ເຮັດໃຫ້ຊີວິດຄອບຄົວຂອງຄລິດສະຕຽນປະສົບຜົນສຳເລັດ
“ທ່ານທັງຫຼາຍທັງມວນທຸກຄົນຈົ່ງຮັກເມຍແຫ່ງຕົນເໝືອນຮັກຕົວເອງ ແລະຝ່າຍເມຍນັ້ນຈົ່ງຢ້ານຢຳຜົວແຫ່ງຕົນ.”—ເອເຟດ 5:33.
ເພງ: 87, 3
1. ເຖິງວ່າການແຕ່ງດອງຈະເລີ່ມຕົ້ນດ້ວຍຄວາມສຸກ ແຕ່ຄົນທີ່ແຕ່ງດອງແລ້ວສາມາດຄາດໝາຍວ່າຈະປະສົບກັບສິ່ງໃດ? (ເບິ່ງຮູບທຳອິດ)
ເມື່ອເຈົ້າບ່າວເຫັນເຈົ້າສາວຜູ້ງົດງາມໃນມື້ແຕ່ງດອງ ທັງສອງຄົນມີຄວາມຍິນດີຢ່າງລົ້ນເຫຼືອ. ໃນຂະນະທີ່ກຳລັງຄົບຫາກັນ ຄວາມຮັກ ທີ່ມີຕໍ່ກັນໄດ້ງອກງາມຂຶ້ນຫຼາຍ ຈົນເຂົາເຈົ້າຕ້ອງການທີ່ຈະແຕ່ງດອງກັນແລະສັນຍາວ່າຈະສັດຊື່ຕໍ່ກັນຕະຫຼອດໄປ. ເມື່ອແຕ່ງດອງກັນແລ້ວ ເຂົາເຈົ້າກໍເລີ່ມໃຊ້ຊີວິດຮ່ວມກັນ ແລະຈຳເປັນຕ້ອງປັບປ່ຽນບາງຢ່າງເພື່ອຈະເປັນອັນໜຶ່ງອັນດຽວກັນຕໍ່ໆໄປ. ພະເຢໂຫວາທີ່ເປັນຜູ້ກໍ່ຕັ້ງຄອບຄົວ ພະອົງຕ້ອງການໃຫ້ແຕ່ລະຄູ່ມີຄວາມສຸກແລະປະສົບຜົນສຳເລັດໃນຊີວິດຄອບຄົວ ດັ່ງນັ້ນ ພະອົງຈຶ່ງຈັດໃຫ້ມີຄຳແນະນຳທີ່ສຸຂຸມໄວ້ໃນຄຳພີໄບເບິນທີ່ເປັນພະຄຳຂອງພະອົງ. (ສຸພາສິດ 18:22) ແຕ່ຄຳພີໄບເບິນບອກເຮົາວ່າ ມະນຸດທີ່ຜິດບາບເຊິ່ງແຕ່ງດອງກັນກໍຈະມີບັນຫາ ຫຼື “ມີຄວາມຍາກລຳບາກໃນເນື້ອໜັງ.” (1 ໂກລິນໂທ 7:28) ຜົວແລະເມຍຈະເຮັດແນວໃດເພື່ອໃຫ້ບັນຫາມີໜ້ອຍທີ່ສຸດ? ແລະຄລິດສະຕຽນຈະເຮັດແນວໃດເພື່ອໃຫ້ຊິວິດຄູ່ປະສົບຜົນສຳເລັດ?
2. ຜົວເມຍຄວນສະແດງຄວາມຮັກແບບໃດແດ່ຕໍ່ກັນ?
2 ຄຳພີໄບເບິນສອນວ່າຄວາມຮັກເປັນຄຸນລັກສະນະຢ່າງໜຶ່ງທີ່ສຳຄັນ. ແຕ່ໃນຊີວິດຄູ່ ຜົວເມຍຕ້ອງສະແດງຄວາມຮັກໃນຫຼາຍຮູບແບບ. ຕົວຢ່າງເຊັ່ນ: ເຂົາເຈົ້າຕ້ອງສະແດງຄວາມຮັກແບບທີ່ອ່ອນໂຍນແລະລວມເຖິງຄວາມຮັກທີ່ຫວານຊື່ນຕໍ່ກັນ ແລະຖ້າເຂົາເຈົ້າມີລູກ ຄວາມຮັກລະຫວ່າງຄົນໃນຄອບຄົວຈະເປັນສິ່ງທີ່ສຳຄັນກວ່າອີກ. ແຕ່ຄວາມຮັກທີ່ອາໄສຫຼັກການຂອງຄລິດສະຕຽນຈະເຮັດໃຫ້ຊີວິດຄອບຄົວປະສົບຜົນສຳເລັດແທ້. ອັກຄະສາວົກໂປໂລພັນລະນາເຖິງຄວາມຮັກແບບນີ້ເມື່ອເວົ້າວ່າ: “ທ່ານທັງຫຼາຍທັງມວນທຸກຄົນຈົ່ງຮັກເມຍແຫ່ງຕົນເໝືອນຮັກຕົວເອງ ແລະຝ່າຍເມຍນັ້ນຈົ່ງຢ້ານຢຳຜົວແຫ່ງຕົນ.”—ເອເຟດ 5:33
ການພິຈາລະນາໜ້າທີ່ຮັບຜິດຊອບຂອງຜົວແລະເມຍ
3. ຄວາມຮັກໃນຊີວິດຄູ່ຄວນໝັ້ນຄົງເຖິງຂັ້ນໃດ?
