ບົດຄວາມສຶກສາທີ 47
ຄວາມເຊື່ອຂອງເຈົ້າຈະເຂັ້ມແຂງພໍບໍ?
“ຢ່າທຸກໃຈເລີຍ ຂໍໃຫ້ສະແດງຄວາມເຊື່ອໃນພະເຈົ້າ.”—ຢຮ. 14:1
ເພງ 119 ພວກເຮົາຕ້ອງມີຄວາມເຊື່ອ
ໃຈຄວາມສຳຄັນ *
1. ເຮົາອາດຈະຖາມຕົວເອງໃນເລື່ອງຫຍັງ?
ເຈົ້າອາດຮູ້ສຶກກັງວົນເມື່ອຄິດເຖິງເຫດການທີ່ຈະເກີດຂຶ້ນໃນອະນາຄົດ ເຊັ່ນ: ການທຳລາຍສາສະໜາປອມ ການໂຈມຕີຂອງໂຄກແຫ່ງມາໂຄກ ແລະສົງຄາມອາມາເຄໂດນ. ແລະເຈົ້າອາດຈະຖາມຕົວເອງວ່າ ‘ເມື່ອມື້ນັ້ນມາຮອດ ຂ້ອຍຈະລອດຜ່ານເຫດການທີ່ເປັນຕາຢ້ານນີ້ດ້ວຍຄວາມສັດຊື່ໄດ້ບໍ?’ ຖ້າເຈົ້າຮູ້ສຶກແບບນັ້ນ ຄຳເວົ້າຂອງພະເຢຊູທີ່ຢູ່ໃນຂໍ້ພະຄຳພີຫຼັກຂອງບົດນີ້ຈະຊ່ວຍເຈົ້າໄດ້. ໃນຂໍ້ນັ້ນພະເຢຊູບອກລູກສິດຂອງເພິ່ນວ່າ: “ຢ່າທຸກໃຈເລີຍ ຂໍໃຫ້ສະແດງຄວາມເຊື່ອໃນພະເຈົ້າ.” (ໂຢຮັນ 14:1) ຄວາມເຊື່ອທີ່ເຂັ້ມແຂງຈະຊ່ວຍເຮົາໃຫ້ອົດທົນກັບສິ່ງທີ່ຈະເກີດຂຶ້ນໃນອະນາຄົດໄດ້.
2. ເຮົາຈະເສີມຄວາມເຊື່ອຂອງເຮົາໃຫ້ເຂັ້ມແຂງໄດ້ແນວໃດ ແລະເຮົາຈະຮຽນຫຍັງໃນບົດຄວາມນີ້?
2 ເພື່ອຈະມີຄວາມເຊື່ອທີ່ເຂັ້ມແຂງ ເຮົາຕ້ອງຄິດເຖິງສິ່ງທີ່ເຮົາເຮັດໃນຕອນນີ້ເມື່ອມີບັນຫາ. ຖ້າເຮົາຄິດເຖິງສິ່ງເຫຼົ່ານີ້ ເຮົາກໍຮູ້ວ່າຈະເສີມຄວາມເຊື່ອຂອງຕົວເອງໃນເລື່ອງຫຍັງແດ່. ແລະທຸກເທື່ອທີ່ເຮົາຜ່ານບັນຫາມາໄດ້ ຄວາມເຊື່ອຂອງເຮົາກໍຈະເຂັ້ມແຂງຂຶ້ນເຊິ່ງຈະຊ່ວຍເຮົາໃຫ້ອົດທົນກັບບັນຫາທີ່ຈະເກີດຂຶ້ນໃນອະນາຄົດໄດ້. ໃນບົດຄວາມນີ້ເຮົາຈະມາເບິ່ງບັນຫາ 4 ຢ່າງທີ່ສະແດງໃຫ້ເຫັນວ່າລູກສິດຂອງພະເຢຊູຕ້ອງມີຄວາມເຊື່ອຫຼາຍຂຶ້ນ. ເມື່ອເຮົາຮຽນເລື່ອງເຫຼົ່ານີ້ ເຮົາອາດຈະເຫັນບັນຫາຄ້າຍຄືກັບທີ່ເຮົາເຈິໃນທຸກມື້ນີ້ ແລະຊ່ວຍເຮົາໃຫ້ກຽມພ້ອມທີ່ຈະຮັບມືກັບບັນຫາທີ່ຈະເກີດຂຶ້ນໃນອະນາຄົດໄດ້.
ເຊື່ອວ່າພະເຢໂຫວາຈະໃຫ້ເຮົາມີສິ່ງຈຳເປັນ
ເຮົາອາດຈະມີບັນຫາດ້ານເສດຖະກິດ ແຕ່ຄວາມເຊື່ອຊ່ວຍເຮົາໃຫ້ເອົາການຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ (ເບິ່ງຂໍ້ 3-6)
3. ມັດທາຍ 6:30, 33 ຊ່ວຍເຮົາໃຫ້ມີຄວາມເຊື່ອເຂັ້ມແຂງໃນເລື່ອງຫຍັງ?
