ບົດຄວາມສຶກສາທີ 39
ເມື່ອຄົນທີ່ເຮົາຮັກປະຖິ້ມພະເຢໂຫວາ
‘ເຂົາໄດ້ເຮັດໃຫ້ພະເຢໂຫວາເສຍໃຈ . . . ຫຼາຍເທື່ອ.’—ເພງ. 78:40
ເພງ 102 ‘ຊ່ວຍຄົນທີ່ອ່ອນແອ’
ໃຈຄວາມສຳຄັນ *
1. ບາງຄົນຮູ້ສຶກແນວໃດເມື່ອຄົນໃນຄອບຄົວຖືກຕັດສຳພັນ?
ມີໃຜໃນຄອບຄົວຂອງເຈົ້າຖືກຕັດສຳພັນບໍ? ຖ້າເປັນແນວນັ້ນ ເຈົ້າຄືຊິເສຍໃຈຫຼາຍແທ້ໆ! ພີ່ນ້ອງຍິງຄົນໜຶ່ງທີ່ຊື່ ຮິວດາ * ບອກວ່າ: “ຂ້ອຍຮູ້ສຶກເສຍໃຈຫຼາຍແທ້ໆ ເມື່ອຜົວທີ່ຢູ່ກິນນຳກັນມາ 41 ປີໄດ້ຕາຍຈາກຂ້ອຍໄປ ແລະຂ້ອຍຍິ່ງເສຍໃຈຫຼາຍກວ່ານັ້ນອີກເມື່ອລູກຊາຍຂອງຂ້ອຍຖິ້ມລູກຖິ້ມເມຍແລະຖິ້ມພີ່ນ້ອງໃນປະຊາຄົມໄປ.”
2-3. ຕາມຄຳເພງ 78:40, 41 ພະເຢໂຫວາຮູ້ສຶກແນວໃດເມື່ອມີຄົນປະຖິ້ມເພິ່ນ?
2 ລອງຄິດເບິ່ງວ່າ ພະເຢໂຫວາຈະເສຍໃຈຫຼາຍສ່ຳໃດເມື່ອທູດສະຫວັນເຊິ່ງຢູ່ໃນຄອບຄົວຂອງເພິ່ນໄດ້ກະບົດຕໍ່ເພິ່ນ! (ຢດ. 6) ແລະຊາດອິດສະຣາເອນເຊິ່ງເປັນປະຊາຊົນທີ່ເພິ່ນເລືອກໄດ້ກະບົດຕໍ່ເພິ່ນຊ້ຳແລ້ວຊ້ຳອີກ. (ອ່ານຄຳເພງ 78:40, 41) ຂໍໃຫ້ໝັ້ນໃຈວ່າພະເຢໂຫວາກໍຮູ້ສຶກເສຍໃຈຄືກັນເມື່ອຄົນທີ່ເຈົ້າຮັກປະຖິ້ມເພິ່ນ ແລະເພິ່ນເຂົ້າໃຈວ່າເຈົ້າຮູ້ສຶກເສຍໃຈຫຼາຍສ່ຳໃດ. ດັ່ງນັ້ນ ເພິ່ນຈຶ່ງຢາກໃຫ້ກຳລັງໃຈເຈົ້າແລະຢາກຊ່ວຍເຫຼືອເຈົ້າ.
3 ໃນບົດນີ້ເຮົາຈະມາເບິ່ງວ່າ ເມື່ອຄົນທີ່ເຮົາຮັກປະຖິ້ມພະເຢໂຫວາເຮົາຕ້ອງເຮັດແນວໃດເພື່ອຈະໄດ້ຮັບຄວາມຊ່ວຍເຫຼືອຈາກພະເຢໂຫວາ ແລະພີ່ນ້ອງໃນປະຊາຄົມຈະຊ່ວຍເຮົາໃຫ້ຮັບມືກັບເລື່ອງນີ້ໄດ້ແນວໃດ. ແຕ່ກ່ອນອື່ນ ໃຫ້ເຮົາມາເບິ່ງວ່າເຮົາຕ້ອງຫຼີກລ່ຽງຄວາມຄິດແບບໃດ.
ຢ່າໂທດຕົວເອງ
4. ພໍ່ແມ່ຫຼາຍຄົນຮູ້ສຶກແນວໃດເມື່ອລູກປະຖິ້ມພະເຢໂຫວາ?
