ບົດຄວາມສຶກສາທີ 44
ເມື່ອລູກໃຫຍ່ແລ້ວຈະຮັບໃຊ້ພະເຢໂຫວາບໍ?
“ພະເຢຊູເຕີບໃຫຍ່ແລະສະຫຼາດຫຼັກແຫຼມຂຶ້ນເລື້ອຍໆ ເພິ່ນໄດ້ຮັບຄວາມພໍໃຈຈາກພະເຈົ້າແລະຈາກຄົນທົ່ວໄປຫຼາຍຂຶ້ນເລື້ອຍໆ.”—ລກ. 2:52
ເພງ 134 ລູກເປັນຂອງຂວັນຈາກພະເຈົ້າ
ໃຈຄວາມສຳຄັນ *
1. ການຕັດສິນໃຈທີ່ດີທີ່ສຸດທີ່ເຮົາເຮັດໄດ້ແມ່ນຫຍັງ?
ສ່ວນຫຼາຍແລ້ວການເລືອກຂອງພໍ່ແມ່ສົ່ງຜົນກະທົບຕໍ່ລູກເປັນເວລາຫຼາຍປີ. ຖ້າພໍ່ແມ່ເລືອກບໍ່ດີ ເຂົາເຈົ້າສາມາດສ້າງບັນຫາໃຫ້ລູກໄດ້ ແຕ່ຖ້າພໍ່ແມ່ເລືອກຢ່າງຖືກຕ້ອງ ເຂົາເຈົ້າກໍຈະຊ່ອຍລູກໃຫ້ມີຊີວິດທີ່ມີຄວາມສຸກ. ແນ່ນອນວ່າລູກກໍຕ້ອງຕັດສິນໃຈຢ່າງຖືກຕ້ອງຄືກັນ. ການຕັດສິນໃຈທີ່ດີທີ່ສຸດທີ່ເຮົາເຮັດໄດ້ແມ່ນ ຮັບໃຊ້ພະເຢໂຫວາພໍ່ຂອງເຮົາທີ່ຢູ່ໃນສະຫວັນ.—ເພງ. 73:28
2. ພະເຢຊູ ໂຢເຊັບກັບມາຣີໄດ້ເລືອກຢ່າງຖືກຕ້ອງແນວໃດ?
2 ໂຢເຊັບກັບມາຣີຢາກຊ່ອຍລູກໃຫ້ຮັບໃຊ້ພະເຢໂຫວາ ແລະການເລືອກຂອງທັງສອງເຮັດໃຫ້ເຫັນວ່າການຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດຂອງເຂົາເຈົ້າ. (ລກ. 2:40, 41, 52) ພະເຢຊູໄດ້ເລືອກຢ່າງຖືກຕ້ອງຄືກັນ ເຊິ່ງຊ່ອຍເພິ່ນໃຫ້ເຮັດຕາມຄວາມຕ້ອງການຂອງພະເຢໂຫວາໄດ້ສຳເລັດ. (ມທ. 4:1-10) ພະເຢຊູໃຫຍ່ຂຶ້ນມາເປັນຄົນທີ່ເມດຕາ ພັກດີ ແລະກ້າຫານ. ພໍ່ແມ່ທຸກຄົນທີ່ຮັກພະເຢໂຫວາຈະພູມໃຈແລະມີຄວາມສຸກທີ່ມີລູກແບບເພິ່ນ.
3. ເຮົາຈະຕອບຄຳຖາມຫຍັງໃນບົດນີ້?
3 ໃນບົດນີ້ ເຮົາຈະຕອບຄຳຖາມຕໍ່ໄປນີ້ ພະເຢໂຫວາໄດ້ເລືອກຢ່າງຖືກຕ້ອງແນວໃດໃນເລື່ອງພະເຢຊູ? ພໍ່ແມ່ສາມາດຮຽນຫຍັງຈາກສິ່ງທີ່ໂຢເຊັບແລະມາຣີເລືອກ? ແລະຄົນໜຸ່ມສາມາດຮຽນຫຍັງຈາກສິ່ງທີ່ພະເຢຊູເລືອກ?
ຮຽນຈາກພະເຢໂຫວາ
4. ພະເຢໂຫວາໄດ້ເລືອກຫຍັງທີ່ສຳຄັນສຳລັບລູກຊາຍຂອງເພິ່ນ?
