ເຈົ້າຈະເອົາໃຈໃສ່ໃນສິ່ງທີ່ຂຽນໄວ້ບໍ?
“ເຫດການທັງໝົດນີ້ . . . ຖືກຂຽນໄວ້ເພື່ອເຕືອນເຮົາເຊິ່ງຢູ່ໃກ້ຕອນສິ້ນຍຸກ.”—1 ໂກລິນໂທ 10:11, ລ.ມ.
ເພງ: 48, 61
1, 2. ເປັນຫຍັງເຮົາຈຶ່ງຮຽນຮູ້ຈາກຕົວຢ່າງຂອງກະສັດທັງສີ່ຄົນຂອງຢູດາ?
ຖ້າເຈົ້າເຫັນບາງຄົນມື່ນແລະລົ້ມຢູ່ຫົນທາງ ແນ່ນອນວ່າເຈົ້າຈະລະວັງເມື່ອຍ່າງໃນທາງເສັ້ນນັ້ນ. ຄ້າຍຄືກັນ ການຮຽນຮູ້ຈາກຄວາມຜິດພາດຂອງຄົນອື່ນກໍຈະຊ່ວຍເຮົາໃຫ້ຫຼີກລ່ຽງການເຮັດຜິດທີ່ຄ້າຍໆກັນນັ້ນ. ຕົວຢ່າງເຊັ່ນ: ເຮົາສາມາດຮຽນຮູ້ຈາກຄວາມຜິດພາດຂອງບຸກຄົນທີ່ຄຳພີໄບເບິນກ່າວເຖິງ.
2 ໃນບົດຄວາມກ່ອນ ເຮົາໄດ້ຮຽນວ່າກະສັດທັງສີ່ຄົນຂອງຢູດາໄດ້ຮັບໃຊ້ພະເຢໂຫວາຢ່າງສຸດຫົວໃຈ ແຕ່ເຂົາເຈົ້າກໍຍັງເຮັດຜິດພາດຮ້າຍແຮງ. ເລື່ອງຂອງເຂົາເຈົ້າຂຽນໄວ້ໃນຄຳພີໄບເບິນກໍເພື່ອໃຫ້ເຮົາຄິດເຖິງສິ່ງເຫຼົ່ານັ້ນແລະຮຽນຮູ້ບົດຮຽນທີ່ມີຄ່າ. ເຮົາຈະໄດ້ບົດຮຽນຫຍັງຈາກສິ່ງທີ່ເກີດຂຶ້ນກັບເຂົາເຈົ້າ ແລະເຮົາຈະເຮັດແນວໃດເພື່ອບໍ່ເຮັດຜິດພາດແບບນັ້ນ?—ອ່ານໂລມ 15:4
ການເພິ່ງສະຕິປັນຍາຈາກມະນຸດນຳໄປສູ່ຄວາມເສຍຫາຍ
3-5. (ກ) ເຖິງວ່າອາຊາຮັບໃຊ້ພະເຢໂຫວາຢ່າງສຸດຫົວໃຈ ແຕ່ລາວເຮັດຫຍັງຜິດພາດ? (ຂ) ເມື່ອຕໍ່ສູ້ກັບບາເອຊາ ເປັນຫຍັງອາຊາຈຶ່ງໄປເພິ່ງມະນຸດ?
3 ທຳອິດໃຫ້ເຮົາຮຽນຮູ້ເລື່ອງຂອງອາຊາ. ລາວໄວ້ວາງໃຈພະເຢໂຫວາເມື່ອທະຫານເອທິໂອປີໜຶ່ງລ້ານຄົນມາໂຈມຕີຢູດາ. ແຕ່ລາວບໍ່ໄດ້ເພິ່ງພະເຢໂຫວາເມື່ອຕໍ່ສູ້ກັບບາເອຊາກະສັດອິດສະລາແອນ. ອາຊາຢາກໃຫ້ບາເອຊາເຊົາສ້າງເມືອງຣາມາເຊິ່ງເປັນເມືອງໜຶ່ງທີ່ສຳຄັນໃນອິດສະລາແອນແລະຢູ່ໃກ້ກັບເຂດແດນຂອງອານາຈັກຢູດາ. (2 ຂ່າວຄາວ 16:1-3) ອາຊາຕັດສິນໃຈວ່າເປັນສິ່ງທີ່ດີທີ່ຈະຊື້ຈ້າງກະສັດຊີລີໃຫ້ຊ່ວຍລາວ. ເມື່ອພວກຊີລີໂຈມຕີເມືອງຕ່າງໆຂອງອິດສະລາແອນ ບາອາຊາ “ເຊົາກໍ່ສ້າງຣາມາ [ທັນທີ].” (2 ຂ່າວຄາວ 16:5) ທຳອິດ ອາຊາອາດຄິດວ່າລາວຕັດສິນໃຈຖືກແລ້ວ!