4 ເມື່ອລູກປະຖິ້ມພະເຢໂຫວາ ເປັນເລື່ອງທຳມະດາທີ່ພໍ່ແມ່ຈະໂທດຕົວເອງແລະຄິດວ່າເຂົາເຈົ້າອາດຈະຊ່ວຍລູກໄດ້ຫຼາຍກວ່ານີ້. ໃຫ້ເຮົາມາເບິ່ງວ່າພີ່ນ້ອງຊາຍຄົນໜຶ່ງທີ່ຊື່ ລຸກ ໄດ້ເຮັດແນວໃດຫຼັງຈາກທີ່ລູກຊາຍລາວຖືກຕັດ
ສຳພັນ. ລາວບອກວ່າ: “ຂ້ອຍມັກຈະໂທດຕົວເອງຢູ່ຕະຫຼອດແລະຝັນຮ້າຍກ່ຽວກັບເລື່ອງນັ້ນ. ບາງເທື່ອຂ້ອຍກໍຮູ້ສຶກເຈັບປວດໃຈແລະຮ້ອງໄຫ້ອອກມາ.” ພີ່ນ້ອງເອລີຊາເບັດກໍມີບັນຫາແບບນີ້ຄືກັນ. ຫຼັງຈາກທີ່ລູກຊາຍປະຖິ້ມພະເຢໂຫວາ ລາວກໍໂທດຕົວເອງວ່າ: “ຂ້ອຍເຮັດຫຍັງຜິດບໍ? ຂ້ອຍອາດຈະຊ່ວຍລູກໃຫ້ຮັກພະເຢໂຫວາຫຼາຍກວ່ານີ້.”5. ເປັນຄວາມຮັບຜິດຊອບຂອງຜູ້ໃດເມື່ອຄົນໜຶ່ງເຊົາຮັບໃຊ້ພະເຢໂຫວາ?
5 ຂໍໃຫ້ຈື່ໄວ້ວ່າ ພະເຢໂຫວາໃຫ້ເຮົາແຕ່ລະຄົນມີສິດທີ່ຈະເລືອກວ່າຈະຮັບໃຊ້ເພິ່ນຫຼືບໍ່. ພໍ່ແມ່ບາງຄົນໄດ້ເຮັດດີທີ່ສຸດແລະພະຍາຍາມຊ່ວຍລູກໃຫ້ຮັບໃຊ້ພະເຢໂຫວາ ແຕ່ລູກກໍຍັງປະຖິ້ມພະເຢໂຫວາໄປ. ສ່ວນບາງຄົນ ພໍ່ແມ່ບໍ່ໄດ້ຮັບໃຊ້ພະເຢໂຫວາ ແຕ່ລູກກໍຍັງຮັບໃຊ້ພະເຢໂຫວາຢູ່. ໃນທີ່ສຸດ ທຸກຄົນກໍຕ້ອງໄດ້ເລືອກເອົາເອງວ່າຈະຮັບໃຊ້ພະເຢໂຫວາຫຼືບໍ່. (ຢຊວຍ. 24:15) ດັ່ງນັ້ນ ພໍ່ແມ່ບໍ່ຄວນໂທດຕົວເອງ.
6. ລູກຈະຮູ້ສຶກແນວໃດເມື່ອພໍ່ແມ່ປະຖິ້ມພະເຢໂຫວາ?
6 ບາງເທື່ອພໍ່ແມ່ກໍຖິ້ມຄວາມຈິງແລະຖິ້ມຄອບຄົວໄປ. (ເພງ. 27:10) ເລື່ອງນີ້ສົ່ງຜົນກະທົບທີ່ບໍ່ດີຕໍ່ລູກ. ເອັດສ໌ເທີເຊິ່ງພໍ່ຂອງລາວຖືກຕັດສຳພັນໄດ້ບອກວ່າ: “ຂ້ອຍຮ້ອງໄຫ້ແລະເສຍໃຈຫຼາຍຍ້ອນຂ້ອຍຮູ້ວ່າພໍ່ບໍ່ໄດ້ຄ່ອຍໆອອກຈາກຄວາມຈິງ ແຕ່ລາວຕັ້ງໃຈທີ່ຈະເຊົາຮັບໃຊ້ພະເຢໂຫວາ. ຂ້ອຍຮັກພໍ່ຫຼາຍ ດັ່ງນັ້ນ ເມື່ອພໍ່ຖືກຕັດສຳພັນ ຂ້ອຍຈຶ່ງຮູ້ສຶກເປັນຫ່ວງວ່າພໍ່ຊິຢູ່ຊິກິນແນວໃດ. ຂ້ອຍຄິດເລື່ອງນີ້ຫຼາຍຈົນເປັນໂລກວິຕົກກັງວົນ.”
7. ພະເຢໂຫວາຮູ້ສຶກແນວໃດຕໍ່ຜູ້ເປັນລູກເມື່ອພໍ່ແມ່ຖືກຕັດສຳພັນ?