4 ພະເຢໂຫວາໄດ້ເລືອກພໍ່ແມ່ທີ່ດີທີ່ສຸດໃຫ້ພະເຢຊູ. (ມທ. 1:18-23; ລກ. 1:26-38) ຄຳເວົ້າຂອງມາຣີທີ່ຂຽນໄວ້ໃນຄຳພີໄບເບິນສະແດງໃຫ້ເຫັນວ່າ ລາວຮັກພະເຢໂຫວາແລະຄຳສອນຂອງເພິ່ນ. (ລກ. 1:46-55) ແລະການທີ່ໂຢເຊັບເຮັດຕາມທີ່ພະເຢໂຫວາບອກສະແດງວ່າລາວຮັກພະເຢໂຫວາແລະຢາກເຮັດໃຫ້ເພິ່ນພໍໃຈ.—ມທ. 1:24
5-6. ພະເຢໂຫວາຍອມໃຫ້ພະເຢຊູເຈິກັບຫຍັງ?
5 ຂໍໃຫ້ສັງເກດວ່າພະເຢໂຫວາບໍ່ໄດ້ເລືອກພໍ່ແມ່ທີ່ຮັ່ງມີໃຫ້ພະເຢຊູ. ເຄື່ອງບູຊາທີ່ໂຢເຊັບແລະມາຣີເອົາໄປໃຫ້ພະເຢໂຫວາຫຼັງຈາກທີ່ພະເຢຊູເກີດສະແດງໃຫ້ເຫັນວ່າເຂົາເຈົ້າເປັນຄົນທຸກ. (ລກ. 2:24) ໂຢເຊັບເປັນຊ່າງໄມ້ແລະອາດມີຮ້ານນ້ອຍໆຢູ່ທາງຂ້າງເຮືອນຂອງລາວໃນເມືອງນາຊາເຣັດ. ຊີວິດຂອງເຂົາເຈົ້າຄືຊິທຳມະດາແລະບໍ່ມີເງິນຫຼາຍ ແລະຄອບຄົວແຮ່ງຊິຍາກຕື່ມອີກເມື່ອໃນທີ່ສຸດເຂົາເຈົ້າມີລູກຮອດ 7 ຄົນ.—ມທ. 13:55, 56
6 ພະເຢໂຫວາໄດ້ປົກປ້ອງພະເຢຊູຈາກອັນຕະລາຍບາງຢ່າງ ແຕ່ເພິ່ນບໍ່ໄດ້ປົກປ້ອງພະເຢຊູຈາກບັນຫາທຸກຢ່າງ. (ມທ. 2:13-15) ຕົວຢ່າງເຊັ່ນ: ພະເຢຊູມີພີ່ນ້ອງທີ່ບໍ່ເຊື່ອກ່ຽວກັບເພິ່ນ. ລອງຄິດເບິ່ງວ່າພະເຢຊູຕ້ອງຜິດຫວັງຫຼາຍສ່ຳໃດທີ່ຄົນໃນຄອບຄົວຂອງເພິ່ນບໍ່ໄດ້ເຊື່ອໃນຕອນທຳອິດວ່າເພິ່ນເປັນເມຊີອາ. (ມຣກ. 3:21; ຢຮ. 7:5) ນອກຈາກນັ້ນ ເບິ່ງຄືວ່າໂຢເຊັບຕາຍຕອນທີ່ພະເຢຊູຍັງນ້ອຍ ແລະເລື່ອງນີ້ຄືຊິຍາກຫຼາຍສຳລັບເພິ່ນ. ຍ້ອນພະເຢຊູເປັນລູກກົກ ນັ້ນໝາຍຄວາມວ່າເພິ່ນຕ້ອງເຮັດວຽກແທນໂຢເຊັບ. (ມຣກ. 6:3) ເມື່ອໃຫຍ່ຂຶ້ນ ພະເຢຊູຮຽນຮູ້ທີ່ຈະເບິ່ງແຍງຄອບຄົວ ເພິ່ນຄືຊິເຮັດວຽກໜັກເພື່ອຫາເງິນແລະໃຫ້ຄອບຄົວມີສິ່ງຈຳເປັນ. ດັ່ງນັ້ນ ພະເຢຊູຮູ້ດີວ່າການເຮັດວຽກໜັກໝົດມື້ມັນເມື່ອຍຫຼາຍສ່ຳໃດ.
ພໍ່ແມ່ ໃຫ້ເຈົ້າກຽມລູກໄວ້ສຳລັບບັນຫາຕ່າງໆທີ່ເຂົາເຈົ້າຈະເຈິໃນຊີວິດ ໂດຍສອນລູກຕໍ່ໆໄປດ້ວຍຄວາມຮັກວ່າໃຫ້ເພິ່ງຄຳແນະນຳໃນຄຳພີໄບເບິນ (ເບິ່ງຂໍ້ 7) *
7. (ກ) ຄົນທີ່ແຕ່ງດອງແລ້ວແລະຄົນທີ່ເປັນພໍ່ແມ່ຄວນຄິດເຖິງຄຳຖາມຫຍັງແດ່? (ຂ) ໃນສຸພາສິດ 2:1-6 ພໍ່ແມ່ຄວນສອນລູກໃຫ້ເຮັດຫຍັງ?
