ບົດຄວາມສຶກສາທີ 30
ໃຫ້ຮັກພະເຢໂຫວາແລະຮັກຄົນອື່ນຫຼາຍຂຶ້ນເລື້ອຍໆ
“ໃຫ້ . . . ສະແດງຄວາມຮັກ ແລ້ວພວກເຮົາກໍຈະເຕີບໂຕເປັນຜູ້ໃຫຍ່ໃນທຸກດ້ານ.”—ອຟຊ. 4:15
ເພງ 2 ຊື່ຂອງພະອົງຄືເຢໂຫວາ
ໃຈຄວາມສຳຄັນ a
1. ຕອນທີ່ເຈົ້າເລີ່ມຮຽນຄຳພີໄບເບິນໃໝ່ໆເຈົ້າໄດ້ຮຽນຄວາມຈິງເລື່ອງຫຍັງແດ່?
ເຈົ້າຈື່ຕອນທີ່ເຈົ້າເລີ່ມຮຽນຄຳພີໄບເບິນໃໝ່ໆໄດ້ບໍ? ຕອນນັ້ນເຈົ້າອາດຈະແປກໃຈຫຼາຍທີ່ຮູ້ວ່າພະເຈົ້າມີຊື່ ຫຼືເຈົ້າອາດຈະຮູ້ສຶກໂລ່ງໃຈທີ່ຮູ້ວ່າພະເຈົ້າບໍ່ໄດ້ທໍລະມານຄົນຕາຍໃນນະລົກ ແລະເຈົ້າອາດຈະຕື່ນເຕັ້ນດີໃຈທີ່ຮູ້ວ່າຈະໄດ້ເຈິກັບຄົນທີ່ເຈົ້າຮັກທີ່ຕາຍໄປແລ້ວແລະໄດ້ຢູ່ກັບເຂົາເຈົ້າໃນໂລກໃໝ່ທີ່ເປັນສວນອຸທິຍານ.
2. ນອກຈາກທີ່ໄດ້ຮຽນຄວາມຈິງໃນຄຳພີໄບເບິນແລ້ວ ເຈົ້າຈະເຮັດແນວໃດເພື່ອຈະກ້າວໜ້າຕໍ່ໆໄປ? (ເອເຟໂຊ 5:1, 2)
2 ເມື່ອເຈົ້າຮຽນຄຳພີໄບເບິນເຈົ້າກໍແຮ່ງຮັກພະເຢໂຫວາຫຼາຍຂຶ້ນ. ຄວາມຮັກນີ້ໄດ້ກະຕຸ້ນເຈົ້າໃຫ້ເອົາສິ່ງທີ່ໄດ້ຮຽນໄປໃຊ້ ແລະເມື່ອເຈົ້າເຮັດຕາມຫຼັກການໃນຄຳພີໄບເບິນ ເຈົ້າກໍຕັດສິນໃຈເລື່ອງຕ່າງໆໄດ້ດີຂຶ້ນ. ນອກຈາກນັ້ນ ເຈົ້າໄດ້ປັບຄວາມຄິດແລະເຮັດສິ່ງທີ່ຖືກຕ້ອງເພາະເຈົ້າຢາກເຮັດໃຫ້ພະເຢໂຫວາພໍໃຈ ແລະເຈົ້າຍັງໄດ້ພະຍາຍາມຮຽນແບບພະເຢໂຫວາພໍ່ທີ່ຢູ່ໃນສະຫວັນຄືກັບທີ່ເດັກນ້ອຍຮຽນແບບພໍ່ແມ່ຂອງລາວ.—ອ່ານເອເຟໂຊ 5:1, 2
3. ເຮົາອາດຈະຖາມຕົວເອງໃນເລື່ອງຫຍັງແດ່?
