ບົດຄວາມສຶກສາທີ 50
“ຄົນຕາຍຈະຖືກປຸກໃຫ້ຟື້ນຄືນມາແນວໃດ?”
“ຄວາມຕາຍເອີຍ ຢູ່ໃສໄຊຊະນະຂອງເຈົ້າ? ຄວາມຕາຍເອີຍ ພິດສົງຂອງເຈົ້າຫາຍໄປໃສໝົດ?”—1 ກຣ. 15:55
ເພງ 141 ຊີວິດເປັນສິ່ງມະຫັດສະຈັນ
ໃຈຄວາມສຳຄັນ *
1-2. ເປັນຫຍັງຄລິດສະຕຽນທຸກຄົນຄວນສົນໃຈເລື່ອງການຄືນມາຈາກຕາຍເພື່ອໄປສະຫວັນ?
ໃນທຸກມື້ນີ້ຜູ້ຮັບໃຊ້ພະເຢໂຫວາສ່ວນຫຼາຍມີຄວາມຫວັງທີ່ຈະມີຊີວິດຕະຫຼອດໄປໃນໂລກ. ແຕ່ກໍຍັງມີອີກສ່ວນໜຶ່ງທີ່ເປັນຜູ້ຖືກເຈີມເຊິ່ງມີຄວາມຫວັງໄປສະຫວັນ. ຜູ້ຖືກເຈີມຢາກຮູ້ວ່າເຂົາເຈົ້າຈະມີຊີວິດແບບໃດໃນສະຫວັນ ແຕ່ຜູ້ທີ່ມີຊີວິດໃນໂລກນີ້ກໍຢາກຮູ້ຄືກັນ. ດັ່ງທີ່ເຮົາຈະໄດ້ຮຽນໃນບົດຄວາມນີ້ ການຄືນມາຈາກຕາຍເພື່ອຈະມີຊີວິດໃນສະຫວັນຈະເຮັດໃຫ້ຜູ້ທີ່ມີຄວາມຫວັງທີ່ຈະມີຊີວິດຕະຫຼອດໄປໃນໂລກໄດ້ຮັບສິ່ງທີ່ດີຫຼາຍຢ່າງ. ດັ່ງນັ້ນ ບໍ່ວ່າເຮົາຈະມີຄວາມຫວັງໃນສະຫວັນຫຼືໃນໂລກ ເຮົາກໍຄວນສົນໃຈເລື່ອງການຄືນມາຈາກຕາຍເພື່ອໄປສະຫວັນ.
2 ພະເຢໂຫວາໄດ້ເຮັດໃຫ້ລູກສິດບາງຄົນຂອງພະເຢຊູໃນສະຕະວັດທຳອິດຂຽນກ່ຽວກັບການຄືນມາຈາກຕາຍເພື່ອໄປສະຫວັນ. ອັກຄະສາວົກໂຢຮັນຂຽນວ່າ “ຕອນນີ້ພວກເຮົາເປັນລູກຂອງພະເຈົ້າແລ້ວ ແຕ່ພວກເຮົາຍັງບໍ່ຮູ້ວ່າພວກເຮົາຈະມີສະພາບແບບໃດໃນອະນາຄົດ. ພວກເຮົາຮູ້ວ່າເມື່ອພະອົງປາກົດຕົວໃຫ້ພວກເຮົາເຫັນ ພວກເຮົາຈະມີສະພາບຄືກັບພະອົງ.” (1 ຢຮ. 3:2) ຄລິດສະຕຽນຜູ້ຖືກເຈີມບໍ່ຮູ້ວ່າເຂົາເຈົ້າຈະມີຮ່າງກາຍແບບໃດເມື່ອຖືກປຸກໃຫ້ໄປສະຫວັນ ແຕ່ເຂົາເຈົ້າຈະໄດ້ເຫັນພະເຢໂຫວາເມື່ອເຂົາເຈົ້າໄດ້ຮັບລາງວັນ. ຄຳພີໄບເບິນບໍ່ໄດ້ບອກທຸກຢ່າງກ່ຽວກັບການຄືນມາຈາກຕາຍເພື່ອໄປສະຫວັນ ແຕ່ອັກຄະສາວົກໂປໂລກໍໃຫ້ຂໍ້ມູນບາງຢ່າງ ກ່ຽວກັບເລື່ອງນີ້. ຜູ້ຖືກເຈີມຈະຢູ່ກັບພະເຢຊູຕອນທີ່ເພິ່ນມາ “ທຳລາຍລັດຖະບານ ຜູ້ມີອຳນາດ ແລະຜູ້ມີລິດເດດທັງໝົດ” ນີ້ລວມເຖິງ “ຄວາມຕາຍ” ເຊິ່ງເປັນ “ສັດຕູໂຕສຸດທ້າຍ” ກໍຈະຖືກທຳລາຍ. ແລະໃນທີ່ສຸດພະເຢຊູແລະຜູ້ທີ່ມາປົກຄອງກັບເພິ່ນຈະຍອມຢູ່ໃຕ້ອຳນາດພະເຢໂຫວາ ແລະທຸກສິ່ງທຸກຢ່າງກໍຈະເປັນຂອງພະເຢໂຫວາ. (1 ກຣ. 15:24-28) ຈັ່ງແມ່ນເປັນເວລາທີ່ດີແທ້ໆ! *
3. ຕາມ 1 ໂກຣິນໂທ 15:30-32 ຄວາມເຊື່ອເລື່ອງການຄືນມາຈາກຕາຍຊ່ອຍໂປໂລແນວໃດ?
3 ຄວາມເຊື່ອເລື່ອງການຄືນມາຈາກຕາຍຊ່ອຍໂປໂລໃຫ້ອົດທົນກັບຄວາມຍາກລຳບາກຫຼາຍຢ່າງ. (ອ່ານ 1 ໂກຣິນໂທ 15:30-32) ລາວບອກພີ່ນ້ອງໃນເມືອງໂກຣິນໂທວ່າ: “ຂ້ອຍເອງປະເຊີນໜ້າກັບຄວາມຕາຍຢູ່ທຸກມື້” ແລະ “ຂ້ອຍສູ້ກັບສັດຮ້າຍຢູ່ເມືອງເອເຟໂຊ.” ລາວອາດໝາຍເຖິງການຕໍ່ສູ້ກັບສັດຮ້າຍແທ້ໆທີ່ຢູ່ໃນສະໜາມກິລາໃນເມືອງເອເຟໂຊ. (2 ກຣ. 1:8; 4:10; 11:23) ຫຼືລາວອາດໝາຍເຖິງຄົນຢິວແລະຄົນອື່ນໆເຊິ່ງເປັນຄືກັບ “ສັດຮ້າຍ” ທີ່ຕໍ່ຕ້ານລາວ. (ກຈກ. 19:26-34; 1 ກຣ. 16:9) ເຖິງວ່າໂປໂລຈະເຈິກັບຄວາມທຸກຫຼາຍຢ່າງ ແຕ່ລາວກໍຍັງໝັ້ນໃຈວ່າລາວຈະມີຄວາມສຸກໃນອະນາຄົດ.—2 ກຣ. 4:16-18
4. ຄວາມຫວັງເລື່ອງການຄືນມາຈາກຕາຍຊ່ອຍຄລິດສະຕຽນໃນທຸກມື້ນີ້ແນວໃດ? (ເບິ່ງຮູບໜ້າປົກ)
4 ເຮົາຢູ່ໃນສະໄໝທີ່ອັນຕະລາຍຫຼາຍ. ສັງຄົມກໍມີແຕ່ອາຊະຍາກຳ ແລະພີ່ນ້ອງບາງຄົນກໍເຈິແບບນັ້ນ. ພີ່ນ້ອງບາງຄົນຢູ່ໃນປະເທດທີ່ມີສົງຄາມ ແລະເຂົາເຈົ້າກໍຮູ້ສຶກບໍ່ປອດໄພ. ສ່ວນບາງຄົນກໍຢູ່ໃນປະເທດທີ່ບໍ່ສາມາດປະກາດໄດ້ຢ່າງເປີດເຜີຍຫຼືວຽກປະກາດຖືກສັ່ງຫ້າມ ແຕ່ເຂົາເຈົ້າກໍຍັງເຮັດວຽກຮັບໃຊ້ພະເຢໂຫວາຢູ່ເຖິງອາດຈະຕ້ອງຕິດຄຸກແລະຖືກຂ້າ. ເຖິງພີ່ນ້ອງຈະເຈິກັບເລື່ອງທີ່ບໍ່ດີແບບນີ້ ແຕ່ເຂົາເຈົ້າກໍຍັງຮັບໃຊ້ພະເຢໂຫວາຢູ່ສະເໝີ ແລະເປັນຕົວຢ່າງທີ່ດີໃຫ້ເຮົາ. ເຂົາເຈົ້າບໍ່ຢ້ານເພາະເຂົາເຈົ້າກໍຮູ້ວ່າ ຖ້າຕ້ອງຕາຍໃນຕອນນີ້ພະເຢໂຫວາກໍຈະໃຫ້ຊີວິດທີ່ດີກວ່າໃນອະນາຄົດ.