4 ພະເຢໂຫວາຮູ້ສຶກແນວໃດ? ພະເຢໂຫວາບໍ່ພໍໃຈທີ່ອາຊາບໍ່ໄດ້ເພິ່ງພະອົງ ດັ່ງນັ້ນ ພະອົງຈຶ່ງສົ່ງຜູ້ພະຍາກອນຫານານີໄປຕຳໜິລາວ. (ອ່ານ 2 ຂ່າວຄາວ 16:7-9) ຫານານີບອກວ່າ: “ຕັ້ງແຕ່ນີ້ຕໍ່ໄປທ່ານຈະມີການເສິກ.” ອາຊາໄດ້ຍຶດເອົາເມືອງຣາມາ ແຕ່ໃນຕະຫຼອດຊີວິດທີ່ເຫຼືອຢູ່ ອາຊາແລະປະຊາຊົນຕ້ອງສູ້ຮົບຫຼາຍຄັ້ງ.
5 ໃນບົດຄວາມກ່ອນ ເຮົາໄດ້ຮູ້ວ່າພະເຢໂຫວາພໍໃຈກັບອາຊາ. ເຖິງວ່າລາວບໍ່ສົມບູນແບບ ແຕ່ພະເຢໂຫວາກໍເຫັນວ່າລາວຮັບໃຊ້ພະອົງຢ່າງສຸດຫົວໃຈ. (1 ກະສັດ 15:14) ແຕ່ເມື່ອອາຊາຕັດສິນໃຈຜິດ ລາວກໍຕ້ອງຮັບຜົນຂອງການຕັດສິນໃຈແບບນັ້ນ. ເປັນຫຍັງລາວເພິ່ງຕົວເອງແລະມະນຸດ ແທນທີ່ຈະເພິ່ງພະເຢໂຫວາ? ອາຊາອາດຄິດວ່າລາວສາມາດໃຊ້ວິທີການທີ່ສະຫຼາດທາງທະຫານເພື່ອເອົາຊະນະໃນການສູ້ຮົບ ຫຼືລາວອາດຟັງຄຳແນະນຳທີ່ບໍ່ດີຈາກຄົນອື່ນ.
ເຮົາຄວນເພິ່ງພະເຢໂຫວາໃນທຸກໆສະຖານະການ ບໍ່ແມ່ນເພິ່ງຄວາມຄິດຂອງເຮົາເອງ
6. ເຮົາໄດ້ບົດຮຽນຫຍັງຈາກຄວາມຜິດພາດຂອງອາຊາ? ໃຫ້ຍົກຕົວຢ່າງ.
6 ເຮົາໄດ້ບົດຮຽນຫຍັງຈາກຄວາມຜິດພາດຂອງອາຊາ? ເຮົາຄວນໝາຍເພິ່ງພະເຢໂຫວາໃນທຸກໆສະຖານະການ ບໍ່ແມ່ນເພິ່ງຄວາມຄິດຂອງເຮົາເອງ. ເຮົາຕ້ອງຂໍໃຫ້ພະອົງຊ່ວຍ ບໍ່ວ່າບັນຫານັ້ນຈະນ້ອຍຫຼືໃຫຍ່ກໍຕາມ. ເປັນສິ່ງທີ່ດີທີ່ຈະຄິດເຖິງຄຳຖາມຕໍ່ໄປນີ້: ບາງຄັ້ງເຮົາເພິ່ງຕົວເອງໂດຍພະຍາຍາມແກ້ໄຂບັນຫາໃດໜຶ່ງໃນແບບທີ່ເຮົາຄິດວ່າດີທີ່ສຸດບໍ? ຫຼືເຮົາຈະຄິດເບິ່ງກ່ອນວ່າຄຳພີໄບເບິນບອກແນວໃດແລະຈາກນັ້ນກໍພະຍາຍາມໃຊ້ຫຼັກການນັ້ນເພື່ອແກ້ໄຂບັນຫາຂອງເຮົາ? ຕົວຢ່າງເຊັ່ນ: ສົມມຸດວ່າຄອບຄົວເຮັດໃຫ້ຍາກທີ່ເຈົ້າຈະເຂົ້າຮ່ວມການປະຊຸມປະຈຳອາທິດຫຼືການປະຊຸມໃຫຍ່. ເຈົ້າຈະຂໍໃຫ້ພະເຢໂຫວາຊ່ວຍບໍເພື່ອໃຫ້ຮູ້ວ່າຄວນເຮັດແນວໃດໃນສະພາບການແບບນັ້ນ? ຫຼືບາງທີເຈົ້າອາດບໍ່ມີວຽກເຮັດດົນແລ້ວ ແລະໃນທີ່ສຸດກໍມີຄົນຢາກຈ້າງເຈົ້າເຮັດວຽກ. ເຈົ້າຈະບອກລາວບໍວ່າເຈົ້າຕ້ອງເຂົ້າຮ່ວມການປະຊຸມທຸກອາທິດ ເຖິງວ່າການເວົ້າແບບນັ້ນອາດຈະເຮັດໃຫ້ເຈົ້າບໍ່ໄດ້ວຽກ? ບໍ່ວ່າບັນຫາຈະເປັນແນວໃດກໍຕາມ ເຮົາຕ້ອງຈື່ຄຳແນະນຳຂອງຜູ້ຂຽນຄຳເພງທີ່ບອກວ່າ: “ໃຫ້ພະເຢໂຫວາຊີ້ທາງໃຫ້ເຈົ້າ ຂໍໃຫ້ເພິ່ງພະອົງ ແລ້ວພະອົງຈະຊ່ວຍເຈົ້າ.”—ຄຳເພງ 37:5, ລ.ມ.