3 ໂປໂລຂຽນວ່າ: “ທ່ານທັງຫຼາຍຜູ້ເປັນຜົວ ຈົ່ງຮັກເມຍຂອງຕົນເອງເໝືອນດັ່ງພະຄລິດໄດ້ຮັກພວກຊຸມນຸມແລະໄດ້ມອບພະອົງເອງໄວ້ແທນພວກຊຸມນຸມນັ້ນ.” (ເອເຟດ 5:25) ຄລິດສະຕຽນໃນທຸກມື້ນີ້ຮຽນແບບຕົວຢ່າງຂອງພະເຍຊູໂດຍການຮັກກັນແລະກັນຄືກັບທີ່ພະເຍຊູໄດ້ຮັກພວກລູກສິດຂອງພະອົງ. (ອ່ານໂຢຮັນ 13:34, 35; 15:12, 13) ຜົວແລະເມຍທີ່ເປັນຄລິດສະຕຽນຄວນຈະຮັກກັນແລະກັນຫຼາຍຈົນສາມາດເຕັມໃຈທີ່ຈະຕາຍເພື່ອກັນແລະກັນໄດ້. ແຕ່ເມື່ອມີບັນຫາຮ້າຍແຮງໃນຊີວິດຄູ່ ບາງຄົນອາດບໍ່ໄດ້ຮູ້ສຶກວ່າຄວາມຮັກຂອງເຂົາເຈົ້າໝັ້ນຄົງຫຼາຍ. ສິ່ງໃດຈະຊ່ວຍເຂົາເຈົ້າໄດ້? ຄວາມຮັກທີ່ອາໄສຫຼັກການໃນຄຳພີໄບເບິນເຊິ່ງ “ປົກອັດສັບພະທຸກສິ່ງ ແລະເຊື່ອສັບພະທຸກສິ່ງ ແລະໄວ້ໃຈໃນສັບພະທຸກສິ່ງ.” ຄວາມຮັກແບບນັ້ນຈະບໍ່ “ສູນເສຍ.” (1 ໂກລິນໂທ 13:7, 8) ຜົວແລະເມຍຕ້ອງຈື່ໄວ້ວ່າເຂົາເຈົ້າໄດ້ສາບານຕໍ່ກັນແລ້ວ. ເຂົາເຈົ້າສັນຍາວ່າຈະຮັກແລະສັດຊື່ຕໍ່ກັນແລະກັນ. ການຈົດຈຳສິ່ງນີ້ໄວ້ຈະກະຕຸ້ນຜົວແລະເມຍທີ່ເປັນຄລິດສະຕຽນໃຫ້ຊອກຫາການຊ່ວຍເຫຼືອຈາກພະເຢໂຫວາ ແລະຊ່ວຍກັນແລະກັນແກ້ໄຂບັນຫາທີ່ເກີດຂຶ້ນ.
4, 5. (ກ) ໃນຖານະເປັນຫົວໜ້າຄອບຄົວ ຜົວມີໜ້າທີ່ຮັບຜິດຊອບຫຍັງ? (ຂ) ເມຍຄວນມີທັດສະນະແນວໃດຕໍ່ຕຳແໜ່ງຂອງຫົວໜ້າຄອບຄົວ? (ຄ) ຜົວເມຍຄູ່ໜຶ່ງຕ້ອງໄດ້ປັບປ່ຽນຫຍັງ?
4 ໂປໂລໄດ້ເວົ້າເຖິງໜ້າທີ່ຮັບຜິດຊອບຂອງຜົວແລະເມຍ ລາວເວົ້າວ່າ: “ຜູ້ເປັນເມຍ ຈົ່ງມີໃຈອ່ອນນ້ອມຟັງຜົວຂອງຕົນເອງເໝືອນຟັງພະອົງເຈົ້າເຖີ້ນ ເພາະວ່າຜົວເປັນຫົວຂອງເມຍເໝືອນດັ່ງພະຄລິດເປັນຫົວຂອງພວກຊຸມນຸມ.” (ເອເຟດ 5:22, 23) ໃນນີ້ບໍ່ໄດ້ໝາຍຄວາມວ່າຜົວດີກວ່າເມຍ. ພະເຢໂຫວາກ່າວເຖິງບົດບາດທີ່ມີຄ່າຂອງຜູ້ເປັນເມຍເມື່ອພະອົງເວົ້າວ່າ: “ຊາຍນັ້ນຈະຢູ່ຜູ້ດຽວກໍບໍ່ດີ ເຮົາຈະສ້າງຄົນໜຶ່ງອີກຄືກັນໃຫ້ເປັນຜູ້ຊົດຊ່ອຍເພິ່ນ.” (ຕົ້ນເດີມ 2:18) ເມຍຄວນຈະຊ່ວຍຜົວໃຫ້ເປັນຫົວໜ້າຄອບຄົວທີ່ດີ ແລະຜົວຕ້ອງຮຽນເອົາແບບຢ່າງຄວາມຮັກຂອງພະເຍຊູ ຜູ້ທີ່ເປັນ “ຫົວຂອງພວກຊຸມນຸມ.” ເມື່ອຜົວເຮັດແບບນີ້ ເມຍກໍຈະຮູ້ສຶກປອດໄພແລະເຮັດໃຫ້ງ່າຍຂຶ້ນທີ່ລາວຈະນັບຖືແລະສະໜັບສະໜູນຜົວ.