7 ຖ້າເຈົ້າແຕ່ງດອງແລ້ວແລະຢາກມີລູກ ໃຫ້ຖາມໂຕເອງວ່າ: ‘ເຮົາເປັນຄົນຖ່ອມຄືກັບໂຢເຊັບແລະມາຣີບໍທີ່ຮັກພະເຢໂຫວາແລະຄຳສອນຂອງເພິ່ນ? ພະເຢໂຫວາຈະເລືອກເຮົາໃຫ້ເບິ່ງແຍງຊີວິດໜຶ່ງທີ່ມີຄ່າບໍ?’ (ເພງ. 127:3, 4) ຖ້າເຈົ້າເປັນພໍ່ແມ່ແລ້ວ ໃຫ້ຖາມໂຕເອງວ່າ: ‘ຂ້ອຍກຳລັງສອນລູກບໍວ່າການເຮັດວຽກໜັກເປັນສິ່ງທີ່ດີ?’ (ຜູ້ປ. 3:12, 13) ‘ຂ້ອຍເຮັດສຸດຄວາມສາມາດບໍເພື່ອປົກປ້ອງລູກຈາກສິ່ງບໍ່ດີແລະບັນຫາຕ່າງໆທີ່ເຂົາເຈົ້າອາດຈະເຈິໃນໂລກທີ່ຊາຕານປົກຄອງ?’ (ສຸພາ. 22:3) ເປັນໄປບໍ່ໄດ້ທີ່ເຈົ້າຈະປົກປ້ອງລູກບໍ່ໃຫ້ເຈິບັນຫາ ຫຍັງເລີຍ. ແຕ່ເຈົ້າສາມາດກຽມລູກໄວ້ສຳລັບບັນຫາຕ່າງໆທີ່ເຂົາເຈົ້າຈະເຈິໃນຊີວິດໂດຍສອນລູກຕໍ່ໆໄປດ້ວຍຄວາມຮັກວ່າໃຫ້ເພິ່ງຄຳແນະນຳໃນຄຳພີໄບເບິນ. (ອ່ານສຸພາສິດ 2:1-6) ຕົວຢ່າງເຊັ່ນ: ຖ້າຄົນໃນຄອບຄົວຫຼືຍາດພີ່ນ້ອງເຊົາຮັບໃຊ້ພະເຢໂຫວາ ໃຫ້ຊ່ອຍລູກຮຽນຮູ້ຈາກຄຳພີໄບເບິນວ່າເປັນຫຍັງຈຶ່ງສຳຄັນທີ່ຈະຮັກສາຄວາມພັກດີຕໍ່ພະເຢໂຫວາຕໍ່ໆໄປ. (ເພງ. 31:23) ຫຼືຖ້າບາງຄົນທີ່ເຈົ້າຮັກຕາຍປະ ໃຫ້ເປີດຂໍ້ພະຄຳພີໃຫ້ລູກເບິ່ງເຊິ່ງຈະຊ່ອຍລູກບໍ່ໃຫ້ໂສກເສົ້າແລະສະບາຍໃຈຂຶ້ນ.—2 ກຣ. 1:3, 4; 2 ຕມ. 3:16
ຮຽນຈາກໂຢເຊັບແລະມາຣີ
8. ໂຢເຊັບແລະມາຣີເຮັດຕາມຄຳແນະນຳຫຍັງໃນພະບັນຍັດ 6:6, 7?
8 ໂຢເຊັບແລະມາຣີຊ່ອຍພະເຢຊູໃຫ້ໃຫຍ່ຂຶ້ນເປັນຄົນທີ່ພະເຈົ້າພໍໃຈ ຍ້ອນທັງສອງເຮັດຕາມຄຳແນະນຳທີ່ພະເຢໂຫວາໃຫ້ພໍ່ແມ່. (ອ່ານພະບັນຍັດ 6:6, 7) ໂຢເຊັບກັບມາຣີຮັກພະເຢໂຫວາຫຼາຍແລະເຂົາເຈົ້າກໍຢາກໃຫ້ລູກຮັກເພິ່ນແບບນັ້ນຄືກັນ.
9. ໂຢເຊັບກັບມາຣີໄດ້ເລືອກເຮັດຫຍັງທີ່ສຳຄັນຫຼາຍ?
