ບົດຄວາມສຶກສາທີ 31
ເຫັນຄ່າສິດທິພິເສດໃນການອະທິດຖານ
“ຂໍໃຫ້ຄຳອະທິດຖານຂອງຂ້ອຍເປັນຄືກັບເຄື່ອງຫອມທີ່ກຽມໄວ້ໃຫ້ພະອົງ.”—ເພງ. 141:2, ລ.ມ.
ເພງ 47 ອະທິດຖານຕໍ່ພະເຢໂຫວາທຸກວັນ
ໃຈຄວາມສຳຄັນ a
1. ເຮົາຄວນຮູ້ສຶກແນວໃດທີ່ພະເຢໂຫວາໃຫ້ເຮົາອະທິດຖານເຖິງເພິ່ນ?
ເຮົາມີສິດທິພິເສດຫຼາຍແທ້ໆທີ່ສາມາດອະທິດຖານເຖິງພະເຢໂຫວາຜູ້ທີ່ສ້າງຟ້າສະຫວັນແລະໂລກ. ລອງຄິດເບິ່ງ ເຮົາສາມາດອະທິດຖານລະບາຍຄວາມຮູ້ສຶກກັບພະເຢໂຫວາບໍ່ວ່າຈະເປັນພາສາໃດແລະເວລາໃດກໍໄດ້ໂດຍທີ່ບໍ່ຕ້ອງນັດໄວ້ກ່ອນ. ເຖິງວ່າເຮົາຈະເຈັບປ່ວຍເຂົ້າໂຮງໝໍຫຼືຢູ່ໃນຄຸກ ແຕ່ເຮົາກໍສາມາດອະທິດຖານເຖິງພະເຢໂຫວາໄດ້ ແລະໝັ້ນໃຈວ່າເພິ່ນຈະຟັງເຮົາ. ເຮົາຂອບໃຈພະເຢໂຫວາຫຼາຍແທ້ໆທີ່ໃຫ້ສິດທິພິເສດນີ້ກັບເຮົາ.
2. ກະສັດດາວິດສະແດງໃຫ້ເຫັນແນວໃດວ່າລາວເຫັນຄ່າການອະທິດຖານ?
2 ກະສັດດາວິດຖືວ່າການອະທິດຖານມີຄ່າຫຼາຍແທ້ໆ. ລາວຮ້ອງເພງວ່າ: “ຂໍໃຫ້ຄຳອະທິດຖານຂອງຂ້ອຍເປັນຄືກັບເຄື່ອງຫອມທີ່ກຽມໄວ້ໃຫ້ພະອົງ.” (ເພງ. 141:1, 2, ລ.ມ.) ໃນສະໄໝຂອງດາວິດ ປະໂລຫິດຈະກຽມເຄື່ອງຫອມຢ່າງດີທີ່ສຸດເພື່ອຖວາຍໃຫ້ພະເຢໂຫວາ. (ອພຍ. 30:34, 35) ດັ່ງນັ້ນ ເມື່ອດາວິດເວົ້າເຖິງເຄື່ອງຫອມທີ່ກຽມຢ່າງດີກໍສະແດງວ່າລາວຢາກກຽມຄຳເວົ້າດີໆກ່ອນຈະອະທິດຖານເຖິງພະເຢໂຫວາ. ເຮົາກໍຄືກັນ ເຮົາຢາກກຽມຄຳອະທິດຖານຂອງເຮົາຢ່າງດີເພື່ອຈະເຮັດໃຫ້ພະເຢໂຫວາພໍໃຈ.
3. ເມື່ອເຮົາອະທິດຖານເຖິງພະເຢໂຫວາ ເຮົາຄວນອະທິດຖານດ້ວຍຄວາມຮູ້ສຶກແບບໃດແລະຍ້ອນຫຍັງ?