“ການເຮັດສິ່ງຕ່າງໆ ຕາມວິທີການຂອງພະເຢໂຫວາເຮັດເຮົາໃກ້ຊິດກັນຫຼາຍຂຶ້ນ”
5 ແຄັດຕີເມຍຂອງເຟຣດຍອມຮັບວ່າ: “ຕອນເປັນໂສດ ຂ້ອຍມີອິດສະຫຼະແລະຈັດການເລື່ອງຕ່າງໆດ້ວຍຕົວເອງ. ຊີວິດຄູ່ເຮັດໃຫ້ຂ້ອຍຕ້ອງປັບປ່ຽນເພາະຂ້ອຍຮຽນຮູ້ທີ່ຈະເພິ່ງພາຜົວ. ການເຮັດແບບນັ້ນບໍ່ງ່າຍສະເໝີໄປ ແຕ່ການເຮັດສິ່ງຕ່າງໆຕາມວິທີການຂອງພະເຢໂຫວາເຮັດເຮົາໃກ້ຊິດກັນຫຼາຍຂຶ້ນ.” [1] (ເບິ່ງຂໍ້ສັງເກດສຳລັບຜູ້ອ່ານ) ເຟຣດເວົ້າວ່າ: “ການຕັດສິນໃຈໃນເລື່ອງຕ່າງໆເປັນເລື່ອງຍາກສຳລັບຂ້ອຍ. ໃນຊີວິດຄູ່ ການທີ່ສອງຄົນພິຈາລະນາເລື່ອງຕ່າງໆນຳກັນເຮັດໃຫ້ເປັນເລື່ອງທ້າທາຍຫຼາຍຂຶ້ນ. ແຕ່ໂດຍການອະທິດຖານຂໍການຊີ້ນຳຈາກພະເຢໂຫວາແລະຕັ້ງໃຈຟັງຄວາມຄິດເຫັນຂອງເມຍ ເຮັດໃຫ້ແຕ່ລະມື້ງ່າຍຂຶ້ນ. ຂ້ອຍຮູ້ສຶກວ່າພວກເຮົາເປັນທີມດຽວກັນແທ້ໆ!”
6. ເມື່ອຊີວິດຄູ່ມີບັນຫາ ຄວາມຮັກເປັນສິ່ງ “ຜູກພັນຜູ້ຄົນໃຫ້ເປັນນໍ້າໜຶ່ງໃຈດຽວກັນຢ່າງແທ້ຈິງ” ໄດ້ແນວໃດ?
6 ຊີວິດຄູ່ຈະໝັ້ນຄົງຖ້າຜົວແລະເມຍ ‘ອົດກັ້ນໄວ້ກັນແລະກັນ ແລະຍົກໂທດໃຫ້ກັນແລະກັນຢ່າງໃຈກວ້າງ.’ ເນື່ອງຈາກເປັນຄົນທີ່ຜິດບາບ ດັ່ງນັ້ນທັງສອງສາມາດເຮັດຜິດພາດໄດ້. ເມື່ອສິ່ງນັ້ນເກີດຂຶ້ນ ເຂົາເຈົ້າສາມາດຮຽນຮູ້ຈາກຄວາມຜິດພາດ ຮຽນຮູ້ທີ່ຈະໃຫ້ອະໄພ ແລະສະແດງຄວາມຮັກໂດຍອາໄສຫຼັກການຕ່າງໆໃນຄຳພີໄບເບິນ. ຄວາມຮັກແບບນີ້ “ຜູກພັນຜູ້ຄົນໃຫ້ເປັນນໍ້າໜຶ່ງໃຈດຽວກັນຢ່າງແທ້ຈິງ.” (ໂກໂລດ 3:13, 14, ລ.ມ.) ຜົວແລະເມຍສາມາດສະແດງຄວາມຮັກແບບນີ້ໂດຍການເປັນຄົນອົດທົນແລະກະລຸນາແລະບໍ່ “ຈົດຈຳຄວາມຜິດ.” (1 ໂກລິນໂທ 13:4, 5, ທ.ປ.) ເມື່ອບໍ່ເຫັນດີນຳກັນ ຜົວແລະເມຍຄວນພະຍາຍາມແກ້ໄຂບັນຫາເຫຼົ່ານັ້ນໃຫ້ໄວທີ່ສຸດພາຍໃນມື້ນັ້ນ. (ເອເຟດ 4:26, 27) ຕ້ອງມີຄວາມຖ່ອມໃຈແລະຄວາມກ້າເພື່ອຈະເວົ້າວ່າ: “ຂ້ອຍຂໍໂທດທີ່ເຮັດໃຫ້ເຈົ້າເສຍໃຈ” ແຕ່ການເຮັດເຊັ່ນນັ້ນຈະຊ່ວຍໃຫ້ແກ້ໄຂບັນຫາແລະເຮັດໃຫ້ຜົວແລະເມຍໃກ້ຊິດກັນຫຼາຍຂຶ້ນ.
