ຄຳຖາມຈາກຜູ້ອ່ານ
ດາວິດເວົ້າເກີນຈິງບໍທີ່ລາວຂຽນໃນຄຳເພງ 61:8 ທີ່ວ່າລາວຈະສັນລະເສີນຊື່ຂອງພະເຈົ້າ “ຕະຫຼອດໄປ”?
ບໍ່ ລາວບໍ່ໄດ້ເວົ້າເກີນຈິງ. ສິ່ງທີ່ລາວເວົ້າເປັນຄວາມຈິງແລະເຊື່ອຖືໄດ້.
ຂໍໃຫ້ສັງເກດສິ່ງທີ່ດາວິດຂຽນໃນຄຳເພງ 61:8 ແລະໃນຂໍ້ອື່ນໆທີ່ເວົ້າຄ້າຍໆກັນວ່າ “ລູກຈະເຮັດຕາມຄຳສາບານຂອງລູກທຸກມື້ ແລະລູກຈະຮ້ອງເພງສັນລະເສີນຊື່ຂອງພະອົງຕະຫຼອດໄປ” “ພະເຢໂຫວາພະເຈົ້າຂອງລູກ ລູກຈະສັນລະເສີນພະອົງໝົດຫົວໃຈ. ແລະລູກຈະຍົກຍ້ອງຊື່ຂອງພະອົງຕະຫຼອດໄປ” “ລູກຈະສັນລະເສີນຊື່ຂອງພະອົງຕະຫຼອດໄປ.”—ເພງ. 61:8; 86:12; 145:1, 2, ລ.ມ.
ສິ່ງທີ່ດາວິດຂຽນບໍ່ໄດ້ໝາຍຄວາມວ່າລາວຈະບໍ່ມີວັນຕາຍ. ລາວຮູ້ວ່າທຸກຄົນມີບາບແລະຈະຕ້ອງຕາຍ ແລະລາວເອງກໍຍອມຮັບວ່າຕົວເອງກໍເປັນຄົນບາບຄືກັນ. (ປຖກ. 3:3, 17-19; ເພງ. 51:4, 5) ລາວຮູ້ວ່າແມ່ນແຕ່ຜູ້ທີ່ສັດຊື່ ເຊັ່ນ: ອັບຣາຮາມ ອີຊາກ ຢາໂຄບກໍຍັງຕາຍ ແລະໃນທີ່ສຸດລາວເອງກໍຕ້ອງຕາຍຄືກັນ. (ເພງ. 37:25; 39:4) ດັ່ງນັ້ນ ສິ່ງທີ່ລາວຂຽນໃນຄຳເພງ 61:8 ຈຶ່ງສະແດງໃຫ້ເຫັນວ່າລາວຢາກສັນລະເສີນພະເຢໂຫວາຕະຫຼອດໄປ ‘ຕາບໃດທີ່ລາວມີຊີວິດຢູ່.’—2ຊມ. 7:12, ລ.ມ.
ບາງເທື່ອດາວິດກໍຂຽນປະສົບການກ່ຽວກັບຊີວິດຂອງລາວເອງ ຄືກັບທີ່ເຮົາເຫັນໃນຂໍ້ຄວາມຫົວບົດຂອງຄຳເພງບົດ 18, 51 ແລະ 52. ຍ້ອນດາວິດເຄີຍເປັນຜູ້ລ້ຽງແກະ ໃນຄຳເພງບົດ 23 ລາວຈຶ່ງບອກວ່າພະເຢໂຫວາເປັນຜູ້ລ້ຽງແກະທີ່ຄອຍຊີ້ນຳລາວ ປົກປ້ອງລາວ ແລະເຮັດໃຫ້ລາວສົດຊື່ນ. ນີ້ຈຶ່ງເຮັດໃຫ້ລາວຢາກຮັບໃຊ້ພະເຈົ້າ “ຕະຫຼອດຊີວິດ.”—ເພງ. 23:6, ລ.ມ.
