ບົດຄວາມສຶກສາທີ 45
ເຮົາຈະຊ່ອຍຄົນອື່ນແນວໃດໃຫ້ເຮັດຕາມຄຳສັ່ງຂອງພະຄລິດ?
“ໃຫ້ພວກເຈົ້າໄປ . . . ສອນພວກເຂົາໃຫ້ເຂົ້າມາເປັນລູກສິດ . . . ແລະສອນພວກເຂົາໃຫ້ເຮັດຕາມທຸກສິ່ງທີ່ຂ້ອຍສັ່ງພວກເຈົ້າໄວ້.”—ມທ. 28:19, 20
ເພງ 89 ຟັງ ເຮັດຕາມ ແລ້ວຈະໄດ້ພອນ
ໃຈຄວາມສຳຄັນ *
1. ຕາມມັດທາຍ 28:18-20 ພະເຢຊູສັ່ງພວກລູກສິດໃຫ້ເຮັດຫຍັງ?
ຫຼັງຈາກພະເຢຊູຟື້ນຄືນມາຈາກຕາຍ ເພິ່ນໄດ້ປະກົດໂຕຕໍ່ພວກລູກສິດທີ່ໄປເຕົ້າໂຮມກັນຢູ່ແຂວງຄາລີເລ. ພະເຢຊູສັ່ງເຂົາເຈົ້າໃຫ້ເຮັດວຽກໜຶ່ງທີ່ສຳຄັນ. ຄຳສັ່ງນັ້ນຢູ່ໃນມັດທາຍ 28:18-20.—ອ່ານ
2. ໃນບົດນີ້ເຮົາຈະເບິ່ງຄຳຖາມຫຍັງແດ່?
2 ຄຳສັ່ງຂອງພະເຢຊູທີ່ໃຫ້ໄປສອນຄົນໃຫ້ເຂົ້າມາເປັນລູກສິດຍັງໃຊ້ໄດ້ກັບເຮົາທຸກຄົນໃນທຸກມື້ນີ້. ດັ່ງນັ້ນ ໃຫ້ເຮົາເບິ່ງ 3 ຄຳຖາມທີ່ກ່ຽວຂ້ອງກັບວຽກມອບໝາຍທີ່ພະເຢຊູໃຫ້ເຮົາເຮັດ. ຄຳຖາມທີ (1) ນອກຈາກສອນນັກສຶກສາໃຫ້ຮູ້ວ່າພະເຈົ້າຕ້ອງການຫຍັງ ເຮົາຄວນເຮັດຫຍັງອີກ? (2) ທຸກຄົນໃນປະຊາຄົມຈະຊ່ອຍນັກສຶກສາໃຫ້ກ້າວໜ້າໄດ້ແນວໃດ? (3) ເຮົາຈະຊ່ອຍພີ່ນ້ອງທີ່ເຊົາຮັບໃຊ້ພະເຢໂຫວາໃຫ້ເລີ່ມປະກາດຄືນອີກໄດ້ແນວໃດ?
ສອນນັກສຶກສາໃຫ້ເຮັດຕາມຄຳສັ່ງຂອງພະຄລິດ
3. ໃນຄຳສັ່ງຂອງພະເຢຊູ ເພິ່ນສັ່ງຫຍັງທີ່ເຈາະຈົງ?
3 ຄຳສັ່ງຂອງພະເຢຊູຈະແຈ້ງ. ດັ່ງນັ້ນ ເຮົາຕ້ອງສອນຜູ້ຄົນໃນສິ່ງທີ່ພະເຢຊູສັ່ງໄວ້. ແຕ່ເຮົາບໍ່ຄວນລືມຈຸດໜຶ່ງທີ່ສຳຄັນ ພະເຢຊູບໍ່ໄດ້ບອກວ່າ: “ໃຫ້ສອນເຂົາເຈົ້າທຸກສິ່ງທີ່ຂ້ອຍສັ່ງພວກເຈົ້າ.” ທີ່ຈິງ ເພິ່ນບອກວ່າ: “ສອນເຂົາເຈົ້າໃຫ້ເຮັດຕາມ ທຸກສິ່ງທີ່ຂ້ອຍສັ່ງພວກເຈົ້າໄວ້.” ເພື່ອເຮັດຕາມຄຳສັ່ງທີ່ເຈາະຈົງນີ້ຂອງພະເຢຊູ ເຮົາບໍ່ພຽງແຕ່ສອນນັກສຶກສາໃຫ້ຮູ້ວ່າຕ້ອງເຮັດແນວໃດ ແຕ່ເຮົາຕ້ອງເຮັດໃຫ້ເຂົາເຈົ້າເບິ່ງນຳ. (ກຈກ. 8:31) ເປັນຫຍັງເຮົາຕ້ອງເຮັດແບບນັ້ນ?
