ບົດຄວາມສຶກສາທີ 49
ເຮົາສາມາດມີຊີວິດຕະຫຼອດໄປໄດ້
“ຜູ້ທີ່ຈະໄດ້ຊີວິດຕະຫຼອດໄປ.”—ຢຮ. 17:3
ເພງ 147 ຄຳສັນຍາເລື່ອງຊີວິດຕະຫຼອດໄປ
ໃຈຄວາມສຳຄັນ a
1. ການຄິດຕຶກຕອງເຖິງຄຳສັນຍາເລື່ອງຊີວິດຕະຫຼອດໄປມີຜົນຕໍ່ເຮົາແນວໃດ?
ພະເຢໂຫວາສັນຍາວ່າຜູ້ທີ່ເຊື່ອຟັງເພິ່ນຈະມີ “ຊີວິດຕະຫຼອດໄປ.” (ຣມ. 6:23) ເມື່ອເຮົາຄິດຕຶກຕອງເຖິງສິ່ງທີ່ພະເຢໂຫວາໃຫ້ເຮົາ ເຮົາກໍແຮ່ງຈະຮັກເພິ່ນຫຼາຍຂຶ້ນ. ລອງຄິດເບິ່ງວ່າ ພະເຢໂຫວາຮັກເຮົາຫຼາຍຈົນບໍ່ຢາກສູນເສຍເຮົາແລະຢາກໃຫ້ເຮົາມີຊີວິດຕະຫຼອດໄປ.
2. ຄຳສັນຍາເລື່ອງຊີວິດຕະຫຼອດໄປຊ່ວຍເຮົາແນວໃດ?
2 ຄຳສັນຍາເລື່ອງຊີວິດຕະຫຼອດໄປຊ່ວຍເຮົາໃຫ້ອົດທົນກັບບັນຫາຕ່າງໆທີ່ມີຢູ່ໃນຕອນນີ້. ເຖິງພວກສັດຕູຂູ່ວ່າຈະຂ້າເຮົາ ເຮົາກໍຈະບໍ່ເຊົາຮັບໃຊ້ພະເຢໂຫວາ. ຍ້ອນຫຍັງ? ເຫດຜົນໜຶ່ງກໍຍ້ອນເຮົາຮູ້ວ່າ ຖ້າເຮົາຕາຍເພາະສັດຊື່ຕໍ່ພະເຢໂຫວາ ເພິ່ນກໍຈະປຸກເຮົາໃຫ້ຟື້ນຄືນມາແລະມີໂອກາດທີ່ຈະມີຊີວິດຕະຫຼອດໄປ. (ຢຮ. 5:28, 29; 1ກຣ. 15:55-58; ຮຣ. 2:15) ແລ້ວເປັນຫຍັງເຮົາຈຶ່ງໝັ້ນໃຈວ່າເຮົາຈະມີຊີວິດຕະຫຼອດໄປໄດ້? ໃຫ້ເຮົາມາເບິ່ງເຫດຜົນຕໍ່ໄປນີ້.
ພະເຢໂຫວາມີຊີວິດຕະຫຼອດໄປ
3. ເປັນຫຍັງເຮົາໝັ້ນໃຈວ່າພະເຢໂຫວາຈະໃຫ້ຊີວິດຕະຫຼອດໄປກັບເຮົາໄດ້? (ຄຳເພງ 102:12, 24, 27)
3 ເຮົາຮູ້ວ່າພະເຢໂຫວາຈະໃຫ້ຊີວິດຕະຫຼອດໄປກັບເຮົາໄດ້ ຍ້ອນເພິ່ນເປັນຜູ້ທີ່ໃຫ້ຊີວິດແລະເພິ່ນກໍມີຊີວິດຢູ່ຕະຫຼອດໄປ. (ເພງ. 36:9) ໃຫ້ເຮົາມາເບິ່ງຂໍ້ຄຳພີທີ່ພິສູດວ່າພະເຢໂຫວາມີຊີວິດຢູ່ຕະຫຼອດໄປ. ໃນຄຳເພງ 90:2, ລ.ມ. ບອກວ່າພະເຢໂຫວາເປັນພະເຈົ້າ “ຕັ້ງແຕ່ອະດີດຈົນເຖິງຕະຫຼອດການ” ແລະໃນຄຳເພງບົດ 102 ກໍເວົ້າຄ້າຍໆກັນ. (ອ່ານຄຳເພງ 102:12, 24, 27) ຜູ້ພະຍາກອນຮາບາກຸກໄດ້ເວົ້າເຖິງພະເຢໂຫວາວ່າ “ພະເຢໂຫວາເອີ້ຍ ພະອົງເປັນພະເຈົ້າທີ່ຢູ່ຕະຫຼອດໄປ. ພະເຈົ້າຂອງລູກເອີ້ຍ ພະອົງເປັນພະເຈົ້າທີ່ບໍລິສຸດ. ພະອົງບໍ່ມີມື້ຕາຍ.”—ຮບກ. 1:12, ລ.ມ.
