ເປັນຫຍັງຕ້ອງໃຫ້ກັບຜູ້ທີ່ມີທຸກສິ່ງຢູ່ແລ້ວ?
‘ໂອ້ພະເຈົ້າຂອງພວກຂ້ານ້ອຍ ພວກຂ້ານ້ອຍໂມທະນາພະເດດພະຄຸນ [ຂອບໃຈ] ພະອົງແລະສັນລະເສີນນາມຊື່ອັນມີລັດສະໝີຂອງພະອົງ.’—1 ຂ່າວຄາວ 29:13
ເພງ: 80, 50
1, 2. ພະເຢໂຫວາເອື້ອເຟື້ອກັບເຮົາແນວໃດ?
ພະເຢໂຫວາເປັນພະເຈົ້າທີ່ເອື້ອເຟື້ອ ທຸກສິ່ງທີ່ເຮົາມີລ້ວນມາຈາກພະອົງ. ພະອົງເປັນເຈົ້າຂອງສິ່ງທີ່ມີຄ່າຕ່າງໆໃນໂລກນີ້ ແລະພະອົງໃຊ້ສິ່ງເຫຼົ່ານີ້ເພື່ອເຮັດໃຫ້ມະນຸດມີຊີວິດຢູ່ໄດ້. (ຄຳເພງ 104:13-15; ອາກເກ 2:8) ເຮົາໄດ້ຮຽນຮູ້ຈາກຄຳພີໄບເບິນວ່າບາງຄັ້ງພະເຢໂຫວາໃຊ້ສິ່ງຕ່າງໆທີ່ຢູ່ໃນໂລກດ້ວຍການອັດສະຈັນເພື່ອຈັດກຽມສິ່ງຈຳເປັນໃຫ້ປະຊາຊົນຂອງພະອົງ.
2 ຕົວຢ່າງເຊັ່ນ: ພະເຢໂຫວາໄດ້ຈັດກຽມມານາແລະນໍ້າໃຫ້ກັບຊາດອິດສະລາແອນຕອນທີ່ເຂົາເຈົ້າຢູ່ໃນຖິ່ນທຸລະກັນດານເປັນເວລາ 40 ປີ. (ອົບພະຍົບ 16:35) ຜົນກໍຄືເຂົາເຈົ້າມີທຸກສິ່ງທີ່ຈຳເປັນ. (ເນເຫມີ 9:20, 21) ຕໍ່ມາ ພະເຢໂຫວາໃຫ້ອຳນາດກັບຜູ້ພະຍາກອນເອລີເຊເພື່ອເຮັດການອັດສະຈັນ ໂດຍເຮັດໃຫ້ນໍ້າມັນໜ້ອຍດຽວທີ່ຢູ່ໃນໄຫຂອງແມ່ໝ້າຍຜູ້ສັດຊື່ເພີ່ມຫຼາຍຂຶ້ນ. ຂອງຂວັນຈາກພະເຈົ້ານີ້ຊ່ວຍໃຫ້ລາວສາມາດໃຊ້ໜີ້ໄດ້ແລະຍັງມີເງິນເຫຼືອພຽງພໍສຳລັບລາວແລະລູກຊາຍທີ່ຈະໃຊ້ຊີວິດຕໍ່ໄປໄດ້. (2 ກະສັດ 4:1-7) ດ້ວຍການຊ່ວຍເຫຼືອຈາກພະເຢໂຫວາ ພະເຍຊູໄດ້ເຮັດການອັດສະຈັນໂດຍຈັດໃຫ້ມີອາຫານແລະເຖິງກັບໃຫ້ມີເງິນເມື່ອຈຳເປັນ.—ມັດທາຍ 15:35-38; 17:27
3. ບົດຄວາມນີ້ຈະຕອບຄຳຖາມຫຍັງ?
3 ພະເຢໂຫວາສາມາດໃຊ້ທຸກສິ່ງເພື່ອເບິ່ງແຍງສິ່ງທີ່ພະອົງສ້າງ ແຕ່ພະອົງກໍຍັງເຊີນຜູ້ຮັບໃຊ້ຂອງພະອົງໃຊ້ສິ່ງທີ່ເຂົາເຈົ້າມີເພື່ອສະໜັບສະໜູນວຽກໃນອົງການຂອງພະອົງ. (ອົບພະຍົບ 36:3-7; ອ່ານສຸພາສິດ 3:9) ເປັນຫຍັງພະເຢໂຫວາຢາກໃຫ້ເຮົາເອົາສິ່ງທີ່ມີຄ່າຂອງເຮົາຄືນໃຫ້ພະອົງ? ຜູ້ຮັບໃຊ້ຂອງພະເຢໂຫວາໃນສະໄໝຄຳພີໄບເບິນສະໜັບສະໜູນວຽກຂອງພະອົງແນວໃດ? ທຸກມື້ນີ້ອົງການໃຊ້ເງິນທີ່ບໍລິຈາກແນວໃດ? ບົດຄວາມນີ້ຈະຕອບຄຳຖາມເຫຼົ່ານີ້.
