ຄຳຖາມຈາກຜູ້ອ່ານ
ພະຍານພະເຢໂຫວາຄວນຊອກຄູ່ໂດຍທາງເວັບໄຊຊອກຫາຄູ່ບໍ?
ພະເຢໂຫວາຢາກໃຫ້ຄົນທີ່ແຕ່ງດອງຢູ່ນຳກັນຢ່າງມີຄວາມສຸກຕະຫຼອດໄປ. (ມທ. 19:4-6) ຖ້າເຈົ້າຢາກແຕ່ງດອງ ເຈົ້າຈະຊອກຫາຄູ່ທີ່ດີໄດ້ແນວໃດ? ຍ້ອນພະເຢໂຫວາເປັນຜູ້ສ້າງເຮົາ ເພິ່ນຈຶ່ງຮູ້ດີວ່າເຮົາຕ້ອງເຮັດແນວໃດເພື່ອຈະມີຊີວິດຄູ່ທີ່ມີຄວາມສຸກ. ດັ່ງນັ້ນ ຖ້າເຮົາເຮັດຕາມຄຳແນະນຳຂອງເພິ່ນ ເຮົາກໍຈະມີຄວາມສຸກແທ້. ຂໍໃຫ້ເຮົາມາເບິ່ງຄຳແນະນຳບາງຢ່າງ.
ທຳອິດ ເຮົາຕ້ອງເຂົ້າໃຈຈຸດພິເສດຂອງຕົວເອງກ່ອນວ່າ: ‘ຫົວໃຈເຮົາທໍລະຍົດຍິ່ງກວ່າສິ່ງໃດທັງໝົດແລະກະຕຸ້ນໃຫ້ຄົນເຮົາເຮັດຊົ່ວໄດ້ທຸກຢ່າງ.’ (ຢເຣ. 17:9, ລ.ມ.) ເມື່ອຄົນທີ່ຢາກແຕ່ງດອງຄົບຫາກັນ ຄວາມຮູ້ສຶກທີ່ມີຕໍ່ກັນອາດຫຼາຍຂຶ້ນເລື້ອຍໆແລະເຮັດໃຫ້ຍາກທີ່ຈະຕັດສິນໃຈໄດ້ຢ່າງສະຫຼາດ. ເມື່ອຄົນນັ້ນຕັດສິນໃຈແຕ່ງດອງຕາມອາລົມຄວາມຮູ້ສຶກ ກໍອາດຈະເຮັດໃຫ້ຜິດຫວັງໃນພາຍຫຼັງໄດ້. (ສຸພາ. 28:26) ດັ່ງນັ້ນ ເປັນເລື່ອງທີ່ບໍ່ສຸຂຸມປານໃດທີ່ທັງສອງຄົນຈະສະແດງຄວາມຮັກໄຄ່ ຫຼືໃຫ້ຄຳໝັ້ນສັນຍາຕໍ່ກັນທັງໆທີ່ຍັງບໍ່ຮູ້ຈັກກັນດີ.
ສຸພາສິດ 22:3, ລ.ມ. ບອກວ່າ: “ຄົນສະຫຼາດເຫັນອັນຕະລາຍແລ້ວໜີໄປລີ້ຕົວ ແຕ່ຄົນທີ່ຂາດປະສົບການຍ່າງໄປຕໍ່ແລະໄດ້ຮັບຜົນເສຍຫາຍ.” ການໃຊ້ເວັບໄຊຊອກຫາຄູ່ເປັນອັນຕະລາຍແນວໃດ? ບາງຄົນທີ່ຄົບກັບຄົນທີ່ບໍ່ຮູ້ຈັກທາງອອນລາຍອາດຖືກຫຼອກແລະເຮັດໃຫ້ເຈັບປວດໃຈ. ສ່ວນຄົນທີ່ບໍ່ດີກໍສ້າງບັນຊີປອມທາງສັງຄົມອອນລາຍເພື່ອຫຼອກເອົາເງິນຄົນອື່ນ ແລະບາງເທື່ອຄົນເຫຼົ່ານີ້ກໍອ້າງວ່າຕົວເອງເປັນພະຍານພະເຢໂຫວາ.
