ບົດຄວາມສຶກສາທີ 46
ຄູ່ທີ່ຫາກໍແຕ່ງດອງໃໝ່ ຂໍໃຫ້ເອົາວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ
“ພະເຢໂຫວາເປັນກຳລັງ . . . ຂ້ອຍວາງໃຈພະອົງ.”—ເພງ. 28:7, ລ.ມ.
ເພງ 131 ພະເຈົ້າໄດ້ເຮັດໃຫ້ຜູກພັນກັນແລ້ວ
ໃຈຄວາມສຳຄັນ *
1-2. (ກ) ເປັນຫຍັງຄູ່ທີ່ຫາກໍແຕ່ງດອງໃໝ່ຄວນຈະເຮັດຕາມຄຳແນະນຳຂອງພະເຢໂຫວາ? (ຄຳເພງ 37:3, 4) (ຂ) ເຮົາຈະຮຽນຫຍັງໃນບົດຄວາມນີ້?
ເຈົ້າຫາກໍແຕ່ງດອງບໍຫຼືກຳລັງຊິແຕ່ງດອງ? ຖ້າແມ່ນ ເຈົ້າຄືຊິດີໃຈທີ່ຈະໄດ້ມີຄວາມສຸກກັບຄົນທີ່ເຈົ້າຮັກ. ແຕ່ໃນຕົວຈິງແລ້ວ ຊີວິດຄູ່ກໍອາດຈະເຈິສິ່ງທີ່ທ້າທາຍບາງຢ່າງ ແລະຕ້ອງໄດ້ຕັດສິນໃຈເລື່ອງທີ່ສຳຄັນຫຼາຍຢ່າງເຊິ່ງການຕັດສິນໃຈນັ້ນກໍຈະສົ່ງຜົນຕໍ່ຊີວິດຄູ່ຂອງເຈົ້າໄປອີກດົນ. ຖ້າເຈົ້າເຮັດຕາມຄຳແນະນຳຂອງພະເຢໂຫວາ ເຈົ້າກໍຈະຕັດສິນໃຈໄດ້ຢ່າງຖືກຕ້ອງ ໃກ້ຊິດກັບຄູ່ຂອງເຈົ້າຫຼາຍຂຶ້ນ ແລະມີຄວາມສຸກຫຼາຍຂຶ້ນ. ແຕ່ຖ້າເຈົ້າບໍ່ໄດ້ເຮັດຕາມຄຳແນະນຳຂອງເພິ່ນ ເຈົ້າກໍອາດຈະມີບັນຫາໃນຊີວິດຄູ່ເຊິ່ງຈະເຮັດໃຫ້ເຈົ້າບໍ່ມີຄວາມສຸກ.—ອ່ານຄຳເພງ 37:3, 4
2 ເຖິງວ່າບົດຄວາມນີ້ຈະຂຽນເພື່ອຄົນທີ່ຫາກໍແຕ່ງດອງໃໝ່ໆ ແຕ່ໃນບົດນີ້ກໍຍັງຈະເວົ້າເຖິງບາງບັນຫາທີ່ທຸກຄູ່ອາດຈະເຈິຄືກັນ. ໃນບົດນີ້ເຮົາຈະມາເບິ່ງວ່າ ເຮົາໄດ້ບົດຮຽນຫຍັງຈາກຕົວຢ່າງຂອງຊາຍຍິງທີ່ສັດຊື່ໃນຄຳພີໄບເບິນ ແລະຕົວຢ່າງຂອງເຂົາເຈົ້າຈະສອນບົດຮຽນໃຫ້ເຮົາໃນຫຼາຍແງ່ມຸມຂອງຊີວິດເຊິ່ງລວມເຖິງຊີວິດແຕ່ງດອງນຳ. ແລະເຮົາຍັງຈະມາເບິ່ງວ່າ ເຮົາຈະໄດ້ບົດຮຽນຫຍັງຈາກປະສົບການຂອງບາງຄູ່ໃນທຸກມື້ນີ້.
ຜູ້ທີ່ຫາກໍແຕ່ງດອງໃໝ່ອາດເຈິຂໍ້ທ້າທາຍຫຍັງແດ່?
3-4. ຄູ່ທີ່ຫາກໍແຕ່ງດອງໃໝ່ອາດເຈິຂໍ້ທ້າທາຍຫຍັງແດ່?
