ບົດຄວາມສຶກສາທີ 41
ວິທີຊ່ອຍນັກສຶກສາໃຫ້ກ້າວໜ້າຈົນຮັບບັບເຕມາ—ຕອນທີ 1
“ເຫັນໄດ້ແຈ້ງວ່າພວກເຈົ້າເປັນໜັງສືຈາກພະຄລິດທີ່ເປັນຜົນງານຈາກວຽກຮັບໃຊ້ຂອງພວກເຮົາ.”—2 ກຣ. 3:3
ເພງ 78 “ສອນຄຳສອນຂອງພະເຈົ້າ”
ໃຈຄວາມສຳຄັນ *
ເປັນເລື່ອງທີ່ໜ້າຕື່ນເຕັ້ນຍິນດີແທ້ໆສຳລັບທຸກຄົນໃນປະຊາຄົມທີ່ເຫັນນັກສຶກສາທີ່ເຂົາເຈົ້າຮັກຮັບບັບເຕມາ (ເບິ່ງຂໍ້ 1)
1. 2 ໂກຣິນໂທ 3:1-3 ຊ່ອຍເຮົາແນວໃດໃຫ້ເຫັນຄ່າສິດທິພິເສດທີ່ໄດ້ສຶກສາກັບບາງຄົນຈົນຮັບບັບເຕມາ? (ເບິ່ງຮູບໜ້າປົກ)
ເຈົ້າຮູ້ສຶກແນວໃດເມື່ອເຫັນນັກສຶກສາໃນປະຊາຄົມຮັບບັບເຕມາ? ເຈົ້າຄືຊິດີໃຈຫຼາຍ. (ມທ. 28:19) ຖ້າເຈົ້າເປັນຜູ້ທີ່ສຶກສາໃຫ້ລາວ ເຈົ້າຄືຊິຕື່ນເຕັ້ນແລະດີໃຈຫຼາຍແທ້ໆທີ່ເຫັນລາວຮັບບັບເຕມາ! (1 ທຊ. 2:19, 20) ຄົນທີ່ຮັບບັບເຕມາໃໝ່ເປັນໜັງສືແນະນຳຕົວສຳລັບຜູ້ທີ່ສຶກສານຳເຂົາເຈົ້າແລະທຸກຄົນໃນປະຊາຄົມ.—ອ່ານ 2 ໂກຣິນໂທ 3:1-3
2. (ກ) ເຮົາຄວນຄິດເຖິງຄຳຖາມຫຍັງທີ່ສຳຄັນ ແລະຍ້ອນຫຍັງ? (ຂ) ການຮຽນຄຳພີໄບເບິນແມ່ນຫຍັງ? (ເບິ່ງໄຂເງື່ອນ)
2 ໃນ 4 ປີທີ່ຜ່ານມາເປັນສິ່ງທີ່ດີແທ້ໆທີ່ເຫັນວ່າໂດຍສະເລ່ຍແລ້ວມີປະມານ 10 ລ້ານຄົນຮຽນຄຳພີໄບເບິນ *ໃນແຕ່ລະເດືອນຢູ່ທົ່ວໂລກ. ໃນເວລາດຽວກັນ ໃນແຕ່ລະປີມີປະມານ 280.000 ຄົນໄດ້ຮັບບັບເຕມາເຂົ້າມາເປັນພະຍານພະເຢໂຫວາແລະເຂົ້າມາເປັນລູກສິດຂອງພະເຢຊູຄລິດ. ເຮົາຈະຊ່ອຍນັກສຶກສາຫຼາຍລ້ານຄົນເຫຼົ່ານີ້ແນວໃດໃຫ້ຮັບບັບເຕມາ? ພະເຢໂຫວາຍັງເປີດໂອກາດໃຫ້ຄົນເຂົ້າມາເປັນພະຍານຂອງເພິ່ນ ດັ່ງນັ້ນ ເຮົາຈຶ່ງຢາກເຮັດສຸດຄວາມສາມາດເພື່ອຊ່ອຍເຂົາເຈົ້າໃຫ້ກ້າວໜ້າຈົນຮັບບັບເຕມາໄວເທົ່າທີ່ຈະໄວໄດ້ ເພາະເວລາໃກ້ຈະໝົດແລ້ວ.—1 ກຣ. 7:29 ສ່ວນ ກ; 1 ປຕ. 4:7
3. ໃນບົດນີ້ເຮົາຈະຮຽນຫຍັງກ່ຽວກັບການນຳການສຶກສາ?