5. ຄວາມຄິດທີ່ອັນຕະລາຍແບບໃດອາດສົ່ງຜົນຕໍ່ຄວາມເຊື່ອເລື່ອງການຄືນມາຈາກຕາຍ?
5 ໂປໂລເຕືອນພີ່ນ້ອງໃຫ້ລະວັງຄວາມຄິດທີ່ອັນຕະລາຍທີ່ວ່າ: “ບໍ່ມີການຄືນມາຈາກຕາຍດອກ ‘ມາກິນມາດື່ມກັນດີກວ່າ ເພາະມື້ອື່ນພວກເຮົາກໍຈະຕາຍ.’” ຄວາມຄິດແບບນີ້ມີກ່ອນສະໄໝຂອງໂປໂລຊ້ຳ. ໂປໂລອາດຍົກຂໍ້ຄວາມນີ້ມາຈາກເອຊາອີ 22:13 ເຊິ່ງເປັນຄວາມຄິດຂອງພວກອິດສະຣາເອນ. ແທນທີ່ເຂົາເຈົ້າຈະພະຍາຍາມໃກ້ຊິດກັບພະເຢໂຫວາ ເຂົາເຈົ້າພັດສົນໃຈແຕ່ຄວາມສຸກຂອງຕົວເອງ. ຫຼາຍຄົນໃນທຸກມື້ນີ້ກໍຄິດຄືກັບພວກອິດສະຣາເອນ. ເຂົາເຈົ້າຄິດວ່າ “ໃຫ້ມີຄວາມສຸກໃນຕອນນີ້ ເພາະບໍ່ຮູ້ວ່າມື້ອື່ນຈະເປັນແນວໃດ.” ຄຳພີໄບເບິນເວົ້າເຖິງຜົນທີ່ບໍ່ດີທີ່ພວກອິດສະຣາເອນໄດ້ຮັບຈາກການຄິດແບບນີ້.—2 ຂ່າວ. 36:15-20
6. ໝູ່ທີ່ເຮົາຫຼິ້ນນຳສົ່ງຜົນຕໍ່ຄວາມເຊື່ອເລື່ອງການຄືນມາຈາກຕາຍແນວໃດ?
6 ຍ້ອນພະເຢໂຫວາສາມາດປຸກຄົນຕາຍໃຫ້ຄືນມາໄດ້ ດັ່ງນັ້ນເລື່ອງນີ້ຄວນສົ່ງຜົນຕໍ່ການທີ່ເຮົາເລືອກໝູ່. ພີ່ນ້ອງໃນເມືອງໂກຣິນໂທຕ້ອງຫຼີກລ່ຽງທີ່ຈະບໍ່ຫຼິ້ນນຳຄົນທີ່ບໍ່ເຊື່ອເລື່ອງການຄືນມາຈາກຕາຍ. ບົດຮຽນກໍຄື: ຖ້າເຮົາຫຼິ້ນນຳໝູ່ທີ່ສົນໃຈແຕ່ຄວາມມ່ວນຊື່ນ ແລະບໍ່ໄດ້ສົນໃຈເລື່ອງອະນາຄົດ ຄວາມຄິດຂອງເຂົາເຈົ້າກໍຈະສົ່ງຜົນທີ່ບໍ່ດີຕໍ່ເຮົາ. ຖ້າຄລິດສະຕຽນຫຼິ້ນນຳຄົນແບບນັ້ນ ລາວກໍອາດຈະມີຄວາມຄິດແລະນິດໄສຄືກັບເຂົາເຈົ້າ ແລະອາດເຖິງຂັ້ນເຮັດສິ່ງທີ່ພະເຢໂຫວາກຽດຊັງ. ດັ່ງນັ້ນໂປໂລຈຶ່ງກະຕຸ້ນເຕືອນວ່າ: “ຕື່ນໄດ້ແລ້ວ ກັບມາເຮັດສິ່ງທີ່ຖືກຕ້ອງແລະຢ່າເຮັດບາບອີກເລີຍ.”—1 ກຣ. 15:33, 34
ຮ່າງກາຍແບບໃດ?
