ຄຳຖາມຈາກຜູ້ອ່ານ
ເປັນຫຍັງການລ້າງມືຈຶ່ງເປັນປະເດັນສຳລັບສັດຕູຂອງພະເຍຊູ?
ເລື່ອງນີ້ເປັນພຽງໜຶ່ງໃນຫຼາຍໆເລື່ອງທີ່ສັດຕູຂອງພະເຍຊູໄດ້ຕຳໜິພະອົງແລະພວກລູກສິດ. ກົດໝາຍທີ່ໃຫ້ຜ່ານທາງໂມເຊໄດ້ອະທິບາຍເຖິງສິ່ງທີ່ເຮັດໃຫ້ບາງຄົນບໍ່ສະອາດ ຕົວຢ່າງເຊັ່ນ: ການບໍ່ຊຳຮະລ້າງຮ່າງກາຍ ພະຍາດຂີ້ທູດ ຫຼືການສຳຜັດຊາກສົບຂອງຄົນຫຼືສັດ. ກົດໝາຍນັ້ນຍັງໃຫ້ຄຳແນະນຳກ່ຽວກັບວິທີທີ່ບາງຄົນສາມາດກັບມາສະອາດອີກຄັ້ງ. ສິ່ງນີ້ເປັນໄປໄດ້ໂດຍການຖວາຍເຄື່ອງບູຊາ ການຊຳຮະລ້າງ ຫຼືການຊິດ.—ພວກເລວີ ບົດ 11-15; ຈົດເຊັນບັນຊີ ບົດ 19
ພວກອາຈານຄົນຢິວຍັງເປັນທີ່ຮັບຮູ້ໃນຖານະພວກລັບບີ ເຂົາເຈົ້າໄດ້ເພີ່ມກົດຕ່າງໆໃສ່ກົດໝາຍເຫຼົ່ານີ້. ແຫຼ່ງອ້າງອີງແຫຼ່ງໜຶ່ງເວົ້າວ່າ ພວກລັບບີໄດ້ເຮັດກົດເພີ່ມເຕີມຫຼືຂໍ້ປີກຍ່ອຍເພີ່ມເຕີມກ່ຽວກັບສິ່ງທີ່ຈະເຮັດໃຫ້ຄົນໃດຄົນໜຶ່ງບໍ່ສະອາດ ແລະວິທີທີ່ຄົນນັ້ນຈະເຮັດໃຫ້ຄົນອື່ນບໍ່ສະອາດ. ນອກຈາກນັ້ນ ພວກລັບບີຍັງຕັ້ງກົດວ່າເຄື່ອງໃຊ້ປະເພດໃດແລະສິ່ງຂອງອັນໃດທີ່ເຮັດໃຫ້ສະອາດແລະບໍ່ສະອາດ ແລະພິທີກຳຕ່າງໆທີ່ຜູ້ຄົນຕ້ອງເຮັດຕາມເພື່ອຈະເປັນຄົນສະອາດອີກຄັ້ງ.
ພວກສັດຕູໄດ້ຖາມພະເຍຊູວ່າ: “ເຫດສັນໃດພວກລູກສິດຂອງພະອົງບໍ່ກະທຳຕາມຮີດຄອງແຫ່ງພວກປູ່ຍ່າຕານາຍທີ່ສືບໆມານັ້ນ ແຕ່ວ່າເຂົາກິນອາຫານກັບມືຖ່ອຍຮ້າຍ?” (ມາລະໂກ 7:5) ພວກຟາລິຊຽນເຫຼົ່ານັ້ນບໍ່ໄດ້ກ່າວເຖິງສຸຂາອະນາໄມທີ່ດີ ເຊິ່ງກໍຄືການລ້າງມືກ່ອນກິນເຂົ້າ. ພວກຟາລິຊຽນໄດ້ຕັ້ງກົດວ່າ ກ່ອນທີ່ຄົນໃດຄົນໜຶ່ງຈະກິນເຂົ້າ ລາວຕ້ອງໄດ້ຖອກນໍ້າກາຍມືຂຶ້ນມາເພາະເປັນສ່ວນໜຶ່ງຂອງພິທີກຳ. ແຫຼ່ງອ້າງອີງທີ່ກ່າວມາກ່ອນໜ້ານີ້ໄດ້ບອກຕື່ມອີກວ່າ ພວກລັບບີ “ຍັງໄດ້ໂຕ້ຖຽງກັນວ່າພາຊະນະແບບໃດທີ່ຈະໃຊ້ເພື່ອຖອກນໍ້າ ນໍ້າປະເພດໃດຈຶ່ງຈະເໝາະສົມ ໃຜຄວນເປັນຜູ້ຖອກນໍ້າ ແລະຈະໃຫ້ມືຖືກນໍ້າຫຼາຍໜ້ອຍເທົ່າໃດ.”
ພະເຍຊູມີທ່າທີແນວໃດຕໍ່ກົດຕ່າງໆທີ່ມະນຸດເພີ່ມໃສ່? ພະອົງບອກພວກຫົວໜ້າສາສະໜາຊາວຢິວວ່າ: “ທ່ານເອຊາອີໄດ້ທຳນວາຍຖືກແທ້ເຖິງທ່ານທັງຫຼາຍເໝືອນທີ່ຂຽນໄວ້ວ່າ: ‘ພວກນີ້ນັບຖືເຮົາດ້ວຍສົບປາກ ແຕ່ວ່າໃຈຂອງເຂົາຫ່າງໄກຈາກເຮົາ [ພະເຢໂຫວາ] ຫຼາຍ. ແຕ່ວ່າເຂົາຂາບໄຫວ້ເຮົາເປັນການເປົ່າໆ ເຂົາເອົາຄຳສັ່ງແຫ່ງມະນຸດສອນວ່າເປັນຄຳໂອວາດ.’ ທ່ານທັງຫຼາຍກໍປະຂໍ້ຄຳສັ່ງຂອງພະເຈົ້າແລະຂັບຕາມຮີດຄອງແຫ່ງມະນຸດທີ່ສືບໆມານັ້ນ.”—ມາລະໂກ 7:6-8