3 ເນື່ອງຈາກການສອນຄົນໃຫ້ເຂົ້າມາເປັນລູກສິດເປັນເລື່ອງສຳຄັນຫຼາຍໃນຕອນນີ້ ຄະນະກຳມະການປົກຄອງຈຶ່ງຂໍໃຫ້ສາຂາຕ່າງໆຊອກເບິ່ງວິທີຕ່າງໆເພື່ອຊ່ອຍນັກສຶກສາໃຫ້ກ້າວໜ້າຈົນຮັບບັບເຕມາ. ໃນບົດນີ້ແລະບົດຕໍ່ໄປ ເຮົາຈະເບິ່ງສິ່ງທີ່ເຮົາຮຽນໄດ້ຈາກໄພໂອເນຍ ມິດຊັນນາຣີ ແລະຜູ້ດູແລໝວດທີ່ມີປະສົບການ. * (ສຸພາ. 11:14; 15:22) ເຂົາເຈົ້າຈະເວົ້າເຖິງສິ່ງທີ່ຜູ້ສອນແລະນັກສຶກສາສາມາດເຮັດໄດ້ເພື່ອໃຫ້ການຮຽນຄຳພີໄບເບິນເປັນປະໂຫຍດຫຼາຍຂຶ້ນຕໍ່ນັກສຶກສາ. ໃນບົດນີ້ເຮົາຈະຮຽນກ່ຽວກັບ 5 ສິ່ງທີ່ນັກສຶກສາທຸກຄົນຕ້ອງເຮັດເພື່ອຈະກ້າວໜ້າຈົນຮັບບັບເຕມາ. ເນື່ອງຈາກເປັນຜູ້ສອນ ເຮົາກໍຕ້ອງຊ່ອຍນັກສຶກສາໃຫ້ເຮັດ 5 ສິ່ງນີ້.
ຮຽນທຸກໆອາທິດ
ໃຫ້ຖາມນັກສຶກສາວ່າຈະນັ່ງລົມກັນເລື່ອງຄຳພີໄບເບິນໄດ້ບໍ່ (ເບິ່ງຂໍ້ 4-6)
4. ເຮົາຄວນຄິດແນວໃດກ່ຽວກັບການຮຽນພະຄຳພີແບບສັ້ນໆ?
4 ພີ່ນ້ອງຫຼາຍຄົນກຳລັງສຶກສາພະຄຳພີແບບສັ້ນໆກັບບາງຄົນໂດຍມີແຕ່ຢືນສຶກສາຢູ່ໜ້າເຮືອນຂອງເຂົາເຈົ້າເທົ່ານັ້ນ. ເຖິງວ່າການເຮັດແບບນີ້ຈະເປັນການເລີ່ມຕົ້ນທີ່ດີເພື່ອປູກຝັງຄວາມສົນໃຈຕໍ່ຄຳພີໄບເບິນໃຫ້ເຂົາເຈົ້າ ແຕ່ສ່ວນຫຼາຍແລ້ວການລົມກັນແບບນີ້ຈະເປັນແບບສັ້ນໆແລະອາດຈະບໍ່ໄດ້ລົມກັນທຸກໆອາທິດ. ເພື່ອຊ່ອຍຜູ້ທີ່ເຮົາລົມນຳໃຫ້ສົນໃຈພະຄຳພີຫຼາຍຂຶ້ນ ພີ່ນ້ອງບາງຄົນໄດ້ເອົາຂໍ້ມູນຕິດຕໍ່ຂອງເຂົາເຈົ້າໃຫ້ຜູ້ສົນໃຈເພື່ອຈະສາມາດສົ່ງຂໍ້ຄວາມຫຼືໂທລົມກັນຫຼາຍຂຶ້ນກ່ຽວກັບເລື່ອງພະຄຳພີກ່ອນຈະໄປຫາຜູ້ນັ້ນອີກ. ການລົມກັນສັ້ນໆແບບນີ້ອາດໃຊ້ເວລາຫຼາຍເດືອນໂດຍທີ່ບໍ່ໄດ້ເລີ່ມຮຽນພະຄຳພີແບບເກີດຜົນ. ຖ້ານັກສຶກສາບໍ່ໄດ້ໃຊ້ເວລາຫຼາຍຂຶ້ນແລະບໍ່ໄດ້ພະຍາຍາມຕື່ມອີກໃນການຮຽນພະຄຳພີ ລາວຈະກ້າວໜ້າແທ້ໆຈົນເຖິງຂັ້ນອຸທິດຕົວແລະຮັບບັບເຕມາບໍ? ຄືຊິບໍ່ໄປຮອດໃສ.
5. ພະເຢຊູເວົ້າຫຍັງໃນລູກາ 14:27-33 ທີ່ເຮົາໃຊ້ໄດ້ເພື່ອຊ່ອຍນັກສຶກສາ?