ເປັນຫຍັງເຮົາຕ້ອງໃຫ້ພະເຢໂຫວາ?
4. ເຮົາສະແດງໃຫ້ພະເຢໂຫວາເຫັນຫຍັງເມື່ອເຮົາສະໜັບສະໜູນວຽກຂອງພະອົງ?
ເຮົາໃຫ້ສິ່ງທີ່ມີຄ່າກັບພະເຢໂຫວາຍ້ອນເຮົາຮັກພະອົງ
4 ເຮົາຢາກໃຫ້ສິ່ງທີ່ມີຄ່າກັບພະເຢໂຫວາຍ້ອນເຮົາຮັກແລະສຳນຶກບຸນຄຸນພະອົງ. ເມື່ອເຮົາຄິດເຖິງທຸກສິ່ງທີ່ພະເຢໂຫວາໄດ້ເຮັດເພື່ອເຮົາ ເຮົາກໍມີຄວາມຮັກທີ່ເລິກເຊິ່ງຕໍ່ພະອົງ. ກະສັດດາວິດຮູ້ສຶກແບບນີ້ເມື່ອລາວອະທິບາຍວ່າຈຳເປັນຕ້ອງມີຫຍັງແດ່ເພື່ອຈະສ້າງວິຫານ. ດາວິດບອກວ່າທຸກສິ່ງທີ່ເຮົາໄດ້ຮັບລ້ວນມາຈາກພະເຢໂຫວາ ແລະທຸກສິ່ງທີ່ເຮົາໃຫ້ພະອົງກໍເປັນສິ່ງທີ່ພະອົງໄດ້ໃຫ້ເຮົາແລ້ວ.—ອ່ານ 1 ຂ່າວຄາວ 29:11-14
5. ຄຳພີໄບເບິນສອນເຮົາແນວໃດວ່າການໃຫ້ທີ່ບໍ່ເຫັນແກ່ຕົວເປັນສ່ວນສຳຄັນຂອງການນະມັດສະການແທ້?
5 ເຮົາຍັງໃຫ້ສິ່ງທີ່ມີຄ່າກັບພະເຢໂຫວາເພາະນີ້ເປັນວິທີທີ່ເຮົາຈະນະມັດສະການພະອົງ. ຢູ່ໃນນິມິດ ອັກຄະສາວົກໂຢຮັນໄດ້ຍິນຜູ້ຮັບໃຊ້ຂອງພະເຢໂຫວາໃນສະຫວັນເວົ້າວ່າ: “ພະອົງເຈົ້າ ແລະພະເຈົ້າຂອງຂ້າພະເຈົ້າທັງຫຼາຍ ພະອົງເປັນຜູ້ສົມຄວນຈະຮັບລັດສະໝີ ແລະຍົດສັກແລະລິດເດດ ເພາະວ່າພະອົງເປັນຜູ້ທີ່ໄດ້ນິລະມິດສ້າງສັບພະທຸກສິ່ງ ແລະສັບພະທຸກສິ່ງເປັນຢູ່ແລະຕ້ອງນິລະມິດສ້າງແລ້ວດ້ວຍນໍ້າໃຈຂອງພະອົງ.” (ຄຳປາກົດ 4:11) ພະເຢໂຫວາສົມຄວນໄດ້ຮັບການຍົກຍ້ອງສັນລະເສີນແລະຄວາມນັບຖື ດັ່ງນັ້ນ ເຮົາຕ້ອງໃຫ້ສິ່ງທີ່ດີທີ່ສຸດກັບພະອົງ. ພະເຢໂຫວາໃຫ້ຄຳສັ່ງແກ່ຊາດອິດສະລາແອນຜ່ານທາງໂມເຊວ່າ ໃຫ້ເຂົາເຈົ້າຈັດງານເທສະການປີລະ 3 ຄັ້ງ. ສ່ວນໜຶ່ງຂອງການນະມັດສະການພະເຢໂຫວາໃນເທສະການເຫຼົ່ານີ້ແມ່ນການໃຫ້ສິ່ງທີ່ເຂົາເຈົ້າມີກັບພະອົງ. ເຂົາເຈົ້າໄດ້ຮັບຄຳສັ່ງວ່າ: “ຈົ່ງມາເຝົ້າຕໍ່ໜ້າພະເຢໂຫວາບໍ່ໃຊ່ດ້ວຍມືເປົ່າ.” (ພະບັນຍັດ 16:16) ໃນທຸກມື້ນີ້ກໍຄືກັນ ສ່ວນໜຶ່ງທີ່ສຳຄັນຂອງການນະມັດສະການຂອງເຮົາຄືການໃຫ້ທີ່ບໍ່ເຫັນແກ່ຕົວ. ໂດຍວິທີນີ້ ເຮົາສະແດງໃຫ້ເຫັນວ່າເຮົາຮູ້ຄຸນຄ່າແລະສະໜັບສະໜູນວຽກຂອງອົງການພະເຢໂຫວາ.
