ເຈົ້າຮູ້ບໍ?
ຄົນໃນສະໄໝທີ່ຂຽນຄຳພີໄບເບິນເຄີຍເອົາຫຍ້າພາໄພຣັດມາເຮັດເຮືອບໍ?
ຕົ້ນຫຍ້າພາໄພຣັດ
ຫຼາຍຄົນໃນປັດຈຸບັນຮູ້ວ່າໃນສະໄໝກ່ອນ ຄົນເອຢິບບູຮານໄດ້ໃຊ້ຫຍ້າພາໄພຣັດມາເຮັດເປັນເຈ້ຍຂຽນໜັງສື. ແມ່ນແຕ່ຄົນກຣີກແລະຄົນໂຣມສະໄໝບູຮານກໍຍັງໃຊ້ຫຍ້າພາໄພຣັດ * ມາເຮັດເປັນເຈ້ຍຂຽນຄືກັນ. ແຕ່ຫຼາຍຄົນບໍ່ຮູ້ວ່າຫຍ້າພາໄພຣັດບໍ່ໄດ້ໃຊ້ເປັນເຈ້ຍຂຽນໜັງສືເທົ່ານັ້ນ ແຕ່ຍັງໃຊ້ເພື່ອເຮັດເຮືອນຳ.
ເຮືອພາໄພຣັດສອງແບບທີ່ພົບຢູ່ໃນອຸໂມງຝັງສົບຂອງຄົນເອຢິບ
ຫຼາຍກວ່າ 2.500 ປີມາແລ້ວ ຜູ້ພະຍາກອນເອຊາຢາໄດ້ຂຽນວ່າ ຄົນທີ່ອາໄສຢູ່ “ດິນແດນທີ່ຢູ່ແຖວແມ່ນ້ຳສາຍຕ່າງໆໃນເອທິໂອປີ” ໄດ້ສົ່ງ “ທູດໄປທາງທະເລໂດຍໃຊ້ເຮືອພາໄພຣັດ.” ຕໍ່ມາ ຜູ້ພະຍາກອນເຢເຣມີກໍໄດ້ບອກລ່ວງໜ້າວ່າ ຕອນທີ່ເມເດຍແລະເປີເຊຍມາບຸກໂຈມຕີເມືອງບາບີໂລນ ເຂົາເຈົ້າຈະຈູດທຳລາຍ “ເຮືອພາໄພຣັດ” ເພື່ອບໍ່ໃຫ້ຊາວບາບີໂລນປົບໜີໄດ້.—ເອຊາ. 18:1, 2; ຢເຣ. 51:32, ລ.ມ.
ຍ້ອນຄຳພີໄບເບິນເປັນປຶ້ມທີ່ມາຈາກພະເຈົ້າ ດັ່ງນັ້ນ ນັກສຶກສາຄຳພີໄບເບິນຈຶ່ງບໍ່ແປກໃຈທີ່ນັກບູຮານຄະດີໄດ້ຄົ້ນພົບວ່າ ມີການໃຊ້ຫຍ້າພາໄພຣັດມາເຮັດເຮືອໃນສະໄໝທີ່ຂຽນຄຳພີໄບເບິນ. (2 ຕມ. 3:16) ແລ້ວມີການຄົ້ນພົບຫຍັງແດ່? ນັກບູຮານຄະດີໄດ້ຄົ້ນພົບລາຍລະອຽດທີ່ເປັນຫຼັກຖານວ່າ ຄົນເອຢິບບູຮານໃຊ້ຫຍ້າພາໄພຣັດມາເຮັດເຮືອ.
ເຮັດເຮືອພາໄພຣັດແນວໃດ?
ຮູບແຕ້ມແລະຮູບແກະສະຫຼັກທີ່ຢູ່ໃນອຸໂມງຝັງສົບຂອງຄົນເອຢິບບູຮານໄດ້ສະແດງເຖິງວິທີການເກັບຫຍ້າພາໄພຣັດແລະເອົາມາເຮັດເປັນເຮືອ. ເມື່ອເຮົາເບິ່ງຮູບນີ້ຈະເຫັນວ່າ ຜູ້ຊາຍກຳລັງຕັດຕົ້ນຫຍ້າພາໄພຣັດແລະມັດໃສ່ກັນ. ຈຸດພິເສດຂອງລຳຕົ້ນຫຍ້າພາໄພຣັດເປັນ 3 ລ່ຽມ. ດັ່ງນັ້ນ ເມື່ອເອົາມາມັດໃສ່ກັນຈະເຮັດໃຫ້ມັນແໜ້ນດີ. ປຶ້ມກ່ຽວກັບປະຫວັດສາດຂອງເອຢິບ ບອກວ່າ ເຮືອພາໄພຣັດອາດຍາວເຖິງ 17 ແມັດແລະແຕ່ລະເບື້ອງມີໄມ້ພາຍເຖິງ 10-12 ໄມ້.
ຮູບແກະສະຫຼັກຂອງຄົນເອຢິບອະທິບາຍວິທີເຮັດເຮືອພາໄພຣັດ
ເປັນຫຍັງຈຶ່ງໃຊ້ຫຍ້າພາໄພຣັດມາເຮັດເຮືອ?
ຫຍ້າພາໄພຣັດມັກເກີດຢູ່ຕາມຮ່ອມພູແຖວແມ່ນ້ຳນິນ ແລະເປັນວັດຖຸທີ່ຫາໄດ້ງ່າຍ ແລະຍັງເອົາມາເຮັດເຮືອໄດ້ງ່າຍນຳອີກ. ເຖິງວ່າຄົນສ່ວນຫຼາຍຈະເອົາໄມ້ເປັນຫຼັກໃນການສ້າງເຮືອ ແຕ່ຄົນຫາປາແລະຄົນລ່າສັດກໍຍັງໃຊ້ຫຍ້າພາໄພຣັດມາເຮັດແພແລະເຮືອນ້ອຍ.
ຕັ້ງແຕ່ສະໄໝບູຮານຈົນຮອດຕອນນີ້ ຜູ້ຄົນກໍຍັງໃຊ້ເຮືອພາໄພຣັດຢູ່. ນັກຂຽນຊາວກຣີກຊື່ພລູຕາດເຊິ່ງມີຊີວິດຢູ່ໃນລະຫວ່າງສະຕະວັດທຳອິດແລະສະຕະວັດທີ 2 ໄດ້ບອກວ່າບາງຄົນໃນສະໄໝນັ້ນຍັງໃຊ້ເຮືອພາໄພຣັດຢູ່.
^ ຂໍ້ 3 ຫຍ້າພາໄພຣັດມັກເກີດຢູ່ຕາມຫ້ວຍຮ່ອງຄອງບຶງ ແລະບ່ອນທີ່ນ້ຳໄຫຼບໍ່ແຮງ. ຕົ້ນຫຍ້າພາໄພຣັດບາງຕົ້ນສູງເຖິງ 5 ແມັດແລະກວ້າງ 15 ຊັງຕີແມັດ.