5 ມີເທື່ອໜຶ່ງພະເຢຊູໄດ້ອະທິບາຍໂດຍໃຊ້ຕົວຢ່າງໜຶ່ງກ່ຽວກັບສິ່ງທີ່ຄົນເຮົາຕ້ອງເຮັດຖ້າລາວຢາກເປັນລູກສິດຂອງເພິ່ນ. ພະເຢຊູໄດ້ເວົ້າເຖິງບາງຄົນທີ່ຢາກສ້າງຫໍຄອຍ ແລະເວົ້າເຖິງກະສັດອົງໜຶ່ງທີ່ຢາກເຮັດສົງຄາມ. ເພິ່ນເວົ້າວ່າ ຄົນທີ່ຢາກສ້າງຫໍຄອຍຕ້ອງ “ນັ່ງລົງແລະຄິດໄລ່ຄ່າໃຊ້ຈ່າຍກ່ອນ” ເພື່ອຈະຮູ້ວ່າມີເງິນພຽງພໍສ້າງໃຫ້ແລ້ວຫຼືບໍ່ ແລະເພິ່ນເວົ້າເຖິງກະສັດວ່າ ລາວຕ້ອງ “ນັ່ງລົມກັບທີ່ປຶກສາກ່ອນ” ເພື່ອເບິ່ງວ່າກອງທັບຂອງລາວຈະເຮັດສຳເລັດຕາມທີ່ຕັ້ງໃຈໄວ້ໄດ້ບໍ່. (ອ່ານລູກາ 14:27-33) ຄ້າຍຄືກັນ ພະເຢຊູຮູ້ວ່າຜູ້ທີ່ຢາກເຂົ້າມາເປັນລູກສິດຂອງເພິ່ນຕ້ອງຄິດເບິ່ງຄັກໆວ່າລາວຕ້ອງເຮັດຫຍັງແດ່ເພື່ອຈະຕິດຕາມເພິ່ນໄດ້. ຍ້ອນແນວນີ້ ເຮົາຕ້ອງກະຕຸ້ນນັກສຶກສາໃຫ້ຮຽນກັບເຮົາທຸກໆອາທິດ. ແຕ່ເຮົາຈະເຮັດແບບນັ້ນໄດ້ແນວໃດ?
6. ເຮົາອາດພະຍາຍາມເຮັດຫຍັງເພື່ອຊ່ອຍນັກສຶກສາໃຫ້ກ້າວໜ້າ?
6 ໃຫ້ເພີ່ມເວລາທີ່ຢືນສຶກສາແບບສັ້ນໆຢູ່ໜ້າເຮືອນໃຫ້ຍາວອອກໄປອີກໜ້ອຍໜຶ່ງ. ໃນແຕ່ລະເທື່ອທີ່ໄປຫາ ແທນທີ່ຈະລົມກັນແຕ່ພະຄຳພີຂໍ້ດຽວ ໃຫ້ລົມກັນຈັກສອງຂໍ້. ເມື່ອເຈົ້າຂອງເຮືອນລຶ້ງກັບການໃຊ້ເວລາລົມກັນດົນໜ້ອຍໜຶ່ງ ໃຫ້ຖາມລາວວ່າມີບ່ອນທີ່ຈະນັ່ງລົມກັນຕໍ່ເລື່ອງຄຳພີໄບເບິນບໍ່. ຄຳຕອບຂອງເຈົ້າຂອງເຮືອນຈະສະແດງໃຫ້ເຫັນວ່າການຮຽນຄຳພີໄບເບິນສຳຄັນຕໍ່ລາວສ່ຳໃດ. ເພື່ອຊ່ອຍນັກສຶກສາໃຫ້ຮຽນຮູ້ໄວຂຶ້ນ ເຈົ້າອາດຖາມລາວວ່າ ລາວຢາກຮຽນສອງເທື່ອຕໍ່ອາທິດບໍ. ນອກຈາກຮຽນໜຶ່ງເທື່ອຫຼືສອງເທື່ອຕໍ່ອາທິດແລ້ວກໍຍັງຕ້ອງໄດ້ເຮັດສິ່ງອື່ນອີກ.
ກຽມລ່ວງໜ້າໃນການຮຽນແຕ່ລະເທື່ອ
ກຽມລ່ວງໜ້າດີໆ ແລະສອນນັກສຶກສາໃຫ້ຮູ້ວິທີກຽມ (ເບິ່ງຂໍ້ 7-9)
7. ຜູ້ສອນຈະກຽມລ່ວງໜ້າດີໆແນວໃດໃນການຮຽນແຕ່ລະເທື່ອ?
