ບົດຄວາມສຶກສາທີ 37
‘ເຮົາຈະສັ່ນໝົດທຸກຊາດ’
‘ເຮົາຈະສັ່ນໝົດທຸກຊາດ ແລ້ວສິ່ງທີ່ມີຄ່າຈາກຊາດທັງໝົດນັ້ນຈະຫຼັ່ງໄຫຼເຂົ້າມາໃນວິຫານຫຼັງນີ້.’—ອເກ. 2:7, ລ.ມ.
ເພງ 24 ໄປທີ່ພູເຂົາຂອງພະເຢໂຫວາ
ໃຈຄວາມສຳຄັນ *
1-2. ຜູ້ພະຍາກອນອາກເກບອກລ່ວງໜ້າວ່າຈະມີການສັ່ນແບບໃດໃນສະໄໝຂອງເຮົາ?
ຄົນທີ່ລອດຈາກແຜ່ນດິນໄຫວໃນເນປານປີ 2015 ເວົ້າວ່າ: “ຮ້ານຄ້າແລະຕຶກຕ່າງໆພັງລົງມາພາຍໃນບໍ່ເທົ່າໃດນາທີ ໃຜກໍຮູ້ສຶກຕົກໃຈແລະຢ້ານ . . . ຫຼາຍຄົນບອກວ່າມັນສັ່ນສະເທືອນຢູ່ປະມານ 2 ນາທີ. ແຕ່ຂ້ອຍພັດຮູ້ສຶກວ່າມັນສັ່ນບັກດົນໆ.” ຖ້າເຈົ້າເຈິເຫດການທີ່ເປັນຕາຢ້ານແບບນີ້ ເຈົ້າຄືຊິບໍ່ລືມມັນງ່າຍໆ.
2 ເຮົາຈະໄດ້ເຫັນການສັ່ນອີກແບບໜຶ່ງ. ການສັ່ນແບບນີ້ບໍ່ໄດ້ມີຢູ່ພຽງເມືອງດຽວຫຼືປະເທດດຽວ ແຕ່ມັນສັ່ນຢູ່ໝົດທຸກຊາດ ແລະມັນສັ່ນແບບນີ້ມາຫຼາຍສິບປີແລ້ວ. ຜູ້ພະຍາກອນອາກເກໄດ້ບອກລ່ວງໜ້າກ່ຽວກັບການສັ່ນນີ້ວ່າ: “ພະເຢໂຫວາຜູ້ເປັນຈອມທັບເວົ້າວ່າ ‘ອີກບໍ່ດົນເຮົາຈະສັ່ນທ້ອງຟ້າແລະໂລກ ສັ່ນທະເລແລະແຜ່ນດິນອີກເທື່ອໜຶ່ງ.’”—ອເກ. 2:6, ລ.ມ.
3. ການສັ່ນທີ່ອາກເກເວົ້າເຖິງຕ່າງຈາກການສັ່ນແບບແຜ່ນດິນໄຫວແນວໃດ?
3 ການສັ່ນທີ່ອາກເກເວົ້າເຖິງບໍ່ແມ່ນການສັ່ນແບບແຜ່ນດິນໄຫວທີ່ເຮັດໃຫ້ເກີດຄວາມເສຍຫາຍເທົ່ານັ້ນ ແຕ່ເປັນການສັ່ນທີ່ເຮັດໃຫ້ເກີດຜົນທີ່ດີນຳ. ພະເຢໂຫວາບອກວ່າ: ‘ເຮົາຈະສັ່ນໝົດທຸກຊາດ ແລ້ວສິ່ງທີ່ມີຄ່າຈາກຊາດທັງໝົດນັ້ນຈະຫຼັ່ງໄຫຼເຂົ້າມາໃນວິຫານຫຼັງນີ້. ເຮົາຈະເຮັດໃຫ້ວິຫານຫຼັງນີ້ມີແຕ່ຄວາມສະຫງ່າງາມ.’ (ອເກ. 2:7, ລ.ມ.) ຄຳພະຍາກອນນີ້ມີຄວາມໝາຍແນວໃດສຳລັບຜູ້ທີ່ຢູ່ໃນສະໄໝອາກເກ? ແລະມີຄວາມໝາຍແນວໃດສຳລັບເຮົາໃນທຸກມື້ນີ້? ເຮົາຈະມາເບິ່ງຄຳຕອບເຫຼົ່ານີ້ ແລະເບິ່ງວ່າເຮົາຈະມີສ່ວນແນວໃດໃນການສັ່ນຊາດຕ່າງໆ.
ຂ່າວດີທີ່ໃຫ້ກຳລັງໃຈໃນສະໄໝອາກເກ
4. ເປັນຫຍັງພະເຢໂຫວາຈຶ່ງສົ່ງຜູ້ພະຍາກອນອາກເກໃຫ້ໄປຫາປະຊາຊົນຂອງເພິ່ນ?