3 ເຮົາອາດຖາມຕົວເອງວ່າ ‘ຕອນນີ້ຂ້ອຍຮັກພະເຢໂຫວາຫຼາຍກວ່າຕອນທີ່ຂ້ອຍຫາກໍຮັບບັບເຕມາບໍ? ຫຼັງຈາກທີ່ຂ້ອຍຮັບບັບເຕມາແລ້ວ ຂ້ອຍຄິດຄືກັບພະເຢໂຫວາແລະຮຽນແບບເພິ່ນຫຼາຍຂຶ້ນບໍ ໂດຍສະເພາະແມ່ນການສະແດງຄວາມຮັກຕໍ່ພີ່ນ້ອງ?’ ຖ້າເຈົ້າຮູ້ສຶກວ່າເຈົ້າບໍ່ໄດ້ຮັກພະເຢໂຫວາແລະຄົນອື່ນຫຼາຍຄືແຕ່ກ່ອນ ກໍຢ່າຟ້າວທໍ້ໃຈ. ຄລິດສະຕຽນໃນສະຕະວັດທຳອິດບາງຄົນກໍເຄີຍເປັນແບບນັ້ນ. ພະເຢຊູບໍ່ໄດ້ໝົດຫວັງໃນຕົວເຂົາເຈົ້າ ເພິ່ນກໍຈະບໍ່ໝົດຫວັງໃນຕົວເຮົາຄືກັນ. (ພນມ. 2:4, 7) ເພິ່ນຮູ້ວ່າເຮົາສາມາດມີຄວາມຮັກເພີ່ມຂຶ້ນຄືກັບຕອນທີ່ເຮົາເລີ່ມຮຽນຄຳພີໄບເບິນໃໝ່ໆໄດ້.
4. ເຮົາຈະຮຽນຫຍັງໃນບົດຄວາມນີ້?
4 ໃນບົດຄວາມນີ້ເຮົາຈະມາເບິ່ງວ່າ ເຮົາຈະສະແດງຄວາມຮັກຕໍ່ພະເຢໂຫວາແລະຕໍ່ຄົນອື່ນຫຼາຍຂຶ້ນໄດ້ແນວໃດ ແລະຖ້າເຮົາເຮັດແບບນັ້ນ ເຮົາແລະຄົນອື່ນຈະໄດ້ຮັບປະໂຫຍດຫຍັງແດ່?
ຮັກພະເຢໂຫວາຫຼາຍຂຶ້ນ
5-6. ຕອນທີ່ໂປໂລເຮັດວຽກຮັບໃຊ້ລາວເຈິບັນຫາຫຍັງແດ່? ແຕ່ສິ່ງໃດຊ່ວຍໂປໂລໃຫ້ຮັບໃຊ້ພະເຢໂຫວາຕໍ່ໆໄປໄດ້?
5 ອັກຄະສາວົກໂປໂລຮັບໃຊ້ພະເຢໂຫວາຢ່າງມີຄວາມສຸກ ແຕ່ລາວກໍເຈິບັນຫາຫຼາຍຢ່າງຄືກັນ. ໂປໂລຕ້ອງໄດ້ເດີນທາງໄກຢູ່ເລື້ອຍໆແລະການເດີນທາງໃນສະໄໝນັ້ນກໍບໍ່ງ່າຍເລີຍ. ບາງເທື່ອລາວເຈິ “ອັນຕະລາຍໃນແມ່ນ້ຳ” ແລະ “ອັນຕະລາຍຈາກໂຈນປຸ້ນ” ແລະລາວກໍເຄີຍຖືກພວກຜູ້ຕໍ່ຕ້ານຕີ. (2ກຣ. 11:23-27) ນອກຈາກນັ້ນ ມີຫຼາຍເທື່ອທີ່ພີ່ນ້ອງຄລິດສະຕຽນບໍ່ເຫັນຄ່າທີ່ລາວພະຍາຍາມຊ່ວຍເຂົາເຈົ້າ.—2ກຣ. 10:10; ຟລປ. 4:15
6 ສິ່ງໃດຊ່ວຍໂປໂລໃຫ້ພະຍາຍາມຮັບໃຊ້ພະເຢໂຫວາຕໍ່ໆໄປ? ໂປໂລຮູ້ດີວ່າພະເຢໂຫວາເປັນພະເຈົ້າແບບໃດ. ລາວຮູ້ເລື່ອງນີ້ຈາກຄຳພີໄບເບິນແລະຈາກປະສົບການຂອງຕົວເອງ. ລາວໝັ້ນໃຈວ່າພະເຢໂຫວາຮັກລາວຫຼາຍ ແລະລາວເອງກໍຮັກພະເຢໂຫວາຫຼາຍຄືກັນ. (ຣມ. 8:38, 39; ອຟຊ. 2:4, 5) ໂປໂລສະແດງຄວາມຮັກຕໍ່ພະເຢໂຫວາໂດຍ “ຮັບໃຊ້ພວກຜູ້ບໍລິສຸດແລະຍັງຮັບໃຊ້ຢູ່.”—ຮຣ. 6:10
7. ວິທີໜຶ່ງທີ່ເຮົາຈະຮັກພະເຢໂຫວາຫຼາຍຂຶ້ນແມ່ນຫຍັງ?