7 ຍ້ອນເປັນຜູ້ສອນ ເຈົ້າຕ້ອງກຽມລ່ວງໜ້າດີໆໃນການຮຽນແຕ່ລະເທື່ອ. ເຈົ້າຄວນເລີ່ມຕົ້ນໂດຍອ່ານສິ່ງທີ່ຈະຮຽນນຳກັນແລະເບິ່ງຂໍ້ພະຄຳພີ. ໃຫ້ເຂົ້າໃຈຈຸດສຳຄັນ ໃຫ້ຄິດເຖິງຫົວຂໍ້ຂອງບົດນັ້ນ ຫົວຂໍ້ຍ່ອຍ ຄຳຖາມ ຂໍ້ພະຄຳພີທີ່ຈະ “ອ່ານ” ຮູບ ແລະວິດີໂອຕ່າງໆທີ່ອາດຊ່ອຍອະທິບາຍເລື່ອງນັ້ນ. ຈາກນັ້ນ ໃຫ້ຄິດເຖິງນັກສຶກສາແລະຄິດເຖິງວິທີທີ່ເຈົ້າຈະອະທິບາຍເລື່ອງນັ້ນແບບຈະແຈ້ງແລະເຂົ້າໃຈງ່າຍເພື່ອນັກສຶກສາຈະເຂົ້າໃຈງ່າຍໆແລະເອົາໄປໃຊ້.—ນເຫ. 8:8; ສຸພາ. 15:28, ສ່ວນ ກ
8. ຄຳເວົ້າຂອງໂປໂລໃນໂກໂລຊາຍ 1:9, 10 ສອນຫຍັງເຮົາກ່ຽວກັບການອະທິດຖານສຳລັບນັກສຶກສາ?
8 ສ່ວນໜຶ່ງຂອງການກຽມລ່ວງໜ້າດີໆແມ່ນ ເຈົ້າຕ້ອງອະທິດຖານເຖິງພະເຢໂຫວາກ່ຽວກັບນັກສຶກສາແລະຄວາມຈຳເປັນຂອງລາວ. ຂໍພະເຢໂຫວາຊ່ອຍເຈົ້າໃຫ້ສອນຄຳພີໄບເບິນໃນແບບທີ່ຈະເຂົ້າເຖິງຫົວໃຈຂອງນັກສຶກສາ. (ອ່ານໂກໂລຊາຍ 1:9, 10) ໃຫ້ຖາມໂຕເອງວ່າ ມີຫຍັງບໍທີ່ນັກສຶກສາຈະເຂົ້າໃຈຍາກຫຼືບໍ່ເຫັນດີນຳ? ໃຫ້ຈື່ໄວ້ວ່າ ເປົ້າໝາຍຂອງເຈົ້າແມ່ນຊ່ອຍນັກສຶກສາໃຫ້ກ້າວໜ້າຈົນຮັບບັບເຕມາ.
9. ເຈົ້າຈະຊ່ອຍນັກສຶກສາແນວໃດໃຫ້ກຽມສຳລັບການຮຽນພະຄຳພີ? ໃຫ້ອະທິບາຍ.
9 ເຮົາຫວັງວ່າການຮຽນເປັນປະຈຳຈະຊ່ອຍນັກສຶກສາໃຫ້ເຫັນຄ່າສິ່ງທີ່ພະເຢໂຫວາແລະພະເຢຊູໄດ້ເຮັດ ແລະສິ່ງເຫຼົ່ານີ້ຈະເຮັດໃຫ້ລາວຢາກຮຽນຮູ້ຫຼາຍຂຶ້ນ. (ມທ. 5:3, 6) ເພື່ອຈະໄດ້ຮັບປະໂຫຍດເຕັມທີຈາກການຮຽນ ນັກສຶກສາ ຕ້ອງເອົາໃຈໃສ່ໃນສິ່ງທີ່ກຳລັງຮຽນ. ເພື່ອຊ່ອຍລາວໃຫ້ເຮັດແບບນັ້ນ ເຈົ້າຕ້ອງຊ່ອຍລາວໃຫ້ເຂົ້າໃຈວ່າເປັນເລື່ອງສຳຄັນທີ່ຈະກຽມບົດຮຽນລ່ວງໜ້າໃນການຮຽນແຕ່ລະເທື່ອ. ໃນການກຽມ ນັກສຶກສາຕ້ອງອ່ານບົດນັ້ນລ່ວງໜ້າແລະຄິດວ່າຈະເອົາສິ່ງທີ່ຮຽນໄປໃຊ້ແນວໃດ. ເຈົ້າຈະຊ່ອຍລາວກຽມແນວໃດ? ໃຫ້ກຽມບົດຮຽນນຳກັນກັບນັກສຶກສາເພື່ອໃຫ້ລາວຮູ້ວິທີກຽມ. * ສອນລາວໃຫ້ຮູ້ວິທີຊອກຄຳຕອບທີ່ກົງຈຸດ ແລະສອນລາວໃຫ້ຮູ້ວິທີໝາຍສະເພາະຄຳຫຼັກເພື່ອຊ່ອຍໃຫ້ຈື່ຄຳຕອບ. ຈາກນັ້ນກໍໃຫ້ລາວຕອບເປັນຄຳເວົ້າຂອງໂຕເອງ. ເມື່ອລາວເຮັດແບບນັ້ນ ເຈົ້າກໍຈະຮູ້ວ່າລາວເຂົ້າໃຈບົດຮຽນດີສ່ຳໃດ. ແຕ່ມີສິ່ງອື່ນອີກທີ່ເຈົ້າຕ້ອງເຮັດເພື່ອຊ່ອຍນັກສຶກສາ.