4 ຜູ້ພະຍາກອນອາກເກໄດ້ຮັບວຽກມອບໝາຍທີ່ສຳຄັນຈາກພະເຢໂຫວາ. ຂໍໃຫ້ເຮົາຄິດເຖິງສິ່ງທີ່ເກີດຂຶ້ນກ່ອນໜ້ານັ້ນ. ອາກເກອາດຈະເປັນຜູ້ໜຶ່ງເອເຊດ. 3:8, 10) ແຕ່ບໍ່ດົນຫຼັງຈາກນັ້ນເຂົາເຈົ້າກໍຮູ້ສຶກທໍ້ໃຈ ແລະເຊົາສ້າງວິຫານຍ້ອນຖືກຕໍ່ຕ້ານ. (ເອເຊດ. 4:4; ອເກ. 1:1, 2) ດັ່ງນັ້ນ ໃນປີ 520 ກ່ອນ ຄ.ສ ພະເຢໂຫວາຈຶ່ງໄດ້ບອກອາກເກໄປກະຕຸ້ນແລະໃຫ້ກຳລັງໃຈເຂົາເຈົ້າເພື່ອຈະສ້າງວິຫານໃຫ້ສຳເລັດ. *—ເອເຊດ. 6:14, 15
ໃນກຸ່ມຄົນທີ່ກັບມາຈາກການເປັນຊະເລີຍຢູ່ບາບີໂລນໃນປີ 537 ກ່ອນ ຄ.ສ ເມື່ອມາຮອດເຢຣູຊາເລັມໄດ້ບໍ່ດົນ ເຂົາເຈົ້າກໍໄດ້ລົງມືສ້າງວິຫານ. (5. ເປັນຫຍັງຄຳເວົ້າຂອງອາກເກຈຶ່ງໃຫ້ກຳລັງໃຈປະຊາຊົນຂອງພະເຈົ້າ?
5 ຄຳເວົ້າຂອງອາກເກແມ່ນເພື່ອເຮັດໃຫ້ປະຊາຊົນເຊື່ອໃນພະເຢໂຫວາຫຼາຍຂຶ້ນ. ລາວໄດ້ເວົ້າກັບຄົນຢິວທີ່ທໍ້ໃຈຢ່າງກ້າຫານວ່າ: “ພະເຢໂຫວາບອກວ່າ ‘ປະຊາຊົນໃນແຜ່ນດິນນີ້ ຂໍໃຫ້ມີໃຈເຂັ້ມແຂງ ແລະລົງມືສ້າງຕໍ່ໄປເດີ້’ ພະເຢໂຫວາຜູ້ເປັນຈອມທັບບອກວ່າ ‘ເຮົາຢູ່ກັບພວກເຈົ້າ.’” (ອເກ. 2:4, ລ.ມ.) ຄຳວ່າ “ພະເຢໂຫວາຜູ້ເປັນຈອມທັບ” ຄືຊິໃຫ້ກຳລັງໃຈເຂົາເຈົ້າຫຼາຍເພາະນັ້ນສະແດງວ່າພະເຢໂຫວາມີອຳນາດຫຼາຍ ແລະສາມາດສັ່ງກອງທັບທູດສະຫວັນມາຊ່ວຍໄດ້. ດັ່ງນັ້ນ ຄົນຢິວຕ້ອງເພິ່ງພະເຢໂຫວາເພື່ອຈະສ້າງວິຫານໃຫ້ສຳເລັດໄດ້.
6. ການສັ່ນທີ່ອາກເກເວົ້າເຖິງຈະເຮັດໃຫ້ເກີດຜົນແນວໃດ?
6 ພະເຢໂຫວາໄດ້ສົ່ງອາກເກໃຫ້ໄປບອກຄົນຢິວວ່າເພິ່ນຈະສັ່ນຊາດຕ່າງໆ. ສິ່ງທີ່ອາກເກເວົ້າເຮັດໃຫ້ຄົນຢິວທີ່ທໍ້ໃຈເຊິ່ງກຳລັງສ້າງວິຫານໝັ້ນໃຈວ່າ ພະເຢໂຫວາຈະສັ່ນເປີເຊຍທີ່ເປັນມະຫາອຳນາດໂລກເຊິ່ງກືນກິນຊາດຕ່າງໆໃນສະໄໝນັ້ນ. ການສັ່ນຊາດຕ່າງໆເຮັດໃຫ້ເກີດຜົນແນວໃດ? (1) ເຮັດໃຫ້ປະຊາຊົນຂອງພະເຈົ້າສ້າງວິຫານໄດ້ສຳເລັດ. (2) ຄົນຕ່າງຊາດຈະມານະມັດສະການພະເຢໂຫວາຢູ່ວິຫານທີ່ສ້າງຂຶ້ນໃໝ່. ເລື່ອງນີ້ຕ້ອງເຮັດໃຫ້ປະຊາຊົນຂອງພະເຈົ້າໄດ້ຮັບກຳລັງໃຈຫຼາຍແທ້ໆ!—ຊກາ. 8:9
ວຽກທີ່ສັ່ນສະເທືອນໂລກໃນທຸກມື້ນີ້
ໃນທຸກມື້ນີ້ ເຈົ້າໄດ້ສັ່ນຊາດຕ່າງໆໂດຍເຮັດວຽກປະກາດສຸດຄວາມສາມາດບໍ? (ເບິ່ງຂໍ້ 7-8) *
7. ເຮົາຈະມີສ່ວນໃນການສັ່ນຊາດຕ່າງໆແນວໃດໃນທຸກມື້ນີ້? ຂໍໃຫ້ອະທິບາຍ.
