ບົດຄວາມສຶກສາທີ 44
ໃຫ້ມີຄວາມຫວັງທີ່ຊັດເຈນຢູ່ສະ
“ລໍຖ້າພະເຢໂຫວາ.”—ເພງ. 27:14, ລ.ມ.
ເພງ 144 ຈ້ອງເບິ່ງທີ່ລາງວັນ
ໃຈຄວາມສຳຄັນ a
1. ພະເຢໂຫວາໃຫ້ເຮົາມີຄວາມຫວັງໃນເລື່ອງຫຍັງ?
ພະເຢໂຫວາໃຫ້ເຮົາມີຄວາມຫວັງທີ່ດີ ນັ້ນກໍຄືຊີວິດຕະຫຼອດໄປ. ບາງຄົນມີຄວາມຫວັງທີ່ຈະມີຊີວິດຕະຫຼອດໄປໃນສະຫວັນ ເຂົາເຈົ້າຈະມີຊີວິດອະມະຕະໃນສະຫວັນ. (1ກຣ. 15:50, 53) ແຕ່ຄົນສ່ວນຫຼາຍມີຄວາມຫວັງທີ່ຈະມີຊີວິດຕະຫຼອດໄປໃນໂລກນີ້. ເຂົາເຈົ້າຈະມີສຸຂະພາບທີ່ແຂງແຮງແລະມີຄວາມສຸກ. (ພນມ. 21:3, 4) ແຕ່ບໍ່ວ່າເຮົາຈະມີຄວາມຫວັງທີ່ຈະມີຊີວິດຕະຫຼອດໄປຢູ່ໃນສະຫວັນຫຼືໃນໂລກນີ້ ເຮົາທຸກຄົນກໍເຫັນຄ່າຄວາມຫວັງນີ້.
2. ເປັນຫຍັງເຮົາຈຶ່ງໝັ້ນໃຈໃນຄວາມຫວັງຂອງເຮົາ? ຂໍໃຫ້ອະທິບາຍ
2 ໃນຄຳພີໄບເບິນຄຳວ່າ “ຄວາມຫວັງ” ສາມາດແປໄດ້ວ່າ “ການຄາດໝາຍວ່າສິ່ງດີໆຈະເກີດຂຶ້ນ.” ຍ້ອນພະເຢໂຫວາເປັນຜູ້ໃຫ້ຄວາມຫວັງກັບເຮົາ ເຮົາຈຶ່ງໝັ້ນໃຈໃນຄວາມຫວັງທີ່ຈະເກີດຂຶ້ນໃນອະນາຄົດ ເພາະເຮົາຮູ້ວ່າພະເຢໂຫວາເຄີຍສັນຍາຫຍັງແດ່ແລະເພິ່ນກໍຮັກສາສັນຍາສະເໝີ. (ໂຣມ 15:13; ຈຊບ. 23:19) ນອກຈາກນັ້ນ ເຮົາຍັງໝັ້ນໃຈວ່າພະເຢໂຫວາມີທັງຄວາມຕ້ອງການແລະມີລິດອຳນາດທີ່ຈະເຮັດທຸກຢ່າງທີ່ເພິ່ນຢາກເຮັດ. ດັ່ງນັ້ນ ຄວາມຫວັງຂອງເຮົາຈຶ່ງບໍ່ແມ່ນຄວາມເພີ້ຝັນ ແຕ່ມັນມີຫຼັກຖານແລະເປັນຄວາມຈິງ.
3. ເຮົາຈະຮຽນຫຍັງໃນບົດຄວາມນີ້? (ຄຳເພງ 27:14)
3 ພະເຢໂຫວາຮັກເຮົາແລະຢາກໃຫ້ເຮົາໄວ້ໃຈເພິ່ນ. (ອ່ານຄຳເພງ 27:14) ເມື່ອເຮົາໄວ້ໃຈແລະໝັ້ນໃຈໃນຄວາມຫວັງທີ່ພະເຢໂຫວາໃຫ້ເຮົາ ເຮົາກໍຈະສາມາດອົດທົນກັບຄວາມລຳບາກຫຼາຍຢ່າງດ້ວຍຄວາມກ້າຫານແລະມີຄວາມສຸກໄດ້. ໃນບົດຄວາມນີ້ເຮົາຈະມາເບິ່ງວ່າ ຄວາມຫວັງປົກປ້ອງເຮົາແນວໃດ. ແຕ່ກ່ອນອື່ນເຮົາຈະມາເບິ່ງວ່າ ຄວາມຫວັງປຽບຄືກັບສະໝໍເຮືອແລະໝວກເກາະແນວໃດ. ແລະເຮົາຈະເຮັດໃຫ້ຄວາມຫວັງຂອງເຮົາຊັດເຈນຢູ່ສະເໝີໄດ້ແນວໃດ.