7. ຕາມ 1 ໂກຣິນໂທ 15:35-38 ບາງຄົນອາດມີຄຳຖາມຫຍັງໃນເລື່ອງການຄືນມາຈາກຕາຍ?
7 ອ່ານ 1 ໂກຣິນໂທ 15:35-38. ຄົນທີ່ຢາກເຮັດໃຫ້ຄົນອື່ນສົງໄສເລື່ອງການຄືນມາຈາກຕາຍອາດຈະຖາມວ່າ “ຄົນຕາຍຈະຖືກປຸກໃຫ້ຟື້ນຄືນມາແນວໃດ?” ເປັນເລື່ອງທີ່ດີທີ່ຈະຄິດເຖິງສິ່ງທີ່ໂປໂລເວົ້າ ເພາະຫຼາຍຄົນໃນທຸກມື້ນີ້ກໍມີຄວາມເຊື່ອທີ່ແຕກຕ່າງກັນກ່ຽວກັບຊີວິດຫຼັງຈາກຕາຍ. ແຕ່ຄຳພີໄບເບິນສອນແນວໃດ?
8. ເພື່ອຈະເຂົ້າໃຈການຄືນມາຈາກຕາຍແລ້ວມີຮ່າງກາຍສຳລັບສະຫວັນ ໂປໂລໄດ້ໃຊ້ຕົວຢ່າງເລື່ອງຫຍັງ?
8 ເມື່ອຄົນເຮົາຕາຍ ຮ່າງກາຍກໍຈະເນົ່າເປື່ອຍ. ແຕ່ພະເຈົ້າຜູ້ທີ່ສ້າງເອກະພົບສາມາດປຸກຄົນເຮົາໃຫ້ຄືນມາຈາກຕາຍແລະໃຫ້ມີຮ່າງກາຍທີ່ເໝາະສົມໄດ້. (ຕົ້ນ. 1:1; 2:7) ໂປໂລໃຊ້ຕົວຢ່າງປຽບທຽບທີ່ສະແດງໃຫ້ເຫັນວ່າພະເຈົ້າຈະບໍ່ໄດ້ປຸກຄົນຕາຍໃຫ້ກັບມາມີຮ່າງກາຍແບບເກົ່າ ແຕ່ໃຫ້ມີຮ່າງກາຍອີກແບບໜຶ່ງ. ລາວເວົ້າເຖິງເມັດຫຼືເມັດພືດ ເມື່ອເຮົາຫວ່ານເມັດນັ້ນລົງດິນ ມັນກໍຈະປົ່ງຂຶ້ນເປັນລຳຕົ້ນ ແລະເຮົາກໍເຫັນວ່າລຳຕົ້ນນັ້ນຕ່າງຈາກເມັດທີ່ຫວ່ານໄປ. ໂປໂລໃຊ້ຕົວຢ່າງນີ້ເພື່ອສະແດງໃຫ້ເຫັນວ່າພະເຈົ້າທີ່ເປັນຜູ້ສ້າງ ສາມາດ “ໃຫ້ລຳຕົ້ນ [ຮ່າງກາຍ] ຕາມທີ່ພະອົງເຫັນວ່າດີ.”
9. 1 ໂກຣິນໂທ 15:39-41 ເວົ້າເຖິງຄວາມແຕກຕ່າງຂອງຮ່າງກາຍແນວໃດ?
