ບົດຄວາມສຶກສາທີ 32
ຮຽນແບບພະເຢໂຫວາເລື່ອງການເປັນຄົນມີເຫດຜົນ
“ໃຫ້ຄົນອື່ນເຫັນວ່າພວກເຈົ້າເປັນຄົນມີເຫດຜົນ.”—ຟລປ. 4:5
ເພງ 89 ຟັງ ເຮັດຕາມ ແລ້ວຈະໄດ້ພອນ
ໃຈຄວາມສຳຄັນ a
ເຈົ້າຢາກເປັນຕົ້ນໄມ້ແບບໃດ? (ເບິ່ງຂໍ້ 1)
1. ຄລິດສະຕຽນຕ້ອງເປັນຄືກັບຕົ້ນໄມ້ແນວໃດ? (ເບິ່ງຮູບພາບ)
ມີສຸພາສິດໜຶ່ງບອກວ່າ “ຕົ້ນໄມ້ທີ່ອ່ອນຕົວຈະບໍ່ຫັກເມື່ອລົມພັດແຮງ.” ຄຳສຸພາສິດນີ້ສະແດງເຖິງຄຸນລັກສະນະທີ່ສຳຄັນຢ່າງໜຶ່ງເພື່ອຕົ້ນໄມ້ຈະຄົງຢູ່ດົນໆຕອນທີ່ເຈິລົມພາຍຸ ເຊິ່ງກໍຄື: ການຍືດຫຍຸ່ນ. ຄລິດສະຕຽນກໍຄືກັນຕ້ອງເປັນຄົນຍືດຫຍຸ່ນເພື່ອທີ່ຈະຮັບໃຊ້ພະເຢໂຫວາຕໍ່ໄປໄດ້ແລະຍັງມີຄວາມສຸກຢູ່. ເຮົາຈະເປັນຄົນແບບນັ້ນໄດ້ແນວໃດ? ເຮົາຕ້ອງເປັນຄົນມີເຫດຜົນໂດຍພ້ອມທີ່ຈະປັບຕົວເມື່ອສະພາບການປ່ຽນແປງ ແລະຍອມຮັບຄວາມຄິດແລະການຕັດສິນໃຈຂອງຄົນອື່ນ.
2. ມີຄຸນລັກສະນະຫຍັງແດ່ທີ່ຈະຊ່ວຍເຮົາໃຫ້ປັບຕົວໄດ້ເມື່ອເຈິສະພາບການທີ່ປ່ຽນແປງໃນຊີວິດ ແລະເຮົາຈະຮຽນຫຍັງໃນບົດຄວາມນີ້?
2 ຜູ້ຮັບໃຊ້ຂອງພະເຢໂຫວາຕ້ອງເປັນຄົນທີ່ມີເຫດຜົນ ເປັນຄົນຖ່ອມ ແລະເຫັນອົກເຫັນໃຈ. ໃນບົດຄວາມນີ້ເຮົາຈະມາເບິ່ງນຳກັນວ່າ ຄຸນລັກສະນະນີ້ຈະຊ່ວຍພີ່ນ້ອງຄລິດສະຕຽນແນວໃດໃຫ້ຮັບມືໄດ້ເມື່ອເຈິກັບສະພາບການທີ່ປ່ຽນແປງໃນຊີວິດ ແລະຄຸນລັກສະນະເຫຼົ່ານີ້ຈະຊ່ວຍເຮົາແນວໃດໃນທຸກມື້ນີ້. ແຕ່ກ່ອນອື່ນ ໃຫ້ເຮົາມາເບິ່ງວ່າພະເຢໂຫວາກັບພະເຢຊູເປັນແບບຢ່າງທີ່ດີທີ່ສຸດແນວໃດໃນການເປັນຄົນມີເຫດຜົນ.
ພະເຢໂຫວາກັບພະເຢຊູເປັນຜູ້ທີ່ມີເຫດຜົນ
3. ມີຫຍັງແດ່ທີ່ສະແດງວ່າພະເຢໂຫວາເປັນຜູ້ທີ່ມີເຫດຜົນ?
3 ຄຳພີໄບເບິນບອກວ່າພະເຢໂຫວາເປັນຄືກັບ “ຫີນຜາ” ເພາະເພິ່ນໜັກແໜ້ນໝັ້ນຄົງ. (ພບຍ. 32:4) ແຕ່ໃນເວລາດຽວກັນ ພະເຢໂຫວາກໍມີເຫດຜົນ. ເມື່ອສິ່ງຕ່າງໆໃນໂລກປ່ຽນໄປ ພະເຢໂຫວາກໍພ້ອມທີ່ຈະປັບຕົວຕາມສະພາບການເພື່ອໃຫ້ຈຸດປະສົງຂອງເພິ່ນສຳເລັດ. ພະເຢໂຫວາສ້າງມະນຸດຕາມແບບຂອງເພິ່ນ ເຮົາເລີຍສາມາດປັບຕົວໄດ້ເມື່ອເຈິສະພາບການທີ່ປ່ຽນແປງໃນຊີວິດ. ນອກຈາກນັ້ນ ເພິ່ນໃຫ້ຫຼັກການທີ່ຈະແຈ້ງໃນຄຳພີໄບເບິນເພື່ອຊ່ວຍເຮົາໃຫ້ຕັດສິນໃຈໄດ້ຢ່າງສະຫຼາດ ບໍ່ວ່າເຮົາຈະເຈິບັນຫາຫຍັງກໍຕາມ. ຕົວຢ່າງຂອງພະເຢໂຫວາເອງແລະຫຼັກການທີ່ເພິ່ນໃຫ້ເປັນຫຼັກຖານວ່າ ເຖິງເພິ່ນຈະເປັນຄືກັບ “ຫີນຜາ” ແຕ່ເພິ່ນກໍເປັນພະເຈົ້າທີ່ມີເຫດຜົນ.
