ບົດຄວາມສຶກສາທີ 18
ເຈົ້າສົງໄສໃນຕົວພະເຢຊູບໍ?
“ຄົນທີ່ບໍ່ສົງໄສໃນຕົວຂ້ອຍກໍມີຄວາມສຸກ.”—ມທ. 11:6
ເພງ 54 “ທາງເສັ້ນນີ້ແຫຼະ”
ໃຈຄວາມສຳຄັນ *
1. ເປັນຫຍັງເຈົ້າອາດຮູ້ສຶກແປກໃຈຕອນທີ່ເຈົ້າພະຍາຍາມບອກຄົນອື່ນໃຫ້ຮູ້ຈັກຄວາມຈິງ?
ເຈົ້າຈື່ຕອນທຳອິດທີ່ເຈົ້າຮູ້ຈັກຄວາມຈິງໃນຄຳພີໄບເບິນບໍ? ເຈົ້າຮູ້ສຶກວ່າຄຳສອນໃນຄຳພີໄບເບິນເຂົ້າໃຈງ່າຍແລະຈະແຈ້ງ ແລະເຈົ້າກໍຄິດວ່າຄົນອື່ນກໍຄືຊິຢາກຮູ້ເລື່ອງນີ້ຄືກັນ. ເຈົ້າໝັ້ນໃຈວ່າຄຳສອນໃນຄຳພີໄບເບິນຈະຊ່ວຍເຂົາເຈົ້າໃຫ້ມີຊີວິດທີ່ມີຄວາມໝາຍໃນຕອນນີ້ ແລະມີຄວາມຫວັງທີ່ດີເລີດໃນອະນາຄົດ. (ເພງ. 119:105) ດັ່ງນັ້ນ ເຈົ້າຈຶ່ງຮູ້ສຶກຕື່ນເຕັ້ນຢາກຈະບອກຄວາມຈິງທີ່ເຈົ້າໄດ້ຮຽນໃຫ້ກັບໝູ່ແລະຍາດພີ່ນ້ອງ. ແຕ່ເຈົ້າອາດຮູ້ສຶກແປກໃຈທີ່ຫຼາຍຄົນບໍ່ຢາກຟັງສິ່ງທີ່ເຈົ້າເວົ້າ.
2-3. ຫຼາຍຄົນໃນສະໄໝພະເຢຊູຮູ້ສຶກແນວໃດກັບເພິ່ນແລະຂ່າວສານທີ່ເພິ່ນປະກາດ?
2 ເຮົາບໍ່ຄວນແປກໃຈທີ່ຫຼາຍຄົນບໍ່ມັກຂ່າວດີທີ່ເຮົາປະກາດ ເພາະໃນສະໄໝພະເຢຊູຫຼາຍຄົນບໍ່ຍອມຮັບເພິ່ນ ເຖິງວ່າເພິ່ນຈະເຮັດການອັດສະຈັນຫຼາຍຢ່າງເພື່ອພິສູດວ່າເພິ່ນເປັນຜູ້ທີ່ພະເຈົ້າສົ່ງມາ. ຕົວຢ່າງເຊັ່ນ: ພວກຜູ້ນຳຊາວຢິວແລະພວກຜູ້ຕໍ່ຕ້ານໄດ້ເຫັນພະເຢຊູປຸກລາຊະໂຣໃຫ້ຄືນມາຈາກຕາຍ ແຕ່ເຂົາເຈົ້າກໍຍັງບໍ່ຍອມຮັບວ່າເພິ່ນເປັນເມຊີອາ. ຊ້ຳບໍ່ໜຳ ເຂົາເຈົ້າແຮ່ງຢາກຂ້າທັງພະເຢຊູກັບລາຊະໂຣ!—ຢຮ. 11:47, 48, 53; 12:9-11
3 ພະເຢຊູຮູ້ວ່າຫຼາຍຄົນຈະບໍ່ຍອມຮັບວ່າເພິ່ນເປັນເມຊີອາ. (ຢຮ. 5:39-44) ເພິ່ນເວົ້າກັບລູກສິດຂອງໂຢຮັນຜູ້ໃຫ້ຮັບບັບເຕມາວ່າ: “ຄົນທີ່ບໍ່ສົງໄສໃນຕົວຂ້ອຍກໍມີຄວາມສຸກ.” (ມທ. 11:2, 3, 6) ເປັນຫຍັງຫຼາຍຄົນຈຶ່ງບໍ່ຍອມຮັບພະເຢຊູ?
4. ເຮົາຈະຮຽນຫຍັງໃນບົດຄວາມນີ້?
4 ໃນບົດຄວາມນີ້ເຮົາຈະມາເບິ່ງບາງເຫດຜົນວ່າ ເປັນຫຍັງຫຼາຍຄົນໃນສະໄໝພະເຢຊູຈຶ່ງບໍ່ຍອມຮັບເພິ່ນ? ເປັນຫຍັງຫຼາຍຄົນໃນທຸກມື້ນີ້ຈຶ່ງບໍ່ມັກຂ່າວສານທີ່ເຮົາປະກາດ? ແລະເປັນຫຍັງເຮົາຕ້ອງມີຄວາມເຊື່ອໃນພະເຢຊູຫຼາຍຂຶ້ນເພື່ອເຮົາຈະບໍ່ສົງໄສໃນຕົວເພິ່ນ?