ຄວາມຫວັງຂອງເຮົາເປັນຄືກັບສະໝໍເຮືອ
4. ຄວາມຫວັງເປັນຄືກັບສະໝໍເຮືອແນວໃດ? (ເຮັບເຣີ 6:19)
4 ໃນຈົດໝາຍທີ່ໂປໂລຂຽນເຖິງພີ່ນ້ອງຄົນເຮັບເຣີ ລາວໄດ້ສົບທຽບຄວາມຫວັງເປັນຄືກັບສະໝໍເຮືອ. (ອ່ານເຮັບເຣີ 6:19) ຍ້ອນໂປໂລເດີນທາງດ້ວຍເຮືອຫຼາຍເທື່ອ ລາວຈຶ່ງຮູ້ວ່າສະໝໍເຮືອຊ່ວຍຍຶດເຮືອບໍ່ໃຫ້ໄຫຼໄປຕາມກະແສລົມ. ມີເທື່ອໜຶ່ງໂປໂລຂີ່ເຮືອຕອນທີ່ມີພາຍຸມາແຮງ. ພະນັກງານເຮືອກໍເລີຍໂຍນສະໝໍເຮືອລົງນ້ຳເພື່ອບໍ່ໃຫ້ເຮືອໄຫຼໄປຕຳໂງ່ນຫີນ. (ກຈກ. 27:29, 39-41) ຄືກັບສະໝໍເຮືອ ຄວາມຫວັງກໍຊ່ວຍຍຶດເຮົາບໍ່ໃຫ້ອອກໄປຈາກທາງຂອງພະເຢໂຫວາເມື່ອເຈິບັນຫາທີ່ໜັກໜ່ວງ. ຄວາມຫວັງທີ່ຊັດເຈນຊ່ວຍເຮົາໃຫ້ອົດທົນກັບບັນຫາຕ່າງໆທີ່ເປັນຄືກັບພາຍຸ ເພາະເຮົາໝັ້ນໃຈວ່າສິ່ງຕ່າງໆຈະດີຂຶ້ນ. ພະເຢຊູເຕືອນວ່າເຮົາຈະເຈິການຂົ່ມເຫງ. (ຢຮ. 15:20) ດັ່ງນັ້ນ ຖ້າເຮົາຄິດຕຶກຕອງເຖິງຄຳສັນຍາຂອງພະເຢໂຫວາ ເຮົາກໍຈະຮັບໃຊ້ເພິ່ນຕໍ່ໆໄປໄດ້.
5. ຄວາມຫວັງຊ່ວຍພະເຢຊູແນວໃດເມື່ອຮູ້ວ່າເພິ່ນຈະຕ້ອງຕາຍ?
5 ໃຫ້ເຮົາມາເບິ່ງວ່າຄວາມຫວັງຊ່ວຍພະເຢຊູແນວໃດເມື່ອເພິ່ນຮູ້ວ່າເພິ່ນຈະຕ້ອງຕາຍແບບທໍລະມານ. ໃນວັນເພັນເຕກອດປີ ຄ.ສ 33 ອັກຄະສາວົກເປໂຕໄດ້ເວົ້າເຖິງຄຳພະຍາກອນທີ່ຢູ່ໃນປຶ້ມຄຳເພງເຊິ່ງສະແດງເຖິງຄວາມຫວັງທີ່ຊັດເຈນຂອງພະເຢຊູວ່າ: “ຂ້ອຍຈະຢູ່ຢ່າງມີຄວາມຫວັງ. ເພາະພະອົງຈະບໍ່ຖິ້ມຂ້ອຍໄວ້ໃນຫຼຸມຝັງສົບ ແລະພະອົງຈະບໍ່ປ່ອຍໃຫ້ຄົນທີ່ພັກດີຕໍ່ພະອົງຕ້ອງເນົ່າເປື່ອຍ. ພະອົງ . . . ເຮັດໃຫ້ຂ້ອຍມີຄວາມສຸກທີ່ໄດ້ຢູ່ໃກ້ຊິດພະອົງ.” (ກຈກ. 2:25-28; ເພງ. 16:8-11, ລ.ມ) ເຖິງພະເຢຊູຮູ້ວ່າໂຕເອງຈະຕ້ອງຕາຍ ແຕ່ເພິ່ນກໍມີຄວາມຫວັງທີ່ຊັດເຈນວ່າພະເຢໂຫວາຈະປຸກເພິ່ນໃຫ້ຄືນມາຈາກຕາຍແລະເພິ່ນຈະມີຄວາມສຸກທີ່ໄດ້ຢູ່ກັບພະເຢໂຫວາອີກຄັ້ງ.—ຮຣ. 12:2, 3
6. ພີ່ນ້ອງຊາຍຄົນໜຶ່ງເວົ້າກ່ຽວກັບຄວາມຫວັງແນວໃດ?
