ບົດຄວາມສຶກສາທີ 42
ຍຶດໝັ້ນກັບຄວາມຈິງ
“ກວດເບິ່ງທຸກສິ່ງໃຫ້ແນ່ໃຈ ແລ້ວຍຶດໝັ້ນໃນສິ່ງທີ່ດີ.”—1 ທຊ. 5:21
ເພງ 142 ຍຶດໝັ້ນກັບຄວາມຫວັງຂອງເຮົາ
ໃຈຄວາມສຳຄັນ *
1. ເປັນຫຍັງຫຼາຍຄົນຈຶ່ງງົງກ່ຽວກັບສາສະໜາຄລິດສະຕຽນ?
ມີຫຼາຍສາສະໜາບອກວ່າໂຕເອງເປັນຄລິດສະຕຽນ. ນີ້ເຮັດໃຫ້ຫຼາຍຄົນງົງແລະສົງໄສວ່າ: “ສາສະໜາໃດເປັນສາສະໜາແທ້? ແລະພະເຈົ້າຍອມຮັບທຸກສາສະໜາບໍ?” ແລ້ວເຮົາເດ ເຮົາໝັ້ນໃຈບໍວ່າພະຍານພະເຢໂຫວາສອນຄວາມຈິງໃນຄຳພີໄບເບິນ ແລະວິທີທີ່ເຮົານະມັດສະການພະເຢໂຫວາກໍເປັນແບບທີ່ເພິ່ນພໍໃຈ? ໃຫ້ເຮົາມາເບິ່ງຫຼັກຖານເລື່ອງນີ້ນຳກັນ.
2. ເປັນຫຍັງໂປໂລຈຶ່ງໝັ້ນໃຈວ່າຄຳສອນໃນພະຄຳພີເປັນຄວາມຈິງ? (1 ເທຊະໂລນິກ 1:5)
2 ໂປໂລໝັ້ນໃຈວ່າ: “ພະຄຳພີທຸກຕອນ ພະເຈົ້າດົນໃຈໃຫ້ຂຽນຂຶ້ນມາ.” (2 ຕມ. 3:16) ທີ່ລາວເຊື່ອແບບນີ້ບໍ່ແມ່ນຍ້ອນອາລົມຄວາມຮູ້ສຶກ ແຕ່ລາວເຊື່ອຍ້ອນລາວໄດ້ສຶກສາພະຄຳພີຢ່າງລະອຽດ. (ອ່ານ 1 ເທຊະໂລນິກ 1:5) ຈາກການສຶກສານີ້ເຮັດໃຫ້ໂປໂລໝັ້ນໃຈວ່າ ພະເຢຊູເປັນເມຊີອາຕາມທີ່ຄຳພີໄບເບິນບອກໄວ້ ແລະລາວກໍເຮັດ “ທຸກສິ່ງຕາມທີ່ພະເຈົ້າຢາກໃຫ້ເຮັດ.” (ກຈກ. 20:27) ແຕ່ພວກຜູ້ນຳສາສະໜາພັດບໍ່ຍອມຮັບວ່າພະເຢຊູເປັນເມຊີອາ ແຖມເຂົາເຈົ້າຍັງບໍ່ໄດ້ເຮັດຕາມທຸກສິ່ງທີ່ຄຳພີໄບເບິນບອກ.—ຕຕ. 1:16
3. ເຮົາຕ້ອງຮູ້ທຸກຢ່າງ ກ່ອນບໍເພື່ອຈະໝັ້ນໃຈວ່າສິ່ງທີ່ຄຳພີໄບເບິນສອນເປັນຄວາມຈິງ? (ເບິ່ງຂອບ “ ຄວາມຄິດຂອງພະເຢໂຫວາແລະສິ່ງທີ່ເພິ່ນສ້າງ—‘ມີຫຼາຍຈົນເວົ້າໄດ້ບໍ່ໝົດ’”)
