ບົດຄວາມສຶກສາທີ 50
“ເຈົ້າຈະໄດ້ຢູ່ກັບຂ້ອຍໃນອຸທິຍານ”
“ຂ້ອຍຂໍບອກເຈົ້າມື້ນີ້ວ່າ ເຈົ້າຈະໄດ້ຢູ່ກັບຂ້ອຍໃນອຸທິຍານແນ່ນອນ.”—ລກ. 23:43
ເພງ 145 ຄຳສັນຍາຂອງພະເຈົ້າເລື່ອງອຸທິຍານ
ໃຈຄວາມສຳຄັນ a
1. ບໍ່ດົນກ່ອນທີ່ພະເຢຊູຈະຕາຍ ເພິ່ນໄດ້ເວົ້າຫຍັງກັບນັກໂທດຜູ້ໜຶ່ງທີ່ຖືກຄຶງຢູ່ຂ້າງໆເພິ່ນ? (ລູກາ 23:39-43)
ພະເຢຊູກັບນັກໂທດສອງຄົນທີ່ຖືກຄຶງຢູ່ຂ້າງໆເພິ່ນຮູ້ສຶກເຈັບປວດຫຼາຍ ເພາະກຳລັງໃກ້ຈະຕາຍ. (ລກ. 23:32, 33) ນັກໂທດສອງຄົນນີ້ໄດ້ເວົ້າດູຖູກພະເຢຊູ ນັ້ນສະແດງວ່າເຂົາເຈົ້າບໍ່ແມ່ນລູກສິດຂອງເພິ່ນ. (ມທ. 27:44; ມຣກ. 15:32) ແຕ່ນັກໂທດຄົນໜຶ່ງໄດ້ປ່ຽນໃຈ. ລາວເວົ້າກັບພະເຢຊູວ່າ “ທ່ານເຢຊູ ຕອນທີ່ທ່ານໄດ້ເປັນກະສັດ ຢ່າລືມຂ້ອຍເດີ້.” ພະເຢຊູຕອບວ່າ: “ຂ້ອຍຂໍບອກເຈົ້າມື້ນີ້ວ່າ ເຈົ້າຈະໄດ້ຢູ່ກັບຂ້ອຍໃນອຸທິຍານແນ່ນອນ.” (ອ່ານລູກາ 23:39-43) ບໍ່ມີບ່ອນໃດໃນຄຳພີໄບເບິນບອກວ່ານັກໂທດຜູ້ນີ້ຍອມຮັບຂ່າວສານເລື່ອງ ‘ການປົກຄອງທີ່ຢູ່ໃນສະຫວັນ’ ທີ່ພະເຢຊູປະກາດ. ແລະພະເຢຊູກໍບໍ່ເຄີຍເວົ້າກັບລາວວ່າ ລາວຈະໄດ້ຢູ່ໃນການປົກຄອງຂອງເພິ່ນທີ່ຢູ່ໃນສະຫວັນ. (ມທ. 4:17) ເພິ່ນກຳລັງເວົ້າເຖິງອຸທິຍານຢູ່ເທິງໂລກນີ້. ເປັນຫຍັງເຮົາຈຶ່ງເວົ້າແບບນັ້ນ?
ເຮົາສະຫຼຸບຫຍັງໄດ້ກ່ຽວກັບນັກໂທດທີ່ເວົ້າກັບພະເຢຊູ ແລະລາວຮູ້ເລື່ອງຫຍັງແດ່? (ເບິ່ງຂໍ້ 2-3)
2. ເປັນຫຍັງເຮົາຈຶ່ງສະຫຼຸບວ່ານັກໂທດທີ່ກັບໃຈເປັນຄົນຢິວ?
2 ນັກໂທດທີ່ກັບໃຈຄົນນີ້ອາດຈະເປັນຄົນຢິວ ເພາະລາວເວົ້າກັບນັກໂທດອີກຄົນໜຶ່ງວ່າ “ເຈົ້າບໍ່ຢຳເກງພະເຈົ້າ ບໍ ເຈົ້າກໍຖືກລົງໂທດຄືກັນໄດ໋?” (ລກ. 23:40) ປົກກະຕິແລ້ວຄົນຢິວຈະນະມັດສະການພະເຈົ້າອົງດຽວ ແຕ່ຊາດອື່ນໆຈະນະມັດສະການພະຫຼາຍອົງ. (ອພຍ. 20:2, 3; 1ກຣ. 8:5, 6) ຖ້າລາວບໍ່ແມ່ນຄົນຢິວ ລາວກໍຄືຊິເວົ້າກັບນັກໂທດອີກຄົນໜຶ່ງວ່າ “ເຈົ້າບໍ່ຢຳເກງເທບພະເຈົ້າຕ່າງໆ ບໍ?” ແລະພະເຢຊູກໍບໍ່ໄດ້ຖືກສົ່ງມາໃຫ້ຊ່ວຍຊາດອື່ນໆ ແຕ່ໃຫ້ມາຊ່ວຍ “ຊາວອິດສະຣາເອນເທົ່ານັ້ນ ພວກເຂົາເປັນຄືກັບແກະທີ່ຫຼົງທາງ.” (ມທ. 15:24) ແລະພະເຢໂຫວາກໍບອກຊາວອິດສະຣາເອນໃຫ້ຮູ້ວ່າເພິ່ນຈະປຸກຄົນຕາຍໃຫ້ຟື້ນຄືນມາ. ນັກໂທດຄົນນີ້ອາດຮູ້ເລື່ອງນີ້ຄືກັນ ເພາະຄຳເວົ້າຂອງລາວສະແດງໃຫ້ເຫັນວ່າພະເຢໂຫວາຈະປຸກພະເຢຊູແລ້ວໃຫ້ເພິ່ນເປັນກະສັດໃນການປົກຄອງຂອງພະເຈົ້າ. ແລະລາວກໍຫວັງວ່າພະເຢໂຫວາຈະປຸກລາວຄືກັນ. ເຫັນໄດ້ວ່ານັກໂທດຄົນນີ້ເປັນຄົນຢິວ.