6. ເປັນຫຍັງການໃຫ້ຈຶ່ງເປັນສິ່ງທີ່ດີສຳລັບເຮົາ? (ເບິ່ງຮູບທຳອິດ)
6 ເປັນສິ່ງທີ່ດີສຳລັບເຮົາທີ່ຈະເປັນຜູ້ໃຫ້ຢ່າງເອື້ອເຟື້ອບໍ່ພຽງແຕ່ເປັນຝ່າຍຮັບ. (ອ່ານສຸພາສິດ 29:21) ຂໍໃຫ້ນຶກພາບເຖິງເດັກນ້ອຍຄົນໜຶ່ງທີ່ໄດ້ເງິນເທື່ອລະໜ້ອຍຈາກພໍ່ແມ່ ແລະຕໍ່ມາລາວໃຊ້ເງິນສ່ວນໜຶ່ງຊື້ຂອງຂວັນໃຫ້ພໍ່ແມ່. ເຈົ້າຄິດວ່າຂອງຂວັນນັ້ນຈະເຮັດໃຫ້ພໍ່ແມ່ຮູ້ສຶກແນວໃດ? ຫຼືລອງນຶກພາບເຖິງໄພໂອເນຍທີ່ຍັງນ້ອຍຄົນໜຶ່ງທີ່ອາໄສຢູ່ກັບພໍ່ແມ່ ລາວໄດ້ໃຫ້ເງິນບາງສ່ວນເພື່ອຊ່ວຍຄ່າໃຊ້ຈ່າຍຂອງຄອບຄົວ. ພໍ່ແມ່ຂອງລາວອາດບໍ່ໄດ້ຄາດໝາຍໃຫ້ລາວເຮັດແບບນັ້ນ ແຕ່ເຂົາເຈົ້າກໍຮັບເອົາຂອງຂວັນນັ້ນ. ຍ້ອນຫຍັງ? ຍ້ອນພໍ່ແມ່ຮູ້ວ່າເປັນສິ່ງທີ່ດີສຳລັບລູກຖ້າລູກຮູ້ຈັກສຳນຶກບຸນຄຸນ. ຄ້າຍຄືກັນ ພະເຢໂຫວາຮູ້ວ່າເປັນສິ່ງທີ່ດີສຳລັບເຮົາທີ່ຈະໃຫ້ສິ່ງທີ່ມີຄ່າກັບພະອົງ.
ການໃຫ້ຂອງຜູ້ຮັບໃຊ້ໃນສະໄໝຄຳພີໄບເບິນ
7, 8. ປະຊາຊົນຂອງພະເຢໂຫວາໃນສະໄໝຄຳພີໄບເບິນໄດ້ວາງຕົວຢ່າງແນວໃດໃນເລື່ອງການບໍລິຈາກ (ກ) ເພື່ອໂຄງການພິເສດ? (ຂ) ເພື່ອສະໜັບສະໜູນວຽກຮັບໃຊ້?
7 ເຮົາໄດ້ຮຽນຮູ້ໃນຄຳພີໄບເບິນວ່າປະຊາຊົນຂອງພະເຢໂຫວາໄດ້ບໍລິຈາກເພື່ອສະໜັບສະໜູນວຽກຂອງພະອົງ. ບາງເທື່ອເຂົາເຈົ້າກໍບໍລິຈາກເພື່ອໂຄງການພິເສດ ເຊັ່ນ: ໂມເຊກະຕຸ້ນຊາວອິດສະລາແອນໃຫ້ບໍລິຈາກເພື່ອສ້າງເຕັ້ນສັກສິດ. ຕໍ່ມາ ກະສັດດາວິດກໍສະໜັບສະໜູນຊາວອິດສະລາແອນໃຫ້ບໍລິຈາກໃນການສ້າງວິຫານ. (ອົບພະຍົບ 35:5; 1 ຂ່າວຄາວ 29:5-9) ໃນສະໄໝການປົກຄອງຂອງກະສັດໂຢອາຊ ປະໂລຫິດໃຫຍ່ໄດ້ໃຊ້ເງິນທີ່ປະຊາຊົນບໍລິຈາກເພື່ອສ້ອມແປງວິຫານ. (2 ກະສັດ 12:4, 5) ໃນສະຕະວັດທຳອິດ ເມື່ອຄລິດສະຕຽນຮູ້ວ່າມີການຂາດແຄນອາຫານໃນແຂວງຢູເດແລະພີ່ນ້ອງກໍຕ້ອງການຄວາມຊ່ວຍເຫຼືອແທ້ໆ. ດັ່ງນັ້ນ ເຂົາເຈົ້າຈຶ່ງຕົກລົງກັນວ່າຈະສົ່ງສິ່ງຂອງໄປຊ່ວຍເຫຼືອພີ່ນ້ອງທີ່ຢູ່ທີ່ນັ້ນຕາມທີ່ແຕ່ລະຄົນຈະໃຫ້ໄດ້.—ກິດຈະການ 11:27-30
