ້ໃຫ້ນິມິດແກ່ເອເຊກຽນກ່ຽວກັບສິ່ງທີ່ຈະເກີດຂຶ້ນໃນເມືອງເຢຣຶຊາເລມກ່ອນທີ່ເມືອງນີ້ຈະຖືກທຳລາຍ. ໃນນິມິດ ເອເຊກຽນໄດ້ເຫັນສິ່ງທີ່ຊົ່ວຮ້າຍຫຼາຍຢ່າງເກີດຂຶ້ນໃນທີ່ນັ້ນ. ຈາກນັ້ນ ລາວໄດ້ເຫັນຜູ້ຊາຍຫົກຄົນເຊິ່ງແຕ່ລະຄົນຖື “ເຄື່ອງອາວຸດທຸບທຳລາຍ” ນອກຈາກນັ້ນຍັງມີຜູ້ຊາຍອີກຄົນໜຶ່ງຢູ່ກັບເຂົາເຈົ້າເຊິ່ງ “ໃສ່ຊຸດຜ້າລິນິນ” ແລະມີ “ກ່ອງນໍ້າໝຶກຂອງເລຂານຸການ.” (ເອເຊກຽນ 8:6-12; 9:2, 3, ລ.ມ.) ມີການບອກຜູ້ຊາຍຄົນນີ້ໃຫ້ໄປທົ່ວເມືອງ ‘ແລະໃຫ້ໝາຍໜ້າຜາກຄົນທີ່ທຸກໃຈແລະຮ້ອງຄາງຍ້ອນການໜ້າກຽດໜ້າຊັງທີ່ເຮັດຢູ່ໃນເມືອງນີ້.’ ຈາກນັ້ນມີການບອກຜູ້ຊາຍຫົກຄົນທີ່ຖືເຄື່ອງອາວຸດໃຫ້ຂ້າທຸກຄົນທີ່ຢູ່ໃນເມືອງນັ້ນເຊິ່ງບໍ່ມີເຄື່ອງໝາຍຢູ່ໜ້າຜາກ. (ເອເຊກຽນ 9:4-7) ເຮົາສາມາດຮຽນຮູ້ຫຍັງຈາກນິມິດນີ້ ແລະຜູ້ຊາຍທີ່ມີ “ກ່ອງນໍ້າໝຶກຂອງເລຂານຸການ” ແມ່ນໃຜ?
ເອເຊກຽນໄດ້ຮັບນິມິດນີ້ໃນປີ 612 ກ່ອນ ຄ.ສ. ນີ້ແມ່ນຄຳພະຍາກອນທີ່ສຳເລັດເປັນຈິງໃນຄັ້ງທຳອິດໃນເວລາຫ້າປີຕໍ່ມາ ເມື່ອພະເຢໂຫວາຍອມໃຫ້ກອງທະຫານບາບີໂລນທຳລາຍເມືອງເຢຣຶຊາເລມ. ໂດຍວິທີນີ້ ພະອົງໃຊ້ຊາວບາບີໂລນໃຫ້ລົງໂທດປະຊາຊົນຂອງພະອົງທີ່ບໍ່ເຊື່ອຟັງ. (ເຢເຣມີ 25:9, 15-18) ແຕ່ສຳລັບຄົນຢິວທີ່ຊອບທຳເດເຊິ່ງບໍ່ເຫັນດີກັບຄວາມຊົ່ວທຸກຢ່າງທີ່ກຳລັງເກີດຂຶ້ນໃນເມືອງນີ້? ພະເຢໂຫວາເຮັດໃຫ້ແນ່ໃຈວ່າເຂົາເຈົ້າໄດ້ຮັບການປົກປ້ອງ.