7 ຄຳພະຍາກອນຂອງອາກເກມີຄວາມໝາຍສຳລັບເຮົາແນວໃດໃນທຸກມື້ນີ້? ພະເຢໂຫວາຈະສັ່ນຊາດຕ່າງໆອີກເທື່ອໜຶ່ງ ແລະເຮົາກໍມີສ່ວນໃນວຽກນີ້. ຂໍໃຫ້ຄິດເຖິງຫຼັກຖານຕໍ່ໄປນີ້: ພະເຢໂຫວາໄດ້ແຕ່ງຕັ້ງພະເຢຊູໃຫ້ເປັນກະສັດໃນການປົກຄອງຂອງເພິ່ນໃນປີ 1914. (ເພງ. 2:6) ນີ້ເປັນຂ່າວທີ່ບໍ່ດີສຳລັບຜູ້ນຳຂອງໂລກເພາະ “ເວລາຂອງຄົນຕ່າງຊາດ” ຈົບລົງແລ້ວ. ເວລາຂອງຄົນຕ່າງຊາດເປັນໄລຍະເວລາທີ່ພະເຢໂຫວາບໍ່ມີຜູ້ຕາງໜ້າເພິ່ນໃນການປົກຄອງ. (ລກ. 21:24) ດັ່ງນັ້ນ ຕັ້ງແຕ່ປີ 1919 ປະຊາຊົນຂອງພະເຈົ້າຈຶ່ງໄດ້ບອກຄົນອື່ນໃຫ້ຮູ້ວ່າ ມີພຽງການປົກຄອງຂອງພະເຈົ້າເທົ່ານັ້ນທີ່ເປັນຄວາມຫວັງດຽວສຳລັບມະນຸດ. ການປະກາດ “ຂ່າວດີເລື່ອງການປົກຄອງຂອງພະເຈົ້າ” ເປັນການສັ່ນສະເທືອນໄປທົ່ວໂລກ.—ມທ. 24:14
8. ຕາມຄຳເພງ 2:1-3 ຊາດຕ່າງໆຮູ້ສຶກແນວໃດຕໍ່ເລື່ອງທີ່ເຮົາປະກາດ?
8 ຫຼາຍຄົນຮູ້ສຶກແນວໃດຕໍ່ກັບເລື່ອງທີ່ເຮົາປະກາດ? ຫຼາຍຄົນຮູ້ສຶກບໍ່ມັກ. (ອ່ານຄຳເພງ 2:1-3) * ຊາດຕ່າງໆສັບສົນວຸ່ນວາຍ ເຂົາເຈົ້າບໍ່ຍອມຮັບຜູ້ປົກຄອງທີ່ພະເຢໂຫວາແຕ່ງຕັ້ງ. ເຂົາເຈົ້າບໍ່ໄດ້ຖືວ່າສິ່ງທີ່ເຮົາປະກາດເປັນ “ຂ່າວດີ” ແລະລັດຖະບານບາງປະເທດເຖິງຂັ້ນສັ່ງຫ້າມການປະກາດດ້ວຍຊ້ຳ! ເຖິງວ່າຜູ້ປົກຄອງ ຫຼາຍຄົນຈະອ້າງວ່າຮັບໃຊ້ພະເຈົ້າ ແຕ່ເຂົາເຈົ້າກໍບໍ່ຢາກເສຍອຳນາດຂອງຕົວເອງແລະຍອມຢູ່ໃຕ້ອຳນາດຂອງພະເຈົ້າ. ຄືກັບຜູ້ປົກຄອງໃນສະໄໝຂອງພະເຢຊູ ຜູ້ປົກຄອງໃນທຸກມື້ນີ້ກໍໄດ້ຕໍ່ຕ້ານຜູ້ຖືກເຈີມໂດຍການຂົ່ມເຫງຜູ້ຮັບໃຊ້ຂອງພະເຢໂຫວາ.—ກຈກ. 4:25-28
9. ພະເຢໂຫວາຈະເຮັດແນວໃດກັບຊາດຕ່າງໆທີ່ບໍ່ມັກເລື່ອງທີ່ເຮົາປະກາດ?
9 ພະເຢໂຫວາຈະເຮັດແນວໃດກັບຊາດຕ່າງໆທີ່ບໍ່ມັກເລື່ອງທີ່ເຮົາປະກາດ? ຄຳເພງ 2:10-12, ລ.ມ. ບອກວ່າ: “ດັ່ງນັ້ນ ກະສັດທັງຫຼາຍ ຂໍໃຫ້ມີຄວາມເຂົ້າໃຈທີ່ເລິກເຊິ່ງ. ພວກຜູ້ພິພາກສາໃນໂລກ ຂໍໃຫ້ຍອມຮັບການວ່າກ່າວແກ້ໄຂ. ຂໍໃຫ້ຮັບໃຊ້ພະເຢໂຫວາດ້ວຍຄວາມຢ້ານຢຳ ແລະຊົມຊື່ນຍິນດີດ້ວຍຄວາມຢຳເກງ. ໃຫ້ນັບຖືລູກຂອງພະເຈົ້າ ບໍ່ດັ່ງນັ້ນພະເຈົ້າຈະຄຽດແລ້ວພວກເຈົ້າຈະພິນາດ ເພາະພະອົງອາດຈະຄຽດຂຶ້ນມາທັນທີ. ແຕ່ຄົນທີ່ເຂົ້າມາເພິ່ງພະອົງຈະມີຄວາມສຸກ.” ຍ້ອນພະເຢໂຫວາໃຈດີ ເພິ່ນຈຶ່ງໃຫ້ໂອກາດພວກຜູ້ຕໍ່ຕ້ານໄດ້ປ່ຽນແປງຕົວເອງແລະຍອມຮັບການປົກຄອງຂອງເພິ່ນ. ແຕ່ເວລາເຫຼືອໜ້ອຍແລ້ວ ເພາະເຮົາກຳລັງຢູ່ “ໃນສະໄໝສຸດທ້າຍ” ຂອງລະບົບນີ້. (2 ຕມ. 3:1; ເອຊາ. 61:2) ນີ້ເປັນເວລາທີ່ຮີບດ່ວນທີ່ຫຼາຍຄົນຈະຕ້ອງຮຽນຮູ້ຄວາມຈິງແລະເລືອກຮັບໃຊ້ພະເຢໂຫວາ.