8 ປະຊາຊົນຂອງພະເຢໂຫວາຍັງສະໜັບສະໜູນທາງດ້ານການເງິນໃຫ້ກັບຄົນທີ່ນຳໜ້າເຊິ່ງເຮັດວຽກຂອງພະອົງດ້ວຍ. ຕົວຢ່າງເຊັ່ນ: ພາຍໃຕ້ກົດໝາຍຂອງໂມເຊ ພວກເລວີບໍ່ໄດ້ຮັບມູນຄືກັບຄົນໃນຕະກູນອື່ນ. ດັ່ງນັ້ນ ຊາວອິດສະລາແອນຕ້ອງໃຫ້ສິ່ງທີ່ເຂົາເຈົ້າມີ 1 ສ່ວນ 10 ກັບຊາວເລວີ ໂດຍວິທີນີ້ຈຶ່ງເຮັດໃຫ້ຊາວເລວີສາມາດທຸ່ມເທກັບວຽກຮັບໃຊ້ຂອງເຂົາເຈົ້າໃນເຕັ້ນສັກສິດ. (ຈົດເຊັນບັນຊີ 18:21) ຄ້າຍຄືກັນ ຜູ້ຍິງທີ່ໃຫ້ຢ່າງເອື້ອເຟື້ອໄດ້ໃຊ້ຊັບສິນທີ່ມີເພື່ອສະໜັບສະໜູນພະເຍຊູແລະລູກສິດຂອງເພິ່ນ.—ລືກາ 8:1-3
ບໍ່ວ່າຈະຮັ່ງມີຫຼືທຸກຍາກຫຼາຍສໍ່າໃດ ທຸກຄົນກໍສາມາດໃຫ້ໄດ້ຄືກັນ
9. ໃນສະໄໝຄຳພີໄບເບິນມີການບໍລິຈາກແນວໃດແດ່?
9 ມີຫຼາຍສິ່ງທີ່ອາດບໍລິຈາກໄດ້. ຊາວອິດສະລາແອນທີ່ບໍລິຈາກເພື່ອສ້າງເຕັ້ນສັກສິດອາດໃຫ້ສິ່ງຂອງທີ່ມີຄ່າທີ່ເຂົາເຈົ້າໄດ້ມາຈາກເອຢິບ. (ອົບພະຍົບ 3:21, 22; 35:22-24) ໃນສະຕະວັດທຳອິດ ຄລິດສະຕຽນບາງຄົນກໍໄດ້ຂາຍຊັບສິນຂອງຕົວເອງ ເຊັ່ນ: ໄຮ່ນາຫຼືບ້ານເພື່ອເອົາເງິນນັ້ນມາໃຫ້ເຫຼົ່າອັກຄະສາວົກ. ຈາກນັ້ນ ພວກອັກຄະສາວົກກໍໃຊ້ເງິນທີ່ໄດ້ມາເພື່ອຊ່ວຍພີ່ນ້ອງທີ່ຕ້ອງການຄວາມຊ່ວຍເຫຼືອ. (ກິດຈະການ 4:34, 35) ສ່ວນພີ່ນ້ອງຄົນອື່ນໆໄດ້ແບ່ງເງິນໄວ້ສ່ວນໜຶ່ງເປັນປະຈຳເພື່ອທີ່ເຂົາເຈົ້າຈະສະໜັບສະໜູນການນະມັດສະການໄດ້. (1 ໂກລິນໂທ 16:2) ດັ່ງນັ້ນ ບໍ່ວ່າຈະຮັ່ງມີຫຼືທຸກຍາກຫຼາຍສໍ່າໃດ ທຸກຄົນກໍສາມາດໃຫ້ໄດ້ຄືກັນ.—ລືກາ 21:1-4
ການໃຫ້ຂອງຜູ້ຮັບໃຊ້ໃນສະໄໝປັດຈຸບັນ
10, 11. (ກ) ເຮົາຈະຮຽນແບບຄວາມເອື້ອເຟື້ອຂອງຜູ້ຮັບໃຊ້ພະເຈົ້າໃນສະໄໝອະດີດໄດ້ແນວໃດ? (ຂ) ເຈົ້າຮູ້ສຶກແນວໃດທີ່ໄດ້ສະໜັບສະໜູນວຽກລາຊະອານາຈັກ?