3 ເປັນເລື່ອງທຳມະດາທີ່ຫົວໜ້າຄອບຄົວຢາກໃຫ້ຄອບຄົວມີສິ່ງຈຳເປັນ ເຊັ່ນ: ອາຫານການກິນ ເຄື່ອງນຸ່ງຫົ່ມ ແລະບ່ອນຢູ່ອາໄສ. ແຕ່ມັນກໍບໍ່ງ່າຍໃນຊ່ວງເວລາທີ່ຫຍຸ້ງຍາກແບບນີ້. ພີ່ນ້ອງບາງຄົນກໍຕົກວຽກແລະຍັງຊອກວຽກເຮັດບໍ່ໄດ້ເຖິງວ່າຈະພະຍາຍາມແລ້ວ. ສ່ວນພີ່ນ້ອງຄົນອື່ນໆກໍປະຕິເສດວຽກທີ່ຂັດກັບຫຼັກການໃນຄຳພີໄບເບິນ. ບໍ່ວ່າເຮົາຈະເຈິບັນຫາແບບໃດ ເຮົາກໍຕ້ອງມີຄວາມເຊື່ອທີ່ເຂັ້ມແຂງວ່າພະເຢໂຫວາຈະໃຫ້ເຮົາມີສິ່ງຈຳເປັນ. ພະເຢຊູໄດ້ເນັ້ນເລື່ອງນີ້ກັບພວກລູກສິດຂອງເພິ່ນໃນຄຳບັນຍາຍເທິງພູເຂົາ. (ອ່ານມັດທາຍ 6:30, 33) ເມື່ອເຮົາໝັ້ນໃຈວ່າພະເຢໂຫວາຈະບໍ່ປະຖິ້ມເຮົາ ເຮົາກໍຈະຈົດຈໍ່ກັບການຮັບໃຊ້ພະເຢໂຫວາຕໍ່ໆໄປໄດ້ ແລະເມື່ອເຮົາເຫັນວ່າພະເຢໂຫວາໄດ້ຊ່ວຍເຮົາໃຫ້ມີສິ່ງຈຳເປັນແນວໃດ ເຮົາກໍຈະໃກ້ຊິດກັບພະເຢໂຫວາຫຼາຍຂຶ້ນແລະມີຄວາມເຊື່ອທີ່ເຂັ້ມແຂງ.
4-5. ສິ່ງໃດຊ່ວຍຄອບຄົວໜຶ່ງໃຫ້ອົດທົນໄດ້ເມື່ອກັງວົນກ່ຽວກັບສິ່ງຈຳເປັນໃນການດຳລົງຊີວິດ?
4 ໃຫ້ເຮົາມາເບິ່ງປະສົບການຂອງຄອບຄົວພີ່ນ້ອງຄັດສ໌ໂຕຣຢູ່ໃນເວເນຊູເອລາ. ເຂົາເຈົ້າໄດ້ເຫັນຄວາມຊ່ວຍເຫຼືອຈາກພະເຢໂຫວາເມື່ອເຂົາເຈົ້າກັງວົນກ່ຽວກັບສິ່ງຈຳເປັນໃນການດຳລົງຊີວິດ. ຕອນທຳອິດ ຄອບຄົວນີ້ທຳມາຫາກິນດ້ວຍການເຮັດໄຮ່ເຮັດສວນ. ແຕ່ຢູ່ມາມື້ໜຶ່ງມີແກ໊ງອັນທະພານໄດ້ມາປຸ້ນແລະຍຶດເອົາທີ່ດິນຂອງເຂົາເຈົ້າ. ມິເກວຜູ້ເປັນພໍ່ບອກວ່າ: “ຕອນນີ້ເຮົາໄດ້ຂໍໃຊ້ທີ່ດິນນ້ອຍໆຂອງຄົນອື່ນເພື່ອຈະເຮັດໄຮ່ເຮັດສວນ. ຂ້ອຍອະທິດຖານເຖິງພະເຢໂຫວາຊ່ວຍເຮົາໃຫ້ມີສິ່ງຈຳເປັນໃນແຕ່ລະມື້.” ເຖິງວ່າຄອບຄົວນີ້ຈະລຳບາກ ແຕ່ເຂົາເຈົ້າກໍໝັ້ນໃຈຢ່າງເຕັມທີວ່າພະເຢໂຫວາຈະເບິ່ງແຍງເຂົາເຈົ້າໃຫ້ມີສິ່ງຈຳເປັນ. ດັ່ງນັ້ນ ເຂົາເຈົ້າຈຶ່ງເຂົ້າຮ່ວມປະຊຸມແລະປະກາດເປັນປະຈຳ. ເຫັນໄດ້ວ່າເມື່ອເຂົາເຈົ້າໃຫ້ການຮັບໃຊ້ພະເຢໂຫວາເປັນສິ່ງສຳຄັນທີ່ສຸດ ພະເຢໂຫວາກໍໄດ້ຊ່ວຍເຂົາເຈົ້າໃຫ້ມີສິ່ງຈຳເປັນ.
5 ຕະຫຼອດເວລາທີ່ມີຄວາມຫຍຸ້ງຍາກ ມິເກວແລະຢູໄຣເມຍຂອງລາວໄດ້ເຫັນວິທີທີ່ພະເຢໂຫວາເບິ່ງແຍງຄອບຄົວຂອງເຂົາເຈົ້າ. ບາງເທື່ອພະເຢໂຫວາໃຊ້ພີ່ນ້ອງເພື່ອແບ່ງປັນສິ່ງຈຳເປັນແລະຫາວຽກເລັກໆນ້ອຍໆໃຫ້ມິເກວເຮັດ. ແລະໃນໂອກາດອື່ນ ພະເຢໂຫວາໄດ້ຊ່ວຍເຂົາເຈົ້າໃຫ້ມີສິ່ງຈຳເປັນໂດຍທາງສຳນັກງານສາຂາ. ເມື່ອເຫັນວ່າພະເຢໂຫວາບໍ່ເຄີຍປະຖິ້ມເຂົາເຈົ້າ ເຮັດໃຫ້ເຂົາເຈົ້າມີຄວາມເຊື່ອໃນພະເຢໂຫວາຫຼາຍຂຶ້ນ. ໂຮເຊລິນລູກສາວກົກຂອງເຂົາເຈົ້າບອກວ່າ: “ເຮົາໄດ້ຮັບກຳລັງໃຈຫຼາຍທີ່ເຫັນວ່າພະເຢໂຫວາເບິ່ງແຍງເຮົາໃຫ້ມີສິ່ງຈຳເປັນ. ພະເຢໂຫວາເປັນໝູ່ຂ້ອຍ ແລະຂ້ອຍກໍໝັ້ນໃຈວ່າເພິ່ນຈະຊ່ວຍເຫຼືອຂ້ອຍຕະຫຼອດ.” ລາວຍັງເວົ້າຕື່ມອີກວ່າ: “ບັນຫາທີ່ເຮົາອົດທົນໄດ້ໃນຕອນນີ້ ຈະຊ່ວຍເຮົາໃຫ້ພ້ອມທີ່ຈະອົດທົນກັບບັນຫາທີ່ໜັກກວ່າໃນອະນາຄົດໄດ້.”