ຂໍໃຫ້ຈື່ໄວ້ວ່າ ພະເຢໂຫວາໄດ້ດົນໃຈໃຫ້ດາວິດຂຽນສິ່ງທີ່ຢູ່ໃນຄຳພີໄບເບິນ. ສິ່ງທີ່ດາວິດຂຽນລວມເຖິງຄຳພະຍາກອນຕ່າງໆທີ່ຈະເກີດຂຶ້ນໃນອະນາຄົດ. ຕົວຢ່າງເຊັ່ນ: ໃນຄຳເພງບົດ 110 ດາວິດໄດ້ຂຽນກ່ຽວກັບເວລາທີ່ຜູ້ເປັນນາຍຈະ “ນັ່ງເບື້ອງຂວາມືຂອງ [ພະເຈົ້າ]” ທີ່ຢູ່ໃນສະຫວັນ ແລະໄດ້ຮັບອຳນາດເພື່ອຈະທຳລາຍສັດຕູຂອງພະເຈົ້າແລະ “ຕັດສິນລົງໂທດຊາດຕ່າງໆ” ທີ່ຢູ່ໃນໂລກ. ຜູ້ເປັນນາຍໝາຍເຖິງເມຊີອາ ເຊິ່ງເປັນລູກຫຼານຂອງດາວິດທີ່ຈະປົກຄອງຈາກສະຫວັນແລະເປັນ “ປະໂລຫິດຕະຫຼອດໄປ.” (ເພງ. 110:1-6, ລ.ມ.) ພະເຢຊູບອກວ່າ ຄຳພະຍາກອນທີ່ຢູ່ໃນຄຳເພງບົດ 110 ແມ່ນເວົ້າກ່ຽວກັບຕົວເພິ່ນເອງແລະຈະສຳເລັດເປັນຈິງໃນອະນາຄົດ.—ມທ. 22:41-45
ເຫັນໄດ້ວ່າ ພະເຢໂຫວາດົນໃຈດາວິດໃຫ້ຂຽນເລື່ອງຂອງລາວເອງແລະຂຽນເລື່ອງທີ່ຈະເກີດຂຶ້ນໃນອະນາຄົດຕອນທີ່ລາວຖືກປຸກໃຫ້ຄືນມາ. ແລະລາວຈະໄດ້ສັນລະເສີນພະເຢໂຫວາຕະຫຼອດໄປ. ເລື່ອງນີ້ຊ່ວຍເຮົາໃຫ້ເຂົ້າໃຈວ່າຄຳເພງ 37:10, 11 ແລະ 29 ໄດ້ສຳເລັດເປັນຈິງແລ້ວໃນສະໄໝອິດສະຣາເອນບູຮານແລະຈະສຳເລັດເປັນຈິງໃນອະນາຄົດນຳ ຕອນທີ່ພະເຢໂຫວາເຮັດຕາມຄຳສັນຍາຕ່າງໆຂອງເພິ່ນ.—ເບິ່ງຂໍ້ 8 ໃນບົດຄວາມທີ່ຊື່ວ່າ “ເຈົ້າຈະໄດ້ຢູ່ກັບຂ້ອຍໃນອຸທິຍານ” ໃນຫໍສັງເກດການສະບັບນີ້.
ຄຳເພງ 61:8 ແລະຂໍ້ຄຳພີອື່ນໆທີ່ເວົ້າຄ້າຍໆກັນສະແດງໃຫ້ເຫັນວ່າດາວິດຢາກສັນລະເສີນພະເຢໂຫວາຕະຫຼອດຊີວິດຂອງລາວ. ແລະຍັງສະແດງເຖິງສິ່ງທີ່ດາວິດຈະເຮັດໃນອະນາຄົດເມື່ອພະເຢໂຫວາປຸກລາວໃຫ້ຄືນມາມີຊີວິດອີກ.