(1) ບ່ອນທີ່ພະເຢຊູເຕີບໃຫຍ່
ຫຼາຍຄົນບໍ່ຍອມຮັບພະເຢຊູຍ້ອນບ່ອນທີ່ພະເຢຊູເຕີບໃຫຍ່. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 5) *
5. ເປັນຫຍັງບາງຄົນຈຶ່ງຄິດວ່າພະເຢຊູບໍ່ແມ່ນເມຊີອາຕາມທີ່ບອກໄວ້ລ່ວງໜ້າ?
5 ຫຼາຍຄົນບໍ່ຍອມຮັບພະເຢຊູຍ້ອນບ່ອນທີ່ພະເຢຊູເຕີບໃຫຍ່. ເຂົາເຈົ້າຮູ້ສຶກງຶດງໍ້ກັບຄຳສອນຂອງພະເຢຊູແລະການອັດສະຈັນທີ່ເພິ່ນເຮັດ ແຕ່ເຂົາເຈົ້າພັດຄິດວ່າເພິ່ນເປັນພຽງລູກຂອງຊ່າງໄມ້ຊື່ໆ ແລະມາຈາກເມືອງນາຊາເຣັດເຊິ່ງເປັນເມືອງນ້ອຍໆທີ່ບໍ່ໄດ້ມີຄວາມສຳຄັນຫຍັງ. ກ່ອນທີ່ນະທານາເອັນຈະເຂົ້າມາເປັນລູກສິດຂອງພະເຢຊູ ລາວກໍຍັງເວົ້າວ່າ “ຈະມີຫຍັງດີໆມາຈາກນາຊາເຣັດໄດ້ບໍ?” (ຢຮ. 1:46) ນະທານາເອັນອາດຈະບໍ່ມັກເມືອງທີ່ພະເຢຊູຢູ່ ຫຼືລາວອາດຈະຈື່ຄຳພະຍາກອນທີ່ຢູ່ໃນມີເກ 5:2 ທີ່ບອກລ່ວງໜ້າວ່າເມຊີອາຈະມາເກີດໃນເມືອງເບັດເລເຮັມ ບໍ່ແມ່ນເມືອງນາຊາເຣັດ.
6. ຄົນໃນສະໄໝຂອງພະເຢຊູຕ້ອງເຮັດຫຍັງເພື່ອຈະຮູ້ວ່າພະເຢຊູເປັນເມຊີອາ?
6 ຄຳພີໄບເບິນເວົ້າແນວໃດ? ຜູ້ພະຍາກອນເອຊາຢາບອກລ່ວງໜ້າວ່າພວກຜູ້ຕໍ່ຕ້ານພະເຢຊູຈະບໍ່ສົນໃຈ “ລາຍລະອຽດຄວາມເປັນມາຂອງ [ເມຊີອາ].” (ເອຊາ. 53:8) ມີຂໍ້ມູນຫຼາຍຢ່າງທີ່ໄດ້ພະຍາກອນໄວ້ກ່ຽວກັບເມຊີອາ. ຖ້າເຂົາເຈົ້າສຶກສາຄົ້ນຄວ້າຄວາມຈິງທັງໝົດ ເຂົາເຈົ້າກໍຈະໄດ້ຮູ້ວ່າພະເຢຊູເກີດຢູ່ໃນເມືອງເບັດເລເຮັມແລະເປັນລູກຫຼານຂອງກະສັດດາວິດ. (ລກ. 2:4-7) ດັ່ງນັ້ນ ບ່ອນທີ່ພະເຢຊູເກີດກໍກົງກັບຄຳພະຍາກອນທີ່ຢູ່ໃນມີເກ 5:2. ແລ້ວເປັນຫຍັງຫຼາຍຄົນຈຶ່ງບໍ່ເຊື່ອ? ກໍຍ້ອນວ່າເຂົາເຈົ້າຟ້າວຕັດສິນໃຈໂພດແລະບໍ່ຮູ້ຄວາມຈິງທັງໝົດ. ດັ່ງນັ້ນ ເຂົາເຈົ້າຈຶ່ງບໍ່ຍອມຮັບພະເຢຊູ.
7. ເປັນຫຍັງຫຼາຍຄົນໃນທຸກມື້ນີ້ຈຶ່ງບໍ່ຍອມຮັບພະຍານພະເຢໂຫວາ?