7 ເຮົາຈະຮັກພະເຢໂຫວາຫຼາຍຂຶ້ນໄດ້ໂດຍການໝັ່ນອ່ານແລະສຶກສາຄຳພີໄບເບິນ. ທຸກເທື່ອທີ່ອ່ານຄຳພີໄບເບິນ ໃຫ້ພະຍາຍາມຖາມຕົວເອງວ່າ: ‘ເລື່ອງທີ່ຂ້ອຍອ່ານສະແດງໃຫ້ເຫັນແນວໃດວ່າພະເຢໂຫວາຮັກຂ້ອຍ ແລະເລື່ອງນີ້ຊ່ວຍຂ້ອຍແນວໃດໃຫ້ຮັກພະເຢໂຫວາຫຼາຍຂຶ້ນ?’
8. ການອະທິດຖານຊ່ວຍເຮົາໃຫ້ຮັກພະເຢໂຫວາຫຼາຍຂຶ້ນໄດ້ແນວໃດ?
8 ອີກວິທີໜຶ່ງທີ່ເຮົາຈະຮັກພະເຢໂຫວາຫຼາຍຂຶ້ນກໍຄືການອະທິດຖານລະບາຍຄວາມຮູ້ສຶກກັບພະເຢໂຫວາເປັນປະຈຳ. (ເພງ. 25:4, 5) ພະເຢໂຫວາຈະຕອບຄຳອະທິດຖານຂອງເຮົາແນ່ນອນ. (1ຢຮ. 3:21, 22) ພີ່ນ້ອງຍິງທີ່ຊື່ຂັນທີ່ຢູ່ອາຊີບອກວ່າ: “ຕອນທຳອິດຂ້ອຍຮັກພະເຢໂຫວາກໍຍ້ອນສິ່ງທີ່ຂ້ອຍຮຽນຮູ້ກ່ຽວກັບເພິ່ນ. ແຕ່ເມື່ອຂ້ອຍເຫັນວ່າເພິ່ນຕອບຄຳອະທິດຖານຂອງຂ້ອຍ ຂ້ອຍກໍແຮ່ງຮັກເພິ່ນຫຼາຍຂຶ້ນເລື້ອຍໆ. ນີ້ຈຶ່ງກະຕຸ້ນຂ້ອຍໃຫ້ຢາກເຮັດສິ່ງທີ່ເພິ່ນພໍໃຈ.” b
ຮັກຄົນອື່ນຫຼາຍຂຶ້ນ
9. ເຮົາຮູ້ໄດ້ແນວໃດວ່າຕີໂມທຽວກ້າວໜ້າໃນການສະແດງຄວາມຮັກຕໍ່ຄົນອື່ນ?
9 ຫຼາຍປີຫຼັງຈາກທີ່ໂປໂລເຂົ້າມາເປັນຄລິດສະຕຽນ ລາວໄດ້ເຈິກັບໄວລຸ້ນຜູ້ຊາຍຄົນໜຶ່ງທີ່ຊື່ຕີໂມທຽວ. ຕີໂມທຽວຮັກພະເຢໂຫວາແລະຮັກຄົນອື່ນ. ໂປໂລບອກກັບພີ່ນ້ອງໃນຟີລິບປອຍວ່າ: “ຂ້ອຍບໍ່ມີໃຜເລີຍທີ່ມີນ້ຳໃຈຄືກັບ [ຕີໂມທຽວ] ທີ່ຫ່ວງໃຍພວກເຈົ້າແທ້ໆ.” (ຟລປ. 2:20) ໂປໂລບໍ່ໄດ້ຊົມເຊີຍຕີໂມທຽວທີ່ບໍລິຫານຈັດການເກັ່ງຫຼືສອນເກັ່ງ ແຕ່ໂປໂລປະທັບໃຈທີ່ຕີໂມທຽວຮັກພີ່ນ້ອງຫຼາຍ. ດັ່ງນັ້ນ ພີ່ນ້ອງໃນປະຊາຄົມທີ່ຕີໂມທຽວຈະໄປຢ້ຽມຢາມຄືຊິດີໃຈຫຼາຍທີ່ຈະໄດ້ເຈິກັບລາວ.—1ກຣ. 4:17
10. ແອນນາກັບຜົວຂອງລາວສະແດງຄວາມຮັກຕໍ່ພີ່ນ້ອງແນວໃດ?