3 ເມື່ອເຮົາອະທິດຖານເຖິງພະເຢໂຫວາ ເຮົາບໍ່ຄວນເວົ້າແບບເປັນກັນເອງຫຼາຍເກີນໄປ ແຕ່ເຮົາຄວນອະທິດຖານເຖິງເພິ່ນດ້ວຍຄວາມນັບຖື. ຂໍໃຫ້ເຮົາຄິດເຖິງນິມິດທີ່ໜ້າງຶດງໍ້ທີ່ເອຊາຢາ ເອເຊກຽນ ດານີເອນແລະໂຢຮັນເຫັນ. ເຖິງວ່າເຂົາເຈົ້າຈະເຫັນນິມິດທີ່ຕ່າງກັນ ແຕ່ເຂົາເຈົ້າກໍເວົ້າເຖິງພະເຢໂຫວາແບບດຽວກັນວ່າ ເພິ່ນເປັນກະສັດອົງຍິ່ງໃຫຍ່ທີ່ມີສະຫງ່າລາສີ. ເອຊາຢາ “ເຫັນນິມິດທີ່ພະເຢໂຫວານັ່ງຢູ່ເທິງບັນລັງທີ່ສູງເດັ່ນ.” (ເອຊາ. 6:1-3, ລ.ມ.) ເອເຊກຽນເຫັນພະເຢໂຫວານັ່ງຢູ່ລົດກະສັດທີ່ອ້ອມຮອບໄປດ້ວຍ “ແສງສະຫວ່າງທີ່ເຈີດຈ້າ . . . ຄືກັບຮຸ້ງ.” (ເອເຊກ. 1:26-28, ລ.ມ.) ດານີເອນເຫັນ “ຜູ້ມີຊີວິດຢູ່ຕັ້ງແຕ່ດຶກດຳບັນ” ນຸ່ງເຄື່ອງສີຂາວແລະມີແປວໄຟອອກມາຈາກບັນລັງຂອງເພິ່ນ. (ດາ. 7:9, 10, ລ.ມ.) ແລະໂຢຮັນເຫັນພະເຢໂຫວານັ່ງຢູ່ເທິງບັນລັງທີ່ອ້ອມຮອບດ້ວຍຮຸ້ງທີ່ເປັນຄືກັບມໍລະກົດ. (ພນມ. 4:2-4) ເມື່ອເຮົາຄິດເຖິງຄວາມຍິ່ງໃຫຍ່ແລະສະຫງ່າລາສີຂອງພະເຢໂຫວາ ເຮົາກໍຮູ້ສຶກວ່າເປັນສິດທິພິເສດຫຼາຍແທ້ໆທີ່ເຮົາສາມາດອະທິດຖານເຖິງເພິ່ນແລະເຮົາຄວນເວົ້າກັບເພິ່ນດ້ວຍຄວາມນັບຖື. ແລ້ວເຮົາຄວນອະທິດຖານເລື່ອງຫຍັງແດ່?
“ພວກເຈົ້າຄວນອະທິດຖານແບບນີ້”
4. ເຮົາໄດ້ບົດຮຽນຫຍັງຈາກເລື່ອງທຳອິດທີ່ພະເຢຊູເວົ້າໃນຄຳອະທິດຖານທີ່ຢູ່ໃນມັດທາຍ 6:9, 10?
4 ອ່ານມັດທາຍ 6:9, 10. ໃນຄຳບັນຍາຍເທິງພູເຂົາ ພະເຢຊູໄດ້ສອນພວກລູກສິດໃຫ້ຮູ້ວິທີອະທິດຖານໃນແບບທີ່ພະເຢໂຫວາພໍໃຈ. ຫຼັງຈາກທີ່ເພິ່ນເວົ້າວ່າ: “ພວກເຈົ້າຄວນອະທິດຖານແບບນີ້” ເລື່ອງທຳອິດທີ່ເພິ່ນເວົ້າໃນຄຳອະທິດຖານເປັນເລື່ອງທີ່ສຳຄັນເຊິ່ງກ່ຽວຂ້ອງກັບຄວາມຕ້ອງການຂອງພະເຢໂຫວາໂດຍກົງ ນັ້ນກໍຄື: ການເຮັດໃຫ້ນາມຊື່ຂອງພະເຢໂຫວາເປັນທີ່ເຄົາລົບນັບຖືຢູ່ສະເໝີ ການຂໍໃຫ້ການປົກຄອງຂອງພະເຈົ້າມາທີ່ໂລກນີ້ເພື່ອຈະທຳລາຍສັດຕູທັງໝົດຂອງພະເຈົ້າ ແລະສິ່ງດີໆທີ່ພະເຢໂຫວາຈະເຮັດເພື່ອໂລກແລະມະນຸດໃນອະນາຄົດ. ການອະທິດຖານແບບນີ້ສະແດງໃຫ້ເຫັນວ່າ ເຮົາໃຫ້ຄວາມຕ້ອງການຂອງພະເຈົ້າສຳຄັນຕໍ່ເຮົາ.
5. ຜິດບໍທີ່ຈະອະທິດຖານຂໍກ່ຽວກັບເລື່ອງຂອງເຮົາເອງ?
