ບົດຄວາມສຶກສາທີ 20
ປຶ້ມພະນິມິດບອກວ່າຈະເກີດຫຍັງຂຶ້ນກັບສັດຕູຂອງພະເຈົ້າ?
“ແລ້ວຖ້ອຍຄຳເຫຼົ່ານັ້ນກໍເຮັດໃຫ້ກະສັດທົ່ວໂລກມາເຕົ້າໂຮມກັນຢູ່ບ່ອນທີ່ມີຊື່ໃນພາສາເຮັບເຣີວ່າ ອາມາເຄໂດນ.”—ພນມ. 16:16
ເພງ 150 ຈົ່ງຊອກຫາພະເຈົ້າເພື່ອເຈົ້າຈະລອດ
ໃຈຄວາມສຳຄັນ a
1. ປຶ້ມພະນິມິດບອກເຮົາໃຫ້ຮູ້ຫຍັງກ່ຽວກັບປະຊາຊົນຂອງພະເຈົ້າ?
ປຶ້ມພະນິມິດບອກເຮົາໃຫ້ຮູ້ວ່າເມື່ອການປົກຄອງຂອງພະເຈົ້າໄດ້ກໍ່ຕັ້ງຂຶ້ນ ຊາຕານກໍຖືກໄລ່ອອກຈາກສະຫວັນ. (ພນມ. 12:1-9) ເຊິ່ງນັ້ນໄດ້ເຮັດໃຫ້ສະຫວັນມີຄວາມສະຫງົບສຸກ ແຕ່ເຮົາມີຄວາມເດືອດຮ້ອນ. ຍ້ອນຫຍັງ? ຍ້ອນຊາຕານໃຈຮ້າຍ ແລະໂຈມຕີຜູ້ຮັບໃຊ້ທີ່ສັດຊື່ຂອງພະເຈົ້າຢູ່ແຜ່ນດິນໂລກ.—ພນມ. 12:12, 15, 17
2. ສິ່ງໃດຈະຊ່ວຍເຮົາໃຫ້ຮັກສາຄວາມສັດຊື່ຕໍ່ພະເຢໂຫວາ?
2 ເຮົາຈະຮັກສາຄວາມສັດຊື່ຕໍ່ພະເຈົ້າໄດ້ແນວໃດເມື່ອຖືກຊາຕານໂຈມຕີ? (ພນມ. 13:10) ສິ່ງໜຶ່ງທີ່ຈະຊ່ວຍເຮົາກໍຄື ການຮູ້ກ່ຽວກັບອະນາຄົດ. ຕົວຢ່າງເຊັ່ນ ໃນປຶ້ມພະນິມິດອັກຄະສາວົກໂຢຮັນໄດ້ເວົ້າເຖິງພອນຫຼາຍຢ່າງທີ່ຈະເກີດຂຶ້ນໃນອະນາຄົດ ເຊິ່ງໜຶ່ງໃນນັ້ນກໍຄືສັດຕູຂອງພະເຈົ້າຈະຖືກທຳລາຍ. ຕອນນີ້ໃຫ້ເຮົາມາເບິ່ງວ່າປຶ້ມພະນິມິດໄດ້ອະທິບາຍກ່ຽວກັບສັດຕູຂອງພະເຈົ້າແນວໃດ ແລະຈະເກີດຫຍັງຂຶ້ນກັບເຂົາເຈົ້າ.
“ສັນຍະລັກ” ທີ່ສະແດງເຖິງສັດຕູຂອງພະເຈົ້າ
3. ບາງສັນຍະລັກທີ່ໃຊ້ໃນປຶ້ມພະນິມິດມີຫຍັງແດ່?