3 ບາງຄົນຄິດວ່າ ສາສະໜາແທ້ຕ້ອງຕອບໄດ້ທຸກຄຳຖາມລວມເຖິງຄຳຖາມທີ່ບໍ່ມີໃນຄຳພີໄບເບິນນຳ. ແຕ່ການຄິດແບບນີ້ສົມເຫດສົມຜົນບໍ? ໃຫ້ເຮົາມາເບິ່ງເລື່ອງຂອງອັກຄະສາວົກໂປໂລ. ໂປໂລກະຕຸ້ນໃຫ້ຄລິດສະຕຽນ “ກວດເບິ່ງທຸກສິ່ງໃຫ້ແນ່ໃຈ.” (1 ທຊ. 5:21) ແຕ່ໂປໂລກໍບໍ່ໄດ້ຮູ້ທຸກສິ່ງເພາະລາວບອກວ່າ: “ພວກເຮົາຮູ້ພຽງບາງຢ່າງ . . . ສິ່ງທີ່ພວກເຮົາເຫັນໃນຕອນນີ້ເປັນພາບສະທ້ອນມົວໆຂອງແວ່ນທີ່ເຮັດຈາກໂລຫະ.” (1 ກຣ. 13:9, 12) ເຮົາເຫັນໄດ້ວ່າ ເຖິງວ່າໂປໂລຈະບໍ່ໄດ້ເຂົ້າໃຈທຸກຢ່າງ ແຕ່ລາວກໍໝັ້ນໃຈວ່າສິ່ງທີ່ຄຳພີໄບເບິນສອນເປັນຄວາມຈິງ ເພາະລາວຮູ້ຈັກຄຳສອນພື້ນຖານກ່ຽວກັບພະເຢໂຫວາແລະຄວາມຕ້ອງການຂອງເພິ່ນ.
4. ເຮົາຕ້ອງເຮັດຫຍັງເພື່ອຈະໝັ້ນໃຈວ່າພະຍານພະເຢໂຫວາເປັນຄລິດສະຕຽນແທ້ ແລະຄລິດສະຕຽນແທ້ຕ້ອງເຮັດຫຍັງແດ່?
4 ຖ້າເຮົາສົມທຽບວິທີທີ່ພະເຢຊູນະມັດສະການພະເຢໂຫວາ ແລະສິ່ງທີ່ພະຍານພະເຢໂຫວາເຮັດໃນທຸກມື້ນີ້ ເຮົາກໍຈະໝັ້ນໃຈຫຼາຍຂຶ້ນວ່າພະຍານພະເຢໂຫວາເປັນຄລິດສະຕຽນແທ້. ໃນບົດຄວາມນີ້ ເຮົາຈະມາເບິ່ງວ່າຄລິດສະຕຽນແທ້ຕ້ອງເຮັດ 4 ຢ່າງຕໍ່ໄປນີ້: (1) ບໍ່ຂາບໄຫວ້ຮູບບູຊາ (2) ເຄົາລົບນັບຖືຊື່ຂອງພະເຢໂຫວາ (3) ຮັກຄວາມຈິງ ແລະ (4) ຮັກກັນແລະກັນ.
ເຮົາບໍ່ຂາບໄຫວ້ຮູບບູຊາ
5. ເຮົາໄດ້ບົດຮຽນຫຍັງຈາກວິທີທີ່ພະເຢຊູນະມັດສະການພະເຢໂຫວາ ແລະເຮົາຈະເຮັດຕາມສິ່ງທີ່ພະເຢຊູສອນແນວໃດ?