ສອນນັກສຶກສາໃຫ້ລົມກັບພະເຢໂຫວາທຸກໆມື້
ສອນນັກສຶກສາໃຫ້ຮູ້ວິທີລົມກັບພະເຢໂຫວາ (ເບິ່ງຂໍ້ 10-11)
10. ເປັນຫຍັງການອ່ານຄຳພີໄບເບິນທຸກໆມື້ຈຶ່ງສຳຄັນ ແລະນັກສຶກສາຕ້ອງເຮັດຫຍັງເພື່ອຈະໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນ?
10 ນອກຈາກຮຽນນຳກັນທຸກໆອາທິດແລ້ວ ນັກສຶກສາຈະໄດ້ຮັບປະໂຫຍດຈາກການເຮັດບາງສິ່ງດ້ວຍໂຕເອງໃນແຕ່ລະມື້. ລາວຕ້ອງລົມກັບພະເຢໂຫວາ. ລົມແນວໃດ? ໂດຍການຟັງແລະເວົ້າກັບພະເຢໂຫວາ. ລາວສາມາດຟັງພະເຢໂຫວາໂດຍອ່ານຄຳພີໄບເບິນທຸກໆມື້. (ຢຊວຍ. 1:8; ເພງ. 1:1-3) ໃຫ້ລາວເບິ່ງວິທີໃຊ້ຕາຕະລາງການອ່ານຄຳພີໄບເບິນໃນເວັບໄຊ jw.org®. * ເພື່ອຊ່ອຍລາວໃຫ້ໄດ້ຮັບປະໂຫຍດຫຼາຍທີ່ສຸດຈາກການອ່ານຄຳພີໄບເບິນ ແນະນຳລາວໃຫ້ຄິດຕຶກຕອງກ່ຽວກັບສິ່ງທີ່ຄຳພີໄບເບິນສອນລາວເລື່ອງພະເຢໂຫວາແລະວິທີທີ່ຈະເອົາສິ່ງທີ່ຮຽນໄປໃຊ້ໃນຊີວິດ.—ກຈກ. 17:11; ຢກບ. 1:25
11. ນັກສຶກສາຈະຮຽນວິທີອະທິດຖານໄດ້ແນວໃດ ແລະເປັນຫຍັງຈຶ່ງສຳຄັນທີ່ລາວຕ້ອງອະທິດຖານເຖິງພະເຢໂຫວາທຸກໆມື້?
11 ກະຕຸ້ນນັກສຶກສາໃຫ້ລົມກັບພະເຢໂຫວາໂດຍອະທິດຖານທຸກໆມື້. ໃຫ້ເຈົ້າອະທິດຖານຈາກໃຈເມື່ອເລີ່ມແລະຈົບການສຶກສາ ແລະໃຫ້ເວົ້າເຖິງນັກສຶກສາໃນຄຳອະທິດຖານ. ເມື່ອລາວຟັງເຈົ້າອະທິດຖານ ລາວກໍຈະຮຽນຮູ້ວິທີອະທິດຖານຈາກໃຈເຖິງພະເຢໂຫວາພະເຈົ້າໃນນາມຂອງພະເຢຊູຄລິດ. (ມທ. 6:9; ຢຮ. 15:16) ລອງຄິດເບິ່ງແມ້ ການອ່ານຄຳພີໄບເບິນທຸກໆມື້ (ການຟັງພະເຢໂຫວາ) ແລະການອະທິດຖານ (ການລົມກັບພະເຢໂຫວາ) ຈະຊ່ອຍນັກສຶກສາໃຫ້ສະໜິດກັບພະເຢໂຫວາຫຼາຍສ່ຳໃດ! (ຢກບ. 4:8) ຖ້າລາວເຮັດແບບນີ້ທຸກໆມື້ກໍຈະຊ່ອຍລາວໃຫ້ກ້າວໜ້າຈົນເຖິງຂັ້ນອຸທິດຕົວແລະຮັບບັບເຕມາ. ມີຫຍັງອີກທີ່ຈະຊ່ອຍລາວ?
ຊ່ອຍນັກສຶກສາໃຫ້ສ້າງສາຍສຳພັນເປັນສ່ວນຕົວກັບພະເຢໂຫວາ
12. ເຈົ້າຈະຊ່ອຍນັກສຶກສາແນວໃດໃຫ້ສ້າງສາຍສຳພັນກັບພະເຢໂຫວາ?