ອັນຕະລາຍອີກຢ່າງໜຶ່ງກໍຄື ບາງເວັບໄຊຊອກຫາຄູ່ໄດ້ໃຊ້ສູດຄິດໄລ່ເລກເພື່ອຈະຈັດຄູ່ໃຫ້ຄົນທີ່ເຂົ້າມາໃນເວັບໄຊ. ແຕ່ວິທີນີ້ກໍບໍ່ໄດ້ມີການພິສູດວ່າມັນດີແທ້ໆ. ຍ້ອນການແຕ່ງດອງເປັນເລື່ອງທີ່ສຳຄັນ ດັ່ງນັ້ນ ຈຶ່ງບໍ່ສະຫຼາດເລີຍທີ່ຈະໃຊ້ໂປຣແກຣມຄອມພິວເຕີທີ່ມະນຸດສ້າງຂຶ້ນເພື່ອຊອກຫາຄູ່. ໂປຣແກຣມຄອມພິວເຕີຈະໜ້າເຊື່ອຖືຫຼາຍກວ່າຫຼັກການໃນຄຳພີໄບເບິນບໍ?—ສຸພາ. 1:7; 3:5-7
ສຸພາສິດ 14:15, ລ.ມ. ບອກວ່າ: “ຄົນຂາດປະສົບການເຊື່ອຄຳເວົ້າທຸກຄຳ ແຕ່ຄົນສະຫຼາດຄິດກ່ອນເຮັດສະເໝີ.” ກ່ອນທີ່ເຈົ້າຈະແຕ່ງດອງກັບຜູ້ໃດຜູ້ໜຶ່ງ ເຈົ້າຕ້ອງຮູ້ຈັກຄົນນັ້ນຢ່າງດີກ່ອນ. ຖ້າພົບກັນແຕ່ທາງອອນລາຍ ມັນກໍຍາກທີ່ຈະຮູ້ຈັກກັນແທ້ໆ. ແລະເຖິງວ່າເຈົ້າຈະຮູ້ຈັກຂໍ້ມູນສ່ວນຕົວຂອງຜູ້ນັ້ນແລະໃຊ້ເວລາລົມກັບລາວຫຼາຍເທື່ອກໍຕາມ ແຕ່ນີ້ໝາຍຄວາມວ່າເຈົ້າຮູ້ຈັກຄົນນັ້ນແທ້ໆບໍ? ບາງຄົນທີ່ຄົບກັນທາງອອນລາຍຮູ້ສຶກຕົກໃຈເມື່ອມາເຫັນກັນແທ້ໆ.
ຜູ້ຂຽນຄຳເພງເວົ້າວ່າ: “ຂ້ອຍບໍ່ຄົບຫາກັບຄົນຫຼອກລວງ ແລະບໍ່ຫຍຸ້ງກ່ຽວກັບຄົນປິດບັງຕົວຕົນທີ່ແທ້ຈິງ.” (ເພງ. 26:4, ລ.ມ.) ຫຼາຍຄົນຄິດວ່າເປັນເລື່ອງທຳມະດາທີ່ຈະໃຊ້ຂໍ້ມູນສ່ວນຕົວທີ່ບໍ່ຈິງເພື່ອຊອກຫາຄູ່ທາງອອນລາຍ. ຖ້າມີບາງຄົນບອກວ່າລາວເປັນພະຍານພະເຢໂຫວາ ແຕ່ລາວເປັນຄລິດສະຕຽນທີ່ຮັບບັບເຕມາແລ້ວແທ້ໆບໍ? ລາວເປັນຄລິດສະຕຽນທີ່ມີຄວາມເຊື່ອເຂັ້ມແຂງບໍ? ລາວມີສາຍສຳພັນທີ່ໃກ້ຊິດກັບພະເຢໂຫວາບໍ? ລາວມີຊື່ສຽງທີ່ດີໃນປະຊາຄົມບໍ? ຫຼືລາວອາດມີຊື່ສຽງທີ່ບໍ່ດີແລະ “ຄົບຫາກັບຄົນທີ່ບໍ່ດີ” ບໍ? (1 ກຣ. 15:33; 2 ຕມ. 2:20, 21) ລາວມີສິດທີ່ຈະແຕ່ງດອງຕາມຫຼັກການໃນຄຳພີໄບເບິນບໍ? ເພື່ອເຈົ້າຈະຮູ້ຄຳຕອບເຫຼົ່ານີ້ ເຈົ້າກໍຕ້ອງໄດ້ຖາມພີ່ນ້ອງທີ່ຮູ້ຈັກລາວດີ. (ສຸພາ. 15:22) ຜູ້ຮັບໃຊ້ທີ່ສັດຊື່ຂອງພະເຢໂຫວາບໍ່ຄິດທີ່ຈະແຕ່ງດອງກັບຄົນທີ່ບໍ່ມີຄວາມເຊື່ອ ແລະບໍ່ “ເຂົ້າທຽມແອກ” ກັບຄົນແບບນັ້ນ.—2 ກຣ. 6:14; 1 ກຣ. 7:39