9 ໂຢເຊັບແລະມາຣີເລືອກທີ່ຈະນະມັດສະການພະເຢໂຫວາເປັນປະຈຳນຳກັນກັບລູກ. ເຂົາເຈົ້າໄປປະຊຸມທຸກອາທິດຢູ່ບ່ອນປະຊຸມຂອງຄົນຢິວໃນເມືອງນາຊາເຣັດ ແລະໄປສະຫຼອງປັດສະຄາທຸກປີຢູ່ເມືອງເຢຣູຊາເລັມ. (ລກ. 2:41; 4:16) ເຂົາເຈົ້າອາດຈະໃຊ້ເວລາໃນການເດີນທາງໄປເມືອງເຢຣູຊາເລັມເພື່ອສອນພະເຢຊູແລະພວກນ້ອງຂອງເພິ່ນກ່ຽວກັບເລື່ອງປະຊາຊົນຂອງພະເຈົ້າໃນອະດີດ ແລະອາດຈະໄປແວ່ບ່ອນຕ່າງໆທີ່ເວົ້າເຖິງໃນພະຄຳພີ. ເມື່ອໂຢເຊັບກັບມາຣີມີລູກຫຼາຍຂຶ້ນ ອາດຈະບໍ່ງ່າຍທີ່ເຂົາເຈົ້າຈະນະມັດສະການພະເຢໂຫວາເປັນປະຈຳ. ແຕ່ໃຫ້ເບິ່ງຜົນດີທີ່ເກີດຂຶ້ນຈາກການເຮັດແບບນັ້ນ. ຍ້ອນທັງສອງໃຫ້ການນະມັດສະການພະເຢໂຫວາເປັນສິ່ງສຳຄັນທີ່ສຸດໃນຊີວິດ ຄອບຄົວຂອງເຂົາເຈົ້າຈຶ່ງສະໜິດກັບພະເຢໂຫວາ.
10. ພໍ່ແມ່ສາມາດຮຽນຫຍັງຈາກໂຢເຊັບແລະມາຣີ?
10 ພໍ່ແມ່ທີ່ຢ້ານຢຳພະເຈົ້າຮຽນຫຍັງຈາກໂຢເຊັບແລະມາຣີ? ສິ່ງສຳຄັນທີ່ສຸດ ເຈົ້າຕ້ອງເຮັດໃຫ້ລູກເຫັນໂດຍທາງຄຳເວົ້າແລະການກະທຳວ່າເຈົ້າຮັກພະເຢໂຫວາຫຼາຍແທ້ໆ. ໃຫ້ຈື່ໄວ້ວ່າສິ່ງທີ່ດີທີ່ສຸດທີ່ເຈົ້າສາມາດໃຫ້ລູກໄດ້ແມ່ນຊ່ອຍເຂົາເຈົ້າໃຫ້ຮັກພະເຢໂຫວາ ແລະສິ່ງສຳຄັນທີ່ສຸດຢ່າງໜຶ່ງທີ່ເຈົ້າສາມາດສອນລູກໄດ້ແມ່ນ ການສຶກສາພະຄຳພີເປັນປະຈຳ ອະທິດຖານ ໄປປະຊຸມ ແລະໄປປະກາດ. (1 ຕມ. 6:6) ແນ່ນອນວ່າເຈົ້າກໍ ຕ້ອງໃຫ້ລູກມີສິ່ງຈຳເປັນທາງດ້ານວັດຖຸຄືກັນ. (1 ຕມ. 5:8) ແຕ່ໃຫ້ຈື່ໄວ້ວ່າສິ່ງທີ່ຈະຊ່ອຍລູກໃຫ້ລອດຜ່ານຈຸດຈົບຂອງລະບົບນີ້ແລະເຂົ້າໄປໃນໂລກໃໝ່ຂອງພະເຈົ້າ * ແມ່ນການມີສາຍສຳພັນທີ່ໃກ້ຊິດກັບພະເຢໂຫວາ ບໍ່ແມ່ນການມີເງິນຄຳແລະຊັບສົມບັດ.—ເອເຊກ. 7:19; 1 ຕມ. 4:8
ເຮົາດີໃຈແທ້ໆທີ່ເຫັນພໍ່ແມ່ຫຼາຍຄົນເລືອກເຮັດສິ່ງທີ່ຖືກຕ້ອງເພື່ອສອນລູກໃຫ້ສະໜິດກັບພະເຢໂຫວາ (ເບິ່ງຂໍ້ 11) *
11. (ກ) ຄຳແນະນຳໃນ 1 ຕີໂມທຽວ 6:17-19 ຈະຊ່ອຍພໍ່ແມ່ແນວໃດໃຫ້ເລືອກຢ່າງຖືກຕ້ອງເມື່ອລ້ຽງລູກ? (ຂ) ຄອບຄົວຂອງເຈົ້າອາດຄິດເຖິງເປົ້າໝາຍຫຍັງແດ່ ແລະຖ້າເຮັດຕາມ ຈະມີຜົນດີແນວໃດ? (ເບິ່ງຂອບ “ ເຈົ້າມີເປົ້າໝາຍຫຍັງ?”)