12 ສິ່ງທີ່ນັກສຶກສາຮຽນໃນຄຳພີໄບເບິນຄວນເຂົ້າເຖິງຫົວໃຈລາວ. ຍ້ອນຫຍັງ? ຍ້ອນວ່າຫົວໃຈຂອງເຮົາລວມເອົາຄວາມຕ້ອງການແລະອາລົມຄວາມຮູ້ສຶກ ສິ່ງເຫຼົ່ານີ້ກະຕຸ້ນເຮົາໃຫ້ລົງມືເຮັດ. ພະເຢຊູໃຊ້ການຫາເຫດຜົນແບບງ່າຍໆທີ່ດຶງດູດໃຈຄົນ ແລະເຂົາເຈົ້າຕິດຕາມເພິ່ນຍ້ອນເພິ່ນສອນເຂົ້າເຖິງຫົວໃຈເຂົາເຈົ້າ. (ລກ. 24:15, 27, 32) ນັກສຶກສາຕ້ອງເຫັນວ່າພະເຢໂຫວາເປັນບຸກຄົນແທ້ໆທີ່ເຂົາເຈົ້າສາມາດສ້າງສາຍສຳພັນນຳໄດ້ ແລະເຫັນວ່າເພິ່ນເປັນພໍ່ ເປັນພະເຈົ້າ ແລະເປັນໝູ່ຂອງເຂົາເຈົ້າ. (ເພງ. 25:4, 5) ຕອນທີ່ຮຽນ ໃຫ້ຊ່ອຍນັກສຶກສາໃຫ້ເຫັນຄຸນລັກສະນະທີ່ດີຂອງພະເຢໂຫວາ. (ອົບ. 34:5, 6; 1 ປຕ. 5:6, 7) ບໍ່ວ່າຈະຮຽນເລື່ອງຫຍັງ ກໍໃຫ້ເນັ້ນວ່າພະເຢໂຫວາເປັນບຸກຄົນແບບໃດ ແລະຊ່ອຍນັກສຶກສາໃຫ້ເຫັນຄຸນລັກສະນະທີ່ດີຂອງພະເຢໂຫວາ ເຊັ່ນ: ຄວາມຮັກ ຄວາມດີ ແລະຄວາມເຫັນອົກເຫັນໃຈ. ພະເຢຊູບອກວ່າ “ກົດໝາຍຂໍ້ສຳຄັນທີ່ສຸດ” ແມ່ນ “ຕ້ອງຮັກພະເຢໂຫວາພະເຈົ້າຂອງເຈົ້າ.” (ມທ. 22:37, 38) ໃຫ້ພະຍາຍາມປູກຝັງຄວາມຮັກຕໍ່ພະເຢໂຫວາໃນຫົວໃຈຂອງນັກສຶກສາ.
13. ໃຫ້ຍົກຕົວຢ່າງວິທີທີ່ຈະຊ່ອຍນັກສຶກສາໃຫ້ຮຽນຮູ້ກ່ຽວກັບຄຸນລັກສະນະທີ່ດີຂອງພະເຢໂຫວາ
13 ຕອນທີ່ລົມກັບນັກສຶກສາ ໃຫ້ເຈົ້າເວົ້າເຖິງຄວາມຮູ້ສຶກຂອງໂຕເອງທີ່ມີຕໍ່ພະເຢໂຫວາ. ການເຮັດແບບນີ້ຈະຊ່ອຍນັກສຶກສາໃຫ້ເຫັນວ່າລາວຈຳເປັນຕ້ອງສ້າງສາຍສຳພັນເປັນສ່ວນຕົວກັບພະເຢໂຫວາ. (ເພງ. 73:28) ຕົວຢ່າງເຊັ່ນ: ມີປະໂຫຍກໃດບໍໃນປຶ້ມທີ່ຮຽນຫຼືໃນຂໍ້ພະຄຳພີທີ່ເວົ້າເຖິງຄຸນລັກສະນະບາງຢ່າງຂອງພະເຢໂຫວາ ເຊັ່ນ: ຄວາມຮັກ ສະຕິປັນຍາ ຄວາມຍຸຕິທຳ ຫຼືລິດເດດ ເຊິ່ງຖືກໃຈເຈົ້າ? ໃຫ້ເວົ້າສູ່ນັກສຶກສາຟັງແລະບອກລາວວ່ານີ້ເປັນເຫດຜົນໜຶ່ງທີ່ເຈົ້າຮັກພະເຢໂຫວາພໍ່ທີ່ຢູ່ໃນສະຫວັນ. ຍັງມີສິ່ງອື່ນອີກທີ່ນັກສຶກສາທຸກຄົນຕ້ອງເຮັດເພື່ອຈະກ້າວໜ້າຈົນຮັບບັບເຕມາ.
ກະຕຸ້ນນັກສຶກສາໃຫ້ເຂົ້າຮ່ວມປະຊຸມ
ກະຕຸ້ນນັກສຶກສາໃຫ້ເຂົ້າຮ່ວມປະຊຸມໄວເທົ່າທີ່ຈະໄວໄດ້! (ເບິ່ງຂໍ້ 14-15)
14. ເຮັບເຣີ 10:24-25 ເວົ້າເຖິງຫຍັງກ່ຽວກັບການປະຊຸມທີ່ຈະຊ່ອຍນັກສຶກສາໃຫ້ກ້າວໜ້າ?