6 ຄວາມຫວັງໄດ້ຊ່ວຍພີ່ນ້ອງຫຼາຍຄົນໃຫ້ອົດທົນກັບບັນຫາຕ່າງໆໄດ້. ໃຫ້ເຮົາມາເບິ່ງຕົວຢ່າງຂອງພີ່ນ້ອງເລເນີດ ຈິນ ທີ່ຮັບໃຊ້ຢ່າງສັດຊື່ໃນປະເທດອັງກິດ. ໃນລະຫວ່າງສົງຄາມໂລກຄັ້ງທີ I ລາວຖືກຂັງຄຸກຍ້ອນບໍ່ຍອມເປັນທະຫານ. ລາວໄດ້ຖືກຂັງດ່ຽວເປັນເວລາສອງເດືອນ ຈາກນັ້ນລາວກໍຖືກບັງຄັບໃຫ້ເຮັດວຽກໜັກ. ລາວບອກວ່າ: “ສິ່ງທີ່ຂ້ອຍເຈິເຮັດໃຫ້ຂ້ອຍເຫັນວ່າຄວາມຫວັງເປັນເລື່ອງທີ່ສຳຄັນຫຼາຍ ເພາະຄວາມຫວັງຊ່ວຍເຮົາໃຫ້ອົດທົນໄດ້. ເຮົາມີຕົວຢ່າງຂອງພະເຢຊູ ພວກອັກຄະສາວົກ ແລະຜູ້ພະຍາກອນຄົນອື່ນໆທີ່ຢູ່ໃນຄຳພີໄບເບິນ. ເລື່ອງເຫຼົ່ານີ້ຊ່ວຍໃຫ້ຄວາມຫວັງຂອງເຮົາຊັດເຈນຂຶ້ນແລະອົດທົນກັບບັນຫາຕ່າງໆໄດ້.” ຄວາມຫວັງເປັນຄືກັບສະໝໍເຮືອສຳລັບພີ່ນ້ອງເລເນີດ ແລະຄວາມຫວັງກໍຈະເປັນຄືກັບສະໝໍເຮືອສຳລັບເຮົາໄດ້ຄືກັນ.
7. ການອົດທົນກັບບັນຫາຊ່ວຍໃຫ້ຄວາມຫວັງຂອງເຮົາຊັດເຈນຫຼາຍຂຶ້ນແນວໃດ? (ໂຣມ 5:3-5; ຢາໂກໂບ 1:12)
7 ເມື່ອເຮົາຜ່ານບັນຫາຕ່າງໆ ເຫັນວ່າພະເຢໂຫວາຊ່ວຍເຮົາແນວໃດແລະຮູ້ວ່າພະເຢໂຫວາພໍໃຈເຮົາ ຄວາມຫວັງຂອງເຮົາກໍຈະຊັດເຈນຂຶ້ນ. (ອ່ານໂຣມ 5:3-5; ຢາໂກໂບ 1:12) ນີ້ຈຶ່ງເຮັດໃຫ້ຄວາມຫວັງຂອງເຮົາຊັດເຈນຫຼາຍກວ່າຕອນທີ່ເຮົາຮຽນຮູ້ຄວາມຈິງໃໝ່ໆ. ຊາຕານພະຍາຍາມເຮັດໃຫ້ເຮົາມີບັນຫາຫຼາຍຢ່າງ ແຕ່ຍ້ອນພະເຢໂຫວາຊ່ວຍ ເຮົາຈຶ່ງອົດທົນແລະຜ່ານບັນຫາຕ່າງໆມາໄດ້.