4. ໃຫ້ອະທິບາຍວ່າເຮົາຈະສອນນັກສຶກສາແນວໃດໃຫ້ເຮັດຕາມຄຳສັ່ງຂອງພະຄລິດ
4 ການ “ເຮັດຕາມ” ຄຳສັ່ງໃດໜຶ່ງໝາຍເຖິງການເຊື່ອຟັງຄຳສັ່ງນັ້ນ. ເຮົາຈະສອນບາງຄົນແນວໃດເພື່ອໃຫ້ເຮັດຕາມສິ່ງທີ່ພະຄລິດສັ່ງໄວ້? ຕົວຢ່າງຕໍ່ໄປນີ້ຈະຊ່ອຍເຮົາໃຫ້ເຂົ້າໃຈວ່າເຮົາຕ້ອງເຮັດຫຍັງ. ຄູສອນຂັບລົດສອນນັກຮຽນແນວໃດໃຫ້ເຮັດຕາມກົດຈະລາຈອນ? ທຳອິດ ຄູອາດຈະສອນກົດຈະລາຈອນໃນຫ້ອງຮຽນກ່ອນ. ແຕ່ເພື່ອຈະສອນນັກຮຽນໃຫ້ເຮັດຕາມກົດເຫຼົ່ານັ້ນ ລາວຕ້ອງເຮັດສິ່ງອື່ນນຳອີກ. ລາວຕ້ອງນັ່ງຢູ່ນຳຕອນທີ່ນັກຮຽນຂັບລົດແລະພະຍາຍາມເຮັດຕາມຄຳແນະນຳທີ່ລາວບອກ. ເຮົາຮຽນຫຍັງຈາກຕົວຢ່າງນີ້?
5. (ກ) ຕາມໂຢຮັນ 14:15 ແລະ 1 ໂຢຮັນ 2:3 ເຮົາຕ້ອງສອນນັກສຶກສາໃຫ້ເຮັດຫຍັງ? (ຂ) ເຮົາຈະຊ່ອຍນັກສຶກສາແນວໃດໃຫ້ເອົາຄຳແນະນຳໃນຄຳພີໄບເບິນໄປໃຊ້?
5 ເມື່ອເຮົາສຶກສາຄຳພີໄບເບິນກັບບາງຄົນ ເຮົາສອນໃຫ້ເຂົາເຈົ້າຮູ້ວ່າພະເຈົ້າຢາກໃຫ້ເຂົາເຈົ້າເຮັດຫຍັງ. ແຕ່ເຮົາຕ້ອງເຮັດຫຼາຍກວ່ານັ້ນອີກ ເຮົາຕ້ອງສອນນັກສຶກສາໃຫ້ເອົາສິ່ງທີ່ຮຽນໄປໃຊ້. (ອ່ານໂຢຮັນ 14:15; 1 ໂຢຮັນ 2:3) ໂດຍທາງການກະທຳຂອງເຮົາ ເຮົາເຮັດໃຫ້ນັກສຶກສາເຫັນວ່າຈະເອົາຫຼັກການໃນຄຳພີໄບເບິນໄປໃຊ້ແນວໃດຢູ່ໂຮງຮຽນ ຢູ່ບ່ອນເຮັດວຽກ ຕອນໄປທ່ຽວຫຼືພັກຜ່ອນ. ເຮົາສາມາດເລົ່າໃຫ້ນັກສຶກສາຟັງກ່ຽວກັບປະສົບການຂອງເຮົາ ເພື່ອໃຫ້ເຂົາເຈົ້າເຫັນວ່າການໃຊ້ຄຳແນະນຳໃນຄຳພີໄບເບິນປົກປ້ອງເຮົາແນວໃດຈາກອັນຕະລາຍແລະຊ່ອຍເຮົາແນວໃດໃຫ້ຕັດສິນໃຈຢ່າງຖືກຕ້ອງ. ຕອນທີ່ຢູ່ກັບນັກສຶກສາ ເຮົາສາມາດອະທິດຖານຂໍໃຫ້ພະເຢໂຫວາຊີ້ນຳເຂົາເຈົ້າໂດຍທາງພະລັງບໍລິສຸດ.—ຢຮ. 16:13
6. ເຮົາຕ້ອງເຮັດຫຍັງອີກເມື່ອສອນຄົນອື່ນໃຫ້ເຮັດຕາມຄຳສັ່ງຂອງພະເຢຊູ?
6 ເຮົາຕ້ອງເຮັດຫຍັງອີກເມື່ອສອນຄົນອື່ນໃຫ້ເຮັດຕາມຄຳສັ່ງຂອງພະເຢຊູ? ເຮົາຕ້ອງຊ່ອຍນັກສຶກສາໃຫ້ຢາກສອນຄົນອື່ນໃຫ້ເຂົ້າມາເປັນລູກສິດ. ນັກສຶກສາບາງຄົນອາດຈະບໍ່ກ້າປະກາດ ດັ່ງນັ້ນ ເຮົາຕ້ອງອົດທົນເມື່ອຊ່ອຍເຂົາເຈົ້າໃຫ້ຄ່ອຍໆເຂົ້າໃຈຄວາມຈິງໃນຄຳພີໄບເບິນຫຼາຍຂຶ້ນ. ເມື່ອປະທັບໃຈໃນສິ່ງທີ່ຮຽນ ເຂົາເຈົ້າກໍຈະຖືກກະຕຸ້ນໃຫ້ຢາກປະກາດ. ເຮົາຕ້ອງເຮັດຫຍັງເພື່ອຈະຊ່ອຍນັກສຶກສາໃຫ້ຢາກປະກາດ?