3 ໃນຂໍ້ຕົ້ນໆຂອງປຶ້ມພະນິມິດບອກໃຫ້ເຮົາຮູ້ວ່າ ເລື່ອງຕ່າງໆທີ່ຢູ່ໃນປຶ້ມນີ້ຈະອະທິບາຍໂດຍໃຊ້ຄຳປຽບທຽບຫຼື “ສັນຍະລັກ.” (ພນມ. 1:1) ມີການສົມທຽບສັດຕູຂອງພະເຈົ້າກັບສັດຮ້າຍຕ່າງໆ ເຊັ່ນ: ມີ “ສັດຮ້າຍໂຕໜຶ່ງຂຶ້ນມາຈາກທະເລ” ມັນມີ “ຫົວ 7 ຫົວກັບເຂົາ 10 ເຂົາ.” (ພນມ. 13:1) ຈາກນັ້ນກໍມີ “ສັດຮ້າຍອີກໂຕໜຶ່ງຂຶ້ນມາຈາກແຜ່ນດິນ” ມັນເວົ້າຄືກັບພະຍານາກ ແລະເຮັດໃຫ້ມີ “ໄຟຕົກຈາກຟ້າ.” (ພນມ. 13:11-13) ແລະນອກຈາກນັ້ນຍັງມີ “ສັດຮ້າຍສີແດງສົດໂຕໜຶ່ງ” ເຊິ່ງມີຜູ້ຍິງໂສເພນີຄົນໜຶ່ງຂີ່ຫຼັງຂອງມັນຢູ່. ສັດຮ້າຍ 3 ໂຕນີ້ໝາຍເຖິງສັດຕູທີ່ຕໍ່ຕ້ານພະເຢໂຫວາແລະການປົກຄອງຂອງເພິ່ນເປັນເວລາດົນນານມາແລ້ວ. ດັ່ງນັ້ນ ເປັນເລື່ອງສຳຄັນທີ່ເຮົາຈະຮູ້ວ່າສັດຮ້າຍເຫຼົ່ານີ້ໝາຍເຖິງໃຜ.—ພນມ. 17:1, 3
ສັດໃຫຍ່ 4 ໂຕ
ພວກມັນ ‘ຂຶ້ນມາຈາກທະເລ’ (ດາ. 7:1-8, 15-17) ພວກມັນໝາຍເຖິງອຳນາດການປົກຄອງທີ່ມີຜົນຕໍ່ປະຊາຊົນຂອງພະເຈົ້າໃນສະໄໝຂອງດານີເອນ. (ຂໍ້ 4, 7)
4-5. ສິ່ງທີ່ຂຽນຢູ່ໃນດານຽນ 7:15-17 ຊ່ວຍເຮົາໃຫ້ເຂົ້າໃຈຄວາມໝາຍຂອງສັດຮ້າຍທີ່ຢູ່ໃນປຶ້ມພະນິມິດແນວໃດ?
4 ກ່ອນທີ່ເຮົາຈະເຂົ້າໃຈວ່າສັດຕູຂອງພະເຈົ້າແມ່ນໃຜ ເຮົາຕ້ອງເຂົ້າໃຈກ່ອນວ່າສັນຍະລັກເຫຼົ່ານີ້ມີຄວາມໝາຍແນວໃດ. ສິ່ງທີ່ຈະຊ່ວຍອະທິບາຍໃຫ້ເຮົາເຂົ້າໃຈສັນຍະລັກເຫຼົ່ານີ້ກໍຄືຄຳພີໄບເບິນ. ມີສັນຍະລັກຫຼາຍຢ່າງທີ່ຢູ່ໃນປຶ້ມພະນິມິດໄດ້ມີການອະທິບາຍແລ້ວໃນປຶ້ມອື່ນໆທີ່ຢູ່ໃນຄຳພີໄບເບິນ. ຕົວຢ່າງເຊັ່ນ: ຜູ້ພະຍາກອນດານີເອນໄດ້ຝັນເຫັນ “ສັດໃຫຍ່ 4 ໂຕຂຶ້ນມາຈາກທະເລ.” (ດາ. 7:1-3, ລ.ມ.) ດານີເອນໄດ້ອະທິບາຍໃຫ້ຮູ້ວ່າສັດໃຫຍ່ເຫຼົ່ານີ້ໝາຍເຖິງ “ກະສັດ” 4 ອົງ ຫຼື 4 ການປົກຄອງ. (ອ່ານດານຽນ 7:15-17) ການອະທິບາຍທີ່ຈະແຈ້ງນີ້ຊ່ວຍເຮົາໃຫ້ເຂົ້າໃຈວ່າສັດຮ້າຍທີ່ຢູ່ໃນປຶ້ມພະນິມິດກໍໝາຍເຖິງອຳນາດການປົກຄອງຕ່າງໆຄືກັນ.
5 ຕອນນີ້ໃຫ້ເຮົາມາເບິ່ງສັນຍະລັກຕ່າງໆທີ່ຢູ່ໃນປຶ້ມພະນິມິດ ແລ້ວເຮົາຈະເບິ່ງວ່າຄຳພີໄບເບິນຊ່ວຍເຮົາແນວໃດໃຫ້ເຂົ້າໃຈຄວາມໝາຍຂອງສັນຍະລັກເຫຼົ່ານີ້. ທຳອິດເຮົາຈະມາເບິ່ງວ່າ ສັດຮ້າຍແຕ່ລະໂຕໝາຍເຖິງໃຜ ແລ້ວຈະເກີດຫຍັງຂຶ້ນກັບພວກມັນ. ແລະເຫດການເຫຼົ່ານີ້ມີຄວາມໝາຍແນວໃດສຳລັບເຮົາ.
ສັດຕູຂອງພະເຈົ້າແມ່ນໃຜ?