ຖ້າເຮົາເລືອກໝູ່ຜິດຈະເປັນແນວໃດ?
7, 8. ໂຢຊາຟາດເຮັດຜິດພາດໃນເລື່ອງໃດ ແລະຜົນເປັນແນວໃດ? (ເບິ່ງຮູບທຳອິດ)
7 ຕອນນີ້ໃຫ້ເຮົາເບິ່ງຕົວຢ່າງຂອງໂຢຊາຟາດລູກຊາຍຂອງອາຊາ. ລາວມີຈຸດທີ່ດີຫຼາຍຢ່າງເຊິ່ງເຮັດໃຫ້ພະເຢໂຫວາພໍໃຈ. ເມື່ອໂຢຊາຟາດເພິ່ງພະເຢໂຫວາ ລາວໄດ້ເຮັດສິ່ງດີຫຼາຍຢ່າງ ແຕ່ໃນບາງເລື່ອງລາວກໍຕັດສິນໃຈຜິດພາດເຊັ່ນກັນ. ຕົວຢ່າງເຊັ່ນ: ລາວໃຫ້ລູກຊາຍແຕ່ງດອງກັບລູກສາວຂອງກະສັດອາກາບຜູ້ຊົ່ວຮ້າຍ. ຕໍ່ມາລາວກໍຮ່ວມມືກັບອາກາບໃນການຕໍ່ສູ້ກັບພວກຊີລີ ທັ່ງໆທີ່ຜູ້ພະຍາກອນມີກາຢາໄດ້ເຕືອນວ່າບໍ່ໃຫ້ເຮັດ. ໃນການສູ້ຮົບ ພວກຊີລີໄດ້ໂຈມຕີໂຢຊາຟາດແລະພະຍາຍາມຂ້າລາວ. (2 ຂ່າວຄາວ 18:1-32) ເມື່ອກັບໄປເມືອງເຢຣຶຊາເລມ ຜູ້ພະຍາກອນເຢຫຶຖາມລາວວ່າ: “ທ່ານຊ່ອຍຜູ້ຮ້າຍແລະຮັກຄົນທັງຫຼາຍທີ່ກຽດຊັງພະເຢໂຫວາບໍ?”—ອ່ານ 2 ຂ່າວຄາວ 19:1-3
8 ໂຢຊາຟາດໄດ້ບົດຮຽນຈາກສິ່ງທີ່ເກີດຂຶ້ນແລະຈາກຄຳເຕືອນຂອງຜູ້ພະຍາກອນບໍ? ໜ້າເສົ້າໃຈລາວບໍ່ໄດ້ບົດຮຽນຫຍັງເລີຍ. ເຖິງວ່າໂຢຊາຟາດຮັກພະເຢໂຫວາແລະຢາກເຮັດສິ່ງທີ່ພະອົງພໍໃຈ ແຕ່ລາວກໍຍັງໄປເປັນມິດກັບຄົນທີ່ບໍ່ຢາກນະມັດສະການພະເຢໂຫວາ ເຊິ່ງຄົນນັ້ນແມ່ນອາກາເຊຍລູກຂອງອາກາບ. ໂຢຊາຟາດແລະອາກາເຊຍຮ່ວມມືກັນສ້າງເຮືອ ແຕ່ເຮືອເຫຼົ່ານັ້ນຫຼົ້ມກ່ອນທີ່ເຂົາເຈົ້າຈະໃຊ້ມັນຊໍ້າ.—2 ຂ່າວຄາວ 20:35-37
9. ຖ້າເຮົາເລືອກໝູ່ຜິດຈະເປັນແນວໃດ?