6. ເຈົ້າຈະເສີມຄວາມເຊື່ອຂອງເຈົ້າໃຫ້ເຂັ້ມແຂງໄດ້ແນວໃດເມື່ອມີບັນຫາດ້ານເສດຖະກິດ?
6 ເຈົ້າກຳລັງມີບັນຫາດ້ານເສດຖະກິດບໍ? ຖ້າແມ່ນ ເຈົ້າກໍຄືຊິມີຊີວິດທີ່ລຳບາກ. ແຕ່ຂໍໃຫ້ໃຊ້ເວລານີ້ເພື່ອຈະເສີມຄວາມເຊື່ອຂອງເຈົ້າໃຫ້ເຂັ້ມແຂງ. ໃຫ້ອະທິດຖານເຖິງພະເຢໂຫວາແລະອ່ານຄຳເວົ້າຂອງພະເຢຊູທີ່ຢູ່ໃນມັດທາຍ 6:25-34 ແລະຄິດຕຶກຕອງສິ່ງທີ່ໄດ້ອ່ານ. ໃຫ້ຄິດເຖິງຕົວຢ່າງຂອງພີ່ນ້ອງໃນທຸກມື້ນີ້ທີ່ສະແດງໃຫ້ເຫັນວ່າ ພະເຢໂຫວາໄດ້ເບິ່ງແຍງເຂົາເຈົ້າໃຫ້ມີສິ່ງຈຳເປັນເມື່ອເຂົາເຈົ້າໃຫ້ການຮັບໃຊ້ຂອງເພິ່ນເປັນສິ່ງສຳຄັນທີ່ສຸດໃນຊີວິດ. (1 ກຣ. 15:58) ຖ້າເຮັດແບບນີ້ ເຈົ້າກໍຈະໝັ້ນໃຈວ່າພະເຢໂຫວາຈະຊ່ວຍເຈົ້າຄືກັບທີ່ເຄີຍຊ່ວຍພີ່ນ້ອງຄົນອື່ນ. ພະເຢໂຫວາຮູ້ວ່າເຈົ້າຕ້ອງການຫຍັງແລະຮູ້ວ່າຈະຊ່ວຍເຈົ້າແນວໃດ. ເມື່ອເຈົ້າເຫັນວ່າພະເຢໂຫວາຊ່ວຍເຫຼືອເຈົ້າຕະຫຼອດ ເຈົ້າກໍຈະມີຄວາມເຊື່ອທີ່ເຂັ້ມແຂງຫຼາຍຂຶ້ນເຊິ່ງຈະເຮັດໃຫ້ເຈົ້າສາມາດອົດທົນກັບບັນຫາທີ່ຈະເກີດຂຶ້ນໃນອະນາຄົດໄດ້.—ຫາບາ. 3:17, 18
ຄວາມເຊື່ອຊ່ວຍໃຫ້ເຮົາອົດທົນກັບ “ພາຍຸໃຫຍ່”
ຄວາມເຊື່ອທີ່ເຂັ້ມແຂງຈະຊ່ວຍເຮົາໃຫ້ຜ່ານພາຍຸໃຫຍ່ໃນຊີວິດ ບໍ່ວ່າຈະເປັນພາຍຸຕາມຕົວອັກສອນຫຼືບັນຫາຕ່າງໆທີ່ເຮົາເຈິ (ເບິ່ງຂໍ້ 7-11)
7. ຕາມມັດທາຍ 8:23-26 ເມື່ອເກີດພາຍຸໃຫຍ່ຂຶ້ນ ຄວາມເຊື່ອຂອງພວກລູກສິດເປັນແນວໃດ?
7 ຕອນທີ່ພະເຢຊູກັບພວກລູກສິດເດີນທາງຢູ່ທະເລ ໄດ້ເກີດມີພາຍຸໃຫຍ່ພັດມາ. ພະເຢຊູເລີຍໃຊ້ເຫດການນີ້ເພື່ອສອນລູກສິດໃຫ້ເຂົ້າໃຈວ່າ ເຂົາເຈົ້າຈຳເປັນຕ້ອງມີຄວາມເຊື່ອຫຼາຍຂຶ້ນ. (ອ່ານມັດທາຍ 8:23-26) ຕອນທີ່ມີລົມແຮງ ຄື້ນໄດ້ຊັດນ້ຳເຂົ້າມາໃນເຮືອຈົນເຮັດໃຫ້ເຮືອເກືອບຈົມ ແຕ່ພະເຢຊູພັດຍັງນອນຫຼັບຢູ່. ພວກລູກສິດຢ້ານຫຼາຍຈຶ່ງໄດ້ໄປປຸກພະເຢຊູແລະຂໍໃຫ້ເພິ່ນຊ່ວຍ. ພະເຢຊູຈຶ່ງໄດ້ບອກເຂົາເຈົ້າວ່າ: “ເປັນຫຍັງພວກເຈົ້າຈຶ່ງຢ້ານ ພວກເຈົ້າຈັ່ງແມ່ນມີຄວາມເຊື່ອໜ້ອຍແທ້ໆ?” ພວກລູກສິດຄວນຈະໝັ້ນໃຈວ່າພະເຢໂຫວາສາມາດປົກປ້ອງເຂົາເຈົ້າກັບພະເຢຊູໄດ້ງ່າຍໆເລີຍ. ເຮົາໄດ້ບົດຮຽນຫຍັງຈາກເລື່ອງນີ້? ຖ້າເຮົາມີຄວາມເຊື່ອເຂັ້ມແຂງ ເຮົາກໍຈະຜ່ານ “ພາຍຸໃຫຍ່” ບໍ່ວ່າຈະເປັນພາຍຸຕາມຕົວອັກສອນຫຼືບັນຫາຕ່າງໆໃນຊີວິດ.