11 ເຮົາດີໃຈແທ້ໆທີ່ເຫັນພໍ່ແມ່ຫຼາຍຄົນເລືອກເຮັດສິ່ງຖືກຕ້ອງເພື່ອສອນລູກໃຫ້ສະໜິດກັບພະເຢໂຫວາ. ເຂົາເຈົ້ານະມັດສະການພະເຢໂຫວານຳກັນເປັນປະຈຳ ເຂົ້າຮ່ວມການປະຊຸມປະຈຳປະຊາຄົມແລະການປະຊຸມໃຫຍ່ ແລະໄປປະກາດ. ບາງຄອບຄົວສາມາດໄປປະກາດໃນເຂດທີ່ບໍ່ມີການປະກາດປານໃດ. ບາງຄອບຄົວໄປເບິ່ງເບເທນຫຼືຊ່ອຍໃນການສ້າງອາຄານຕ່າງໆທີ່ອົງການຂອງພະເຢໂຫວາໃຊ້. ຄອບຄົວທີ່ເລືອກເຮັດສິ່ງເຫຼົ່ານີ້ຕ້ອງໃຊ້ຈ່າຍເງິນຂອງໂຕເອງແລະອາດຈະບໍ່ງ່າຍສຳລັບເຂົາເຈົ້າ ແຕ່ພະເຢໂຫວາຈະຕອບແທນເຂົາເຈົ້າຢ່າງລົ້ນເຫຼືອທີ່ເຮັດແບບນີ້. (ອ່ານ 1 ຕີໂມທຽວ 6:17-19) ເດັກນ້ອຍທີ່ຖືກລ້ຽງໃນຄອບຄົວແບບນີ້ສ່ວນຫຼາຍແລ້ວຈະເຮັດສິ່ງດີໆແບບນີ້ຕໍ່ໆໄປເມື່ອເຂົາເຈົ້າໃຫຍ່ຂຶ້ນ ແລະເຂົາເຈົ້າກໍດີໃຈທີ່ພໍ່ແມ່ລ້ຽງເຂົາເຈົ້າແບບນີ້. *—ສຸພາ. 10:22
ຮຽນຈາກພະເຢຊູ
12. ເມື່ອພະເຢຊູໃຫຍ່ຂຶ້ນ ເພິ່ນຕ້ອງເຮັດຫຍັງ?
12 ພະເຢໂຫວາພໍ່ຂອງພະເຢຊູເລືອກຢ່າງຖືກຕ້ອງສະເໝີ ແລະໂຢເຊັບກັບມາຣີກໍເລືອກຢ່າງຖືກຕ້ອງຄືກັນ. ແຕ່ເມື່ອພະເຢຊູໃຫຍ່ຂຶ້ນ ເພິ່ນຕ້ອງເລືອກເອົາເອງ. (ຄລຕ. 6:5) ຄືກັບເຮົາທຸກຄົນ ພະເຢຊູມີອິດສະຫຼະທີ່ຈະເລືອກ. ດັ່ງນັ້ນ ເພິ່ນສາມາດເລືອກແບບທີ່ເຫັນແກ່ໂຕແລະບໍ່ຕ້ອງເຮັດຕາມຄວາມຕ້ອງການຂອງພະເຈົ້າກໍໄດ້. ແທນທີ່ຈະເຮັດແບບນັ້ນ ເພິ່ນເລືອກທີ່ຈະຮັກສາສາຍສຳພັນທີ່ດີກັບພະເຢໂຫວາ. (ຢຮ. 8:29) ຕົວຢ່າງຂອງພະເຢຊູຈະຊ່ອຍຄົນໜຸ່ມໃນທຸກມື້ນີ້ໄດ້ແນວໃດ?
ຄົນໜຸ່ມ ໃຫ້ເຊື່ອຟັງພໍ່ແມ່ສະເໝີ (ເບິ່ງຂໍ້ 13) *
13. ຕອນທີ່ພະເຢຊູຍັງນ້ອຍ ເພິ່ນໄດ້ເລືອກເຮັດຫຍັງທີ່ສຳຄັນຫຼາຍ?
13 ຕອນທີ່ພະເຢຊູຍັງນ້ອຍ ເພິ່ນເລືອກເຊື່ອຟັງພໍ່ແມ່. ເພິ່ນ “ເຊື່ອຟັງພວກເຂົາສະເໝີ” ແລະບໍ່ເຄີຍຫາເຫດຜົນວ່າເພິ່ນຮູ້ດີກວ່າເຂົາເຈົ້າ. (ລກ. 2:51) ຍ້ອນເປັນລູກກົກ ແນ່ນອນວ່າພະເຢຊູຕ້ອງເຮັດໜ້າທີ່ຮັບຜິດຊອບຂອງໂຕເອງໃຫ້ດີທີ່ສຸດ. ພະເຢຊູຄືຊິພະຍາຍາມຮຽນຮູ້ວິທີເຮັດວຽກຈາກໂຢເຊັບເພື່ອເພິ່ນຈະສາມາດຊ່ອຍຫາເງິນລ້ຽງຄອບຄົວ.