ສັດຮ້າຍທີ່ມີຫົວ 7 ຫົວ
ມັນ “ຂຶ້ນມາຈາກທະເລ” ແລະມີຫົວ 7 ຫົວ ກັບເຂົາ 10 ເຂົາ ແລະທັງ 10 ເຂົານັ້ນມີມົງກຸດ. (ພນມ. 13:1-4) ສັດຮ້າຍໂຕນີ້ໝາຍເຖິງອຳນາດການປົກຄອງທັງໝົດທີ່ປົກຄອງມະນຸດຕະຫຼອດປະຫວັດສາດ. 7 ຫົວຂອງສັດຮ້າຍໝາຍເຖິງປະເທດມະຫາອຳນາດໂລກທັງ 7 ທີ່ມີຜົນຕໍ່ປະຊາຊົນຂອງພະເຈົ້າ. (ຂໍ້ 6-8)
6. ສັດຮ້າຍທີ່ມີ 7 ຫົວທີ່ຢູ່ໃນພະນິມິດ 13:1-4 ໝາຍເຖິງຫຍັງ?
6 ສັດຮ້າຍ 7 ຫົວໝາຍເຖິງຫຍັງ? (ອ່ານພະນິມິດ 13:1-4) ເຮົາສັງເກດເຫັນວ່າສັດຮ້າຍນີ້ມີລັກສະນະຄືເສືອດາວ ຕີນຄືໝີ ປາກຄືສິງ ແລະມີ 10 ເຂົາ. ລັກສະນະເຫຼົ່ານີ້ແມ່ນລັກສະນະຂອງສັດແຕ່ລະໂຕທີ່ເວົ້າເຖິງຢູ່ໃນປຶ້ມດານຽນບົດ 7. ແຕ່ປຶ້ມພະນິມິດເວົ້າເຖິງລັກສະນະເຫຼົ່ານີ້ລວມຢູ່ໃນສັດຮ້າຍໂຕດຽວ ບໍ່ແມ່ນ 4 ໂຕ. ແລະສັດຮ້າຍໂຕນີ້ບໍ່ໄດ້ໝາຍເຖິງການປົກຄອງດຽວ ເພາະອັກຄະສາວົກໂຢຮັນຍັງບອກວ່າ ມັນປົກຄອງ “ເໜືອທຸກຕະກູນ ທຸກຊາດ ທຸກພາສາ ແລະທຸກປະເທດ.” (ພນມ. 13:7) ດັ່ງນັ້ນ ມັນຕ້ອງໃຫຍ່ກວ່າສັດໂຕໃດໂຕໜຶ່ງ ຫຼືການປົກຄອງໃດການປົກຄອງໜຶ່ງ. ນັ້ນກໍສະແດງວ່າ ສັດຮ້າຍໂຕນີ້ໝາຍເຖິງການປົກຄອງທັງໝົດທີ່ປົກຄອງມະນຸດຕະຫຼອດປະຫວັດສາດ. b—ຜູ້ປ. 8:9
7. ແຕ່ລະຫົວຂອງສັດຮ້າຍ 7 ຫົວໝາຍເຖິງຫຍັງ?
7 ແຕ່ລະຫົວຂອງສັດຮ້າຍ 7 ຫົວໝາຍເຖິງຫຍັງ? ປຶ້ມພະນິມິດບົດ 17 ຈະຊ່ວຍເຮົາໃຫ້ຮູ້ຄຳຕອບນີ້ ເພາະບົດນັ້ນຈະອະທິບາຍຮູບປັ້ນຂອງສັດຮ້າຍທີ່ຢູ່ໃນພະນິມິດບົດ 13. ໃນພະນິມິດ 17:10 ບອກວ່າ “ມີກະສັດ 7 ອົງ: ກະສັດ 5 ອົງໝົດອຳນາດໄປແລ້ວ ອົງໜຶ່ງມີອຳນາດຢູ່ຕອນນີ້ ແລະອີກອົງໜຶ່ງຍັງບໍ່ມາ ແຕ່ເມື່ອມາແລ້ວລາວຈະຢູ່ໄດ້ໄລຍະສັ້ນໆ.” ໃນບັນດາອຳນາດປົກຄອງຕ່າງໆທີ່ຊາຕານໃຊ້ ມີ “7 ຫົວ” ຫຼື 7 ອຳນາດທີ່ເດັນກວ່າໝູ່ ຍ້ອນເປັນມະຫາອຳນາດໂລກທີ່ມີຜົນຕໍ່ປະຊາຊົນຂອງພະເຈົ້າ. ໃນສະໄໝຂອງອັກຄະສາວົກໂຢຮັນ ມີ 5 ມະຫາອຳນາດໂລກໄດ້ປົກຄອງໄປແລ້ວ ເຊິ່ງກໍຄື: ເອຢິບ ອາຊີລີ ບາບີໂລນ ເມເດຍແລະເປີເຊຍ ແລະກຣີກ. ມະຫາອຳນາດໂລກທີ 6 ແມ່ນໂຣມ ເຊິ່ງປົກຄອງຢູ່ຕອນທີ່ໂຢຮັນໄດ້ຮັບນິມິດ. ແລ້ວມະຫາອຳນາດທີ 7 ຫຼືຫົວທີ 7 ໝາຍເຖິງໃຜ?
8. ຫົວທີ 7 ຂອງສັດຮ້າຍໝາຍເຖິງໃຜ?