3. ນັກໂທດທີ່ກັບໃຈອາດຈະຄິດວ່າອຸທິຍານທີ່ພະເຢຊູເວົ້າເຖິງເປັນແນວໃດ? (ປະຖົມມະການ 2:15)
3 ຍ້ອນນັກໂທດຄົນນີ້ເປັນຄົນຢິວ ລາວຈຶ່ງຮູ້ກ່ຽວກັບເລື່ອງຂອງອາດາມແລະເອວາແລະສວນອຸທິຍານທີ່ພະເຢໂຫວາສ້າງໄວ້ໃຫ້ເຂົາເຈົ້າ. ດັ່ງນັ້ນ ລາວອາດຈະຄິດວ່າອຸທິຍານທີ່ພະເຢຊູເວົ້າເຖິງເປັນສວນທີ່ສວຍງາມທີ່ຢູ່ເທິງໂລກນີ້.—ອ່ານປະຖົມມະການ 2:15
4. ສິ່ງທີ່ພະເຢຊູເວົ້າກັບນັກໂທດຄົນໜຶ່ງກະຕຸ້ນເຮົາໃຫ້ຄິດເຖິງຫຍັງ?
4 ສິ່ງທີ່ພະເຢຊູເວົ້າກັບນັກໂທດຄົນນັ້ນໜ້າຈະກະຕຸ້ນເຮົາໃຫ້ຄິດວ່າຊີວິດໃນອຸທິຍານເປັນແນວໃດ. ທີ່ຈິງ ການປົກຄອງຂອງກະສັດໂຊໂລໂມນຈະຊ່ວຍເຮົາໃຫ້ເຫັນພາບຊີວິດໃນອຸທິຍານ. ແລະເຮົາຄາດໝາຍໄດ້ວ່າພະເຢຊູຜູ້ທີ່ຍິ່ງໃຫຍ່ກວ່າໂຊໂລໂມນຈະເຮັດວຽກຮ່ວມກັບຜູ້ຖືກເຈີມໃນການເຮັດໃຫ້ໂລກນີ້ກາຍເປັນອຸທິຍານ. (ມທ. 12:42) ດັ່ງນັ້ນ “ແກະອື່ນ” ຄວນຈະສົນໃຈວ່າເຂົາເຈົ້າຕ້ອງເຮັດຫຍັງເພື່ອຈະມີຊີວິດຕະຫຼອດໄປໃນອຸທິຍານ.—ຢຮ. 10:16
ຊີວິດໃນອຸທິຍານຈະເປັນແນວໃດ?
5. ເຈົ້າຄິດວ່າຊີວິດໃນອຸທິຍານເປັນແນວໃດ?
5 ເຈົ້າຄິດວ່າຊີວິດໃນອຸທິຍານຈະເປັນແນວໃດ? ບາງທີເຈົ້າອາດຈະຄິດເຖິງສວນທີ່ງາມໆຄືກັບສວນເອເດັນ. (ປຖກ. 2:7-9) ຫຼືເຈົ້າອາດຈະຄິດເຖິງຄຳພະຍາກອນຂອງມີເກທີ່ບອກວ່າປະຊາຊົນຂອງພະເຈົ້າ “ທຸກຄົນຈະນັ່ງຢູ່ກ້ອງເຄືອໝາກລະແຊັງຂອງໂຕເອງ ແລະຢູ່ກ້ອງຕົ້ນໝາກເດື່ອຂອງໂຕເອງ.” (ມກ. 4:3, 4, ລ.ມ.) ຫຼືເຈົ້າອາດຈະຄິດເຖິງຂໍ້ຄຳພີອື່ນທີ່ບອກວ່າຈະມີອາຫານຢ່າງອຸດົມສົມບູນ. (ເພງ. 72:16; ອຊຢ. 65:21, 22) ລອງນຶກພາບວ່າ ເຈົ້າຢູ່ໃນສວນທີ່ສວຍງາມ ມີຕົ້ນໄມ້ຫຼາຍຊະນິດ ມີອາກາດທີ່ສົດຊື່ນ ມີກິ່ນຫອມຂອງດອກໄມ້ແລະມີອາຫານແຊບໆເຕັມໂຕະ. ຫຼືເຈົ້າອາດຈະນຶກພາບເຖິງຄອບຄົວແລະໝູ່ເຊິ່ງລວມເຖິງຄົນທີ່ຄືນມາຈາກຕາຍໄດ້ມາຫຼິ້ນນຳກັນຢ່າງມີຄວາມສຸກ. ສິ່ງເຫຼົ່ານີ້ບໍ່ໄດ້ເປັນພຽງຄວາມເພີ້ຝັນ ແຕ່ມັນຈະເກີດຂຶ້ນແທ້. ແລະໃນອຸທິຍານເຮົາຍັງຈະໄດ້ເຮັດວຽກທີ່ເຮັດໃຫ້ມີຄວາມສຸກນຳອີກ.