7 ເມື່ອພໍ່ແມ່ຖືກຕັດສຳພັນ ເຈົ້າທີ່ເປັນລູກຄືຊິຮູ້ສຶກເສຍໃຈຫຼາຍແທ້ໆ! ແຕ່ຂໍໃຫ້ໝັ້ນໃຈວ່າ ພະເຢໂຫວາເຂົ້າໃຈຄວາມຮູ້ສຶກຂອງເຈົ້າແລະຮູ້ວ່າເຈົ້າເຈັບປວດຫຼາຍສ່ຳໃດ. ທັງພະເຢໂຫວາແລະພີ່ນ້ອງໃນປະຊາຄົມຮັກແລະເຫັນຄຸນຄ່າຄວາມສັດຊື່ຂອງເຈົ້າ. ຢ່າລືມວ່າການຕັດສິນໃຈຂອງພໍ່ແມ່ບໍ່ແມ່ນ ຄວາມຮັບຜິດຊອບຂອງເຈົ້າ. ຄືກັບທີ່ເຮົາໄດ້ເວົ້າເຖິງກ່ອນໜ້ານີ້ ພະເຢໂຫວາໃຫ້ທຸກຄົນມີສິດທີ່ຈະເລືອກດ້ວຍຕົວເອງ. ດັ່ງນັ້ນ ຜູ້ທີ່ອຸທິດຕົວແລະຮັບບັບເຕມາແລ້ວຈະຕ້ອງ “ແບກຄວາມຮັບຜິດຊອບຂອງຕົວເອງ.”—ຄລຕ. 6:5
8. ເຈົ້າສາມາດເຮັດຫຍັງໄດ້ໃນລະຫວ່າງທີ່ລໍຖ້າໃຫ້ຄົນທີ່ເຈົ້າຮັກກັບມາຫາພະເຢໂຫວາ? (ເບິ່ງຂອບ “ ຂໍໃຫ້ກັບມາຫາພະເຢໂຫວາ”)
8 ເມື່ອຄົນທີ່ເຈົ້າຮັກປະຖິ້ມພະເຢໂຫວາ ເຈົ້າຄືຊິຫວັງວ່າຈັກມື້ໜຶ່ງລາວຈະກັບມາ. ແລ້ວເຈົ້າຈະເຮັດຫຍັງໄດ້ແດ່ໃນລະຫວ່າງທີ່ລໍຖ້າໃຫ້ລາວກັບມາ? ເຈົ້າກໍຕ້ອງເສີມຄວາມເຊື່ອຂອງເຈົ້າໃຫ້ເຂັ້ມແຂງຕໍ່ໆໄປ. ການເຮັດແບບນີ້ຈະຊ່ວຍເຈົ້າໃຫ້ຮັບມືກັບຄວາມເສຍໃຈໄດ້ ແລະເຈົ້າຍັງຈະເປັນຕົວຢ່າງທີ່ດີໃຫ້ກັບຄົນໃນຄອບຄົວແລະຜູ້ທີ່ຖືກຕັດສຳພັນນຳ. ຕອນນີ້ໃຫ້ເຮົາມາເບິ່ງບາງຢ່າງທີ່ເຮົາເຮັດໄດ້ເພື່ອຈະມີຄວາມເຊື່ອທີ່ເຂັ້ມແຂງ.
ສິ່ງທີ່ເຮົາເຮັດໄດ້ເພື່ອຈະມີຄວາມເຊື່ອເຂັ້ມແຂງ
9. ເຮົາຕ້ອງເຮັດຫຍັງເພື່ອຈະເສີມສ້າງຄວາມເຊື່ອໃຫ້ເຂັ້ມແຂງ? (ເບິ່ງຂອບ “ ຂໍ້ພະຄຳພີທີ່ໃຫ້ກຳລັງໃຈເມື່ອຄົນທີ່ເຮົາຮັກປະຖິ້ມພະເຢໂຫວາ”)
9 ເຮັດສິ່ງທີ່ເສີມຄວາມເຊື່ອເປັນປະຈຳ. ເປັນເລື່ອງສຳຄັນຫຼາຍທີ່ຈະເສີມສ້າງຄວາມເຊື່ອຂອງເຮົາແລະ
ຄົນໃນຄອບຄົວໃຫ້ເຂັ້ມແຂງ. ເຮົາຈະເຮັດແບບນັ້ນໄດ້ແນວໃດ? ເຮົາຕ້ອງອ່ານຄຳພີໄບເບິນເລື້ອຍໆແລະຄິດຕຶກຕອງສິ່ງທີ່ໄດ້ອ່ານລວມທັງເຂົ້າຮ່ວມການປະຊຸມນຳ. ໂຈແອນນາເຊິ່ງພໍ່ກັບເອື້ອຍໄດ້ອອກຈາກຄວາມຈິງໄດ້ເວົ້າວ່າ: “ຂ້ອຍຮູ້ສຶກສະບາຍໃຈຫຼາຍຂຶ້ນເມື່ອຂ້ອຍອ່ານຄຳພີໄບເບິນກ່ຽວກັບເລື່ອງຂອງອາບີຄາລີ ເອເຊເທຣ ໂຢບ ໂຢເຊັບ ແລະພະເຢຊູ. ຕົວຢ່າງຂອງເຂົາເຈົ້າ ແລະເພງຈາກມິວສິກວິດີໂອຂອງອົງການຊ່ວຍຂ້ອຍໃຫ້ມີກຳລັງໃຈແລະຄິດໃນແງ່ບວກ.”10. ຄຳເພງ 32:6-8 ຊ່ວຍເຮົາໃຫ້ຮັບມືກັບຄວາມເສຍໃຈໄດ້ແນວໃດ?