3 ຄູ່ທີ່ຫາກໍແຕ່ງດອງໃໝ່ອາດຖືກກົດດັນໃຫ້ໃຊ້ຊີວິດຄືກັບຄົນທົ່ວໄປ. ຕົວຢ່າງເຊັ່ນ: ພໍ່ແມ່ຫຼືຍາດພີ່ນ້ອງອາດຈະກົດດັນໃຫ້ເຂົາເຈົ້າມີລູກ ຫຼືໝູ່
ຄູ່ອາດຈະກົດດັນໃຫ້ເຂົາເຈົ້າມີເຮືອນຫຼັງໃຫຍ່ໆ ມີເຄື່ອງງາມໆ ແລະສິ່ງຂອງຫຼາຍຢ່າງເພື່ອເຮັດໃຫ້ຊີວິດສະດວກສະບາຍ.4 ຖ້າບໍ່ລະວັງ ຄູ່ທີ່ຫາກໍແຕ່ງດອງໃໝ່ອາດຈະເຮັດຕາມທີ່ພໍ່ແມ່ແລະໝູ່ຄູ່ບອກເຊິ່ງຈະເຮັດໃຫ້ເຂົາເຈົ້າມີໜີ້ສິນ. ເຂົາເຈົ້າຕ້ອງເຮັດວຽກຫຼາຍຂຶ້ນເພື່ອຈະໃຊ້ໜີ້ ເຊິ່ງການເຮັດແບບນີ້ຈະເຮັດໃຫ້ເຂົາເຈົ້າບໍ່ມີເວລາສຶກສາສ່ວນຕົວ ນະມັດສະການຄອບຄົວ ແລະເຮັດວຽກປະກາດ. ເຂົາເຈົ້າອາດເຖິງຂັ້ນຂາດປະຊຸມຍ້ອນເຮັດວຽກລ່ວງເວລາເພື່ອຈະໄດ້ເງິນຫຼາຍຂຶ້ນຫຼືເພື່ອຈະມີວຽກເຮັດຕໍ່ໄປ. ສິ່ງເຫຼົ່ານີ້ຈະເຮັດໃຫ້ເຂົາເຈົ້າບໍ່ມີໂອກາດຮັບໃຊ້ພະເຢໂຫວາຫຼາຍຂຶ້ນ.
5. ເຮົາໄດ້ບົດຮຽນຫຍັງຈາກປະສົບການຂອງຄຼາວສ໌ກັບມາຣິຊາ?
5 ຕາມປະສົບການຂອງຫຼາຍຄົນສະແດງໃຫ້ເຫັນວ່າ ການໝົກມຸ້ນກັບການຫາວັດຖຸສິ່ງຂອງ ບໍ່ໄດ້ເຮັດໃຫ້ເຮົາມີຄວາມສຸກແທ້. ເລື່ອງນີ້ເກີດຂຶ້ນກັບຜົວເມຍຄູ່ໜຶ່ງທີ່ຊື່ຄຼາວສ໌ກັບມາຣິຊາ. * ຕອນທີ່ແຕ່ງດອງໃໝ່ໆ ເຂົາເຈົ້າທັງສອງໄດ້ເຮັດວຽກຫຼາຍຊົ່ວໂມງເພື່ອຈະມີຊີວິດທີ່ສະດວກສະບາຍ. ແຕ່ເລິກໆແລ້ວເຂົາເຈົ້າບໍ່ໄດ້ມີຄວາມສຸກເລີຍ. ຄຼາວສ໌ບອກວ່າ: “ເຮົາມີສິ່ງຂອງຫຼາຍເກີນຄວາມຈຳເປັນ ແຕ່ພັດບໍ່ມີເປົ້າໝາຍໃນການຮັບໃຊ້ພະເຢໂຫວາເລີຍ. ນີ້ເຮັດໃຫ້ຊີວິດເຮົາມີແຕ່ຄວາມເຄັ່ງຕຶງແລະບໍ່ມີຄວາມສຸກ.” ບາງທີເຈົ້າກໍອາດຈະເຫັນຄືກັນວ່າການໝົກມຸ້ນຢູ່ກັບວັດຖຸສິ່ງຂອງບໍ່ໄດ້ເຮັດໃຫ້ມີຄວາມສຸກແທ້. ແຕ່ຖ້າເຈົ້າກຳລັງເປັນແບບນີ້ ກໍຢ່າຟ້າວທໍ້ໃຈ ເພາະມີຕົວຢ່າງທີ່ດີຂອງຄົນອື່ນທີ່ຊ່ວຍເຈົ້າໄດ້. ຕອນນີ້ໃຫ້ເຮົາມາເບິ່ງວ່າຜູ້ເປັນຜົວຈະໄດ້ບົດຮຽນຫຍັງຈາກເລື່ອງຂອງກະສັດເຢໂຮຊາຟັດ.
ໄວ້ໃຈພະເຢໂຫວາຄືກັບກະສັດເຢໂຮຊາຟັດ
6. ເມື່ອມີກອງທັບໃຫຍ່ມາໂຈມຕີ ກະສັດເຢໂຮຊາຟັດໄດ້ເຮັດຕາມຄຳແນະນຳໃນສຸພາສິດ 3:5, 6 ແນວໃດ?