9 ອ່ານ 1 ໂກຣິນໂທ 15:39-41. ໂປໂລເວົ້າວ່າທຸກສິ່ງທີ່ພະເຈົ້າສ້າງມີຮ່າງກາຍທີ່ແຕກຕ່າງກັນ. ຕົວຢ່າງເຊັ່ນ: ຊີ້ນຂອງງົວ ນົກ ແລະປາກໍຕ່າງກັນ. ໃນທ້ອງຟ້າດວງເດືອນແລະດວງຕາເວັນກໍຕ່າງກັນ ແລະ “ລັດສະໝີຂອງດາວແຕ່ລະດວງກໍແຕກຕ່າງກັນ.” ເຖິງເຮົາຈະບໍ່ເຫັນດ້ວຍຕາເປົ່າວ່າດາວຕ່າງໆແຕກຕ່າງກັນ ແຕ່ນັກວິທະຍາສາດກໍບອກໃຫ້ເຮົາຮູ້ວ່າມີດາວຫຼາຍຊະນິດທີ່ຕ່າງກັນເຊັ່ນ: ມີດາວໃຫຍ່ສີແດງ ດາວນ້ອຍສີຂາວ ແລະດາວສີເຫຼືອງເຊິ່ງກໍຄືຕາເວັນທີ່ເຮົາເຫັນ. ແລະໂປໂລຍັງບອກວ່າ “ມີຮ່າງກາຍສຳລັບສະຫວັນ ແລະຮ່າງກາຍສຳລັບໂລກ.” ລາວໝາຍຄວາມວ່າແນວໃດ? ຢູ່ໂລກກໍມີຮ່າງກາຍແບບເນື້ອໜັງ ແຕ່ຢູ່ສະຫວັນກໍມີຮ່າງກາຍສຳລັບສະຫວັນຄືກັບທູດສະຫວັນ.
10. ຄົນທີ່ຖືກປຸກໃຫ້ຄືນມາຈາກຕາຍແລ້ວໄປສະຫວັນຈະມີຮ່າງກາຍແບບໃດ?
10 ຂໍໃຫ້ສັງເກດສິ່ງທີ່ໂປໂລບອກວ່າ: “ການຟື້ນຄືນມາຂອງຄົນຕາຍກໍຄືກັນ. ຮ່າງກາຍທີ່ຕາຍກໍເນົ່າເປື່ອຍ ແຕ່ຮ່າງກາຍທີ່ຖືກປຸກໃຫ້ຟື້ນຄືນມາກໍບໍ່ເນົ່າເປື່ອຍ.” ເຮົາຮູ້ວ່າເມື່ອຄົນເຮົາຕາຍ ຮ່າງກາຍກໍເນົ່າເປື່ອຍແລະກາຍເປັນຂີ້ດິນ. (ຕົ້ນ. 3:19) ແລ້ວຈະເປັນໄປໄດ້ແນວໃດທີ່ຮ່າງກາຍ ‘ທີ່ຖືກປຸກໃຫ້ຟື້ນຄືນມາບໍ່ເນົ່າເປື່ອຍ’? ໂປໂລບໍ່ໄດ້ເວົ້າເຖິງຮ່າງກາຍຂອງຄົນຕາຍທີ່ເອລີຢາ ເອລີເຊ ແລະພະເຢຊູໄດ້ປຸກໃຫ້ຄືນມາໃນໂລກ ແຕ່ໂປໂລເວົ້າເຖິງຄົນທີ່ຖືກປຸກໃຫ້ມີ “ຮ່າງກາຍສຳລັບສະຫວັນ.”—1 ກຣ. 15:42-44
11-12. ພະເຢຊູມີຮ່າງກາຍແບບໃດຕອນທີ່ຖືກປຸກໃຫ້ຄືນມາຈາກຕາຍ ແລະຜູ້ຖືກເຈີມເດຈະຖືກປຸກໃຫ້ມີຮ່າງກາຍແບບໃດ?