5 ສ່ວນຕໍ່ໄປໃນຄຳອະທິດຖານຂອງພະເຢຊູສະແດງໃຫ້ເຫັນວ່າບໍ່ແມ່ນເລື່ອງຜິດທີ່ເຮົາຈະອະທິດຖານຂໍກ່ຽວກັບເລື່ອງຂອງເຮົາເອງ. ເຮົາສາມາດອະທິດຖານເຖິງພະເຢໂຫວາເພື່ອຂໍໃຫ້ເພິ່ນຊ່ວຍເຮົາໃຫ້ມີອາຫານກິນໃນມື້ນັ້ນ ຂໍໃຫ້ເພິ່ນຍົກໂທດຄວາມຜິດຂອງເຮົາ ຂໍໃຫ້ເພິ່ນຊ່ວຍເຮົາບໍ່ໃຫ້ຍອມແພ້ຕໍ່ການລໍ້ໃຈ ແລະຂໍໃຫ້ເພິ່ນຊ່ວຍປົກປ້ອງເຮົາຈາກຕົວຊົ່ວຮ້າຍ. (ມທ. 6:11-13) ເມື່ອເຮົາອະທິດຖານແບບນີ້ກໍສະແດງໃຫ້ເຫັນວ່າເຮົາໝາຍເພິ່ງພະເຢໂຫວາແລະຢາກເຮັດໃຫ້ເພິ່ນພໍໃຈ.
ຜົວເມຍຈະອະທິດຖານເລື່ອງຫຍັງແດ່? (ເບິ່ງຂໍ້ 6) b
6. ເຮົາຈະອະທິດຖານໄດ້ສະເພາະເລື່ອງທີ່ຢູ່ໃນຄຳອະທິດຖານແບບຢ່າງຂອງພະເຢຊູເທົ່ານັ້ນບໍ? ຂໍໃຫ້ອະທິບາຍ.
6 ພະເຢຊູບໍ່ໄດ້ຄາດໝາຍໃຫ້ພວກລູກສິດອະທິດຖານຕາມຄຳອະທິດຖານແບບຢ່າງຂອງເພິ່ນທຸກຄຳ. ເພາະບາງເທື່ອພະເຢຊູກໍອະທິດຖານເລື່ອງອື່ນໆ ແລະເລື່ອງທີ່ເພິ່ນກັງວົນນຳ. (ມທ. 26:39, 42; ຢຮ. 17:1-26) ເຮົາເອງກໍສາມາດອະທິດຖານເລື່ອງທີ່ເຮົາກັງວົນໄດ້ຄືກັນ. ເຮົາສາມາດອະທິດຖານຂໍສະຕິປັນຍາແລະຄວາມເຂົ້າໃຈເມື່ອມີເລື່ອງທີ່ຕ້ອງຕັດສິນໃຈ. (ເພງ. 119:33, 34) ເມື່ອໄດ້ຮັບວຽກມອບໝາຍທີ່ຍາກ ເຮົາສາມາດຂໍພະເຢໂຫວາຊ່ວຍເຮົາໃຫ້ຮູ້ວ່າຄວນເຮັດແນວໃດ. (ສຸພາ. 2:6) ພໍ່ແມ່ສາມາດອະທິດຖານເພື່ອລູກ ແລະລູກກໍສາມາດອະທິດຖານເພື່ອພໍ່ແມ່ ແລະເຮົາທຸກຄົນກໍຄວນອະທິດຖານເພື່ອນັກສຶກສາຄຳພີໄບເບິນແລະຜູ້ທີ່ເຮົາປະກາດນຳ. ແຕ່ເມື່ອເຮົາອະທິດຖານ ເຮົາຕ້ອງບໍ່ພຽງແຕ່ຂໍໃຫ້ພະເຢໂຫວາຊ່ວຍເຮົາເທົ່ານັ້ນ.
ເຮົາຈະຍົກຍ້ອງສັນລະເສີນແລະຂອບໃຈພະເຢໂຫວາເລື່ອງຫຍັງແດ່ໃນຄຳອະທິດຖານ? (ເບິ່ງຂໍ້ 7-9) c
7. ເປັນຫຍັງເຮົາຄວນຍົກຍ້ອງສັນລະເສີນພະເຢໂຫວາໃນຄຳອະທິດຖານ?
7 ເມື່ອເຮົາອະທິດຖານ ເຮົາຄວນຍົກຍ້ອງສັນລະເສີນ ພະເຢໂຫວານຳ. ມີພຽງພະເຢໂຫວາເທົ່ານັ້ນທີ່ສົມຄວນໄດ້ຮັບການຍົກຍ້ອງສັນລະເສີນຫຼາຍທີ່ສຸດ ເພາະພະເຢໂຫວາເປັນພະເຈົ້າທີ່ “ດີແທ້ໆແລະພ້ອມທີ່ຈະໃຫ້ອະໄພ” ເພິ່ນຍັງ “ເມດຕາ ສົງສານ ບໍ່ຄຽດງ່າຍ ຮັກໃຜກໍຮັກໝັ້ນຄົງ ແລະສັດຊື່.” (ເພງ. 86:5, 15, ລ.ມ.) ເຮົາເຫັນໄດ້ວ່າ ມີຫຼາຍເຫດຜົນແທ້ໆທີ່ເຮົາຈະຍົກຍ້ອງສັນລະເສີນພະເຢໂຫວາໃນສິ່ງທີ່ເພິ່ນເປັນແລະສິ່ງທີ່ເພິ່ນເຮັດ.