4. ເຮົາຄວນກັງວົນບໍຖ້າຮູ້ສຶກຍາກທີ່ຈະເຂົ້າໃຈວ່າພະເຢໂຫວາມີຊີວິດຢູ່ຕະຫຼອດໄປ? ຂໍໃຫ້ອະທິບາຍ.
4 ເຈົ້າຮູ້ສຶກວ່າຍາກບໍທີ່ຈະເຂົ້າໃຈວ່າພະເຢໂຫວາ “ມີຊີວິດຢູ່ຕະຫຼອດໄປ”? (ອຊຢ. 40:28, ລ.ມ.) ຖ້າເຈົ້າຮູ້ສຶກແບບນີ້ກໍບໍ່ແປກ ເພາະເອລີຮູກໍເຄີຍເວົ້າກ່ຽວກັບພະເຈົ້າວ່າ “ພວກເຮົາບໍ່ມີທາງທີ່ຈະຮູ້ວ່າ . . . ເພິ່ນມີອາຍຸຫຼາຍສ່ຳໃດ.” (ໂຢບ 36:26, ລ.ມ.) ແຕ່ນີ້ບໍ່ໄດ້ໝາຍຄວາມວ່າ ເລື່ອງທີ່ເຮົາບໍ່ເຂົ້າໃຈບໍ່ແມ່ນຄວາມຈິງ. ຕົວຢ່າງເຊັ່ນ: ເຖິງເຮົາຈະບໍ່ເຂົ້າໃຈທັງໝົດວ່າກະແສໄຟຟ້າເຮັດວຽກແນວໃດ ແຕ່ກໍບໍ່ໄດ້ໝາຍຄວາມວ່າກະແສໄຟຟ້າບໍ່ມີຢູ່ແທ້. ຄ້າຍຄືກັນ ເຖິງເຮົາຈະບໍ່ເຂົ້າໃຈທັງໝົດວ່າພະເຢໂຫວາມີຊີວິດຢູ່ຕະຫຼອດໄປແນວໃດ ແຕ່ກໍບໍ່ໄດ້ໝາຍຄວາມວ່າພະເຈົ້າບໍ່ມີຊີວິດຢູ່ຕະຫຼອດໄປ ເພາະຄວາມຈິງກ່ຽວກັບພະເຈົ້າຜູ້ທີ່ສ້າງເຮົາບໍ່ໄດ້ຂຶ້ນຢູ່ກັບວ່າເຮົາເຂົ້າໃຈຫຼືບໍ່ເຂົ້າໃຈ. (ຣມ. 11:33-36) ພະເຢໂຫວາມີຊີວິດຢູ່ກ່ອນທີ່ສິ່ງຕ່າງໆໃນເອກະພົບ ເຊັ່ນ: ດວງດາວແລະດວງຕາເວັນຈະມີດ້ວຍຊ້ຳ. ພະເຢໂຫວາບອກເຮົາໃຫ້ຮູ້ວ່າເພິ່ນເປັນ“ຜູ້ສ້າງໂລກດ້ວຍພະລັງຂອງເພິ່ນ” ແລະເພິ່ນກໍມີຊີວິດຢູ່ກ່ອນທີ່ເພິ່ນຈະ “ກາງທ້ອງຟ້າ.” (ຢເຣ. 51:15, ລ.ມ.; ກຈກ. 17:24) ແລ້ວຍັງມີເຫດຜົນຫຍັງອີກທີ່ເຮັດໃຫ້ເຮົາໝັ້ນໃຈວ່າເຮົາຈະມີຊີວິດຕະຫຼອດໄປໄດ້?