6 ຜູ້ເປັນຜົວ ເຈົ້າຮູ້ສຶກອຸກໃຈກັບໜ້າທີ່ຮັບຜິດຊອບຂອງເຈົ້າບໍ? ຖ້າເປັນແບບນັ້ນ ເຈົ້າກໍຈະໄດ້ຮັບປະໂຫຍດຈາກຕົວຢ່າງຂອງເຢໂຮຊາຟັດ ເພາະເຢໂຮຊາຟັດກໍມີໜ້າທີ່ຮັບຜິດຊອບຫຼາຍຢ່າງຄືກັນ. ລາວບໍ່ໄດ້ເບິ່ງແຍງແຕ່ຄອບຄົວຂອງຕົວເອງ ແຕ່ລາວຕ້ອງເບິ່ງແຍງປະຊາຊົນທຸກຄົນນຳ. ລາວໄດ້ເຮັດຫຍັງແດ່? ລາວໄດ້ເຮັດຫຼາຍຢ່າງເພື່ອປົກປ້ອງປະຊາຊົນ ເຊັ່ນ: ລາວໄດ້ສ້າງປ້ອມປາການຢູ່ເມືອງຕ່າງໆຂອງຢູດາ ແລະລວບລວມກອງກຳລັງທະຫານຫຼາຍກວ່າ 1.160.000 ຄົນ. (2 ຂ່າວ. 17:12-19) ຈາກນັ້ນ ກະສັດເຢໂຮຊາຟັດກໍເຈິບັນຫາທີ່ໜັກໜ່ວງ ເພາະມີກອງທັບໃຫຍ່ຂອງຊາວອາມໂມນ ໂມອາບ ແລະຄົນຈາກພູເຊອີຣມາໂຈມຕີລາວ. (2 ຂ່າວ. 20:1, 2) ແລ້ວລາວເຮັດແນວໃດ? ລາວໄດ້ອະທິດຖານຂໍຄວາມຊ່ວຍເຫຼືອຈາກພະເຢໂຫວາ ເຊິ່ງສິ່ງທີ່ລາວເຮັດກໍສອດຄ່ອງກັບສຸພາສິດ 3:5, 6 (ອ່ານ). ຄຳອະທິດຖານຂອງລາວທີ່ຢູ່ໃນ 2 ຂ່າວຄາວ 20:5-12 ສະແດງໃຫ້ ເຫັນວ່າລາວໄວ້ໃຈພະເຢໂຫວາຫຼາຍແທ້ໆ. ແລ້ວພະເຢໂຫວາຕອບຄຳອະທິດຖານຂອງລາວແນວໃດ?
7. ພະເຢໂຫວາໄດ້ຕອບຄຳອະທິດຖານຂອງເຢໂຮຊາຟັດແນວໃດ?
7 ພະເຢໂຫວາໄດ້ຕອບຄຳອະທິດຖານຂອງເຢໂຮຊາຟັດຜ່ານທາງຄົນເລວີຜູ້ໜຶ່ງທີ່ຊື່ ຢາຄາຊຽນ. ພະເຢໂຫວາບອກວ່າ: “ໃຫ້ເຂົ້າປະຈຳທີ່ ຢືນຊື່ໆ ແລ້ວເບິ່ງພະເຢໂຫວາຊ່ວຍພວກເຈົ້າໃຫ້ລອດ.” (2 ຂ່າວ. 20:13-17, ລ.ມ.) ເບິ່ງຄືວ່ານີ້ເປັນວິທີສູ້ຮົບທີ່ແປກໆ! ແຕ່ນີ້ເປັນສິ່ງທີ່ພະເຢໂຫວາບອກ ບໍ່ແມ່ນມະນຸດບອກ. ເຢໂຮຊາຟັດກໍໄວ້ໃຈພະເຢໂຫວາເຕັມທີ ແລະເຮັດຕາມທີ່ເພິ່ນບອກທຸກຢ່າງ. ເມື່ອເຢໂຮຊາຟັດແລະປະຊາຊົນອອກໄປສູ້ຮົບ ລາວໄດ້ໃຫ້ນັກຮ້ອງມາຢູ່ດ້ານໜ້າແທນທີ່ຈະເປັນນັກຮົບທີ່ເກັ່ງກ້າ. ແລ້ວພະເຢໂຫວາກໍໄດ້ຊ່ວຍເຢໂຮຊາຟັດແທ້ໆໂດຍທຳລາຍສັດຕູທີ່ມາໂຈມຕີລາວ.—2 ຂ່າວ. 20:18-23
8. ຜູ້ເປັນຜົວໄດ້ຮຽນຫຍັງຈາກເລື່ອງຂອງເຢໂຮຊາຟັດ?