ຜົນດີທີ່ເກີດຈາກການສັ່ນ
10. ຕາມອາກເກ 2:7-9 ການສັ່ນເຮັດໃຫ້ເກີດຜົນດີແນວໃດ?
10 ການສັ່ນທີ່ອາກເກບອກລ່ວງໜ້າໄດ້ເກີດຜົນດີກັບບາງຄົນ. ລາວບອກວ່າການສັ່ນຈະເຮັດໃຫ້ ‘ສິ່ງທີ່ມີຄ່າ [ຄົນທີ່ມີຫົວໃຈທີ່ດີ] ຈາກຊາດທັງໝົດນັ້ນຫຼັ່ງໄຫຼເຂົ້າມາ’ ນະມັດສະການພະເຢໂຫວາ. * (ອ່ານອາກເກ 2:7-9) * ເອຊາຢາແລະມີເກກໍໄດ້ບອກລ່ວງໜ້າວ່າ ສິ່ງເຫຼົ່ານີ້ຈະເກີດຂຶ້ນ “ໃນສະໄໝສຸດທ້າຍ.”—ເອຊາ. 2:2-4; ມີເກ 4:1, 2, ລ.ມ.
11. ພີ່ນ້ອງຊາຍຄົນໜຶ່ງຮູ້ສຶກແນວໃດເມື່ອລາວໄດ້ຍິນເລື່ອງການປົກຄອງຂອງພະເຈົ້າເທື່ອທຳອິດ?
11 ໃຫ້ເຮົາມາເບິ່ງວ່າ ການສັ່ນມີຜົນແນວໃດຕໍ່ພີ່ນ້ອງເຄນທີ່ຮັບໃຊ້ຢູ່ສຳນັກງານໃຫຍ່. ລາວຍັງຈື່ຕອນທີ່ລາວໄດ້ຍິນຄວາມຈິງເລື່ອງການປົກຄອງຂອງພະເຈົ້າເທື່ອທຳອິດປະມານ 40 ປີທີ່ແລ້ວ. ລາວເລົ່າວ່າ: “ຕອນທີ່ຂ້ອຍໄດ້ຍິນຄວາມຈິງເທື່ອທຳອິດຈາກຄຳພີໄບເບິນ ຂ້ອຍຮູ້ສຶກດີໃຈຫຼາຍທີ່ໄດ້ຮູ້ວ່າເຮົາກຳລັງມີຊີວິດຢູ່ໃນສະໄໝສຸດທ້າຍຂອງລະບົບນີ້. ຂ້ອຍຮູ້ວ່າເພື່ອຈະເຮັດໃຫ້ພະເຈົ້າພໍໃຈແລະໄດ້ຮັບຊີວິດຕະຫຼອດໄປ ຂ້ອຍຕ້ອງເລືອກຢູ່ຝ່າຍພະເຢໂຫວາແລະບໍ່ເປັນສ່ວນໜຶ່ງຂອງໂລກນີ້ທີ່ເຊື່ອໃຈບໍ່ໄດ້. ດັ່ງນັ້ນ ຂ້ອຍຈຶ່ງໄດ້ອະທິດຖານແລະສະແດງໃຫ້ເຫັນວ່າຂ້ອຍບໍ່ໄດ້ເພິ່ງການປົກຄອງຂອງມະນຸດ ແຕ່ເຂົ້າມາເພິ່ງການປົກຄອງຂອງພະເຢໂຫວາທີ່ບໍ່ມີສິ່ງໃດຈະສັ່ນມັນໄດ້.”
12. ໃນສະໄໝສຸດທ້າຍນີ້ ວິຫານໂດຍໄນຂອງພະເຢໂຫວາເຕັມໄປດ້ວຍສິ່ງທີ່ມີຄ່າແນວໃດ?