7. ເຮົາຈະຊ່ອຍນັກສຶກສາແນວໃດໃຫ້ຢາກປະກາດກັບຄົນອື່ນ?
7 ເຮົາອາດຖາມນັກສຶກສາວ່າ “ເມື່ອເອົາຄຳສອນໃນຄຳພີໄບເບິນໄປໃຊ້ ຊີວິດຂອງເຈົ້າດີຂຶ້ນແນວໃດ? ເຈົ້າຄິດວ່າຄົນອື່ນຈຳເປັນຕ້ອງຮູ້ຄຳສອນນີ້ຄືກັນບໍ? ເຈົ້າຈະເຮັດແນວໃດເພື່ອຊ່ອຍເຂົາເຈົ້າ?” (ສຸພາ. 3:27; ມທ. 9:37, 38) ໃຫ້ນັກສຶກສາເບິ່ງແຜ່ນພັບທີ່ຢູ່ໃນກ່ອງເຄື່ອງມືສຳລັບການສອນ ແລະໃຫ້ລາວເລືອກແຜ່ນພັບທີ່ລາວຄິດວ່າພີ່ນ້ອງ ໝູ່ ຫຼືຄົນຢູ່ບ່ອນເຮັດວຽກອາດຈະສົນໃຈ ແລະເອົາແຜ່ນພັບເຫຼົ່ານັ້ນຈຳນວນໜຶ່ງໃຫ້ລາວ. ໃຫ້ຝຶກຊ້ອມກັບນັກສຶກສາວິທີສະເໜີແຜ່ນພັບກັບຄົນອື່ນແບບດີໆ. ແນ່ນອນວ່າເມື່ອນັກສຶກສາເປັນຜູ້ປະກາດທີ່ຍັງບໍ່ທັນຮັບບັບເຕມາ ເຮົາຈະໄປປະກາດນຳລາວເພື່ອຊ່ອຍລາວ.—ຜູ້ປ. 4:9, 10; ລກ. 6:40
ພີ່ນ້ອງໃນປະຊາຄົມຈະຊ່ອຍນັກສຶກສາໃຫ້ກ້າວໜ້າໄດ້ແນວໃດ?
8. ເປັນຫຍັງຈຶ່ງສຳຄັນທີ່ນັກສຶກສາຕ້ອງຮັກພະເຈົ້າແລະຮັກຄົນອື່ນ? (ເບິ່ງຂອບ “ ວິທີຊ່ອຍນັກສຶກສາໃຫ້ຮັກພະເຈົ້າຫຼາຍຂຶ້ນ”)
8 ຂໍໃຫ້ຈື່ວ່າພະເຢຊູສັ່ງເຮົາໃຫ້ສອນຄົນອື່ນໃຫ້ “ເຮັດຕາມທຸກສິ່ງ” ທີ່ເພິ່ນສັ່ງໄວ້. ແນ່ນອນວ່າຄຳສັ່ງນີ້ລວມເຖິງຄຳສັ່ງ 2 ຂໍ້ທີ່ສຳຄັນທີ່ສຸດ ນັ້ນຄືໃຫ້ຮັກພະເຈົ້າແລະຮັກຄົນອື່ນ. ຄວາມຮັກແບບນີ້ກ່ຽວຂ້ອງກັນແທ້ໆກັບການປະກາດແລະການສອນຄົນໃຫ້ເຂົ້າມາເປັນລູກສິດ. (ມທ. 22:37-39) ກ່ຽວຂ້ອງກັນແນວໃດ? ຄວາມຮັກທີ່ເຮົາມີຕໍ່ພະເຈົ້າແລະຕໍ່ຄົນອື່ນເປັນສິ່ງທີ່ກະຕຸ້ນເຮົາໃຫ້ຢາກປະກາດ. ເຮົາເຂົ້າໃຈໄດ້ທີ່ນັກສຶກສາບາງຄົນອາດຮູ້ສຶກຢ້ານທີ່ຈະປະກາດ ແຕ່ເຮົາເຮັດໃຫ້ເຂົາເຈົ້າໝັ້ນໃຈໄດ້ວ່າພະເຢໂຫວາຈະຊ່ອຍເຂົາເຈົ້າໃຫ້ຄ່ອຍໆເຊົາຢ້ານ. (ເພງ. 18:1-3; ສຸພາ. 29:25) ຂອບຢູ່ໃນບົດນີ້ເວົ້າເຖິງຂັ້ນຕອນຕ່າງໆທີ່ເຮົາເຮັດໄດ້ເພື່ອຊ່ອຍນັກສຶກສາໃຫ້ຮັກພະເຈົ້າຫຼາຍຂຶ້ນ. ນອກຈາກນັ້ນ ພີ່ນ້ອງໃນປະຊາຄົມສາມາດເຮັດຫຍັງເພື່ອຊ່ອຍນັກສຶກສາໃຫ້ມີຄວາມຮັກຫຼາຍຂຶ້ນ?