ຈຳເປັນຕ້ອງມີຄວາມອ່ອນໂຍນເປັນພິເສດ
7, 8. (ກ) ຄຳພີໄບເບິນມີຄຳແນະນຳແນວໃດໃນເລື່ອງເພດສຳພັນໃນຊີວິດຄູ່? (ຂ) ເປັນຫຍັງຜົວແລະເມຍຕ້ອງສະແດງຄວາມອ່ອນໂຍນຕໍ່ກັນ?
7 ຄຳພີໄບເບິນໃຫ້ຄຳແນະນຳທີ່ດີເຊິ່ງສາມາດຊ່ວຍຜົວແລະເມຍໃຫ້ມີທັດສະນະທີ່ເໝາະສົມໃນເລື່ອງເພດສຳພັນໃນຊີວິດຄູ່. (ອ່ານ 1 ໂກລິນໂທ 7:3-5) ເປັນເລື່ອງສຳຄັນຫຼາຍທີ່ຜົວແລະເມຍຈະຄຳນຶງເຖິງຄວາມຮູ້ສຶກແລະຄວາມຕ້ອງການຂອງກັນແລະກັນ. ຖ້າຜົວບໍ່ປະຕິບັດຕໍ່ເມຍຢ່າງອ່ອນໂຍນ ອາດເປັນເລື່ອງຍາກທີ່ເມຍຈະມີຄວາມສຸກໃນການມີເພດສຳພັນ. ຜົວຄວນປະຕິບັດຕໍ່ເມຍດ້ວຍ “ຄວາມເຂົ້າໃຈ.” (1 ເປໂຕ 3:7, ລ.ມ.) ການມີເພດສຳພັນຄວນເປັນຄວາມຕ້ອງການຕາມທຳມະຊາດ ບໍ່ແມ່ນດ້ວຍການຝືນໃຈຫຼືຮຽກຮ້ອງເອົາ. ໃນເລື່ອງນີ້ ສ່ວນຫຼາຍແລ້ວຜູ້ຊາຍສາມາດຕອບສະໜອງໄດ້ໄວກວ່າຜູ້ຍິງ. ແຕ່ທາງດ້ານອາລົມຄວນເປັນຕອນທີ່ທັງຜົວແລະເມຍມີຄວາມຮູ້ສຶກຄືກັນ.
8 ຄຳພີໄບເບິນບໍ່ໄດ້ຕັ້ງກົດທີ່ສະເພາະເຈາະຈົງກ່ຽວກັບປະເພດແລະຂອບເຂດຂອງການສະແດງຄວາມຮັກລະຫວ່າງຜົວເມຍ. ແຕ່ກໍມີການກ່າວເຖິງຄວາມຮັກແບບນັ້ນ. (ບົດລຳເພງ 1:2; 2:6) ຜົວແລະເມຍທີ່ເປັນຄລິດສະຕຽນຄວນປະຕິບັດຕໍ່ກັນແລະກັນດ້ວຍຄວາມອ່ອນໂຍນ.
9. ເປັນຫຍັງການສົນໃຈທາງເພດສຳພັນຕໍ່ຄົນທີ່ບໍ່ແມ່ນຄູ່ຂອງຕົນຈຶ່ງເປັນສິ່ງທີ່ບໍ່ເໝາະສົມ?