12 ເຫັນໄດ້ແຈ້ງວ່າ ພະເຢໂຫວາໄດ້ອວຍພອນປະຊາຊົນຂອງເພິ່ນ. ໃນສະໄໝສຸດທ້າຍນີ້ ເຮົາເຫັນວ່າມີຜູ້ທີ່ນະມັດສະການພະເຢໂຫວາເພີ່ມຂຶ້ນ. ໃນປີ 1914 ມີພະຍານພະເຢໂຫວາພຽງບໍ່ເທົ່າໃດພັນຄົນ ແຕ່ຕອນນີ້ມີຫຼາຍກວ່າ 8 ລ້ານຄົນ ແລະມີຜູ້ເຂົ້າຮ່ວມການປະຊຸມອະນຸສອນໃນແຕ່ລະປີຫຼາຍລ້ານຄົນ. ນີ້ສະແດງວ່າ “ສິ່ງທີ່ມີຄ່າຈາກຊາດທັງໝົດ” ໄດ້ຫຼັ່ງໄຫຼເຂົ້າມາໃນລານວິຫານໂດຍໄນຂອງພະເຢໂຫວາ ເຊິ່ງວິຫານໂດຍໄນໝາຍເຖິງການຈັດກຽມເພື່ອນະມັດສະການພະເຢໂຫວາຢ່າງຖືກຕ້ອງ. ນອກຈາກນັ້ນ ຊື່ຂອງພະເຢໂຫວາຍັງຈະໄດ້ຮັບການຍົກຍ້ອງຍ້ອນຄົນທີ່ເຂົ້າມານະມັດສະການເພິ່ນໄດ້ປ່ຽນແປງຕົວເອງ.—ອຟຊ. 4:22-24
ພະຍານພະເຢໂຫວາທົ່ວໂລກປະກາດເລື່ອງການປົກຄອງຂອງພະເຈົ້າຢ່າງມີຄວາມສຸກ (ເບິ່ງຂໍ້ 13)
13. ມີຄຳພະຍາກອນຫຍັງອີກທີ່ສຳເລັດເປັນຈິງເລື່ອງການເພີ່ມຂຶ້ນຂອງພະຍານພະເຢໂຫວາ? (ເບິ່ງຮູບໜ້າປົກ)
13 ການເພີ່ມຂຶ້ນຂອງພະຍານພະເຢໂຫວາຍັງໄດ້ເຮັດໃຫ້ຄຳພະຍາກອນອື່ນໆສຳເລັດເປັນຈິງ ເຊັ່ນ ເອຊາອີ 60:22, ລ.ມ. ບອກວ່າ: “ຄົນຈຳນວນໜ້ອຍຈະເພີ່ມເປັນຈຳນວນພັນ ຄົນໂຕນ້ອຍຈະກາຍເປັນຊາດໃຫຍ່. ເຮົາເຢໂຫວາຈະຟ້າວໃຫ້ສິ່ງນີ້ເກີດຂຶ້ນໃນເວລາທີ່ເໝາະສົມ.” ຍ້ອນມີຫຼາຍຄົນເຂົ້າມານະມັດສະການພະເຢໂຫວາຈຶ່ງເຮັດໃຫ້ມີສິ່ງທີ່ດີເກີດຂຶ້ນ. “ສິ່ງທີ່ມີຄ່າ” ເຫຼົ່ານີ້ໝາຍເຖິງຜູ້ທີ່ມີຄວາມຮູ້ແລະຄວາມສາມາດເຊິ່ງເຕັມໃຈເຮັດວຽກປະກາດ “ຂ່າວດີເລື່ອງການປົກຄອງ ຂອງພະເຈົ້າ.” ດັ່ງນັ້ນ ເອຊາຢາຈຶ່ງປຽບຄວາມຮູ້ຄວາມສາມາດເຫຼົ່ານີ້ເປັນຄືກັບ “ນ້ຳນົມຂອງຊາດຕ່າງໆ” ທີ່ອົງການຂອງພະເຢໂຫວາໃຊ້. (ເອຊາ. 60:5, 16, ລ.ມ.) ຍ້ອນຄວາມຊ່ວຍເຫຼືອຈາກພີ່ນ້ອງທີ່ມີຄ່າເຫຼົ່ານີ້ ເຮົາຈຶ່ງມີປຶ້ມແລະສິ່ງພິມຕ່າງໆຫຼາຍກວ່າ 1.000 ພາສາ ແລະເຮັດວຽກປະກາດໃນ 240 ດິນແດນ.
ເຖິງເວລາທີ່ຕ້ອງຕັດສິນໃຈແລ້ວ
14. ຕອນນີ້ທຸກຄົນຕ້ອງຕັດສິນໃຈເລື່ອງຫຍັງ?
14 ໃນສະໄໝສຸດທ້າຍນີ້ ການສັ່ນຊາດຕ່າງໆຈະຊ່ວຍໃຫ້ຫຼາຍຄົນຕັດສິນໃຈໄດ້ວ່າ ເຂົາເຈົ້າຈະເລືອກຢູ່ຝ່າຍປົກຄອງພະເຈົ້າຫຼືຈະໄວ້ໃຈການປົກຄອງຂອງມະນຸດ. ການເລືອກນີ້ສຳຄັນຫຼາຍເຊິ່ງທຸກຄົນຕ້ອງໄດ້ຕັດສິນໃຈເອງ. ເຖິງວ່າປະຊາຊົນຂອງພະເຢໂຫວາເຊື່ອຟັງແລະປະຕິບັດຕາມກົດໝາຍຂອງລັດຖະບານໃນປະເທດທີ່ເຂົາເຈົ້າຢູ່ ແຕ່ເຂົາເຈົ້າກໍບໍ່ໄດ້ຫຍຸ້ງກ່ຽວໃນເລື່ອງການເມືອງຂອງໂລກນີ້. (ຣມ. 13:1-7) ເຂົາເຈົ້າຮູ້ວ່າມີພຽງການປົກຄອງຂອງພະເຈົ້າເທົ່ານັ້ນທີ່ຈະແກ້ໄຂບັນຫາທັງໝົດຂອງມະນຸດ ເຊິ່ງການປົກຄອງນີ້ບໍ່ໄດ້ເປັນສ່ວນໜຶ່ງຂອງໂລກ.—ຢຮ. 18:36, 37
15. ປຶ້ມພະນິມິດບອກວ່າປະຊາຊົນຂອງພະເຈົ້າຈະຖືກທົດສອບເລື່ອງຫຍັງ?