8 ຜູ້ເປັນຜົວ ເຈົ້າໄດ້ບົດຮຽນຫຍັງແດ່ຈາກເລື່ອງຂອງເຢໂຮຊາຟັດ? ເຈົ້າມີໜ້າທີ່ຮັບຜິດຊອບຫຼາຍຢ່າງເພື່ອຈະເບິ່ງແຍງແລະປົກປ້ອງຄອບຄົວ. ດັ່ງນັ້ນ ເມື່ອມີບັນຫາເຈົ້າອາດຈະຄິດວ່າສາມາດແກ້ໄຂບັນຫາດ້ວຍຕົວເອງໄດ້. ແຕ່ຂໍຢ່າຄິດແບບນັ້ນ. ຂໍໃຫ້ເຈົ້າອະທິດຖານຂໍຄວາມຊ່ວຍເຫຼືອຈາກພະເຢໂຫວາເປັນສ່ວນຕົວແລະໃຫ້ອະທິດຖານກັບເມຍນຳ. ຈາກນັ້ນ ໃຫ້ຂໍແນະນຳຈາກພະເຢໂຫວາໂດຍສຶກສາຄຳພີໄບເບິນ ປຶ້ມຕ່າງໆຂອງອົງການ ແລະເຮັດຕາມຄຳແນະນຳນັ້ນ. ຄົນອື່ນອາດຈະບໍ່ມັກທີ່ເຈົ້າຕັດສິນໃຈແບບນີ້ ແລະເຖິງຂັ້ນບອກວ່າເຈົ້າບໍ່ສະຫຼາດເພາະເຂົາເຈົ້າຄິດວ່າການມີເງິນແລະສິ່ງຂອງຫຼາຍໆຈະຊ່ວຍປົກປ້ອງຄອບຄົວໄດ້. ແຕ່ຂໍໃຫ້ເຈົ້າຈື່ເລື່ອງຂອງເຢໂຮຊາຟັດ ລາວໄວ້ໃຈພະເຢໂຫວາແລະເຮັດຕາມທີ່ເພິ່ນບອກ. ພະເຢໂຫວາຈະບໍ່ປະຖິ້ມຜູ້ທີ່ໄວ້ໃຈເພິ່ນ ແລ້ວເພິ່ນກໍຈະບໍ່ປະຖິ້ມເຈົ້າຄືກັນ. (ເພງ. 37:28; ຮຣ. 13:5) ຄູ່ຜົວເມຍ ຍັງຕ້ອງເຮັດຫຍັງອີກເພື່ອຈະມີຊີວິດທີ່ມີຄວາມສຸກ?
ໃຫ້ວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດຄືກັບເອຊາຢາແລະເມຍ
9. ຜູ້ພະຍາກອນເອຊາຢາກັບເມຍໃຊ້ຊີວິດແນວໃດ?
9 ຜູ້ພະຍາກອນເອຊາຢາແລະເມຍໃຫ້ວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ. ເອຊາຢາເປັນຜູ້ພະຍາກອນຂອງພະເຢໂຫວາ ແລະເມຍຂອງລາວກໍອາດຈະເປັນຜູ້ພະຍາກອນຄືກັນເພາະຄຳພີໄບເບິນເອີ້ນລາວວ່າ “ຜູ້ພະຍາກອນຍິງ.” (ເອຊາ. 8:1-4, ລ.ມ.) ເອຊາຢາແລະເມຍເປັນຕົວຢ່າງທີ່ດີໃຫ້ກັບຄູ່ຜົວເມຍໃນທຸກມື້ນີ້ເພາະເຂົາເຈົ້າໃຫ້ວຽກຮັບໃຊ້ພະເຢໂຫວາສຳຄັນທີ່ສຸດໃນຊີວິດ.
10. ການສຶກສາຄຳພະຍາກອນໃນຄຳພີໄບເບິນຈະຊ່ວຍຄູ່ຜົວເມຍໃຫ້ຢາກຮັບໃຊ້ພະເຢໂຫວາຫຼາຍຂຶ້ນໄດ້ແນວໃດ?
10 ຄູ່ຜົວເມຍໃນທຸກມື້ນີ້ສາມາດຮຽນແບບເອຊາຢາກັບເມຍໂດຍໃຫ້ວຽກຮັບໃຊ້ພະເຢໂຫວາເປັນສິ່ງສຳຄັນທີ່ສຸດໃນຊີວິດ. ແຕ່ເພື່ອຈະເຮັດແບບນັ້ນໄດ້ ເຂົາເຈົ້າຕ້ອງໄວ້ໃຈພະເຢໂຫວາໂດຍສຶກສາຄຳພະຍາກອນໃນຄຳພີໄບເບິນນຳກັນແລະເບິ່ງວ່າມັນເກີດຂຶ້ນແທ້ແນວໃດ. ເຂົາເຈົ້າອາດຈະຄິດເຖິງສິ່ງທີ່ເຮັດໄດ້ເພື່ອເຮັດໃຫ້ຄຳພະຍາກອນໃນຄຳພີໄບເບິນສຳເລັດເປັນຈິງ. * (ຕຕ. 1:2) ຕົວຢ່າງເຊັ່ນ: ເຂົາເຈົ້າອາດຈະມີສ່ວນຮ່ວມໃນຄຳພະຍາກອນຂອງພະເຢຊູທີ່ບອກວ່າ ຈະມີການປະກາດຂ່າວດີໄປທົ່ວໂລກກ່ອນທີ່ຈຸດຈົບຈະມາເຖິງ. (ມທ. 24:14) ເມື່ອເຂົາເຈົ້າເຫັນວ່າຄຳພະຍາກອນໃນຄຳພີໄບເບິນກຳລັງເກີດຂຶ້ນແທ້ແນວໃດ ເຂົາເຈົ້າກໍແຮ່ງຈະຢາກຮັບໃຊ້ພະເຢໂຫວາຫຼາຍຂຶ້ນ.
ໃຫ້ການປົກຄອງຂອງພະເຈົ້າມາກ່ອນຄືກັບປີຊະກີລາແລະອາກີລາ
11. ປີຊະກີລາກັບອາກີລາມີຊີວິດແບບໃດແລະຍ້ອນຫຍັງ?