ຄວາມຫວັງຂອງເຮົາເປັນຄືກັບໝວກເກາະ
8. ຄວາມຫວັງເປັນຄືກັບໝວກເກາະແນວໃດ? (1 ເທຊະໂລນິກ 5:8)
8 ຄຳພີໄບເບິນສົມທຽບຄວາມຫວັງເປັນຄືກັບໝວກເກາະ. (ອ່ານ 1 ເທຊະໂລນິກ 5:8) ທະຫານຈະໃສ່ໝວກເກາະເພື່ອປົກປ້ອງຫົວຂອງໂຕເອງຈາກການໂຈມຕີຂອງສັດຕູ. ໃນຖານະທີ່ເປັນຄລິດສະຕຽນ ເຮົາກໍ ຕ້ອງປົກປ້ອງຄວາມຄິດຈິດໃຈຂອງເຮົາຈາກການໂຈມຕີຂອງຊາຕານ ເພາະມັນພະຍາຍາມໃຊ້ຫຼາຍຢ່າງເພື່ອຈະລໍ້ໃຈເຮົາແລະທຳລາຍຄວາມຄິດຂອງເຮົາ. ຄືກັບໝວກເກາະທີ່ປົກປ້ອງຫົວຂອງທະຫານ ຄວາມຫວັງກໍຈະຊ່ວຍປົກປ້ອງຄວາມຄິດຂອງເຮົາເພື່ອເຮົາຈະຮັກສາຄວາມສັດຊື່ຕໍ່ພະເຢໂຫວາໄດ້.
9. ຄົນທີ່ບໍ່ມີຄວາມຫວັງໃນຄຳສັນຍາຂອງພະເຈົ້າຈະເປັນແນວໃດ?
9 ຄວາມຫວັງເລື່ອງຊີວິດຕະຫຼອດໄປຈະຊ່ວຍເຮົາໃຫ້ຕັດສິນໃຈໄດ້ຢ່າງສະຫຼາດ. ແຕ່ຖ້າຄວາມຫວັງຂອງເຮົາບໍ່ຊັດເຈນ ເຮົາກໍຈະຄິດເຖິງແຕ່ຄວາມຕ້ອງການຂອງໂຕເອງແລະລືມຄວາມຫວັງເລື່ອງຊີວິດຕະຫຼອດໄປ. ຂໍໃຫ້ເຮົາຄິດເຖິງຄລິດສະຕຽນບາງຄົນທີ່ຢູ່ໃນເມືອງໂກຣິນໂທ. ເຂົາເຈົ້າບໍ່ມີຄວາມເຊື່ອເລື່ອງການຄືນມາຈາກຕາຍ ເຊິ່ງເປັນເລື່ອງທີ່ສຳຄັນໃນຄຳສັນຍາຂອງພະເຈົ້າ. (1ກຣ. 15:12) ໂປໂລຈຶ່ງບອກວ່າ ຄົນເຫຼົ່ານີ້ມັກໃຊ້ຊີວິດຕາມໃຈໂຕເອງແລະພໍໃຈກັບຊີວິດໃນປັດຈຸບັນ. (1ກຣ. 15:32) ຫຼາຍຄົນໃນທຸກມື້ນີ້ກໍເປັນແບບນັ້ນ. ເຂົາເຈົ້າບໍ່ມີຄວາມຫວັງໃນຄຳສັນຍາຂອງພະເຈົ້າ ແລະເຮັດທຸກຢ່າງເພື່ອໃຫ້ໂຕເອງມີຄວາມສຸກສະເພາະຕອນນີ້. ແຕ່ເຮົາບໍ່ເປັນແບບນັ້ນ ເພາະເຮົາມີຄວາມຫວັງໃນຄຳສັນຍາຂອງພະເຈົ້າ. ຄວາມຫວັງຂອງເຮົາເປັນຄືກັບໝວກເກາະທີ່ຊ່ວຍປົກປ້ອງຄວາມຄິດແລະຊ່ວຍເຮົາບໍ່ໃຫ້ຄິດເຖິງແຕ່ໂຕເອງ ເຊິ່ງການເຮັດແບບນັ້ນອາດຈະທຳລາຍສາຍສຳພັນຂອງເຮົາກັບພະເຢໂຫວາ.—1ກຣ. 15:33, 34
10. ຄວາມຫວັງຊ່ວຍປົກປ້ອງເຮົາຈາກຄວາມຄິດທີ່ບໍ່ຖືກຕ້ອງແນວໃດ?