4. ຕົວຢ່າງຫຍັງທີ່ສະແດງວ່າພະເຢໂຫວາເປັນຜູ້ທີ່ມີເຫດຜົນ? (ລະບຽບພວກເລວີ 5:7, 11)
4 ວິທີທີ່ພະເຢໂຫວາປະຕິບັດກັບຄົນອື່ນແມ່ນດີທີ່ສຸດແລະມີເຫດຜົນ. ເພິ່ນບໍ່ໄດ້ເຂັ້ມງວດເກີນໄປ. ຕົວຢ່າງເຊັ່ນ: ໃຫ້ເຮົາມາເບິ່ງວ່າພະເຢໂຫວາສະແດງຄວາມມີເຫດຜົນກັບຊາດອິດສະຣາເອນແນວໃດ? ພະເຢໂຫວາບໍ່ໄດ້ຮຽກຮ້ອງໃຫ້ທຸກຄົນທີ່ມີຖານະແຕກຕ່າງກັນບໍ່ວ່າຄົນຮັ່ງມີຫຼືຄົນທຸກຍາກຕ້ອງຖວາຍເຄື່ອງບູຊາແບບດຽວກັນ. ໃນບາງກໍລະນີ ພະເຢໂຫວາກໍໃຫ້ແຕ່ລະຄົນຖວາຍເຄື່ອງບູຊາຕາມສະພາບການຂອງໃຜລາວ.—ອ່ານລະບຽບພວກເລວີ 5:7, 11
5. ຕົວຢ່າງຫຍັງທີ່ສະແດງໃຫ້ເຫັນວ່າພະເຢໂຫວາເປັນພະເຈົ້າທີ່ຖ່ອມແລະເຫັນອົກເຫັນໃຈ?
5 ຄວາມຖ່ອມແລະຄວາມເຫັນອົກເຫັນໃຈຂອງພະເຢໂຫວາກະຕຸ້ນເພິ່ນໃຫ້ມີເຫດຜົນ. ຕົວຢ່າງເຊັ່ນ: ເຮົາເຫັນວ່າພະເຢໂຫວາຖ່ອມໃຈແທ້ໆຕອນທີ່ເພິ່ນກຳລັງຈະທຳລາຍເມືອງໂຊໂດມ. ພະເຢໂຫວາໃຊ້ທູດສະຫວັນໄປສັ່ງໂລດໃຫ້ໜີໄປທີ່ເຂດພູເຂົາ. ແຕ່ໂລດຢ້ານຫຼາຍ ລາວເລີຍຂໍພະເຢໂຫວາວ່າລາວກັບຄອບຄົວຈະໄປເມືອງໂຊອາເຊິ່ງເປັນເມືອງນ້ອຍໆ. ແຕ່ແທ້ໆແລ້ວເມືອງນັ້ນພະເຢໂຫວາກໍຕັ້ງໃຈຈະທຳລາຍຄືກັນ. ທີ່ຈິງພະເຢໂຫວາຈະສັ່ງໃຫ້ໂລດເຮັດຕາມຄຳສັ່ງກໍໄດ້ ແຕ່ພະເຢໂຫວາກໍຍອມເຮັດຕາມທີ່ໂລດຂໍ ເຊິ່ງໝາຍຄວາມວ່າເພິ່ນຈະບໍ່ໄດ້ທຳລາຍເມືອງໂຊອາຕາມທີ່ຕັ້ງໃຈໄວ້. (ປຖກ. 19:18-22) ຫຼາຍຮ້ອຍປີຕໍ່ມາ ພະເຢໂຫວາກໍສະແດງຄວາມເຫັນອົກເຫັນໃຈຕໍ່ຄົນໃນເມືອງນີເນເວ. ເພິ່ນສົ່ງຜູ້ພະຍາກອນໂຢນາໃຫ້ໄປປະກາດວ່າເພິ່ນຈະທຳລາຍເມືອງນີ້. ແຕ່ເມື່ອຄົນໃນເມືອງນີເນເວກັບໃຈ ພະເຢໂຫວາກໍເຫັນອົກເຫັນໃຈແລະອີ່ຕົນເຂົາເຈົ້າ ເພິ່ນກໍເລີຍບໍ່ທຳລາຍເມືອງນີ້ຄືກັບທີ່ຕັ້ງໃຈໄວ້ໃນຕອນທຳອິດ.—ຢນ. 3:1, 10; 4:10, 11
6. ພະເຢຊູສະແດງຄວາມມີເຫດຜົນຄືກັບພະເຢໂຫວາແນວໃດ?