7 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ພະຍານພະເຢໂຫວາສ່ວນຫຼາຍບໍ່ໄດ້ເປັນຄົນຮັ່ງມີຫຼືເປັນຄົນສຳຄັນ. ດັ່ງນັ້ນ ຫຼາຍຄົນຈຶ່ງຄິດວ່າເຂົາເຈົ້າເປັນ “ຄົນທຳມະດາແລະບໍ່ມີການສຶກສາ.” (ກຈກ. 4:13) ບາງຄົນຄິດວ່າພະຍານພະເຢໂຫວາບໍ່ຄວນມາສອນຄຳພີໄບເບິນ ຍ້ອນວ່າເຂົາເຈົ້າບໍ່ໄດ້ຈົບມາຈາກໂຮງຮຽນສອນສາສະໜາ. ສ່ວນບາງຄົນກໍບອກວ່າ ພະຍານພະເຢໂຫວາເປັນ “ສາສະໜາຂອງອາເມຣິກາ” ແຕ່ໃນຕົວຈິງແລ້ວ ພະຍານພະເຢໂຫວາທີ່ຢູ່ໃນອາເມຣິກາມີພຽງສ່ວນໜ້ອຍເທົ່ານັ້ນ. ສ່ວນບາງຄົນກໍບອກວ່າ ພະຍານພະເຢໂຫວາບໍ່ໄດ້ເຊື່ອໃນພະເຢຊູ. ໃນຫຼາຍປີຜ່ານມາພະຍານພະເຢໂຫວາຖືກໃສ່ຮ້າຍວ່າ “ເປັນພວກທີ່ບໍ່ສົນໃຈຄອບຄົວ” “ເປັນລູກແຫຼ້ງຕີນມືຂອງອາເມຣິກາ” ແລະ “ເປັນພວກຫົວຮຸນແຮງ.” ຍ້ອນເຂົາເຈົ້າເຊື່ອເລື່ອງເຫຼົ່ານີ້ແລະບໍ່ໄດ້ເບິ່ງຄວາມຈິງດ້ວຍຕົວເອງ ເຂົາເຈົ້າຈຶ່ງບໍ່ຍອມຮັບພະຍານພະເຢໂຫວາ.
8. ຕາມກິດຈະການ 17:11 ເຮົາຕ້ອງເຮັດຫຍັງຖ້າເຮົາຢາກຮູ້ຄວາມຈິງກ່ຽວກັບພະຍານພະເຢໂຫວາ?
8 ສິ່ງໃດຈະຊ່ວຍເຮົາບໍ່ໃຫ້ສົງໄສ? ເຮົາຕ້ອງພະຍາຍາມສຶກສາຄົ້ນຄວ້າຫາຄວາມຈິງ. ລູກາຜູ້ຂຽນຄຳພີໄບເບິນກໍເຮັດແບບນີ້ຄືກັນ. ລາວໄດ້ພະຍາຍາມ “ຄົ້ນຄວ້າທຸກສິ່ງຕັ້ງແຕ່ຕົ້ນຢ່າງລະອຽດຖີ່ຖ້ວນ.” ລາວຢາກໃຫ້ຜູ້ອ່ານໝັ້ນໃຈວ່າເລື່ອງທີ່ເຂົາເຈົ້າໄດ້ຍິນກ່ຽວກັບພະເຢຊູນັ້ນ “ເປັນຄວາມຈິງ.” (ລກ. 1:1-4) ຄົນຢິວທີ່ຢູ່ໃນເມືອງເບເຣຍກໍໄດ້ເຮັດຄືກັນກັບລູກາ. ເມື່ອເຂົາເຈົ້າໄດ້ຍິນກ່ຽວກັບເລື່ອງຂອງພະເຢຊູເທື່ອທຳອິດ ເຂົາເຈົ້າກໍໄດ້ສຶກສາຄົ້ນຄວ້າໃນພະຄຳພີພາກພາສາເຮັບເຣີເພື່ອຈະໝັ້ນໃຈວ່າສິ່ງທີ່ເຂົາເຈົ້າໄດ້ຍິນນັ້ນເປັນຄວາມຈິງ. (ອ່ານກິດຈະການ 17:11) ຄ້າຍຄືກັນ ໃນທຸກມື້ນີ້ເຮົາກໍຕ້ອງສຶກສາຄົ້ນຄວ້າຫາຄວາມຈິງແລະສົມທຽບສິ່ງທີ່ເຮົາໄດ້ຮຽນຈາກພະຍານພະເຢໂຫວາກັບສິ່ງທີ່ຢູ່ໃນຄຳພີໄບເບິນ. ນອກຈາກນັ້ນ ເຮົາຍັງຕ້ອງສຶກສາຄົ້ນຄວ້າກ່ຽວກັບສິ່ງທີ່ພະຍານພະເຢໂຫວາເຮັດໃນທຸກມື້ນີ້. ດັ່ງນັ້ນ ຖ້າເຮົາກວດເບິ່ງ “ປະຫວັດຄວາມເປັນມາ” ເຮົາກໍຈະບໍ່ມີອະຄະຕິແລະບໍ່ເຊື່ອຂ່າວລືທີ່ຜິດໆກ່ຽວກັບພະຍານພະເຢໂຫວາ.
(2) ພະເຢຊູບໍ່ໄດ້ເຮັດການອັດສະຈັນເພື່ອພິສູດວ່າເພິ່ນເປັນເມຊີອາ
ຫຼາຍຄົນບໍ່ຍອມຮັບພະເຢຊູຍ້ອນເພິ່ນບໍ່ເຮັດການອັດສະຈັນ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 9-10) *
9. ເມື່ອພະເຢຊູບໍ່ຍອມເຮັດການອັດສະຈັນໃນທ້ອງຟ້າ ບາງຄົນຮູ້ສຶກແນວໃດ?