10 ຄວາມຫວັງທີ່ເປັນຄືກັບໝວກເກາະຍັງຊ່ວຍປົກປ້ອງເຮົາຈາກຄວາມຄິດທີ່ວ່າ ເຖິງເຮົາຈະພະຍາຍາມຫຼາຍສ່ຳໃດກໍເຮັດໃຫ້ພະເຢໂຫວາພໍໃຈບໍ່ໄດ້. ເຊັ່ນ ບາງຄົນອາດຈະຄິດວ່າ: ‘ຂ້ອຍຄືຊິບໍ່ໄດ້ຮັບຊີວິດຕະຫຼອດດອກ ເພາະຂ້ອຍບໍ່ດີພໍແລະເຮັດຕາມມາດຕະຖານຂອງພະເຢໂຫວາບໍ່ໄດ້.’ ເອລີຟັດກໍເຄີຍເວົ້າກັບໂຢບຄ້າຍໆກັນນີ້. ລາວບອກວ່າ: “ມະນຸດຈະເປັນຄົນບໍລິສຸດໄດ້ບໍ?” ແລະລາວເວົ້າເຖິງພະເຈົ້າວ່າ: “ແມ່ນແຕ່ທູດສະຫວັນ ເພິ່ນກໍຍັງບໍ່ເຊື່ອໃຈ ແລະສະຫວັນກໍບໍ່ບໍລິສຸດພໍສຳລັບເພິ່ນ.” (ໂຢບ 15:14, 15, ລ.ມ.) ນີ້ເປັນຄຳຕົວະແທ້ໆ! ແລະຊາຕານກໍເປັນຜູ້ຢູ່ເບື້ອງຫຼັງໃນເລື່ອງນີ້ ເພາະມັນຮູ້ວ່າຖ້າເຮົາຄິດແບບນັ້ນເຮົາຈະບໍ່ມີຄວາມຫວັງຫຍັງເລີຍ. ດັ່ງນັ້ນ ຂໍໃຫ້ເຮົາຢ່າເຊື່ອຄຳຕົວະຂອງຊາຕານ ແຕ່ໃຫ້ຄິດເຖິງຄຳສັນຍາຂອງພະເຢໂຫວາແລະໝັ້ນໃຈວ່າເພິ່ນຢາກໃຫ້ເຮົາມີຊີວິດຕະຫຼອດໄປ ແລະຈະຊ່ວຍເຮົາໃຫ້ເຮັດແບບນັ້ນໄດ້.—1ຕມ. 2:3, 4
ເຮັດໃຫ້ຄວາມຫວັງຊັດເຈນຢູ່ສະເໝີ
11. ເປັນຫຍັງເຮົາຄວນລໍຖ້າໃຫ້ພະເຢໂຫວາເຮັດຕາມຄຳສັນຍາຂອງເພິ່ນ?
11 ບໍ່ແມ່ນເລື່ອງງ່າຍທີ່ເຮົາຈະເຮັດໃຫ້ຄວາມຫວັງຂອງເຮົາຊັດເຈນຢູ່ສະເໝີ ເພາະເຮົາອາດຈະລໍຖ້າໃຫ້ພະເຢໂຫວາເຮັດຕາມຄຳສັນຍາຂອງເພິ່ນບໍ່ໄຫວ ແຕ່ຂໍໃຫ້ຈື່ໄວ້ວ່າ ພະເຢໂຫວາມີຊີວິດທີ່ບໍ່ມີຈຸດເລີ່ມຕົ້ນແລະບໍ່ມີມື້ສິ້ນສຸດ ດັ່ງນັ້ນ ເພິ່ນຈຶ່ງເບິ່ງເລື່ອງເວລາຕ່າງຈາກທີ່ເຮົາເບິ່ງ. (2ປຕ. 3:8, 9) ເພິ່ນຈະເຮັດຕາມຄຳສັນຍາຂອງເພິ່ນຢ່າງດີທີ່ສຸດແລະເຮັດໃນເວລາທີ່ເໝາະສົມເຊິ່ງເປັນເວລາທີ່ເຮົາຄາດບໍ່ເຖິງ. ແລ້ວສິ່ງໃດຈະຊ່ວຍເຮົາໃຫ້ມີຄວາມຫວັງທີ່ຊັດເຈນຢູ່ສະເໝີແລະລໍຖ້າພະເຢໂຫວາໃຫ້ເຮັດຕາມຄຳສັນຍາຂອງເພິ່ນ?—ຢກບ. 5:7, 8
12. ຕາມເຮັບເຣີ 11:1, 6 ຄວາມຫວັງກ່ຽວຂ້ອງກັບຄວາມເຊື່ອແນວໃດ?