9 ເຮົາໄດ້ບົດຮຽນຫຍັງຈາກສິ່ງທີ່ເກີດຂຶ້ນກັບໂຢຊາຟາດ? ລາວເຮັດສິ່ງທີ່ຖືກຕ້ອງແລະ “ຊອກຫາພະເຢໂຫວາດ້ວຍສຸດໃຈ.” (2 ຂ່າວຄາວ 22:9) ແຕ່ລາວເລືອກຄົບຫາກັບຄົນທີ່ບໍ່ຮັກພະເຢໂຫວາ ແລະສິ່ງນີ້ກໍ່ບັນຫາຮ້າຍແຮງໃນຊີວິດຂອງລາວ. ທີ່ຈິງລາວເກືອບຖືກຂ້າ. ຂໍໃຫ້ຈື່ສຸພາສິດໃນຄຳພີໄບເບິນທີ່ບອກວ່າ: “ຜູ້ທີ່ທຽວໄປນຳພວກຄົນປັນຍາກໍເລີຍເປັນຄົນປັນຍາດ້ວຍ ແຕ່ວ່າຜູ້ສ່ຽວຂອງພວກຄົນໂງ່ກໍຈະໃຫ້ຕົວຊົ່ວໄປ.” (ສຸພາສິດ 13:20) ແມ່ນຢູ່ ເຮົາຢາກບອກໃຫ້ຄົນອື່ນຮູ້ເລື່ອງຂອງພະເຢໂຫວາ ແຕ່ຈະເປັນອັນຕະລາຍຖ້າເຮົາກາຍເປັນໝູ່ສະໜິດກັບຄົນທີ່ບໍ່ຮັບໃຊ້ພະອົງ.
ເຈົ້າເຊື່ອບໍວ່າພະເຢໂຫວາຈະເບິ່ງແຍງຄວາມຕ້ອງການຂອງເຈົ້າທີ່ຈະໄດ້ຮັບຄວາມຮັກແລະມີເພື່ອນຮ່ວມຊີວິດ?
10. (ກ) ຖ້າເຮົາຢາກແຕ່ງດອງ ເຮົາໄດ້ບົດຮຽນຫຍັງຈາກໂຢຊາຟາດ? (ຂ) ເຮົາຄວນຈື່ສິ່ງໃດໄວ້?
10 ສົມມຸດວ່າເຮົາຢາກແຕ່ງດອງ ເຮົາໄດ້ບົດຮຽນຫຍັງຈາກຕົວຢ່າງຂອງໂຢຊາຟາດ? ບາງທີເຮົາອາດຈະເລີ່ມມັກຄົນທີ່ບໍ່ຮັກພະເຢໂຫວາ ເພາະຄິດວ່າບໍ່ມີມື້ພົບຄົນທີ່ເໝາະສົມເຊິ່ງຈະແຕ່ງດອງນຳໄດ້ໃນທ່າມກາງພະຍານພະເຢໂຫວາ. ຫຼືຍາດພີ່ນ້ອງບາງຄົນອາດເວົ້າຕະຫຼອດວ່າເຮົາຕ້ອງແຕ່ງດອງກ່ອນທີ່ຈະເຖົ້າ. ທີ່ຈິງ ພະເຢໂຫວາສ້າງເຮົາໃຫ້ຢາກໄດ້ຄວາມຮັກແລະຢາກສະແດງຄວາມຮັກ. ແຕ່ຖ້າເຮົາຍັງບໍ່ພົບຄົນທີ່ເໝາະສົມເພື່ອຈະແຕ່ງດອງນຳ ເຮົາຄວນເຮັດແນວໃດ? ການຄິດເຖິງສິ່ງທີ່ເກີດຂຶ້ນກັບໂຢຊາຟາດເປັນສິ່ງໜຶ່ງທີ່ຈະຊ່ວຍເຮົາໄດ້. ຕາມປົກກະຕິແລ້ວລາວຂໍການຊີ້ນຳຈາກພະເຢໂຫວາສະເໝີ. (2 ຂ່າວຄາວ 18:4-6) ແຕ່ເມື່ອເປັນໝູ່ກັບອາກາບເຊິ່ງເປັນຄົນທີ່ບໍ່ຮັກພະເຢໂຫວາ ໂຢຊາຟາດກໍເມີນເສີຍຕໍ່ຄຳເຕືອນຂອງພະອົງ. ໂຢຊາຟາດຄວນຈື່ໄວ້ວ່າ “ພະເຢໂຫວາເບິ່ງທົ່ວທັງໂລກເພື່ອຈະໃຊ້ອຳນາດຂອງພະອົງຊ່ວຍເຫຼືອຄົນທີ່ຮັບໃຊ້ພະອົງສຸດຫົວໃຈ.” (2 ຂ່າວຄາວ 16:9, ລ.ມ.) ເຮົາເອງກໍຄວນຈື່ໄວ້ວ່າພະເຢໂຫວາຢາກຊ່ວຍເຮົາເຊັ່ນກັນ. ພະອົງຮັກເຮົາແລະເຂົ້າໃຈສະຖານະການຂອງເຮົາ. ເຈົ້າເຊື່ອບໍວ່າພະເຢໂຫວາຈະເບິ່ງແຍງຄວາມຕ້ອງການຂອງເຈົ້າທີ່ຈະໄດ້ຮັບຄວາມຮັກແລະມີເພື່ອນຮ່ວມຊີວິດ? ໃຫ້ໝັ້ນໃຈວ່າເມື່ອຮອດຈຸດໜຶ່ງພະອົງຈະເບິ່ງແຍງໃນເລື່ອງນີ້!