9 ຄຳສອນຂອງພະເຢຊູພຽງຢ່າງດຽວຍັງບໍ່ພໍທີ່ຈະເຮັດໃຫ້ບາງຄົນເຊື່ອວ່າເພິ່ນເປັນເມຊີອາ. ເຂົາເຈົ້າຕ້ອງການຫຼາຍກວ່ານັ້ນ. ເຂົາເຈົ້າຕ້ອງການໃຫ້ເພິ່ນເຮັດ “ການອັດສະຈັນໃນທ້ອງຟ້າ” ເພື່ອພິສູດວ່າເພິ່ນເປັນເມຊີອາ. (ມທ. 16:1) ເຂົາເຈົ້າຢາກໃຫ້ເພິ່ນເຮັດແບບນັ້ນອາດເປັນຍ້ອນວ່າ ເຂົາເຈົ້າເຂົ້າໃຈຜິດກ່ຽວກັບຄຳພະຍາກອນທີ່ຢູ່ໃນດານຽນ 7:13, 14. ແຕ່ຍັງບໍ່ທັນເຖິງເວລາທີ່ພະເຢໂຫວາຈະເຮັດໃຫ້ຄຳພະຍາກອນນີ້ສຳເລັດ. ສິ່ງທີ່ພະເຢຊູສອນກໍພຽງພໍແລ້ວທີ່ຈະພິສູດວ່າເພິ່ນເປັນເມຊີອາ. ເມື່ອພະເຢຊູບໍ່ຍອມເຮັດການອັດສະຈັນຕາມທີ່ເຂົາເຈົ້າຕ້ອງການ ເຂົາເຈົ້າກໍຮູ້ສຶກຄຽດແລະບໍ່ຍອມຮັບພະເຢຊູ.—ມທ. 16:4
10. ພະເຢຊູໄດ້ເຮັດໃຫ້ສິ່ງທີ່ເອຊາຢາຂຽນໄວ້ກ່ຽວກັບເມຊີອາສຳເລັດແນວໃດ?
10 ຄຳພີໄບເບິນເວົ້າແນວໃດ? ຜູ້ພະຍາກອນເອຊາຢາໄດ້ຂຽນກ່ຽວກັບເມຊີອາວ່າ: “ທ່ານຈະບໍ່ຮ້ອງ ບໍ່ຍົກສຽງປາກ ບໍ່ໃຫ້ເຂົາໄດ້ຍິນສຽງປາກນັ້ນໃນຖະໜົນ.” (ເອຊາ. 42:1, 2) ພະເຢຊູເຮັດວຽກປະກາດແບບຈຽມຕົວ. ເພິ່ນບໍ່ໄດ້ສ້າງວັດວາອາຮາມຫຼືໂບດທີ່ຫຼູຫຼາ ຫຼືນຸ່ງເຄື່ອງທີ່ງາມໆເພື່ອໃຫ້ຄົນອື່ນປະທັບໃຈ ແລະບໍ່ໄດ້ໃຫ້ຄົນອື່ນເອີ້ນເພິ່ນໂດຍໃຊ້ຊື່ຕຳແໜ່ງທີ່ເຮັດໃຫ້ຄົນອື່ນນັບໜ້າຖືຕາ. ຕອນທີ່ພະເຢຊູຖືກພິຈາລະນາຄະດີ ເພິ່ນກໍບໍ່ໄດ້ພະຍາຍາມເຮັດໃຫ້ກະສັດເຮໂຣດພໍໃຈໂດຍເຮັດການອັດສະຈັນ. (ລກ. 23:8-11) ເຖິງວ່າພະເຢຊູຈະເຮັດການອັດສະຈັນບາງຢ່າງ ແຕ່ວຽກຫຼັກຂອງເພິ່ນແມ່ນການປະກາດຂ່າວດີ ແລະເພິ່ນໄດ້ບອກກັບພວກລູກສິດຂອງເພິ່ນວ່າ “ຂ້ອຍມາເພື່ອເຮັດວຽກນີ້.”—ມຣກ. 1:38
11. ຫຼາຍຄົນໃນທຸກມື້ນີ້ມີຄວາມຄິດຜິດໆແນວໃດກ່ຽວກັບການນະມັດສະການພະເຈົ້າ?
