ເຈົ້າຈື່ໄດ້ບໍ?
ເຈົ້າໄດ້ອ່ານຫໍສັງເກດການ ຂອງປີນີ້ຢ່າງລະອຽດບໍ? ໃຫ້ເຈົ້າລອງຕອບຄຳຖາມຕໍ່ໄປນີ້:
ເຮົາຈະໄດ້ຮັບປະໂຫຍດແນວໃດເມື່ອເຮົາໃຊ້ເວລາລົມ ຟັງແລະຄິດກ່ຽວກັບພະເຢໂຫວາ?
ເຮົາຈະຕັດສິນໃຈໄດ້ດີຂຶ້ນ ເປັນຜູ້ສອນທີ່ດີຂຶ້ນ ຄວາມເຊື່ອຂອງເຮົາຈະເຂັ້ມແຂງຂຶ້ນແລະເຮົາຈະຮັກພະເຢໂຫວາຫຼາຍຂຶ້ນ.—ຫ22.01 ໜ້າ 30-31.
ເຮົາຈະໄດ້ຮັບປະໂຫຍດແນວໃດເມື່ອເຮົາໄວ້ໃຈພະເຢໂຫວາແລະຜູ້ທີ່ເພິ່ນແຕ່ງຕັ້ງ?
ຕອນນີ້ເປັນເວລາທີ່ເຮົາຕ້ອງໄວ້ໃຈວິທີການຂອງພະເຢໂຫວາໂດຍເຮັດຕາມການຊີ້ນຳຈາກອົງການແລະການຕັດສິນໃຈຂອງຜູ້ດູແລ. ເມື່ອຄວາມທຸກລຳບາກຄັ້ງໃຫຍ່ເລີ່ມຕົ້ນ ເຮົາກໍພ້ອມທີ່ຈະເຊື່ອຟັງຄຳແນະນຳທີ່ເບິ່ງຄືແປກໆຫຼືບໍ່ສົມເຫດສົມຜົນ.—ຫ22.02 ໜ້າ 4-6.
ທູດສະຫວັນໝາຍຄວາມວ່າແນວໃດຕອນທີ່ເວົ້າກັບຊາກາລີວ່າ “[ຜູ້ປົກຄອງ] ເຊຣຸບບາເບນຖືສາຍດິ່ງ”? (ຊກາ. 4:8-10, ລ.ມ.)
ນິມິດນີ້ເຮັດໃຫ້ປະຊາຊົນຂອງພະເຈົ້າໝັ້ນໃຈວ່າເຂົາເຈົ້າຈະສ້າງວິຫານໄດ້ສຳເລັດແລະເປັນໄປຕາມມາດຕະຖານທີ່ພະເຢໂຫວາກຳນົດໄວ້.—ຫ22.03 ໜ້າ 16-17.
ເຮົາຈະເປັນຕົວຢ່າງທີ່ດີ “ໃນການເວົ້າ” ແນວໃດ? (1ຕມ. 4:12)
ເຮົາຈະເວົ້າດີໆແລະໃຫ້ກຽດຄົນອື່ນຕອນທີ່ປະກາດ, ຕັ້ງໃຈຮ້ອງເພງ, ອອກຄວາມຄິດເຫັນເລື້ອຍໆໃນການປະຊຸມ, ເວົ້າຄວາມຈິງ, ເວົ້າໃນແບບທີ່ໃຫ້ກຳລັງໃຈ ແລະຫຼີກລ່ຽງຄຳເວົ້າທີ່ດູຖູກຢຽດຫຍາມທຸກຮູບແບບ.—ຫ22.04 ໜ້າ 6-9.
ເປັນຫຍັງລັກສະນະຂອງສັດໃຫຍ່ 4 ໂຕ (ການປົກຄອງ) ທີ່ເວົ້າໃນດານຽນບົດ 7 ຈຶ່ງລວມເຂົ້າກັນເປັນສັດຮ້າຍໂຕດຽວທີ່ເວົ້າໃນພະນິມິດ 13:1, 2?
ສັດຮ້າຍທີ່ຢູ່ໃນພະນິມິດບົດ 13 ບໍ່ໄດ້ໝາຍເຖິງແຕ່ການປົກຄອງດຽວ ເຊັ່ນ ໂຣມ. ແຕ່ໝາຍເຖິງການປົກຄອງທັງໝົດທີ່ປົກຄອງມະນຸດຕະຫຼອດປະຫວັດສາດ.—ຫ22.05 ໜ້າ 9.
ສິ່ງໃດສະແດງວ່າເຮົາໄວ້ໃຈຄວາມຍຸຕິທຳຂອງພະເຢໂຫວາ?