14. ເຮົາຮູ້ໄດ້ແນວໃດວ່າພະເຢຊູໝັ່ນສຶກສາພະຄຳພີ?
ລກ. 2:8-19, 25-38) ພະເຢຊູບໍ່ພຽງແຕ່ຟັງສິ່ງທີ່ໂຢເຊັບກັບມາຣີເລົ່າໃຫ້ຟັງເທົ່ານັ້ນ ແຕ່ເພິ່ນຍັງຮຽນເລື່ອງຕ່າງໆໃນພະຄຳພີດ້ວຍໂຕເອງ. ເຮົາຮູ້ໄດ້ແນວໃດວ່າພະເຢຊູໝັ່ນສຶກສາພະຄຳພີ? ກໍຍ້ອນວ່າຕອນທີ່ພະເຢຊູຍັງນ້ອຍ ພວກອາຈານໃນເມືອງເຢຣູຊາເລັມ “ຮູ້ສຶກງຶດງໍ້ແທ້ໆທີ່ເຫັນວ່າເພິ່ນເຂົ້າໃຈແລະຕອບໄດ້ດີຫຼາຍ.” (ລກ. 2:46, 47) ຕອນອາຍຸ 12 ປີ ພະເຢຊູໝັ້ນໃຈວ່າພະເຢໂຫວາເປັນພໍ່ຂອງເພິ່ນ ຍ້ອນວ່າເພິ່ນໄດ້ຮຽນຫຼາຍຢ່າງຈາກພະຄຳພີ.—ລກ. 2:42, 43, 49
14 ໂຢເຊັບກັບມາຣີຄືຊິເລົ່າໃຫ້ພະເຢຊູຟັງກ່ຽວກັບການເກີດຂອງເພິ່ນທີ່ອັດສະຈັນ ແລະສິ່ງທີ່ທູດສະຫວັນເວົ້າກ່ຽວກັບເພິ່ນ. (15. ພະເຢຊູເຮັດໃຫ້ເຫັນແນວໃດວ່າເພິ່ນເລືອກທີ່ຈະເຮັດຕາມຄວາມຕ້ອງການຂອງພະເຢໂຫວາ?
15 ເມື່ອພະເຢຊູຮູ້ວ່າພະເຢໂຫວາຢາກໃຫ້ເພິ່ນເຮັດຫຍັງ ພະເຢຊູກໍເລືອກທີ່ຈະເຮັດຕາມຄວາມຕ້ອງການຂອງພະເຢໂຫວາ. (ຢຮ. 6:38) ພະເຢຊູຮູ້ວ່າຈະມີຫຼາຍຄົນຊັງເພິ່ນ. ເຖິງວ່າເພິ່ນບໍ່ຢາກໃຫ້ເປັນແບບນັ້ນ ແຕ່ເພິ່ນກໍຍັງເລືອກທີ່ຈະເຊື່ອຟັງພະເຢໂຫວາ. ຕອນທີ່ພະເຢຊູຮັບບັບເຕມາໃນປີ ຄ.ສ 29 ສິ່ງສຳຄັນທີ່ສຸດສຳລັບເພິ່ນແມ່ນການເຮັດຕາມຄວາມຕ້ອງການຂອງພະເຢໂຫວາ. (ຮຣ. 10:5-7) ເຖິງວ່າພະເຢຊູກຳລັງຈະຕາຍຢູ່ເທິງເສົາທໍລະມານ ແຕ່ເພິ່ນກໍຕັ້ງໃຈທີ່ຈະເຮັດຕາມຄວາມຕ້ອງການຂອງພໍ່ເພິ່ນຕໍ່ໆໄປ.—ຢຮ. 19:30
16. ສິ່ງໜຶ່ງທີ່ລູກສາມາດຮຽນຈາກພະເຢຊູແມ່ນຫຍັງ?