10 ເຮົາເອງກໍຄືກັນຄວນຫາວິທີທີ່ຈະຊ່ວຍເຫຼືອພີ່ນ້ອງ. (ຮຣ. 13:16) ໃຫ້ເຮົາມາເບິ່ງປະສົບການຂອງພີ່ນ້ອງແອນນາທີ່ເວົ້າເຖິງໃນບົດຄວາມກ່ອນໜ້ານີ້. ຫຼັງຈາກທີ່ເກີດພາຍຸຮ້າຍແຮງ ແອນນາກັບຜົວຂອງລາວໄດ້ໄປຢາມພີ່ນ້ອງຄອບຄົວໜຶ່ງ ແລະເຫັນວ່າຫຼັງຄາເຮືອນຂອງເຂົາເຈົ້າພັງ. ເຂົາເຈົ້າກໍເລີຍບໍ່ມີເຄື່ອງນຸ່ງທີ່ສະອາດໃສ່. ແອນນາເວົ້າວ່າ: “ເຮົາໄດ້ເອົາເຄື່ອງນຸ່ງຂອງເຂົາເຈົ້າມາຊັກໃຫ້ເຂົາເຈົ້າ. ທີ່ຈິງ ສິ່ງທີ່ເຮົາເຮັດເປັນສິ່ງເລັກໆນ້ອຍໆແຕ່ມັນກໍເຮັດໃຫ້ເຮົາສະໜິດກັບເຂົາເຈົ້າຫຼາຍຂຶ້ນຈົນຮອດທຸກມື້ນີ້.” ແອນນາກັບຜົວຂອງລາວສະແດງຄວາມຮັກຕໍ່ພີ່ນ້ອງໂດຍລົງມືຊ່ວຍເຫຼືອເຂົາເຈົ້າ.—1ຢຮ. 3:17, 18
11. (ກ) ການທີ່ເຮົາສະແດງຄວາມຮັກຕໍ່ຄົນອື່ນອາດສົ່ງຜົນຕໍ່ເຂົາເຈົ້າແນວໃດ? (ຂ) ຕາມທີ່ບອກໄວ້ໃນສຸພາສິດ 19:17 ພະເຢໂຫວາຮູ້ສຶກແນວໃດຖ້າເຮົາສະແດງຄວາມຮັກຕໍ່ຄົນອື່ນ?
11 ເມື່ອເຮົາເຮັດດີແລະສະແດງຄວາມຮັກຕໍ່ຄົນອື່ນ ເຂົາເຈົ້າຈະເຫັນວ່າເຮົາພະຍາຍາມຮຽນແບບພະເຢໂຫວາ ແລະຫຼາຍເທື່ອເຂົາເຈົ້າອາດຈະເຫັນຄ່າຄວາມດີທີ່ເຮົາເຮັດຕໍ່ເຂົາເຈົ້າຫຼາຍກວ່າທີ່ເຮົາຄິດ. ພີ່ນ້ອງຂັນທີ່ເວົ້າເຖິງກ່ອນໜ້ານີ້ຮູ້ສຶກປະທັບໃຈພີ່ນ້ອງຍິງຫຼາຍຄົນທີ່ເຄີຍຊ່ວຍເຫຼືອລາວ. ລາວບອກວ່າ: “ຂ້ອຍຂອບໃຈພີ່ນ້ອງຍິງທີ່ໜ້າຮັກທຸກຄົນທີ່ພາຂ້ອຍໄປປະກາດ. ເຂົາເຈົ້າມາຮັບຂ້ອຍຢູ່ເຮືອນ ຊວນຂ້ອຍໄປກິນນັ້ນກິນນີ້ຫຼືບາງເທື່ອກໍຊວນຂ້ອຍໄປກິນເຂົ້ານຳ ແລ້ວກໍໄປສົ່ງຂ້ອຍຢູ່ເຮືອນ. ຕອນນີ້ຂ້ອຍຮູ້ແລ້ວວ່າເຂົາເຈົ້າອອກຄວາມພະຍາຍາມຫຼາຍສ່ຳໃດ ແລະເຂົາເຈົ້າກໍມີຄວາມສຸກທີ່ໄດ້ເຮັດແບບນີ້.” ທີ່ຈິງ ບໍ່ແມ່ນທຸກຄົນທີ່ຈະຮູ້ສຶກຂອບໃຈໃນສິ່ງທີ່ເຮົາເຮັດເພື່ອເຂົາເຈົ້າ. ຂັນເວົ້າເຖິງພີ່ນ້ອງທີ່ຊ່ວຍລາວວ່າ: “ຂ້ອຍຢາກຕອບແທນສິ່ງດີໆທີ່ເຂົາເຈົ້າເຮັດເພື່ອຂ້ອຍ ແຕ່ຕອນນີ້ຂ້ອຍບໍ່ຮູ້ວ່າເຂົາເຈົ້າຢູ່ໃສ ແຕ່ພະເຢໂຫວາຮູ້. ຂ້ອຍກໍເລີຍອະທິດຖານຂໍໃຫ້ພະເຢໂຫວາຕອບແທນສິ່ງດີໆທີ່ເຂົາເຈົ້າເຮັດໃຫ້ຂ້ອຍ.” ຂັນເວົ້າຖືກແທ້ໆ! ພະເຢໂຫວາສັງເກດເຫັນສິ່ງດີໆທຸກຢ່າງທີ່ເຮົາເຮັດເພື່ອຄົນອື່ນ ແມ່ນແຕ່ສິ່ງເລັກໆນ້ອຍໆເພິ່ນກໍຖືວ່າເປັນເຄື່ອງບູຊາທີ່ມີຄ່າຫຼາຍແລະເພິ່ນຍັງຖືວ່າເພິ່ນເປັນໜີ້ທີ່ຈະຕ້ອງຕອບແທນເຮົາ.—ອ່ານສຸພາສິດ 19:17
ຄົນທີ່ຢາກຈະກ້າວໜ້າຈະຊອກຫາວິທີທີ່ຈະຊ່ວຍຄົນອື່ນ (ເບິ່ງຂໍ້ 12)
12. ພີ່ນ້ອງຊາຍຈະສະແດງຄວາມຮັກຕໍ່ພີ່ນ້ອງຄົນອື່ນໆໃນປະຊາຄົມໄດ້ແນວໃດ? (ເບິ່ງຮູບພາບ)
12 ຖ້າເຈົ້າເປັນພີ່ນ້ອງຊາຍ ເຈົ້າຈະສະແດງຄວາມຮັກຕໍ່ພີ່ນ້ອງຄົນອື່ນແລະຊ່ວຍເຫຼືອເຂົາເຈົ້າໄດ້ແນວໃດ? ພີ່ນ້ອງຊາຍໄວລຸ້ນຄົນໜຶ່ງທີ່ຊື່ຈໍແດນຖາມຜູ້ດູແລວ່າ ມີຫຍັງແດ່ທີ່ລາວຈະເຮັດໄດ້ຫຼາຍຂຶ້ນເພື່ອຊ່ວຍປະຊາຄົມ. ຜູ້ດູແລຊົມເຊີຍຈໍແດນທີ່ກຳລັງກ້າວໜ້າເປັນຢ່າງດີແລະໄດ້ໃຫ້ຄຳແນະນຳບາງຢ່າງກັບລາວ ເຊັ່ນ: ຜູ້ດູແລແນະນຳຈໍແດນໃຫ້ໄປຫໍປະຊຸມໄວຂຶ້ນເພື່ອຈະທັກທາຍພີ່ນ້ອງ ໃຫ້ອອກຄວາມຄິດເຫັນຫຼາຍຂຶ້ນຢູ່ການປະຊຸມ ອອກປະກາດກັບພີ່ນ້ອງເປັນປະຈຳ ແລະຊອກຫາວິທີທີ່ຈະຊ່ວຍເຫຼືອພີ່ນ້ອງ. ເມື່ອຈໍແດນເຮັດຕາມຄຳແນະນຳເຫຼົ່ານີ້ ກໍເຮັດໃຫ້ລາວບໍ່ພຽງແຕ່ໄດ້ຮຽນຮູ້ທີ່ຈະເຮັດສິ່ງໃໝ່ໆທີ່ບໍ່ເຄີຍເຮັດ ແຕ່ຍັງມີໂອກາດຮຽນຮູ້ທີ່ຈະຮັກພີ່ນ້ອງນຳ. ຈໍແດນໄດ້ຮຽນຮູ້ວ່າບໍ່ແມ່ນວ່າຖືກແຕ່ງຕັ້ງໃຫ້ເປັນຜູ້ຊ່ວຍວຽກຮັບໃຊ້ກ່ອນຈຶ່ງເລີ່ມຊ່ວຍເຫຼືອພີ່ນ້ອງ ແຕ່ຕ້ອງຊ່ວຍເຫຼືອຢູ່ແລ້ວແລະຊ່ວຍເຫຼືອພີ່ນ້ອງຕໍ່ໆໄປ.—1ຕມ. 3:8-10, 13
13. ຄວາມຮັກຊ່ວຍພີ່ນ້ອງທີ່ຊື່ຄຣິດສະຕຽນແນວໃດໃຫ້ກັບມາເປັນຜູ້ດູແລໄດ້ອີກ?