14 ເຮົາທຸກຄົນຢາກໃຫ້ນັກສຶກສາກ້າວໜ້າຈົນຮັບບັບເຕມາ. ວິທີໜຶ່ງທີ່ສຳຄັນທີ່ເຮົາຊ່ອຍໄດ້ແມ່ນ ກະຕຸ້ນເຂົາເຈົ້າໃຫ້ເຂົ້າຮ່ວມປະຊຸມ. ພີ່ນ້ອງທີ່ມີປະສົບການໃນການສອນເວົ້າວ່າ ນັກສຶກສາທີ່ເຂົ້າຮ່ວມການປະຊຸມທັນທີຈະກ້າວໜ້າໄວທີ່ສຸດ. (ເພງ. 111:1) ພີ່ນ້ອງບາງຄົນບອກນັກສຶກສາວ່າ ເຂົາເຈົ້າຈະໄດ້ຮຽນຫຼາຍຢ່າງກ່ຽວກັບຄຳພີໄບເບິນຢູ່ການປະຊຸມ ເຊິ່ງຈະບໍ່ໄດ້ຮຽນໃນການສຶກສາແບບສອງຕໍ່ສອງ. ອ່ານເຮັບເຣີ 10:24-25 ກັບນັກສຶກສາແລະເວົ້າເຖິງປະໂຫຍດທີ່ລາວຈະໄດ້ຮັບເມື່ອເຂົ້າຮ່ວມປະຊຸມ ແລະເປີດວິດີໂອ ພວກເຮົາເຮັດຫຍັງຢູ່ທີ່ຫໍປະຊຸມລາຊະອານາຈັກ? * ໃຫ້ລາວເບິ່ງ. ຊ່ອຍນັກສຶກສາໃຫ້ເຫັນວ່າການເຂົ້າຮ່ວມປະຊຸມທຸກອາທິດເປັນສິ່ງໜຶ່ງທີ່ສຳຄັນໃນຊີວິດຂອງລາວ.
15. ເຈົ້າສາມາດເຮັດຫຍັງເພື່ອຊ່ອຍນັກສຶກສາໃຫ້ເຂົ້າຮ່ວມການປະຊຸມເປັນປະຈຳ?
15 ເຈົ້າຈະເຮັດແນວໃດຖ້ານັກສຶກສາຍັງບໍ່ທັນເຂົ້າຮ່ວມການປະຊຸມຫຼືບໍ່ໄປປະຊຸມເປັນປະຈຳ? ເລົ່າໃຫ້ນັກສຶກສາຟັງກ່ຽວກັບບາງສິ່ງທີ່ເຈົ້າໄດ້ຮຽນຈາກການປະຊຸມເມື່ອບໍ່ດົນມານີ້. ເມື່ອນັກສຶກສາເຫັນວ່າເຈົ້າຮູ້ສຶກແນວໃດຕໍ່ການປະຊຸມ ລາວອາດຢາກໄປກໍໄດ້. ເອົາຫໍສັງເກດການ ຫຼືຄູ່ມືການປະຊຸມ ທີ່ກຳລັງໃຊ້ສຶກສາຢູ່ການປະຊຸມໃຫ້ລາວ ແລະໃຫ້ລາວເບິ່ງສິ່ງທີ່ຈະຮຽນໃນການປະຊຸມເທື່ອຕໍ່ໄປ ແລ້ວຖາມລາວວ່າສ່ວນໃດທີ່ລາວສົນໃຈ. ສິ່ງທີ່ນັກສຶກສາໄດ້ເຫັນແລະໄດ້ຟັງໃນການປະຊຸມເທື່ອທຳອິດຈະດີກວ່າສິ່ງທີ່ລາວເຄີຍເຫັນແລະເຄີຍຟັງໃນການເຕົ້າໂຮມກັນຂອງສາສະໜາອື່ນ. (1 ກຣ. 14:24, 25) ລາວຈະເຈິກັບຄົນທີ່ເປັນຕົວຢ່າງທີ່ດີໃຫ້ລາວຮຽນແບບແລະຄົນທີ່ຈະຊ່ອຍລາວໃຫ້ກ້າວໜ້າຈົນຮັບບັບເຕມາ.
16. ເພື່ອຊ່ອຍນັກສຶກສາໃຫ້ຮັບບັບເຕມາ ເຮົາຕ້ອງເຮັດຫຍັງໃນການນຳການສຶກສາ ແລະເຮົາຈະຮຽນຫຍັງໃນບົດຕໍ່ໄປ?