8 ຕອນນີ້ໃຫ້ເຮົາມາເບິ່ງວ່າຄຳພະຍາກອນທີ່ຢູ່ໃນປຶ້ມດານຽນຊ່ວຍເຮົາໃຫ້ຮູ້ວ່າມະຫາອຳນາດໂລກທີ 7 ຫຼືຫົວທີ 7 ຂອງສັດຮ້າຍໝາຍເຖິງໃຜ. ແລ້ວໃຜເປັນມະຫາອຳນາດໂລກໃນສະໄໝສຸດທ້າຍ ຫຼືໃນ “ວັນຂອງຜູ້ເປັນນາຍ”? (ພນມ. 1:10) ມະຫາອຳນາດໂລກທີ່ປົກຄອງຢູ່ໃນຕອນນີ້ກໍຄື ອັງກິດກັບອາເມຣິກາ. ດັ່ງນັ້ນ ເຮົາສາມາດສະຫຼຸບໄດ້ວ່າ ຫົວທີ 7 ຂອງສັດຮ້າຍທີ່ເວົ້າຢູ່ໃນພະນິມິດ 13:1-4 ແມ່ນອັງກິດກັບອາເມຣິກາ.
ສັດຮ້າຍທີ່ມີເຂົາ 2 ເຂົາຄືກັບລູກແກະ
ມັນ “ຂຶ້ນມາຈາກແຜ່ນດິນ” ແລະເວົ້າ “ຄືກັບພະຍານາກ.” ມັນ “ເຮັດໃຫ້ມີໄຟຕົກຈາກຟ້າ” ແລະມັນເປັນຄືກັບ “ຜູ້ພະຍາກອນປອມ.” (ພນມ. 13:11-15; 16:13; 19:20) ສັດຮ້າຍທີ່ມີ 2 ເຂົາ ໝາຍເຖິງມະຫາອຳນາດໂລກອັງກິດກັບອາເມຣິກາ. ທີ່ມັນຖືກເອີ້ນວ່າເປັນ “ຜູ້ພະຍາກອນປອມ” ກໍຍ້ອນວ່າມັນຫຼອກລວງຜູ້ຄົນໃນໂລກໃຫ້ຫຼົງຜິດ ແລະບອກເຂົາເຈົ້າໃຫ້ “ເຮັດຮູບປັ້ນ” ຂອງ “ສັດຮ້າຍ” ທີ່ມີ 7 ຫົວ ແລະ 10 ເຂົາ. (ຂໍ້ 9)
9. ສັດຮ້າຍທີ່ “ມີເຂົາ 2 ເຂົາຄືກັບລູກແກະ” ໝາຍເຖິງໃຜ?
9 ປຶ້ມພະນິມິດບົດ 13 ບອກໃຫ້ຮູ້ວ່າຫົວທີ 7 ຂອງສັດຮ້າຍເຊິ່ງກໍຄື ອັງກິດກັບອາເມຣິກາຍັງເປັນສັດຮ້າຍທີ່ “ມີເຂົາ 2 ເຂົາຄືກັບລູກແກະ ແຕ່ມັນເລີ່ມເວົ້າຄືກັບພະຍານາກ.” ສັດຮ້າຍນີ້ “ເຮັດສິ່ງທີ່ມະຫັດສະຈັນຕ່າງໆຕໍ່ໜ້າຄົນທົ່ວໂລກ ເຖິງຂັ້ນວ່າເຮັດໃຫ້ມີໄຟຕົກຈາກຟ້າລົງມາໃສ່ໂລກ.” (ພນມ. 13:11-15) ພະນິມິດບົດ 16 ແລະ 19 ຍັງໄດ້ບອກວ່າສັດຮ້າຍນີ້ເປັນຄືກັບ “ຜູ້ພະຍາກອນປອມ.” (ພນມ. 16:13; 19:20) ແລະນອກຈາກນັ້ນ ດານີເອນຍັງໄດ້ເວົ້າເຖິງບາງຢ່າງທີ່ຄ້າຍຄືກັນວ່າ ມະຫາອຳນາດໂລກອັງກິດກັບອາເມຣິກາຈະ “ເຮັດໃຫ້ເກີດຄວາມເສຍຫາຍແບບທີ່ບໍ່ເຄີຍມີມາກ່ອນ.” (ດາ. 8:19, 23, 24, ລ.ມ.) ເລື່ອງນີ້ໄດ້ເກີດຂຶ້ນແທ້ໃນສົງຄາມໂລກຄັ້ງທີ II. ອັງກິດແລະອາເມຣິກາໄດ້ຮ່ວມມືກັນສ້າງລະເບີດປະລະມານູ 2 ລູກ ແລ້ວຖິ້ມລົງໃສ່ປະເທດຍີ່ປຸ່ນເຊິ່ງເຮັດໃຫ້ສົງຄາມໂລກຄັ້ງທີ II ຈົບລົງ. ເຫັນໄດ້ວ່າມະຫາອຳນາດໂລກອັງກິດກັບອາເມຣິກາ “ເຮັດໃຫ້ມີໄຟຕົກຈາກຟ້າລົງມາໃສ່ໂລກ” ແທ້ໆ!