15 ປຶ້ມພະນິມິດບອກໃຫ້ຮູ້ວ່າ ໃນສະໄໝສຸດທ້າຍປະຊາຊົນຂອງພະເຈົ້າຈະຖືກທົດສອບເລື່ອງຄວາມພັກດີ. ການທົດສອບນີ້ຈະເຮັດໃຫ້ເຮົາຖືກຕໍ່ຕ້ານແລະຖືກຂົ່ມເຫງຢ່າງໜັກ. ລັດຖະບານຕ່າງໆຂອງໂລກນີ້ຈະບັງຄັບເຮົາໃຫ້ນະມັດສະການເຂົາເຈົ້າ ແລະເຂົາເຈົ້າຈະຂົ່ມເຫງຜູ້ທີ່ບໍ່ສະໜັບສະໜູນເຂົາເຈົ້າ. (ພນມ. 13:12, 15) ເຂົາເຈົ້າຈະ “ບັງຄັບທຸກຄົນ ທັງຄົນທຳມະດາແລະຄົນທີ່ມີອຳນາດ ຄົນຮັ່ງແລະຄົນທຸກ ຄົນທີ່ມີອິດສະຫຼະແລະຄົນທີ່ເປັນທາດ ໃຫ້ຮັບເຄື່ອງໝາຍຢູ່ມືເບື້ອງຂວາຫຼືຢູ່ໜ້າຜາກ.” (ພນມ. 13:16) ທາດໃນສະໄໝບູຮານຈະໄດ້ຮັບເຄື່ອງໝາຍເພື່ອຈະສະແດງວ່າໃຜເປັນເຈົ້າຂອງ. ຄ້າຍຄືກັນ ໃນທຸກມື້ນີ້ທຸກຄົນຈະຖືກກົດດັນໃຫ້ຮັບເຄື່ອງໝາຍໂດຍໄນຢູ່ທີ່ໜ້າຜາກແລະມື ເຊິ່ງໝາຍຄວາມວ່າເຂົາເຈົ້າສະໜັບສະໜູນການປົກຄອງຂອງມະນຸດທັງຄວາມຄິດແລະການກະທຳ.
16. ເປັນຫຍັງຈຶ່ງສຳຄັນທີ່ເຮົາຈະພັກດີຕໍ່ພະເຢໂຫວາຕັ້ງແຕ່ຕອນນີ້?
16 ເຮົາຈະຮັບເອົາເຄື່ອງໝາຍແລະຢູ່ຝ່າຍການປົກຄອງຂອງມະນຸດບໍ? ຜູ້ທີ່ບໍ່ຮັບເອົາເຄື່ອງໝາຍຈະເຈິສະພາບການທີ່ຫຍຸ້ງຍາກແລະອັນຕະລາຍ. ປຶ້ມພະນິມິດຍັງບອກຕໍ່ໄປວ່າ: “ບໍ່ໃຫ້ຜູ້ໃດຊື້ຫຼືຂາຍຫຍັງໄດ້ນອກຈາກວ່າລາວຈະມີເຄື່ອງໝາຍ.” (ພນມ. 13:17) ແຕ່ປະຊາຊົນຂອງພະເຈົ້າຮູ້ວ່າພະເຢໂຫວາຈະເຮັດແນວໃດກັບຜູ້ທີ່ຮັບເຄື່ອງໝາຍນັ້ນຄືກັບທີ່ຂຽນໄວ້ໃນພະນິມິດ 14:9, 10. ແທນທີ່ຈະຮັບເອົາເຄື່ອງໝາຍນັ້ນ ເຂົາເຈົ້າໄດ້ຂຽນໃສ່ມືເປັນໄນວ່າ ‘ຂ້ອຍເປັນຂອງພະເຢໂຫວາ.’ (ເອຊາ. 44:5) ນີ້ເປັນເວລາທີ່ເຮົາຕ້ອງເຮັດໃຫ້ໝັ້ນໃຈວ່າເຮົາພັກດີຕໍ່ພະເຢໂຫວາແທ້ໆ! ຖ້າເຮົາເຮັດແບບນັ້ນ ພະເຢໂຫວາກໍຈະດີໃຈແລະບອກວ່າເຮົາເປັນຄົນຂອງເພິ່ນ.
ການສັ່ນຄັ້ງສຸດທ້າຍ
17. ເຮົາຕ້ອງຈື່ຫຍັງໄວ້ໃນເລື່ອງຄວາມອົດທົນຂອງພະເຢໂຫວາ?
17 ພະເຢໂຫວາສະແດງຄວາມອົດທົນຫຼາຍແທ້ໆໃນສະໄໝສຸດທ້າຍນີ້ ເພາະເພິ່ນບໍ່ຢາກໃຫ້ໃຜຖືກທຳລາຍ. (2 ປຕ. 3:9) ເພິ່ນໃຫ້ໂອກາດທຸກຄົນໄດ້ກັບໃຈແລະເລືອກທີ່ຈະຮັບໃຊ້ເພິ່ນ. ແຕ່ຄວາມອົດທົນຂອງເພິ່ນກໍມີຂີດຈຳກັດ. ຜູ້ທີ່ບໍ່ຍອມຮັບການປົກຄອງຂອງພະເຈົ້າຈະເປັນຄືກັບຟາໂຣໃນສະໄໝໂມເຊ. ພະເຢໂຫວາເວົ້າກັບຟາໂຣວ່າ: “ຕອນນີ້ ເຮົາຈະລົງມືຈັດການເຈົ້າແລະປະຊາຊົນຂອງເຈົ້າໂດຍເຮັດໃຫ້ເກີດໂລກລະບາດຮ້າຍແຮງ ເພື່ອໃຫ້ເຈົ້າຫາຍໄປຈາກໂລກນີ້ເລີຍກໍໄດ້. ແຕ່ທີ່ເຮົາປ່ອຍໃຫ້ເຈົ້າມີຊີວິດຢູ່ແບບນີ້ ກໍເພື່ອຈະສະແດງລິດອຳນາດຂອງເຮົາໃຫ້ເຈົ້າເຫັນ ແລະເພື່ອຊື່ຂອງເຮົາ ຈະເລື່ອງລືໄປທົ່ວໂລກ.” (ອົບ. 9:15, 16, ລ.ມ.) ໃນທີ່ສຸດທຸກຊາດຈະໄດ້ຮູ້ວ່າພະເຢໂຫວາເປັນພະເຈົ້າທ່ຽງແທ້ອົງດຽວ. (ເອເຊກ. 38:23) ແຕ່ເລື່ອງນີ້ຈະເກີດຂຶ້ນໄດ້ແນວໃດ?