ເມື່ອມີຄົນດ່າເຮົາ ດູຖູກແລະຂົ່ມເຫງເຮົາ ເຮົາພະຍາຍາມທີ່ຈະບໍ່ເກັບຄວາມຄຽດແຄ້ນໄວ້ ແລະຝາກເລື່ອງນັ້ນໄວ້ກັບພະເຢໂຫວາ. ເພິ່ນຈະແກ້ໄຂຄວາມເສຍຫາຍທຸກຢ່າງທີ່ເກີດຈາກບາບ.—ຫ22.06 ໜ້າ 10-11.
ພີ່ນ້ອງຊາຍທີ່ຖືກຂໍໃຫ້ອະທິດຖານຕອນການປະຊຸມຄວນຈື່ຫຍັງໄວ້?
ລາວບໍ່ຄວນ “ເວົ້າຫຼາຍ” ໂດຍສະເພາະຕອນອະທິດຖານເປີດການປະຊຸມ. (ມທ. 6:7) ແລະຈະບໍ່ໃຊ້ການອະທິດຖານເພື່ອສັ່ງສອນ ຫຼືແຈ້ງການເລື່ອງໃນປະຊາຄົມ.—ຫ22.07 ໜ້າ 24-25.
“ຄົນທີ່ເຮັດຊົ່ວຈະຄືນມາແລ້ວຖືກຕັດສິນ” ໝາຍຄວາມວ່າແນວໃດ? (ຢຮ. 5:29)
ເຂົາເຈົ້າຈະບໍ່ໄດ້ຖືກຕັດສິນຕາມການກະທຳໃນອະດີດ ແຕ່ຈະຖືກຕັດສິນໃນແງ່ທີ່ວ່າພະເຢຊູຈະສັງເກດເບິ່ງຄວາມຄິດແລະການກະທຳຂອງເຂົາເຈົ້າຫຼັງຈາກທີ່ຄືນມາຈາກຕາຍ.—ຫ22.09 ໜ້າ 18.
ໃນການປະຊຸມໃຫຍ່ເດືອນກັນຍາ 1922 ພີ່ນ້ອງ ເຈ. ເອັບຟ໌. ຣັດເທີຝອດໄດ້ກະຕຸ້ນພີ່ນ້ອງໃຫ້ເຮັດຫຍັງ?
ໃນປະຊຸມໃຫຍ່ຢູ່ເມືອງຊີດາພອຍ ລັດໂອຮາຍໂອ ສະຫະລັດອາເມຣິກາ ລາວໄດ້ປະກາດວ່າ: “ພະມະຫາກະສັດໄດ້ປົກຄອງແລ້ວ! ເຈົ້າເປັນຜູ້ເຜີຍແຜ່ຂອງພະອົງ. ດັ່ງນັ້ນ ຈົ່ງໂຄສະນາ ໂຄສະນາ ໂຄສະນາພະມະຫາກະສັດແລະລາຊະອານາຈັກຂອງພະອົງ!”—ຫ22.10 ໜ້າ 3-5.
ເອຊາອີບົດທີ 30 ເນັ້ນສາມວິທີຫຍັງແດ່ທີ່ສະແດງວ່າພະເຈົ້າຈະຊ່ວຍເຮົາໃຫ້ອົດທົນ?
ໃນບົດນີ້ບອກໃຫ້ຮູ້ວ່າພະເຢໂຫວາ (1) ຕັ້ງໃຈຟັງແລະຕອບຄຳອະທິດຖານຂອງເຮົາ (2) ຊີ້ນຳເຮົາ ແລະ (3) ອວຍພອນເຮົາທັງໃນຕອນນີ້ແລະໃນອະນາຄົດ.—ຫ22.11 ໜ້າ 9.
ເປັນຫຍັງເຮົາຈຶ່ງສະຫຼຸບວ່າຄຳເວົ້າໃນຄຳເພງ 37:10, 11, 29 ໄດ້ເກີດຂຶ້ນແລ້ວໃນອະດີດແລະຈະເກີດຂຶ້ນໃນອະນາຄົດ?
ຄຳເວົ້າຂອງດາວິດບອກໃຫ້ຮູ້ເຖິງສະພາບການທີ່ດີງາມໃນອິດສະຣາເອນ ເຊັ່ນ ໃນລະຫວ່າງການປົກຄອງຂອງໂຊໂລໂມນ. ເມື່ອພະເຢຊູເວົ້າເຖິງອຸທິຍານໃນອະນາຄົດ ເພິ່ນຍົກຄຳເວົ້າຈາກຂໍ້ 11. (ມທ. 5:5; ລກ. 23:43)—ຫ22.12 ໜ້າ 8-10, 14.