8-9. ອາເນວເຈິກັບບັນຫາຫຍັງ ແລະສິ່ງໃດຊ່ວຍລາວໃຫ້ອົດທົນໄດ້?
8 ໃຫ້ເຮົາມາເບິ່ງປະສົບການຂອງອາເນວພີ່ນ້ອງຍິງໂສດຈາກປອກໂຕຣິໂກທີ່ໄດ້ເຈິກັບບັນຫາໃຫຍ່ເຊິ່ງເຮັດໃຫ້ຄວາມເຊື່ອຂອງລາວເຂັ້ມແຂງຂຶ້ນ. ບັນຫາທີ່ລາວເຈິເປັນພາຍຸໃຫຍ່ແທ້ໆ ເພາະໃນປີ 2017 ພາຍຸເຮີຣິເຄນມາເຣຍໄດ້ສ້າງຄວາມເສຍຫາຍໃຫ້ບ້ານເຮືອນຂອງລາວ ແລະຊ້ຳບໍ່ໜຳລາວຍັງຕົກວຽກອີກ. ອາເນວເວົ້າວ່າ: “ໃນຊ່ວງເວລາທີ່ຫຍຸ້ງຍາກແບບນີ້ ຂ້ອຍໄດ້ໄວ້ໃຈພະເຢໂຫວາໂດຍການອະທິດຖານ ແລະບໍ່ຍອມໃຫ້ຄວາມອຸກໃຈມາເຮັດໃຫ້ຂ້ອຍທໍ້ຈົນບໍ່ຢາກເຮັດຫຍັງເລີຍ.”
9 ອີກສິ່ງໜຶ່ງທີ່ຊ່ວຍອາເນວໄດ້ກໍຄື ການເຊື່ອຟັງ. ລາວບອກວ່າ: “ການເຊື່ອຟັງຄຳແນະນຳຂອງອົງການຊ່ວຍຂ້ອຍໃຫ້ສະຫງົບໃຈໄດ້. ຂ້ອຍເຫັນວ່າພະເຢໂຫວາຊ່ວຍຂ້ອຍໂດຍທາງພີ່ນ້ອງ. ເຂົາເຈົ້າບໍ່ພຽງແຕ່ໃຫ້ກຳລັງໃຈຂ້ອຍ ແຕ່ຍັງໃຫ້ສິ່ງຈຳເປັນກັບຂ້ອຍນຳ.” ລາວເວົ້າຕື່ມວ່າ: “ພະເຢໂຫວາໄດ້ຊ່ວຍເຫຼືອຂ້ອຍຫຼາຍກວ່າທີ່ຂ້ອຍຂໍດ້ວຍຊ້ຳ. ນີ້ເຮັດໃຫ້ຂ້ອຍມີຄວາມເຊື່ອທີ່ເຂັ້ມແຂງຫຼາຍຂຶ້ນ.”
10. ເຮົາຕ້ອງເຮັດຫຍັງຖ້າເຮົາເຈິ “ພາຍຸໃຫຍ່” ໃນຊີວິດ?
10 ເຈົ້າກຳລັງເຈິກັບ “ພາຍຸໃຫຍ່” ໃນຊີວິດບໍ? ເຊິ່ງພາຍຸໃຫຍ່ນັ້ນອາດຈະໝາຍເຖິງໄພທຳມະຊາດຫຼືບັນຫາຮ້າຍແຮງທາງດ້ານສຸຂະພາບທີ່ເຮັດໃຫ້ຮູ້ສຶກທໍ້ໃຈແລະບໍ່ຮູ້ວ່າຈະເຮັດແນວໃດ. ບາງເທື່ອເຈົ້າອາດຈະຮູ້ສຶກອຸກໃຈ ແຕ່ຢ່າໃຫ້ຄວາມອຸກໃຈນັ້ນມາເຮັດໃຫ້ເຈົ້າເຊົາໄວ້ໃຈພະເຢໂຫວາ. ໃຫ້ໃກ້ຊິດກັບພະເຢໂຫວາໂດຍອະທິດຖານເຖິງເພິ່ນ. ໃຫ້ມີຄວາມເຊື່ອເຂັ້ມແຂງໂດຍຄິດຕຶກຕອງເຖິງສິ່ງທີ່ພະເຢໂຫວາເຄີຍຊ່ວຍເຈົ້າມາແລ້ວ. (ເພງ. 77:11, 12) ເມື່ອເຈົ້າເຮັດສິ່ງເຫຼົ່ານີ້ ເຈົ້າກໍຈະໝັ້ນໃຈໄດ້ວ່າພະເຢໂຫວາຈະບໍ່ມີວັນປະຖິ້ມເຈົ້າທັງໃນຕອນນີ້ແລະໃນອະນາຄົດ.
11. ເປັນຫຍັງເຮົາຄວນເຊື່ອຟັງຜູ້ທີ່ນຳໜ້າໃນອົງການ?