ສັດຮ້າຍສີແດງສົດ
ຜູ້ຍິງໂສເພນີທີ່ເອີ້ນວ່າບາບີໂລນໃຫຍ່ໄດ້ຂີ່ຫຼັງສັດຮ້າຍນີ້ ແລະມີການພັນລະນາວ່າສັດຮ້າຍນີ້ເປັນກະສັດອົງທີ 8. (ພນມ. 17:3-6, 8, 11) ທຳອິດຜູ້ຍິງໂສເພນີສາມາດຄວບຄຸມສັດຮ້າຍໄດ້ ແຕ່ຕໍ່ມາລາວກໍຖືກສັດຮ້າຍທຳລາຍ. ຜູ້ຍິງໂສເພນີໝາຍເຖິງສາສະໜາປອມທັງໝົດທີ່ຢູ່ທົ່ວໂລກ. ສັດຮ້າຍໃນທຸກມື້ນີ້ໝາຍເຖິງອົງການສະຫະປະຊາຊາດທີ່ສົ່ງເສີມລະບົບການເມືອງທົ່ວໂລກ. (ຂໍ້ 10, 14-17)
10. “ຮູບປັ້ນຂອງສັດຮ້າຍ” ໝາຍເຖິງໃຜ? (ພະນິມິດ 13:14, 15; 17:3, 8, 11)
10 ຍັງມີສັດຮ້າຍອີກໂຕໜຶ່ງ. ສັດຮ້າຍນີ້ມີລັກສະນະຄືກັບສັດຮ້າຍທີ່ມີ 7 ຫົວ ແຕ່ເປັນສີແດງສົດ. ມັນເປັນ “ຮູບປັ້ນຂອງສັດຮ້າຍ” ແລະເປັນ “ກະສັດອົງທີແປດ.” c (ອ່ານພະນິມິດ 13:14, 15; 17:3, 8, 11) ໂຢຮັນບອກວ່າ “ກະສັດ” ອົງນີ້ເຄີຍມີຊີວິດຢູ່ ຈາກນັ້ນກໍຕາຍໄປ ແລ້ວຕໍ່ມາກໍກັບມາມີຊີວິດອີກ. ຄຳອະທິບາຍນີ້ເໝາະສົມແທ້ໆກັບອົງການສະຫະປະຊາຊາດທີ່ສົ່ງເສີມລະບົບການເມືອງທົ່ວໂລກ ເພາະອົງການນີ້ເຄີຍຖືກເອີ້ນວ່າ ອົງການສັນນິບາດຊາດ. ແຕ່ອົງການນີ້ກໍຖືກຍົກເລີກໃນໄລຍະສົງຄາມໂລກຄັ້ງທີ II. ແລ້ວຕໍ່ມາອົງການນີ້ກໍຖືກກໍ່ຕັ້ງອີກຄັ້ງ ເຊິ່ງເອີ້ນວ່າອົງການສະຫະປະຊາຊາດ.
11. ສັດຮ້າຍຈະເຮັດຫຍັງ ແລະເປັນຫຍັງເຮົາບໍ່ຕ້ອງຢ້ານ?
11 ສັດຮ້າຍຕ່າງໆຫຼືອຳນາດການປົກຄອງຈະກະຕຸ້ນຜູ້ຄົນໃຫ້ຕໍ່ຕ້ານພະເຢໂຫວາແລະປະຊາຊົນຂອງເພິ່ນ. ມັນໄດ້ເຮັດໃຫ້ “ກະສັດທົ່ວໂລກ” ມາລວມຕົວກັນຢູ່ໃນສົງຄາມອາມາເຄໂດນ ເຊິ່ງເປັນ “ວັນໃຫຍ່ຂອງພະເຈົ້າຜູ້ມີລິດເດດສູງສຸດ.” (ພນມ. 16:13, 14, 16) ແຕ່ເຮົາບໍ່ຕ້ອງຢ້ານ ເພາະພະເຢໂຫວາພະເຈົ້າຜູ້ຍິ່ງໃຫຍ່ສູງສຸດຈະປົກປ້ອງທຸກຄົນທີ່ເລືອກຢູ່ຝ່າຍການປົກຄອງຂອງເພິ່ນ.—ເອເຊກ. 38:21-23
12. ຈະເກີດຫຍັງຂຶ້ນກັບສັດຮ້າຍທັງໝົດ?
12 ຈະເກີດຫຍັງຂຶ້ນກັບສັດຮ້າຍທັງໝົດ? ພະນິມິດ 19:20 ບອກວ່າ: “ແລ້ວສັດຮ້າຍນັ້ນກໍຖືກຈັບພ້ອມກັບຜູ້ພະຍາກອນປອມ ເຊິ່ງແມ່ນຜູ້ທີ່ເຮັດສິ່ງມະຫັດສະຈັນຕ່າງໆຕໍ່ໜ້າສັດຮ້າຍເພື່ອຫຼອກລວງຄົນທີ່ໄດ້ຮັບເຄື່ອງໝາຍຂອງສັດຮ້າຍແລະຄົນທີ່ຂາບໄຫວ້ຮູບປັ້ນຂອງມັນ ທັງສັດຮ້າຍກັບຜູ້ພະຍາກອນປອມກໍຖືກໂຍນລົງໄປໃນບຶງໄຟທີ່ລຸກໄໝ້ດ້ວຍມາດທັງໆທີ່ຍັງມີຊີວິດຢູ່.” ເຮົາເຫັນໄດ້ວ່າ ພະເຢໂຫວາຈະທຳລາຍລັດຖະບານຕ່າງໆຕອນທີ່ເຂົາເຈົ້າຍັງປົກຄອງຢູ່.
13. ອຳນາດການປົກຄອງເຮັດໃຫ້ຄລິດສະຕຽນມີບັນຫາໃນເລື່ອງຫຍັງ?
13 ເລື່ອງນີ້ມີຄວາມໝາຍແນວໃດສຳລັບເຮົາ? ເຮົາທີ່ເປັນຄລິດສະຕຽນຕ້ອງພັກດີຕໍ່ພະເຢໂຫວາແລະການປົກຄອງຂອງເພິ່ນ. (ຢຮ. 18:36) ເພື່ອຈະເຮັດແບບນັ້ນ ເຮົາຕ້ອງຮັກສາຄວາມເປັນກາງທາງການເມືອງ. ແຕ່ການເຮັດແບບນີ້ກໍບໍ່ງ່າຍ ເພາະອຳນາດການປົກຄອງຂອງໂລກນີ້ພະຍາຍາມກົດດັນເຮົາໃຫ້ສະໜັບສະໜູນເຂົາເຈົ້າທັງທາງຄຳເວົ້າແລະການກະທຳ. ຜູ້ທີ່ຍອມຕໍ່ຄວາມກົດດັນນັ້ນຈະໄດ້ຮັບເຄື່ອງໝາຍຂອງສັດຮ້າຍ. (ພນມ. 13:16, 17) ແລະຜູ້ທີ່ຮັບເຄື່ອງໝາຍນັ້ນຈະເຮັດໃຫ້ພະເຢໂຫວາບໍ່ພໍໃຈ ແລະຈະບໍ່ໄດ້ຊີວິດຕະຫຼອດໄປ. (ພນມ. 14:9, 10; 20:4) ດັ່ງນັ້ນ ເປັນເລື່ອງສຳຄັນຫຼາຍທີ່ເຮົາຈະຮັກສາຄວາມເປັນກາງບໍ່ວ່າຈະຖືກກົດດັນແບບໃດກໍຕາມ!
ຈຸດຈົບທີ່ໜ້າອັບອາຍຂອງໂສເພນີຄົນສຳຄັນ
14. ຕາມພະນິມິດ 17:3-5 ອັກຄະສາວົກໂຢຮັນເຫັນຫຍັງທີ່ເຮັດໃຫ້ລາວຮູ້ສຶກແປກໃຈຫຼາຍ?
14 ອັກຄະສາວົກໂຢຮັນຮູ້ສຶກ “ແປກໃຈຫຼາຍ” ກັບສິ່ງທີ່ລາວເຫັນ. ສິ່ງທີ່ລາວເຫັນກໍຄືມີຜູ້ຍິງຄົນໜຶ່ງຂີ່ຫຼັງສັດຮ້າຍທີ່ເປັນຕາຢ້ານຫຼາຍ. (ພນມ. 17:1, 2, 6) ຜູ້ຍິງຄົນນີ້ເປັນ “ຜູ້ຍິງໂສເພນີຄົນສຳຄັນ” ເຊິ່ງຄຳພີໄບເບິນເອີ້ນວ່າ “ບາບີໂລນໃຫຍ່.” ລາວໄດ້ເຮັດ “ຜິດສິນລະທຳທາງເພດ” ກັບ “ກະສັດໃນໂລກ.”—ອ່ານພະນິມິດ 17:3-5
15-16. “ບາບີໂລນໃຫຍ່” ໝາຍເຖິງໃຜ ແລະເຮົາຮູ້ໄດ້ແນວໃດ?