ໃນອະນາຄົດເຮົາຈະມີວຽກທີ່ສຳຄັນເຊິ່ງກໍຄືການສອນຄົນທີ່ຄືນມາຈາກຕາຍ (ເບິ່ງຂໍ້ 6)
6. ເຮົາຈະເຮັດຫຍັງແດ່ໃນອຸທິຍານ? (ເບິ່ງຮູບພາບ)
6 ພະເຢໂຫວາສ້າງເຮົາໃຫ້ມີຄວາມສຸກກັບການເຮັດວຽກ. (ຜູ້ປ. 2:24) ໃນລະຫວ່າງການປົກຄອງຂອງພະເຢຊູໜຶ່ງພັນປີ ເຮົາຈະໄດ້ເຮັດວຽກຫຼາຍຢ່າງ ເຊັ່ນ: ຄົນທີ່ລອດຜ່ານຄວາມທຸກລຳບາກຄັ້ງໃຫຍ່ແລະຄົນທີ່ຄືນມາຈາກຕາຍຈຳເປັນທີ່ຈະຕ້ອງມີອາຫານ ເຄື່ອງນຸ່ງ ແລະບ່ອນຢູ່ອາໄສ. ນີ້ຄືຊິເປັນວຽກທີ່ເຮັດໃຫ້ເຮົາມີຄວາມສຸກຫຼາຍແທ້ໆ! ເຮົາຍັງຈະໄດ້ເຮັດວຽກຄືກັບອາດາມແລະເອວາທີ່ເຮັດໃຫ້ໂລກນີ້ກາຍເປັນອຸທິຍານ. ແລະເຮົາຍັງຈະໄດ້ສອນຫຼາຍລ້ານຄົນທີ່ຄືນມາຈາກຕາຍໃຫ້ຮູ້ກ່ຽວກັບພະເຢໂຫວາແລະຄວາມຕ້ອງການຂອງເພິ່ນ. ເຮົາຍັງຈະໄດ້ຊ່ວຍຜູ້ຮັບໃຊ້ທີ່ສັດຊື່ຂອງພະເຢໂຫວາເຊິ່ງຕາຍກ່ອນສະໄໝຂອງພະເຢຊູໃຫ້ຮຽນຮູ້ເລື່ອງພະເຢໂຫວາຫຼາຍຂຶ້ນ.
7. ເຮົາສາມາດໝັ້ນໃຈໃນເລື່ອງຫຍັງ ແລະຍ້ອນຫຍັງ?
7 ເຮົາສາມາດໝັ້ນໃຈໄດ້ວ່າຊີວິດໃນອຸທິຍານຈະມີຄວາມສະຫງົບສຸກ ມີທຸກຢ່າງທີ່ເຮົາຕ້ອງການ ແລະເປັນລະບົບລະບຽບ. ເປັນຫຍັງເຮົາຈຶ່ງເວົ້າແນວນັ້ນ? ກໍຍ້ອນພະເຢໂຫວາເຮັດໃຫ້ເຫັນເປັນຕົວຢ່າງແລ້ວວ່າ ຊີວິດພາຍໃຕ້ການປົກຄອງຂອງພະເຢຊູຈະເປັນແນວໃດ. ເຮົາຮູ້ເລື່ອງນີ້ໄດ້ຈາກການປົກຄອງຂອງກະສັດໂຊໂລໂມນ.