16 ເຊື່ອຟັງພໍ່ແມ່. ຄືກັບໂຢເຊັບແລະມາຣີ ພໍ່ແມ່ຂອງເຈົ້າກໍບໍ່ສົມບູນແບບ ແຕ່ພະເຢໂຫວາມອບໝາຍໃຫ້ເຂົາເຈົ້າປົກປ້ອງ ຝຶກສອນ ແລະຊີ້ນຳເຈົ້າ. ຖ້າເຈົ້າຟັງຄຳແນະນຳຂອງພໍ່ແມ່ແລະນັບຖືສິດອຳນາດຂອງພວກເພິ່ນ “ເຈົ້າຈະຢູ່ດີມີສຸກ.”—ອຟຊ. 6:1-4
17. ຕາມໂຢຊວຍ 24:15 ຄົນໜຸ່ມຕ້ອງຕັດສິນໃຈໃນເລື່ອງຫຍັງດ້ວຍໂຕເອງ?
17 ຕັດສິນໃຈວ່າເຈົ້າຈະຮັບໃຊ້ໃຜ. ເຈົ້າຕ້ອງເຂົ້າໃຈແທ້ໆວ່າພະເຢໂຫວາເປັນພະເຈົ້າແບບໃດ ເພິ່ນຕ້ອງການຫຍັງ ແລະເຈົ້າຈະເຮັດຕາມຄວາມຕ້ອງການນັ້ນໄດ້ແນວໃດ. (ຣມ. 12:2) ແລ້ວເຈົ້າກໍຈະສາມາດຕັດສິນໃຈໃນສິ່ງທີ່ສຳຄັນທີ່ສຸດໃນຊີວິດ ນັ້ນຄືການຮັບໃຊ້ພະເຢໂຫວາ. (ອ່ານໂຢຊວຍ 24:15; ຜູ້ປ. 12:1) ຖ້າເຈົ້າເຮັດຕາມຕາຕະລາງການອ່ານຄຳພີໄບເບິນແລະ ການສຶກສາສ່ວນຕົວ ເຈົ້າກໍຈະຮັກພະເຢໂຫວາຫຼາຍຂຶ້ນແລະມີຄວາມເຊື່ອເຂັ້ມແຂງຂຶ້ນ.
18. ການເລືອກແບບໃດທີ່ຄົນໜຸ່ມຕ້ອງເຮັດ ແລະຜົນຈະເປັນແນວໃດ?
18 ເລືອກທີ່ຈະເຮັດໃຫ້ຄວາມຕ້ອງການຂອງພະເຢໂຫວາເປັນສິ່ງສຳຄັນທີ່ສຸດໃນຊີວິດ. ໂລກທີ່ຊາຕານປົກຄອງບອກວ່າ ຖ້າເຈົ້າໃຊ້ຄວາມສາມາດຂອງເຈົ້າເພື່ອໂຕເອງ ເຈົ້າຈະມີຄວາມສຸກ. ແຕ່ເຮົາຮູ້ວ່າຄົນທີ່ເນັ້ນເປົ້າໝາຍທາງດ້ານວັດຖຸກໍ “ເຮັດໃຫ້ຕົວເອງຕ້ອງເຈັບປວດໃຈຫຼາຍຢ່າງ.” (1 ຕມ. 6:9, 10) ແຕ່ຖ້າເຈົ້າເຊື່ອຟັງພະເຢໂຫວາແລະເລືອກທີ່ຈະເຮັດໃຫ້ຄວາມຕ້ອງການຂອງເພິ່ນເປັນສິ່ງສຳຄັນທີ່ສຸດໃນຊີວິດ “ເຈົ້າກໍຈະຕັດສິນໃຈຢ່າງສະຫຼາດສຸຂຸມ” ແລະມີຊີວິດທີ່ມີຄວາມສຸກ.—ຢຊວຍ. 1:8, ລ.ມ.
ເຈົ້າເລືອກທີ່ຈະເຮັດຫຍັງ?
19. ພໍ່ແມ່ຕ້ອງຈື່ຫຍັງໄວ້?
19 ພໍ່ແມ່ ໃຫ້ເຮັດສຸດຄວາມສາມາດເພື່ອຊ່ອຍລູກໃຫ້ຮັບໃຊ້ພະເຢໂຫວາ. ໃຫ້ເພິ່ງພະເຢໂຫວາ ແລະເພິ່ນຈະຊ່ອຍເຈົ້າໃຫ້ເລືອກຢ່າງຖືກຕ້ອງ. (ສຸພາ. 3:5, 6) ໃຫ້ຈື່ໄວ້ວ່າລູກຈະໄດ້ຮັບອິດທິພົນຈາກສິ່ງທີ່ເຈົ້າເຮັດຫຼາຍກວ່າສິ່ງທີ່ເຈົ້າເວົ້າ. ດັ່ງນັ້ນ ໃຫ້ເລືອກສິ່ງທີ່ດີທີ່ສຸດເພື່ອຈະຊ່ອຍລູກໃຫ້ໄດ້ຮັບຄວາມພໍໃຈຈາກພະເຢໂຫວາ.