6 ພະເຢຊູຮຽນແບບຄວາມມີເຫດຜົນຂອງພະເຢໂຫວາແທ້ໆ. ເຖິງວ່າເພິ່ນຈະຖືກສົ່ງລົງມາຢູ່ເທິງໂລກເພື່ອປະກາດກັບ “ຊາວອິດສະຣາເອນເທົ່ານັ້ນ.” ແຕ່ເພິ່ນກໍສະແດງໃຫ້ເຫັນວ່າເພິ່ນເປັນຄົນມີເຫດຜົນ. ມີເທື່ອໜຶ່ງ ຜູ້ຍິງທີ່ບໍ່ແມ່ນຄົນອິດສະຣາເອນມາຂໍໃຫ້ພະເຢຊູປິ່ນປົວລູກສາວຂອງລາວທີ່ “ຖືກປີສາດສິງ” ແລະ “ເຈັບປວດທໍລະມານຫຼາຍ.” ພະເຢຊູເຫັນອົກເຫັນໃຈລາວ ເພິ່ນເລີຍເຮັດຕາມທີ່ຜູ້ຍິງຄົນນັ້ນຂໍໂດຍປິ່ນປົວລູກສາວຂອງລາວ. (ມທ. 15:21-28) ໃຫ້ເຮົາມາເບິ່ງອີກຕົວຢ່າງໜຶ່ງ. ພະເຢຊູເຄີຍບອກວ່າ “ຖ້າຜູ້ໃດປະຕິເສດຂ້ອຍ . . . ຂ້ອຍກໍຈະປະຕິເສດລາວ.” (ມທ. 10:33) ແຕ່ເມື່ອເປໂຕປະຕິເສດພະເຢຊູເຖິງສາມເທື່ອ ເພິ່ນເຮັດແນວໃດ? ພະເຢຊູຮູ້ວ່າເປໂຕກັບໃຈແທ້ໆແລະມີຄວາມເຊື່ອ. ຫຼັງຈາກທີ່ພະເຢຊູຄືນມາຈາກຕາຍ ເພິ່ນກໍມາຫາເປໂຕແລະຄືຊິຮັບຮອງກັບເປໂຕວ່າເພິ່ນໃຫ້ອະໄພລາວແລ້ວແລະຮັກລາວຫຼາຍ.—ລກ. 24:33, 34
7. ຕາມທີ່ບອກໄວ້ໃນຟີລິບປອຍ 4:5 ເຮົາຢາກໃຫ້ຄົນອື່ນເບິ່ງວ່າເຮົາເປັນຄົນແນວໃດ?
7 ເຮົາໄດ້ເຫັນແລ້ວວ່າພະເຢໂຫວາກັບພະເຢຊູເປັນຜູ້ທີ່ມີເຫດຜົນ. ແລ້ວເຮົາເດ? ພະເຢໂຫວາກໍຢາກໃຫ້ເຮົາເປັນຄົນມີເຫດຜົນ. (ອ່ານຟີລິບປອຍ 4:5) ຄຳພີໄບເບິນສະບັບໜຶ່ງແປຂໍ້ນີ້ວ່າ: “ໃຫ້ມີຊື່ສຽງວ່າເປັນຄົນມີເຫດຜົນ.” ໃຫ້ຖາມຕົວເອງວ່າ: ‘ຄົນອື່ນເບິ່ງວ່າຂ້ອຍເປັນຄົນມີເຫດຜົນແລະຍອມຄົນອື່ນບໍ? ຫຼືເຂົາເຈົ້າເບິ່ງວ່າຂ້ອຍເປັນຄົນເຂັ້ມງວດບໍ່ຍອມໃຜ? ຫຼືຂ້ອຍຟັງແລະຍອມຮັບຄວາມຄິດເຫັນຂອງຄົນອື່ນເມື່ອເຫັນວ່າເໝາະສົມ?’ ແຮ່ງເຮົາເປັນຄົນມີເຫດຜົນກໍສະແດງວ່າເຮົາຮຽນແບບພະເຢໂຫວາກັບພະເຢຊູ. ໃຫ້ເຮົາມາເບິ່ງສະຖານະການສອງຢ່າງທີ່ເຮັດໃຫ້ເຫັນວ່າ ການເປັນຄົນມີເຫດຜົນເປັນເລື່ອງສຳຄັນແທ້ໆ. ນັ້ນກໍຄື: ເມື່ອສະພາບການໃນຊີວິດຂອງເຮົາປ່ຽນແປງແລະເມື່ອຄົນອື່ນຄິດແລະຕັດສິນໃຈບໍ່ຄືກັນກັບເຮົາ.
ເຮົາຕ້ອງເປັນຄົນມີເຫດຜົນເມື່ອສະພາບການໃນຊີວິດຂອງເຮົາປ່ຽນແປງ
8. ການເປັນຄົນມີເຫດຜົນຊ່ວຍເຮົາແນວໃດເມື່ອສະພາບການປ່ຽນແປງ? (ເບິ່ງໄຂເງື່ອນ)
8 ເປັນເລື່ອງສຳຄັນແທ້ໆທີ່ເຮົາຕ້ອງເປັນຄົນມີເຫດຜົນເມື່ອສະພາບການໃນຊີວິດຂອງເຮົາປ່ຽນແປງ. ເມື່ອເກີດເຫດການແບບນີ້ ມັນກໍເຮັດໃຫ້ຊີວິດຂອງເຮົາລຳບາກຂຶ້ນແບບທີ່ເຮົາບໍ່ໄດ້ຕັ້ງຕົວ ເຊັ່ນ: ເຮົາອາດເຈັບປ່ວຍແບບກະທັນຫັນ ປະເທດທີ່ເຮົາຢູ່ມີບັນຫາເສດຖະກິດທີ່ຮ້າຍແຮງ ຫຼື ອາດຈະມີການປ່ຽນແປງທາງການເມືອງ ເຊິ່ງສິ່ງເຫຼົ່ານີ້ມີຜົນຕໍ່ຊີວິດຂອງເຮົາໂດຍກົງ. (ຜູ້ປ. 9:11; 1ກຣ. 7:31) ຫຼືບາງເທື່ອອາດຖືກປ່ຽນວຽກມອບໝາຍ ຫຼືຕ້ອງຍ້າຍໄປເຮັດວຽກຢູ່ບ່ອນອື່ນ. ນີ້ອາດເປັນເລື່ອງຍາກສຳລັບເຮົານຳ. ແຕ່ບໍ່ວ່າເຮົາຈະເຈິການປ່ຽນແປງຫຍັງກໍຕາມ ເຮົາກໍພ້ອມທີ່ຈະປັບຕົວໄດ້ຖ້າເຮົາເຮັດຕາມ 4 ຂັ້ນຕອນຕໍ່ໄປນີ້: (1) ຍອມຮັບຄວາມຈິງ (2) ເບິ່ງໄປທີ່ອະນາຄົດ (3) ມີຄວາມຄິດໃນແງ່ບວກ ແລະ (4) ເຮັດເພື່ອຄົນອື່ນ. b ໃຫ້ເຮົາມາເບິ່ງຕົວຢ່າງຂອງພີ່ນ້ອງບາງຄົນທີ່ໄດ້ປະໂຫຍດຈາກການເຮັດຕາມຂັ້ນຕອນຕ່າງໆເຫຼົ່ານີ້.