ຢ່າໄປພົວພັນກັບຄົນທີ່ບໍ່ນະມັດສະການພະເຢໂຫວາ (ເບິ່ງຂໍ້ 10)
ຢ່າປ່ອຍໃຫ້ໃຈຂອງເຈົ້າຍິ່ງ
11, 12. (ກ) ເອເຊເກຍເຊໄດ້ເຮັດຫຍັງເຊິ່ງເປີດເຜີຍໃຫ້ຮູ້ສິ່ງທີ່ຢູ່ໃນໃຈລາວ? (ຂ) ເປັນຫຍັງພະເຢໂຫວາຈຶ່ງໃຫ້ອະໄພເອເຊເກຍເຊ?
11 ເຮົາໄດ້ບົດຮຽນຫຍັງຈາກເອເຊເກຍເຊ? ພະເຢໂຫວາຊ່ວຍລາວໃຫ້ເຫັນສິ່ງທີ່ຢູ່ໃນຫົວໃຈຂອງລາວແທ້ໆ. (ອ່ານ 2 ຂ່າວຄາວ 32:31) ເມື່ອເອເຊເກຍເຊເຈັບປ່ວຍໜັກ ພະເຢໂຫວາບອກວ່າລາວຈະດີຂຶ້ນແລະພະອົງໄດ້ເຮັດການອັດສະຈັນຢ່າງໜຶ່ງເພື່ອໃຫ້ລາວໝັ້ນໃຈໃນເລື່ອງນີ້ ພະອົງເຮັດໃຫ້ເງົາທີ່ສ່ອງໃສ່ຂັ້ນໄດຂອງເອເຊເກຍເຊຖອຍກັບໄປ 10 ຂັ້ນ. ຕໍ່ມາ ເບິ່ງຄືວ່າພວກເຈົ້ານາຍຈາກບາບີໂລນຢາກຮູ້ກ່ຽວກັບການອັດສະຈັນນີ້ ດັ່ງນັ້ນ ເຂົາເຈົ້າຈຶ່ງໄດ້ສົ່ງຕົວແທນໄປຖາມເອເຊເກຍເຊໃນເລື່ອງນີ້. (2 ກະສັດ 20:8-13; 2 ຂ່າວຄາວ 32:24) ພະເຢໂຫວາບໍ່ໄດ້ບອກເອເຊເກຍເຊວ່າຄວນປະຕິບັດຕໍ່ຄົນເຫຼົ່ານີ້ແນວໃດ. ຄຳພີໄບເບິນບອກວ່າພະເຢໂຫວາໄດ້ “ປະ” ລາວເພື່ອລອງເບິ່ງວ່າລາວຈະເຮັດແນວໃດ. ແຕ່ເອເຊເກຍເຊໃຫ້ຕົວແທນຈາກບາບີໂລນເຫັນຄັງສົມບັດທັງໝົດຂອງລາວ. ການກະທຳນີ້ເປີດເຜີຍໃຫ້ຮູ້ສິ່ງທີ່ຢູ່ໃນໃຈລາວ. ເປີດເຜີຍໃນແງ່ໃດ?