13 ຖ້າເຈົ້າເຄີຍເປັນຜູ້ຊ່ວຍວຽກຮັບໃຊ້ຫຼືເຄີຍເປັນຜູ້ດູແລມາກ່ອນ ແຕ່ຕອນນີ້ບໍ່ໄດ້ເປັນແລ້ວ ພະເຢໂຫວາກໍຍັງບໍ່ລືມຄວາມຮັກທີ່ເຈົ້າມີແລະວຽກທີ່ເຈົ້າເຄີຍເຮັດ. (1ກຣ. 15:58) ນອກຈາກນັ້ນ ພະເຢໂຫວາຍັງສັງເກດເຫັນວ່າເຈົ້າຍັງສະແດງຄວາມຮັກຕໍ່ໆໄປ. ຕອນທີ່ພີ່ນ້ອງຊາຍຄົນໜຶ່ງທີ່ຊື່ຄຣິດສະຕຽນຖືກປົດອອກຈາກການເປັນຜູ້ດູແລ ລາວຮູ້ສຶກຜິດຫວັງຫຼາຍແລະລາວກໍບອກວ່າ: “ບໍ່ວ່າຂ້ອຍຈະເປັນຜູ້ດູແລຫຼືບໍ່ໄດ້ເປັນ ຂ້ອຍກໍຕັ້ງໃຈຈະເຮັດທຸກຢ່າງທີ່ເຮັດໄດ້ເພື່ອຮັບໃຊ້ພະເຢໂຫວາຍ້ອນຂ້ອຍຮັກເພິ່ນ.” ຕໍ່ມາ ລາວກໍໄດ້ຖືກແຕ່ງຕັ້ງໃຫ້ເປັນຜູ້ດູແລອີກ ແຕ່ລາວກໍຍອມຮັບວ່າ: “ຂ້ອຍຢ້ານໜ້ອຍໜຶ່ງ ແຕ່ຂ້ອຍກໍຄິດວ່າຖ້າພະເຢໂຫວາໃຫ້ໂອກາດຂ້ອຍກັບມາເປັນຜູ້ດູແລອີກຍ້ອນເພິ່ນເມດຕາຂ້ອຍ ຂ້ອຍກໍຈະເຮັດເພາະຂ້ອຍຮັກເພິ່ນແລະຮັກພີ່ນ້ອງ.”
14. ເຈົ້າໄດ້ຮຽນຫຍັງຈາກຄຳເວົ້າຂອງພີ່ນ້ອງຍິງຈາກປະເທດຈໍເຈຍ?
14 ນອກຈາກນັ້ນ ຜູ້ຮັບໃຊ້ພະເຢໂຫວາຍັງສະແດງຄວາມຮັກຕໍ່ຄົນອື່ນນຳ. (ມທ. 22:37-39) ຕົວຢ່າງເຊັ່ນ: ພີ່ນ້ອງທີ່ຊື່ເອເລນ້າຢູ່ປະເທດຈໍເຈຍບອກວ່າ: “ທຳອິດ ເຫດຜົນດຽວທີ່ຂ້ອຍໄປປະກາດກໍຍ້ອນຂ້ອຍຮັກພະເຢໂຫວາ. ແຕ່ເມື່ອຂ້ອຍຮັກພະເຢໂຫວາຫຼາຍຂຶ້ນ ມັນກໍເຮັດໃຫ້ຂ້ອຍຮັກຄົນອື່ນຫຼາຍຂຶ້ນນຳ. ຂ້ອຍພະຍາຍາມຈະຄິດວ່າຄົນທີ່ຂ້ອຍປະກາດນຳມີບັນຫາຫຍັງແດ່ແລະຂ້ອຍຄວນເວົ້າເລື່ອງຫຍັງເພື່ອໃຫ້ເຂົາເຈົ້າສົນໃຈ. ເມື່ອຂ້ອຍຄິດແບບນີ້ ມັນກໍເຮັດໃຫ້ຂ້ອຍຢາກຊ່ວຍເຂົາເຈົ້າຫຼາຍຂຶ້ນ.”—ມທ. 22:37-39; ຣມ. 10:13-15
ປະໂຫຍດຈາກການສະແດງຄວາມຮັກຕໍ່ຄົນອື່ນ
ການສະແດງຄວາມຮັກພຽງແຕ່ເທື່ອດຽວເຮັດໃຫ້ຫຼາຍຄົນໄດ້ຮັບປະໂຫຍດ (ເບິ່ງຂໍ້ 15-16)
15-16. ຕາມທີ່ເຫັນໃນຮູບພາບ ການສະແດງຄວາມຮັກຕໍ່ຄົນອື່ນມີປະໂຫຍດຫຍັງແດ່?