ໃນນິມິດ ເອເຊກຽນບໍ່ໄດ້ໝາຍໜ້າຜາກຂອງຜູ້ໃດແທ້ໆຫຼືມີສ່ວນໃນການທຳລາຍເມືອງ. ແຕ່ແມ່ນພວກທູດສະຫວັນເປັນຜູ້ບັນຊາການໃຫ້ທຳລາຍເມືອງເຢຣຶຊາເລມ. ດັ່ງນັ້ນ ຄຳພະຍາກອນນີ້ຈຶ່ງເປີດໂອກາດໃຫ້ເຮົາເຫັນສິ່ງທີ່ເກີດຂຶ້ນໃນສະຫວັນ. ພະເຢໂຫວາບອກພວກທູດສະຫວັນຂອງພະອົງໃຫ້ກຽມການທຳລາຍຄົນຊົ່ວແລະໃຫ້ແນ່ໃຈວ່າຄົນຊອບທຳຈະລອດຊີວິດ.ຄຳພະຍາກອນນີ້ຍັງຈະສຳເລັດເປັນຈິງໃນອະນາຄົດ. ພວກເຮົາເຄີຍເວົ້າວ່າຜູ້ຊາຍທີ່ມີກ່ອງນໍ້າໝຶກຂອງເລຂານຸການໝາຍເຖິງຜູ້ຖືກເຈີມທີ່ຍັງມີຊີວິດຢູ່ໃນໂລກນີ້. ນອກຈາກນັ້ນ ພວກເຮົາຍັງໄດ້ເວົ້າວ່າຜູ້ຄົນທີ່ຟັງແລະຍອມຮັບເອົາຂ່າວດີທີ່ເຮົາປະກາດຖືກໝາຍໄວ້ສຳລັບຄວາມລອດ. ແຕ່ເມື່ອບໍ່ດົນມານີ້ເຫັນໄດ້ແຈ້ງວ່າເຮົາຈຳເປັນຕ້ອງປ່ຽນແປງວິທີທີ່ເຮົາອະທິບາຍກ່ຽວກັບຄຳພະຍາກອນເລື່ອງນີ້. ເຮົາໄດ້ຮຽນຮູ້ຈາກມັດທາຍ 25:31-33 ວ່າ ພະເຍຊູເປັນຜູ້ທີ່ຕັດສິນຜູ້ຄົນ. ພະອົງຈະເຮັດສິ່ງນີ້ໃນອະນາຄົດໃນລະຫວ່າງຄວາມທຸກລຳບາກຄັ້ງໃຫຍ່. ໃນຕອນນັ້ນ ຄົນທີ່ຖືກຕັດສິນວ່າເປັນຄືກັບແກະຈະລອດຊີວິດ ແລະຄົນທີ່ຖືກຕັດສິນວ່າເປັນຄືກັບແບ້ຈະຖືກທຳລາຍ.
ດັ່ງນັ້ນ ເຮົາຮຽນຮູ້ຫຍັງຈາກນິມິດຂອງເອເຊກຽນ? ເຮົາຮຽນຮູ້ບົດຮຽນຫ້າເລື່ອງຕໍ່ໄປນີ້:
-
ກ່ອນທີ່ເມືອງເຢຣຶຊາເລມຈະຖືກທຳລາຍ ເອເຊກຽນແລະລວມເຖິງເຢເຣມີແລະເອຊາອີ ເຂົາເຈົ້າໄດ້ເຕືອນຜູ້ຄົນໃນສິ່ງທີ່ກຳລັງຈະເກີດຂຶ້ນກັບເມືອງນີ້. ເຂົາເຈົ້າເປັນຄືກັບຄົນເຝົ້າຍາມ. ໃນປັດຈຸບັນນີ້ ພະເຢໂຫວາໄດ້ໃຊ້ຜູ້ຖືກເຈີມກຸ່ມນ້ອຍໆກຸ່ມໜຶ່ງເພື່ອສອນຜູ້ຄົນແລະເຕືອນຄົນເຫຼົ່ານັ້ນ ກ່ອນທີ່ຄວາມທຸກລຳບາກຄັ້ງໃຫຍ່ເລີ່ມຕົ້ນ. ທີ່ຈິງ ປະຊາຊົນທຸກຄົນຂອງພະເຈົ້າເຊິ່ງໝາຍເຖິງຜູ້ຮັບໃຊ້ຂອງພະຄລິດມີສ່ວນຮ່ວມໃນການເຮັດວຽກເຕືອນນີ້.—ມັດທາຍ 24:45-47
-
ເອເຊກຽນບໍ່ໄດ້ໝາຍໜ້າຜາກຂອງຄົນທີ່ຈະລອດຊີວິດ ແລະປະຊາຊົນຂອງພະເຢໂຫວາໃນທຸກມື້ນີ້ກໍບໍ່ໄດ້ເຮັດແບບນັ້ນ. ເຂົາເຈົ້າພຽງແຕ່ປະກາດໃຫ້ຜູ້ຄົນຮູ້ແລະເຕືອນຄົນເຫຼົ່ານັ້ນເຖິງສິ່ງທີ່ຈະເກີດຂຶ້ນໃນອະນາຄົດ. ວຽກປະກາດໃນທົ່ວໂລກດຳເນີນໄປກໍຍ້ອນການຊ່ວຍເຫຼືອຈາກພວກທູດສະຫວັນ.—ຄຳປາກົດ 14:6
-
ຄົນທີ່ໄດ້ຮັບການຊ່ວຍໃຫ້ລອດຊີວິດໃນສະໄໝຂອງເອເຊກຽນບໍ່ມີເຄື່ອງໝາຍແທ້ໆຢູ່ທີ່ໜ້າຜາກຂອງເຂົາເຈົ້າ. ໃນທຸກມື້ນີ້ ຄົນທີ່ຈະໄດ້ຮັບການຊ່ວຍໃຫ້ລອດຊີວິດກໍຈະບໍ່ມີເຄື່ອງໝາຍຢູ່ໜ້າຜາກຂອງເຂົາເຈົ້າເຊັ່ນກັນ. ຜູ້ຄົນຕ້ອງເຮັດຫຍັງເພື່ອຈະລອດຜ່ານຄວາມທຸກລຳບາກຄັ້ງໃຫຍ່? ເມື່ອໄດ້ຍິນຄຳເຕືອນ ເຂົາເຈົ້າຕ້ອງຮຽນແບບພະຄລິດ ອຸທິດຊີວິດໃຫ້ແກ່ພະເຈົ້າ ແລະສະໜັບສະໜູນພີ່ນ້ອງຂອງພະຄລິດໂດຍການປະກາດຂ່າວດີ. (ມັດທາຍ 25:35-40) ໃນລະຫວ່າງຄວາມທຸກລຳບາກຄັ້ງໃຫຍ່ ຄົນເຫຼົ່ານີ້ຈະໄດ້ຮັບເຄື່ອງໝາຍ ເຊິ່ງກໍໝາຍຄວາມວ່າເຂົາເຈົ້າຈະຖືກເລືອກໃຫ້ລອດຊີວິດ.