9. ໃນຕົວຢ່າງນີ້ ນັກຮຽນໄດ້ບົດຮຽນທີ່ສຳຄັນຫຍັງແດ່?
9 ໃຫ້ຄິດເຖິງຕົວຢ່າງເລື່ອງນັກຮຽນຂັບລົດອີກເທື່ອໜຶ່ງ. ເມື່ອຂັບລົດຕາມຫົນທາງແລະມີຄູສອນນັ່ງຢູ່ທາງຂ້າງ ລາວຈະຮຽນຮູ້ໂດຍວິທີໃດ? ໂດຍຟັງສິ່ງທີ່ຄູສອນບອກແລະໂດຍເບິ່ງຄົນອື່ນທີ່ຂັບລົດແບບລະວັງ. ຕົວຢ່າງເຊັ່ນ: ຄູສອນອາດຈະຊີ້ໃຫ້ນັກຮຽນເຫັນຄົນຂັບລົດຜູ້ໜຶ່ງທີ່ປ່ອຍທາງໃຫ້ຄົນອື່ນ ຫຼືຄູສອນອາດຈະຊີ້ໃຫ້ນັກຮຽນເບິ່ງຄົນຂັບລົດອີກຜູ້ໜຶ່ງທີ່ລີ່ຕາໄຟລົດທາງໜ້າເພື່ອບໍ່ໃຫ້ຄົນອື່ນເຫຼື້ອມຕາ. ຕົວຢ່າງເຫຼົ່ານີ້ສອນບົດຮຽນທີ່ສຳຄັນເຊິ່ງນັກຮຽນສາມາດເອົາໄປໃຊ້ຕອນທີ່ຂັບລົດ.
10. ສິ່ງໃດຈະຊ່ອຍນັກສຶກສາໃຫ້ກ້າວໜ້າແລະມີຄວາມເຊື່ອເຂັ້ມແຂງ?
10 ຄ້າຍຄືກັນ ນັກສຶກສາທີ່ເລີ່ມຮັບໃຊ້ພະເຢໂຫວາບໍ່ພຽງແຕ່ຮຽນຈາກຜູ້ທີ່ສອນລາວເທົ່ານັ້ນ ແຕ່ຍັງຮຽນຈາກຕົວຢ່າງທີ່ດີຂອງພີ່ນ້ອງຄົນອື່ນນຳອີກ. ຄັນຊັ້ນ ສິ່ງໃດຈະຊ່ອຍນັກສຶກສາໃຫ້ກ້າວໜ້າແລະມີຄວາມເຊື່ອເຂັ້ມແຂງ? ການເຂົ້າຮ່ວມປະຊຸມ. ເປັນຫຍັງຈຶ່ງເຂົ້າຮ່ວມ? ຍ້ອນວ່າສິ່ງທີ່ນັກສຶກສາຮຽນຢູ່ການປະຊຸມຈະຊ່ອຍເຂົາເຈົ້າໃຫ້ມີຄວາມເຊື່ອຫຼາຍຂຶ້ນ ມີຄວາມເຊື່ອເຂັ້ມແຂງຂຶ້ນ ແລະຮັກພະເຈົ້າຫຼາຍຂຶ້ນ. (ກຈກ. 15:30-32) ນອກຈາກນັ້ນ ຢູ່ການປະຊຸມຜູ້ນຳການສຶກສາສາມາດແນະນຳນັກສຶກສາໃຫ້ຮູ້ຈັກພີ່ນ້ອງຄົນອື່ນທີ່ມີບັນຫາຄ້າຍຄືກັບລາວ. ນັກສຶກສາຈະເຫັນຕົວຢ່າງທີ່ດີຫຍັງແດ່ຂອງພີ່ນ້ອງໃນປະຊາຄົມ? ໃຫ້ເຮົາເບິ່ງຕົວຢ່າງຕໍ່ໄປນີ້.
11. ນັກສຶກສາອາດສັງເກດເຫັນຕົວຢ່າງຫຍັງແດ່ໃນປະຊາຄົມ ແລະຕົວຢ່າງເຫຼົ່ານັ້ນສົ່ງຜົນຕໍ່ເຂົາເຈົ້າແນວໃດ?