11 ຄູ່ຜົວເມຍທີ່ຍັງໜຸ່ມຈະໄດ້ຮັບປະໂຫຍດຈາກເລື່ອງຂອງປີຊະກີລາແລະອາກີລາເຊິ່ງເປັນຄົນຢິວທີ່ຢູ່ເມືອງໂຣມ. ເມື່ອປີຊະກີລາກັບອາກີລາໄດ້ຍິນຂ່າວດີກ່ຽວກັບພະເຢຊູ ເຂົາເຈົ້າກໍເຂົ້າມາເປັນຄລິດສະຕຽນ. ຕອນທີ່ຢູ່ໂຣມ ເຂົາເຈົ້າມີຊີວິດທີ່ດີ. ແຕ່ຊີວິດເຂົາເຈົ້າກໍປ່ຽນໄປກະທັນຫັນເມື່ອຈັກກະພັດກະລາວດີໂອໄດ້ສັ່ງຄົນຢິວໃຫ້ອອກຈາກໂຣມ. ເຂົາເຈົ້າຕ້ອງອອກຈາກບ່ອນທີ່ລຶ້ງເຄີຍ ໄປປຸກເຮືອນໃໝ່ ແລະເຮັດວຽກຫຍິບເຕັ້ນຢູ່ບ່ອນໃໝ່. ແຕ່ສິ່ງເຫຼົ່ານີ້ເຮັດໃຫ້ເຂົາເຈົ້າຮັບໃຊ້ພະເຢໂຫວາໜ້ອຍລົງບໍ? ບໍ່ ເພາະຕອນທີ່ເຂົາເຈົ້າຢູ່ເມືອງໂກຣິນໂທ ເຂົາເຈົ້າໄດ້ຊ່ວຍພີ່ນ້ອງໃນປະຊາຄົມແລະເຮັດວຽກຮ່ວມກັບອັກຄະສາວົກໂປໂລ. ຕໍ່ມາ ເຂົາເຈົ້າກໍໄດ້ຍ້າຍໄປຮັບໃຊ້ຢູ່ເຂດໃໝ່ທີ່ຈຳເປັນຫຼາຍກວ່າ. (ກຈກ. 18:18-21; ຣມ. 16:3-5) ເຖິງເຂົາເຈົ້າຈະຫຍຸ້ງກັບວຽກຮັບໃຊ້ພະເຢໂຫວາ ແຕ່ເຂົາເຈົ້າກໍມີຊີວິດທີ່ມີຄວາມສຸກຫຼາຍ.
12. ເປັນຫຍັງຄູ່ຜົວເມຍຄວນຕັ້ງເປົ້າໝາຍໃນການຮັບໃຊ້ພະເຢໂຫວາ?
12 ຄູ່ຜົວເມຍໃນທຸກມື້ນີ້ສາມາດຮຽນແບບປີຊະກີລາກັບອາກີລາໂດຍໃຫ້ການປົກຄອງຂອງພະເຈົ້າມາກ່ອນ. ແຕ່ເພື່ອຈະເຮັດແບບນັ້ນໄດ້ ເປັນເລື່ອງດີທີ່ຈະລົມເລື່ອງເປົ້າໝາຍໃນການຮັບໃຊ້ພະເຢໂຫວາກ່ອນຈະແຕ່ງດອງ. ເພາະເມື່ອຕ້ອງຕັດສິນໃຈເລື່ອງອື່ນ ເຂົາເຈົ້າຈະໄດ້ພະຍາຍາມເຮັດຕາມເປົ້າໝາຍໄດ້ ແລະມີໂອກາດໄດ້ເຫັນວິທີທີ່ພະເຢໂຫວາຊ່ວຍເຫຼືອເຂົາເຈົ້າ. (ຜູ້ປ. 4:9, 12) ຄືກັບປະສົບການຂອງຣັດເຊວແລະເອລີຊາເບັດ. ຣັດເຊວບອກວ່າ: “ກ່ອນແຕ່ງດອງ ພວກເຮົາໄດ້ລົມກັນຢ່າງຈິງຈັງກ່ຽວກັບເປົ້າໝາຍໃນການຮັບໃຊ້ພະເຢໂຫວາ.” ເອລີຊາເບັດບອກວ່າ: “ການລົມກັນແບບນີ້ໄດ້ຊ່ວຍເຮົາໃຫ້ຍັງເຮັດຕາມເປົ້າໝາຍໄດ້ເມື່ອຕ້ອງຕັດສິນໃຈເລື່ອງອື່ນ.” ໃນທີ່ສຸດ ຣັດເຊວກັບເອລີຊາເບັດກໍສາມາດຍ້າຍໄປຮັບໃຊ້ຢູ່ໄມໂຄນີເຊຍເຊິ່ງເປັນບ່ອນທີ່ຕ້ອງການຜູ້ປະກາດຫຼາຍກວ່າ.
13. ຕາມຄຳເພງ 28:7 ຈະເປັນແນວໃດເມື່ອເຮົາໄວ້ໃຈພະເຢໂຫວາ?