ພະເຢໂຫວາສ້າງເຮົາໃຫ້ມີຊີວິດຕະຫຼອດໄປ
5. ມະນຸດຄູ່ທຳອິດມີຄວາມຫວັງຫຍັງ?
5 ທຸກສິ່ງທີ່ພະເຢໂຫວາສ້າງໃນໂລກນີ້ມີແຕ່ມະນຸດເທົ່ານັ້ນທີ່ຈະຢູ່ຕະຫຼອດໄປ. ພະເຢໂຫວາໄດ້ໃຫ້ອາດາມກັບເອວາມີຄວາມຫວັງທີ່ຈະມີຊີວິດຕະຫຼອດໄປ. ແຕ່ເພິ່ນເຕືອນອາດາມວ່າ “ຫ້າມເຈົ້າກິນໝາກໄມ້ທີ່ໃຫ້ຮູ້ຄວາມດີຄວາມຊົ່ວນັ້ນ ຖ້າເຈົ້າກິນມື້ໃດເຈົ້າກໍຈະຕາຍມື້ນັ້ນ.” (ປຖກ. 2:17, ລ.ມ.) ຖ້າອາດາມແລະເອວາເຊື່ອຟັງພະເຢໂຫວາ ເຂົາເຈົ້າກໍຈະບໍ່ຕາຍ. ນີ້ຈຶ່ງມີເຫດຜົນທີ່ເຮົາຈະສະຫຼຸບວ່າ ໃນທີ່ສຸດພະເຢໂຫວາຈະໃຫ້ເຂົາເຈົ້າກິນ “ໝາກໄມ້ທີ່ໃຫ້ຊີວິດ” ເພື່ອຈະ “ໄດ້ຊີວິດຕະຫຼອດໄປ.” b—ປຖກ. 3:22, ລ.ມ.
6-7. (ກ) ມີສິ່ງໃດອີກທີ່ສະແດງໃຫ້ເຫັນວ່າມະນຸດຖືກສ້າງໃຫ້ມີຊີວິດຕະຫຼອດໄປ? (ຂ) ເຈົ້າຢາກເຮັດຫຍັງໃນໂລກໃໝ່? (ເບິ່ງຮູບພາບ)
6 ນັກວິທະຍາສາດບາງຄົນຄົ້ນພົບວ່າສະໝອງຂອງຄົນເຮົາສາມາດເກັບກຳຂໍ້ມູນໄດ້ຫຼາຍກວ່າຊ່ວງຊີວິດຂອງເຮົາ. ນີ້ເປັນເລື່ອງທີ່ໜ້າງຶດງໍ້ແທ້ໆ! ໃນປີ 2010 ມີບົດຄວາມທີ່ຢູ່ໃນວາລະສານໄຊເອັນທິຟິກ ອາເມຣິກັນ ມາຍ (Scientific American Mind) ບອກວ່າ ສະໝອງຂອງຄົນເຮົາເກັບການຂໍ້ມູນໄດ້ປະມານ 2,5 ລ້ານກິກກະໄບທ໌ (GB) ຫຼືເທົ່າກັບວິດີໂອທີ່ບັນທຶກໄວ້ 3 ລ້ານຊົ່ວໂມງ ແລະເພື່ອຈະເບິ່ງວິດີໂອນັ້ນຈົບຕ້ອງໃຊ້ເວລາຫຼາຍກວ່າ 300 ປີ. ທີ່ຈິງ ສະໝອງຄົນເຮົາອາດຈະເກັບຂໍ້ມູນໄດ້ຫຼາຍກວ່ານັ້ນຊ້ຳ. ນີ້ສະແດງໃຫ້ເຫັນວ່າ ພະເຢໂຫວາສ້າງສະໝອງຂອງຄົນເຮົາໃຫ້ເກັບກຳຂໍ້ມູນໄດ້ຫຼາຍກວ່າທີ່ເຮົາຈະໃຊ້ມັນພຽງແຕ່ 70 ຫຼື 80 ປີ.—ເພງ. 90:10