12 ໜ້າເສົ້າໃຈ ເອເຊເກຍເຊກາຍເປັນຄົນຍິ່ງ. ຜົນກໍຄື ລາວ “ບໍ່ໄດ້ສຳນຶກບຸນຄຸນທີ່ພະເຈົ້າດີກັບລາວ, ລ.ມ.” ຄຳພີໄບເບິນບໍ່ໄດ້ບອກວ່າເປັນຫຍັງຄວາມຄິດຂອງລາວຈຶ່ງປ່ຽນໄປ. ບາງທີອາດເປັນຍ້ອນວ່າລາວຊະນະພວກອາຊີລີ ຫຼືຍ້ອນວ່າພະເຢໂຫວາປິ່ນປົວລາວໃຫ້ເຊົາຢ່າງອັດສະຈັນ ຫຼືຍ້ອນວ່າລາວກາຍເປັນຄົນຮັ່ງມີແລະມີຊື່ສຽງ. ເຖິງວ່າເອເຊເກຍເຊຮັບໃຊ້ພະເຢໂຫວາຢ່າງສຸດຫົວໃຈ ແຕ່ມີໄລຍະໜຶ່ງລາວເປັນຄົນຍິ່ງແລະພະອົງກໍບໍ່ພໍໃຈລາວ. ແຕ່ຕໍ່ມາ “ເອເຊເກຍເຊໄດ້ຖ່ອມຕົວ” ແລະພະເຢໂຫວາໃຫ້ອະໄພລາວ.—2 ຂ່າວຄາວ 32:25-27; ຄຳເພງ 138:6
ເມື່ອມີຄົນຊົມເຊີຍ ທ່າທີຂອງເຮົາບອກໃຫ້ຮູ້ສິ່ງທີ່ຢູ່ໃນໃຈເຮົາ
13, 14. (ກ) ສະຖານະການແບບໃດທີ່ບອກໃຫ້ຮູ້ສິ່ງທີ່ຢູ່ໃນໃຈເຮົາ? (ຂ) ເຮົາຄວນມີທ່າທີແນວໃດເມື່ອມີຄົນຊົມເຊີຍເຮົາ?
13 ເຮົາໄດ້ບົດຮຽນຫຍັງຈາກເອເຊເກຍເຊແລະຄວາມຜິດພາດຂອງລາວ? ໃຫ້ຈື່ວ່າເອເຊເກຍເຊປະພຶດແບບຍິ່ງ ທັນທີຫຼັງຈາກພະເຢໂຫວາຊ່ວຍລາວໃຫ້ຊະນະພວກອາຊີລີແລະປິ່ນປົວລາວໃຫ້ເຊົາເຈັບປ່ວຍ. ດັ່ງນັ້ນ ເມື່ອມີເລື່ອງທີ່ດີເກີດຂຶ້ນກັບເຮົາຫຼືມີຄົນຊົມເຊີຍ ເຮົາຈະເຮັດແນວໃດ? ທ່າທີຂອງເຮົາບອກໃຫ້ຮູ້ສິ່ງທີ່ຢູ່ໃນໃຈເຮົາ. ສົມມຸດວ່າພີ່ນ້ອງຊາຍຄົນໜຶ່ງອາດອອກຄວາມພະຍາຍາມຫຼາຍເພື່ອກຽມຄຳບັນລະຍາຍແລະເວົ້າຕໍ່ໜ້າຜູ້ຟັງກຸ່ມໃຫຍ່ ແລະຫຼາຍຄົນຊົມເຊີຍລາວວ່າເຮັດໄດ້ດີຫຼາຍ. ລາວຈະມີທ່າທີແນວໃດຕໍ່ຄຳຊົມເຊີຍນັ້ນ?
14 ເຮົາຄວນຈື່ໄວ້ສະເໝີທີ່ພະເຍຊູບອກວ່າ: “ເມື່ອເຮັດວຽກທີ່ນາຍສັ່ງແລ້ວ ກໍຄວນຈະເວົ້າວ່າ: ‘ພວກເຮົາເປັນແຕ່ທາດທີ່ເຮັດຕາມໜ້າທີ່ເທົ່ານັ້ນ.’” (ລືກາ 17:10, ລ.ມ.) ໃຫ້ຈື່ໄວ້ວ່າເມື່ອເອເຊເກຍເຊກາຍເປັນຄົນຍິ່ງ ລາວບໍ່ໄດ້ຮູ້ຄຸນຄ່າຕໍ່ສິ່ງທີ່ພະເຢໂຫວາຊ່ວຍລາວ. ດັ່ງນັ້ນ ເມື່ອມີຄົນຊົມເຊີຍຄຳບັນລະຍາຍຂອງເຮົາ ອັນໃດຈະຊ່ວຍເຮົາໃຫ້ຮັກສາຄວາມຖ່ອມ? ເຮົາຄວນຄິດເຖິງສິ່ງທີ່ພະເຢໂຫວາໄດ້ເຮັດເພື່ອເຮົາ. ນອກຈາກນັ້ນ ເຮົາຄວນເວົ້າກ່ຽວກັບເລື່ອງຂອງພະອົງແລະວິທີທີ່ພະອົງໄດ້ຊ່ວຍເຮົາ. ສຳຄັນທີ່ສຸດ ພະເຢໂຫວາເປັນຜູ້ຈັດໃຫ້ເຮົາມີຄຳພີໄບເບິນແລະແມ່ນພະລັງບໍລິສຸດຂອງພະອົງທີ່ຊ່ວຍເຮົາໃຫ້ມີຄວາມສາມາດບັນລະຍາຍໄດ້.