13 ຄືກັບຣັດເຊວແລະເອລີຊາເບັດ ພີ່ນ້ອງຫຼາຍຄົນຄຳເພງ 28:7
ໃນທຸກມື້ນີ້ກໍໄດ້ໃຊ້ຊີວິດແບບພໍພຽງເພື່ອຈະເຮັດວຽກປະກາດແລະສອນຄົນອື່ນໄດ້ຫຼາຍຂຶ້ນ. ເມື່ອຄູ່ຜົວເມຍໄດ້ຕັ້ງເປົ້າໝາຍໃນການຮັບໃຊ້ພະເຢໂຫວາແລະພະຍາຍາມເຮັດຕາມນັ້ນ ເຂົາເຈົ້າກໍຈະໄດ້ຮັບພອນຫຼາຍຢ່າງ. ເຂົາເຈົ້າຈະເຫັນວ່າພະເຢໂຫວາເບິ່ງແຍງເຂົາເຈົ້າແນວໃດ ເຂົາເຈົ້າຈະໄວ້ໃຈພະເຢໂຫວາຫຼາຍຂຶ້ນແລະມີຄວາມສຸກແທ້.—ອ່ານໃຫ້ໝັ້ນໃຈໃນຄຳສັນຍາຂອງພະເຢໂຫວາຄືກັບເປໂຕແລະເມຍ
14. ອັກຄະສາວົກເປໂຕກັບເມຍສະແດງໃຫ້ເຫັນແນວໃດວ່າ ເຂົາເຈົ້າໝັ້ນໃຈຄຳສັນຍາທີ່ຢູ່ໃນມັດທາຍ 6:25, 31-34?
14 ຄູ່ຜົວເມຍຍັງຈະໄດ້ບົດຮຽນຈາກເລື່ອງຂອງເປໂຕກັບເມຍຄືກັນ. ຫຼັງຈາກທີ່ເປໂຕໄດ້ເຈິພະເຢຊູປະມານຫົກເດືອນຫາໜຶ່ງປີ ລາວກໍໄດ້ຕັດສິນໃຈເລື່ອງທີ່ສຳຄັນ. ເປໂຕເຮັດທຸລະກິດຫາປາເພື່ອເບິ່ງແຍງຄອບຄົວ. (ລກ. 5:1-11) ແຕ່ເມື່ອພະເຢຊູຊວນລາວໃຫ້ໄປປະກາດກັບເພິ່ນ ລາວຕ້ອງໄດ້ຄິດເຖິງສະພາບການຄອບຄົວຂອງຕົວເອງ. ແລ້ວເປໂຕກໍເລືອກທີ່ຈະໄປປະກາດກັບພະເຢຊູ. ລາວເລືອກຖືກແລ້ວແລະເມຍລາວກໍຄືຊິເຫັນດີນຳ ເພາະຄຳພີໄບເບິນບອກວ່າຫຼັງຈາກທີ່ພະເຢຊູຄືນມາຈາກຕາຍ ເມຍລາວກໍໄດ້ຮ່ວມເດີນທາງໄປນຳລາວບາງເທື່ອ. (1 ກຣ. 9:5) ຍ້ອນເມຍລາວເປັນຕົວຢ່າງທີ່ດີ ລາວຈຶ່ງກ້າໃຫ້ຄຳແນະນຳພີ່ນ້ອງຄົນອື່ນໃນເລື່ອງຜົວເມຍ. (1 ປຕ. 3:1-7) ເປໂຕກັບເມຍໝັ້ນໃຈໃນຄຳສັນຍາຂອງພະເຢໂຫວາທີ່ບອກວ່າ ຈະເບິ່ງແຍງເຂົາເຈົ້າໃຫ້ມີສິ່ງຈຳເປັນຖ້າເຂົາເຈົ້າໃຫ້ການປົກຄອງຂອງເພິ່ນມາກ່ອນ.—ອ່ານມັດທາຍ 6:25, 31-34
15. ເຈົ້າໄດ້ບົດຮຽນຫຍັງຈາກປະສົບການຂອງທິອາໂກແລະເອັດສ໌ເທີ?