11 ມີສິ່ງໃດອີກທີ່ຈະຊ່ວຍເຮົາໃຫ້ອົດທົນກັບບັນຫາຕ່າງໆໄດ້? ຈາກປະສົບການຂອງອາເນວບອກໃຫ້ຮູ້ວ່າສິ່ງທີ່ຈະຊ່ວຍໄດ້ກໍຄື ການເຊື່ອຟັງ. ດັ່ງນັ້ນ ເພື່ອທີ່ເຮົາຈະເຊື່ອຟັງ ເຮົາກໍຕ້ອງຮຽນຮູ້ທີ່ຈະໄວ້ໃຈຜູ້ທີ່ພະເຢໂຫວາແລະພະເຢຊູໄວ້ໃຈ. ເປັນຫຍັງຈຶ່ງເວົ້າແນວນັ້ນ? ເພາະບາງເທື່ອເຮົາອາດຮູ້ສຶກວ່າຄຳແນະນຳຂອງຜູ້ທີ່ນຳໜ້າໃນອົງການບໍ່ສົມເຫດສົມຜົນ ແຕ່ຂໍໃຫ້ຈື່ໄວ້ວ່າພະເຢໂຫວາຈະອວຍພອນຜູ້ທີ່ເຊື່ອຟັງເພິ່ນ. ຈາກເລື່ອງຂອງຄົນໃນຄຳພີໄບເບິນແລະປະສົບການຂອງພີ່ນ້ອງໃນທຸກມື້ນີ້ ກໍສະແດງໃຫ້ເຫັນວ່າການເຊື່ອຟັງຊ່ວຍເຂົາເຈົ້າໃຫ້ລອດຊີວິດ. (ອົບ. 14:1-4; 2 ຂ່າວ. 20:17) ການຄິດຕຶກຕອງກ່ຽວກັບເລື່ອງເຫຼົ່ານີ້ຈະຊ່ວຍເຮົາໃຫ້ຢາກເຮັດຕາມຄຳແນະນຳຈາກອົງການຂອງພະເຢໂຫວາທັງໃນຕອນນີ້ແລະໃນອະນາຄົດ. (ຮຣ. 13:17) ແລ້ວເຮົາກໍຈະບໍ່ຢ້ານຄວາມທຸກລຳບາກຄັ້ງໃຫຍ່ທີ່ໃກ້ຈະມາເຖິງ.—ສຸພາ. 3:25
ຄວາມເຊື່ອຊ່ວຍໃຫ້ອົດທົນກັບຄວາມບໍ່ຍຸຕິທຳ
ການອະທິດຖານເລື້ອຍໆຈະຊ່ວຍໃຫ້ເຮົາມີຄວາມເຊື່ອເຂັ້ມແຂງ (ເບິ່ງຂໍ້ 12)
12. ຕາມລູກາ 18:1-8 ການມີຄວາມເຊື່ອແລະການອົດທົນກັບຄວາມບໍ່ຍຸຕິທຳກ່ຽວຂ້ອງກັນແນວໃດ?
12 ພະເຢຊູຮູ້ວ່າຄວາມບໍ່ຍຸຕິທຳສົ່ງຜົນຕໍ່ຄວາມເຊື່ອຂອງພວກລູກສິດ. ດັ່ງນັ້ນ ເພື່ອຈະຊ່ວຍພວກລູກສິດໃຫ້ມີຄວາມອົດທົນກັບຄວາມບໍ່ຍຸຕິທຳ ພະເຢຊູໄດ້ຍົກຕົວຢ່າງປຽບທຽບເລື່ອງໜຶ່ງຂຶ້ນມາເຊິ່ງບັນທຶກຢູ່ໃນປຶ້ມລູກາ. ພະເຢຊູບອກວ່າ ແມ່ໝ້າຍຄົນໜຶ່ງໄດ້ໄປຮ້ອງຂໍຄວາມຍຸຕິທຳຈາກຜູ້ພິພາກສາທີ່ບໍ່ມີຄວາມຍຸຕິທຳ. ແມ່ໝ້າຍຄົນນີ້ໝັ້ນໃຈວ່າຖ້າລາວອົດທົນພະຍາຍາມຂໍຕໍ່ໆໄປ ຜູ້ພິພາກສາຄົນນີ້ຈະໃຫ້ຄວາມຍຸຕິທຳກັບລາວ. ໃນທີ່ສຸດແມ່ໝ້າຍຄົນນີ້ກໍໄດ້ຮັບຄວາມຍຸຕິທຳ. ເຮົາໄດ້ບົດຮຽນຫຍັງຈາກເລື່ອງນີ້? ເຮົາຮູ້ວ່າພະເຢໂຫວາເປັນພະເຈົ້າທີ່ມີຄວາມຍຸຕິທຳຢູ່ແລ້ວ. ດັ່ງນັ້ນ ພະເຢຊູຈຶ່ງບອກວ່າ: “ພະເຈົ້າຈະໃຫ້ຄວາມຍຸຕິທຳກັບຄົນທີ່ພະອົງເລືອກໄວ້ເມື່ອພວກເຂົາຂໍຄວາມຊ່ວຍເຫຼືອຈາກພະອົງທັງເວັນທັງຄືນ.” (ອ່ານລູກາ 18:1-8) ຈາກນັ້ນເພິ່ນກໍເວົ້າຕື່ມອີກວ່າ “ແຕ່ເມື່ອ ‘ລູກມະນຸດ’ ມາ ເພິ່ນຈະພົບຄົນທີ່ມີຄວາມເຊື່ອແບບນີ້ ໃນໂລກແທ້ໆບໍ?” ດັ່ງນັ້ນ ເມື່ອເຮົາເຈິກັບຄວາມບໍ່ຍຸຕິທຳ ຂໍໃຫ້ເຮົາມີຄວາມເຊື່ອທີ່ເຂັ້ມແຂງຄືກັບແມ່ໝ້າຍຄົນນີ້ໂດຍສະແດງຄວາມອົດທົນແລະເຮັດສິ່ງທີ່ເຮົາເຮັດໄດ້ຕໍ່ໆໄປ ເພາະຖ້າເຮົາເຮັດແບບນີ້ເຮົາກໍໝັ້ນໃຈໄດ້ວ່າ ບໍ່ຊ້າກໍໄວພະເຢໂຫວາຈະຊ່ວຍເຮົາແທ້ໆ. ນອກຈາກນັ້ນ ເຮົາຕ້ອງໝັ້ນໃຈວ່າຄຳອະທິດຖານມີພະລັງຫຼາຍແລະອາດຈະຊ່ວຍເຮົາໃນແບບທີ່ບໍ່ຄາດຄິດ.
13. ຄຳອະທິດຖານຊ່ວຍຄອບຄົວໜຶ່ງແນວໃດເມື່ອເຈິຄວາມບໍ່ຍຸຕິທຳ?