ໃຫ້ພະເຢໂຫວາຊີ້ນຳເມື່ອຕັດສິນໃຈ
15, 16. ໂຢເຊຍເຊໄດ້ເຮັດຫຍັງເຊິ່ງເຮັດໃຫ້ລາວເສຍຊີວິດ?
15 ສຸດທ້າຍເຮົາໄດ້ບົດຮຽນຫຍັງຈາກໂຢເຊຍເຊ? ເຖິງວ່າເປັນກະສັດທີ່ດີ ແຕ່ລາວເຮັດສິ່ງທີ່ຜິດພາດຈົນເຮັດໃຫ້ລາວເສຍຊີວິດ. (ອ່ານ 2 ຂ່າວຄາວ 35:20-22) ເກີດຫຍັງຂຶ້ນ? ໂຢເຊຍເຊໄປຕໍ່ສູ້ກັບເນໂກກະສັດເອຢິບ ທັ່ງໆທີ່ບໍ່ມີເຫດຜົນທີ່ຈະເຮັດແບບນັ້ນ. ເນໂກເອງໄດ້ບອກໂຢເຊຍເຊວ່າບໍ່ຢາກຕໍ່ສູ້ກັບໂຢເຊຍເຊ. ທີ່ຈິງ ຄຳພີໄບເບິນບອກວ່າຄຳເວົ້າຂອງເນໂກ “ມາແຕ່ປາກພະເຈົ້າ.” ເຖິງຢ່າງນັ້ນກໍຕາມ ໂຢເຊຍເຊໄດ້ໄປສູ້ຮົບແລ້ວກໍຖືກຂ້າ. ເປັນຫຍັງລາວຈຶ່ງຕໍ່ສູ້ກັບເນໂກ? ຄຳພີໄບເບິນບໍ່ໄດ້ບອກເຫດຜົນ.
16 ໂຢເຊຍເຊຄວນຊອກຮູ້ວ່າສິ່ງທີ່ເນໂກເວົ້າມາຈາກພະເຢໂຫວາແທ້ໆຫຼືບໍ່. ຊອກຮູ້ໂດຍວິທີໃດ? ລາວສາມາດຖາມເຢເຣມີທີ່ເປັນຜູ້ພະຍາກອນຂອງພະເຢໂຫວາ. (2 ຂ່າວຄາວ 35:23, 25) ນອກຈາກນັ້ນ ໂຢເຊຍເຊຄວນເບິ່ງຄວາມເປັນຈິງຕ່າງໆ ເຊັ່ນ: ເນໂກກຳລັງໄປຕໍ່ສູ້ເມືອງກາເຣເກມີຊເຊິ່ງເປັນອີກຊາດໜຶ່ງ ລາວບໍ່ໄດ້ຕໍ່ສູ້ເມືອງເຢຣຶຊາເລມ ແລະເນໂກກໍບໍ່ໄດ້ດູຖູກພະເຢໂຫວາຫຼືປະຊາຊົນຂອງພະອົງ. ກ່ອນທີ່ໂຢເຊຍເຊຈະຕັດສິນໃຈ ລາວບໍ່ໄດ້ຄິດຮອບຄອບກ່ຽວກັບສິ່ງເຫຼົ່ານີ້. ເຮົາໄດ້ບົດຮຽນຫຍັງ? ເມື່ອເຮົາມີບັນຫາແລະຕ້ອງຕັດສິນໃຈ ທຳອິດເຮົາຄວນເບິ່ງວ່າພະເຢໂຫວາຢາກໃຫ້ເຮົາເຮັດແນວໃດ.
17. ເມື່ອມີບັນຫາ ເຮົາຄວນເຮັດແນວໃດເພື່ອຈະບໍ່ຜິດພາດຄືໂຢເຊຍເຊ?