9 ເມື່ອເຮົາມີຄວາມຮັກທີ່ໝັ້ນຄົງຕໍ່ພະເຈົ້າແລະເພື່ອນບ້ານ ເຮົາຈະບໍ່ຍອມໃຫ້ຄົນໜຶ່ງຄົນໃດຫຼືສິ່ງໜຶ່ງສິ່ງໃດມາທຳລາຍຊີວິດຄູ່ຂອງເຮົາ. ບາງຄົນເຮັດໃຫ້ຊີວິດຄູ່ອ່ອນແອລົງຫຼືແມ່ນກະທັ່ງທຳລາຍຊີວິດຄູ່ໂດຍຕິດການເບິ່ງພາບໂປ້. ເຮົາຕ້ອງຕ້ານທານສິ່ງທີ່ດຶງດູດເຮົາໃຫ້ເບິ່ງພາບໂປ້ຫຼືຄວາມສົນໃຈຢ່າງອື່ນທີ່ບໍ່ເໝາະສົມໃນເລື່ອງເພດສຳພັນ. ເຮົາຕ້ອງຫຼີກລ່ຽງການກະທຳໃດໆກໍຕາມທີ່ເບິ່ງຄືວ່າເປັນການກ້ຽວພາລາສີກັບຄົນທີ່ບໍ່ແມ່ນຄູ່ຂອງເຮົາ ເພາະການເຮັດແບບນັ້ນເປັນການບໍ່ສະແດງຄວາມຮັກ. ເຮົາຕ້ອງຈື່ໄວ້ວ່າພະເຈົ້າຮູ້ຈັກທຸກຢ່າງກ່ຽວກັບຄວາມຄິດແລະການກະທຳຂອງເຮົາ. ການສຳນຶກແນວນີ້ຊ່ວຍເຮົາໃຫ້ເສີມສ້າງຄວາມປາຖະໜາທີ່ຈະເຮັດໃຫ້ພະອົງພໍໃຈແລະພັກດີຕໍ່ຄູ່ຂອງເຮົາສະເໝີ.—ອ່ານມັດທາຍ 5:27, 28; ເຫບເລີ 4:13
ເມື່ອຊີວິດຄູ່ມີບັນຫາ
10, 11. (ກ) ການຢ່າຮ້າງກັນເປັນເລື່ອງທຳມະດາຄືແນວໃດ? (ຂ) ຄຳພີໄບເບິນເວົ້າແນວໃດກ່ຽວກັບການແຍກກັນຢູ່? (ຄ) ສິ່ງໃດຈະຊ່ວຍຜົວແລະເມຍບໍ່ຟ້າວແຍກກັນຢູ່?
10 ເມື່ອບັນຫາຮ້າຍແຮງບໍ່ໄດ້ຮັບການແກ້ໄຂ ຜົວເມຍບາງຄູ່ອາດຕັດສິນໃຈທີ່ຈະແຍກກັນຢູ່ຫຼືຢ່າຮ້າງກັນ. ໃນບາງປະເທດ ຄູ່ຜົວເມຍຫຼາຍກວ່າເຄິ່ງໜຶ່ງໄດ້ຢ່າຮ້າງກັນ. ແນ່ນອນວ່າກະແສແບບນີ້ບໍ່ໄດ້ເປັນເລື່ອງທຳມະດາໃນທ່າມກາງປະຊາຄົມຄລິດສະຕຽນ. ຢ່າງໃດກໍຕາມ ນັບມື້ນັບຫຼາຍຂຶ້ນທີ່ຄູ່ຜົວເມຍຄລິດສະຕຽນກຳລັງມີບັນຫາທີ່ໜັກໜ່ວງໃນຊີວິດຄູ່.
11 ຄຳພີໄບເບິນໃຫ້ຄຳແນະນຳດັ່ງນີ້: “ຢ່າໃຫ້ເມຍປະຜົວ ແຕ່ວ່າຖ້າເພິ່ນປະຜົວແລ້ວ ຢ່າໃຫ້ເພິ່ນເອົາຜົວອື່ນຈັກເທື່ອ ຫຼືຈົ່ງມາເຂົ້າເປັນໄມຕີກັນກັບຜົວອີກ ແລະຜົວນັ້ນຢ່າໃຫ້ປະເມຍຈັກເທື່ອ.” (1 ໂກລິນໂທ 7:10, 11) ບາງຄູ່ອາດຮູ້ສຶກວ່າບັນຫາຂອງເຂົາເຈົ້າຮ້າຍແຮງຫຼາຍຈົນຕ້ອງໄດ້ແຍກກັນຢູ່. ຢ່າງໃດກໍຕາມ ພະເຍຊູສະແດງໃຫ້ເຫັນວ່າການແຍກກັນຢູ່ເປັນເລື່ອງທີ່ຮ້າຍແຮງແທ້ໆ ເມື່ອພະອົງເວົ້າຊໍ້າສິ່ງທີ່ພະເຈົ້າໄດ້ບອກໄວ້ໃນຕອນທຳອິດກ່ຽວກັບການແຕ່ງດອງ ແລະຈາກນັ້ນພະອົງໄດ້ເວົ້າຕື່ມອີກວ່າ: “ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກແຕກຈາກກັນ.” (ມັດທາຍ 19:3-6; ຕົ້ນເດີມ 2:24) ເຫັນໄດ້ວ່າ ພະເຢໂຫວາຕ້ອງການໃຫ້ຜົວແລະເມຍຢູ່ນຳກັນ. (1 ໂກລິນໂທ 7:39) ເຮົາທຸກຄົນຕ້ອງຈື່ໄວ້ວ່າ ເຮົາຕ້ອງໃຫ້ການຕໍ່ພະເຢໂຫວາໃນເລື່ອງການປະພຶດຂອງເຮົາ. ການສຳນຶກໃນເລື່ອງນີ້ສາມາດຊ່ວຍເຮົາໃຫ້ແກ້ໄຂບັນຫາຢ່າງໄວວາກ່ອນທີ່ມັນຈະຮ້າຍແຮງກວ່າເກົ່າ.