11 ຕອນພະເຢຊູຢູ່ໃນໂລກ ເພິ່ນກໍມີຮ່າງກາຍຄືກັບຄົນເຮົານີ້ແຫຼະ. ແຕ່ເມື່ອເພິ່ນຖືກປຸກໃຫ້ຄືນມາຈາກຕາຍແລ້ວໄປສະຫວັນ ເພິ່ນກໍມີ “ຮ່າງກາຍສຳລັບສະຫວັນ.” ຜູ້ຖືກເຈີມກໍຄືກັນ ເມື່ອເຂົາເຈົ້າຖືກປຸກໃຫ້ຄືນມາຈາກຕາຍກໍຈະມີຮ່າງກາຍສຳລັບສະຫວັນ. ໂປໂລບອກວ່າ: “ຄືກັບທີ່ຕອນນີ້ພວກເຮົາມີລັກສະນະຄືຄົນທຳອິດທີ່ຖືກສ້າງຈາກດິນ ອີກຈັກໜ້ອຍພວກເຮົາກໍຈະມີລັກສະນະຄືເພິ່ນຜູ້ນັ້ນທີ່ມາຈາກສະຫວັນ.”—1 ກຣ. 15:45-49
12 ເປັນເລື່ອງສຳຄັນທີ່ຈະຈື່ວ່າ ພະເຢຊູບໍ່ໄດ້ຖືກປຸກໃຫ້ມີຮ່າງກາຍແບບຄົນເຮົາ. ຕອນທີ່ໂປໂລເວົ້າເຖິງສ່ວນສຸດທ້າຍເລື່ອງການຄືນມາຈາກຕາຍ ລາວບອກວ່າ: “ເລືອດແລະເນື້ອໜັງຈະມີສ່ວນໃນການປົກຄອງຂອງພະເຈົ້າບໍ່ໄດ້.” (1 ກຣ. 15:50) ພວກອັກຄະສາວົກແລະຜູ້ຖືກເຈີມຄົນອື່ນໆຈະບໍ່ໄດ້ຖືກປຸກໃຫ້ຂຶ້ນໄປສະຫວັນໃນຮ່າງກາຍທີ່ມີເລືອດເນື້ອເຊິ່ງເນົ່າເປື່ອຍໄດ້. ແລ້ວເຂົາເຈົ້າຈະຖືກປຸກໃຫ້ຄືນມາຕອນໃດ? ໂປໂລບອກວ່າການປຸກໃຫ້ຄືນມາຈາກຕາຍເປັນສິ່ງທີ່ຈະເກີດຂຶ້ນໃນອະນາຄົດ ບໍ່ແມ່ນວ່າເຂົາເຈົ້າຈະຖືກປຸກ ທັນທີຫຼັງຈາກຕາຍເພາະຕອນທີ່ໂປໂລຂຽນ 1 ໂກຣິນໂທ ລູກສິດບາງຄົນກໍ “ຕາຍ” ໄປແລ້ວເຊັ່ນ: ອັກຄະສາວົກຢາໂກໂບ. (ກຈກ. 12:1, 2) ເຊິ່ງຕໍ່ມາອັກຄະສາວົກຄົນອື່ນໆແລະຜູ້ຖືກເຈີມກໍຈະ “ຕາຍ” ຄືກັນ.—1 ກຣ. 15:6
ຊະນະຄວາມຕາຍ
13. ຈະມີຫຍັງເກີດຂຶ້ນໃນໄລຍະການປະທັບຂອງພະເຢຊູ?
13 ທັງພະເຢຊູແລະໂປໂລຕ່າງກໍເວົ້າເຖິງໄລຍະເວລາທີ່ສຳຄັນນັ້ນກໍຄື: ການປະທັບຂອງພະຄລິດ. ໃນໄລຍະການປະທັບຂອງພະເຢຊູຈະມີສົງຄາມ ແຜ່ນດິນໄຫວ ໂລກລະບາດ ແລະສິ່ງທີ່ບໍ່ດີຫຼາຍຢ່າງເກີດຂຶ້ນທົ່ວໂລກ. ເຮົາໄດ້ເຫັນຄຳພະຍາກອນນີ້ເກີດຂຶ້ນແທ້ຕັ້ງແຕ່ປີ 1914. ແລະຍັງມີເຫດການທີ່ສຳຄັນທີ່ພະເຢຊູບອກໄວ້ກໍຄື ຈະມີການປະກາດຂ່າວດີເລື່ອງການປົກຄອງຂອງພະເຈົ້າ “ໄປທົ່ວໂລກເພື່ອໃຫ້ຄົນທຸກຊາດມີໂອກາດໄດ້ຍິນ ແລ້ວຈຸດຈົບກໍຈະມາເຖິງ.” (ມທ. 24:3, 7-14) ໃນເວລາ “ການປະທັບຂອງຜູ້ເປັນນາຍ” ຜູ້ຖືກເຈີມທີ່ “ຕາຍ” ໄປແລ້ວຈະຖືກປຸກໃຫ້ມີຊີວິດໃນສະຫວັນ.—1 ທຊ. 4:14-16; 1 ກຣ. 15:23
14. ຈະເກີດຫຍັງຂຶ້ນກັບຜູ້ຖືກເຈີມທີ່ຕາຍໃນໄລຍະການປະທັບຂອງພະເຢຊູ?