17 ເມື່ອຕ້ອງຕັດສິນໃຈໃນເລື່ອງໃດເລື່ອງໜຶ່ງ ກ່ອນອື່ນໝົດເຮົາຕ້ອງຄິດເຖິງຫຼັກການຕ່າງໆໃນຄຳພີໄບເບິນທີ່ຈະຊ່ວຍໄດ້ແລະເບິ່ງວ່າຈະໃຊ້ຫຼັກການເຫຼົ່ານັ້ນແນວໃດ. ໃນບາງກໍລະນີ ເຮົາອາດຢາກຄົ້ນຄວ້າຕື່ມອີກໃນປຶ້ມຂອງອົງການຫຼືອາດຈະຂໍຄຳແນະນຳຈາກຜູ້ເຖົ້າແກ່ ເຊິ່ງລາວຈະຊ່ວຍເຮົາໃຫ້ຄິດເຖິງຫຼັກການໃນຄຳພີໄບເບິນ. ລອງນຶກພາບສະຖານະການຕໍ່ໄປນີ້: ພີ່ນ້ອງຍິງຄົນໜຶ່ງແຕ່ງດອງກັບຄົນທີ່ບໍ່ແມ່ນພະຍານພະເຢໂຫວາ. ມີມື້ໜຶ່ງລາວຕັ້ງໃຈວ່າຈະອອກໄປປະກາດ. (ກິດຈະການ 4:20) ແຕ່ຜົວບໍ່ຢາກໃຫ້ລາວອອກໄປໃນມື້ນັ້ນ. ຜົວຂອງລາວເວົ້າວ່າ ເຂົາເຈົ້າບໍ່ໄດ້ໃຊ້ເວລານຳກັນຫຼາຍປານໃດໃນໄລຍະນີ້ແລະລາວຢາກພາເມຍໄປບ່ອນໃດບ່ອນໜຶ່ງ. ພີ່ນ້ອງຍິງຄິດເຖິງຂໍ້ພະຄຳພີຕ່າງໆທີ່ຈະຊ່ວຍລາວໃຫ້ຕັດສິນໃຈຢ່າງສຸຂຸມ. ລາວຮູ້ວ່າຕ້ອງເຊື່ອຟັງພະເຈົ້າແລະພະເຍຊູສັ່ງເຮົາໃຫ້ໄປຊ່ວຍຄົນເຂົ້າມາເປັນລູກສິດ. (ມັດທາຍ 28:19, 20; ກິດຈະການ 5:29) ແຕ່ລາວກໍຈື່ວ່າເມຍຄວນເຊື່ອຟັງຜົວແລະຜູ້ຮັບໃຊ້ຂອງພະເຢໂຫວາຕ້ອງເປັນຄົນມີເຫດຜົນ. (ເອເຟດ 5:22-24; ຟີລິບ 4:5) ຜົວກຳລັງພະຍາຍາມເຮັດໃຫ້ລາວເຊົາໄປປະກາດບໍ ຫຼືລາວພຽງແຕ່ຢາກໃຊ້ເວລາກັບເມຍໃນມື້ນັ້ນ? ເນື່ອງຈາກເປັນຜູ້ຮັບໃຊ້ຂອງພະເຢໂຫວາ ເຮົາຢາກຕັດສິນໃຈແບບມີເຫດຜົນແລະເຮັດໃຫ້ພະອົງພໍໃຈ.
ຮັບໃຊ້ຢ່າງສຸດຫົວໃຈແລະດ້ວຍຄວາມຍິນດີ
18. ເຈົ້າໄດ້ບົດຮຽນຫຍັງຈາກການຄິດເຖິງຕົວຢ່າງຂອງກະສັດທັງສີ່ຄົນຂອງຢູດາ?
18 ບາງຄັ້ງ ເຮົາເອງກໍອາດເຮັດຜິດພາດໃນເລື່ອງໃດເລື່ອງໜຶ່ງຄືກັບກະສັດສີ່ຄົນນີ້ໄດ້ເຮັດ. ເຮົາອາດ (1) ເພິ່ງຄວາມຄິດຂອງຕົວເອງ (2) ເລືອກໝູ່ຜິດ (3) ມີຄວາມຄິດທີ່ຍິ່ງ ຫຼື (4) ຕັດສິນໃຈໂດຍທີ່ບໍ່ໄດ້ເບິ່ງກ່ອນວ່າພະເຢໂຫວາຕ້ອງການແນວໃດ. ເຖິງຢ່າງນັ້ນກໍຕາມ ບໍ່ມີເຫດຜົນທີ່ຈະຮູ້ສຶກວ່າເຮົາບໍ່ມີທາງເຮັດໃຫ້ພະເຢໂຫວາພໍໃຈ. ພະອົງເຫັນສິ່ງທີ່ດີໃນຕົວເຮົາ ຄືກັບທີ່ເຫັນໃນຕົວກະສັດສີ່ຄົນນັ້ນ. ພະເຢໂຫວາຍັງເຫັນວ່າເຮົາຮັກພະອົງຫຼາຍສໍ່າໃດແລະຢາກຮັບໃຊ້ພະອົງຢ່າງເຕັມທີແທ້ໆ. ດັ່ງນັ້ນ ພະອົງຈຶ່ງຈັດໃຫ້ມີຕົວຢ່າງທີ່ຈະຊ່ວຍເຮົາໃຫ້ຫຼີກລ່ຽງການເຮັດຜິດຮ້າຍແຮງ. ໃຫ້ເຮົາຄິດເຖິງເລື່ອງຂອງຄົນເຫຼົ່ານີ້ແລະຂອບໃຈພະເຢໂຫວາທີ່ຈັດຕຽມສິ່ງນີ້ໃຫ້ເຮົາ!