7 ພະເຢໂຫວາສ້າງເຮົາໃຫ້ຢາກມີຊີວິດຕະຫຼອດໄປ. ຄຳພີໄບເບິນບອກວ່າ ພະເຈົ້າ “ໃສ່ຄວາມຄິດເລື່ອງການມີຊີວິດຕະຫຼອດໄວ້ໃນໃຈມະນຸດ.” (ຜູ້ປ. 3:11, ລ.ມ.) ນີ້ເປັນເຫດຜົນໜຶ່ງທີ່ເຮົາເບິ່ງວ່າຄວາມຕາຍເປັນຄືກັບສັດຕູ. (1ກຣ. 15:26) ຖ້າເຮົາເຈັບປ່ວຍຮ້າຍແຮງ ເຮົາຈະຍອມຮັບມັນແລະລໍຖ້າມື້ຕາຍເທົ່ານັ້ນບໍ? ບໍ່ ປົກກະຕິແລ້ວຖ້າເຮົາເຈັບປ່ວຍຮ້າຍແຮງ ເຮົາກໍຈະໄປຫາໝໍແລະບາງເທື່ອກໍຕ້ອງໄດ້ກິນຢາເພື່ອຈະດີຂຶ້ນ. ເຮົາຈະເຮັດທຸກວິທີທາງເພື່ອຈະບໍ່ຕາຍ. ແລະເມື່ອຄົນທີ່ເຮົາຮັກຕາຍ ບໍ່ວ່າຈະອາຍຸໜ້ອຍຫຼືຫຼາຍ ເຮົາກໍຮູ້ສຶກເຈັບປວດໃຈແລະເສຍໃຈເປັນເວລາດົນ. (ຢຮ. 11:32, 33) ທີ່ເປັນແບບນີ້ກໍຍ້ອນພະເຢໂຫວາສ້າງເຮົາໃຫ້ຢາກມີຊີວິດຕະຫຼອດໄປ ແລະນີ້ກໍເປັນຄວາມຕ້ອງການທີ່ເພິ່ນມີຕໍ່ມະນຸດ. ແຕ່ຍັງມີເຫດຜົນອື່ນອີກທີ່ເຮັດໃຫ້ເຮົາເຊື່ອວ່າ ເຮົາສາມາດມີຊີວິດຕະຫຼອດໄປໄດ້. ໃຫ້ເຮົາມາເບິ່ງສິ່ງທີ່ພະເຢໂຫວາເຮັດໃນອະດີດແລະໃນປັດຈຸບັນເຊິ່ງສະແດງໃຫ້ເຫັນວ່າເພິ່ນບໍ່ປ່ຽນຄວາມຕ້ອງການທີ່ມີຕໍ່ມະນຸດໃນຕອນທຳອິດ.
ເຮົາມີຄວາມສຸກເມື່ອຄິດເຖິງສິ່ງຕ່າງໆທີ່ຈະເຮັດໃນອະນາຄົດຕອນທີ່ມີຊີວິດຕະຫຼອດໄປ (ເບິ່ງຂໍ້ 7) c
ຄວາມຕ້ອງການຂອງພະເຢໂຫວາບໍ່ປ່ຽນແປງ
8. ເອຊາຢາ 55:11 ບອກເຮົາໃຫ້ຮູ້ຫຍັງກ່ຽວກັບຄວາມຕ້ອງການຂອງພະເຢໂຫວາທີ່ມີຕໍ່ເຮົາ?
8 ເຖິງວ່າອາດາມແລະເອວາຈະບໍ່ເຊື່ອຟັງແລະເຮັດໃຫ້ລູກຫຼານຕ້ອງຕາຍ ແຕ່ພະເຢໂຫວາກໍບໍ່ໄດ້ປ່ຽນຄວາມຕ້ອງການຂອງເພິ່ນທີ່ມີຕໍ່ມະນຸດ. (ອ່ານເອຊາຢາ 55:11) ເພິ່ນຍັງຢາກໃຫ້ຄົນທີ່ສັດຊື່ຕໍ່ເພິ່ນ ມີຊີວິດຕະຫຼອດໄປ. ເຮົາຮູ້ເລື່ອງນີ້ໄດ້ຈາກສິ່ງທີ່ພະເຢໂຫວາເວົ້າແລະເຮັດເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ.