10 ໃຫ້ລະບາຍຄວາມຮູ້ສຶກກັບພະເຢໂຫວາ. ເມື່ອເຈົ້າຮູ້ສຶກເສຍໃຈ ໃຫ້ອະທິດຖານເຖິງພະເຢໂຫວາຕໍ່ໆໄປ. ຂໍພະເຢໂຫວາ ‘ຊ່ວຍເຈົ້າໃຫ້ມີຄວາມເຂົ້າໃຈແລະບອກທາງທີ່ເຈົ້າຄວນໄປ’ ເພື່ອເຈົ້າຈະເບິ່ງສະພາບການຄືກັບທີ່ເພິ່ນເບິ່ງ. (ອ່ານຄຳເພງ 32:6-8) * ບາງເທື່ອມັນກໍຍາກທີ່ຈະບອກພະເຢໂຫວາໃຫ້ຮູ້ວ່າເຈົ້າຮູ້ສຶກແນວໃດແທ້ໆ. ແຕ່ພະເຢໂຫວາຮູ້ດີວ່າເຈົ້າເຈັບປວດຫຼາຍສ່ຳໃດ. ເພິ່ນຮັກເຈົ້າຫຼາຍ ແລະຢາກໃຫ້ເຈົ້າລະບາຍຄວາມຮູ້ສຶກກັບເພິ່ນ.—ອົບ. 34:6; ເພງ. 62:7, 8
11. ຕາມເຮັບເຣີ 12:11 ເປັນຫຍັງເຮົາຄວນໄວ້ໃຈການສັ່ງສອນຈາກພະເຢໂຫວາ? (ເບິ່ງຂອບ “ ການຕັດສຳພັນສະແດງເຖິງຄວາມຮັກທີ່ພະເຢໂຫວາມີຕໍ່ເຮົາ”)
11 ການຕັດສຳພັນເປັນການຈັດກຽມຂອງພະເຢໂຫວາເຊິ່ງເປັນວິທີແກ້ໄຂບັນຫາທີ່ດີທີ່ສຸດສຳລັບທຸກຄົນລວມທັງຄົນທີ່ເຮັດຜິດນຳ. (ອ່ານເຮັບເຣີ 12:11) ເມື່ອມີເຫດການແບບນີ້ເກີດຂຶ້ນ ພີ່ນ້ອງບາງຄົນອາດຮູ້ສຶກ ວ່າຜູ້ດູແລເຮັດບໍ່ຖືກ. ທີ່ເຂົາເຈົ້າຄິດແບບນັ້ນອາດເປັນຍ້ອນວ່າເຂົາເຈົ້າບໍ່ໄດ້ຮູ້ຄວາມຈິງທັງໝົດແລະບໍ່ຮູ້ວ່າຜູ້ນັ້ນເຮັດຫຍັງຜິດ. ຍ້ອນເຮົາບໍ່ຮູ້ຄວາມຈິງທັງໝົດ ດັ່ງນັ້ນ ເຮົາຄວນຈະຝາກເລື່ອງນີ້ໄວ້ກັບຜູ້ດູແລ. ແລະເຮົາໝັ້ນໃຈໄດ້ວ່າຄະນະຜູ້ດູແລຊິຈັດການເລື່ອງນີ້ຕາມຫຼັກການໃນຄຳພີໄບເບິນ ແລະຕັດສິນ “ສຳລັບພະເຢໂຫວາ.”—2 ຂ່າວ. 19:6
12. ບາງຄົນໄດ້ຮັບປະໂຫຍດຫຍັງແດ່ເມື່ອເຮັດຕາມຄຳແນະນຳຂອງພະເຢໂຫວາໃນເລື່ອງການສັ່ງສອນ?