15 ຖ້າເຈົ້າແຕ່ງດອງມາຫຼາຍປີແລ້ວ ເຈົ້າຈະຮັບໃຊ້ພະເຢໂຫວາຫຼາຍຂຶ້ນໄດ້ແນວໃດ? ສິ່ງໜຶ່ງທີ່ຈະຊ່ວຍໃຫ້ເຈົ້າເຮັດແບບນີ້ໄດ້ກໍຄື: ການອ່ານປະສົບການຂອງພີ່ນ້ອງຄູ່ອື່ນໆ. ຕົວຢ່າງເຊັ່ນ: ເຈົ້າອາດຈະອ່ານບົດຄວາມຊຸດທີ່ຊື່ວ່າ “ພວກເຂົາເຕັມໃຈໄປຮັບໃຊ້.” * ບົດຄວາມເຫຼົ່ານີ້ໄດ້ຊ່ວຍພີ່ນ້ອງທິອາໂກແລະເອັດສ໌ເທີເຊິ່ງເປັນຄູ່ຜົວເມຍທີ່ມາຈາກເບຣຊິນໃຫ້ຢາກຮັບໃຊ້ພະເຢໂຫວາໃນເຂດທີ່ຕ້ອງການຜູ້ປະກາດຫຼາຍກວ່າ. ທິອາໂກບອກວ່າ: “ເມື່ອເຮົາອ່ານປະສົບການເຫຼົ່ານີ້ ເຮົາກໍໄດ້ເຫັນວ່າພະເຢໂຫວາຊ່ວຍຜູ້ຮັບໃຊ້ຂອງເພິ່ນໃນທຸກມື້ນີ້ແນວໃດ. ເຮົາຈຶ່ງຢາກເຫັນດ້ວຍຕົວເອງວ່າ ພະເຢໂຫວາໄດ້ຊີ້ນຳແລະເບິ່ງແຍງເຮົາແບບນັ້ນຄືກັນ.” ໃນທີ່ສຸດ ເຂົາເຈົ້າກໍໄດ້ຍ້າຍໄປປາຣາກວາຍແລະຮັບໃຊ້ໃນເຂດພາສາປອກຕຸຍການຕັ້ງແຕ່ປີ 2014. ເອັດສ໌ເທີບອກວ່າ: “ມີຂໍ້ຄວາມໜຶ່ງທີ່ເຮົາມັກຫຼາຍທີ່ຢູ່ໃນເອເຟໂຊ 3:20. ຫຼາຍເທື່ອເຮົາເຫັນວ່າຂໍ້ຄຳພີນີ້ເປັນຈິງກັບເຮົາແທ້ໆໃນການຮັບໃຊ້ພະເຢໂຫວາ.” ໃນຈົດໝາຍທີ່ໂປໂລຂຽນໃຫ້ພີ່ນ້ອງໃນເມືອງເອເຟໂຊລາວກໍບອກວ່າ ພະເຢໂຫວາຈະໃຫ້ເຮົາມີທຸກສິ່ງຫຼາຍກວ່າທີ່ເຮົາຂໍດ້ວຍຊ້ຳ ແລະຄຳສັນຍານີ້ກໍເປັນຈິງແທ້ໆ!
16. ຄູ່ຜົວເມຍທີ່ຍັງໜຸ່ມສາມາດຂໍຄຳແນະນຳຈາກໃຜເພື່ອຈະຕັ້ງເປົ້າໝາຍໃນການຮັບໃຊ້ພະເຢໂຫວາ?
16 ຖ້າເຈົ້າເປັນຄູ່ຜົວເມຍທີ່ຍັງໜຸ່ມ ເຈົ້າກໍຈະໄດ້ຮັບປະໂຫຍດຈາກປະສົບການຂອງຄູ່ອື່ນໆທີ່ໝາຍເພິ່ງພະເຢໂຫວາ ເພາະບາງຄູ່ຮັບໃຊ້ພະເຢໂຫວາເປັນເວລາຫຼາຍສິບປີ. ໃຫ້ເຈົ້າຂໍຄຳແນະນຳຈາກເຂົາເຈົ້າເພື່ອຈະຕັ້ງເປົ້າໝາຍໃນການຮັບໃຊ້ພະເຢໂຫວາ. ເພາະຖ້າເຈົ້າເຮັດແບບນີ້ກໍສະແດງວ່າເຈົ້າກຳລັງໄວ້ໃຈພະເຢໂຫວາ. (ສຸພາ. 22:17, 19) ນອກຈາກນັ້ນ ຜູ້ດູແລໃນປະຊາຄົມກໍສາມາດຊ່ວຍເຈົ້າໃຫ້ຕັ້ງເປົ້າໝາຍແລະເຮັດຕາມເປົ້າໝາຍນັ້ນໄດ້.
17. ປະສົບການຂອງພີ່ນ້ອງຄຼາວສ໌ກັບມາຣິຊາເປັນແນວໃດ ແລະເຮົາໄດ້ບົດຮຽນຫຍັງຈາກປະສົບການຂອງເຂົາເຈົ້າ?