ການປົກຄອງຂອງໂຊໂລໂມນເປັນພາບເຖິງອຸທິຍານ
8. ຄຳເວົ້າທີ່ຢູ່ໃນຄຳເພງ 37:10, 11, 29 ເກີດຂຶ້ນແທ້ແນວໃດຫຼັງຈາກທີ່ດາວິດຂຽນ? (ເບິ່ງ “ຄຳຖາມຈາກຜູ້ອ່ານ” ໃນຫໍສັງເກດການສະບັບນີ້)
8 ກະສັດດາວິດຖືກດົນໃຈໃຫ້ຂຽນວ່າ ຊີວິດຈະເປັນແນວໃດເມື່ອຢູ່ພາຍໃຕ້ການປົກຄອງຂອງກະສັດທີ່ສະຫຼາດແລະສັດຊື່. (ອ່ານຄຳເພງ 37:10, 11, 29) ເຮົາມັກຈະອ່ານຄຳເພງ 37:11 ເມື່ອເວົ້າກ່ຽວກັບຊີວິດໃນອຸທິຍານ. ນີ້ເປັນເຫດຜົນທີ່ພະເຢຊູຍົກເລື່ອງນີ້ມາເວົ້າໃນຄຳບັນຍາຍເທິງພູເຂົາ ເຊິ່ງສະແດງວ່າເລື່ອງນີ້ຈະເກີດຂຶ້ນແທ້ໃນອະນາຄົດ. (ມທ. 5:5) ແລະສິ່ງທີ່ດາວິດເວົ້າຍັງບອກໃຫ້ຮູ້ວ່າຊີວິດຈະເປັນແນວໃດໃນສະໄໝທີ່ໂຊໂລໂມນປົກຄອງ. ຕອນທີ່ໂຊໂລໂມນປົກຄອງອິດສະຣາເອນ ປະຊາຊົນຂອງພະເຈົ້າມີຄວາມສະຫງົບສຸກແລະຈະເລີນຮຸ່ງເຮືອງເປັນພິເສດ ແລະແຜ່ນດິນກໍ “ມີນ້ຳນົມແລະນ້ຳເຜີ້ງຫຼາຍ.” ພະເຢໂຫວາເວົ້າວ່າ: “ຖ້າເຈົ້າເຮັດຕາມກົດໝາຍແລະເຊື່ອຟັງຄຳສັ່ງຂອງເຮົາຕໍ່ໆໄປ . . . ເຮົາຈະເຮັດໃຫ້ແຜ່ນດິນຂອງເຈົ້າມີຄວາມສະຫງົບ. ຕອນທີ່ເຈົ້ານອນກໍຈະບໍ່ມີໃຜເຮັດໃຫ້ເຈົ້າຢ້ານ.” (ລລວ. 20:24; 26:3, 6, ລ.ມ.) ຄຳສັນຍາເຫຼົ່ານີ້ໄດ້ເກີດຂຶ້ນໃນສະໄໝທີ່ໂຊໂລໂມນປົກຄອງ. (1ຂຄ. 22:9; 29:26-28) ແລະພະເຢໂຫວາໄດ້ສັນຍາວ່າຄົນຊົ່ວ “ຈະບໍ່ມີແລ້ວ.” (ເພງ. 37:10, ລ.ມ.) ເຫັນໄດ້ວ່າຄຳເວົ້າທີ່ຢູ່ໃນຄຳເພງ 37:10, 11, 29 ໄດ້ເກີດຂຶ້ນໃນອະດີດແລະຈະເກີດຂຶ້ນໃນອະນາຄົດຄືກັນ.
9. ລາຊີນີຂອງປະເທດເຊບາໄດ້ເວົ້າເຖິງການປົກຄອງຂອງກະສັດໂຊໂລໂມນແນວໃດ?
9 ເມື່ອລາຊີນີຂອງປະເທດເຊບາໄດ້ຍິນຂ່າວກ່ຽວກັບຄວາມສະຫງົບສຸກແລະຄວາມຈະເລີນຮຸ່ງເຮືອງຂອງປະເທດອິດສະຣາເອນພາຍໃຕ້ການປົກຄອງຂອງກະສັດໂຊໂລໂມນ ລາວຈຶ່ງໄດ້ເດີນທາງບັກໄກໆເພື່ອຈະມາເບິ່ງເມືອງເຢຣູຊາເລັມດ້ວຍຕົວເອງ. (1ກສ. 10:1) ຫຼັງຈາກທີ່ລາວມາເບິ່ງອານາຈັກຂອງໂຊໂລໂມນແລ້ວ ລາວກໍເວົ້າວ່າ: “ສິ່ງທີ່ຄົນໄປເລົ່າບໍ່ໄດ້ເຄິ່ງໜຶ່ງຂອງສິ່ງທີ່ຂ້ອຍເຫັນຊ້ຳ . . . ປະຊາຊົນແລະຄົນທີ່ເຮັດວຽກນຳທ່ານທຸກມື້ຄືຊິມີຄວາມສຸກຫຼາຍທີ່ໄດ້ຟັງຄຳເວົ້າທີ່ມີສະຕິປັນຍາຂອງທ່ານ.” (1ກສ. 10:6-8, ລ.ມ.) ແຕ່ສິ່ງດີໆທີ່ມີຢູ່ໃນການປົກຄອງຂອງໂຊໂລໂມນເປັນພຽງຕົວຢ່າງໜຶ່ງຂອງສິ່ງທີ່ພະເຢໂຫວາຈະເຮັດເພື່ອມະນຸດພາຍໃຕ້ການປົກຄອງຂອງພະເຢຊູລູກຊາຍຂອງເພິ່ນ.