12 ຄວາມຫວັງຂອງເຮົາຈະຊັດເຈນຢູ່ສະເໝີຖ້າເຮົາສະໜິດກັບພະເຢໂຫວາຜູ້ທີ່ຈະເຮັດໃຫ້ຄວາມຫວັງຂອງເຮົາເປັນຈິງ. ຄຳພີໄບເບິນບອກວ່າເພື່ອຈະມີຄວາມຫວັງ ເຮົາຕ້ອງເຊື່ອວ່າພະເຢໂຫວາມີຢູ່ແທ້ແລະເພິ່ນຈະ “ໃຫ້ລາງວັນແກ່ຄົນທີ່ຊອກຫາເພິ່ນຢ່າງຈິງຈັງ.” (ອ່ານເຮັບເຣີ 11:1, 6) ແຮ່ງເຮົາເຊື່ອໃນພະເຢໂຫວາ ຫຼາຍເທົ່າໃດ ເຮົາກໍຈະແຮ່ງໝັ້ນໃຈໃນຄຳສັນຍາຂອງເພິ່ນຫຼາຍຂຶ້ນ. ຕອນນີ້ໃຫ້ເຮົາມາເບິ່ງບາງວິທີທີ່ຈະຊ່ວຍເຮົາໃຫ້ສະໜິດກັບພະເຢໂຫວາຫຼາຍຂຶ້ນແລະມີຄວາມຫວັງທີ່ຊັດເຈນຢູ່ສະເໝີ.
13. ເຮົາຈະສະໜິດກັບພະເຢໂຫວາໄດ້ແນວໃດ?
13 ອະທິດຖານເຖິງພະເຢໂຫວາແລະອ່ານຄຳພີໄບເບິນ. ເຖິງວ່າເຮົາຈະເບິ່ງພະເຢໂຫວາບໍ່ເຫັນ ແຕ່ເຮົາກໍສາມາດສະໜິດກັບເພິ່ນໄດ້. ເຮົາສາມາດລົມກັບເພິ່ນໂດຍອະທິດຖານແລະໝັ້ນໃຈວ່າເພິ່ນຈະຟັງເຮົາ. (ຢເຣ. 29:11, 12) ແລະເຮົາສາມາດຟັງພະເຢໂຫວາໄດ້ໂດຍອ່ານຄຳພີໄບເບິນແລະຄິດຕຶກຕອງເລື່ອງທີ່ໄດ້ອ່ານ. ເມື່ອເຮົາເຫັນວ່າພະເຢໂຫວາໄດ້ເບິ່ງແຍງຜູ້ຮັບໃຊ້ຂອງເພິ່ນໃນອະດີດແນວໃດ ເຮົາກໍແຮ່ງຈະມີຄວາມຫວັງທີ່ຊັດເຈນຫຼາຍຂຶ້ນ ເພາະທຸກສິ່ງທີ່ຂຽນໄວ້ໃນຄຳພີໄບເບິນ “ກໍຂຽນໄວ້ເພື່ອສອນພວກເຮົາ ເພື່ອພວກເຮົາຈະມີຄວາມຫວັງ ເພາະພະຄຳພີຊ່ວຍໃຫ້ພວກເຮົາອົດທົນແລະມີກຳລັງໃຈ.”—ໂຣມ 15:4
14. ເປັນຫຍັງເຮົາຕ້ອງຄິດຕຶກຕອງເຖິງສິ່ງທີ່ພະເຢໂຫວາເຄີຍເຮັດເພື່ອຄົນອື່ນມາແລ້ວ?
14 ຄິດຕຶກຕອງວ່າພະເຢໂຫວາໄດ້ເຮັດຕາມຄຳສັນຍາແນວໃດ. ຂໍໃຫ້ເຮົາຄິດເຖິງສິ່ງທີ່ພະເຢໂຫວາເຮັດເພື່ອອັບຣາຮາມແລະຊາຣາ. ເຂົາເຈົ້າເຖົ້າເກີນທີ່ຈະມີລູກໄດ້ ແຕ່ໃນທີ່ສຸດເຂົາເຈົ້າກໍມີລູກເຊິ່ງເປັນໄປຕາມທີ່ພະເຢໂຫວາສັນຍາໄວ້. (ປຖກ. 18:10) ເລື່ອງນີ້ສົ່ງຜົນຕໍ່ອັບຣາຮາມແນວໃດ? ຄຳພີໄບເບິນບອກວ່າ: “ລາວເຊື່ອວ່າລາວຈະໄດ້ເປັນພໍ່ຂອງຄົນຫຼາຍຊົນຊາດແທ້ໆ.” (ໂຣມ 4:18) ເຖິງວ່າອັບຣາຮາມຈະບໍ່ຮູ້ວ່າພະເຢໂຫວາຈະເຮັດຕາມຄຳສັນຍາແນວໃດ ແຕ່ລາວກໍໝັ້ນໃຈວ່າເພິ່ນຈະເຮັດໃຫ້ເກີດຂຶ້ນແທ້. ແລ້ວລາວກໍບໍ່ຜິດຫວັງເລີຍ. (ໂຣມ 4:19-21) ຈາກເລື່ອງນີ້ສອນເຮົາໃຫ້ຮູ້ວ່າ ພະເຢໂຫວາຈະເຮັດຕາມຄຳສັນຍາຂອງເພິ່ນສະເໝີເຖິງເຮົາຈະເບິ່ງວ່າເປັນໄປບໍ່ໄດ້ກໍຕາມ.