14 ຜູ້ຖືກເຈີມທີ່ຕາຍໃນຕອນນີ້ກໍຈະຖືກປຸກໃຫ້ໄປສະຫວັນທັນທີ. ໂປໂລໄດ້ເວົ້າເຖິງເລື່ອງນີ້ໃນ 1 ໂກຣິນໂທ 15:51, 52 ທີ່ວ່າ: “ພວກເຮົາບາງຄົນຈະບໍ່ຕ້ອງຫຼັບຢູ່ໃນຄວາມຕາຍ ແຕ່ຈະຖືກປ່ຽນແປງໃໝ່ໝົດ ໃນໄລຍະສັ້ນໆພຽງພິບຕາດຽວໃນລະຫວ່າງການເປົ່າແກຄັ້ງສຸດທ້າຍ.” ຕອນນີ້ຄຳເວົ້າຂອງໂປໂລກຳລັງເກີດຂຶ້ນແລ້ວ! ຫຼັງຈາກທີ່ຜູ້ຖືກເຈີມຄືນມາຈາກຕາຍ ເຂົາເຈົ້າຈະມີຄວາມສຸກຫຼາຍແລະຈະໄດ້ “ຢູ່ກັບຜູ້ເປັນນາຍຕະຫຼອດໄປ.”—1 ທຊ. 4:17
15. ຜູ້ທີ່ປ່ຽນແປງ “ໃນພິບຕາດຽວ” ຈະເຮັດຫຍັງໃນສະຫວັນ?
ພນມ. 2:26, 27) ເຂົາເຈົ້າຈະເຮັດຕາມຄຳສັ່ງຂອງພະເຢຊູ ແລະປົກຄອງຊາດຕ່າງໆດ້ວຍຄະທາເຫຼັກ.—ພນມ. 19:11-15
15 ພະຄຳພີບອກວ່າຜູ້ທີ່ປ່ຽນແປງ “ໃນພິບຕາດຽວ” ຈະເຮັດຫຍັງໃນສະຫວັນ? ພະເຢຊູບອກເຂົາເຈົ້າວ່າ “ຂ້ອຍຈະໃຫ້ຄົນທີ່ໄດ້ໄຊຊະນະແລະເຮັດຕາມຄຳສັ່ງຂອງຂ້ອຍຈົນເຖິງທີ່ສຸດມີອຳນາດເໜືອປະເທດຕ່າງໆ ແລ້ວລາວຈະປົກຄອງດ້ວຍຄະທາເຫຼັກແລະທຸບພວກນັ້ນໃຫ້ແຕກເປັນປ່ຽງໆຄືພາຊະນະດິນເຜົາ ລາວຈະໄດ້ຮັບອຳນາດຄືກັບທີ່ຂ້ອຍໄດ້ຮັບຈາກພໍ່ຂອງຂ້ອຍ.” (16. ມະນຸດຈະຊະນະຄວາມຕາຍໄດ້ແນວໃດ?