10 ໃນທຸກມື້ນີ້ ເຮົາສາມາດຂໍບໍລິຈາກສຳລັບໂຄງການພິເສດຄືກັນ ເຊັ່ນ: ປະຊາຄົມຂອງເຈົ້າອາດມີແຜນການທີ່ຈະສ້ອມແປງຫໍປະຊຸມຫຼືສ້າງຫຼັງໃໝ່. ບາງເທື່ອສຳນັກງານສາຂາທ້ອງຖິ່ນຂອງເຈົ້າອາດຈຳເປັນຕ້ອງປັບປຸງສ້ອມແປງ. ຫຼືເຮົາອາດຊ່ວຍຄ່າໃຊ້ຈ່າຍໃນການປະຊຸມພາກ ຫຼືຊ່ວຍພີ່ນ້ອງໃນປະເທດອື່ນທີ່ປະສົບໄພທຳມະຊາດແລະຕ້ອງການຄວາມຊ່ວຍເຫຼືອຈາກເຮົາ. ນອກຈາກນັ້ນ ເງິນບໍລິຈາກຂອງເຮົາຍັງຊ່ວຍມິດຊັນນາລີ ໄພໂອເນຍພິເສດ ຜູ້ດູແລໝວດ ແລະພີ່ນ້ອງທີ່ເຮັດວຽກໃນສຳນັກງານໃຫຍ່ແລະສຳນັກງານສາຂາທີ່ຢູ່ທົ່ວໂລກ. ປະຊາຄົມຂອງເຈົ້າກໍຄົງສົ່ງເງິນບໍລິຈາກເປັນປະຈຳເພື່ອຊ່ວຍສ້າງຫໍປະຊຸມໃຫຍ່ແລະຫໍປະຊຸມລາຊະອານາຈັກສຳລັບພີ່ນ້ອງຂອງເຮົາທີ່ຢູ່ບ່ອນຕ່າງໆທົ່ວໂລກ.
11 ເຮົາທຸກຄົນສາມາດມີສ່ວນສະໜັບສະໜູນວຽກໃນອົງການຂອງພະເຢໂຫວາທີ່ກຳລັງເຮັດຢູ່ໃນສະໄໝສຸດທ້າຍນີ້. ການບໍລິຈາກສ່ວນໃຫຍ່ຈະບໍ່ໄດ້ລະບຸຊື່ ເມື່ອເຮົາໃສ່ເງິນໃນກ່ອງທີ່ຢູ່ຫໍປະຊຸມຫຼືບໍລິຈາກທາງອອນລາຍຜ່ານທາງ jw.org ເຮົາຈະບໍ່ບອກຄົນອື່ນວ່າເຮົາບໍລິຈາກເງິນເທົ່າໃດ. ແຕ່ເຈົ້າອາດຮູ້ສຶກວ່າເງິນໜ້ອຍໆທີ່ເຈົ້າໄດ້ບໍລິຈາກອາດຈະເອົາໄປເຮັດຫຍັງກໍບໍ່ໄດ້. ທີ່ຈິງແລ້ວເງິນບໍລິຈາກສ່ວນຫຼາຍທີ່ໄດ້ແມ່ນມາຈາກຫຼາຍໆຄົນທີ່ໃຫ້ຜູ້ລະເລັກຜູ້ລະໜ້ອຍ ແທນທີ່ຈະມາຈາກເງິນກ້ອນໃຫຍ່ທີ່ໃຫ້ບໍ່ເທົ່າໃດເທື່ອ. ພີ່ນ້ອງຂອງເຮົາໃນປັດຈຸບັນທີ່ມີເງິນໜ້ອຍກໍຮຽນແບບຄລິດສະຕຽນທີ່ຢູ່ໃນແຂວງມາເຊດັວນເຊິ່ງໃຫ້ດ້ວຍຄວາມເອື້ອເຟື້ອ ເຖິງວ່າເຂົາເຈົ້າຈະ ‘ຍາກຈົນຂັດສົນຫຼາຍ’ ແຕ່ເຂົາເຈົ້າກໍຍັງອ້ອນວອນເພື່ອຈະມີສ່ວນຮ່ວມໃນການບໍລິຈາກ.—2 ໂກລິນໂທ 8:1-4
12. ອົງການພະຍາຍາມໃຊ້ເງິນບໍລິຈາກໃຫ້ເກີດປະໂຫຍດຫຼາຍທີ່ສຸດແນວໃດ?