ຕາມທີ່ເຮົາໄດ້ເວົ້າມາແລ້ວວ່າການຊອກຫາຄູ່ທາງເວັບໄຊບໍ່ຄ່ອຍປອດໄພປານໃດ. ແຕ່ມີວິທີທີ່ດີກວ່ານີ້ທີ່ເຮົາຈະສາມາດຮູ້ຈັກບາງຄົນທີ່ອາດຈະມາເປັນຄູ່ຂອງເຮົາໄດ້. ແລ້ວເຮົາຈະຮູ້ຈັກເຂົາເຈົ້າໄດ້ແນວໃດ? ເຮົາສາມາດພົບກັບເຂົາເຈົ້າໄດ້ເມື່ອເຮົາໄປເຂົ້າຮ່ວມການປະຊຸມປະຊາຄົມ ການປະຊຸມໝວດ ການປະຊຸມພາກ ແລະການປະຊຸມອື່ນໆ.
ເມື່ອເຮົາໃຊ້ເວລານຳກັນ ເຮົາກໍຈະເຫັນວ່າເປົ້າໝາຍຂອງເຮົາກັບລາວຄືກັນຫຼືບໍ່ແລະເຂົ້າກັນໄດ້ບໍ
ເນື່ອງຈາກພະຍາດໂຄວິດ-19 ລະບາດ ເຮົາຈຶ່ງປະຊຸມຮ່ວມກັນທາງອອນລາຍ ແລະມີໂອກາດທີ່ຈະຮູ້ຈັກກັບພີ່ນ້ອງຫຼາຍຄົນທີ່ເປັນຄົນໂສດ. ເຮົາຈະໄດ້ເຫັນວ່າຄວາມເຊື່ອຂອງເຂົາເຈົ້າເປັນແນວໃດເມື່ອເຂົາເຈົ້າບັນລະຍາຍຫຼືອອກຄຳຄິດເຫັນ. (1 ຕມ. 6:11, 12) ນອກຈາກນັ້ນ ເຮົາຍັງຈະໄດ້ຮູ້ຈັກກັບເຂົາເຈົ້າຫຼາຍຂຶ້ນຕອນທີ່ແບ່ງອອກເປັນກຸ່ມນ້ອຍຫຼັງເລີກປະຊຸມ. ນອກຈາກການປະຊຸມແລ້ວ ການຄົບຫາກັບພີ່ນ້ອງທາງອອນລາຍໃນໂອກາດອື່ນກໍຈະເຮັດໃຫ້ເຮົາຮູ້ວ່າເຂົາເຈົ້າເຮັດແນວໃດກັບຄົນອື່ນ ແລະຈະເຮັດໃຫ້ເຮົາເຂົ້າໃຈວ່າເຂົາເຈົ້າເປັນຄົນແບບໃດແທ້ໆ. (1 ປຕ. 3:4) ເມື່ອເຮົາຮູ້ຈັກກັບເຂົາເຈົ້າຫຼາຍຂຶ້ນ ເຮົາກໍຈະເຫັນວ່າເຮົາກັບເຂົາເຈົ້າມີເປົ້າໝາຍຄືກັນຫຼືບໍ່ແລະຈະເຂົ້າກັນໄດ້ບໍ.
ເມື່ອພີ່ນ້ອງໂສດເຮັດຕາມຫຼັກການໃນຄຳພີໄບເບິນໃນການຊອກຫາຄູ່ ເຂົາເຈົ້າອາດຈະມີຊີວິດທີ່ມີຄວາມສຸກຫຼາຍກວ່າ. ຄືກັບທີ່ສຸພາສິດບອກວ່າ: “ຄົນທີ່ໄດ້ເມຍ [ຫຼືຜົວ] ດີກໍໄດ້ຂອງດີ ແລະລາວໄດ້ຮັບຄວາມໂປດປານຈາກພະເຢໂຫວາ.”—ສຸພາ. 18:22, ລ.ມ.