12 ເມື່ອເຮົາໃຫ້ຄວາມຮ່ວມມືກັບຜູ້ດູແລໃນເລື່ອງການຕັດສຳພັນ ເຮົາອາດຈະຊ່ວຍຄົນທີ່ຖືກຕັດສຳພັນໃຫ້ກັບມາຫາພະເຢໂຫວາກໍໄດ້. ເອລີຊາເບັດທີ່ເວົ້າເຖິງກ່ອນໜ້ານີ້ບອກວ່າ: “ເຖິງວ່າຈະເປັນເລື່ອງຍາກທີ່ຈະບໍ່ຕິດຕໍ່ກັບລູກຊາຍທີ່ໃຫຍ່ແລ້ວທີ່ອອກຈາກຄວາມຈິງໄປ ແຕ່ເມື່ອລູກຊາຍຂ້ອຍກັບມາ ລາວບອກວ່າດີແລ້ວທີ່ລາວຖືກຕັດສຳພັນເພາະມັນຊ່ວຍໃຫ້ລາວໄດ້ບົດຮຽນຫຼາຍຢ່າງ ແລະເຫັນວ່າການສັ່ງສອນຈາກພະເຢໂຫວາເປັນສິ່ງທີ່ດີ.” ມາກຜົວຂອງເອລີຊາເບັດບອກວ່າ: “ຂ້ອຍດີໃຈຫຼາຍທີ່ພະເຢໂຫວາຊ່ວຍເຮົາໃຫ້ເຊື່ອຟັງເພິ່ນ ເພາະຫຼາຍປີຕໍ່ມາລູກໄດ້ສາລະພາບກັບຂ້ອຍວ່າ ສິ່ງທີ່ໄດ້ກະຕຸ້ນລາວໃຫ້ຢາກກັບມາກໍຍ້ອນວ່າເຮົາໄດ້ເຮັດສິ່ງທີ່ຖືກຕ້ອງໂດຍບໍ່ໄດ້ຕິດຕໍ່ກັບລາວເລີຍ.”
13. ສິ່ງໃດຈະຊ່ວຍເຮົາໄດ້ເມື່ອເຮົາຮູ້ສຶກເສຍໃຈ?
13 ລົມກັບໝູ່ຜູ້ທີ່ເຂົ້າໃຈເຈົ້າ. ການຫຼິ້ນນຳພີ່ນ້ອງທີ່ມີຄວາມເຊື່ອເຂັ້ມແຂງຈະຊ່ວຍເຈົ້າໃຫ້ມີຄວາມຄິດທີ່ຖືກຕ້ອງ. (ສຸພາ. 12:25; 17:17) ໂຈແອນນາທີ່ເວົ້າເຖິງກ່ອນໜ້ານີ້ບອກວ່າ: “ເລິກໆແລ້ວຂ້ອຍຮູ້ສຶກເຫງົາ ແຕ່ເມື່ອຂ້ອຍໄດ້ລົມກັບໝູ່ທີ່ເຂົ້າໃຈຂ້ອຍ ມັນຊ່ວຍຂ້ອຍໄດ້ຫຼາຍແທ້ໆ.” ແຕ່ຈະເຮັດແນວໃດຖ້າພີ່ນ້ອງບາງຄົນເວົ້າໃນສິ່ງທີ່ເຮັດໃຫ້ເຮົາເສຍໃຈຫຼາຍກວ່າເກົ່າອີກ?
14. ເປັນຫຍັງເຮົາຕ້ອງ “ອົດທົນຕໍ່ກັນແລະກັນ ແລະໃຫ້ອະໄພກັນຢ່າງໃຈກວ້າງຕໍ່ໄປ”?
14 ໃຫ້ອົດທົນກັບພີ່ນ້ອງ. ເຮົາບໍ່ຄວນຄາດໝາຍວ່າທຸກຄົນຈະເວົ້າຖືກໃຈເຮົາໝົດ ຍ້ອນເຮົາທຸກຄົນບໍ່ສົມບູນແບບ. (ຢກບ. 3:2) ດັ່ງນັ້ນ ເຮົາຈຶ່ງບໍ່ແປກໃຈຖ້າພີ່ນ້ອງບາງຄົນເວົ້າຫຼືເຮັດບາງຢ່າງທີ່ເຮັດໃຫ້ເຮົາເສຍໃຈໂດຍບໍ່ໄດ້ຕັ້ງໃຈ. ຂໍໃຫ້ເຮົາຈື່ຄຳແນະນຳຂອງອັກຄະສາວົກໂປໂລທີ່ບອກວ່າ: “ແຕ່ຖ້າຜູ້ໃດມີສາເຫດຈະຈົ່ມໃຫ້ຄົນອື່ນ ກໍຂໍໃຫ້ອົດທົນຕໍ່ກັນແລະກັນ ແລະໃຫ້ອະໄພກັນຢ່າງໃຈກວ້າງຕໍ່ໄປ.” (ກລຊ. 3:13) ພີ່ນ້ອງຍິງຄົນໜຶ່ງເຊິ່ງຍາດພີ່ນ້ອງຂອງລາວຖືກຕັດສຳພັນໄດ້ບອກວ່າ: “ພະເຢໂຫວາໄດ້ຊ່ວຍຂ້ອຍໃຫ້ຍົກໂທດໃຫ້ພີ່ນ້ອງຜູ້ທີ່ໄດ້ພະຍາຍາມໃຫ້ກຳລັງໃຈຂ້ອຍ ແຕ່ພັດເຮັດໃຫ້ຂ້ອຍເສຍໃຈ.” ຄັນຊັ້ນ ພີ່ນ້ອງໃນປະຊາຄົມຈະຊ່ວຍຄົນໃນຄອບຄົວຂອງຜູ້ທີ່ຖືກຕັດສຳພັນໄດ້ແນວໃດ?