12 ຄະນະກຳມະການປົກຄອງໃຊ້ເງິນບໍລິຈາກຢ່າງສັດຊື່ແລະສຸຂຸມ. (ມັດທາຍ 24:45) ເຂົາເຈົ້າອະທິດຖານເພື່ອຈະຕັດສິນໃຈຢ່າງສຸຂຸມແລະວາງແຜນຢ່າງຮອບຄອບກ່ຽວກັບການໃຊ້ເງິນນີ້. (ລືກາ 14:28) ໃນສະໄໝຄຳພີໄບເບິນ ຄົນທີ່ສັດຊື່ເຊິ່ງເບິ່ງແຍງເງິນບໍລິຈາກຈະເຮັດໃຫ້ແນ່ໃຈວ່າເຂົາເຈົ້າໃຊ້ເງິນນີ້ສຳລັບການນະມັດສະການພະເຢໂຫວາເທົ່ານັ້ນ. ຕົວຢ່າງ: ເອເຊດຣາເຊກັບໄປເມືອງເຢຣຶຊາເລມພ້ອມກັບສິ່ງຂອງທີ່ກະສັດເປເຣເຊບໍລິຈາກໃຫ້ ເຊັ່ນ ເງິນ ຄຳ ແລະສິ່ງມີຄ່າອື່ນໆເຊິ່ງມີມູນຄ່າຫຼາຍກວ່າ 100 ລ້ານໂດຣາ (ສະຫະລັດ) ຂອງທຸກມື້ນີ້. ເອເຊດຣາເຊເບິ່ງວ່າເງິນບໍລິຈາກເຫຼົ່ານີ້ເປັນຂອງຂວັນທີ່ໃຫ້ກັບພະເຢໂຫວາ. ດັ່ງນັ້ນ ລາວຈຶ່ງໃຫ້ຄຳແນະນຳທີ່ເຈາະຈົງກ່ຽວກັບວິທີປົກປ້ອງສິ່ງຂອງທີ່ມີຄ່າເຫຼົ່ານີ້ໃນຂະນະທີ່ຂົນຍ້າຍຜ່ານເຂດອັນຕະລາຍ. (ເອເຊດຣາເຊ 8:24-34) ຫຼາຍປີຫຼັງຈາກນັ້ນ ອັກຄະສາວົກໂປໂລກໍລວບລວມເງິນທີ່ໄດ້ຈາກການບໍລິຈາກເພື່ອຊ່ວຍພີ່ນ້ອງທີ່ມີຄວາມຈຳເປັນໃນຢູເດ. ລາວເຕືອນຄົນທີ່ຖືເງິນໄປວ່າໃຫ້ເຮັດທຸກຢ່າງດ້ວຍຄວາມ “ສັດຊື່ຕໍ່ໜ້າພະອົງເຈົ້າ [“ພະເຢໂຫວາ,” ລ.ມ.] ບໍ່ໃຊ່ເທົ່ານັ້ນແຕ່ວ່າຕໍ່ໜ້າຄົນທັງປວງດ້ວຍ.” (ອ່ານ 2 ໂກລິນໂທ 8:18-21) ທຸກມື້ນີ້ອົງການຂອງເຮົາຮຽນແບບເອເຊດຣາເຊແລະໂປໂລໃນການໃຊ້ເງິນບໍລິຈາກຢ່າງສຸຂຸມຮອບຄອບ.
13. ເປັນຫຍັງເມື່ອບໍ່ດົນມານີ້ອົງການຈຶ່ງມີການປ່ຽນແປງ?
13 ຄອບຄົວໜຶ່ງອາດເຮັດການປ່ຽນແປງເພື່ອທີ່ເຂົາເຈົ້າຈະສາມາດໃຊ້ເງິນບໍ່ເກີນລາຍຮັບ. ເຂົາເຈົ້າອາດຊອກຫາວິທີທີ່ຈະໃຊ້ຊີວິດໃຫ້ຮຽບງ່າຍກວ່າເກົ່າເພື່ອຈະຮັບໃຊ້ພະເຢໂຫວາຫຼາຍຂຶ້ນ. ອົງການຂອງພະເຢໂຫວາກໍເຮັດແບບດຽວກັນ ເມື່ອບໍ່ດົນມານີ້ມີໂຄງການໃໝ່ໆທີ່ໜ້າຕື່ນເຕັ້ນຫຼາຍໂຄງການ ແລະບາງເທື່ອຄ່າໃຊ້ຈ່າຍກໍຫຼາຍກວ່າລາຍຮັບ. ດັ່ງນັ້ນ ອົງການຂອງພະເຢໂຫວາກໍເຮັດຄືກັບຄອບຄົວນັ້ນທີ່ຊອກຫາວິທີປະຢັດເງິນແລະວິທີເຮັດວຽກໃຫ້ງ່າຍຂຶ້ນ ເພື່ອຈະໃຊ້ເງິນທີ່ພີ່ນ້ອງບໍລິຈາກໃຫ້ຄຸ້ມຄ່າທີ່ສຸດເທົ່າທີ່ເປັນໄປໄດ້.
ປະໂຫຍດທີ່ໄດ້ຮັບຈາກເງິນບໍລິຈາກຂອງເຈົ້າ
ການບໍລິຈາກຂອງເຈົ້າຊ່ວຍວຽກງານທົ່ວໂລກ (ເບິ່ງຂໍ້ 14-16)
14-16. (ກ) ເງິນທີ່ເຈົ້າບໍລິຈາກຖືກໃຊ້ກັບໂຄງການຫຍັງແດ່? (ຂ) ໂຄງການເຫຼົ່ານີ້ເປັນປະໂຫຍດກັບເຈົ້າແນວໃດ?