ຄູ່ຜົວເມຍຄລິດສະຕຽນຫາທາງແກ້ໄຂບັນຫາໄດ້ຍ້ອນວ່າເຂົາເຈົ້າຍອມໃຫ້ພະເຈົ້າຊີ້ນຳ
12. ສິ່ງໃດອາດເປັນສາເຫດເຮັດໃຫ້ຜົວເມຍຄິດທີ່ຈະແຍກກັນຢູ່?
12 ເປັນຫຍັງບາງຄູ່ຈຶ່ງມີບັນຫາທີ່ຮ້າຍແຮງ? ສຳລັບບາງຄົນ ຊີວິດຄູ່ຂອງເຂົາເຈົ້າບໍ່ໄດ້ເປັນຕາມທີ່ຄາດຫວັງໄວ້ແລະເຂົາເຈົ້າຈຶ່ງຮູ້ສຶກຜິດຫວັງຫຼືໃຈຮ້າຍ. ສ່ວນຫຼາຍ ບັນຫາທີ່ເກີດຂຶ້ນແມ່ນຍ້ອນຄົນເຮົາຖືກລ້ຽງດູມາໃນວິທີທີ່ແຕກຕ່າງກັນ ຫຼືຍ້ອນວິທີຕອບສະໜອງທາງດ້ານອາລົມຄວາມຮູ້ສຶກທີ່ບໍ່ຄືກັນ. ການມີບັນຫາກັບພໍ່ແມ່ຂອງຜົວຫຼືເມຍ ຫຼືການບໍ່ເຫັນດີນຳກັນໃນວິທີການໃຊ້ເງິນຫຼືວິທີການລ້ຽງດູລູກ ສິ່ງເຫຼົ່ານີ້ສາມາດກໍ່ບັນຫາໄດ້. ແຕ່ໜ້າຍິນດີທີ່ເຫັນຄູ່ຜົວເມຍຄລິດສະຕຽນຫາທາງແກ້ໄຂບັນຫາໄດ້ຍ້ອນວ່າເຂົາເຈົ້າຍອມໃຫ້ພະເຈົ້າຊີ້ນຳ.
13. ມີເຫດຜົນຫຍັງແດ່ທີ່ພຽງພໍເຊິ່ງເຮັດໃຫ້ຜົວເມຍແຍກກັນຢູ່ໄດ້?
13 ມີເຫດຜົນພຽງພໍທີ່ອາດເຮັດໃຫ້ຜົວເມຍແຍກກັນຢູ່ໄດ້. ສະຖານະການຕ່າງໆທີ່ຮ້າຍແຮງເຊິ່ງເປັນສາເຫດເຮັດໃຫ້ບາງຄົນເລືອກທີ່ຈະແຍກກັນຢູ່ແມ່ນ: ການຈົງໃຈບໍ່ລ້ຽງດູຄອບຄົວ ການທຳຮ້າຍຮ່າງກາຍຢ່າງຮຸນແຮງ ແລະການເຮັດໃຫ້ສາຍສຳພັນກັບພະເຢໂຫວາຕົກຢູ່ໃນອັນຕະລາຍ. ເມື່ອມີບັນຫາທີ່ຮ້າຍແຮງເກີດຂຶ້ນ ຄູ່ຜົວເມຍຄວນຂໍຄວາມຊ່ວຍເຫຼືອຈາກຜູ້ເຖົ້າແກ່. ຄົນເຫຼົ່ານັ້ນມີປະສົບການຫຼາຍແລະສາມາດຊ່ວຍຄູ່ຜົວເມຍໃຫ້ໃຊ້ຄຳແນະນຳຂອງພະເຈົ້າໃນຊີວິດຂອງເຂົາເຈົ້າ. ເມື່ອຄູ່ຜົວເມຍຂໍພະລັງບໍລິສຸດຈາກພະເຢໂຫວາ ພະລັງນັ້ນສາມາດຊ່ວຍເຂົາເຈົ້າໃຫ້ນຳໃຊ້ຫຼັກການໃນຄຳພີໄບເບິນ ແລະໃຫ້ສະແດງຄຸນລັກສະນະຕ່າງໆຂອງຄລິດສະຕຽນ. (ຄາລາຊີ 5:22, 23) [2]—ເບິ່ງຂໍ້ສັງເກດສຳລັບຜູ້ອ່ານ
14. ຄຳພີໄບເບິນບອກແນວໃດແກ່ຄລິດສະຕຽນທີ່ແຕ່ງດອງແລ້ວເຊິ່ງຄູ່ຂອງຕົນເອງບໍ່ໄດ້ນະມັດສະການພະເຢໂຫວາ?