10. ພະເຢຊູດີກວ່າໂຊໂລໂມນແນວໃດ?
10 ພະເຢຊູດີກວ່າໂຊໂລໂມນທຸກດ້ານ. ໂຊໂລໂມນເປັນຄົນບໍ່ສົມບູນແບບ ລາວເຄີຍເຮັດຜິດຮ້າຍແຮງແລະນຳຄວາມເດືອດຮ້ອນມາສູ່ປະຊາຊົນ. ແຕ່ພະເຢຊູເປັນຜູ້ປົກຄອງທີ່ສົມບູນແບບແລະບໍ່ເຄີຍເຮັດຜິດພາດເລີຍ. (ລກ. 1:32; ຮຣ. 4:14, 15) ເຖິງຊາຕານຈະເຮັດໃຫ້ເພິ່ນເຈິຄວາມຍາກລຳບາກຫຼາຍຢ່າງ ແຕ່ເພິ່ນກໍຍັງສັດຊື່ຕໍ່ພະເຈົ້າສະເໝີ. ພະເຢຊູພິສູດໃຫ້ເຫັນວ່າ ເພິ່ນບໍ່ເຄີຍເຮັດຜິດແລະຈະບໍ່ເຮັດຫຍັງກໍຕາມທີ່ເຮັດໃຫ້ປະຊາຊົນເດືອດຮ້ອນ. ຈັ່ງແມ່ນເປັນກຽດແທ້ໆທີ່ມີພະເຢຊູເປັນກະສັດຂອງເຮົາ!
11. ໃຜຈະຮ່ວມປົກຄອງກັບພະເຢຊູ?
11 ພະເຢຊູຈະມີຜູ້ຮ່ວມປົກຄອງກັບເພິ່ນ 144.000 ຄົນ ເຊິ່ງຈະຊ່ວຍໃນການເບິ່ງແຍງມະນຸດແລະເຮັດໃຫ້ຄວາມຕ້ອງການຂອງພະເຢໂຫວາທີ່ມີຕໍ່ໂລກນີ້ສຳເລັດ. (ພນມ. 14:1-3) ຍ້ອນວ່າຜູ້ທີ່ຮ່ວມປົກຄອງກັບພະເຢຊູເຄີຍເຈິກັບບັນຫາຫຼາຍຢ່າງຕອນທີ່ເຂົາເຈົ້າມີຊີວິດຢູ່ໃນໂລກນີ້ ເຂົາເຈົ້າຈຶ່ງຈະເປັນຜູ້ປົກຄອງທີ່ເຫັນອົກເຫັນໃຈ. ແລ້ວເຂົາເຈົ້າຈະເຮັດໜ້າທີ່ຫຍັງ?
ຜູ້ຖືກເຈີມຈະເຮັດຫຍັງ?
12. ພະເຢໂຫວາຈະໃຫ້ຜູ້ທີ່ຮ່ວມປົກຄອງກັບພະເຢຊູເຮັດວຽກຫຍັງ?
12 ພະເຢຊູແລະຜູ້ທີ່ຮ່ວມປົກຄອງກັບເພິ່ນຈະເຮັດວຽກຫຼາຍກວ່າທີ່ໂຊໂລໂມນເຮັດ. ໂຊໂລໂມນເບິ່ງແຍງຫຼາຍລ້ານຄົນໃນປະເທດດຽວເທົ່ານັ້ນ. ແຕ່ພະເຢຊູແລະຜູ້ທີ່ຮ່ວມປົກຄອງກັບເພິ່ນຈະເບິ່ງແຍງຫຼາຍຕື້ຄົນທີ່ຢູ່ທົ່ວໂລກ. ພະເຢໂຫວາໄດ້ໃຫ້ຜູ້ທີ່ຮ່ວມປົກຄອງກັບພະເຢຊູເຮັດວຽກທີ່ມີກຽດຫຼາຍແທ້ໆ!
13. ໜ້າທີ່ຫຼັກຂອງຜູ້ທີ່ຮ່ວມປົກຄອງກັບພະເຢຊູແມ່ນຫຍັງ?