11 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ຫຼາຍຄົນໃນທຸກມື້ນີ້ມັກວັດຫຼືໂບດໃຫຍ່ໆທີ່ມີຮູບແຕ້ມຫຼືຮູບແກະສະຫຼັກງາມໆ ມີນັກເທດນັກບວດທີ່ມີຊື່ສຽງ ແລະມີພິທີກຳຕ່າງໆທີ່ຫຼາຍຄົນບໍ່ຮູ້ວ່າມີຕົ້ນກຳເນີດມາຈາກໃສ. ຫຼາຍຄົນທີ່ເຂົ້າຮ່ວມກັບສາສະໜາເຫຼົ່ານັ້ນບໍ່ເຄີຍໄດ້ຮູ້ກ່ຽວກັບພະເຈົ້າແລະຈຸດປະສົງຂອງເພິ່ນຊ້ຳ. ແຕ່ຄົນທີ່ເຂົ້າຮ່ວມການປະຊຸມກັບພະຍານພະເຢໂຫວາໄດ້ຮຽນຮູ້ວ່າພະເຢໂຫວາຕ້ອງການຫຍັງແລະເພິ່ນຢາກໃຫ້ເຮົາເຮັດຫຍັງ. ຫໍປະຊຸມຂອງພວກເຮົາບໍ່ໄດ້ຕົກແຕ່ງຫຼູຫຼາ ແຕ່ສະອາດງາມຕາແລະເປັນລະບຽບຮຽບຮ້ອຍ. ຜູ້ທີ່ນຳໜ້າໃນປະຊາຄົມກໍບໍ່ໄດ້ນຸ່ງເຄື່ອງທີ່ຫຼູຫຼາຫຼືໃຊ້ຊື່ຕຳແໜ່ງທີ່ເຮັດໃຫ້ຄົນນັບໜ້າຖືຕາ. ສິ່ງທີ່ເຮົາເຊື່ອແລະສິ່ງທີ່ເຮົາສອນກໍມາຈາກຄຳພີໄບເບິນ. ດັ່ງນັ້ນ ຫຼາຍຄົນໃນທຸກມື້ນີ້ຈຶ່ງບໍ່ມັກເຮົາຍ້ອນວິທີທີ່ເຮົານະມັດສະການພະເຈົ້າທຳມະດາໂພດ ແລະສິ່ງທີ່ເຮົາສອນກໍບໍ່ໄດ້ກົງກັບສິ່ງທີ່ເຂົາເຈົ້າຢາກຟັງ.
12. ຕາມເຮັບເຣີ 11:1, 6 ເຮົາຄວນເຮັດຫຍັງເພື່ອຈະມີຄວາມເຊື່ອທີ່ເຂັ້ມແຂງ?
12 ສິ່ງໃດຈະຊ່ວຍເຮົາບໍ່ໃຫ້ສົງໄສ? ອັກຄະສາວົກໂປໂລບອກຄລິດສະຕຽນຢູ່ໃນເມືອງໂຣມວ່າ: “ຄວາມເຊື່ອຈະເກີດຂຶ້ນກໍຍ້ອນໄດ້ຍິນຂ່າວດີ. ແລະຄົນຈະໄດ້ຍິນຂ່າວດີກໍຍ້ອນມີຄົນໄປປະກາດເລື່ອງພະຄລິດ.” (ຣມ. 10:17) ດັ່ງນັ້ນ ເຮົາຕ້ອງສ້າງຄວາມເຊື່ອຈາກການສຶກສາຄຳພີໄບເບິນ ບໍ່ແມ່ນຈາກພິທີກຳຕ່າງໆທີ່ໜ້າປະທັບໃຈເຊິ່ງບໍ່ໄດ້ເປັນຕາມຫຼັກການໃນຄຳພີໄບເບິນ. ເຮົາຕ້ອງມີຄວາມເຊື່ອທີ່ເຂັ້ມແຂງຈາກຄວາມຮູ້ທີ່ຖືກຕ້ອງເພາະ “ຖ້າບໍ່ມີຄວາມເຊື່ອກໍບໍ່ມີທາງເຮັດໃຫ້ພະເຈົ້າພໍໃຈໄດ້.” (ອ່ານເຮັບເຣີ 11:1, 6) ດັ່ງນັ້ນ ເຮົາບໍ່ຈຳເປັນຕ້ອງເຫັນການອັດສະຈັນຈຶ່ງຈະເຊື່ອວ່າສິ່ງທີ່ເຮົາຮຽນນັ້ນເປັນຄວາມຈິງ ເພາະການສຶກສາຄົ້ນຄວ້າຢ່າງລະອຽດກ່ຽວກັບຄຳສອນໃນຄຳພີໄບເບິນກໍພຽງພໍແລ້ວທີ່ຈະເຮັດໃຫ້ເຮົາໝັ້ນໃຈແລະບໍ່ສົງໄສ.
(3) ພະເຢຊູບໍ່ໄດ້ເຮັດຕາມທຳນຽມຂອງຊາວຢິວ
ຫຼາຍຄົນບໍ່ຍອມຮັບພະເຢຊູຍ້ອນເພິ່ນບໍ່ເຮັດຕາມທຳນຽມຕ່າງໆຂອງເຂົາເຈົ້າ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 13) *
13. ເປັນຫຍັງຫຼາຍຄົນບໍ່ຍອມຮັບພະເຢຊູ?