15. ເປັນຫຍັງເຮົາຄວນຄິດເຖິງສິ່ງທີ່ພະເຢໂຫວາເຄີຍເຮັດເພື່ອເຮົາມາແລ້ວ?
15 ຄິດເຖິງສິ່ງທີ່ພະເຢໂຫວາເຄີຍເຮັດເພື່ອເຈົ້າມາແລ້ວ. ໃຫ້ຄິດເຖິງຄຳສັນຍາຕ່າງໆທີ່ຢູ່ໃນຄຳພີໄບເບິນທີ່ເຈົ້າເຫັນວ່າມັນໄດ້ເກີດຂຶ້ນແທ້. ຕົວຢ່າງເຊັ່ນ: ພະເຢຊູສັນຍາວ່າ ພະເຢໂຫວາຈະໃຫ້ເຈົ້າມີສິ່ງຈຳເປັນໃນຊີວິດ. (ມທ. 6:32, 33) ແລະພະເຢຊູຍັງຮັບຮອງວ່າ ພະເຢໂຫວາຈະໃຫ້ພະລັງບໍລິສຸດເມື່ອເຈົ້າຂໍ. (ລກ. 11:13) ແລ້ວພະເຢໂຫວາກໍໄດ້ເຮັດຕາມຄຳສັນຍາເຫຼົ່ານັ້ນແທ້. ນອກຈາກນັ້ນ ເຈົ້າອາດຈະຄິດເຖິງຄຳສັນຍາອື່ນໆນຳ ເຊັ່ນ: ພະເຢໂຫວາສັນຍາວ່າຈະໃຫ້ອະໄພເຈົ້າ ໃຫ້ກຳລັງໃຈເຈົ້າ ແລະເບິ່ງແຍງເຈົ້າທາງດ້ານຄວາມເຊື່ອ. (ມທ. 6:14; 24:45; 2ກຣ. 1:3) ເມື່ອເຈົ້າຄິດຕຶກຕອງເຖິງສິ່ງທີ່ພະເຢໂຫວາເຄີຍເຮັດເພື່ອເຈົ້າມາແລ້ວ ຄວາມຫວັງຂອງເຈົ້າກໍຈະຊັດເຈນຫຼາຍຂຶ້ນ ແລະໝັ້ນໃຈວ່າພະເຢໂຫວາຈະເຮັດຕາມຄຳສັນຍາຂອງເພິ່ນໃນອະນາຄົດ.
ໃຫ້ມີຄວາມສຸກກັບຄວາມຫວັງ
16. ເປັນຫຍັງຄວາມຫວັງຈຶ່ງເປັນຂອງຂວັນທີ່ມີຄ່າຈາກພະເຈົ້າ?
16 ຄວາມຫວັງເລື່ອງຊີວິດຕະຫຼອດໄປເປັນຂອງຂວັນທີ່ມີຄ່າຈາກພະເຈົ້າ. ເຮົາລໍຖ້າຄວາມຫວັງທີ່ດີແບບນີ້ແລະໝັ້ນໃຈວ່າມັນຈະເກີດຂຶ້ນແທ້ໃນອະນາຄົດ. ຄວາມຫວັງນີ້ປຽບຄືກັບສະໝໍເຮືອ ທີ່ຊ່ວຍເຮົາໃຫ້ອົດທົນກັບບັນຫາທີ່ຍາກລຳບາກ ອົດທົນກັບການຂົ່ມເຫງ ແລະບໍ່ຢ້ານຄວາມຕາຍຫຼາຍເກີນໄປ. ນອກຈາກນັ້ນ ຄວາມຫວັງຍັງປຽບຄືກັບໝວກເກາະ ເຊິ່ງຊ່ວຍເຮົາບໍ່ໃຫ້ມີຄວາມຄິດທີ່ຜິດໆແລະເຮັດສິ່ງທີ່ຖືກຕ້ອງຕໍ່ໄປ. ຄວາມຫວັງທີ່ຢູ່ໃນຄຳພີໄບເບິນເຮັດໃຫ້ເຮົາສະໜິດກັບພະເຢໂຫວາຫຼາຍຂຶ້ນ ແລະເຫັນຄວາມຮັກທີ່ເພິ່ນມີຕໍ່ເຮົາ. ເຮົາຈະໄດ້ຮັບປະໂຫຍດຫຼາຍຖ້າເຮົາເຮັດໃຫ້ຄວາມຫວັງຊັດເຈນຢູ່ສະເໝີ.