5 ຍ້ອນພະເຢຊູຮັກພະເຢໂຫວາຫຼາຍ ເພິ່ນຈຶ່ງນະມັດສະການພະເຢໂຫວາພຽງຜູ້ດຽວທັງຕອນທີ່ເພິ່ນຢູ່ໃນສະຫວັນແລະຢູ່ໃນໂລກ. (ລກ. 4:8) ແລະເພິ່ນກໍຍັງໄດ້ສອນພວກລູກສິດໃຫ້ເຮັດແບບນັ້ນຄືກັນ. ເນື່ອງຈາກບໍ່ມີມະນຸດຄົນໃດເຄີຍເຫັນພະເຈົ້າ ດັ່ງນັ້ນ ເຂົາເຈົ້າຈຶ່ງບໍ່ສາມາດສ້າງຮູບປັ້ນທີ່ມີສະຫງ່າລາສີຄືກັບພະເຈົ້າໄດ້. ນີ້ຈຶ່ງເປັນເຫດຜົນທີ່ພະເຢຊູແລະພວກລູກສິດບໍ່ໃຊ້ຮູບປັ້ນໃນການນະມັດສະການ. (ເອຊາ. 46:5) ຄັນຊັ້ນເຮົາຈະຂາບໄຫວ້ຮູບທີ່ຫຼາຍຄົນຖືວ່າສັກສິດໄດ້ບໍ? ໃນຂໍ້ທີສອງທີ່ຢູ່ໃນບັນຍັດ 10 ຂໍ້ ພະເຢໂຫວາໄດ້ບອກວ່າ: “ຢ່າສ້າງຮູບເຄົາລົບບໍ່ວ່າຈະເປັນຮູບຫຍັງກໍຕາມ ທີ່ຄືກັບສິ່ງທີ່ຢູ່ໃນທ້ອງຟ້າ ຫຼືສິ່ງທີ່ຢູ່ເທິງແຜ່ນດິນ . . . ຢ່າຂາບໄຫວ້ຮູບເຄົາລົບພວກນັ້ນ.” (ອົບ. 20:4, 5, ລ.ມ.) ຈາກເລື່ອງນີ້ເຮົາເຫັນໄດ້ວ່າ ຜູ້ທີ່ຢາກເຮັດໃຫ້ພະເຈົ້າພໍໃຈກໍບໍ່ຄວນທີ່ຈະຂາບໄຫວ້ຮູບບູຊາທຸກຮູບແບບ.
6. ພະຍານພະເຢໂຫວາໃນທຸກມື້ນີ້ໄດ້ນະມັດສະການພະເຈົ້າຕາມແບບໃຜ?
6 ນັກປະຫວັດສາດຄົນໜຶ່ງບອກວ່າ ຄລິດສະຕຽນໃນສະຕະວັດທຳອິດນະມັດສະການພະເຈົ້າພຽງອົງດຽວ. ຕົວຢ່າງເຊັ່ນ: ໃນປຶ້ມປະຫວັດສາດຂອງຄລິດສະຕຽນ ບອກວ່າ: “ຄລິດສະຕຽນໃນສະຕະວັດທຳອິດກຽດຊັງຮູບບູຊາແລະບໍ່ໃຊ້ຮູບນັ້ນໃນບ່ອນນະມັດສະການພະເຈົ້າ.” ໃນທຸກມື້ນີ້ພະຍານພະເຢໂຫວາກໍເຮັດແບບດຽວກັນ. ເຂົາເຈົ້າບໍ່ຂາບໄຫວ້ຮູບບູຊາຕ່າງໆເຊິ່ງລວມເຖິງຮູບຂອງພະເຢຊູ ແລະສິ່ງທີ່ສະແດງເຖິງສັນຍະລັກຂອງຊາດ ເພາະເຂົາເຈົ້າພະຍາຍາມເຮັດຕາມສິ່ງທີ່ພະເຢຊູສອນທີ່ບອກວ່າ “ເຈົ້າຕ້ອງນະມັດສະການພະເຢໂຫວາພະເຈົ້າຂອງເຈົ້າ.”—ມທ. 4:10
7. ພະຍານພະເຢໂຫວາຕ່າງຈາກຄລິດສະຕຽນນິກາຍອື່ນແນວໃດ?