ສິ່ງທີ່ພີ່ນ້ອງໃນປະຊາຄົມຊ່ວຍໄດ້
15. ເຮົາຈະຊ່ວຍຄອບຄົວຂອງຄົນທີ່ຖືກຕັດສຳພັນໄດ້ແນວໃດ?
15 ໃຫ້ສະແດງຄວາມຮັກແລະຕ້ອນຮັບພີ່ນ້ອງຢ່າງອົບອຸ່ນ. ພີ່ນ້ອງຍິງທີ່ຊື່ມີຣີອາມບອກວ່າ: “ຫຼັງຈາກ
ທີ່ນ້ອງຊາຍຖືກຕັດສຳພັນຂ້ອຍຮູ້ສຶກບໍ່ກ້າໄປປະຊຸມ ເພາະຢ້ານພີ່ນ້ອງຈະເວົ້າບາງຢ່າງໃຫ້ຂ້ອຍ. ແຕ່ເມື່ອໄປຮອດ ພີ່ນ້ອງບໍ່ໄດ້ເຮັດຄືກັບທີ່ຂ້ອຍຄິດ. ເຂົາເຈົ້າເສຍໃຈກັບສິ່ງທີ່ເກີດຂຶ້ນ ແລະບໍ່ໄດ້ເວົ້າແນວທີ່ບໍ່ດີໃຫ້ນ້ອງຊາຍຂ້ອຍ. ຂ້ອຍຈຶ່ງຂອບໃຈເຂົາເຈົ້າແລະຮູ້ສຶກວ່າຂ້ອຍບໍ່ໄດ້ຢູ່ໂດດດ່ຽວ.” ພີ່ນ້ອງຍິງອີກຄົນໜຶ່ງບອກວ່າ: “ຫຼັງຈາກທີ່ລູກຊາຍເຮົາຖືກຕັດສຳພັນ ພີ່ນ້ອງກໍໄດ້ມາໃຫ້ກຳລັງໃຈພວກເຮົາ. ບາງຄົນບອກວ່າເຂົາເຈົ້າບໍ່ຮູ້ຈະເວົ້າແນວໃດ ບາງຄົນກໍຮ້ອງໄຫ້ກັບເຮົາ ສ່ວນບາງຄົນກໍຂຽນຈົດໝາຍໃຫ້ກຳລັງໃຈເຮົາ. ສິ່ງເຫຼົ່ານີ້ຊ່ວຍເຮົາໄດ້ຫຼາຍແທ້ໆ!”16. ພີ່ນ້ອງໃນປະຊາຄົມຈະຊ່ວຍຄອບຄົວຂອງຜູ້ທີ່ຖືກຕັດສຳພັນໄດ້ແນວໃດ?
16 ເຮົາຕ້ອງຊ່ວຍເຫຼືອພີ່ນ້ອງຕໍ່ໆໄປ. ເຮົາຕ້ອງສະແດງຄວາມຮັກແລະໃຫ້ກຳລັງໃຈຄອບຄົວຂອງຜູ້ທີ່ຖືກຕັດສຳພັນຫຼາຍກວ່າເກົ່າ. (ຮຣ. 10:24, 25) ບາງເທື່ອເຂົາເຈົ້າກໍຮູ້ສຶກວ່າ ພີ່ນ້ອງໃນປະຊາຄົມບໍ່ຢາກລົມກັບເຂົາເຈົ້າແລະເຮັດຄືກັບວ່າເຂົາເຈົ້າຖືກຕັດສຳພັນຄືກັນ. ເຮົາຕ້ອງລະວັງທີ່ຈະບໍ່ເຮັດແບບນັ້ນ! ຜູ້ທີ່ເຮົາຄວນຊົມເຊີຍແລະໃຫ້ກຳລັງໃຈຫຼາຍກວ່າໝູ່ກໍຄື ໄວລຸ້ນຜູ້ທີ່ພໍ່ແມ່ເຂົາເຈົ້າປະຖິ້ມພະເຢໂຫວາ. ມາເຣຍເຊິ່ງຜົວຂອງລາວໄດ້ຖືກຕັດສຳພັນແລະອອກຈາກຄອບຄົວໄປໄດ້ບອກວ່າ: “ໝູ່ບາງຄົນມາຫາຂ້ອຍຢູ່ເຮືອນ ພວກເຮົາແຕ່ງກິນນຳກັນແລະນະມັດສະການປະຈຳຄອບຄົວນຳກັນ. ເຂົາເຈົ້າເຂົ້າໃຈຄວາມຮູ້ສຶກແລະເຖິງຂັ້ນຮ້ອງໄຫ້ນຳຂ້ອຍ ແລະເຂົາເຈົ້າຍັງໄດ້ເວົ້າປົກປ້ອງເມື່ອມີຄົນເວົ້າບໍ່ດີໃຫ້ຄອບຄົວຂອງຂ້ອຍ. ນີ້ເຮັດໃຫ້ຂ້ອຍໄດ້ກຳລັງໃຈຫຼາຍແທ້ໆ!”—ຣມ. 12:13, 15
17. ຜູ້ດູແລຈະໃຫ້ກຳລັງໃຈຜູ້ທີ່ເສົ້າເສຍໃຈແນວໃດ?