14 ຫຼາຍຄົນເຊິ່ງຢູ່ໃນຄວາມຈິງເປັນເວລາຫຼາຍປີບອກວ່າຕອນນີ້ເຮົາກຳລັງຮັບຂອງຂວັນຫຼາຍຂຶ້ນເລື້ອຍໆຈາກອົງການຢ່າງທີ່ບໍ່ເຄີຍໄດ້ຮັບ. ຕອນນີ້ເຮົາມີເວັບໄຊ jw.org ລາຍການໂທລະທັດ JW ແລະຍັງມີຄຳພີໄບເບິນສະບັບແປໂລກໃໝ່ ໃນຫຼາຍພາສາເພີ່ມຂຶ້ນ. ໃນປີ 2014 ແລະ 2015 ມີການຈັດການປະຊຸມນານາຊາດ 3 ມື້ທີ່ມີຫົວຂໍ້ວ່າ: “ສະແຫວງຫາລາຊະອານາຈັກຂອງພະເຈົ້າກ່ອນ!” ຢູ່ສະໜາມກິລາທີ່ໃຫຍ່ທີ່ສຸດ 14 ເມືອງທົ່ວໂລກ ແລະຄົນທີ່ເຂົ້າຮ່ວມກໍມີຄວາມສຸກຫຼາຍແທ້ໆ!
15 ຫຼາຍຄົນຮູ້ຄຸນຄ່າຫຼາຍສຳລັບຂອງຂວັນທີ່ເຂົາເຈົ້າໄດ້ຮັບຈາກອົງການຂອງພະເຢໂຫວາ. ຕົວຢ່າງ: ຜົວເມຍຄູ່ໜຶ່ງທີ່ຮັບໃຊ້ໃນອາຊີຂຽນວ່າ: “ວຽກມອບໝາຍຂອງເຮົາແມ່ນຢູ່ໃນເມືອງນ້ອຍໆ. ບາງເທື່ອເຮົາຈຶ່ງຮູ້ສຶກໂດດດ່ຽວຈົນລືມໄປວ່າຂອບເຂດວຽກຂອງພະເຢໂຫວາກວ້າງຂວາງຂະໜາດໃດ. ແຕ່ເມື່ອໄດ້ເບິ່ງລາຍການໂທລະທັດ JW ສິ່ງນີ້ຊ່ວຍເຕືອນໃຈໃຫ້ເຮົາຈື່ວ່າເຮົາເປັນສ່ວນໜຶ່ງຂອງສັງຄົມພີ່ນ້ອງທົ່ວໂລກ. ພີ່ນ້ອງທ້ອງຖິ່ນໃນເຂດຂອງເຮົາຮູ້ສຶກຕື່ນເຕັ້ນແທ້ໆກັບລາຍການໂທລະທັດ JW. ເຮົາໄດ້ຍິນເຂົາເຈົ້າເວົ້າເລື້ອຍໆຫຼັງຈາກທີ່ເບິ່ງລາຍການປະຈຳເດືອນວ່າ ເຂົາເຈົ້າຮູ້ສຶກໃກ້ຊິດກັບສະມາຊິກຄະນະກຳມະການປົກຄອງ. ຕອນນີ້ເຂົາເຈົ້າພູມໃຈຫຼາຍກວ່າແຕ່ກ່ອນໃນການເປັນສ່ວນໜຶ່ງຂອງອົງການຂອງພະເຈົ້າ.”
16 ໃນທົ່ວໂລກຫໍປະຊຸມລາຊະອານາຈັກເກືອບ 2.500 ແຫ່ງກຳລັງກໍ່ສ້າງຫຼືສ້ອມແປງ. ພີ່ນ້ອງທີ່ຢູ່ໃນປະຊາຄົມໜຶ່ງຂອງປະເທດຮົງດູຣັດບອກວ່າ: ເຂົາເຈົ້າເຄີຍຝັນວ່າຢາກມີຫໍປະຊຸມເປັນຂອງຕົວເອງ ແຕ່ຕອນນີ້ຝັນນັ້ນກໍເປັນຈິງແລ້ວ. ເຂົາເຈົ້າຂຽນວ່າ: “ພວກເຮົາມີຄວາມສຸກແທ້ໆທີ່ໄດ້ເປັນສ່ວນໜຶ່ງໃນຄອບຄົວຂອງພະເຢໂຫວາແລະໄດ້ເປັນສ່ວນໜຶ່ງໃນສັງຄົມພີ່ນ້ອງທົ່ວໂລກ.” ຫຼາຍຄົນກໍຮູ້ສຶກຄ້າຍໆກັນນີ້ເມື່ອເຂົາເຈົ້າໄດ້ຮັບຄຳພີໄບເບິນແລະໜັງສືຕ່າງໆໃນພາສາຂອງຕົວເອງ ເມື່ອພີ່ນ້ອງຊ່ວຍເຂົາເຈົ້າຫຼັງຈາກປະສົບໄພທຳມະຊາດ ຫຼືເມື່ອເຂົາເຈົ້າເຫັນຜົນຈາກການປະກາດຕາມເມືອງໃຫຍ່ແລະບ່ອນສາທາລະນະ.
17. ເຮົາຮູ້ໄດ້ແນວໃດວ່າພະເຢໂຫວາສະໜັບສະໜູນອົງການຂອງພະອົງໃນທຸກມື້ນີ້?