20. ຖ້າຄົນໜຸ່ມເລືອກຮັບໃຊ້ພະເຢໂຫວາ ເຂົາເຈົ້າຈະໄດ້ຮັບສິ່ງດີໆຫຍັງແດ່?
20 ຄົນໜຸ່ມ ພໍ່ແມ່ສາມາດຊ່ອຍເຈົ້າໃຫ້ເລືອກຢ່າງຖືກຕ້ອງທີ່ສຸດໃນຊີວິດ. ແຕ່ຖ້າເຈົ້າຢາກໃຫ້ພະເຢໂຫວາພໍໃຈ ເຈົ້າຕ້ອງເລືອກຢ່າງຖືກຕ້ອງ. ດັ່ງນັ້ນ ໃຫ້ຮຽນແບບພະເຢຊູ ແລະເລືອກທີ່ຈະຮັບໃຊ້ພະເຢໂຫວາພໍ່ຂອງເຈົ້າທີ່ຢູ່ໃນສະຫວັນ. ຖ້າເຮັດແບບນັ້ນ ເຈົ້າກໍຈະມີຊີວິດທີ່ບໍ່ໜ້າເບື່ອ ແຕ່ຈະໄດ້ຮັບສິ່ງທີ່ດີແລະມີຄວາມສຸກໃນຕອນນີ້. (1 ຕມ. 4:16) ແລະໃນອະນາຄົດ ເຈົ້າກໍຈະມີຊີວິດທີ່ມີຄວາມສຸກທີ່ສຸດ.
ເພງ 133 ນະມັດສະການພະເຢໂຫວາຕັ້ງແຕ່ຍັງໜຸ່ມ
^ ຂໍ້ 5 ພໍ່ແມ່ຢາກໃຫ້ລູກມີຄວາມສຸກແລະໃຫ້ຮັບໃຊ້ພະເຢໂຫວາເມື່ອເຂົາເຈົ້າໃຫຍ່ຂຶ້ນ. ພໍ່ແມ່ຈະເລືອກແນວໃດເພື່ອຊ່ອຍລູກໃຫ້ຮັບໃຊ້ພະເຢໂຫວາ? ຄົນໜຸ່ມຈະເລືອກແນວໃດເພື່ອເຂົາເຈົ້າຈະປະສົບຜົນສຳເລັດໃນຊີວິດ? ໃນບົດນີ້ເຮົາຈະໄດ້ຄຳຕອບສຳລັບຄຳຖາມສອງຂໍ້ນີ້.
^ ຂໍ້ 10 ເບິ່ງປຶ້ມການນະມັດສະການທີ່ບໍລິສຸດຂອງພະເຢໂຫວາໄດ້ຮັບການຟື້ນຟູໜ້າ 69-70 ຂໍ້ 17-18 (ພາສາໄທ)
^ ຂໍ້ 11 ເບິ່ງຂອບ “ຂ້ອຍມີພໍ່ແມ່ທີ່ດີທີ່ສຸດ” ໃນຕື່ນເຖີດ! ເດືອນຕຸລາ ປີ 2011 ໜ້າ 20 ແລະບົດຄວາມ “ຈົດໝາຍພິເສດສະບັບໜຶ່ງເຖິງພໍ່ແມ່” ໃນຕື່ນເຖີດ! 8 ມີນາ 1999 ໜ້າ 25 (ພາສາໄທ).
^ ຂໍ້ 66 ຄຳອະທິບາຍຮູບ: ຕັ້ງແຕ່ພະເຢຊູຍັງນ້ອຍ ມາຣີໄດ້ສອນເພິ່ນໃຫ້ຮັກພະເຢໂຫວາ. ຜູ້ເປັນແມ່ໃນທຸກມື້ນີ້ກໍສາມາດສອນລູກໃຫ້ຮັກພະເຢໂຫວາຄືກັນ.
^ ຂໍ້ 68 ຄຳອະທິບາຍຮູບ: ໂຢເຊັບເຫັນຄ່າການເຂົ້າຮ່ວມປະຊຸມຢູ່ບ່ອນປະຊຸມຂອງຄົນຢິວນຳກັນກັບຄອບຄົວ. ຜູ້ເປັນພໍ່ໃນທຸກມື້ນີ້ກໍເຫັນຄ່າການເຂົ້າຮ່ວມປະຊຸມປະຈຳປະຊາຄົມນຳກັນກັບຄອບຄົວ.
^ ຂໍ້ 70 ຄຳອະທິບາຍຮູບ: ພະເຢຊູຮຽນຮູ້ວິທີເຮັດວຽກຈາກໂຢເຊັບ. ຄົນໜຸ່ມໃນທຸກມື້ນີ້ກໍສາມາດຮຽນຮູ້ວິທີເຮັດວຽກຈາກພໍ່.