17 ຜູ້ດູແລໃນປະຊາຄົມມີໜ້າທີ່ທີ່ຈະໃຫ້ກຳລັງໃຈພີ່ນ້ອງໂດຍສະເພາະຜູ້ທີ່ຄົນໃນຄອບຄົວຖືກຕັດສຳພັນ. (1 ທຊ. 5:14) ຜູ້ດູແລຄວນເປັນຝ່າຍລິເລີ່ມໃຫ້ກຳລັງໃຈພີ່ນ້ອງທັງກ່ອນແລະຫຼັງການປະຊຸມ ໄປຢາມເຂົາເຈົ້າຢູ່ເຮືອນແລະອະທິດຖານກັບເຂົາເຈົ້າ ຊວນເຂົາເຈົ້າໄປຮັບໃຊ້ນຳກັນຫຼືນະມັດສະການປະຈຳຄອບຄົວຮ່ວມກັນ. ຜູ້ດູແລຕ້ອງສະແດງຄວາມຮັກ ຄວາມເຫັນອົກເຫັນໃຈ ແລະສົນໃຈຜູ້ທີ່ເສຍໃຈ.—1 ທຊ. 2:7, 8
ໃຫ້ມີຄວາມຫວັງແລະໄວ້ໃຈພະເຢໂຫວາຕໍ່ໆໄປ
18. ຕາມ 2 ເປໂຕ 3:9 ພະເຢໂຫວາຢາກໃຫ້ຜູ້ທີ່ເຮັດຜິດເຮັດຫຍັງ?
18 ພະເຢໂຫວາ “ບໍ່ຢາກໃຫ້ຜູ້ໃດຕ້ອງຖືກທຳລາຍ ແຕ່ຢາກໃຫ້ທຸກຄົນກັບໃຈ.” (ອ່ານ 2 ເປໂຕ 3:9) ເຖິງວ່າບາງຄົນຈະເຮັດຜິດຮ້າຍແຮງ ແຕ່ພະເຢໂຫວາກໍຍັງຖືວ່າເຂົາເຈົ້າມີຄ່າໃນສາຍຕາຂອງເພິ່ນ. ລອງຄິດເບິ່ງວ່າພະເຢໂຫວາໄດ້ເສຍສະລະຫຼາຍສ່ຳໃດໂດຍໃຫ້ພະເຢຊູລູກຊາຍຂອງເພິ່ນມາເປັນຄ່າໄຖ່ເພື່ອເຂົາເຈົ້າ. ພະເຢໂຫວາຢາກໃຫ້ເຂົາເຈົ້າກັບມາຫາເພິ່ນ ແລະເພິ່ນກໍຫວັງວ່າເຂົາເຈົ້າຈະກັບມາດັ່ງທີ່ເຮົາເຫັນໃນຕົວຢ່າງປຽບທຽບຂອງພະເຢຊູເລື່ອງລູກທີ່ຫຼົງຫາຍໄປ. (ລກ. 15:11-32) ຫຼາຍຄົນທີ່ໄດ້ອອກຈາກຄວາມຈິງໄປໄດ້ກັບມາຫາພະເຢໂຫວາ ແລະພີ່ນ້ອງໃນປະຊາຄົມກໍໄດ້ຕ້ອນຮັບເຂົາເຈົ້າຢ່າງອົບອຸ່ນ. ເອລີຊາເບັດທີ່ເວົ້າເຖິງກ່ອນໜ້ານີ້ຮູ້ສຶກດີໃຈຫຼາຍທີ່ລູກຊາຍລາວກັບມາ. ລາວບອກວ່າ: “ຂ້ອຍຮູ້ສຶກຂອບໃຈພີ່ນ້ອງຫຼາຍແທ້ໆທີ່ໃຫ້ກຳລັງໃຈເຮົາແລະຊ່ວຍເຮົາໃຫ້ຫວັງຢູ່ສະເໝີວ່າລູກຊາຍເຮົາຈະກັບມາ.”