17 ເຮົາຢາກຮັບໃຊ້ພະເຢໂຫວາຫຼາຍຂຶ້ນ ແຕ່ບາງເທື່ອມັນກໍບໍ່ໄດ້ເປັນຕາມທີ່ເຮົາຄິດໄວ້. ໃຫ້ເຮົາມາເບິ່ງສິ່ງທີ່ເກີດຂຶ້ນກັບພີ່ນ້ອງຄຼາວສ໌ແລະມາຣິຊາທີ່ເວົ້າເຖິງກ່ອນໜ້ານີ້. ຫຼັງຈາກທີ່ເຂົາເຈົ້າແຕ່ງດອງໄດ້ 3 ປີ ເຂົາເຈົ້າກໍຍ້າຍບ້ານເພື່ອຈະໄປເປັນອາສາສະໝັກຊ່ວຍໂຄງການກໍ່ສ້າງຢູ່ສາຂາແຟງລັງ. ແຕ່ເຂົາເຈົ້າກໍຢູ່ຫັ້ນໄດ້ພຽງແຕ່ 6 ເດືອນ. ທຳອິດ ເຂົາເຈົ້າເສຍໃຈຫຼາຍ ແຕ່ບໍ່ດົນຫຼັງຈາກນັ້ນເຂົາເຈົ້າກໍຖືກເຊີນໃຫ້ເຂົ້າຮ່ວມໃນການຮຽນພາສາອາຣັບ. ຕອນນີ້ເຂົາເຈົ້າມີຄວາມສຸກຫຼາຍທີ່ໄດ້ຮັບໃຊ້ໃນເຂດພາສາອາຣັບຢູ່ອີກປະເທດໜຶ່ງ. ເມື່ອຄິດຄືນຫຼັງມາຣິຊາບອກວ່າ: “ຂ້ອຍຮູ້ສຶກຢ້ານທີ່ຈະເຮັດສິ່ງທີ່ບໍ່ເຄີຍເຮັດເລີຍແລະຕ້ອງໝາຍເພິ່ງພະເຢໂຫວາຢ່າງເຕັມທີ. ແຕ່ຂ້ອຍກໍໄດ້ເຫັນວ່າພະເຢໂຫວາໄດ້ຊ່ວຍພວກເຮົາຕະຫຼອດໃນແບບທີ່ບໍ່ຄາດຄິດ. ຈາກປະສົບການນີ້ເຮັດໃຫ້ຂ້ອຍໝາຍເພິ່ງພະເຢໂຫວາຫຼາຍຂຶ້ນແທ້ໆ!” ເລື່ອງນີ້ສະແດງໃຫ້ເຫັນວ່າ ເຮົາຕ້ອງໝັ້ນໃຈວ່າພະເຢໂຫວາຈະໃຫ້ລາງວັນກັບຜູ້ທີ່ໝາຍເພິ່ງເພິ່ນຢ່າງເຕັມທີ.
18. ຄູ່ຜົວເມຍທີ່ຍັງໜຸ່ມຕ້ອງເຮັດຫຍັງເພື່ອຈະໄວ້ໃຈພະເຢໂຫວາຕໍ່ໆໄປ?
18 ການແຕ່ງດອງເປັນຂອງຂວັນຈາກພະເຢໂຫວາ. (ມທ. 19:5, 6) ດັ່ງນັ້ນ ເພິ່ນຈຶ່ງຢາກໃຫ້ຜູ້ທີ່ແຕ່ງດອງມີຄວາມສຸກກັບຊີວິດຄູ່. (ສຸພາ. 5:18) ຄູ່ແຕ່ງດອງທີ່ຍັງໜຸ່ມ ຂໍໃຫ້ເຈົ້າລອງຄິດເບິ່ງວ່າສິ່ງທີ່ເຈົ້າເຮັດສະແດງໃຫ້ເຫັນບໍວ່າເຈົ້າເຫັນຄ່າຂອງຂວັນທີ່ພະເຢໂຫວາໃຫ້ເຈົ້າ? ໃຫ້ອະທິດຖານເຖິງພະເຢໂຫວາ ຊອກຫາຄຳແນະນຳຈາກຄຳພີໄບເບິນທີ່ເໝາະກັບສະພາບການຂອງເຈົ້າ ແລະໃຫ້ເຮັດຕາມຄຳແນະນຳນັ້ນ. ຖ້າເຈົ້າເອົາການຮັບໃຊ້ພະເຢໂຫວາມາເປັນສິ່ງສຳຄັນທີ່ສຸດ ເຈົ້າກໍໝັ້ນໃຈໄດ້ເລີຍວ່າເຈົ້າຈະມີຊີວິດຄູ່ທີ່ມີຄວາມສຸກ!
ເພງ 132 ເຮົາສອງຄົນກາຍເປັນຄົນດຽວກັນ
^ ຂໍ້ 5 ການຕັດສິນໃຈບາງຢ່າງຈະສົ່ງຜົນຕໍ່ເວລາແລະກຳລັງຂອງເຮົາທີ່ຈະຮັບໃຊ້ພະເຢໂຫວາ. ຄູ່ທີ່ແຕ່ງດອງໃໝ່ຕ້ອງໄດ້ຕັດສິນໃຈບາງຢ່າງທີ່ຈະສົ່ງຜົນຕໍ່ຊີວິດຂອງເຂົາເຈົ້າໃນໄລຍະຍາວ. ໃນບົດຄວາມນີ້ຈະມີຄຳແນະນຳທີ່ຊ່ວຍເຂົາເຈົ້າໃຫ້ຕັດສິນໃຈໄດ້ດີເຊິ່ງຈະເຮັດໃຫ້ຊີວິດມີຄວາມສຸກ.
^ ຂໍ້ 5 ຊື່ສົມມຸດ
^ ຂໍ້ 10 ຂໍໃຫ້ເບິ່ງປຶ້ມການນະມັດສະການທີ່ບໍລິສຸດຂອງພະເຢໂຫວາ—ໄດ້ຮັບການຟື້ນຟູ! ໃນບົດທີ 6, 7, 19 (ພາສາໄທ).
^ ຂໍ້ 15 ພາສາໄທ