16 ຜູ້ຖືກເຈີມຈະຊະນະຄວາມຕາຍ. (1 ກຣ. 15:54-57) ເມື່ອຄືນມາຈາກຕາຍເຂົາເຈົ້າຈະມີສ່ວນຊ່ອຍທຳລາຍຄວາມຊົ່ວທັງໝົດໃນໂລກນີ້ໃນສົງຄາມອາມາເຄໂດນ. ຄລິດສະຕຽນຫຼາຍລ້ານຄົນຈະ “ຜ່ານຄວາມທຸກລຳບາກຄັ້ງໃຫຍ່” ແລະເຂົ້າໄປໃນໂລກໃໝ່. (ພນມ. 7:14) ຄົນທີ່ລອດຈະເຫັນຫຼາຍຕື້ຄົນທີ່ຕາຍໄປແລ້ວກັບມາມີຊີວິດອີກ. ນີ້ກໍເປັນການຊະນະຄວາມຕາຍອີກຢ່າງໜຶ່ງ. ລອງຄິດເບິ່ງວ່າເຈົ້າຈະມີຄວາມສຸກຫຼາຍສ່ຳໃດເມື່ອເຫັນສິ່ງເຫຼົ່ານີ້ເກີດຂຶ້ນ! (ກຈກ. 24:15) ແລະທຸກຄົນທີ່ສັດຊື່ຕໍ່ພະເຢໂຫວາກໍຈະໄດ້ຊີວິດຕະຫຼອດໄປ. ນີ້ພິສູດວ່າເຂົາເຈົ້າຊະນະຄວາມຕາຍທີ່ໄດ້ຈາກອາດາມ.
17. ຕາມ 1 ໂກຣິນໂທ 15:58 ເຮົາຄວນຈະເຮັດຫຍັງ?
17 ຄລິດສະຕຽນທຸກຄົນໃນທຸກມື້ນີ້ຄວນເຫັນຄ່າສິ່ງທີ່ໂປໂລຂຽນເຖິງພີ່ນ້ອງໃນເມືອງໂກຣິນໂທກ່ຽວກັບການຄືນມາຈາກຕາຍ. ເຮົາສະແດງໃຫ້ເຫັນວ່າເຮົາເຫັນຄ່າເລື່ອງນີ້ໂດຍເຮັດຕາມຄຳແນະນຳຂອງໂປໂລທີ່ໃຫ້ທຸ່ມເທກັບ “ວຽກຂອງຜູ້ເປັນນາຍ.” (ອ່ານ 1 ໂກຣິນໂທ 15:58) ຖ້າເຮົາເຮັດວຽກນີ້ຢ່າງສັດຊື່ແລະສຸດຄວາມສາມາດ ເຮົາກໍຈະມີຊີວິດທີ່ມີຄວາມສຸກໃນອະນາຄົດ. ຕອນນັ້ນເຮົາຈະມີຄວາມສຸກຫຼາຍແທ້ໆ ຫຼາຍກວ່າທີ່ເຮົາຈະຄິດອອກໄດ້. ແລະເຮົາກໍໝັ້ນໃຈວ່າວຽກທີ່ເຮົາເຮັດເພື່ອຜູ້ເປັນນາຍຈະບໍ່ເສຍໄປລ້າໆ.
ເພງ 140 ໃນທີ່ສຸດຊີວິດຈະບໍ່ຈົບສິ້ນ
^ ຂໍ້ 5 ສ່ວນທີ 2 ຂອງ 1 ໂກຣິນໂທບົດ 15 ບອກລາຍລະອຽດກ່ຽວກັບການຄືນມາຈາກຕາຍ ໂດຍສະເພາະແມ່ນການຄືນມາຈາກຕາຍຂອງຜູ້ຖືກເຈີມ. ແຕ່ສິ່ງທີ່ໂປໂລຂຽນກໍຍັງມີຄວາມສຳຄັນສຳລັບແກະອື່ນ. ໃນບົດຄວາມນີ້ ເຮົາຈະມາເບິ່ງວ່າຄວາມຫວັງເລື່ອງການຄືນມາຈາກຕາຍສົ່ງຜົນຕໍ່ຊີວິດຂອງເຮົາໃນຕອນນີ້ ແລະຊ່ອຍເຮົາໃຫ້ມີຄວາມສຸກໃນອະນາຄົດໄດ້ແນວໃດ.
^ ຂໍ້ 2 “ຄຳຖາມຈາກຜູ້ອ່ານ” ທີ່ເວົ້າເຖິງຄຳເວົ້າຂອງໂປໂລໃນ 1 ໂກຣິນໂທ 15:29.