13 ໃຫ້ເຮົາມາເບິ່ງປະສົບການຂອງພີ່ນ້ອງຍິງທີ່ຊື່ເວໂຣເຊິ່ງຢູ່ສາທາລະນະລັດ ປະຊາທິປະໄຕ ກົງໂກ. ໃນຕອນທີ່ສັງຄົມບໍ່ມີຄວາມສະຫງົບ ເວໂຣກັບຜົວທີ່ບໍ່ມີຄວາມເຊື່ອແລະລູກສາວອາຍຸ 15 ປີ ໄດ້ພາກັນປົບໜີຈາກພວກທະຫານກຸ່ມໜຶ່ງທີ່ມາບຸກບ້ານ. ຕອນທີ່ກຳລັງໜີ ເຂົາເຈົ້າກໍໄດ້ເຈິດ່ານທະຫານແລະຖືກພວກທະຫານຂູ່ວ່າຈະຂ້າຖິ້ມ. ໃນຕອນນັ້ນເວໂຣໄດ້ເລີ່ມຮ້ອງໄຫ້ ແຕ່ລູກສາວຂອງລາວກໍໄດ້ປອບໃຈໂດຍອະທິດຖານສຽງດັງແລະເວົ້າຊື່ພະເຢໂຫວາຫຼາຍເທື່ອໃນຄຳອະທິດຖານ. ຫຼັງຈາກທີ່ລາວອະທິດຖານຈົບ ຫົວໜ້າທະຫານກໍໄດ້ຖາມລູກຂອງເວໂຣວ່າ: “ນາງນ້ອຍ ໃຜສອນເຈົ້າໃຫ້ອະທິດຖານແບບນີ້?” ລາວຕອບວ່າ: “ແມ່ເຮົາສອນ ເພິ່ນສອນເຮົາໃຫ້ອະທິດຖານຕາມແບບທີ່ຂຽນໄວ້ຢູ່ໃນມັດທາຍ 6:9-13.” ແລ້ວຫົວໜ້າທະຫານກໍບອກວ່າ: “ໃຫ້ເຈົ້າກັບພໍ່ແມ່ເດີນທາງໄປຕໍ່ຢ່າງປອດໄພ ແລະຂໍໃຫ້ພະເຢໂຫວາພະເຈົ້າຂອງເຈົ້າປົກປ້ອງພວກເຈົ້າເດີ້!”
14. ຄວາມເຊື່ອຂອງເຮົາອາດຖືກທົດສອບແນວໃດ ແລະສິ່ງໃດຊ່ວຍເຮົາໃຫ້ອົດທົນໄດ້?
14 ຈາກປະສົບການກ່ອນໜ້ານີ້ສອນເຮົາໃຫ້ຮູ້ວ່າການອະທິດຖານເປັນສິ່ງທີ່ສຳຄັນຫຼາຍ. ແຕ່ຖ້າຄຳອະທິດຖານຂອງເຈົ້າບໍ່ໄດ້ຮັບຄຳຕອບທັນທີ ຫຼືບໍ່ໄດ້ຕອບໃນແບບທີ່ເຈົ້າຄິດເດ? ຂໍໃຫ້ອະທິດຖານຕໍ່ໆໄປຄືກັບແມ່ໝ້າຍທີ່ຢູ່ໃນຕົວຢ່າງປຽບທຽບຂອງພະເຢຊູ ແລະໝັ້ນໃຈວ່າພະເຢໂຫວາຈະຕອບຄຳອະທິດຖານຂອງເຈົ້າບໍ່ທາງໃດກໍທາງໜຶ່ງ ແລະຕອບໃນເວລາທີ່ເໝາະສົມ. ໃຫ້ຂໍພະລັງບໍລິສຸດກັບພະເຢໂຫວາຕໍ່ໆໄປ. (ຟລປ. 4:13) ຂໍໃຫ້ຈື່ໄວ້ວ່າອີກບໍ່ດົນພະເຢໂຫວາຈະອວຍພອນເຮົາຢ່າງລົ້ນເຫຼືອເຊິ່ງຈະຊ່ວຍເຮົາໃຫ້ລືມຄວາມທຸກທີ່ເຄີຍເຈິ. ແລະເມື່ອເຮົາອົດທົນກັບບັນຫາຕ່າງໆໂດຍເພິ່ງພະເຢໂຫວາ ເຮົາກໍຈະມີຄວາມເຊື່ອທີ່ເຂັ້ມແຂງຫຼາຍຂຶ້ນແລະສາມາດອົດທົນກັບບັນຫາທີ່ຈະເກີດຂຶ້ນໃນອະນາຄົດໄດ້.—1 ປຕ. 1:6, 7
ຄວາມເຊື່ອຊ່ວຍເຮົາໃຫ້ຜ່ານບັນຫາທີ່ຍາກໆໄດ້
15. ຕາມມັດທາຍ 17:19, 20 ພວກລູກສິດຂອງພະເຢຊູມີບັນຫາຫຍັງ?
15 ພະເຢຊູສອນພວກລູກສິດວ່າ ຄວາມເຊື່ອຈະຊ່ວຍເຂົາເຈົ້າໃຫ້ຜ່ານບັນຫາທີ່ຍາກໆໄດ້. (ອ່ານມັດທາຍ 17:19, 20) ມີເທື່ອໜຶ່ງພວກລູກສິດຂັບໄລ່ປີສາດບໍ່ໄດ້ ເຖິງວ່າເຂົາເຈົ້າເຄີຍເຮັດມາແລ້ວ. ບັນຫາແມ່ນຫຍັງ? ພະເຢຊູອະທິບາຍວ່າເຂົາເຈົ້າຕ້ອງມີຄວາມເຊື່ອຫຼາຍກວ່ານີ້. ເພິ່ນຍັງບອກອີກວ່າ ຖ້າເຂົາເຈົ້າມີຄວາມເຊື່ອຫຼາຍພໍ ເຂົາເຈົ້າຈະສາມາດຜ່ານບັນຫາທີ່ຍາກໆທີ່ປຽບຄືກັບພູເຂົາໄດ້. ໃນທຸກມື້ນີ້ຄືກັນ ເຮົາກໍອາດຈະມີບັນຫາທີ່ຍາກໆທີ່ເບິ່ງຄືວ່າຈະຜ່ານມັນໄປບໍ່ໄດ້.