9. ພະເຢໂຫວາໄດ້ສັນຍາເລື່ອງຫຍັງ? (ດານີເອນ 12:2, 13)
9 ພະເຢໂຫວາສັນຍາວ່າເພິ່ນຈະປຸກຄົນຕາຍໃຫ້ຟື້ນຄືນມາແລະໃຫ້ເຂົາເຈົ້າມີໂອກາດທີ່ຈະມີຊີວິດຕະຫຼອດໄປ. (ກຈກ. 24:15; ຕຕ. 1:1, 2) ໂຢບຊາຍທີ່ສັດຊື່ໝັ້ນໃຈວ່າພະເຢໂຫວາຢາກປຸກຄົນຕາຍໃຫ້ຟື້ນຄືນມາແທ້ໆ. (ໂຢບ 14:14, 15) ດານີເອນຮູ້ວ່າຄົນທີ່ຕາຍໄປແລ້ວຈະຖືກປຸກໃຫ້ຄືນມາແລະມີໂອກາດທີ່ຈະມີຊີວິດຕະຫຼອດໄປ. (ເພງ. 37:29; ອ່ານດານີເອນ 12:2, 13) ຄົນຢິວໃນສະໄໝພະເຢຊູຮູ້ວ່າພະເຢໂຫວາຈະໃຫ້ “ຊີວິດຕະຫຼອດໄປ” ກັບຜູ້ຮັບໃຊ້ທີ່ສັດຊື່. (ລກ. 10:25; 18:18) ພະເຢຊູກໍເຄີຍເວົ້າເຖິງຄຳສັນຍານີ້ຫຼາຍເທື່ອ ແລະເພິ່ນເອງກໍເຄີຍຖືກປຸກໃຫ້ຄືນມາຈາກຕາຍ.—ມທ. 19:29; 22:31, 32; ລກ. 18:30; ຢຮ. 11:25
ການທີ່ເອລີຢາສາມາດປຸກຄົນຕາຍໃຫ້ຟື້ນຄືນມາເຮັດໃຫ້ເຮົາໝັ້ນໃຈໃນເລື່ອງຫຍັງ? (ເບິ່ງຂໍ້ 10)
10. ການຄືນມາຈາກຕາຍໃນສະໄໝກ່ອນສະແດງໃຫ້ເຫັນຫຍັງ? (ເບິ່ງຮູບພາບ)
10 ພະເຢໂຫວາເປັນຜູ້ໃຫ້ຊີວິດແລະມີລິດອຳນາດທີ່ຈະປຸກຄົນຕາຍໃຫ້ຟື້ນຄືນມາ. ເພິ່ນໄດ້ໃຫ້ເອລີຢາມີລິດອຳນາດທີ່ຈະປຸກລູກຊາຍຂອງແມ່ໝ້າຍໃນເມືອງຊາເຣຟັດ. (1ກສ. 17:21-23) ຕໍ່ມາ ເພິ່ນກໍໄດ້ຊ່ວຍເອລີຊາໃຫ້ປຸກລູກຊາຍຂອງຜູ້ຍິງຄົນຊູເນມໃຫ້ຄືນມາຈາກຕາຍ. (2ກສ. 4:18-20, 34-37) ການຄືນມາຈາກຕາຍຂອງຄົນເຫຼົ່ານີ້ແລະຄົນອື່ນໆສະແດງໃຫ້ເຫັນວ່າ ພະເຢໂຫວາມີລິດອຳນາດທີ່ຈະປຸກຄົນຕາຍໃຫ້ກັບມາມີຊີວິດອີກ. ຕອນທີ່ພະເຢຊູຢູ່ໃນໂລກ ເພິ່ນກໍໄດ້ພິສູດວ່າພະເຢໂຫວາໄດ້ໃຫ້ລິດອຳນາດກັບເພິ່ນ. (ຢຮ. 11:23-25, 43, 44) ຕອນນີ້ພະເຢຊູຢູ່ໃນສະຫວັນແລ້ວແລະໄດ້ຮັບ “ອຳນາດໃຫ້ . . . ປົກຄອງທຸກສິ່ງໃນສະຫວັນແລະໃນໂລກນີ້.” ດັ່ງນັ້ນ ເພິ່ນຈຶ່ງຈະເຮັດໃຫ້ຄຳສັນຍາຂອງພະເຢໂຫວາສຳເລັດເປັນຈິງທີ່ວ່າ “ທຸກຄົນເຊິ່ງຢູ່ໃນອຸໂມງຝັງສົບ” ຈະຄືນມາຈາກຕາຍແລະມີໂອກາດທີ່ຈະໄດ້ຊີວິດຕະຫຼອດໄປ.—ມທ. 28:18; ຢຮ. 5:25-29
11. ຄ່າໄຖ່ເປີດໂອກາດໃຫ້ເຮົາມີຊີວິດຕະຫຼອດໄປແນວໃດ?