-
ຜູ້ຊາຍທີ່ມີກ່ອງນໍ້າໝຶກໝາຍເຖິງພະເຍຊູ. ໃນລະຫວ່າງຄວາມທຸກລຳບາກຄັ້ງໃຫຍ່ ພະເຍຊູຈະໝາຍຊົນຝູງໃຫຍ່ເມື່ອພະອົງຕັດສິນເຂົາເຈົ້າວ່າເປັນຄືກັບແກະ. ຈາກນັ້ນ ເຂົາເຈົ້າຈະມີໂອກາດທີ່ຈະມີຊີວິດຕະຫຼອດໄປໃນໂລກນີ້.—ມັດທາຍ 25:34, 46 *
-
ໃນທຸກມື້ນີ້ ຜູ້ຊາຍຫົກຄົນທີ່ຖືເຄື່ອງອາວຸດທຸບທຳລາຍໝາຍເຖິງກອງທັບທູດສະຫວັນເຊິ່ງມີພະເຍຊູເປັນຫົວໜ້າ. ອີກບໍ່ດົນເຂົາເຈົ້າກໍຈະທຳລາຍຊາດຕ່າງໆແລະກຳຈັດຄວາມຊົ່ວຮ້າຍທຸກຢ່າງໃຫ້ໝົດໄປ.—ເອເຊກຽນ 10:2, 6, 7; ຄຳປາກົດ 19:11-21.
ບົດຮຽນຕ່າງໆທີ່ເຮົາຮຽນຮູ້ຈາກນິມິດນີ້ຊ່ວຍເຮົາໃຫ້ຮູ້ສຶກໝັ້ນໃຈວ່າພະເຢໂຫວາຈະບໍ່ທຳລາຍຄົນຊອບທຳພ້ອມກັບຄົນຊົ່ວ. (2 ເປໂຕ 2:9; 3:9) ນອກຈາກນັ້ນ ບົດຮຽນເຫຼົ່ານີ້ຍັງເຕືອນເຮົາວ່າວຽກປະກາດທີ່ກຳລັງເຮັດໃນສະໄໝຂອງເຮົາເປັນວຽກທີ່ສຳຄັນຫຼາຍ. ທຸກໆຄົນຈຳເປັນຕ້ອງໄດ້ຍິນກ່ຽວກັບຄຳເຕືອນນີ້ກ່ອນທີ່ອະວະສານຈະເກີດຂຶ້ນ!—ມັດທາຍ 24:14
^ ຂໍ້ 6 ຄົນທີ່ໄດ້ຮັບການຊ່ວຍຊີວິດ ເຊັ່ນ: ບາຣຶກ (ເລຂານຸການຂອງເຢເຣມີ) ເອເບດເມເລກຊາວເອທິໂອປີ ແລະຊາວເຣກາບີດ ເຂົາເຈົ້າບໍ່ໄດ້ຮັບເຄື່ອງໝາຍແທ້ໆຢູ່ທີ່ໜ້າຜາກ. (ເຢເຣມີ 35:1-19; 39:15-18; 45:1-5) ສັນຍະລັກທີ່ເປັນເຄື່ອງໝາຍພຽງແຕ່ໝາຍຄວາມວ່າເຂົາເຈົ້າຈະລອດຊີວິດ.
^ ຂໍ້ 12 ຜູ້ຖືກເຈີມທີ່ສັດຊື່ບໍ່ຈຳເປັນຕ້ອງໄດ້ຮັບເຄື່ອງໝາຍນີ້ເພື່ອຈະລອດຊີວິດ. ແຕ່ເຂົາເຈົ້າຈະໄດ້ຮັບການປະທັບກາຄັ້ງສຸດທ້າຍອາດຈະກ່ອນທີ່ເຂົາເຈົ້າຕາຍຫຼືກ່ອນທີ່ຄວາມທຸກລຳບາກຄັ້ງໃຫຍ່ເລີ່ມຕົ້ນ.—ຄຳປາກົດ 7:1, 3