13 ໃນສະໄໝພະເຢຊູລູກສິດຂອງໂຢຮັນຜູ້ໃຫ້ບັບເຕມາຮູ້ສຶກງົງວ່າ ເປັນຫຍັງລູກສິດຂອງພະເຢຊູຈຶ່ງບໍ່ຖືສິນອົດອາຫານ. ແລ້ວພະເຢຊູກໍອະທິບາຍກັບເຂົາເຈົ້າວ່າ ລູກສິດຂອງເພິ່ນບໍ່ຈຳເປັນຕ້ອງອົດອາຫານຕອນທີ່ເພິ່ນຍັງມີຊີວິດຢູ່. (ມທ. 9:14-17) ພວກຟາຣິຊາຍແລະຄົນອື່ນໆທີ່ຕໍ່ຕ້ານພະເຢຊູໄດ້ຕຳໜິເພິ່ນຍ້ອນເພິ່ນບໍ່ຍອມເຮັດຕາມທຳນຽມແລະປະເພນີຕ່າງໆຂອງເຂົາເຈົ້າ. ເຂົາເຈົ້າໃຈຮ້າຍຕອນທີ່ພະເຢຊູປິ່ນປົວຄົນເຈັບໃນວັນຊະບາໂຕ. (ມຣກ. 3:1-6; ຢຮ. 9:16) ເຂົາເຈົ້າອ້າງວ່າຕົວເອງນັບຖືວັນຊະບາໂຕຢ່າງເຄັ່ງຄັດ ແຕ່ເຂົາເຈົ້າພັດຄ້າຂາຍຢູ່ໃນວິຫານໃນວັນຊະບາໂຕ. ແລະເມື່ອພະເຢຊູຕຳໜິເຂົາເຈົ້າກ່ຽວກັບເລື່ອງນີ້ ເຂົາເຈົ້າກໍຄຽດຫຼາຍ. (ມທ. 21:12, 13, 15) ຄົນທີ່ມາຟັງພະເຢຊູສອນຢູ່ໃນບ່ອນປະຊຸມຂອງຊາວຢິວໃນເມືອງນາຊາເຣັດຮູ້ສຶກໃຈຮ້າຍຫຼາຍຕອນທີ່ພະເຢຊູຍົກເລື່ອງຂອງຊາວອິດສະຣາເອນຂຶ້ນມາເພື່ອສະແດງໃຫ້ເຫັນວ່າ ເຂົາເຈົ້າເປັນຄົນເຫັນແກ່ໂຕແລະຂາດຄວາມເຊື່ອ. (ລກ. 4:16, 25-30) ເຂົາເຈົ້າຈຶ່ງບໍ່ຍອມຮັບພະເຢຊູຍ້ອນວ່າເພິ່ນບໍ່ໄດ້ເຮັດຕາມທີ່ເຂົາເຈົ້າຕ້ອງການ.—ມທ. 11:16-19
14. ເປັນຫຍັງພະເຢຊູຈຶ່ງຕຳໜິທຳນຽມຕ່າງໆຂອງມະນຸດເຊິ່ງບໍ່ໄດ້ເປັນຕາມຫຼັກການໃນຄຳພີໄບເບິນ?
14 ຄຳພີໄບເບິນເວົ້າແນວໃດ? ພະເຢໂຫວາບອກຜ່ານທາງຜູ້ພະຍາກອນເອຊາຢາວ່າ: “ຊົນຊາດນີ້ດີແຕ່ເວົ້າວ່າຈະມາຫາເຮົາ ພວກເຂົານັບຖືເຮົາແຕ່ປາກ ແຕ່ໃນໃຈຂອງເຂົາບໍ່ໄດ້ເປັນແບບນັ້ນເລີຍ. ທີ່ເຂົາເຄົາລົບຢຳເກງເຮົາກໍພຽງເພາະເຮັດຕາມກົດເກນຂອງມະນຸດທີ່ສອນກັນມາ.” (ເອຊາ. 29:13, ລ.ມ.) ຄົນທີ່ຄິດວ່າກົດແລະທຳນຽມຕ່າງໆທີ່ມະນຸດຕັ້ງຂຶ້ນສຳຄັນກວ່າຄຳພີໄບເບິນຈະບໍ່ຍອມຮັບພະເຢໂຫວາແລະເມຊີອາຜູ້ທີ່ພະເຈົ້າໃຊ້ມາ. ສະນັ້ນ ພະເຢຊູຈຶ່ງເຮັດຖືກແລ້ວທີ່ຕຳໜິທຳນຽມຕ່າງໆຂອງມະນຸດເຊິ່ງບໍ່ເປັນໄປຕາມຫຼັກການໃນຄຳພີໄບເບິນ.
15. ເປັນຫຍັງຫຼາຍຄົນຈຶ່ງບໍ່ມັກພະຍານພະເຢໂຫວາ?
15 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ຫຼາຍຄົນຮູ້ສຶກບໍ່ມັກພະຍານພະເຢໂຫວາທີ່ບໍ່ໄປສະຫຼອງບຸນຕ່າງໆເຊັ່ນ: ບຸນປີໃໝ່ແລະວັນເກີດ. ສ່ວນບາງຄົນກໍບໍ່ມັກທີ່ເຮົາບໍ່ໄປການສະຫຼອງຕ່າງໆກ່ຽວກັບຊາດ ແລະບໍ່ໄປຮ່ວມພິທີກຳອື່ນໆທີ່ບໍ່ເປັນໄປຕາມຫຼັກການໃນຄຳພີໄບເບິນ. ແຕ່ເຂົາເຈົ້າເຊື່ອວ່າການເຮັດແບບນີ້ເປັນການນະມັດສະການທີ່ພະເຈົ້າຍອມຮັບ ເພາະຄົນທີ່ເຮັດແບບນີ້ເຊື່ອວ່າພະເຈົ້າພໍໃຈໃນສິ່ງທີ່ເຂົາເຈົ້າເຮັດ. ແຕ່ຄວາມຈິງແລ້ວເຂົາເຈົ້າບໍ່ສາມາດເຮັດໃຫ້ພະເຈົ້າພໍໃຈໄດ້ ຖ້າວ່າເຂົາເຈົ້າຍັງມັກທຳນຽມຂອງໂລກນີ້ຫຼາຍກວ່າຄຳສອນໃນຄຳພີໄບເບິນ.—ມຣກ. 7:7-9
16. ຕາມຄຳເພງ 119:97, 113, 163-165 ເຮົາຕ້ອງເຮັດຫຍັງແລະບໍ່ເຮັດຫຍັງ?