8. ເຮົາຈະຂອບໃຈພະເຢໂຫວາໃນເລື່ອງຫຍັງແດ່? (ຄຳເພງ 104:12-15, 24)
8 ນອກຈາກເຮົາຈະຍົກຍ້ອງສັນລະເສີນພະເຢໂຫວາແລ້ວ ເຮົາຍັງຢາກຂອບໃຈ ເພິ່ນທີ່ຈັດໃຫ້ເຮົາມີສິ່ງດີໆຫຼາຍຢ່າງ ເຊັ່ນ: ເພິ່ນໃຫ້ມີດອກໄມ້ຫຼາຍສີ ມີອາຫານທີ່ແຊບໆຫຼາຍຊະນິດ ແລະມີໝູ່ທີ່ຮັກແພງກັນແລະກັນ. ເຮົາຢາກຂອບໃຈພະເຢໂຫວາຫຼາຍແທ້ໆທີ່ໃຫ້ສິ່ງເຫຼົ່ານີ້ກັບເຮົາແລະສິ່ງອື່ນໆທີ່ເຮັດໃຫ້ເຮົາມີຄວາມສຸກ. (ອ່ານຄຳເພງ 104:12-15, 24) ແລະທີ່ສຳຄັນ ເຮົາຢາກຂອບໃຈພະເຢໂຫວາທີ່ໃຫ້ເຮົາມີຄວາມຮູ້ແລະຄຳສອນຫຼາຍຢ່າງທີ່ເສີມຄວາມເຊື່ອ ແລະຍັງໃຫ້ເຮົາມີຄວາມຫວັງທີ່ດີເລີດໃນອະນາຄົດນຳ.
9. ສິ່ງໃດຊ່ວຍເຮົາບໍ່ໃຫ້ລືມຂອບໃຈພະເຢໂຫວາ? (1 ເທຊະໂລນິກ 5:17, 18)
9 ເປັນເລື່ອງງ່າຍທີ່ເຮົາຈະລືມຂອບໃຈພະເຢໂຫວາສຳລັບສິ່ງທີ່ເພິ່ນເຮັດເພື່ອເຮົາ. ແລ້ວສິ່ງໃດຈະຊ່ວຍເຮົາບໍ່ໃຫ້ລືມ? ເຈົ້າອາດຈະຂຽນລາຍການອອກມາວ່າເຄີຍຂໍຫຍັງຈາກພະເຢໂຫວາແດ່ ແລະເພິ່ນໄດ້ຕອບເຈົ້າແນວໃດ ຈາກນັ້ນ ໃຫ້ອະທິດຖານຂອບໃຈເພິ່ນທີ່ໄດ້ຊ່ວຍເຈົ້າ. (ອ່ານ 1 ເທຊະໂລນິກ 5:17, 18) ລອງຄິດເບິ່ງວ່າ ເຮົາຈະຮູ້ສຶກດີໃຈຫຼາຍສ່ຳໃດເມື່ອມີຄົນເຫັນຄ່າແລະຂອບໃຈສຳລັບສິ່ງທີ່ເຮົາເຮັດ. ຄ້າຍຄືກັນ ພະເຢໂຫວາກໍຈະມີຄວາມສຸກຫຼາຍເມື່ອເຮົາອະທິດຖານຂອບໃຈເພິ່ນທີ່ເພິ່ນຕອບຄຳອະທິດຖານຂອງເຮົາ. (ກລຊ. 3:15) ແລ້ວເຮົາຈະຂອບໃຈພະເຢໂຫວາເລື່ອງຫຍັງອີກ?
ຂອບໃຈພະເຢໂຫວາທີ່ໃຫ້ລູກຊາຍທີ່ຮັກກັບເຮົາ
10. ຕາມ 1 ເປໂຕ 2:21 ເປັນຫຍັງເຮົາຄວນຂອບໃຈພະເຢໂຫວາທີ່ສົ່ງພະເຢຊູມາໂລກນີ້?