ເຮົາອາດຈະຮູ້ສຶກໂສກເສົ້າເສຍໃຈຫຼາຍ ແຕ່ຄວາມເຊື່ອຈະຊ່ວຍເຮົາໃຫ້ຮັບໃຊ້ພະເຢໂຫວາຕໍ່ໆໄປໄດ້ (ເບິ່ງຂໍ້ 16)
16. ຄວາມເຊື່ອຊ່ວຍເກດີ້ໃຫ້ອົດທົນໄດ້ແນວໃດຫຼັງຈາກທີ່ຜົວຂອງລາວຕາຍ?
16 ໃຫ້ເຮົາມາເບິ່ງປະສົບການຂອງພີ່ນ້ອງຍິງທີ່ຊື່ ເກດີ້ຈາກກົວເຕມາລາ. ເອັດດີ້ຜົວຂອງລາວຖືກຄາດຕະກຳຕອນທີ່ເດີນທາງກັບມາຈາກການປະຊຸມ. ສິ່ງໃດຊ່ວຍເກດີ້ໃຫ້ອົດທົນກັບຄວາມໂສກເສົ້າເສຍໃຈແບບນີ້ໄດ້? ເກດີ້ບອກວ່າ: “ການອະທິດຖານຊ່ວຍຂ້ອຍໃຫ້ຢາກມອບພາລະໄວ້ກັບພະເຢໂຫວາ ເຊິ່ງການເຮັດແບບນີ້ຊ່ວຍໃຫ້ຂ້ອຍຮູ້ສຶກສະຫງົບໃຈ. ຂ້ອຍເຫັນວ່າພະເຢໂຫວາຊ່ວຍຂ້ອຍຜ່ານທາງຄອບຄົວແລະພີ່ນ້ອງໃນປະຊາຄົມ. ການຫຍຸ້ງຢູ່ກັບການຮັບໃຊ້ພະເຢໂຫວາເຮັດໃຫ້ຂ້ອຍບໍ່ເສົ້າໃຈຫຼາຍເກີນໄປ ແລະຊ່ວຍຂ້ອຍບໍ່ໃຫ້ກັງວົນກັບເລື່ອງຂອງມື້ອື່ນ. ຫຼັງຈາກຜ່ານຊ່ວງເວລາທີ່ລຳບາກມາໄດ້ ຂ້ອຍກໍໄດ້ຮຽນຮູ້ວ່າໃນອະນາຄົດ ບໍ່ວ່າຂ້ອຍຈະເຈິຄວາມລຳບາກແບບໃດ ຂ້ອຍກໍຈະຜ່ານມັນໄປໄດ້ດ້ວຍຄວາມຊ່ວຍເຫຼືອຈາກພະເຢໂຫວາ ພະເຢຊູ ແລະອົງການ.”
17. ເຮົາຈະເຮັດຫຍັງໄດ້ແດ່ເມື່ອມີບັນຫາທີ່ຍາກທີ່ເບິ່ງຄືວ່າຈະຜ່ານມັນເປັນໄປບໍ່ໄດ້?
17 ເຈົ້າກຳລັງໂສກເສົ້າຍ້ອນຄົນທີ່ເຈົ້າຮັກຕາຍຈາກໄປບໍ? ຖ້າແມ່ນ ຂໍໃຫ້ໃຊ້ໂອກາດນີ້ເສີມຄວາມເຊື່ອຂອງເຈົ້າໂດຍອ່ານຄຳພີໄບເບິນເລື່ອງຄົນທີ່ຖືກປຸກໃຫ້ຄືນມາຈາກຕາຍ. ການເຮັດແບບນີ້ຈະຊ່ວຍເຈົ້າໃຫ້ໝັ້ນໃຈຫຼາຍຂຶ້ນກ່ຽວກັບຄວາມຫວັງເລື່ອງການຄືນມາຈາກຕາຍ. ຫຼືເຈົ້າກຳລັງເສຍໃຈຍ້ອນຄົນໃນຄອບຄົວຂອງເຈົ້າຖືກຕັດສຳພັນບໍ? ຖ້າເປັນແບບນັ້ນ ຂໍໃຫ້ເຈົ້າສຶກສາຄົ້ນຄວ້າດ້ວຍຕົວເອງຈົນໝັ້ນໃຈວ່າການຕັດສຳພັນເປັນວິທີການສັ່ງສອນທີ່ດີທີ່ສຸດຈາກພະເຢໂຫວາ. ບໍ່ວ່າບັນຫາເຈົ້າຈະເປັນແບບໃດ ຂໍໃຫ້ຖືວ່ານີ້ເປັນໂອກາດທີ່ເຈົ້າຈະເສີມຄວາມເຊື່ອໃຫ້ເຂັ້ມແຂງຫຼາຍຂຶ້ນ. ໃຫ້ອະທິດຖານລະບາຍຄວາມຮູ້ສຶກກັບພະເຢໂຫວາ ໃຫ້ສະໜິດກັບພີ່ນ້ອງສະເໝີ ບໍ່ຄວນແຍກໂຕຢູ່ຜູ້ດຽວ. (ສຸພາ. 18:1) ເຮັດກິດຈະກຳທີ່ຊ່ວຍເຈົ້າໃຫ້ອົດທົນໄດ້ເຖິງວ່າເຈົ້າຍັງຮ້ອງໄຫ້ຢູ່ກໍຕາມ. (ເພງ. 126:5, 6) ໃຫ້ອ່ານຄຳພີໄບເບິນ ໄປປະກາດ ເຂົ້າຮ່ວມປະຊຸມເປັນປະຈຳ ແລະໃຫ້ຄິດເຖິງລາງວັນທີ່ພະເຢໂຫວາຈະໃຫ້ໃນອະນາຄົດ. ເມື່ອເຈົ້າເຫັນວ່າພະເຢໂຫວາໄດ້ຊ່ວຍເຫຼືອເຈົ້າແນວໃດ ຄວາມເຊື່ອຂອງເຈົ້າກໍຈະເຂັ້ມແຂງຂຶ້ນເລື້ອຍໆ.