16 ສິ່ງໃດຈະຊ່ວຍເຮົາບໍ່ໃຫ້ສົງໄສ? ເຮົາຕ້ອງຮັກຫຼັກການແລະກົດໝາຍຂອງພະເຢໂຫວາໃຫ້ຫຼາຍຂຶ້ນ. (ອ່ານຄຳເພງ 119:97, 113, 163-165) ຖ້າເຮົາຮັກພະເຢໂຫວາ ເຮົາກໍຈະບໍ່ເຮັດຕາມທຳນຽມຕ່າງໆທີ່ພະເຢໂຫວາບໍ່ມັກ ແລະບໍ່ຍອມໃຫ້ສິ່ງໃດກໍຕາມມາສຳຄັນກວ່າພະເຢໂຫວາ.
(4) ພະເຢຊູບໍ່ໄດ້ແກ້ໄຂບັນຫາທາງການເມືອງທັນທີ
ຫຼາຍຄົນບໍ່ຍອມຮັບພະເຢຊູຍ້ອນເພິ່ນບໍ່ໄດ້ແກ້ໄຂບັນຫາທາງການເມືອງ. ໃນທຸກມື້ນີ້ເຮົາເຫັນບັນຫາແບບດຽວກັນບໍທີ່ເຮັດໃຫ້ບາງຄົນບໍ່ຍອມຮັບພະເຢຊູ? (ເບິ່ງຂໍ້ 17) *
17. ຫຼາຍຄົນໃນສະໄໝພະເຢຊູຄາດໝາຍໃຫ້ເມຊີອາເຮັດຫຍັງ?
17 ບາງຄົນໃນສະໄໝຂອງພະເຢຊູຢາກໃຫ້ເພິ່ນແກ້ໄຂບັນຫາທີ່ກ່ຽວຂ້ອງກັບການເມືອງການປົກຄອງທັນທີ. ເຂົາເຈົ້າຄາດໝາຍວ່າເມຊີອາຈະມາປົດປ່ອຍເຂົາເຈົ້າອອກຈາກການປົກຄອງຂອງໂຣມ. ຕອນທີ່ເຂົາເຈົ້າພະຍາຍາມຈະແຕ່ງຕັ້ງພະເຢຊູໃຫ້ເປັນກະສັດ ພະເຢຊູພັດບໍ່ຍອມເປັນ. (ຢຮ. 6:14, 15) ສ່ວນຄົນອື່ນໆເຊິ່ງລວມເຖິງປະໂລຫິດກໍຮູ້ສຶກຢ້ານວ່າພະເຢຊູຈະມາປ່ຽນແປງການປົກຄອງເຊິ່ງຈະເຮັດໃຫ້ພວກໂຣມໃຈຮ້າຍແລະຍຶດອຳນາດຄືນຈາກເຂົາເຈົ້າ. ຍ້ອນແນວນີ້ເຂົາເຈົ້າຈຶ່ງບໍ່ຍອມຮັບພະເຢຊູ.
18. ຄຳພະຍາກອນຫຍັງກ່ຽວກັບເມຊີອາທີ່ຫຼາຍຄົນບໍ່ສົນໃຈ?
18 ຄຳພີໄບເບິນເວົ້າແນວໃດ? ເຖິງວ່າຄຳພະຍາກອນຫຼາຍຂໍ້ຈະບອກລ່ວງໜ້າວ່າ ໃນທີ່ສຸດເມຊີອາຈະຊະນະໃນສົງຄາມ ແຕ່ຄຳພະຍາກອນຂໍ້ອື່ນໆບອກໃຫ້ຮູ້ວ່າເມຊີອາຈະຕ້ອງມາຕາຍກ່ອນເພື່ອໄຖ່ບາບໃຫ້ກັບເຮົາ. (ເອຊາ. 53:9, 12) ແລ້ວເປັນຫຍັງຄົນຢິວຈຶ່ງມີຄວາມຄິດຜິດໆກ່ຽວກັບເມຊີອາ? ຫຼາຍຄົນໃນສະໄໝຂອງພະເຢຊູບໍ່ໄດ້ສົນໃຈຄຳພະຍາກອນໃດໆທີ່ບໍ່ໄດ້ກ່ຽວຂ້ອງກັບການແກ້ໄຂບັນຫາຂອງເຂົາເຈົ້າໃນຕອນນັ້ນ.—ຢຮ. 6:26, 27
19. ຫຼາຍຄົນໃນທຸກມື້ນີ້ຄາດໝາຍໃຫ້ເຮົາເຮັດຫຍັງ?