13 144.000 ຄົນຈະເປັນກະສັດແລະປະໂລຫິດຄືກັບພະເຢຊູ. (ພນມ. 5:10) ພາຍໃຕ້ກົດໝາຍຂອງໂມເຊ ປະໂລຫິດມີໜ້າທີ່ຫຼັກໃນການເບິ່ງແຍງປະຊາຊົນໃຫ້ມີສຸຂະພາບທີ່ດີແລະມີສາຍສຳພັນທີ່ໃກ້ຊິດກັບພະເຢໂຫວາ. ຍ້ອນກົດໝາຍຂອງໂມເຊເປັນ “ເງົາຂອງສິ່ງດີຕ່າງໆທີ່ຈະມີມາ” ດັ່ງນັ້ນ ເຮົາມີເຫດຜົນທີ່ຈະສະຫຼຸບໄດ້ວ່າ ໃນອະນາຄົດຜູ້ທີ່ຈະຮ່ວມປົກຄອງກັບພະເຢຊູຈະມີໜ້າທີ່ຫຼັກໃນການຊ່ວຍປະຊາຊົນທາງດ້ານຮ່າງກາຍແລະຄວາມເຊື່ອ. (ຮຣ. 10:1) ເຮົາບໍ່ຮູ້ວ່າກະສັດແລະປະໂລຫິດເຫຼົ່ານີ້ຈະສື່ສານກັບເຮົາແນວໃດເຊິ່ງເຮົາຕ້ອງຖ້າເບິ່ງຕໍ່ໄປ. ແຕ່ວ່າບໍ່ວ່າພະເຢໂຫວາຈະໃຊ້ວິທີໃດ ເຮົາກໍໝັ້ນໃຈວ່າໃນອຸທິຍານທຸກຄົນຈະໄດ້ຮັບການຊີ້ນຳທີ່ຈຳເປັນແທ້ໆ.—ພນມ. 21:3, 4
“ແກະອື່ນ” ຕ້ອງເຮັດຫຍັງເພື່ອຈະໄດ້ຢູ່ໃນອຸທິຍານ?
14. “ແກະອື່ນ” ແລະ “ແກຝູງນ້ອຍ” ເປັນນ້ຳໜຶ່ງໃຈດຽວກັນແນວໃດ?
14 ພະເຢຊູເວົ້າເຖິງຄົນທີ່ຈະຮ່ວມປົກຄອງກັບເພິ່ນວ່າເປັນ “ແກະຝູງນ້ອຍ.” (ລກ. 12:32) ແຕ່ເພິ່ນຍັງໄດ້ເວົ້າເຖິງຄົນອີກກຸ່ມໜຶ່ງ ເພິ່ນເອີ້ນກຸ່ມນັ້ນວ່າເປັນ “ແກະອື່ນ.” ທັງສອງກຸ່ມນີ້ຢູ່ໃນຄອກດຽວກັນຫຼືເປັນນ້ຳໜຶ່ງໃຈດຽວກັນ. (ຢຮ. 10:16) ໃນປັດຈຸບັນ ທັງສອງກຸ່ມນີ້ກຳລັງເຮັດວຽກນຳກັນ ແລະວຽກນີ້ກໍຈະສືບຕໍ່ຈົນຮອດອຸທິຍານ. ຕອນທີ່ໂລກເປັນອຸທິຍານ “ແກະຝູງນ້ອຍ” ຈະຢູ່ໃນສະຫວັນແລ້ວ. ສ່ວນ “ແກະອື່ນ” ກໍມີຄວາມຫວັງທີ່ຈະມີຊີວິດຕະຫຼອດໄປໃນໂລກ. ແຕ່ “ແກະອື່ນ” ຕ້ອງເຮັດຫຍັງເພື່ອຈະມີຊີວິດໃນອຸທິຍານ?
ໃນຕອນນີ້ເຮົາສາມາດສະແດງໃຫ້ເຫັນວ່າເຮົາກຽມພ້ອມທີ່ຈະມີຊີວິດໃນອຸທິຍານ (ເບິ່ງຂໍ້ 15) b
15. (ກ) “ແກະອື່ນ” ເຮັດວຽກຮ່ວມກັບພີ່ນ້ອງຂອງພະຄລິດແນວໃດ? (ຂ) ເຈົ້າຈະຮຽນແບບພີ່ນ້ອງຊາຍທີ່ຢູ່ໃນຮ້ານຂາຍຢາແນວໃດ? (ເບິ່ງຮູບພາບ)
15 ນັກໂທດທີ່ກັບໃຈໄດ້ຕາຍກ່ອນທີ່ຈະມີໂອກາດໄດ້ສະແດງໃຫ້ເຫັນວ່າລາວຮູ້ຄຸນຄ່າຕໍ່ສິ່ງທີ່ພະເຢຊູເຮັດເພື່ອລາວ. ແຕ່ເຮົາທີ່ເປັນ “ແກະອື່ນ” ເຮົາມີຫຼາຍໂອກາດໃນຕອນນີ້ທີ່ຈະສະແດງວ່າເຮົາເຫັນຄ່າຕໍ່ສິ່ງທີ່ພະເຢຊູເຮັດເພື່ອເຮົາ. ຕົວຢ່າງເຊັ່ນ: ເຮົາສາມາດສະແດງຄວາມຮັກຕໍ່ພະເຢຊູໂດຍວິທີທີ່ເຮົາປະຕິບັດກັບຜູ້ຖືກເຈີມເຊິ່ງເປັນພີ່ນ້ອງຂອງເພິ່ນ. ພະເຢຊູບອກວ່າເພິ່ນຈະຕັດສິນເຮົາຈາກສິ່ງນີ້. (ມທ. 25:31-40) ເຮົາສາມາດຊ່ວຍເຫຼືອພີ່ນ້ອງຂອງພະຄລິດໂດຍຫ້າວຫັນໃນການປະກາດແລະສອນຄົນໃຫ້ເຂົ້າມາເປັນລູກສິດ. (ມທ. 28:18-20) ເພື່ອຈະເຮັດແບບນັ້ນໄດ້ດີ ເຮົາຢາກຈະພະຍາຍາມໃຊ້ປຶ້ມຕ່າງໆທີ່ອະທິບາຍຄວາມຮູ້ໃນຄຳພີໄບເບິນ ເຊັ່ນ ປຶ້ມຊີວິດທີ່ມີຄວາມສຸກຕະຫຼອດໄປ! ຖ້າເຈົ້າຍັງບໍ່ມີນັກສຶກສາ ເຈົ້າໜ້າຈະລອງຕັ້ງເປົ້າໝາຍສຶກສານຳຈັກຄົນໜຶ່ງດີບໍ?