11 ເມື່ອນັກສຶກສາທີ່ເປັນແມ່ທີ່ລ້ຽງລູກຜູ້ດຽວເຫັນພີ່ນ້ອງຍິງຄົນໜຶ່ງທີ່ມີສະພາບການຄ້າຍຄືກັບລາວ ລາວກໍປະທັບໃຈພີ່ນ້ອງຜູ້ນີ້ຫຼາຍທີ່ອອກຄວາມພະຍາຍາມພາລູກນ້ອຍໆມາປະຊຸມ. ນັກສຶກສາທີ່ພະຍາຍາມເຊົາສູບຢາໄດ້ຮູ້ຈັກພີ່ນ້ອງຄົນໜຶ່ງທີ່ເຄີຍມີບັນຫາດຽວກັນກັບລາວແລະເຊົາສູບຢາໄດ້. ພີ່ນ້ອງຜູ້ນີ້ບອກນັກສຶກສາວ່າ ຍ້ອນລາວຮັກພະເຢໂຫວາຫຼາຍ ຄວາມຮັກນີ້ຈຶ່ງກະຕຸ້ນລາວໃຫ້ເຊື່ອຟັງຄຳສັ່ງຂອງເພິ່ນ. (2 ກຣ. 7:1; ຟລປ. 4:13) ຫຼັງຈາກທີ່ພີ່ນ້ອງເລົ່າໃຫ້ຟັງວ່າລາວເຊົາສູບຢາໄດ້ແນວໃດ ນັກສຶກສາກໍຮູ້ສຶກໝັ້ນໃຈຫຼາຍຂຶ້ນເມື່ອພີ່ນ້ອງບອກວ່າ “ເຈົ້າກໍເຊົາໄດ້ຄືກັນ.” ເມື່ອນັກສຶກສາຄົນໜຶ່ງທີ່ເປັນຜູ້ຍິງໄວລຸ້ນສັງເກດເຫັນວ່າພີ່ນ້ອງຍິງໄວລຸ້ນຄົນໜຶ່ງມີຄວາມສຸກຫຼາຍທີ່ໃຊ້ຊີວິດເປັນພະຍານພະເຢໂຫວາແລະຊ່ອຍຄົນອື່ນ. ດັ່ງນັ້ນ ລາວຈຶ່ງຢາກຮູ້ວ່າເປັນຫຍັງພີ່ນ້ອງຜູ້ນີ້ຈຶ່ງເບິ່ງຄືມີຄວາມສຸກ.
12. ເປັນຫຍັງເຮົາເວົ້າໄດ້ວ່າທຸກຄົນໃນປະຊາຄົມມີສ່ວນຊ່ອຍນັກສຶກສາ?
12 ເມື່ອນັກສຶກສາຮູ້ຈັກກັບພີ່ນ້ອງທີ່ສັດຊື່ຫຼາຍຄົນເຂົາເຈົ້າກໍຮຽນຮູ້ຈາກຕົວຢ່າງຂອງພີ່ນ້ອງເຫຼົ່ານັ້ນກ່ຽວກັບການເຮັດຕາມຄຳສັ່ງຂອງພະຄລິດທີ່ໃຫ້ຮັກພະເຈົ້າແລະຮັກຄົນອື່ນ. (ຢຮ. 13:35; 1 ຕມ. 4:12) ຕາມທີ່ເວົ້າໄປແລ້ວ ນັກສຶກສາສາມາດຮຽນຈາກຕົວຢ່າງຂອງພີ່ນ້ອງທີ່ມີບັນຫາຄ້າຍຄືກັບລາວ ແລະເຫັນວ່າລາວສາມາດປ່ຽນແປງໂຕເອງໄດ້ເພື່ອຈະເຂົ້າມາເປັນລູກສິດຂອງພະຄລິດ. (ບັນຍັດ. 30:11) ທຸກຄົນໃນປະຊາຄົມມີສ່ວນຊ່ອຍນັກສຶກສາໃຫ້ກ້າວໜ້າທາງຄວາມເຊື່ອ. (ມທ. 5:16) ເຈົ້າໄດ້ອອກຄວາມພະຍາຍາມຫຍັງແດ່ເພື່ອຊ່ອຍນັກສຶກສາທີ່ມາປະຊຸມແລ້ວ?
ຊ່ອຍຄົນທີ່ເຊົາຮັບໃຊ້ພະເຢໂຫວາໃຫ້ເລີ່ມປະກາດຄືນອີກ
13-14. ພະເຢຊູປະຕິບັດແນວໃດກັບພວກອັກຄະສາວົກທີ່ທໍ້ໃຈ?
13 ເຮົາຢາກຊ່ອຍພີ່ນ້ອງທີ່ເຊົາຮັບໃຊ້ພະເຢໂຫວາໃຫ້ເລີ່ມປະກາດຄືນອີກແລະສອນຄົນໃຫ້ເຂົ້າມາເປັນລູກສິດຕາມທີ່ພະເຢຊູສັ່ງໄວ້. ວິທີທີ່ພະເຢຊູປະຕິບັດກັບພວກອັກຄະສາວົກທີ່ທໍ້ໃຈສະແດງເຖິງສິ່ງທີ່ເຮົາອາດຈະເຮັດໃນທຸກມື້ນີ້.