10 ອ່ານ 1 ເປໂຕ 2:21. ເຮົາຄວນຂອບໃຈພະເຢໂຫວາທີ່ສົ່ງພະເຢຊູລູກຊາຍທີ່ຮັກຂອງເພິ່ນມາສອນເຮົາ. ເມື່ອເຮົາຮຽນເລື່ອງຂອງພະເຢຊູ ເຮົາກໍໄດ້ຮຽນຮູ້ຫຼາຍຢ່າງກ່ຽວກັບພະເຢໂຫວາແລະຮູ້ວິທີທີ່ຈະເຮັດໃຫ້ເພິ່ນພໍໃຈ. ຖ້າເຮົາສະແດງຄວາມເຊື່ອໃນພະເຢຊູ ເຮົາກໍຈະມີສັນຕິສຸກແລະມີສາຍສຳພັນທີ່ໃກ້ຊິດກັບພະເຢໂຫວາ.—ຣມ. 5:1
11. ເປັນຫຍັງເຮົາຄວນອະທິດຖານເຖິງພະເຢໂຫວາໃນນາມຂອງພະເຢຊູ?
11 ເຮົາຂອບໃຈພະເຢໂຫວາທີ່ໃຫ້ເຮົາອະທິດຖານເຖິງເພິ່ນໄດ້ໂດຍທາງພະເຢຊູ. ພະເຢໂຫວາຈະຟັງແລະຕອບຄຳອະທິດຖານຂອງເຮົາເມື່ອເຮົາຂໍໃນນາມຂອງພະເຢຊູ. ພະເຢໂຫວາໃຊ້ພະເຢຊູໃຫ້ເຮັດຕາມສິ່ງທີ່ເຮົາຂໍ ເພາະພະເຢຊູບອກວ່າ: “ບໍ່ວ່າພວກເຈົ້າຈະຂໍຫຍັງໃນນາມຂອງຂ້ອຍ ຂ້ອຍກໍຈະເຮັດສິ່ງນັ້ນໃຫ້ ເພື່ອພະເຈົ້າຜູ້ເປັນພໍ່ຈະໄດ້ຮັບການຍົກຍ້ອງເພາະລູກຂອງພະອົງ.”—ຢຮ. 14:13, 14
12. ເຮົາມີເຫດຜົນຫຍັງອີກທີ່ຈະຂອບໃຈພະເຢໂຫວາສຳລັບລູກຊາຍທີ່ຮັກຂອງເພິ່ນ?
12 ພະເຢໂຫວາໃຫ້ອະໄພບາບເຮົາຍ້ອນຄ່າໄຖ່ຂອງພະເຢຊູ. ຄຳພີໄບເບິນບອກວ່າ ພະເຢຊູເປັນ “ມະຫາປະໂລຫິດຂອງພວກເຮົາ . . . ເພິ່ນນັ່ງເບື້ອງຂວາບັນລັງຂອງພະເຈົ້າອົງຍິ່ງໃຫຍ່ໃນສະຫວັນ.” (ຮຣ. 8:1) ແລະເພິ່ນຍັງເປັນ “ຜູ້ຊ່ວຍທີ່ຢູ່ກັບພະເຈົ້າຜູ້ເປັນພໍ່.” (1 ຢຮ. 2:1) ເຮົາຂອບໃຈພະເຢໂຫວາຫຼາຍແທ້ໆທີ່ໃຫ້ເຮົາມີມະຫາປະໂລຫິດທີ່ເຂົ້າໃຈຄວາມອ່ອນແອຂອງເຮົາແລະ “ຊ່ວຍເວົ້າແທນພວກເຮົາ.” (ຣມ. 8:34; ຮຣ. 4:15) ຍ້ອນເຮົາເປັນມະນຸດທີ່ບໍ່ສົມບູນແບບ ເຮົາຈຶ່ງບໍ່ສາມາດອະທິດຖານເຖິງພະເຢໂຫວາໄດ້ຖ້າບໍ່ມີຄ່າໄຖ່ຂອງພະເຢຊູ. ເຮົາບໍ່ຮູ້ວ່າເຮົາຊິຂອບໃຈພະເຢໂຫວາແນວໃດສຳລັບຂອງຂວັນທີ່ມີຄ່າທີ່ພະເຢໂຫວາໃຫ້ກັບເຮົາເຊິ່ງກໍຄືພະເຢຊູລູກຊາຍທີ່ຮັກຂອງເພິ່ນ!
ອະທິດຖານເພື່ອພີ່ນ້ອງ
13. ໃນຄືນສຸດທ້າຍກ່ອນທີ່ພະເຢຊູຈະຕາຍ ເພິ່ນໄດ້ສະແດງໃຫ້ເຫັນແນວໃດວ່າເພິ່ນຮັກພວກລູກສິດ?