7 ຫຼາຍຄົນໃນທຸກມື້ນີ້ມັກນັບຖືພວກຄຸນພໍ່ທີ່ມີຊື່ສຽງແລະເຮັດຄືກັບວ່າຄົນເຫຼົ່ານັ້ນເປັນພະເຈົ້າ. ເຂົາເຈົ້າເຊື່ອຄຳເວົ້າທຸກຄຳແລະຊື້ປຶ້ມຕ່າງໆຂອງພວກຄຸນພໍ່ແລະກໍບໍລິຈາກເງິນເປັນຈຳນວນຫຼາຍ. ບາງຄົນໃຫ້ຄວາມສຳຄັນແລະສົນໃຈພວກຄຸນພໍ່ຫຼາຍກວ່າພະເຢຊູດ້ວຍຊ້ຳ! ແຕ່ເຮົາທີ່ເປັນພະຍານພະເຢໂຫວາບໍ່ໄດ້ໃຫ້ຄວາມສຳຄັນກັບມະນຸດຫຼາຍກວ່າພະເຈົ້າ ເພາະເຖິງວ່າເຮົາຈະນັບຖືຜູ້ທີ່ນຳໜ້າໃນປະຊາຄົມ ແຕ່ເຮົາກໍເຮັດຕາມຄຳສອນຂອງພະເຢຊູທີ່ບອກວ່າ: “ພວກເຈົ້າທຸກຄົນເປັນພີ່ນ້ອງກັນ.” (ມທ. 23:8-10) ເຮົາບໍ່ໄດ້ນະມັດສະການມະນຸດບໍ່ວ່າຜູ້ນັ້ນຈະເປັນຜູ້ນຳທາງສາສະໜາຫຼືຜູ້ນຳຂອງໂລກນີ້ ແລະເຮົາກໍບໍ່ໄດ້ສະໜັບສະໜູນເຂົາເຈົ້າຄືກັນ ແຕ່ເຮົາພະຍາຍາມທີ່ຈະຮັກສາຄວາມເປັນກາງແລະບໍ່ມີສ່ວນໃນການປົກຄອງຂອງໂລກ. ເມື່ອເຮົາເຮັດແບບນີ້ເຮົາກໍແຕກຕ່າງຈາກຄົນອື່ນໆທີ່ອ້າງວ່າເປັນຄລິດສະຕຽນ.—ຢຮ. 18:36
ເຮົາເຄົາລົບນັບຖືຊື່ຂອງພະເຢໂຫວາ
ຄລິດສະຕຽນແທ້ພູມໃຈທີ່ໄດ້ບອກຄົນອື່ນໃຫ້ຮູ້ເລື່ອງຂອງພະເຢໂຫວາ (ເບິ່ງຂໍ້ 8-10) *
8. ເຮົາຮູ້ໄດ້ແນວໃດວ່າພະເຢໂຫວາຢາກໃຫ້ຄົນອື່ນຮູ້ຈັກແລະຍົກຍ້ອງຊື່ຂອງເພິ່ນ?
8 ພະເຢຊູໄດ້ອະທິດຖານວ່າ: “ພໍ່ເອີຍ ຂໍໃຫ້ຊື່ຂອງພໍ່ໄດ້ຮັບການຍົກຍ້ອງ.” ແລ້ວພະເຢໂຫວາກໍໄດ້ຕອບຄຳອະທິດຖານນັ້ນຈາກສະຫວັນວ່າ ເພິ່ນໄດ້ເຮັດໃຫ້ຊື່ຂອງເພິ່ນໄດ້ຮັບການຍົກຍ້ອງແລ້ວ. (ຢຮ. 12:28) ພະເຢຊູໄດ້ເຮັດໃຫ້ຊື່ຂອງພະເຢໂຫວາໄດ້ຮັບການຍົກຍ້ອງຕະຫຼອດຊີວິດຂອງເພິ່ນ. (ຢຮ. 17:26) ດັ່ງນັ້ນ ຄລິດສະຕຽນແທ້ກໍຄວນພູມໃຈທີ່ໄດ້ໃຊ້ຊື່ຂອງພະເຢໂຫວາແລະຊ່ວຍຄົນອື່ນໃຫ້ຮູ້ຈັກຊື່ນີ້.
9. ຄລິດສະຕຽນໃນສະຕະວັດທຳອິດສະແດງໃຫ້ເຫັນແນວໃດວ່າເຂົາເຈົ້າຍົກຍ້ອງຊື່ຂອງພະເຈົ້າ?
9 ບໍ່ດົນຫຼັງຈາກທີ່ມີການກໍ່ຕັ້ງປະຊາຄົມຄລິດສະຕຽນໃນສະຕະວັດທຳອິດ ພະເຢໂຫວາກໍ ‘ສົນໃຈຄົນຕ່າງຊາດ ແລະລວບລວມປະຊາຊົນກຸ່ມໜຶ່ງໃນພວກເຂົາໃຫ້ໃຊ້ຊື່ຂອງພະອົງ.’ (ກຈກ. 15:14) ຄລິດສະຕຽນໃນສະຕະວັດທຳອິດພູມໃຈທີ່ໄດ້ໃຊ້ຊື່ຂອງພະເຢໂຫວາແລະຊ່ວຍຄົນອື່ນໃຫ້ຮູ້ຈັກຊື່ນີ້. ເຂົາເຈົ້າໄດ້ປະກາດນາມຊື່ຂອງເພິ່ນໃຫ້ຄົນອື່ນຮູ້ຈັກແລະຂຽນນາມຊື່ນັ້ນໄວ້ໃນຄຳພີໄບເບິນ. * ສິ່ງທີ່ເຂົາເຈົ້າເຮັດສະແດງໃຫ້ເຫັນວ່າ ເຂົາເຈົ້າເປັນກຸ່ມດຽວທີ່ຍົກຍ້ອງຊື່ຂອງພະເຈົ້າ.—ກຈກ. 2:14, 21
10. ສິ່ງໃດສະແດງວ່າພະຍານພະເຢໂຫວາເປັນກຸ່ມດຽວທີ່ຍົກຍ້ອງແລະໃຊ້ຊື່ຂອງພະເຈົ້າ?