14 ບໍ່ດົນກ່ອນພະເຢຊູຕາຍ ພວກອັກຄະສາວົກ “ທຸກຄົນກໍຖິ້ມພະເຢຊູແລ້ວໜີໄປ.” (ມຣກ. 14:50; ຢຮ. 16:32) ພະເຢຊູໄດ້ເຮັດຫຍັງຕອນທີ່ພວກອັກຄະສາວົກທໍ້ໃຈ? ບໍ່ດົນຫຼັງຈາກພະເຢຊູຟື້ນຄືນມາຈາກຕາຍ ເພິ່ນບອກລູກສິດບາງຄົນທີ່ເປັນຜູ້ຍິງວ່າ: “ບໍ່ຕ້ອງຢ້ານ! ໄປເລົ່າເລື່ອງນີ້ໃຫ້ພີ່ນ້ອງຂອງຂ້ອຍຟັງ [ວ່າຂ້ອຍຄືນມາຈາກຕາຍແລ້ວ].” (ມທ. 28:10 ສ່ວນ ກ) ພະເຢຊູບໍ່ໄດ້ຖິ້ມພວກອັກຄະສາວົກຂອງເພິ່ນ ເຖິງວ່າເຂົາເຈົ້າຈະຖິ້ມເພິ່ນກໍຕາມ ແຕ່ເພິ່ນກໍຍັງເອີ້ນເຂົາເຈົ້າວ່າ “ພີ່ນ້ອງຂອງຂ້ອຍ.” ຄືກັບພະເຢໂຫວາ ພະເຢຊູເມດຕາແລະໃຫ້ອະໄພ.—2 ກະ. 13:23
15. ເຮົາຮູ້ສຶກແນວໃດຕໍ່ຄົນທີ່ເຊົາຮັບໃຊ້ພະເຢໂຫວາ?
15 ເຮົາກໍເປັນຫ່ວງຜູ້ທີ່ເຊົາຮັບໃຊ້ພະເຢໂຫວາຄືກັນ ຍ້ອນວ່າເຂົາເຈົ້າເປັນພີ່ນ້ອງຂອງເຮົາແລະເຮົາກໍຮັກເຂົາເຈົ້າຫຼາຍ. ເຮົາຍັງຈື່ວຽກໜັກທຸກຢ່າງທີ່ເຂົາເຈົ້າໄດ້ເຮັດເພື່ອພະເຢໂຫວາ ແລະບາງຄົນກໍເຮັດເປັນເວລາຫຼາຍສິບປີ. (ຮຣ. 6:10) ເຮົາຄິດຮອດເຂົາເຈົ້າຫຼາຍແທ້ໆ! (ລກ. 15:4-7) ເພື່ອຮຽນແບບພະເຢຊູ ມີວິທີໃດແດ່ທີ່ເຮົາຈະສະແດງໃຫ້ເຫັນວ່າເຮົາເປັນຫ່ວງພີ່ນ້ອງເຫຼົ່ານີ້?
16. ເຮົາຈະເຮັດໃຫ້ເຫັນແນວໃດວ່າ ເຮົາເປັນຫ່ວງພີ່ນ້ອງທີ່ເຊົາຮັບໃຊ້ພະເຢໂຫວາ?
16 ເຊີນດ້ວຍຄວາມຮັກ. ວິທີໜຶ່ງທີ່ພະເຢຊູໃຫ້ກຳລັງໃຈພວກອັກຄະສາວົກທີ່ທໍ້ໃຈແມ່ນເພິ່ນຊວນເຂົາເຈົ້າໄປປະຊຸມ. (ມທ. 28:10 ສ່ວນ ຂ; 1 ກຣ. 15:6) ທຸກມື້ນີ້ກໍຄືກັນ ເຮົາສາມາດໃຫ້ກຳລັງໃຈຄົນທີ່ເຊົາຮັບໃຊ້ພະເຢໂຫວາໂດຍຊວນເຂົາເຈົ້າໄປປະຊຸມ ຖ້າເຂົາເຈົ້າຍັງບໍ່ທັນໄດ້ໄປເທື່ອ. ເຮົາຮູ້ວ່າອາດຕ້ອງຊວນຫຼາຍເທື່ອ ເຂົາເຈົ້າຈຶ່ງຈະໄປ. ພະເຢຊູຕ້ອງດີໃຈແທ້ໆທີ່ພວກລູກສິດໄປຕາມທີ່ເພິ່ນຊວນແລະເຮົາກໍຈະຮູ້ສຶກແບບດຽວກັນນັ້ນ.—ສົມທຽບກັບມັດທາຍ 28:16 ແລະລູກາ 15:6
17. ເຮົາຄວນເຮັດແນວໃດເມື່ອຄົນທີ່ເຊົາຮັບໃຊ້ພະເຢໂຫວາມາປະຊຸມ?