16. ເຮົາຕ້ອງເຮັດຫຍັງແດ່ເພື່ອຈະຢູ່ພາຍໃຕ້ການປົກຄອງຂອງພະເຈົ້າ?
16 ເຮົາບໍ່ຈຳເປັນຕ້ອງລໍຖ້າໃຫ້ຮອດອຸທິຍານກ່ອນເພື່ອຈະເປັນຄົນທີ່ພະເຢໂຫວາຕ້ອງການ. ຕອນນີ້ເຮົາສາມາດພະຍາຍາມທີ່ຈະເປັນຄົນສັດຊື່ ເວົ້າຄວາມຈິງ ເຮັດສິ່ງຕ່າງໆແບບພໍດີງາມ ສັດຊື່ຕໍ່ພະເຢໂຫວາ ຕໍ່ຄູ່ຊີວິດຂອງເຮົາແລະຕໍ່ພີ່ນ້ອງ. ແຮ່ງເຮົາເຮັດຕາມມາດຕະຖານຂອງພະເຢໂຫວາຫຼາຍເທົ່າໃດຕອນທີ່ຢູ່ໃນໂລກຂອງຊາຕານ ມັນກໍແຮ່ງງ່າຍທີ່ເຮົາຈະເຮັດຕາມສິ່ງທີ່ພະເຢໂຫວາບອກຕອນທີ່ຢູ່ໃນອຸທິຍານ. ເມື່ອເຮົາພະຍາຍາມພັດທະນານິດໄສແລະຄຸນລັກສະນະຕ່າງໆກໍສະແດງວ່າເຮົາກຽມພ້ອມທີ່ຈະເຂົ້າໄປຢູ່ໃນອຸທິຍານ. ເບິ່ງບົດຄວາມທີ່ຊື່ວ່າ “ເຈົ້າພ້ອມທີ່ຈະຮັບເອົາ “ໂລກເປັນລາງວັນ” ບໍ?” ໃນຫໍສັງເກດການ ສະບັບນີ້.
17. ເຮົາຄວນຮູ້ສຶກຜິດກັບຄວາມຜິດທີ່ເຄີຍເຮັດບໍ? ຂໍໃຫ້ອະທິບາຍ.
17 ເຮົາຕ້ອງພະຍາຍາມທີ່ຈະບໍ່ຮູ້ສຶກຜິດກັບຄວາມຜິດຮ້າຍແຮງທີ່ເຄີຍເຮັດ. ແຕ່ເຮົາກໍຈະບໍ່ໃຊ້ຄ່າໄຖ່ຂອງພະເຢຊູມາເປັນຂໍ້ອ້າງໃນການ “ຈົງໃຈເຮັດບາບ.” (ຮຣ. 10:26-31) ເຮົາໝັ້ນໃຈໄດ້ວ່າຖ້າເຮົາກັບໃຈແທ້ໆ ຂໍຄວາມຊ່ວຍເຫຼືອຈາກພະເຢໂຫວາແລະຜູ້ດູແລ ແລະປ່ຽນແປງຕົວເອງ ພະເຢໂຫວາກໍຈະຍົກໂທດໃຫ້ເຮົາແທ້ໆ. (ອຊຢ. 55:7; ກຈກ. 3:19) ຂໍໃຫ້ຈື່ສິ່ງທີ່ພະເຢຊູເວົ້າກັບພວກຟາຣິຊາຍທີ່ວ່າ “ຂ້ອຍມາ ບໍ່ແມ່ນເພື່ອຊ່ວຍຄົນດີ ແຕ່ມາຊ່ວຍຄົນບາບ.” (ມທ. 9:13) ບໍ່ວ່າເຮົາຈະເຮັດຜິດຮ້າຍແຮງຫຼາຍສ່ຳໃດ ພະເຢໂຫວາກໍສາມາດຍົກໂທດໃຫ້ເຮົາໄດ້ໂດຍທາງຄ່າໄຖ່ຂອງພະເຢຊູ.
ເຈົ້າສາມາດມີຊີວິດຕະຫຼອດໄປໃນອຸທິຍານ
18. ເຈົ້າຢາກຈະຖາມຫຍັງກັບນັກໂທດທີ່ຕາຍຢູ່ທາງຂ້າງພະເຢຊູ?