15 ເມື່ອເຮົາສະແດງຄວາມຮັກຕໍ່ພີ່ນ້ອງ ບໍ່ໄດ້ມີແຕ່ພີ່ນ້ອງເທົ່ານັ້ນທີ່ໄດ້ຮັບປະໂຫຍດ ຄົນອື່ນກໍໄດ້ຮັບປະໂຫຍດນຳຄືກັນ. ເມື່ອພະຍາດໂຄວິດ-19 ເລີ່ມລະບາດ ພີ່ນ້ອງຊາຍທີ່ຊື່ເພົາໂລແລະເມຍຂອງລາວໄດ້ຊ່ວຍພີ່ນ້ອງຍິງທີ່ສູງອາຍຸຫຼາຍຄົນໃນປະຊາຄົມໃຫ້ຮູ້ໃຊ້ໂທລະສັບ ແທັບເລັດ ແລະຄອມພິວເຕີໃນວຽກຮັບໃຊ້. ທຳອິດ ພີ່ນ້ອງສູງອາຍຸຄົນໜຶ່ງຮູ້ສຶກວ່າມັນຍາກຫຼາຍ ແຕ່ໃນທີ່ສຸດລາວກໍເຮັດໄດ້. ລາວໄດ້ຊວນຍາດພີ່ນ້ອງຂອງລາວໃຫ້ມາປະຊຸມອະນຸສອນ ແລະມີຕັ້ງ 60 ຄົນເຂົ້າຮ່ວມການປະຊຸມອະນຸສອນທາງອອນລາຍ! ເຮົາເຫັນວ່າພີ່ນ້ອງຍິງຄົນນີ້ກັບຍາດພີ່ນ້ອງຂອງລາວໄດ້ຮັບປະໂຫຍດຫຼາຍຍ້ອນຄວາມພະຍາຍາມຂອງເພົາໂລແລະເມຍຂອງລາວ. ລາວຂຽນເຖິງເພົາໂລວ່າ: “ຂອບໃຈພວກເຈົ້າທັງສອງຄົນຫຼາຍໆທີ່ຊ່ວຍສອນຄົນສູງອາຍຸຄືພວກເຮົາ. ຂ້ອຍຈະບໍ່ມີວັນລືມເລີຍວ່າພວກເຈົ້າພະຍາຍາມຊ່ວຍເຫຼືອເຮົາຂະໜາດໃດ ແລະຈະບໍ່ລືມວ່າພະເຢໂຫວາຮັກແລະສົນໃຈພວກເຮົາຂະໜາດໃດ.”
16 ພີ່ນ້ອງເພົາໂລຮູ້ສຶກວ່າໄດ້ບົດຮຽນທີ່ສຳຄັນຢ່າງໜຶ່ງຈາກປະສົບການນີ້. ລາວໄດ້ຮຽນຮູ້ວ່າຄວາມຮັກສຳຄັນກວ່າຄວາມຮູ້ແລະຄວາມສາມາດ. ລາວບອກວ່າ: “ແຕ່ກ່ອນຂ້ອຍເຄີຍເປັນຜູ້ດູແລໝວດ. ຕອນນີ້ພີ່ນ້ອງອາດຈະລືມເລື່ອງທີ່ຂ້ອຍບັນຍາຍໄປໝົດແລ້ວ ແຕ່ເຂົາເຈົ້າຍັງຈື່ໄດ້ວ່າຂ້ອຍເຄີຍຊ່ວຍຫຍັງເຂົາເຈົ້າແດ່.”
17. ເມື່ອເຮົາສະແດງຄວາມຮັກ ໃຜອີກຈະໄດ້ຮັບປະໂຫຍດ?