17 ຫຼາຍຄົນທີ່ບໍ່ແມ່ນພະຍານພະເຢໂຫວາບໍ່ເຂົ້າໃຈວ່າເຮົາເຮັດທຸກສິ່ງທັງໝົດເຫຼົ່ານີ້ໄດ້ແນວໃດໂດຍໃຊ້ພຽງແຕ່ເງິນບໍລິຈາກດ້ວຍຄວາມສະໝັກໃຈເທົ່ານັ້ນ. ຜູ້ບໍລິຫານບໍລິສັດໃຫຍ່ແຫ່ງໜຶ່ງມາຢ້ຽມຊົມໂຮງພິມຂອງເຮົາ. ລາວປະຫຼາດໃຈຫຼາຍທີ່ຄົນເຮັດວຽກທັງໝົດນີ້ເປັນອາສາສະໝັກ ໃຊ້ພຽງແຕ່ເງິນບໍລິຈາກ ແລະບໍ່ເຄີຍຈັດກິດຈະກຳເພື່ອຫາລາຍໄດ້. ລາວບອກວ່າສິ່ງທີ່ພວກເຮົາເຮັດບໍ່ໜ້າຈະເປັນໄປໄດ້. ເຮົາເຫັນດີນຳ! ເຮົາຮູ້ວ່າສິ່ງນີ້ເປັນໄປໄດ້ຍ້ອນພະເຢໂຫວາສະໜັບສະໜູນວຽກນີ້.—ໂຢບ 42:2
ໄດ້ຮັບພອນຕ່າງໆເມື່ອເຮົາໃຫ້ພະເຢໂຫວາຄືນ
18. (ກ) ເມື່ອເຮົາສະໜັບສະໜູນວຽກລາຊະອານາຈັກ ເຮົາຈະໄດ້ຮັບພອນຫຍັງ? (ຂ) ເຮົາຈະສອນລູກແລະພີ່ນ້ອງໃໝ່ແນວໃດໃຫ້ເຮັດແບບດຽວກັນ?
18 ພະເຢໂຫວາໃຫ້ເຮົາມີກຽດແລະມີໂອກາດໄດ້ສະໜັບສະໜູນວຽກລາຊະອານາຈັກທີ່ຍິ່ງໃຫຍ່. ພະອົງຮັບປະກັນວ່າຖ້າເຮົາເຮັດແບບນັ້ນພະອົງກໍຈະອວຍພອນເຮົາ. (ມາລາກີ 3:10) ພະເຢໂຫວາສັນຍາວ່າຖ້າເຮົາໃຫ້ຢ່າງເອື້ອເຟື້ອ ເຮົາກໍຈະໄດ້ຮັບສິ່ງດີໆ. (ອ່ານສຸພາສິດ 11:24, 25) ພະອົງຍັງບອກວ່າເຮົາຈະມີຄວາມສຸກເມື່ອເຮົາໃຫ້ ເພາະ “ການປະທານໃຫ້ກໍເປັນເຫດໃຫ້ມີຄວາມສຸກຫຼາຍກວ່າການຮັບເອົາ.” (ກິດຈະການ 20:35) ເຮົາສາມາດສອນລູກແລະຄົນທີ່ເປັນພີ່ນ້ອງໃໝ່ໄດ້ໂດຍທາງຄຳເວົ້າແລະການກະທຳຂອງເຮົາ ເພື່ອຊ່ວຍເຂົາເຈົ້າໃຫ້ຮູ້ວ່າເຂົາເຈົ້າກໍສາມາດສະໜັບສະໜູນວຽກນີ້ແລະຈະໄດ້ຮັບພອນຫຼາຍຢ່າງ.
19. ບົດຄວາມນີ້ໃຫ້ກຳລັງໃຈເຈົ້າແນວໃດ?
19 ທຸກສິ່ງທີ່ເຮົາມີລ້ວນແລ້ວມາຈາກພະເຢໂຫວາ. ເມື່ອເຮົາໃຫ້ພະເຢໂຫວາຄືນ ເຮົາກໍສະແດງໃຫ້ເຫັນວ່າເຮົາຮັກແລະເຫັນຄຸນຄ່າທຸກສິ່ງທີ່ພະອົງເຮັດເພື່ອເຮົາ. (1 ຂ່າວຄາວ 29:17) ຕອນທີ່ຊາວອິດສະລາແອນນຳຊັບສິນມາບໍລິຈາກເພື່ອສ້າງວິຫານ ເຂົາເຈົ້າ “ມີຄວາມສຸກທີ່ໄດ້ເອົາຂອງມາຖວາຍດ້ວຍຄວາມສະໝັກໃຈ ເພາະພວກເຂົາເຕັມໃຈຖວາຍຂອງເຫຼົ່ານີ້ແກ່ພະເຢໂຫວາຢ່າງສຸດຫົວໃຈ.” (1 ຂ່າວຄາວ 29:9, ລ.ມ.) ພະເຢໂຫວາໃຫ້ຫຼາຍສິ່ງກັບເຮົາ ຂໍໃຫ້ເຮົາຄືນໃຫ້ກັບພະອົງ ແລ້ວເຮົາກໍຈະມີຄວາມສຸກແທ້.