18. (ກ) ອາກເກ 2:6, 20-22 ເວົ້າເຖິງການສັ່ນແບບໃດ? (ຂ) ເຮົາຮູ້ໄດ້ແນວໃດວ່າຄຳເວົ້າຂອງອາກເກຈະສຳເລັດເປັນຈິງໃນອະນາຄົດ?
18 ຫຼາຍຮ້ອຍປີຫຼັງຈາກທີ່ອາກເກຕາຍແລ້ວ ໂປໂລບອກວ່າ ຄຳເວົ້າຂອງອາກເກທີ່ຢູ່ໃນອາກເກ 2:6, 20-22 (ອ່ານ) ຈະສຳເລັດເປັນຈິງໃນອະນາຄົດ. ໂປໂລບອກວ່າ: “ຕອນນີ້ພະອົງສັນຍາວ່າ: ‘ເຮົາຈະສັ່ນທັງໂລກແລະທ້ອງຟ້າອີກເທື່ອໜຶ່ງ.’ ຄຳເວົ້າທີ່ວ່າ ‘ອີກເທື່ອໜຶ່ງ’ ສະແດງວ່າພະເຈົ້າຈະກຳຈັດສິ່ງທີ່ຖືກສັ່ນໃຫ້ໝົດໄປ ນັ້ນຄືສິ່ງທີ່ພະອົງບໍ່ໄດ້ສ້າງ ເພື່ອໃຫ້ສິ່ງທີ່ບໍ່ຖືກສັ່ນຍັງເຫຼືອຢູ່.” (ຮຣ. 12:26, 27) ການສັ່ນນີ້ຕ່າງຈາກການສັ່ນທີ່ເວົ້າເຖິງຢູ່ໃນອາກເກ 2:7 ເພາະການສັ່ນນີ້ໝາຍເຖິງການທຳລາຍຜູ້ທີ່ບໍ່ຍອມຮັບສິດໃນການປົກຄອງຂອງພະເຢໂຫວາຄືກັບຟາໂຣ.
19. ສິ່ງໃດຈະບໍ່ຖືກສັ່ນ ແລະເຮົາຮູ້ເລື່ອງນີ້ໄດ້ແນວໃດ?
19 ສິ່ງໃດຈະບໍ່ຖືກສັ່ນຫຼືຖືກທຳລາຍ? ໂປໂລອະທິບາຍຕໍ່ໄປວ່າ: “ເມື່ອເຫັນວ່າພວກເຮົາຈະໄດ້ຢູ່ໃນການປົກຄອງທີ່ບໍ່ມີສິ່ງໃດຈະສັ່ນມັນໄດ້ ຂໍໃຫ້ພວກເຮົາຮັບປະໂຫຍດຈາກຄວາມກະລຸນາທີ່ຍິ່ງໃຫຍ່ຕໍ່ໄປ. ຄວາມກະລຸນານີ້ເຮັດໃຫ້ພວກເຮົາເຮັດວຽກຮັບໃຊ້ທີ່ສັກສິດໃຫ້ແກ່ພະເຈົ້າດ້ວຍເຄົາລົບຢຳເກງແບບທີ່ພະອົງຍອມຮັບໄດ້.” (ຮຣ. 12:28) ຫຼັງຈາກການສັ່ນຄັ້ງສຸດທ້າຍຈົບລົງ ການປົກຄອງນີ້ຈະຄົງຢູ່ຕະຫຼອດໄປ!—ເພງ. 110:5, 6; ດາ. 2:44
20. ທຸກຄົນຕ້ອງໄດ້ຕັດສິນໃຈເລື່ອງຫຍັງ ແລະເຮົາຈະຊ່ວຍເຂົາເຈົ້າໄດ້ແນວໃດ?
20 ຕອນນີ້ເປັນເວລາທີ່ທຸກຄົນຕ້ອງເລືອກວ່າ ເຂົາເຈົ້າຈະເລືອກສະໜັບສະໜູນການປົກຄອງຂອງໂລກນີ້ເຊິ່ງຈະຖືກທຳລາຍຫຼືເລືອກສະໜັບສະໜູນການປົກຄອງຂອງພະເຈົ້າເຊິ່ງຈະນຳໄປສູ່ຊີວິດຕະຫຼອດໄປ. (ຮຣ. 12:25) ເມື່ອເຮົາປະກາດ ເຮົາກໍຈະຊ່ວຍຄົນອື່ນໃຫ້ຕັດສິນໃຈເລື່ອງທີ່ສຳຄັນນີ້. ຂໍໃຫ້ເຮົາຊ່ວຍຫຼາຍຄົນໃຫ້ມາຢູ່ຝ່າຍການປົກຄອງຂອງພະເຈົ້າຕໍ່ໆໄປ. ແລະຂໍໃຫ້ເຮົາຈື່ຄຳເວົ້າຂອງພະເຢຊູສະເໝີທີ່ບອກວ່າ: “ຈະມີການປະກາດຂ່າວດີເລື່ອງການປົກຄອງຂອງພະເຈົ້າໄປທົ່ວໂລກເພື່ອໃຫ້ຄົນທຸກຊາດມີໂອກາດໄດ້ຍິນ ແລ້ວຈຸດຈົບກໍຈະມາເຖິງ.”—ມທ. 24:14
ເພງ 40 ເຮົາເປັນຄົນຂອງໃຜ?