19 ໃນທຸກມື້ນີ້ເຮົາເຫັນບັນຫາແບບດຽວກັນບໍ? ເຫັນແທ້. ຫຼາຍຄົນໃນທຸກມື້ນີ້ບໍ່ມັກເຮົາຍ້ອນເຮົາບໍ່ມີສ່ວນຮ່ວມທາງການເມືອງ. ເຂົາເຈົ້າຢາກໃຫ້ເຮົາໄປລົງຄະແນນສຽງໃນການເລືອກຕັ້ງ ແຕ່ເຮົາຮູ້ວ່າຖ້າເຮົາເລືອກຜູ້ນຳທີ່ເປັນມະນຸດກໍເທົ່າກັບວ່າເຮົາບໍ່ຢາກໃຫ້ພະເຢໂຫວາປົກຄອງ. (1 ຊາມ. 8:4-7) ຫຼາຍຄົນອາດຍັງຄິດວ່າເຮົາບໍ່ເຮັດວຽກຊ່ວຍສັງຄົມເຊັ່ນ: ບໍ່ສ້າງໂຮງໝໍຫຼືໂຮງຮຽນ. ເຂົາເຈົ້າບໍ່ມັກເຮົາຍ້ອນວ່າເຮົາມີແຕ່ເຮັດວຽກປະກາດ ແຕ່ບໍ່ໄດ້ລົງມືແກ້ໄຂບັນຫາຂອງໂລກນີ້ທັນທີ.
20. ສິ່ງສຳຄັນທີ່ເຮົາຕ້ອງເຮັດແມ່ນຫຍັງຕາມທີ່ພະເຢຊູບອກໄວ້ໃນມັດທາຍ 7:21-23?
20 ສິ່ງໃດຊ່ວຍເຮົາບໍ່ໃຫ້ສົງໄສ? (ອ່ານມັດທາຍ 7:21-23) ວຽກຫຼັກຂອງເຮົາແມ່ນການເຮັດຕາມຄຳສັ່ງຂອງພະເຢຊູ. (ມທ. 28:19, 20) ເຮົາບໍ່ຄວນສົນໃຈບັນຫາທາງການເມືອງແລະບັນຫາສັງຄົມຂອງໂລກນີ້ຫຼາຍເກີນໄປ. ເຮົາຮັກແລະເປັນຫ່ວງຄົນອື່ນ ແຕ່ເຮົາຮູ້ວ່າວິທີທີ່ດີທີ່ສຸດທີ່ຈະຊ່ວຍເຂົາເຈົ້າແມ່ນສອນເຂົາເຈົ້າໃຫ້ຮູ້ກ່ຽວກັບການປົກຄອງຂອງພະເຈົ້າ ແລະຊ່ວຍເຂົາເຈົ້າໃຫ້ມາເປັນໝູ່ກັບພະເຢໂຫວາ.
21. ເຮົາຄວນຕັ້ງໃຈທີ່ຈະເຮັດຫຍັງ?
21 ໃນບົດຄວາມນີ້ເຮົາໄດ້ຮູ້ເຫດຜົນ 4 ຢ່າງທີ່ຫຼາຍຄົນໃນສະໄໝນັ້ນບໍ່ຍອມຮັບພະເຢຊູ ແລະຫຼາຍຄົນໃນທຸກມື້ນີ້ບໍ່ມັກລູກສິດຂອງພະເຢຊູ. ແຕ່ມີພຽງ 4 ເຫດຜົນເທົ່ານັ້ນບໍ? ບໍ່. ໃນບົດຄວາມຕໍ່ໄປເຮົາຈະມາເບິ່ງອີກ 4 ເຫດຜົນ. ຂໍໃຫ້ເຮົາຕັ້ງໃຈທີ່ຈະມີຄວາມເຊື່ອເຂັ້ມແຂງຕໍ່ໆໄປເພື່ອຈະບໍ່ສົງໄສໃນຕົວພະເຢຊູ!
ເພງ 56 ເຮັດໃຫ້ຄວາມຈິງເປັນຂອງເຈົ້າເອງ
^ ຂໍ້ 5 ເຖິງວ່າພະເຢຊູຈະເປັນຄູສອນທີ່ດີທີ່ສຸດທີ່ເຄີຍມີຊີວິດຢູ່ໃນໂລກນີ້ ແຕ່ຄົນໃນສະໄໝນັ້ນກໍຍັງບໍ່ຍອມຮັບເພິ່ນ. ຍ້ອນຫຍັງ? ໃນບົດຄວາມນີ້ເຮົາຈະມາເບິ່ງ 4 ເຫດຜົນທີ່ເຂົາເຈົ້າບໍ່ຍອມຮັບເພິ່ນ. ແລະເຮົາຍັງຈະມາເບິ່ງວ່າ ເປັນຫຍັງຫຼາຍຄົນໃນທຸກມື້ນີ້ຈຶ່ງບໍ່ມັກສິ່ງທີ່ລູກສິດຂອງພະເຢຊູເວົ້າແລະເຮັດ. ແລະນອກຈາກນັ້ນ ເຮົາຍັງຈະມາເບິ່ງວ່າ ເປັນຫຍັງເຮົາຕ້ອງມີຄວາມເຊື່ອໃນພະເຢຊູຫຼາຍຂຶ້ນເພື່ອທີ່ເຮົາຈະບໍ່ສົງໄສໃນຕົວເພິ່ນ.