9. ມິດຊັນນາຣີຄູ່ໜຶ່ງຮັບມືກັບບັນຫາທີ່ບໍ່ຄາດຄິດໄດ້ແນວໃດ?
9 ຍອມຮັບຄວາມຈິງ. ພີ່ນ້ອງເອມານູເອນກັບພີ່ນ້ອງຟຣານເຈັດຊະກາໄດ້ຮັບມອບໝາຍໃຫ້ເປັນມິດຊັນນາຣີໃນຕ່າງປະເທດ. ເມື່ອເຂົາເຈົ້າເລີ່ມຮຽນພາສາໃໝ່ແລະເລີ່ມຮູ້ຈັກກັບພີ່ນ້ອງໃນປະຊາຄົມໃໝ່ກໍເກີດການລະບາດຂອງພະຍາດໂຄວິດ-19. ນີ້ຈຶ່ງເຮັດໃຫ້ເຂົາເຈົ້າກັກໂຕຢູ່ແຕ່ໃນເຮືອນ. ຫຼັງຈາກນັ້ນ ແມ່ຂອງຟຣານເຈັດຊະກາກໍຕາຍຢ່າງກະທັນຫັນ. ລາວຢາກກັບໄປຢູ່ກັບຄອບຄົວຫຼາຍ ແຕ່ກໍໄປບໍ່ໄດ້ຍ້ອນໂລກລະບາດ. ແລ້ວອັນໃດຊ່ວຍຟຣານເຈັດຊະກາໃຫ້ຮັບມືກັບບັນຫາເຫຼົ່ານີ້ໄດ້? ຢ່າງທຳອິດທີ່ເອມານູເອນກັບຟຣານເຈັດຊະກາເຮັດກໍຄື ອະທິດຖານນຳກັນເພື່ອຂໍສະຕິປັນຍາຈາກພະເຢໂຫວາທີ່ຈະຊ່ວຍໃຫ້ເຂົາເຈົ້າຮັບມືກັບບັນຫາໃນແຕ່ລະມື້ໄດ້. ພະເຢໂຫວາຕອບຄຳອະທິດຖານຂອງເຂົາເຈົ້າໃນເວລາທີ່ເໝາະສົມຜ່ານທາງອົງການຂອງເພິ່ນ ເຊັ່ນ: ເຂົາເຈົ້າໄດ້ຮັບກຳລັງໃຈຈາກວິດີໂອທີ່ມີການສຳພາດພີ່ນ້ອງຊາຍຄົນໜຶ່ງ. ພີ່ນ້ອງຄົນນີ້ບອກວ່າ: “ຖ້າເຮົາຍອມຮັບສິ່ງທີ່ເກີດຂຶ້ນໄດ້ໄວເທົ່າໃດ ເຮົາກໍຈະແຮ່ງກັບມາມີຄວາມສຸກໄດ້ໄວ ແລະເຮົາກໍຈະໃຊ້ໂອກາດນີ້ເພື່ອຮັບໃຊ້ພະເຢໂຫວາແລະຮັບໃຊ້ຄົນອື່ນ.” c ຢ່າງທີສອງ ເຂົາເຈົ້າຕັ້ງໃຈທີ່ຈະປະກາດທາງໂທລະສັບໃຫ້ເກັ່ງຂຶ້ນ. ນີ້ເຮັດໃຫ້ເຂົາເຈົ້າໄດ້ເລີ່ມນຳການສຶກສາກັບຜູ້ສົນໃຈໜຶ່ງຄົນ. ແລະຢ່າງທີສາມ ເຂົາເຈົ້າຍອມຮັບຄວາມຊ່ວຍເຫຼືອຈາກພີ່ນ້ອງແລະຮູ້ຄຸນຄ່າພີ່ນ້ອງທີ່ຊ່ວຍເຫຼືອເຂົາເຈົ້າ. ພີ່ນ້ອງຍິງຄົນໜຶ່ງທີ່ໃສ່ໃຈໄດ້ສົ່ງຂໍ້ຄວາມແລະຂໍ້ພະຄຳພີໜຶ່ງຂໍ້ມາໃຫ້ເຂົາເຈົ້າທຸກມື້ເປັນປະຈຳໜຶ່ງປີ. ພວກເຮົາກໍຄືກັນ ຖ້າພວກເຮົາຍອມຮັບການປ່ຽນແປງ ພວກເຮົາກໍຈະມີຄວາມສຸກກັບສິ່ງທີ່ເຮົາເຮັດໄດ້.
10. ພີ່ນ້ອງຍິງຄົນໜຶ່ງຮັບມືກັບການປ່ຽນແປງຄັ້ງໃຫຍ່ໃນຊີວິດໄດ້ແນວໃດ?