10 ພະຍານພະເຢໂຫວາເປັນກຸ່ມດຽວທີ່ຍົກຍ້ອງແລະໃຊ້ຊື່ຂອງພະເຈົ້າບໍ? ແມ່ນແລ້ວ. ໃນທຸກມື້ນີ້ຫຼາຍສາສະໜາພະຍາຍາມປົກປິດຊື່ຂອງພະເຈົ້າ. ເຂົາເຈົ້າໄດ້ລຶບຊື່ຂອງພະເຈົ້າອອກຈາກຄຳພີໄບເບິນ ແລະເຖິງຂັ້ນສັ່ງຫ້າມບໍ່ໃຫ້ໃຊ້ຊື່ພະເຈົ້າໃນພິທີກຳທາງສາສະໜາ. * ແຕ່ພະຍານພະເຢໂຫວາບໍ່ໄດ້ເປັນແບບນັ້ນ. ຫຼາຍຄົນຮູ້ຈັກວ່າເຮົາເປັນກຸ່ມດຽວທີ່ຍົກຍ້ອງແລະໃຊ້ຊື່ຂອງພະເຈົ້າຫຼາຍກວ່າສາສະໜາອື່ນໆ ແລະໃຊ້ຊີວິດສົມກັບເປັນພະຍານພະເຢໂຫວາ. (ເອຊາ. 43:10-12) ເຮົາໄດ້ຈັດພິມຄຳພີໄບເບິນສະບັບແປໂລກໃໝ່ ຫຼາຍກວ່າ 240 ລ້ານຫົວເຊິ່ງໃນນັ້ນມີຊື່ຂອງພະເຈົ້າຢູ່ໃນບ່ອນທີ່ຄວນຢູ່. ນອກຈາກນັ້ນ ເຮົາຍັງໄດ້ຈັດພິມປຶ້ມຕ່າງໆທີ່ອະທິບາຍຄຳພີໄບເບິນເຊິ່ງມີຊື່ຂອງພະເຈົ້າຢູ່ນຳຫຼາຍກວ່າ 1.000 ພາສາ!
ເຮົາຮັກຄວາມຈິງ
11. ຄລິດສະຕຽນໃນສະຕະວັດທຳອິດສະແດງໃຫ້ເຫັນແນວໃດວ່າເຂົາເຈົ້າຮັກຄວາມຈິງ?
11 ພະເຢຊູຮັກຄວາມຈິງກ່ຽວກັບພະເຈົ້າແລະຄວາມຕ້ອງການຂອງເພິ່ນ. ພະເຢຊູໄດ້ໃຊ້ຊີວິດສອດຄ່ອງກັບຄວາມຈິງ. ເພິ່ນໄດ້ບອກຄວາມຈິງນີ້ໃຫ້ຄົນອື່ນຮູ້ແລະສອນພວກລູກສິດໃຫ້ຮັກຄວາມຈິງຄືກັນ. (ຢຮ. 18:37; ຢຮ. 4:23, 24) ອັກຄະສາວົກເປໂຕບອກວ່າ ສາສະໜາຄລິດສະຕຽນເປັນ “ທາງຂອງຄວາມຈິງ.” (2 ປຕ. 2:2) ຄລິດສະຕຽນໃນສະຕະວັດທຳອິດຮັກຄວາມຈິງ ດັ່ງນັ້ນ ເຂົາເຈົ້າຈຶ່ງປະຕິເສດຄຳສອນ ປະເພນີຕ່າງໆ ແລະຄວາມຄິດທີ່ບໍ່ສອດຄ່ອງກັບຄວາມຈິງ. (ກລຊ. 2:8) ຄລິດສະຕຽນໃນທຸກມື້ນີ້ກໍເຮັດຄ້າຍໆກັນ ເຂົາເຈົ້າພະຍາຍາມ “ໃຊ້ຊີວິດຕາມຄວາມຈິງ” ໂດຍຍຶດໝັ້ນກັບຄວາມເຊື່ອແລະເຮັດຕາມຄຳສອນທີ່ຢູ່ໃນຄຳພີໄບເບິນ.—3 ຢຮ. 3, 4
12. ຄະນະກຳມະການປົກຄອງໄດ້ເຮັດຫຍັງເມື່ອເຂົ້າໃຈຄວາມຈິງໃນຄຳພີໄບເບິນຫຼາຍຂຶ້ນ ແລະເປັນຫຍັງເຂົາເຈົ້າຈຶ່ງເຮັດແບບນັ້ນ?