“ຂໍຊ່ວຍພວກເຮົາໃຫ້ມີຄວາມເຊື່ອຫຼາຍຂຶ້ນແດ່”
18. ເຈົ້າຈະເຮັດແນວໃດຖ້າສັງເກດເຫັນວ່າຄວາມເຊື່ອຂອງເຈົ້າຍັງບໍ່ເຂັ້ມແຂງພໍ?
18 ຖ້າເຈົ້າສັງເກດວ່າບັນຫາທີ່ເຈົ້າເຈິທັງໃນຕອນນີ້ແລະໃນອະດີດເຮັດໃຫ້ເຈົ້າຮູ້ສຶກວ່າຄວາມເຊື່ອຂອງເຈົ້າຍັງບໍ່ເຂັ້ມແຂງພໍ ຂໍຢ່າຟ້າວທໍ້ໃຈ. ແຕ່ໃຫ້ຖືວ່ານີ້ເປັນໂອກາດທີ່ຈະເສີມຄວາມເຊື່ອໃຫ້ເຂັ້ມແຂງຂຶ້ນໂດຍເຮັດຄືກັບພວກລູກສິດຂອງພະເຢຊູທີ່ບອກວ່າ “ຂໍຊ່ວຍພວກເຮົາໃຫ້ມີຄວາມເຊື່ອຫຼາຍຂຶ້ນແດ່.” (ລກ. 17:5) ນອກຈາກນັ້ນ ໃຫ້ຄິດເຖິງປະສົບການຕ່າງໆທີ່ເວົ້າເຖິງໃນບົດຄວາມນີ້ ເຊັ່ນ: ເລື່ອງຂອງມິເກວແລະຢູໄຣຊ່ວຍເຮົາໃຫ້ຈື່ໄວ້ສະເໝີວ່າພະເຢໂຫວາຈະໃຫ້ເຮົາມີສິ່ງຈຳເປັນ. ເລື່ອງຂອງພີ່ນ້ອງອາເນວແລະລູກສາວຂອງເວໂຣຊ່ວຍເຮົາໃຫ້ຈື່ວ່າເຮົາຕ້ອງອະທິດຖານເຖິງພະເຢໂຫວາເລື້ອຍໆ ໂດຍສະເພາະຕອນທີ່ເຮົາເຈິບັນຫາທີ່ຍາກໆ. ແລະເລື່ອງຂອງເກດີ້ຊ່ວຍເຮົາໃຫ້ຈື່ວ່າພະເຢໂຫວາອາດຈະຊ່ວຍເຫຼືອເຮົາຜ່ານທາງຄອບຄົວແລະພີ່ນ້ອງໃນປະຊາຄົມ. ເມື່ອເຮົາໝາຍເພິ່ງພະເຢໂຫວາໃຫ້ຊ່ວຍເຮົາອົດທົນກັບບັນຫາໃນຕອນນີ້ ເຮົາກໍຈະໝັ້ນໃຈຫຼາຍຂຶ້ນວ່າເພິ່ນຈະຊ່ວຍເຮົາໃຫ້ອົດທົນກັບບັນຫາທີ່ຈະເກີດຂຶ້ນໃນອະນາຄົດໄດ້.
19. ພະເຢຊູໝັ້ນໃຈໃນເລື່ອງຫຍັງ? ແລະເຈົ້າເດໝັ້ນໃຈໃນເລື່ອງຫຍັງ?
19 ພະເຢຊູຊ່ວຍພວກລູກສິດໃຫ້ເຫັນວ່າເຂົາເຈົ້າຕ້ອງມີຄວາມເຊື່ອຫຼາຍຂຶ້ນໃນເລື່ອງຫຍັງແດ່ ແຕ່ພະເຢຊູກໍຮູ້ວ່າພະເຢໂຫວາຈະຊ່ວຍເຂົາເຈົ້າໃຫ້ລອດຜ່ານບັນຫາທີ່ຈະເກີດຂຶ້ນໃນອະນາຄົດໄດ້. (ຢຮ. 14:1; 16:33) ແລະເພິ່ນຍັງໝັ້ນໃຈວ່າຄົນຝູງໃຫຍ່ຈະລອດຜ່ານຄວາມທຸກລຳບາກຄັ້ງໃຫຍ່ໄດ້ ຖ້າເຂົາເຈົ້າມີຄວາມເຊື່ອທີ່ເຂັ້ມແຂງ. (ພນມ. 7:9, 14) ແລ້ວເຈົ້າຈະໄດ້ຢູ່ໃນກຸ່ມທີ່ລອດຜ່ານເຫດການນັ້ນບໍ? ເຈົ້າຈະເປັນໜຶ່ງໃນນັ້ນແທ້ ເພາະພະເຢໂຫວາຈະຊ່ວຍເຈົ້າຖ້າເຈົ້າເຮັດທຸກຢ່າງທີ່ເຮັດໄດ້ເພື່ອເສີມຄວາມເຊື່ອໃຫ້ເຂັ້ມແຂງຕັ້ງແຕ່ຕອນນີ້.—ຮຣ. 10:39
ເພງ 118 “ຂໍຊ່ວຍໃຫ້ພວກເຮົາມີຄວາມເຊື່ອຫຼາຍຂຶ້ນ”
^ ຂໍ້ 5 ເຮົາຢາກຈະໃຫ້ຈຸດຈົບຂອງລະບົບນີ້ມາຮອດໄວໆ. ແຕ່ເຮົາອາດສົງໄສວ່າ ເຮົາຈະມີຄວາມເຊື່ອເຂັ້ມແຂງພໍທີ່ຈະຜ່ານບັນຫາຕ່າງໆໄປໄດ້ບໍເມື່ອມື້ນັ້ນມາຮອດ. ໃນບົດຄວາມນີ້ ເຮົາຈະມາເບິ່ງບົດຮຽນແລະປະສົບການຕ່າງໆທີ່ຈະຊ່ວຍເຮົາໃຫ້ມີຄວາມເຊື່ອເຂັ້ມແຂງ.