10 ເບິ່ງໄປທີ່ອະນາຄົດແລະມີຄວາມຄິດໃນແງ່ບວກ. ຄຣິດສະຕິນາພີ່ນ້ອງຍິງຄົນຣູມານີທີ່ອາໄສຢູ່ໃນປະເທດຍີ່ປຸ່ນ ລາວຮູ້ສຶກທໍ້ໃຈຕອນທີ່ມີການຍຸບປະຊາຄົມພາສາອັງກິດທີ່ລາວສົມທົບຢູ່. ແຕ່ລາວກໍບໍ່ໄດ້ຍຶດຕິດຢູ່ກັບອະດີດ. ລາວຕັດສິນໃຈສົມທົບກັບປະຊາຄົມພາສາຍີ່ປຸ່ນແລະພະຍາຍາມສຸດຄວາມສາມາດທີ່ຈະປະກາດໃນພາສາຍີ່ປຸ່ນ. ຄຣິດສະຕິນາຂໍໃຫ້ຜູ້ຍິງຄົນໜຶ່ງທີ່ເຄີຍເຮັດວຽກນຳກັນມາສອນພາສາຍີ່ປຸ່ນໃຫ້ລາວໂດຍໃຊ້ຄຳພີໄບເບິນແລະຈຸນລະສານຊີວິດທີ່ມີຄວາມສຸກຕະຫຼອດໄປ! ຜູ້ຍິງຄົນນັ້ນກໍຕອບຕົກລົງ. ນີ້ຈຶ່ງເຮັດໃຫ້ຄຣິດສະຕິນາເວົ້າພາສາຍີ່ປຸ່ນໄດ້ດີຂຶ້ນແລະຜູ້ຍິງຄົນນັ້ນກໍເລີ່ມສົນໃຈຄຳພີໄບເບິນ. ເມື່ອເຮົາເບິ່ງໄປທີ່ອະນາຄົດແລະຄິດໃນແງ່ບວກ ການປ່ຽນແປງແບບທີ່ບໍ່ຄາດຄິດກໍອາດຈະເຮັດໃຫ້ເຮົາເຈິສິ່ງດີໆໃນແບບທີ່ບໍ່ຄາດຄິດກໍໄດ້.
11. ຄູ່ຜົວເມຍໜຶ່ງໄດ້ຮັບມືແນວໃດຕອນທີ່ມີບັນຫາທາງດ້ານເສດຖະກິດ?
11 ເຮັດສິ່ງຕ່າງໆເພື່ອຄົນອື່ນ. ພີ່ນ້ອງຄູ່ຜົວເມຍໜຶ່ງຢູ່ໃນປະເທດທີ່ວຽກຂອງເຮົາຖືກສັ່ງຫ້າມ ເຂົາເຈົ້າເລີ່ມມີບັນຫາທາງດ້ານການເງິນຕອນທີ່ລະບົບເສດຖະກິດລົ້ມລະລາຍ. ແລ້ວເຂົາເຈົ້າໄດ້ປັບຕົວແນວໃດ? ຢ່າງທຳອິດ ເຂົາເຈົ້າພະຍາຍາມໃຊ້ຊີວິດແບບພໍພຽງແທນທີ່ຈະຄິດເຖິງແຕ່ບັນຫາຂອງຕົວເອງ. ເຂົາເຈົ້າໄດ້ຕັດສິນໃຈທີ່ຈະພະຍາຍາມຊ່ວຍເຫຼືອຄົນອື່ນໂດຍໄປປະກາດຫຼາຍຂຶ້ນ. (ກຈກ. 20:35) ຜູ້ທີ່ເປັນຜົວບອກວ່າ “ເມື່ອເຮົາເຮັດວຽກປະກາດຫຼາຍຂຶ້ນເຮັດໃຫ້ເຮົາບໍ່ໄດ້ໃຊ້ເວລາຫຼາຍໃນການຄິດໃນແງ່ລົບເລື່ອງບັນຫາຂອງຕົວເອງ ແຕ່ເຮົາມີເວລາຫຼາຍຂຶ້ນທີ່ຈະຄິດເຖິງຄວາມຕ້ອງການຂອງພະເຢໂຫວາ.” ດັ່ງນັ້ນ ເມື່ອສະພາບການຂອງເຮົາປ່ຽນໄປເຮົາຄວນຈື່ໄວ້ວ່າ ເປັນເລື່ອງສຳຄັນທີ່ເຮົາຕ້ອງຊ່ວຍເຫຼືອຄົນອື່ນຕໍ່ໆໄປໂດຍສະເພາະການເຮັດວຽກປະກາດ.
12. ຕົວຢ່າງຂອງໂປໂລຊ່ວຍເຮົາໃຫ້ປັບຕົວແນວໃດເມື່ອເຮົາປະກາດ?
12 ເມື່ອເຮົາເຮັດວຽກປະກາດເຮົາຕ້ອງຜ່ອນສັ້ນຜ່ອນຍາວ ເພາະວ່າເຮົາເຈິກັບຄົນທີ່ມີຄວາມເຊື່ອແຕກຕ່າງກັນ ຄິດບໍ່ຄືກັນ ແລະມີວັດທະນະທຳທີ່ແຕກຕ່າງກັນ. ອັກຄະສາວົກໂປໂລກໍເປັນຄົນທີ່ພ້ອມຈະປັບຕົວ ແລະເຮົາກໍສາມາດຮຽນຈາກຕົວຢ່າງຂອງລາວໄດ້. ພະເຢຊູແຕ່ງຕັ້ງໃຫ້ໂປໂລເປັນ “ອັກຄະສາວົກທີ່ຖືກສົ່ງໄປຫາຄົນຕ່າງຊາດ.” (ຣມ. 11:13) ດັ່ງນັ້ນ ໂປໂລປະກາດກັບທັງຄົນຢິວ ຄົນກຣີກ ປັນຍາຊົນ ສາມັນຊົນ ເຈົ້າໜ້າທີ່ລັດ ແລະກະສັດ. ເພື່ອທີ່ໂປໂລຈະປະກາດໃນແບບທີ່ເຂົ້າເຖິງຫົວໃຈຂອງຄົນທີ່ມີຄວາມແຕກຕ່າງຫຼາຍຂະໜາດນັ້ນໄດ້ ລາວໄດ້ຍອມປັບຕົວ “ເປັນຄົນທຸກຊະນິດ.” (1ກຣ. 9:19-23) ລາວຄິດເຖິງຄວາມເຊື່ອແລະວັດທະນະທຳຂອງຜູ້ຟັງແລະປັບວິທີທີ່ຈະປະກາດກັບເຂົາເຈົ້າ. ພວກເຮົາສາມາດເຮັດແບບນັ້ນໄດ້ຄືກັນ. ເພື່ອທີ່ເຮົາຈະເຮັດວຽກຮັບໃຊ້ໄດ້ເກັ່ງຂຶ້ນ ເຮົາກໍຕ້ອງພ້ອມທີ່ຈະປັບຕົວແລະພະຍາຍາມຫາວິທີທີ່ດີທີ່ສຸດທີ່ຈະປະກາດໃຫ້ເໝາະກັບຜູ້ຟັງແຕ່ລະຄົນ.