15 “ບາບີໂລນໃຫຍ່” ໝາຍເຖິງໃຜ? ຜູ້ຍິງໂສເພນີຫຼືບາບີໂລນໃຫຍ່ບໍ່ໄດ້ໝາຍເຖິງອຳນາດການປົກຄອງ ເພາະໃນປຶ້ມພະນິມິດບອກວ່າ ຜູ້ຍິງຄົນນີ້ໄດ້ເຮັດຜິດສິນລະທຳທາງເພດກັບຜູ້ນຳທາງການເມືອງໃນໂລກ. (ພນມ. 18:9) ທີ່ຈິງ ລາວກຳລັງຄວບຄຸມອຳນາດການປົກຄອງເພາະລາວຂີ່ຫຼັງສັດຮ້າຍຢູ່. ນອກຈາກນັ້ນ ບາບີໂລນໃຫຍ່ຍັງບໍ່ໄດ້ໝາຍເຖິງລະບົບການຄ້າຂອງໂລກຊາຕານ ເພາະໃນປຶ້ມພະນິມິດເວົ້າເຖິງລະບົບນີ້ວ່າເປັນ “ພວກພໍ່ຄ້າໃນໂລກ.”—ພນມ. 18:11, 15, 16
16 ຄຳວ່າ “ໂສເພນີ” ທີ່ເວົ້າເຖິງໃນຄຳພີໄບເບິນມັກຈະໝາຍເຖິງຄົນທີ່ອ້າງຕົວເອງວ່າຮັບໃຊ້ພະເຈົ້າ ແຕ່ພັດໄປຂາບໄຫວ້ຮູບບູຊາແລະເປັນມິດກັບໂລກ. (ເອເຊກ. 16:2, 35, 36, ລ.ມ.; ຢກບ. 4:4) ສ່ວນຄຳວ່າ “ສາວບໍລິສຸດ” ໃນຄຳພີໄບເບິນມັກຈະໝາຍເຖິງຜູ້ທີ່ນະມັດສະການພະເຈົ້າຢ່າງສັດຊື່. (2 ກຣ. 11:2; ພນມ. 14:4) ເມືອງບາບີໂລນໃນສະໄໝບູຮານເປັນສູນກາງຂອງການນະມັດສະການປອມ. ດັ່ງນັ້ນ ບາບີໂລນໃຫຍ່ຕ້ອງໝາຍເຖິງການນະມັດສະການປອມທຸກຮູບແບບ ແລະໝາຍເຖິງສາສະໜາປອມທັງໝົດທີ່ຢູ່ທົ່ວໂລກ.—ພນມ. 17:5, 18; ເບິ່ງບົດຄວາມທີ່ຊື່ວ່າ “ບາບີໂລນໃຫຍ່ແມ່ນຫຍັງ?” ໃນເວັບໄຊ jw.org (ພາສາໄທ)
17. ຈະເກີດຫຍັງຂຶ້ນກັບບາບີໂລນໃຫຍ່?
17 ຈະເກີດຫຍັງຂຶ້ນກັບບາບີໂລນໃຫຍ່? ພະນິມິດ 17:16, 17 ບອກວ່າ: “ເຂົາ 10 ເຂົາກັບສັດຮ້າຍທີ່ເຈົ້າເຫັນຈະພາກັນກຽດຊັງຜູ້ຍິງໂສເພນີຄົນນັ້ນແລະທຳຮ້າຍລາວ ເຮັດໃຫ້ລາວປະເປືອຍ ກັດກິນຊີ້ນຂອງລາວ ແລະເອົາໄຟເຜົາລາວຈົນບໍ່ເຫຼືອຊາກ. ພະເຈົ້າໃຫ້ພວກເຂົາເຮັດຕາມຄວາມຄິດຂອງພະອົງ.” ນີ້ໝາຍຄວາມວ່າ ພະເຢໂຫວາຈະກະຕຸ້ນຊາດຕ່າງໆໃຫ້ໃຊ້ສັດຮ້າຍສີແດງສົດ ເຊິ່ງກໍຄືອົງການສະຫະປະຊາຊາດໃຫ້ທຳລາຍສາສະໜາປອມທັງໝົດທີ່ຢູ່ທົ່ວໂລກ.—ພນມ. 18:21-24
18. ເຮົາຈະເຮັດໃຫ້ແນ່ໃຈໄດ້ແນວໃດວ່າເຮົາບໍ່ມີສ່ວນກ່ຽວຂ້ອງກັບບາບີໂລນໃຫຍ່?
18 ເລື່ອງນີ້ມີຄວາມໝາຍແນວໃດສຳລັບເຮົາ? ເຮົາຕ້ອງ “ນະມັດສະການແບບທີ່ສະອາດແລະບໍລິສຸດຕາມຄວາມຄິດຂອງພະເຈົ້າ.” (ຢກບ. 1:27) ເຮົາຍັງຕ້ອງບໍ່ຮັບເອົາແນວຄວາມຄິດແລະການກະທຳຂອງບາບີໂລນໃຫຍ່ບໍ່ວ່າຈະເປັນຄຳສອນປອມ ການສະຫຼອງບຸນຕ່າງໆ ສິນລະທຳທີ່ເສື່ອມຊາມ ແລະການຫຼິ້ນໄສຍະສາດ. ແລະນອກຈາກນັ້ນ ເຮົາຍັງຕ້ອງໄປເຕືອນຜູ້ຄົນໃຫ້ “ອອກຈາກເມືອງນີ້” ເພື່ອພະເຈົ້າຈະບໍ່ເບິ່ງວ່າເຂົາເຈົ້າຍັງມີສ່ວນຮ່ວມໃນບາບຂອງເມືອງນີ້.—ພນມ. 18:4
ການພິພາກສາສັດຕູໂຕສຳຄັນ
ພະຍານາກສີແດງສົດ
ຊາຕານໃຫ້ອຳນາດກັບສັດຮ້າຍ.(ພນມ. 12:3, 9, 13; 13:4; 20:2, 10) ຊາຕານສັດຕູໂຕສຳຄັນທີ່ສຸດຂອງພະເຢໂຫວາຈະຖືກຂັງໄວ້ໃນເຫວເລິກ 1.000 ປີ. ຫຼັງຈາກນັ້ນມັນຈະຖືກທຳລາຍຕະຫຼອດໄປໃນ “ບຶງໄຟທີ່ມີມາດ.” (ຂໍ້ 19-20)
19. “ພະຍານາກໃຫຍ່ສີແດງສົດ” ໝາຍເຖິງໃຜ?