^ ຂໍ້ 5 ບົດນີ້ຈະປັບປ່ຽນຄວາມເຂົ້າໃຈຂອງຄຳພະຍາກອນທີ່ຢູ່ໃນອາກເກ 2:7. ເຮົາຈະມາເບິ່ງວິທີທີ່ເຮົາຈະມີສ່ວນໃນວຽກທີ່ໜ້າຕື່ນເຕັ້ນເຊິ່ງສັ່ນສະເທືອນຊາດຕ່າງໆ ແລະເຮົາຈະເຫັນວ່າວຽກນີ້ມີຜົນດີຕໍ່ບາງຄົນແນວໃດ ແລະບາງຄົນຮູ້ສຶກແນວໃດຕໍ່ວຽກນີ້.
^ ຂໍ້ 4 ເຮົາຮູ້ວ່າອາກເກເຮັດວຽກທີ່ພະເຢໂຫວາມອບໝາຍໃຫ້ສຳເລັດຍ້ອນວ່າວິຫານສ້າງແລ້ວໃນປີ 515 ກ່ອນ ຄ.ສ.
^ ຂໍ້ 8 ຄຳເພງ 2:1-3 (ລ.ມ.): “ເປັນຫຍັງຊາດຕ່າງໆຈຶ່ງສົນລະວົນວຸ່ນວາຍກັນແທ້? ເປັນຫຍັງຜູ້ຄົນຈຶ່ງຈົ່ມເລື່ອງທີ່ບໍ່ເປັນປະໂຫຍດ? ພວກກະສັດໃນໂລກຕັ້ງຕົວເປັນສັດຕູ ແລະພວກຂຸນນາງລວມຫົວກັນຕໍ່ຕ້ານພະເຢໂຫວາແລະຜູ້ຖືກເຈີມຂອງພະອົງ. ພວກເຂົາເວົ້າວ່າ ‘ໃຫ້ພວກເຮົາຫັກໂສ້ທີ່ພວກເຂົາລ່າມພວກເຮົາໄວ້ແລະດຶງເຊືອກທີ່ພວກເຂົາມັດພວກເຮົາຖິ້ມໄປ!’”
^ ຂໍ້ 10 ນີ້ເປັນການປັບປ່ຽນຄວາມເຂົ້າໃຈ ເພາະແຕ່ກີ້ເຮົາເຂົ້າໃຈວ່າຜູ້ທີ່ຈິງໃຈທີ່ເຂົ້າມາຫາພະເຢໂຫວາບໍ່ແມ່ນຍ້ອນການສັ່ນຊາດຕ່າງໆ. ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການ 15 ພຶດສະພາ 2006 (ພາສາໄທ).
^ ຂໍ້ 10 ອາກເກ 2:7-9 (ລ.ມ.): “ພະເຢໂຫວາຜູ້ເປັນຈອມທັບເວົ້າວ່າ: ‘ເຮົາຈະສັ່ນໝົດທຸກຊາດ ແລ້ວສິ່ງທີ່ມີຄ່າຈາກຊາດທັງໝົດນັ້ນຈະຫຼັ່ງໄຫຼເຂົ້າມາໃນວິຫານຫຼັງນີ້ ເຮົາຈະເຮັດໃຫ້ວິຫານຫຼັງນີ້ມີແຕ່ຄວາມສະຫງ່າງາມ.’ ພະເຢໂຫວາຜູ້ເປັນຈອມທັບເວົ້າວ່າ: ‘ເງິນເປັນຂອງເຮົາ ຄຳກໍເປັນຂອງເຮົາ.’ ພະເຢໂຫວາຜູ້ເປັນຈອມທັບເວົ້າວ່າ: ‘ວິຫານຫຼັງນີ້ຈະມີຄວາມສະຫງ່າງາມຍິ່ງກວ່າວິຫານຫຼັງກ່ອນ’ ພະເຢໂຫວາຜູ້ເປັນຈອມທັບເວົ້າວ່າ: ‘ແລະເຮົາຈະໃຫ້ມີຄວາມສະຫງົບສຸກໃນສະຖານທີ່ນີ້.’”
^ ຂໍ້ 65 ຄຳອະທິບາຍຮູບພາບ: ອາກເກໃຫ້ກຳລັງໃຈປະຊາຊົນທີ່ຈະສ້າງວິຫານຕໍ່ໄປໃຫ້ສຳເລັດ. ປະຊາຊົນຂອງພະເຈົ້າໃນສະໄໝນີ້ກໍປະກາດເລື່ອງຂອງພະເຈົ້າຢ່າງກ້າຫານ. ພີ່ນ້ອງຜົວເມຍຄູ່ນີ້ກຳລັງປະກາດເລື່ອງການສັ່ນຊາດຕ່າງໆຄັ້ງສຸດທ້າຍ.