ຍອມຮັບຄວາມຄິດຂອງຄົນອື່ນ
ຖ້າເຮົາເປັນຄົນມີເຫດຜົນ ເຮົາຈະຍອມຮັບຄວາມຄິດຂອງຄົນອື່ນ (ເບິ່ງຂໍ້ 13)
13. ຕາມທີ່ບອກໄວ້ໃນ 1 ໂກຣິນໂທ 8:9 ຖ້າເຮົາຍອມຮັບຄວາມຄິດຂອງຄົນອື່ນ ເຮົາຈະຫຼີກລ່ຽງສິ່ງທີ່ເປັນອັນຕະລາຍຫຍັງ?
13 ຄົນທີ່ມີເຫດຜົນຈະຍອມຮັບຄວາມຄິດຂອງຄົນອື່ນ. ຕົວຢ່າງເຊັ່ນ: ພີ່ນ້ອງຍິງບາງຄົນມັກແຕ່ງໜ້າ ແຕ່ບາງຄົນກໍບໍ່ມັກແຕ່ງໜ້າເລີຍ. ພີ່ນ້ອງບາງຄົນກິນເຫຼົ້າພໍປະມານ ແຕ່ບາງຄົນກໍຕັດສິນໃຈທີ່ຈະບໍ່ກິນເຫຼົ້າເລີຍ. ນອກຈາກນັ້ນ ພີ່ນ້ອງທຸກຄົນຢາກມີສຸຂະພາບທີ່ແຂງແຮງດີ ແຕ່ກໍເລືອກວິທີເບິ່ງແຍງສຸຂະພາບບໍ່ຄືກັນ. ຖ້າເຮົາຄິດວ່າຄວາມຄິດຂອງເຮົາດີທີ່ສຸດແລະພະຍາຍາມເຮັດໃຫ້ຄົນອື່ນໃນປະຊາຄົມເຮັດຕາມ ເຮົາອາດເຮັດໃຫ້ບາງຄົນບໍ່ສະບາຍໃຈແລະເຮັດໃຫ້ປະຊາຄົມແຕກແຍກໄດ້. ເຮົາຄືຊິບໍ່ຢາກໃຫ້ເປັນແບບນັ້ນ! (ອ່ານ 1 ໂກຣິນໂທ 8:9; 10:23, 24) ຂໍໃຫ້ເຮົາມາເບິ່ງສອງເລື່ອງນຳກັນທີ່ສະແດງວ່າ ການເອົາຫຼັກການໃນຄຳພີໄບເບິນມາໃຊ້ຈະຊ່ວຍເຮົາໃຫ້ເປັນຄົນມີເຫດຜົນແລະເຮັດໃຫ້ມີສັນຕິສຸກໃນປະຊາຄົມແນວໃດ.
ຖ້າເຮົາເປັນຄົນມີເຫດຜົນ ເຮົາຈະຍອມຮັບຄວາມຄິດຂອງຄົນອື່ນ (ເບິ່ງຂໍ້ 14)
14. ໃນຄຳພີໄບເບິນມີຫຼັກການຫຍັງແດ່ທີ່ຊ່ວຍເຮົາໃນເລື່ອງການແຕ່ງໂຕແລະຊົງຜົມ?
14 ການແຕ່ງໂຕແລະຊົງຜົມ. ພະເຢໂຫວາບໍ່ໄດ້ຕັ້ງກົດຕາຍໂຕໃນເລື່ອງນີ້ ແຕ່ເພິ່ນກໍໄດ້ໃຫ້ຫຼັກການກັບເຮົາ. ເຮົາຕ້ອງແຕ່ງໂຕແບບທີ່ເໝາະສົມກັບການເປັນຜູ້ຮັບໃຊ້ຂອງພະເຈົ້າ. ການແຕ່ງໂຕຂອງເຮົາຄວນເຮັດໃຫ້ຄົນອື່ນເຫັນວ່າ ເຮົາເປັນຄົນມີເຫດຜົນ ສະຫງ່ຽມຈຽມຕົວ ແລະ “ມີສະຕິດີ.” (1ຕມ. 2:9, 10; 1ປຕ. 3:3) ດັ່ງນັ້ນ ເຮົາຈະບໍ່ແຕ່ງໂຕແບບທີ່ເຮັດໃຫ້ຄົນອື່ນສົນໃຈທີ່ຕົວເຮົາຫຼາຍເກີນໄປ. ຫຼັກການໃນຄຳພີໄບເບິນຍັງຊ່ວຍຜູ້ດູແລບໍ່ໃຫ້ຕັ້ງກົດຂຶ້ນມາເອງວ່າພີ່ນ້ອງຕ້ອງແຕ່ງໂຕແນວໃດແລະມີຊົງຜົມແບບໃດ. ຕົວຢ່າງເຊັ່ນ: ໃນປະຊາຄົມໜຶ່ງມີພີ່ນ້ອງຊາຍທີ່ເປັນໄວລຸ້ນຫຼາຍຄົນຕັດຊົງຜົມທີ່ກຳລັງຮິດ ເຖິງມັນຈະສັ້ນແຕ່ເບິ່ງແລ້ວກໍບໍ່ຄ່ອຍຮຽບຮ້ອຍປານໃດ ຖ້າຜູ້ດູແລຢາກຈະຊ່ວຍລາວ ເຂົາເຈົ້າຈະເຮັດແນວໃດເພື່ອຈະບໍ່ເປັນການຕັ້ງກົດ? ຜູ້ດູແລໝວດແນະນຳຜູ້ດູແລວ່າເຂົາເຈົ້າອາດຈະຕ້ອງລົມກັບໄວລຸ້ນເຫຼົ່ານີ້ວ່າ “ຖ້າເຈົ້າເຮັດສ່ວນເທິງເວທີແລ້ວພີ່ນ້ອງເບິ່ງແຕ່ການແຕ່ງໂຕແລະຊົງຜົມຂອງເຈົ້າແທນທີ່ຈະສົນໃຈສິ່ງທີ່ເຈົ້າເວົ້າ ກໍສະແດງວ່າເຈົ້າກຳລັງມີບັນຫາເລື່ອງການແຕ່ງໂຕແລະຊົງຜົມ.” ການອະທິບາຍແບບງ່າຍໆນີ້ຊ່ວຍພີ່ນ້ອງໄວລຸ້ນໃຫ້ຮູ້ວ່າເຂົາເຈົ້າຄວນເຮັດແນວໃດແລະຜູ້ດູແລກໍບໍ່ຄວນຕັ້ງກົດຂຶ້ນມາເອງ. d
ຖ້າເຮົາເປັນຄົນມີເຫດຜົນ ເຮົາຈະຍອມຮັບຄວາມຄິດຂອງຄົນອື່ນ (ເບິ່ງຂໍ້ 15)
15. ຫຼັກການໃນຄຳພີໄບເບິນຂໍ້ໃດແດ່ຊ່ວຍເຮົາໃນການຕັດສິນໃຈກ່ຽວກັບການເບິ່ງແຍງສຸຂະພາບ? (ໂຣມ 14:5)
15 ການເບິ່ງແຍງສຸຂະພາບ. ຄລິດສະຕຽນແຕ່ລະຄົນຕ້ອງຕັດສິນໃຈເອົາເອງວ່າຈະເບິ່ງແຍງສຸຂະພາບຂອງຕົວເອງແນວໃດ. (ຄລຕ. 6:5) ຄຳພີໄບເບິນມີບໍ່ເທົ່າໃດຂໍ້ທີ່ຊ່ວຍຄລິດສະຕຽນໃນເລື່ອງວິທີເບິ່ງແຍງສຸຂະພາບ ເຊິ່ງກໍຄື: ຄຳສັ່ງຫ້າມໃສ່ເລືອດແລະຫ້າມກ່ຽວຂ້ອງກັບປີສາດ. (ກຈກ. 15:20; ຄລຕ. 5:19, 20) ນອກຈາກເລື່ອງເຫຼົ່ານີ້ແລ້ວ ເຮົາກໍຕ້ອງຕັດສິນໃຈເອົາເອງວ່າຈະເບິ່ງແຍງສຸຂະພາບຂອງເຮົາແນວໃດ. ພີ່ນ້ອງບາງຄົນເລືອກທີ່ຈະປິ່ນປົວແລະຮັກສາສຸຂະພາບຕາມວົງການການແພດເທົ່ານັ້ນ ສ່ວນບາງຄົນກໍເລືອກວິທີອື່ນ. ບໍ່ວ່າເຮົາເອງຈະມັກການປິ່ນປົວແລະຮັກສາສຸຂະພາບແບບໃດແບບໜຶ່ງເປັນພິເສດ ແຕ່ເຮົາຕ້ອງນັບຖືສິດໃນການຕັດສິນໃຈຂອງຄົນອື່ນທີ່ຈະເລືອກເອງວ່າຈະປິ່ນປົວແລະຮັກສາແບບໃດ. ດັ່ງນັ້ນ ຈຸດຕໍ່ໄປນີ້ຈະຊ່ວຍເຮົາເລື່ອງບັນຫານີ້: (1) ມີແຕ່ການປົກຄອງຂອງພະເຈົ້າເທົ່ານັ້ນທີ່ຈະແກ້ໄຂແລະປິ່ນປົວພະຍາດທຸກຢ່າງຢ່າງຖາວອນ. (ອຊຢ. 33:24) (2) ຄລິດສະຕຽນແຕ່ລະຄົນຕ້ອງ “ໝັ້ນໃຈ” ສິ່ງທີ່ຕົວເອງເລືອກ. (ອ່ານໂຣມ 14:5) (3) ເຮົາຈະບໍ່ຕັດສິນຄົນອື່ນ ຫຼືເຮັດໃຫ້ຄົນອື່ນຫຼົງເຮັດຜິດແລ້ວຖິ້ມຄວາມເຊື່ອ. (ຣມ. 14:13) (4) ຄລິດສະຕຽນສະແດງຄວາມຮັກກັບພີ່ນ້ອງ ແລະເຖິງວ່າເຮົາຈະມີສິດທີ່ຈະເລືອກການເບິ່ງແຍງສຸຂະພາບຂອງເຮົາເອງ ແຕ່ເຮົາຈະບໍ່ໃຫ້ເລື່ອງນີ້ສຳຄັນກວ່າຄວາມເປັນນ້ຳໜຶ່ງໃຈດຽວກັນໃນປະຊາຄົມ. (ຣມ. 14:15, 19, 20) ຖ້າເຮົາຈື່ຈຸດສຳຄັນເຫຼົ່ານີ້ ເຮົາກໍຈະມີສາຍສຳພັນທີ່ໃກ້ຊິດກັບພີ່ນ້ອງແລະເຮັດໃຫ້ປະຊາຄົມມີສັນຕິສຸກ.