11 ເປັນຫຍັງພະເຢໂຫວາຈຶ່ງຍອມໃຫ້ພະເຢຊູລູກຊາຍຂອງເພິ່ນມາຕາຍຢ່າງທໍລະມານ? ພະເຢຊູໃຫ້ເຫດຜົນວ່າ “ພະເຈົ້າຮັກຄົນໃນໂລກຫຼາຍ ຈົນເຖິງຂັ້ນຍອມສະລະລູກຄົນດຽວຂອງພະອົງ ເພື່ອທຸກຄົນທີ່ສະແດງຄວາມເຊື່ອໃນຜູ້ນັ້ນຈະບໍ່ຖືກທຳລາຍແຕ່ຈະມີຊີວິດຕະຫຼອດໄປ.” (ຢຮ. 3:16) ຍ້ອນຄ່າໄຖ່ຂອງພະເຢຊູ ເຮົາຈຶ່ງມີໂອກາດທີ່ຈະມີຊີວິດຕະຫຼອດໄປ. (ມທ. 20:28) ອັກຄະສາວົກໂປໂລໄດ້ສະຫຼຸບສ່ວນສຳຄັນຂອງຄວາມຕ້ອງການຂອງພະເຈົ້າໂດຍເວົ້າວ່າ “ຄວາມຕາຍເກີດຂຶ້ນຍ້ອນມະນຸດຄົນດຽວ ການຄືນມາຈາກຕາຍກໍເກີດຂຶ້ນຍ້ອນມະນຸດຄົນດຽວຄືກັນ. ທຸກຄົນຕາຍຍ້ອນອາດາມ ແລະທຸກຄົນກໍຈະມີຊີວິດອີກຍ້ອນພະຄລິດ.”—1ກຣ. 15:21, 22
12. ພະເຢໂຫວາຈະເຮັດໃຫ້ຄວາມຕ້ອງການຂອງເພິ່ນສຳເລັດເປັນຈິງແນວໃດ?
12 ພະເຢຊູສອນພວກລູກສິດໃຫ້ອະທິດຖານຂໍໃຫ້ການປົກຄອງຂອງພະເຈົ້າມາທີ່ໂລກນີ້ ແລະໃຫ້ທຸກສິ່ງໃນໂລກເປັນໄປຕາມທີ່ພະເຈົ້າຕ້ອງການ. (ມທ. 6:9, 10) ຄວາມຕ້ອງການຂອງພະເຈົ້າຢ່າງໜຶ່ງກໍຄືຢາກໃຫ້ມະນຸດມີຊີວິດຕະຫຼອດໄປໃນໂລກ. ເພື່ອຈະເຮັດໃຫ້ຄວາມຕ້ອງການນີ້ສຳເລັດ ພະເຢໂຫວາໄດ້ແຕ່ງຕັ້ງໃຫ້ພະເຢຊູເປັນກະສັດໃນການປົກຄອງຂອງເພິ່ນ. ແລະເພິ່ນໄດ້ເລືອກ 144.000 ຄົນ ທີ່ຢູ່ໃນໂລກນີ້ໃຫ້ມາເຮັດວຽກກັບພະເຢຊູເພື່ອເຮັດໃຫ້ຄວາມຕ້ອງການຂອງເພິ່ນສຳເລັດ.—ພນມ. 5:9, 10
13. ພະເຢໂຫວາກຳລັງເຮັດຫຍັງໃນຕອນນີ້ ແລະເຮົາຕ້ອງເຮັດຫຍັງ?