16 ເຮົາຈະນຳການສຶກສາແນວໃດເພື່ອຊ່ອຍນັກສຶກສາໃຫ້ຮັບບັບເຕມາ? ເຮົາສາມາດຊ່ອຍນັກສຶກສາແຕ່ລະຄົນໃຫ້ເຫັນວ່າການຮຽນຄຳພີໄບເບິນເປັນເລື່ອງທີ່ສຳຄັນ ໂດຍກະຕຸ້ນເຂົາເຈົ້າໃຫ້ຮຽນທຸກໆອາທິດແລະກຽມບົດຮຽນລ່ວງໜ້າກ່ອນທີ່ຈະຮຽນແຕ່ລະເທື່ອ. ເຮົາຍັງຢາກກະຕຸ້ນນັກສຶກສາໃຫ້ລົມກັບພະເຢໂຫວາທຸກໆມື້ແລະສ້າງສາຍສຳພັນກັບເພິ່ນເປັນສ່ວນຕົວ. ນອກຈາກນັ້ນ ເຮົາຢາກກະຕຸ້ນນັກສຶກສາໃຫ້ເຂົ້າຮ່ວມປະຊຸມ. (ເບິ່ງຂອບ “ ສິ່ງທີ່ນັກສຶກສາຕ້ອງເຮັດເພື່ອຈະກ້າວໜ້າຈົນຮັບບັບເຕມາ”) ໃນບົດຕໍ່ໄປຈະເວົ້າເຖິງອີກ 5 ສິ່ງທີ່ຜູ້ສອນຕ້ອງເຮັດເພື່ອຊ່ອຍນັກສຶກສາໃຫ້ຮັບບັບເຕມາ.
ເພງ 76 ເຈົ້າຮູ້ສຶກແນວໃດ?
^ ຂໍ້ 5 ການສອນຜູ້ໃດຜູ້ໜຶ່ງໝາຍເຖິງການຊ່ອຍລາວໃຫ້ “ຄິດ ຮູ້ສຶກ ແລະເຮັດແບບໃໝ່.” ຂໍ້ພະຄຳພີປະຈຳປີ 2020 ທີ່ມາຈາກມັດທາຍ 28:19 ໄດ້ເຕືອນເຮົາເຖິງຄວາມສຳຄັນຂອງການສຶກສາຄຳພີໄບເບິນກັບຄົນອື່ນແລະການສອນເຂົາເຈົ້າໃຫ້ຮູ້ວິທີທີ່ຈະເຂົ້າມາເປັນລູກສິດທີ່ຮັບບັບເຕມາແລ້ວຂອງພະເຢຊູຄລິດ. ໃນບົດນີ້ແລະບົດຕໍ່ໄປ ເຮົາຈະເບິ່ງວິທີທີ່ເຮົາສາມາດປັບປຸງໂຕເອງໃນວຽກທີ່ສຳຄັນນີ້.
^ ຂໍ້ 2 ການອະທິບາຍສຳນວນ: ຖ້າເຈົ້າລົມກັບບາງຄົນເປັນປະຈຳແລະແບບເປັນລະບົບໂດຍໃຊ້ຄຳພີໄບເບິນ ນັ້ນກໍໝາຍຄວາມວ່າເຈົ້າກຳລັງນຳການສຶກສາ. ຖ້າເຈົ້າເຮັດໃຫ້ລາວເບິ່ງວ່າການຮຽນຄຳພີໄບເບິນເປັນແນວໃດແລະໄດ້ຮຽນກັບລາວສອງສາມເທື່ອແລ້ວ ແລະໝັ້ນໃຈວ່າລາວຈະຮຽນຕໍ່ໄປ ເຈົ້າກໍນັບລາວເປັນນັກສຶກສາໄດ້ໃນການສົ່ງລາຍງານ.
^ ຂໍ້ 3 ສອງບົດນີ້ມີຄຳແນະນຳຈາກບົດຄວາມຊຸດ “ການນຳການສຶກສາພະຄຳພີທີ່ຊ່ວຍໃຫ້ນັກສຶກສາກ້າວໜ້າ” ທີ່ຢູ່ໃນພະລາຊະກິດ ເດືອນກໍລະກົດ 2004 ຫາເດືອນພຶດສະພາ 2005 (ພາສາໄທ).
^ ຂໍ້ 9 ເບິ່ງວິດີໂອ 4 ນາທີເລື່ອງສອນນັກສຶກສາໃຫ້ກຽມລ່ວງໜ້າ. ໃນແອັບ JW Library® ໄປທີ່ ມີເດຍ > ການປະຊຸມແລະວຽກປະກາດ > ປັບປຸງຄວາມສາມາດໃນວຽກຮັບໃຊ້ຂອງເຮົາໃຫ້ດີຂຶ້ນ
^ ຂໍ້ 10 ໄປທີ່ ຄຳສອນໃນຄຳພີໄບເບິນ > ເຄື່ອງມືສຶກສາຄຳພີໄບເບິນ (ພາສາໄທ)
^ ຂໍ້ 14 ໃນແອັບ JW Library® ໄປທີ່ ມີເດຍ > ການປະຊຸມແລະວຽກປະກາດ > ເຄື່ອງມືສຳລັບວຽກປະກາດ