13 ໃນຄືນສຸດທ້າຍກ່ອນທີ່ພະເຢຊູຈະຕາຍ ເພິ່ນໄດ້ອະທິດຖານເປັນເວລາດົນເພື່ອພວກລູກສິດ ເພິ່ນໄດ້ຂໍໃຫ້ພະເຢໂຫວາ “ປົກປ້ອງພວກເຂົາຈາກຕົວຊົ່ວຮ້າຍ.” (ຢຮ. 17:15) ເຖິງພະເຢຊູຮູ້ວ່າອີກບໍ່ດົນເພິ່ນຈະຕ້ອງເຈິຄວາມທຸກຫຼາຍຢ່າງ ແຕ່ເພິ່ນກໍຍັງເປັນຫ່ວງພວກລູກສິດຂອງເພິ່ນ ນີ້ສະແດງວ່າເພິ່ນຮັກພວກລູກສິດຫຼາຍແທ້ໆ!
ເຮົາຈະອະທິດຖານເພື່ອພີ່ນ້ອງໃນເລື່ອງຫຍັງແດ່? (ເບິ່ງຂໍ້ 14-16) d
14. ເຮົາຈະສະແດງໃຫ້ເຫັນແນວໃດວ່າເຮົາຮັກພີ່ນ້ອງ?
14 ເຮົາຢາກຮຽນແບບພະເຢຊູໂດຍບໍ່ຄິດເຖິງແຕ່ຕົວເອງເທົ່ານັ້ນ ແຕ່ຈະຄິດເຖິງພີ່ນ້ອງແລະອະທິດຖານເພື່ອເຂົາເຈົ້າເປັນປະຈຳ. ເມື່ອເຮົາເຮັດແບບນີ້ ເຮົາກໍກຳລັງເຮັດຕາມຄຳສັ່ງຂອງພະເຢຊູທີ່ໃຫ້ຮັກກັນແລະກັນ ແລະສະແດງໃຫ້ພະເຢໂຫວາເຫັນວ່າເຮົາຮັກພີ່ນ້ອງຫຼາຍສ່ຳໃດ. (ຢຮ. 13:34) ການອະທິດຖານເພື່ອພີ່ນ້ອງບໍ່ແມ່ນເລື່ອງທີ່ເສຍເວລາ ແຕ່ເປັນການຊ່ວຍເຫຼືອເຂົາເຈົ້າ. ເພາະຄຳພີໄບເບິນບອກວ່າ: “ຄຳອ້ອນວອນຂອງຄົນທີ່ພະເຈົ້າຍອມຮັບມີພະລັງແລະໄດ້ຜົນດີ.”—ຢກບ. 5:16
15. ເປັນຫຍັງເຮົາຄວນຈະອະທິດຖານເພື່ອພີ່ນ້ອງ?
15 ເຮົາຄວນຈະອະທິດຖານເພື່ອພີ່ນ້ອງຂອງເຮົາຍ້ອນວ່າເຂົາເຈົ້າເຈິບັນຫາຫຼາຍຢ່າງ. ເຊັ່ນ: ຄວາມເຈັບປ່ວຍ ໄພທຳມະຊາດ ສົງຄາມ ການຂົ່ມເຫງ ແລະບັນຫາອື່ນໆເຊິ່ງເຮົາສາມາດອະທິດຖານຂໍພະເຢໂຫວາຊ່ວຍເຂົາເຈົ້າໃຫ້ອົດທົນກັບບັນຫາເຫຼົ່ານີ້. ແລະເຮົາຍັງສາມາດອະທິດຖານເພື່ອພີ່ນ້ອງທີ່ເຕັມໃຈໄປຊ່ວຍເຫຼືອຄົນອື່ນ. ຖ້າເຈົ້າຮູ້ຈັກພີ່ນ້ອງບາງຄົນທີ່ກຳລັງເຈິກັບບັນຫາທີ່ຄ້າຍໆກັນນີ້ ເຈົ້າອາດຈະອະທິດຖານໂດຍອອກຊື່ຂອງເຂົາເຈົ້ານຳດີບໍ? ຖ້າເຮົາອະທິດຖານຂໍໃຫ້ພະເຢໂຫວາຊ່ວຍພີ່ນ້ອງໃຫ້ອົດທົນກັບບັນຫາກໍສະແດງວ່າເຮົາຮັກເຂົາເຈົ້າ.
16. ເປັນຫຍັງເຮົາຄວນຈະອະທິດຖານເພື່ອພີ່ນ້ອງທີ່ນຳໜ້າໃນປະຊາຄົມ?