12 ພະຍານພະເຢໂຫວາບໍ່ໄດ້ຄິດວ່າຕົວເອງສົມບູນແບບ ແລະເຂົ້າໃຈຄວາມຈິງໃນຄຳພີໄບເບິນທຸກຢ່າງ ເພາະບາງເທື່ອເຮົາກໍເຂົ້າໃຈຜິດກ່ຽວກັບຄຳສອນບາງຢ່າງ ແລະການຈັດລະບຽບໃນອົງການ. ນີ້ເປັນເລື່ອງທຳມະດາເພາະຄຳພີໄບເບິນບອກວ່າ ຄວາມຮູ້ທີ່ຖືກຕ້ອງຈະມີຫຼາຍຂຶ້ນເລື້ອຍໆເມື່ອເວລາຜ່ານໄປ ແລະພະເຢໂຫວາກໍຈະຄ່ອຍໆເປີດເຜີຍຄວາມຈິງໃຫ້ເຮົາຮູ້ເທື່ອລະເລັກເທື່ອລະນ້ອຍ. (ກລຊ. 1:9, 10; ສຸພາ. 4:18) ເມື່ອຄະນະກຳມະການປົກຄອງເຂົ້າໃຈຄວາມຈິງໃນຄຳພີໄບເບິນຫຼາຍຂຶ້ນແລະເຫັນວ່າຈຳເປັນຕ້ອງປັບປ່ຽນບາງຢ່າງ ເຂົາເຈົ້າກໍປັບປ່ຽນທັນທີເພື່ອເຮັດໃຫ້ພີ່ນ້ອງໃກ້ຊິດກັບພະເຢໂຫວາຫຼາຍຂຶ້ນ ແລະນະມັດສະການພະເຢໂຫວາຕາມແບບທີ່ພະເຢຊູເຮັດ. (ຢກບ. 4:4) ເຂົາເຈົ້າບໍ່ໄດ້ເຮັດຄືກັບຄລິດສະຕຽນນິກາຍອື່ນທີ່ປັບປ່ຽນຄຳສອນຕາມຄວາມຄິດຂອງຄົນໃນໂລກເພື່ອຈະເຮັດໃຫ້ຄົນອື່ນພໍໃຈ. ເມື່ອເຮົາປັບປ່ຽນແບບນີ້ ເຮົາກໍເຂົ້າໃຈຄວາມຈິງໃນຄຳພີໄບເບິນໄດ້ຢ່າງຖືກຕ້ອງແລະຮັກຄວາມຈິງຫຼາຍຂຶ້ນ.—1 ທຊ. 2:3, 4
ເຮົາຮັກກັນແລະກັນ
13. ຄລິດສະຕຽນໃນສະຕະວັດທຳອິດຮູ້ວ່າຄຸນລັກສະນະໃດສຳຄັນທີ່ສຸດ ແລະພະຍານພະເຢໂຫວາໃນທຸກມື້ນີ້ໄດ້ສະແດງຄຸນລັກສະນະນັ້ນແນວໃດ?