17. ເປັນຫຍັງຄວາມຫວັງຈຶ່ງເຮັດໃຫ້ເຮົາມີຄວາມສຸກ?
17 ອັກຄະສາວົກໂປໂລຂຽນຈົດໝາຍເຖິງພີ່ນ້ອງໃນເມືອງໂຣມວ່າ: “ໃຫ້ມີຄວາມສຸກກັບຄວາມຫວັງ.” (ໂຣມ 12:12) ໂປໂລມີຄວາມສຸກໄດ້ຍ້ອນລາວໝັ້ນໃຈວ່າ ຖ້າລາວຮັກສາຄວາມສັດຊື່ລາວຈະໄດ້ຮັບຊີວິດຕະຫຼອດໄປໃນສະຫວັນ. ເຮົາກໍສາມາດມີຄວາມສຸກກັບຄວາມຫວັງໄດ້ຄືກັນ ເພາະເຮົາໝັ້ນໃຈວ່າພະເຢໂຫວາຈະເຮັດຕາມຄຳສັນຍາຂອງເພິ່ນສະເໝີ. ຄືກັບທີ່ຜູ້ຂຽນຄຳເພງບອກວ່າ: “ຄົນທີ່ມີຄວາມສຸກຄືຄົນທີ່ຫວັງເພິ່ງພະເຢໂຫວາເປັນພະເຈົ້າຂອງລາວ . . . ແລະເປັນຜູ້ທີ່ສັດຊື່ສະເໝີ.”—ເພງ. 146:5, 6, ລ.ມ.
ເພງ 139 ນຶກພາບເມື່ອທຸກສິ່ງກາຍເປັນສິ່ງໃໝ່
a ພະເຢໂຫວາໃຫ້ເຮົາມີຄວາມຫວັງທີ່ດີໃນອະນາຄົດ. ຄວາມຫວັງນີ້ຊ່ວຍເຮົາໃຫ້ມີຄວາມສຸກແລະເບິ່ງຂ້າມບັນຫາຕ່າງໆທີ່ມີໃນຕອນນີ້. ນອກຈາກນັ້ນ ຄວາມຫວັງຍັງຊ່ວຍເຮົາໃຫ້ຮັກສາຄວາມສັດຊື່ຕໍ່ພະເຢໂຫວາແລະປົກປ້ອງເຮົາບໍ່ໃຫ້ມີຄວາມຄິດທີ່ບໍ່ດີ. ສິ່ງເຫຼົ່ານີ້ເປັນເຫດຜົນທີ່ເຮັດໃຫ້ເຮົາຢາກຮັກສາຄວາມຫວັງໃຫ້ຊັດເຈນຢູ່ສະເໝີ ເຊິ່ງເຮົາຈະໄດ້ຮຽນໃນບົດຄວາມນີ້.
b ຄຳອະທິບາຍຮູບພາບ: ຄືກັບໝວກເກາະທີ່ປົກປ້ອງຫົວຂອງທະຫານແລະສະໝໍເຮືອຍຶດເຮືອໄວ້ບໍ່ໃຫ້ໄຫຼໄປຕາມກະແສລົມ ຄວາມຫວັງກໍຊ່ວຍປົກປ້ອງຄວາມຄິດຂອງເຮົາແລະຍຶດເຮົາບໍ່ໃຫ້ອອກຈາກທາງຂອງພະເຢໂຫວາເມື່ອເຈິບັນຫາຫຼາຍຢ່າງ. ພີ່ນ້ອງຍິງອະທິດຖານເຖິງພະເຢໂຫວາດ້ວຍຄວາມໝັ້ນໃຈ. ພີ່ນ້ອງຊາຍຄິດຕຶກຕອງເຖິງຄຳສັນຍາທີ່ພະເຢໂຫວາເຮັດເພື່ອອັບຣາຮາມ. ພີ່ນ້ອງຊາຍອີກຄົນໜຶ່ງຄິດເຖິງສິ່ງທີ່ພະເຢໂຫວາເຄີຍເຮັດເພື່ອລາວມາແລ້ວ.