13 ຕອນນີ້ພະເຢໂຫວາກຳລັງລວບລວມ “ຄົນຝູງໃຫຍ່” ແລະຝຶກເຂົາເຈົ້າໃຫ້ໃຊ້ຊີວິດພາຍໃຕ້ການປົກຄອງຂອງເພິ່ນ. (ພນມ. 7:9, 10; ຢກບ. 2:8) ເຖິງວ່າຄົນສ່ວນຫຼາຍໃນທຸກມື້ນີ້ຈະແຕກແຍກກັນຍ້ອນຄວາມກຽດຊັງຫຼືສົງຄາມ ແຕ່ຄົນຝູງໃຫຍ່ພະຍາຍາມທີ່ຈະກຳຈັດຄວາມກຽດຊັງທຸກຢ່າງ ເຊິ່ງລວມເຖິງຄວາມກຽດຊັງທາງດ້ານເຊື້ອຊາດແລະຊົນເຜົ່າ. ເຂົາເຈົ້າເຮັດຄືກັບສິ່ງທີ່ຄຳພີໄບເບິນສອນທີ່ວ່າ ເອົາດາບມາຕີເປັນໄຖໄຖນາ. (ມກ. 4:3) ແທນທີ່ເຂົາເຈົ້າຈະເຂົ້າຮ່ວມໃນການເຮັດສົງຄາມ ເຂົາເຈົ້າໄດ້ຊ່ວຍຫຼາຍຄົນໃຫ້ມີ “ຄວາມຫວັງເລື່ອງຊີວິດແທ້” ໂດຍສອນເລື່ອງພະເຈົ້າອົງທ່ຽງແທ້ແລະຄວາມຕ້ອງການຂອງເພິ່ນ. (1ຕມ. 6:19) ເຂົາເຈົ້າອາດຖືກຄອບຄົວຕໍ່ຕ້ານຫຼືອາດຈະມີບັນຫາທາງການເງິນຍ້ອນເຂົາເຈົ້າສະໜັບສະໜູນການປົກຄອງຂອງພະເຈົ້າ ແຕ່ພະເຢໂຫວາກໍເບິ່ງແຍງເຂົາເຈົ້າໃຫ້ມີສິ່ງຈຳເປັນ. (ມທ. 6:25, 30-33; ລກ. 18:29, 30) ສິ່ງເຫຼົ່ານີ້ເຮັດໃຫ້ເຮົາໝັ້ນໃຈວ່າ ການປົກຄອງຂອງພະເຈົ້າມີຢູ່ແທ້ແລະຈະເຮັດໃຫ້ຄວາມຕ້ອງການຂອງພະເຢໂຫວາທີ່ມີໃນຕອນທຳອິດສຳເລັດເປັນຈິງ.
ອະນາຄົດທີ່ດີເລີດລໍຖ້າເຮົາຢູ່
14-15. ຄຳສັນຍາຂອງພະເຢໂຫວາທີ່ວ່າຈະທຳລາຍຄວາມຕາຍຕະຫຼອດໄປຈະສຳເລັດໄດ້ແນວໃດ?
14 ຕອນນີ້ພະເຢຊູເປັນກະສັດໃນການປົກຄອງຂອງພະເຈົ້າທີ່ຢູ່ໃນສະຫວັນ ແລະເພິ່ນຈະເຮັດໃຫ້ຄຳສັນຍາທຸກຢ່າງຂອງພະເຢໂຫວາສຳເລັດເປັນຈິງ. (2ກຣ. 1:20) ຕັ້ງແຕ່ປີ 1914 ພະເຢຊູໄດ້ຈັດການກັບພວກສັດຕູ. (ເພງ. 110:1, 2) ອີກບໍ່ດົນພະເຢຊູແລະຜູ້ທີ່ຮ່ວມປົກຄອງກັບເພິ່ນຈະທຳລາຍຄົນຊົ່ວທັງໝົດທີ່ຢູ່ໃນໂລກນີ້.—ພນມ. 6:2
15 ໃນລະຫວ່າງການປົກຄອງຂອງພະເຢຊູໜຶ່ງພັນປີ ເພິ່ນຈະປຸກຄົນຕາຍໃຫ້ກັບມາມີຊີວິດອີກ ແລະຈະຊ່ວຍໃຫ້ທຸກຄົນທີ່ເຊື່ອຟັງກາຍເປັນຄົນທີ່ສົມບູນແບບ. ຫຼັງຈາກການທົດສອບຄັ້ງສຸດທ້າຍ ຜູ້ທີ່ພະເຢໂຫວາຕັດສິນວ່າເປັນຄົນທີ່ເຮັດສິ່ງທີ່ຖືກຕ້ອງ “ຈະໄດ້ຢູ່ໃນໂລກ ແລະເຂົາເຈົ້າຈະໄດ້ຢູ່ໃນໂລກຕະຫຼອດໄປ.” (ເພງ. 37:10, 11, 29, ລ.ມ.) ເຮົາດີໃຈຫຼາຍແທ້ໆທີ່ “ຄວາມຕາຍ” ເຊິ່ງເປັນ “ສັດຕູໂຕສຸດທ້າຍ” ຈະຖືກທຳລາຍ.—1ກຣ. 15:26
16. ສິ່ງໃດຄວນເປັນເຫດຜົນຫຼັກທີ່ເຮົາຮັບໃຊ້ພະເຢໂຫວາ?