17 ຕ້ອນຮັບຢ່າງຈິງໃຈ. ພະເຢຊູເຮັດໃຫ້ພວກລູກສິດຮູ້ສຶກສະບາຍໃຈເມື່ອເຈິກັບເພິ່ນ. ພະເຢຊູເປັນຝ່າຍເຂົ້າໄປຫາເຂົາເຈົ້າແລະເລີ່ມລົມນຳເຂົາເຈົ້າ. (ມທ. 28:18) ເຮົາຈະເຮັດແນວໃດເມື່ອຄົນທີ່ເຊົາຮັບໃຊ້ພະເຢໂຫວາມາຮອດຫໍປະຊຸມ? ເຮົາຄວນເປັນຝ່າຍຍ່າງໄປຫາແລະຕ້ອນຮັບລາວຢ່າງອົບອຸ່ນ. ຕອນທຳອິດ ເຮົາອາດກັງວົນເພາະບໍ່ຮູ້ວ່າຊິເວົ້າຫຍັງ. ແຕ່ໂດຍທີ່ບໍ່ເຮັດໃຫ້ລາວຮູ້ສຶກອາຍ ເຮົາກໍອາດຈະມີແຕ່ເວົ້າວ່າ “ຂ້ອຍດີໃຈທີ່ເຫັນເຈົ້າ.”
18. ເຮົາຈະເຮັດໃຫ້ຄົນທີ່ເຊົາຮັບໃຊ້ພະເຢໂຫວາຮູ້ສຶກໝັ້ນໃຈໄດ້ແນວໃດ?
18 ເຮັດໃຫ້ຮູ້ສຶກໝັ້ນໃຈ. ລູກສິດຂອງພະເຢຊູຮູ້ສຶກວ່າເຂົາເຈົ້າບໍ່ມີທາງທີ່ຈະປະກາດຢູ່ທົ່ວໂລກໄດ້ ແຕ່ພະເຢຊູເຮັດໃຫ້ເຂົາເຈົ້າໝັ້ນໃຈໂດຍເວົ້າວ່າ: “ຂ້ອຍຈະຢູ່ກັບພວກເຈົ້າສະເໝີ.” (ມທ. 28:20) ຄຳເວົ້ານີ້ຊ່ອຍພວກລູກສິດບໍ? ຊ່ອຍແທ້. ຕໍ່ມາບໍ່ດົນ ເຂົາເຈົ້າກໍໄດ້ “ສອນແລະປະກາດຂ່າວດີ” ເອົາແທ້ເອົາວ່າ. (ກຈກ. 5:42) ຄົນທີ່ເຊົາຮັບໃຊ້ພະເຢໂຫວາກໍຢາກໃຫ້ມີຄົນເຮັດໃຫ້ເຂົາເຈົ້າຮູ້ສຶກໝັ້ນໃຈຄືກັນ ຍ້ອນເຂົາເຈົ້າອາດຮູ້ສຶກຢ້ານທີ່ຈະເລີ່ມປະກາດຄືນອີກ. ເຮົາສາມາດເຮັດໃຫ້ພີ່ນ້ອງເຫຼົ່ານີ້ໝັ້ນໃຈວ່າເຂົາເຈົ້າຈະບໍ່ໄປປະກາດຄົນດຽວ ແລະເມື່ອເຂົາເຈົ້າພ້ອມ ເຮົາຈະໄປນຳ. ເຂົາເຈົ້າຄືຊິດີໃຈແທ້ໆທີ່ເຮົາຊ່ອຍເຂົາເຈົ້າເມື່ອເລີ່ມປະກາດຄືນອີກ. ຖ້າເຮົາເຮັດໃຫ້ຄົນເຫຼົ່ານີ້ເຫັນວ່າເຂົາເຈົ້າເປັນພີ່ນ້ອງຂອງເຮົາ ເຂົາເຈົ້າກໍອາດຈະກັບມາຮັບໃຊ້ພະເຢໂຫວາຄືນອີກ ເຊິ່ງເຮັດໃຫ້ທຸກຄົນໃນປະຊາຄົມມີຄວາມສຸກ.
ເຮົາຢາກເຮັດວຽກທີ່ພະເຢຊູມອບໝາຍໃຫ້ສຳເລັດ
19. ເຮົາຕັ້ງໃຈຢາກເຮັດຫຍັງ ແລະຍ້ອນຫຍັງ?