14 ຄຳພີໄບເບິນສະແດງໃຫ້ເຫັນວ່າມີເຫດຜົນທີ່ດີທີ່ຜົວແລະເມຍຈະຢູ່ນຳກັນເຖິງວ່າຝ່າຍໜຶ່ງບໍ່ໄດ້ນະມັດສະການພະເຢໂຫວາ. (ອ່ານ 1 ໂກລິນໂທ 7:12-14) ຝ່າຍຜົວຫຼືເມຍທີ່ບໍ່ໄດ້ນະມັດສະການພະເຢໂຫວາ “ເປັນທີ່ຕັ້ງໄວ້” ຫຼືບໍລິສຸດກໍຍ້ອນວ່າໄດ້ແຕ່ງດອງກັບຜູ້ຮັບໃຊ້ຂອງພະເຢໂຫວາ. ລູກນ້ອຍຂອງເຂົາເຈົ້າກໍຖືວ່າ “ບໍລິສຸດ” ແລະດ້ວຍເຫດນັ້ນຈຶ່ງຢູ່ພາຍໃຕ້ການປົກປ້ອງຈາກພະອົງ. ໂປໂລກະຕຸ້ນເຕືອນຄູ່ຜົວເມຍຄລິດສະຕຽນວ່າ: “ຜູ້ເປັນເມຍ ເຈົ້າຮູ້ຈັກສິ່ງໃດວ່າເຈົ້າຈະບໍ່ຊ່ອຍຜົວໃຫ້ພົ້ນຫຼື? ຫຼືທ່ານຜູ້ເປັນຜົວ ທ່ານຮູ້ຈັກສິ່ງໃດວ່າທ່ານຈະບໍ່ຊ່ອຍເມຍໃຫ້ພົ້ນຫຼື?” (1 ໂກລິນໂທ 7:16) ມີຕົວຢ່າງທີ່ດີຂອງຜົວແລະເມຍຄລິດສະຕຽນຫຼາຍຄົນທີ່ໄດ້ຊ່ວຍຄູ່ຂອງຕົນໃຫ້ເຂົ້າມາຮັບໃຊ້ພະເຢໂຫວາ.
15, 16. (ກ) ຄຳພີໄບເບິນໃຫ້ຄຳແນະນຳຫຍັງແກ່ເມຍຄລິດສະຕຽນເຊິ່ງມີຜົວທີ່ບໍ່ໄດ້ຮັບໃຊ້ພະເຢໂຫວາ? (ຂ) ຄລິດສະຕຽນຄວນມີທ່າທີແນວໃດ “ຖ້າແມ່ນຜູ້ທີ່ບໍ່ເຊື່ອຈະໄປ”?
15 ອັກຄະສາວົກເປໂຕໄດ້ແນະນຳເມຍທີ່ເປັນຄລິດສະຕຽນໃຫ້ຢູ່ໃຕ້ອຳນາດຜົວ “ເພື່ອວ່າຖ້າຜົວຄົນໃດບໍ່ເຊື່ອພະຄຳຂອງພະເຈົ້າ ຄວາມປະພຶດຂອງເມຍກໍອາດຊະນະໃຈຜົວໃຫ້ເຊື່ອໄດ້. ພວກທ່ານບໍ່ຈຳເປັນເວົ້າຫຍັງຈັກຄຳ ເພາະເຂົາຈະເຫັນຄວາມປະພຶດອັນບໍລິສຸດແລະອ່ອນນ້ອມຂອງພວກທ່ານ. ສ່ວນການຕົກແຕ່ງຕົວນັ້ນ ຢ່າໃຫ້ສວຍງາມແຕ່ພາຍນອກຄື: ການແຕ່ງຜົມ, ການໃສ່ເພັດພອຍ, ແລະການນຸ່ງຖື. ແຕ່ໃຫ້ຄວາມງາມຂອງເຈົ້າປະກອບດ້ວຍການປະດັບທີ່ມີຢູ່ພາຍໃນ ເຊິ່ງເປັນຄວາມງາມອັນບໍ່ຮູ້ເຊື່ອມສູນຈາກຄວາມອ່ອນສຸພາບແລະຈິດໃຈສະຫງົບງຽບ ເຊິ່ງເປັນສິ່ງທີ່ມີຄ່າສູງໃນສາຍຕາຂອງພະເຈົ້າ.”—1 ເປໂຕ 3:1-4, ທ.ປ.
16 ຈະວ່າແນວໃດຖ້າຝ່າຍຜົວຫຼືເມຍທີ່ບໍ່ໄດ້ນະມັດສະການພະເຢໂຫວາເລືອກທີ່ຈະແຍກກັນຢູ່? ຄຳພີໄບເບິນກ່າວວ່າ: “ຖ້າແມ່ນຜູ້ທີ່ບໍ່ເຊື່ອຈະໄປກໍໃຫ້ເພິ່ນໄປ ຖ້າເພິ່ນໄປຢ່າງນັ້ນພີ່ນ້ອງຜູ້ໃດເປັນຊາຍຫຼືຍິງບໍ່ຕ້ອງຈຳເປັນຈຳຢູ່ນຳກັນ ແຕ່ວ່າພະເຈົ້າໄດ້ເອີ້ນເຮົາທັງຫຼາຍໃຫ້ຢູ່ໃນຄວາມສຸກສຳລານ.” (1 ໂກລິນໂທ 7:15) ເຖິງວ່າການແຍກກັນຢູ່ອາດຈະເຮັດໃຫ້ເກີດຄວາມສະຫງົບສຸກ ແຕ່ຕາມຫຼັກການໃນຄຳພີໄບເບິນ ຝ່າຍຜົວຫຼືເມຍທີ່ເປັນຄລິດສະຕຽນບໍ່ມີອິດສະຫຼະທີ່ຈະແຕ່ງດອງໃໝ່. ແຕ່ລາວຈະບໍ່ພະຍາຍາມບັງຄັບໃຫ້ຄູ່ຂອງລາວຢູ່ນຳ. ບາງຄັ້ງຝ່າຍທີ່ບໍ່ມີຄວາມເຊື່ອອາດຕັດສິນໃຈທີ່ຈະກັບຄືນມາຢູ່ນຳກັນອີກໂດຍຕ້ອງການທີ່ຈະຟື້ນຟູຊີວິດຄູ່. ໃນອະນາຄົດ ລາວອາດຈະເຂົ້າມາຮັບໃຊ້ພະເຢໂຫວາກໍໄດ້.