16 ໃນບົດຄວາມນີ້ເຮົາໄດ້ຮຽນຮູ້ວ່າ ຄວາມຫວັງເລື່ອງຊີວິດຕະຫຼອດໄປມີຫຼັກຖານໜັກແໜ້ນຈາກຄຳພີໄບເບິນ. ຄວາມຫວັງນີ້ຈະຊ່ວຍເຮົາໃຫ້ຮັກສາຄວາມສັດຊື່ຕອນທີ່ເຈິຄວາມລຳບາກໃນສະໄໝສຸດທ້າຍນີ້. ແຕ່ເພື່ອຈະເຮັດໃຫ້ພະເຢໂຫວາພໍໃຈ ເຮົາຕ້ອງສັດຊື່ຕໍ່ພະເຢໂຫວາແລະພະເຢຊູຍ້ອນເຮົາຮັກພວກເພິ່ນແທ້ໆ ບໍ່ແມ່ນແຕ່ຍ້ອນຢາກມີຊີວິດຕະຫຼອດໄປ. (2ກຣ. 5:14, 15) ຄວາມຮັກນີ້ກະຕຸ້ນເຮົາໃຫ້ຢາກຮຽນແບບພວກເພິ່ນແລະປະກາດເລື່ອງຄວາມຫວັງນີ້ໃຫ້ກັບຄົນອື່ນ. (ຣມ. 10:13-15) ເມື່ອເຮົາຮຽນຮູ້ທີ່ຈະເປັນຄົນໃຈກວ້າງແລະບໍ່ເຫັນແກ່ຕົວ ພະເຢໂຫວາກໍຈະຢາກເປັນໝູ່ກັບເຮົາຕະຫຼອດໄປ.—ຮຣ. 13:16
17. ເຮົາແຕ່ລະຄົນຕ້ອງເຮັດຫຍັງ? (ມັດທາຍ 7:13, 14)
17 ເຮົາຈະໄດ້ຢູ່ໃນກຸ່ມຄົນທີ່ຈະມີຊີວິດຕະຫຼອດໄປບໍ? ພະເຢໂຫວາເປີດໂອກາດນັ້ນໃຫ້ເຮົາແລ້ວ ແຕ່ຂຶ້ນຢູ່ກັບເຮົາວ່າຈະເລືອກຢູ່ໃນທາງທີ່ຈະພາໄປເຖິງຊີວິດຫຼືບໍ່. (ອ່ານມັດທາຍ 7:13, 14) ແລ້ວເຮົາຈະເປັນແນວໃດເມື່ອເຮົາມີຊີວິດຕະຫຼອດໄປ? ເຮົາຈະຕອບຄຳຖາມນີ້ໃນບົດຄວາມຕໍ່ໄປ.
ເພງ 141 ຊີວິດເປັນສິ່ງມະຫັດສະຈັນ
a ເຈົ້າລໍຖ້າທີ່ຈະມີຊີວິດຕະຫຼອດໄປບໍ? ພະເຢໂຫວາສັນຍາກັບເຮົາວ່າ ມື້ໜຶ່ງ ເຮົາຈະມີຊີວິດຕະຫຼອດໄປແລະບໍ່ຕ້ອງກັງວົນເລື່ອງຄວາມຕາຍ. ໃນບົດຄວາມນີ້ເຮົາຈະມາເບິ່ງບາງເຫດຜົນທີ່ເຮົາສາມາດໝັ້ນໃຈໄດ້ວ່າ ພະເຢໂຫວາຈະເຮັດຕາມຄຳສັນຍາຂອງເພິ່ນ.
b ເບິ່ງຂອບ “ ‘ຕະຫຼອດໄປ’ ໃນຄຳພີໄບເບິນ.”
c ຄຳອະທິບາຍຮູບພາບ: ພີ່ນ້ອງຊາຍທີ່ສູງອາຍຸໄດ້ຄິດເຖິງສິ່ງຕ່າງໆທີ່ລາວຈະເຮັດໃນໂລກໃໝ່ຕອນທີ່ມີຊີວິດຕະຫຼອດໄປ.