19 ອີກດົນປານໃດທີ່ເຮົາຕ້ອງປະກາດແລະສອນຄົນໃຫ້ເຂົ້າມາເປັນລູກສິດ? ຈົນຮອດສະໄໝສຸດທ້າຍຂອງໂລກນີ້. (ມທ. 28:20; ເບິ່ງສ່ວນອະທິບາຍຄຳສັບໃນຫົວຂໍ້ “ສະໄໝສຸດທ້າຍຂອງໂລກນີ້”) ເຮົາຈະເຮັດຕາມຄຳສັ່ງຂອງພະເຢຊູໃຫ້ສຳເລັດໄດ້ບໍ? ໄດ້ແທ້ ເພາະເຮົາຕັ້ງໃຈທີ່ຈະເຮັດແບບນັ້ນ. ເຮົາເຕັມໃຈໃຊ້ເວລາ ກຳລັງ ແລະເງິນຂອງເຮົາເພື່ອຊອກຫາ “ຄົນທີ່ເຕັມໃຈຕອບຮັບຄວາມຈິງເຊິ່ງເຮັດໃຫ້ໄດ້ຊີວິດຕະຫຼອດໄປ.” (ກຈກ. 13:48) ເມື່ອເຮັດແບບນີ້ເຮົາກໍເຮັດຕາມຕົວຢ່າງຂອງພະເຢຊູ ເພາະເພິ່ນເວົ້າວ່າ: “ອາຫານຂອງຂ້ອຍຄືການເຮັດຕາມຄວາມຕ້ອງການຂອງຜູ້ທີ່ໃຊ້ຂ້ອຍມາແລະເຮັດວຽກຂອງພະອົງໃຫ້ສຳເລັດ.” (ຢຮ. 4:34; 17:4) ເຮົາກໍຢາກເຮັດແບບນີ້ຄືກັນ. ເຮົາຢາກເຮັດວຽກທີ່ພະເຢຊູມອບໝາຍໃຫ້ສຳເລັດ. (ຢຮ. 20:21) ແລະເຮົາກໍຢາກໃຫ້ຄົນອື່ນລວມທັງຄົນທີ່ເຊົາຮັບໃຊ້ພະເຢໂຫວາໃຫ້ອົດທົນເຮັດວຽກນີ້ນຳກັນກັບເຮົາ.—ມທ. 24:13
20. ຕາມຟີລິບປອຍ 4:13 ເປັນຫຍັງເຮົາສາມາດເຮັດວຽກທີ່ພະເຢຊູສັ່ງໄດ້ສຳເລັດ?
20 ບໍ່ແມ່ນເລື່ອງງ່າຍທີ່ຈະເຮັດຕາມຄຳສັ່ງຂອງພະເຢຊູ ແຕ່ເຮົາບໍ່ໄດ້ເຮັດວຽກນີ້ຜູ້ດຽວເພາະພະເຢຊູສັນຍາວ່າເພິ່ນຈະຢູ່ກັບເຮົາ. ເມື່ອເຮົາເຮັດວຽກມອບໝາຍໃນການສອນຄົນໃຫ້ເຂົ້າມາເປັນລູກສິດ ເຮົາກໍເປັນ “ເພື່ອນຮ່ວມງານຂອງພະເຈົ້າ.” (1 ກຣ. 3:9) ດັ່ງນັ້ນ ເຮົາໝັ້ນໃຈໄດ້ວ່າເຮົາສາມາດເຮັດວຽກນີ້ໄດ້ສຳເລັດ. ເປັນສິດທິພິເສດແລະເປັນເລື່ອງທີ່ໜ້າຍິນດີແທ້ໆທີ່ໄດ້ເຮັດວຽກມອບໝາຍນີ້ຕໍ່ໆໄປ ແລະທັງຊ່ອຍຄົນອື່ນໃຫ້ເຮັດວຽກນີ້ຄືກັນ.—ອ່ານຟີລິບປອຍ 4:13
ເພງ 79 ສອນພວກເຂົາໃຫ້ມີຄວາມເຊື່ອທີ່ໝັ້ນຄົງ
^ ຂໍ້ 5 ພະເຢຊູສັ່ງພວກລູກສິດໃຫ້ໄປສອນຄົນໃຫ້ເຂົ້າມາເປັນລູກສິດ ແລະສອນເຂົາເຈົ້າໃຫ້ເຮັດຕາມ ທຸກສິ່ງທີ່ເພິ່ນສັ່ງໄວ້. ໃນບົດນີ້ເຮົາຈະເບິ່ງວ່າ ເຮົາຈະເຮັດຕາມຄຳສັ່ງຂອງພະເຢຊູໄດ້ແນວໃດ. ເນື້ອໃນຂອງບົດນີ້ມາຈາກຫໍສັງເກດການ 1 ກໍລະກົດ 2004 ໜ້າ 14-19.
^ ຂໍ້ 68 ຄຳອະທິບາຍຮູບ: ພີ່ນ້ອງຍິງທີ່ນຳການສຶກສາອະທິບາຍຂັ້ນຕອນຕ່າງໆທີ່ນັກສຶກສາຕ້ອງເຮັດເພື່ອຈະຮັກພະເຈົ້າຫຼາຍຂຶ້ນ. ຕໍ່ມາ ນັກສຶກສາໄດ້ເອົາຄຳແນະນຳສາມຢ່າງນັ້ນໄປໃຊ້.