16 ພີ່ນ້ອງທີ່ນຳໜ້າໃນປະຊາຄົມຮູ້ສຶກເຫັນຄ່າທີ່ເຮົາອະທິດຖານເພື່ອເຂົາເຈົ້າ. ອັກຄະສາວົກໂປໂລກໍຮູ້ສຶກແບບນັ້ນ ລາວຂຽນວ່າ: “ຂໍໃຫ້ອະທິດຖານເພື່ອຂ້ອຍນຳ ເພື່ອວ່າຕອນທີ່ຂ້ອຍເວົ້າຂ້ອຍຈຶ່ງຈະເວົ້າດ້ວຍຄວາມກ້າຫານເມື່ອປະກາດຄວາມລັບອັນສັກສິດກ່ຽວກັບຂ່າວດີ.” (ອຟຊ. 6:19) ໃນທຸກມື້ນີ້ກໍຄືກັນ ເຮົາສາມາດສະແດງຄວາມຮັກຕໍ່ພີ່ນ້ອງທີ່ນຳໜ້າໃນອົງການໂດຍອະທິດຖານຂໍໃຫ້ພະເຢໂຫວາອວຍພອນວຽກທີ່ເຂົາເຈົ້າເຮັດ.
ເມື່ອອະທິດຖານຕາງໜ້າຄົນອື່ນ
17-18. ເຮົາອາດຈະຖືກຂໍໃຫ້ອະທິດຖານຕາງໜ້າຄົນອື່ນຕອນໃດແດ່ ແລະເຮົາຄວນຈະຈື່ຫຍັງໄວ້?
17 ບາງເທື່ອເຮົາອາດຖືກຂໍໃຫ້ອະທິດຖານຕາງໜ້າຄົນອື່ນ. ຕົວຢ່າງເຊັ່ນ ພີ່ນ້ອງຍິງທີ່ນຳການສຶກສາອາດຈະຂໍໃຫ້ພີ່ນ້ອງທີ່ມາຮ່ວມສຶກສາອະທິດຖານ ແຕ່ພີ່ນ້ອງທີ່ມາຮ່ວມສຶກສາອາດຈະບໍ່ຮູ້ຈັກນັກສຶກສາດີປານໃດ ດັ່ງນັ້ນ ມັນຈຶ່ງດີກວ່າທີ່ລາວຈະຂໍເປັນຜູ້ອະທິດຖານຕອນຈົບການສຶກສາ ເພາະຈະຊ່ວຍລາວໃຫ້ປັບຄຳອະທິດຖານໃຫ້ເໝາະກັບສະພາບການຂອງນັກສຶກສາ.
18 ພີ່ນ້ອງຊາຍອາດຈະຖືກຂໍໃຫ້ອະທິດຖານຕອນທີ່ປະຊຸມປະຈຳປະຊາຄົມຫຼືປະຊຸມເພື່ອການປະກາດ. ເມື່ອພີ່ນ້ອງຊາຍໄດ້ຮັບສິດທິພິເສດນີ້ ລາວຄວນຈະຈື່ວ່າຈຸດປະສົງຂອງການປະຊຸມນັ້ນແມ່ນຫຍັງ. ແລະລາວຈະບໍ່ໃຊ້ການອະທິດຖານເພື່ອຈະສັ່ງສອນຫຼືແຈ້ງການເລື່ອງໃນປະຊາຄົມ. ໃນຕາຕະລາງການປະຊຸມປະຈຳປະຊາຄົມ ມີການກຳນົດເວລາໄວ້ 5 ນາທີສຳລັບການຮ້ອງເພງແລະການອະທິດຖານ. ດັ່ງນັ້ນ ພີ່ນ້ອງຊາຍທີ່ຖືກຂໍໃຫ້ອະທິດຖານບໍ່ຄວນ “ເວົ້າຫຼາຍ” ໂດຍສະເພາະຕອນທີ່ອະທິດຖານເປີດການປະຊຸມ.—ມທ. 6:7
ໃຫ້ການອະທິດຖານເປັນສິ່ງສຳຄັນໃນຊີວິດ
19. ສິ່ງໃດຈະຊ່ວຍເຮົາໃຫ້ກຽມພ້ອມສຳລັບວັນພິພາກສາຂອງພະເຢໂຫວາ?
19 ເຮົາຕ້ອງໃຫ້ການອະທິດຖານເປັນສິ່ງສຳຄັນໃນຊີວິດຂອງເຮົາຍ້ອນວັນພິພາກສາຂອງພະເຢໂຫວາໃກ້ຈະມາຮອດແລ້ວ. ດັ່ງນັ້ນ ພະເຢຊູຈຶ່ງບອກວ່າ: “ໃຫ້ເຈົ້າຕື່ນຕົວຢູ່ສະເໝີແລະອະທິດຖານອ້ອນວອນຢູ່ເລື້ອຍໆ ເພື່ອເຈົ້າຈະລອດຈາກເຫດການທັງໝົດທີ່ຈະເກີດຂຶ້ນ.” (ລກ. 21:36) ຖ້າເຮົາອະທິດຖານເປັນປະຈຳ ຄວາມເຊື່ອຂອງເຮົາກໍຈະເຂັ້ມແຂງແລະເຮົາກໍຈະພ້ອມເມື່ອວັນພິພາກສາຂອງພະເຢໂຫວາມາຮອດ.