ສິ່ງໃດຄວນຈະມາກ່ອນຊີວິດຄູ່ຂອງເຮົາ?
ເມື່ອເຮົາເອົາໃສ່ໃຈຕໍ່ການນະມັດສະການພະເຢໂຫວາ ເຮົາກໍສາມາດເຮັດໃຫ້ຊີວິດຄູ່ມີຄວາມສຸກຫຼາຍຂຶ້ນ (ເບິ່ງຂໍ້ 17)
17. ສຳລັບຄູ່ຜົວເມຍຄລິດສະຕຽນ ສິ່ງໃດຄວນມາກ່ອນ?
17 ເນື່ອງຈາກວ່າເຮົາມີຊີວິດຢູ່ໃນຕອນທ້າຍຂອງ “ສະໄໝສຸດທ້າຍ” ເຮົາຈຶ່ງປະສົບກັບ “ວິກິດການທີ່ມີແຕ່ຄວາມຫຍຸ້ງຍາກລຳບາກ.” (2 ຕີໂມເຕ 3:1-5, ລ.ມ.) ດ້ວຍເຫດນີ້ ເຮົາຈຶ່ງຈຳເປັນຕ້ອງປົກປ້ອງສາຍສຳພັນທີ່ແໜ້ນແຟ້ນກັບພະເຢໂຫວາເອົາໄວ້. ໂປໂລຂຽນວ່າ: ‘ເວລາກໍສັ້ນເຂົ້າແລ້ວ. ແຕ່ນີ້ຕໍ່ໄປຄົນທີ່ມີເມຍຕ້ອງເປັນເໝືອນບໍ່ມີ . . . ແລະຄົນທີ່ໃຊ້ປະໂຫຍດຈາກໂລກນີ້ເໝືອນຄົນທີ່ບໍ່ໃຊ້ຢ່າງເຕັມທີ.’ (1 ໂກລິນໂທ 7:29-31) ໂປໂລບໍ່ໄດ້ໝາຍຄວາມວ່າຄົນທີ່ແຕ່ງດອງແລ້ວຄວນຖິ້ມປະລະເລີຍຄູ່ຂອງເຂົາເຈົ້າ. ແຕ່ເນື່ອງຈາກວ່າເຮົາກຳລັງມີຊີວິດຢູ່ໃນສະໄໝສຸດທ້າຍ ເຮົາຕ້ອງໃຫ້ການນະມັດສະການພະເຢໂຫວາມາກ່ອນສິ່ງອື່ນໆ.—ມັດທາຍ 6:33
18. ເປັນຫຍັງຈຶ່ງເປັນໄປໄດ້ທີ່ຄລິດສະຕຽນຈະມີຄວາມສຸກແລະປະສົບຜົນສຳເລັດໃນຊີວິດຄູ່?
18 ໃນສະໄໝທີ່ຫຍຸ້ງຍາກນີ້ ເຮົາເຫັນວ່າຊີວິດຄູ່ຂອງຫຼາຍຄົນບໍ່ປະສົບຜົນສຳເລັດ. ເປັນໄປໄດ້ບໍທີ່ຈະມີຊີວິດຄູ່ທີ່ມີຄວາມສຸກແລະປະສົບຜົນສຳເລັດ? ເປັນໄປໄດ້ ຖ້າເຮົາໃກ້ຊິດກັບພະເຢໂຫວາແລະປະຊາຊົນຂອງພະອົງສະເໝີ ໃຊ້ຫຼັກການໃນຄຳພີໄບເບິນ ແລະຍອມຮັບການຊີ້ນຳຈາກພະລັງບໍລິສຸດຂອງພະເຢໂຫວາ. ເມື່ອເຮົາເຮັດສິ່ງເຫຼົ່ານີ້ ເຮົານັບຖື “ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນ.”—ມາລະໂກ 10:9
^ [1] (ຂໍ້ 5) ຊື່ສົມມຸດ.
^ [2] (ຂໍ້ 13) ເບິ່ງໃນປຶ້ມ “ຈົ່ງຮັກສາຕົວໄວ້ໃນຄວາມຮັກຂອງພະເຈົ້າ” ໃນພາກຜະໜວກ “ທັດສະນະຂອງຄຳພີໄບເບິນໃນເລື່ອງການຢ່າຮ້າງແລະການແຍກກັນຢູ່” ໜ້າ 219-221.