17 ເມື່ອເຮົາສະແດງຄວາມຮັກຕໍ່ພີ່ນ້ອງ ເຮົາເອງກໍໄດ້ຮັບປະໂຫຍດຄືກັນໃນແບບທີ່ເຮົາບໍ່ຄາດຄິດ. ພີ່ນ້ອງໂຢນາທານທີ່ຢູ່ປະເທດນິວຊີແລນກໍຮູ້ສຶກແບບນີ້. ຕອນບ່າຍວັນເສົາມື້ໜຶ່ງອາກາດຮ້ອນຫຼາຍ ໂຢນາທານເຫັນພີ່ນ້ອງຊາຍຄົນໜຶ່ງທີ່ເປັນໄພໂອເນຍກຳລັງປະກາດຢູ່ຕາມຫົນທາງຄົນດຽວ. ລາວກໍເລີຍຕັດສິນໃຈວ່າຕໍ່ໄປນີ້ລາວຈະໄປປະກາດເປັນໝູ່ກັບພີ່ນ້ອງຄົນນີ້ທຸກຕອນບ່າຍວັນເສົາ. ຕອນນັ້ນລາວບໍ່ໄດ້ຄິດເລີຍວ່າຈະໄດ້ຮັບປະໂຫຍດຫຼາຍຈາກການເຮັດແບບນີ້. ໂຢນາທານບອກວ່າ “ຕອນນັ້ນຂ້ອຍບໍ່ໄດ້ມັກວຽກປະກາດປານໃດ ແຕ່ເມື່ອຂ້ອຍໄດ້ເຫັນວິທີທີ່ພີ່ນ້ອງໄພໂອເນຍຄົນນີ້ສອນແລະເຫັນວ່າວຽກຮັບໃຊ້ຂອງລາວເກີດຜົນດີ ກໍເລີຍເຮັດໃຫ້ຂ້ອຍເລີ່ມມັກວຽກປະກາດແລະເຮັດໃຫ້ຂ້ອຍໄດ້ໝູ່ສະໜິດນຳ. ລາວຊ່ວຍຂ້ອຍໃຫ້ກ້າວໜ້າ ໃຫ້ມ່ວນກັບວຽກປະກາດແລະເຮັດໃຫ້ຂ້ອຍສະໜິດກັບພະເຢໂຫວາຫຼາຍຂຶ້ນ.”
18. ພະເຢໂຫວາຢາກໃຫ້ເຮົາເຮັດຫຍັງ?
18 ພະເຢໂຫວາຢາກໃຫ້ເຮົາທຸກຄົນຮັກເພິ່ນແລະຮັກຄົນອື່ນຫຼາຍຂຶ້ນ. ຄືທີ່ເຮົາໄດ້ຮຽນມາແລ້ວ ເຮົາຈະຮັກພະເຢໂຫວາຫຼາຍຂຶ້ນໄດ້ໂດຍອ່ານຄຳພີໄບເບິນ ຄິດຕຶກຕອງ ແລະອະທິດຖານເຖິງພະເຢໂຫວາເປັນປະຈຳ. ເຮົາຈະຮັກພີ່ນ້ອງຫຼາຍຂຶ້ນໂດຍຊອກຫາວິທີຊ່ວຍເຫຼືອເຂົາເຈົ້າ. ຖ້າເຮົາພະຍາຍາມສະແດງຄວາມຮັກຫຼາຍຂຶ້ນ ເຮົາກໍຈະສະໜິດກັບພະເຢໂຫວາແລະພີ່ນ້ອງຫຼາຍຂຶ້ນ ແລະຈະເຮັດໃຫ້ເຮົາເປັນໝູ່ກັບພະເຢໂຫວາແລະກັບພີ່ນ້ອງຕະຫຼອດໄປ!
ເພງ 109 ຮັກທີ່ແຮງກ້າສຸດຫົວໃຈ
a ບໍ່ວ່າເຮົາຈະເປັນພີ່ນ້ອງໃໝ່ຫຼືຮັບໃຊ້ພະເຢໂຫວາມາຫຼາຍປີແລ້ວ ເຮົາທຸກຄົນກໍຍັງສາມາດກ້າວໜ້າຕໍ່ໆໄປໄດ້. ໃນບົດຄວາມນີ້ເຮົາຈະໄດ້ຮຽນຮູ້ວິທີທີ່ຈະເຮັດແບບນັ້ນໄດ້ໂດຍຮັກພະເຢໂຫວາແລະຮັກຄົນອື່ນຫຼາຍຂຶ້ນ. ຕອນທີ່ເຈົ້າຮຽນບົດຄວາມນີ້ ໃຫ້ເຈົ້າຄິດວ່າເຈົ້າໄດ້ກ້າວໜ້າມາໄດ້ຫຼາຍສ່ຳໃດແລ້ວ ແລະເຈົ້າຈະກ້າວໜ້າຫຼາຍຂຶ້ນອີກໄດ້ແນວໃດ.
b ຊື່ສົມມຸດ