19. ເປັນຫຍັງເຮົາຈຶ່ງສາມາດໄວ້ວາງໃຈພະເຢໂຫວາໄດ້ຕໍ່ໆໄປ?
19 ເຮົາສາມາດໄວ້ວາງໃຈພະເຢໂຫວາໄດ້ຕໍ່ໆໄປ ຍ້ອນເພິ່ນເປັນພໍ່ທີ່ໃຈກວ້າງແລະເຫັນອົກເຫັນໃຈຕໍ່ຜູ້ທີ່ຮັກເພິ່ນ. ຄຳແນະນຳຂອງເພິ່ນກໍເປັນປະໂຫຍດຕໍ່ເຮົາສະເໝີ ດັ່ງນັ້ນ ເຮົາຈຶ່ງໝັ້ນໃຈໄດ້ວ່າເພິ່ນຈະບໍ່ມີວັນປະຖິ້ມເຮົາເມື່ອເຮົາມີບັນຫາ. (ຮຣ. 13:5, 6) ມາກທີ່ເວົ້າເຖິງກ່ອນໜ້ານີ້ບອກວ່າ: “ພະເຢໂຫວາບໍ່ເຄີຍປະຖິ້ມເຮົາ. ເພິ່ນຊ່ວຍເຫຼືອເຮົາຕະຫຼອດຕອນທີ່ເຮົາມີບັນຫາ.” ພະເຢໂຫວາຈະໃຫ້ “ກຳລັງທີ່ຫຼາຍກວ່າປົກກະຕິ” ກັບເຮົາຕໍ່ໆໄປ. (2 ກຣ. 4:7) ດັ່ງນັ້ນ ເຮົາຈຶ່ງສາມາດ ສັດຊື່ແລະມີຄວາມຫວັງຕໍ່ໄປໄດ້ເຖິງວ່າຄົນທີ່ເຮົາຮັກຈະປະຖິ້ມພະເຢໂຫວາ.
ເພງ 44 ຄຳອະທິດຖານຂອງຄົນທຸກໃຈ
^ ຂໍ້ 5 ເປັນເລື່ອງທີ່ໜ້າເສົ້າໃຈຫຼາຍແທ້ໆເມື່ອຄົນທີ່ເຮົາຮັກປະຖິ້ມພະເຢໂຫວາ! ໃນບົດນີ້ເຮົາຈະມາເບິ່ງວ່າ ພະເຢໂຫວາຮູ້ສຶກແນວໃດເມື່ອເລື່ອງນີ້ເກີດຂຶ້ນ. ຄອບຄົວຂອງຜູ້ທີ່ຖືກຕັດສຳພັນຈະເຮັດແນວໃດເພື່ອຮັບມືກັບຄວາມເສຍໃຈແລະເພື່ອທີ່ຈະມີຄວາມເຊື່ອທີ່ເຂັ້ມແຂງ. ແລະເຮົາຍັງຈະມາເບິ່ງວ່າ ພີ່ນ້ອງໃນປະຊາຄົມຈະໃຫ້ກຳລັງໃຈແລະຊ່ວຍເຫຼືອຄອບຄົວຂອງຜູ້ທີ່ຖືກຕັດສຳພັນໄດ້ແນວໃດ.
^ ຂໍ້ 1 ຊື່ສົມມຸດ
^ ຂໍ້ 10 ຄຳເພງ 32:6-8 (ລ.ມ.) ບອກວ່າ: “ຍ້ອນແນວນີ້ທຸກຄົນທີ່ພັກດີຈະອະທິດຖານເຖິງພະອົງ ຕອນທີ່ຍັງຈະພົບພະອົງໄດ້. ເມື່ອເຮັດແບບນັ້ນ ແມ່ນແຕ່ນ້ຳກໍບໍ່ຖ້ວມຮອດລາວ. ພະອົງເປັນທີ່ເພິ່ງຂອງຂ້ອຍ ພະອົງຈະປົກປ້ອງຂ້ອຍໄວ້ຈາກຄວາມທຸກລຳບາກ ພະອົງຈະເຮັດໃຫ້ອ້ອມຕົວຂ້ອຍມີແຕ່ສຽງຮ້ອງດີໃຈເພາະພະອົງຊ່ວຍໃຫ້ລອດ. ເຮົາຈະຊ່ວຍເຈົ້າໃຫ້ມີຄວາມເຂົ້າໃຈແລະຈະບອກທາງທີ່ເຈົ້າຄວນໄປ ເຮົາຈະແນະນຳເຈົ້າແລະເຝົ້າເບິ່ງເຈົ້າ.”