18 ລອງນຶກພາບເບິ່ງວ່າ ເຈົ້າຢູ່ໃນອຸທິຍານແລະກຳລັງລົມກັບນັກໂທດທີ່ເຄີຍເວົ້າກັບພະເຢຊູ. ເຈົ້າກັບລາວຄືຊິຮູ້ສຶກເຫັນຄ່າຕໍ່ຄ່າໄຖ່ຂອງພະເຢຊູແທ້ໆ. ເຈົ້າອາດຈະຖາມລາວວ່າ ລາວຮູ້ສຶກແນວໃດຕອນທີ່ພະເຢຊູຕອບຄຳຮ້ອງຂໍຂອງລາວ ແລະໃນຊົ່ວໂມງທ້າຍໆຂອງຊີວິດພະເຢຊູເປັນແນວໃດ. ແລະລາວກໍອາດຈະຖາມເຈົ້າຄືນວ່າ ຊີວິດໃນສະໄໝສຸດທ້າຍເປັນແນວໃດ. ເຈົ້າຄືຊິຮູ້ສຶກດີໃຈແລະເປັນສິດທິພິເສດຫຼາຍແທ້ໆທີ່ຈະໄດ້ສຶກສາຄຳພີໄບເບິນໃຫ້ຄົນແບບນີ້!—ອຟຊ. 4:22-24
ໃນລະຫວ່າງການປົກຄອງຂອງພະເຢຊູໜຶ່ງພັນປີ ພີ່ນ້ອງຊາຍຄົນໜຶ່ງມີຄວາມສຸກທີ່ໄດ້ປັບປຸງທັກສະຂອງຕົວເອງ ເຊິ່ງລາວລໍຖ້າທີ່ຈະເຮັດແບບນັ້ນມາດົນແລ້ວ (ເບິ່ງຂໍ້ 19)
19. ເປັນຫຍັງຊີວິດໃນອຸທິຍານຈຶ່ງບໍ່ໜ້າເບື່ອ? (ເບິ່ງຮູບໜ້າປົກ)
19 ຊີວິດໃນອຸທິຍານຈະບໍ່ໜ້າເບື່ອຈັກເທື່ອ ເພາະເຮົາຈະໄດ້ເຈິຄົນໃໝ່ໆແລະມີວຽກທີ່ເຮັດໃຫ້ມີຄວາມສຸກ. ໃນແຕ່ລະມື້ເຮົາຈະຮູ້ຈັກພະເຢໂຫວາຫຼາຍຂຶ້ນແລະມີຄວາມສຸກກັບສິ່ງທີ່ເພິ່ນຈັດກຽມໃຫ້ເຮົາ. ເຮົາຈະໄດ້ຮຽນຮູ້ເລື່ອງຂອງພະເຢໂຫວາແລະສິ່ງທີ່ເພິ່ນສ້າງຫຼາຍຂຶ້ນເລື້ອຍໆ. ແຮ່ງເຮົາມີຊີວິດດົນປານໃດ ເຮົາກໍແຮ່ງຈະຮັກພະເຢໂຫວາຫຼາຍຂຶ້ນ. ເຮົາຢາກຂອບໃຈພະເຢໂຫວາແລະພະເຢຊູຫຼາຍແທ້ໆທີ່ສັນຍາວ່າຈະໃຫ້ເຮົາມີຊີວິດຕະຫຼອດໄປໃນອຸທິຍານ!
ເພງ 22 ລັດຖະບານຂອງພະເຈົ້າກໍ່ຕັ້ງແລ້ວ—ຂໍໃຫ້ມາເຖີດ!
a ເຈົ້າມັກຄິດເລື້ອຍໆບໍວ່າຊີວິດໃນອຸທິຍານຈະເປັນແນວໃດ? ຖ້າເຈົ້າມັກຄິດ ມັນກໍຈະດີຫຼາຍເພາະມັນເຮັດໃຫ້ເຮົາຄິດເຖິງສິ່ງທີ່ພະເຢໂຫວາຈະເຮັດເພື່ອເຮົາໃນອະນາຄົດ ເຮົາກໍແຮ່ງຢາກຈະບອກຄົນອື່ນຫຼາຍຂຶ້ນກ່ຽວກັບໂລກໃໝ່. ໃນບົດຄວາມນີ້ຈະຊ່ວຍເຮົາໃຫ້ມີຄວາມເຊື່ອຫຼາຍຂຶ້ນກ່ຽວກັບຄຳສັນຍາຂອງພະເຢຊູໃນເລື່ອງອຸທິຍານ.
b ຄຳອະທິບາຍຮູບພາບ: ພີ່ນ້ອງຊາຍທີ່ຢາກຈະສອນຄົນທີ່ຄືນມາຈາກຕາຍໃນໂລກໃໝ່ກຳລັງສອນຄົນໃນປັດຈຸບັນ.