20. ຄຳອະທິດຖານຂອງເຮົາຈະເປັນຄືກັບເຄື່ອງຫອມທີ່ມີກິ່ນຫອມໄດ້ແນວໃດ?
20 ໃນບົດຄວາມນີ້ເຮົາໄດ້ຮຽນວ່າ ເປັນສິດທິພິເສດຫຼາຍແທ້ໆທີ່ເຮົາສາມາດອະທິດຖານເຖິງພະເຢໂຫວາ. ສິ່ງສຳຄັນທີ່ສຸດທີ່ເຮົາອະທິດຖານກໍຄື ເຮົາຄວນຈະເວົ້າເຖິງຄວາມຕ້ອງການຂອງພະເຢໂຫວາກ່ອນ. ເຮົາສາມາດອະທິດຖານຂອບໃຈພະເຢໂຫວາທີ່ໃຫ້ລູກຊາຍທີ່ຮັກກັບເຮົາ ແລະສິ່ງດີໆທີ່ເຮົາຈະໄດ້ຮັບໃນອະນາຄົດໂດຍທາງການປົກຄອງຂອງເພິ່ນ. ນອກຈາກນັ້ນ ເຮົາຍັງສາມາດອະທິດຖານເພື່ອພີ່ນ້ອງ ແລະອະທິດຖານຂໍສິ່ງຈຳເປັນໃນຊີວິດແລະສິ່ງທີ່ຈະຊ່ວຍເຮົາໃຫ້ມີຄວາມເຊື່ອເຂັ້ມແຂງ. ເມື່ອເຮົາຄິດຢ່າງດີວ່າຈະເວົ້າຫຍັງແດ່ໃນຄຳອະທິດຖານກໍສະແດງໃຫ້ເຫັນວ່າເຮົາເຫັນຄ່າສິດທິພິເສດໃນການອະທິດຖານ. ແລະຄຳອະທິດຖານຂອງເຮົາກໍຈະເປັນຄືກັບເຄື່ອງຫອມທີ່ມີກິ່ນຫອມທີ່ເຮັດໃຫ້ພະເຢໂຫວາ ‘ພໍໃຈ.’—ສຸພາ. 15:8
ເພງ 45 ສິ່ງທີ່ຄິດຕຶກຕອງໃນໃຈ
a ເຮົາຮູ້ສຶກດີໃຈຫຼາຍແທ້ໆທີ່ພະເຢໂຫວາໃຫ້ເຮົາອະທິດຖານເຖິງເພິ່ນ. ດັ່ງນັ້ນ ເຮົາຈຶ່ງຢາກໃຫ້ຄຳອະທິດຖານຂອງເຮົາເປັນຄືກັບເຄື່ອງຫອມທີ່ມີກິ່ນຫອມທີ່ເຮັດໃຫ້ພະເຢໂຫວາພໍໃຈ. ໃນບົດຄວາມນີ້ ເຮົາຈະມາເບິ່ງວ່າ ເຮົາສາມາດອະທິດຖານເລື່ອງຫຍັງໄດ້ແດ່ ແລະເຮົາຄວນຄິດເຖິງຫຍັງເມື່ອເຮົາຖືກຂໍໃຫ້ອະທິດຖານຕາງໜ້າຄົນອື່ນ.
b ຄຳອະທິບາຍຮູບພາບ: ຜົວເມຍຄູ່ໜຶ່ງໄດ້ອະທິດຖານເພື່ອໃຫ້ລູກປອດໄພຕອນທີ່ຢູ່ໂຮງຮຽນ ເພື່ອພໍ່ທີ່ເຈັບປ່ວຍ ແລະເພື່ອຄວາມກ້າວໜ້າຂອງນັກສຶກສາ.
c ຄຳອະທິບາຍຮູບພາບ: ພີ່ນ້ອງຊາຍໜຸ່ມໄດ້ອະທິດຖານຂອບໃຈພະເຢໂຫວາສຳລັບຄ່າໄຖ່ຂອງພະເຢຊູ ສຳລັບສິ່ງທີ່ສວຍງາມໃນໂລກນີ້ ແລະສຳລັບອາຫານຫຼາກຫຼາຍຊະນິດ.
d ຄຳອະທິບາຍຮູບພາບ: ພີ່ນ້ອງຍິງໄດ້ອະທິດຖານຂໍໃຫ້ພະເຢໂຫວາອວຍພອນຄະນະກຳມະການປົກຄອງ ແລະຂໍໃຫ້ຊ່ວຍພີ່ນ້ອງທີ່ເຈິກັບໄພທຳມະຊາດແລະການຂົ່ມເຫງ.