13 ຄລິດສະຕຽນໃນສະຕະວັດທຳອິດຮູ້ວ່າຄຸນລັກສະນະທີ່ສຳຄັນທີ່ສຸດແມ່ນຄວາມຮັກ ເພາະພະເຢຊູບອກວ່າ: “ທຸກຄົນຈະຮູ້ວ່າພວກເຈົ້າເປັນລູກສິດຂອງຂ້ອຍ ເມື່ອພວກເຈົ້າຮັກກັນ.” (ຢຮ. 13:34, 35) ພະຍານພະເຢໂຫວາໃນທຸກມື້ນີ້ບໍ່ໄດ້ເຮັດຄືກັບສາສະໜາອື່ນ ເພາະເຮົາຮັກແລະເປັນນ້ຳໜຶ່ງໃຈດຽວກັນເຖິງວ່າຈະມາຈາກຫຼາຍປະເທດແລະມີວັດທະນະທຳທີ່ແຕກຕ່າງກັນ. ເຮົາເຫັນຄວາມຮັກທີ່ເຮົາສະແດງຕໍ່ກັນເມື່ອເຮົາເຂົ້າຮ່ວມການປະຊຸມປະຈຳປະຊາຄົມ ປະຊຸມໝວດ ແລະປະຊຸມພາກ. ເລື່ອງນີ້ຊ່ວຍເຮົາໃຫ້ໝັ້ນໃຈວ່າເຮົານະມັດສະການພະເຢໂຫວາໃນແບບທີ່ເພິ່ນພໍໃຈ.
14. ຕາມໂກໂລຊາຍ 3:12-14 ເຮົາຕ້ອງເຮັດຫຍັງເພື່ອສະແດງໃຫ້ເຫັນວ່າເຮົາຮັກພີ່ນ້ອງ?
14 ພະຄຳພີກະຕຸ້ນເຮົາ “ໃຫ້ຮັກກັນຫຼາຍໆ.” (1 ປຕ. 4:8) ວິທີໜຶ່ງທີ່ເຮົາຈະສະແດງຄວາມຮັກຕໍ່ກັນກໍຄື ອົດທົນຕໍ່ຄວາມບໍ່ສົມບູນແບບຂອງພີ່ນ້ອງແລະໃຫ້ອະໄພກັນ. ໃຫ້ເຮົາຫາໂອກາດທີ່ຈະສະແດງຄວາມເອື້ອເຟື້ອຕໍ່ພີ່ນ້ອງທຸກຄົນ ບໍ່ວ່າຜູ້ນັ້ນຈະເຄີຍເຮັດໃຫ້ເຮົາເສຍໃຈກໍຕາມ. (ອ່ານໂກໂລຊາຍ 3:12-14) ເພາະເມື່ອເຮົາເຮັດແບບນີ້ກໍສະແດງວ່າເຮົາເປັນຄລິດສະຕຽນແທ້.
“ຄວາມເຊື່ອແບບດຽວກັນ”
15. ພະຍານພະເຢໂຫວາໄດ້ເຮັດຄືກັບຄລິດສະຕຽນໃນສະຕະວັດທຳອິດດ້ານໃດອີກ?
15 ພະຍານພະເຢໂຫວາຍັງເຮັດຄືກັບຄລິດສະຕຽນໃນສະຕະວັດທຳອິດໃນດ້ານອື່ນອີກ ເຊັ່ນ: ການຈັດລະບຽບຂອງອົງການ. ເຮົາມີຜູ້ຊ່ວຍວຽກຮັບໃຊ້ ຜູ້ດູແລໃນປະຊາຄົມ ແລະຜູ້ດູແລເດີນທາງ. (ຟລປ. 1:1; ຕຕ. 1:5) ນອກຈາກນັ້ນ ເຮົາຍັງນັບຖືກົດໝາຍຂອງພະເຈົ້າໃນເລື່ອງເລືອດ ເລື່ອງເພດ ແລະເລື່ອງການແຕ່ງດອງ ແລະເຮົາຍັງໄດ້ຕັດສຳພັນຜູ້ທີ່ບໍ່ກັບໃຈເພື່ອປົກປ້ອງພີ່ນ້ອງໃນປະຊາຄົມ.—ກຈກ. 15:28, 29; 1 ກຣ. 5:11-13; 6:9, 10; ຮຣ. 13:4
16. ເອເຟໂຊ 4:4-6 ຊ່ວຍເຮົາໃຫ້ເຂົ້າໃຈເລື່ອງທີ່ສຳຄັນຫຍັງ?
