ມີຊື່ຂອງບຸກຄົນໃນຄຳພີໄບເບິນຢູ່ໄຫເກົ່າແກ່
ໃນປີ 2012 ນັກບູຮານຄະດີພົບຊິ້ນສ່ວນນ້ອຍໆຂອງໄຫດິນເຜົາທີ່ມີອາຍຸ 3.000 ປີ. ພວກນັກຂຸດຄົ້ນຕື່ນເຕັ້ນຫຼາຍ. ຍ້ອນຫຍັງ? ບໍ່ແມ່ນຍ້ອນພົບຊິ້ນສ່ວນຕ່າງໆຂອງໄຫ ແຕ່ຕື່ນເຕັ້ນກັບຕົວໜັງສືທີ່ຢູ່ນຳຊິ້ນສ່ວນເຫຼົ່ານັ້ນ.
ໃນທີ່ສຸດ ເມື່ອນັກບູຮານຄະດີເອົາຊິ້ນສ່ວນທັງໝົດມາຕໍ່ໃສ່ກັນ ເຂົາເຈົ້າສາມາດອ່ານຕົວໜັງສືຂອງພວກການາອານທີ່ຂຽນຢູ່ໄຫໜ່ວຍນັ້ນ. ຂໍ້ຄວາມນັ້ນຂຽນວ່າ: “ເອເຊບາອານ ເບັນ ເບດາ” ເຊິ່ງໝາຍຄວາມວ່າ “ເອເຊບາອານລູກຊາຍຂອງເບດາ.” ນີ້ເປັນຄັ້ງທຳອິດທີ່ນັກບູຮານຄະດີພົບຊື່ນີ້ຂຽນຢູ່ໃນວັດຖຸບູຮານ.
ຄຳພີໄບເບິນກ່າວເຖິງຊື່ເອເຊບາອານ. ລາວເປັນລູກຊາຍຂອງກະສັດຊາອຶລ. (1 ຂ່າວຄາວ 8:33; 9:39) ສາສະດາຈານໂຢເຊບ ກາຟິນໂກ ເປັນຄົນໜຶ່ງທີ່ພົບໄຫໜ່ວຍນັ້ນ ລາວເວົ້າວ່າ: “ໜ້າສົນໃຈທີ່ມີຊື່ຂອງເອເຊບາອານໃນຄຳພີໄບເບິນ ເຊິ່ງຢູ່ໃນໄລຍະທີ່ກະສັດດາວິດປົກຄອງເທົ່ານັ້ນ ແລະຕອນນີ້ຊື່ນີ້ກໍຢູ່ໃນບັນທຶກທາງບູຮານຄະດີ.” ນີ້ເປັນອີກຕົວຢ່າງໜຶ່ງທີ່ສະແດງວ່າຫຼັກຖານທາງບູຮານຄະດີສະໜັບສະໜູນຄຳພີໄບເບິນ!
ໃນຄຳພີໄບເບິນ ເອເຊບາອານລູກຊາຍຂອງຊາອຶລຍັງມີອີກຊື່ໜຶ່ງວ່າອີດໂບເຊດ. (2 ຊາເມືອນ 2:10) ເປັນຫຍັງຈຶ່ງເອົາຄຳວ່າ “ໂບເຊດ” ໃສ່ແທນຄຳວ່າ “ບາອານ”? ນັກຄົ້ນຄວ້າອະທິບາຍວ່າຜູ້ຂຽນພະທຳ 2 ຊາເມືອນ ອາດຫຼີກລ່ຽງການໃຊ້ຊື່ເອເຊບາອານ ເພາະມັນເຮັດໃຫ້ຊາວອິດສະລາແອນຄິດເຖິງບາອານທີ່ເປັນພະເຈົ້າແຫ່ງລົມພາຍຸເຊິ່ງພວກການາອານນະມັດສະການ. ເຖິງຢ່າງນັ້ນກໍຕາມ ເຮົາຍັງເຫັນຊື່ເອເຊບາອານໃນພະທຳ 1 ຂ່າວຄາວ.