ຖ້າເຮົາເປັນຄົນມີເຫດຜົນ ເຮົາຈະຍອມຮັບຄວາມຄິດຂອງຄົນອື່ນ (ເບິ່ງຂໍ້ 16)
16. ຜູ້ດູແລຈະສະແດງວ່າເປັນຄົນມີເຫດຜົນແນວໃດຕອນທີ່ເຮັດວຽກກັບຜູ້ດູແລຄົນອື່ນ? (ເບິ່ງຮູບພາບ)
16 ຜູ້ດູແລຕ້ອງເປັນຕົວຢ່າງທີ່ດີໃນເລື່ອງການເປັນຄົນມີເຫດຜົນ. (1ຕມ. 3:2, 3) ຕົວຢ່າງເຊັ່ນ ຜູ້ດູແລຈະບໍ່ຄິດວ່າຜູ້ດູແລຄົນອື່ນຕ້ອງເຫັນດີກັບຄວາມຄິດຂອງລາວຍ້ອນວ່າລາວອາຍຸຫຼາຍກວ່າ. ຜູ້ດູແລຕ້ອງຈື່ໄວ້ວ່າ ພະເຢໂຫວາສາມາດໃຊ້ພະລັງບໍລິສຸດເພື່ອຊ່ວຍຜູ້ດູແລຄົນໃດກໍໄດ້ໃຫ້ເວົ້າໃນສິ່ງທີ່ຈະຊ່ວຍໃຫ້ຜູ້ດູແລທັງຄະນະຕັດສິນໃຈໄດ້ຢ່າງສະຫຼາດ. ແລະຖ້າຜູ້ດູແລສ່ວນໃຫຍ່ໃນຄະນະເຫັນດີກັບເລື່ອງໜຶ່ງທີ່ບໍ່ໄດ້ຜິດຕໍ່ຫຼັກການໃນຄຳພີໄບເບິນ ຜູ້ດູແລທີ່ມີເຫດຜົນກໍຈະຍອມຮັບການຕັດສິນໃຈແບບນັ້ນ ເຖິງວ່າລາວເອງຈະບໍ່ເຫັນດີນຳກໍຕາມ.
ປະໂຫຍດຂອງການເປັນຄົນມີເຫດຜົນ
17. ເຮົາຈະໄດ້ຮັບປະໂຫຍດຫຍັງແດ່ຖ້າເຮົາເປັນຄົນທີ່ມີເຫດຜົນ?
17 ຖ້າເຮົາເປັນຄົນມີເຫດຜົນ ເຮົາຈະໄດ້ຮັບປະໂຫຍດຫຼາຍຢ່າງ. ເຮົາຈະມີສາຍສຳພັນທີ່ດີກັບຄົນອື່ນແລະປະຊາຄົມຈະມີຄວາມສະຫງົບສຸກ. ນອກຈາກນັ້ນ ເຮົາມີຄວາມສຸກທີ່ໄດ້ນະມັດສະການພະເຢໂຫວາຢ່າງເປັນນ້ຳໜຶ່ງໃຈດຽວກັນກັບພີ່ນ້ອງທີ່ມີວັດທະນະທຳທີ່ຫຼາກຫຼາຍແລະບຸກຄະລິກທີ່ແຕກຕ່າງກັນ. ສຳຄັນທີ່ສຸດແມ່ນເຮົາມີຄວາມສຸກທີ່ຮູ້ວ່າ ເຮົາກຳລັງຮຽນແບບພະເຢໂຫວາພະເຈົ້າທີ່ມີເຫດຜົນ.
ເພງ 90 ໃຫ້ກຳລັງໃຈກັນແລະກັນ
a ພະເຢໂຫວາກັບພະເຢຊູເປັນຜູ້ທີ່ມີເຫດຜົນ ແລະເພິ່ນກໍຢາກໃຫ້ເຮົາເປັນຄົນມີເຫດຜົນຄືກັນ. ຖ້າເຮົາເປັນຄົນມີເຫດຜົນ ມັນກໍຈະເປັນເລື່ອງງ່າຍສຳລັບເຮົາທີ່ຈະປັບຕົວເມື່ອເຈິການປ່ຽນແປງໃນຊີວິດ ເຊັ່ນ: ເມື່ອເຮົາມີບັນຫາສຸຂະພາບຫຼືເມື່ອເຮົາມີບັນຫາເລື່ອງການເງິນ. ນອກຈາກນັ້ນ ເມື່ອເຮົາເປັນຄົນມີເຫດຜົນ ເຮົາຈະສົ່ງເສີມຄວາມສະຫງົບສຸກແລະເປັນນ້ຳໜຶ່ງໃຈດຽວກັນໃນປະຊາຄົມ.
b ເບິ່ງບົດຄວາມ “ຂ້ອຍຈະຮັບມືກັບການປ່ຽນແປງໄດ້ແນວໃດ?” ໃນຕື່ນເຖິດ! ສະບັບທີ 4 ປີ 2016 (ພາສາໄທ)
c ໃຫ້ເບິ່ງວິດີໂອສຳພາດພີ່ນ້ອງດະມິຕຣີ ມິໄຮລອບໃນບົດຄວາມພະເຢໂຫວາປ່ຽນການຂົ່ມເຫງໃຫ້ເປັນການປະກາດ ເດືອນມີນາ-ເມສາ ປີ 2021 ໃນຄູ່ມືປະຊຸມຊີວິດແລະວຽກຮັບໃຊ້
d ເບິ່ງຂໍ້ມູນເພີ່ມເຕີມໃນປຶ້ມຊີວິດທີ່ມີຄວາມສຸກຕະຫຼອດໄປ! ບົດ 52 ເລື່ອງການແຕ່ງໂຕ