16 ພະເຢຊູບອກວ່າ ບໍ່ແມ່ນທຸກຄົນທີ່ບອກວ່າຕົວເອງເປັນຄລິດສະຕຽນຈະແມ່ນຄລິດສະຕຽນແທ້. (ມທ. 7:21-23) ຄຳພີໄບເບິນເຕືອນເຮົາວ່າໃນສະໄໝສຸດທ້າຍ ຫຼາຍຄົນທີ່ບອກວ່ານັບຖືພະເຈົ້າຈະເຄັ່ງສາສະໜາ “ແຕ່ພາຍນອກ.” (2 ຕມ. 3:1, 5) ແລະຄຳພີໄບເບິນຍັງອີກບອກວ່າ ມີແຕ່ ‘ຄວາມເຊື່ອດຽວ’ ຫຼືສາສະໜາດຽວເທົ່ານັ້ນທີ່ພະເຈົ້າຍອມຮັບ.—ອ່ານເອເຟໂຊ 4:4-6
17. ໃນທຸກມື້ນີ້ ໃຜເປັນຄລິດສະຕຽນແທ້ແລະເຮັດຕາມຄວາມຈິງໃນຄຳພີໄບເບິນ?
17 ແລ້ວໃນທຸກມື້ນີ້ ໃຜເປັນຄລິດສະຕຽນແທ້ແລະເຮັດຕາມຄວາມຈິງໃນຄຳພີໄບເບິນ? ຄົນກຸ່ມນັ້ນແມ່ນ ພະຍານພະເຢໂຫວາ ເພາະເຂົາເຈົ້າເຮັດຕາມສິ່ງທີ່ພະເຢຊູສອນແລະເຮັດຕາມສິ່ງທີ່ຄລິດສະຕຽນໃນສະຕະວັດທຳອິດເຮັດ. ເຮົາຮູ້ສຶກເປັນກຽດຫຼາຍແທ້ໆທີ່ໄດ້ເປັນປະຊາຊົນຂອງພະເຢໂຫວາ ແລະຮູ້ຈັກຄວາມຈິງກ່ຽວກັບພະເຢໂຫວາແລະຄວາມຕ້ອງການຂອງເພິ່ນ! ດັ່ງນັ້ນ ຂໍໃຫ້ເຮົາທຸກຄົນຍຶດໝັ້ນກັບຄວາມຈິງນີ້ຕໍ່ໆໄປ.
ເພງ 3 ເປັນກຳລັງ ຄວາມຫວັງ ແລະຄວາມໝັ້ນໃຈຂອງເຮົາ
^ ຂໍ້ 5 ໃນບົດຄວາມນີ້ເຮົາຈະມາເບິ່ງວ່າ ພະເຢຊູແລະພວກລູກສິດໃນສະຕະວັດທຳອິດໄດ້ນະມັດສະການພະເຢໂຫວາແນວໃດ. ແລະພະຍານພະເຢໂຫວາໃນປັດຈຸບັນນີ້ໄດ້ເຮັດຕາມຕົວຢ່າງຂອງເຂົາເຈົ້າແນວໃດ.
^ ຂໍ້ 9 ເບິ່ງຂອບ “ຄລິດສະຕຽນຍຸກທຳອິດໃຊ້ພະນາມພະເຈົ້າບໍ?” ໃນຫໍສັງເກດການ 1 ກໍລະກົດ 2010 ໜ້າ 6 (ພາສາໄທ)
^ ຂໍ້ 10 ຕົວຢ່າງເຊັ່ນ ໃນປີ 2008 ສັນຕະປາປາເບເນດິກທີ 16 ບອກວ່າ “ຫ້າມອອກສຽງຫຼືໃຊ້ຊື່ຂອງພະເຈົ້າ” ໃນການຮ້ອງເພງ ອະທິດຖານ ແລະພິທີກຳຕ່າງໆໃນໂບດກາໂຕລິກ.
^ ຂໍ້ 63 ຄຳອະທິບາຍຮູບພາບ: ອົງການຂອງພະເຢໂຫວາໄດ້ຈັດພິມຄຳພີໄບເບິນສະບັບແປໂລກໃໝ່ ຫຼາຍກວ່າ 200 ພາສາເຊິ່ງມີຊື່ຂອງພະເຈົ້າຢູ່ໃນນັ້ນ ເພື່ອໃຫ້ຫຼາຍຄົນສາມາດອ່ານຄຳພີໄບເບິນໃນພາສາຂອງຕົວເອງໄດ້.