19 ປຶ້ມພະນິມິດຍັງໄດ້ອະທິບາຍກ່ຽວກັບ “ພະຍານາກໃຫຍ່ສີແດງສົດ.” (ພນມ. 12:3) ພະຍານາກໂຕນີ້ໄດ້ຕໍ່ສູ້ກັບພະເຢຊູແລະທູດສະຫວັນຂອງເພິ່ນ. (ພນມ. 12:7-9) ມັນຍັງໄດ້ໂຈມຕີປະຊາຊົນຂອງພະເຈົ້າ ແລະໃຫ້ອຳນາດກັບສັດຮ້າຍຕ່າງໆ ຫຼືການປົກຄອງຂອງມະນຸດ. (ພນມ. 12:17; 13:4) ພະຍານາກໃຫຍ່ໂຕນີ້ “ແມ່ນງູໂຕທຳອິດ ມັນຖືກເອີ້ນວ່າມານຮ້າຍແລະຊາຕານ.” (ພນມ. 12:9; 20:2) ມັນເປັນຜູ້ທີ່ຢູ່ເບື້ອງຫຼັງຂອງສັດຕູພະເຢໂຫວາທັງໝົດ.
20. ຈະເກີດຫຍັງຂຶ້ນກັບພະຍານາກ?
20 ຈະເກີດຫຍັງຂຶ້ນກັບພະຍານາກ? ພະນິມິດ 20:1-3 ໄດ້ອະທິບາຍວ່າ ທູດສະຫວັນອົງໜຶ່ງຈະຖິ້ມຊາຕານລົງໃນເຫວເລິກ ເຊິ່ງເຫວເລິກນັ້ນເປັນຄືກັບຄຸກ. ຕອນທີ່ຊາຕານຢູ່ໃນເຫວເລິກນັ້ນ ມັນບໍ່ສາມາດ “ອອກມາຫຼອກລວງປະເທດຕ່າງໆອີກຈົນກວ່າຈະຄົບ 1.000 ປີ.” ແລະສຸດທ້າຍ ຊາຕານກັບພັກພວກຂອງມັນກໍຈະຖືກທຳລາຍຕະຫຼອດໄປໃນ “ບຶງໄຟທີ່ມີມາດ.” (ພນມ. 20:10) ລອງນຶກພາບເບິ່ງວ່າ ໂລກຂອງເຮົາຈະດີຂະໜາດໃດຖ້າບໍ່ມີຊາຕານແລະພັກພວກຂອງມັນ!
21. ເປັນຫຍັງເຮົາຈຶ່ງໄດ້ກຳລັງໃຈເມື່ອອ່ານປຶ້ມພະນິມິດ?
21 ເຮົາໄດ້ຮັບກຳລັງໃຈຫຼາຍແທ້ໆທີ່ໄດ້ເຂົ້າໃຈຄວາມໝາຍຂອງສັນຍະລັກຕ່າງໆທີ່ຢູ່ໃນປຶ້ມພະນິມິດ. ເຮົາບໍ່ພຽງແຕ່ຮູ້ວ່າສັດຕູຂອງພະເຈົ້າແມ່ນໃຜ ແຕ່ຍັງຮູ້ວ່າຈະເກີດຫຍັງຂຶ້ນກັບພວກມັນ. ນີ້ຈຶ່ງເຮັດໃຫ້ຄຳເວົ້າທີ່ຢູ່ໃນປຶ້ມພະນິມິດເປັນຈິງທີ່ວ່າ “ຄວາມສຸກຈະເກີດກັບຄົນທີ່ອ່ານອອກສຽງ ແລະຄົນທີ່ໄດ້ຍິນຄຳພະຍາກອນນີ້”! (ພນມ. 1:3) ເມື່ອສັດຕູຂອງພະເຈົ້າຖືກທຳລາຍແລ້ວ ຜູ້ຮັບໃຊ້ທີ່ສັດຊື່ຂອງພະເຈົ້າຈະໄດ້ຮັບພອນຫຍັງແດ່? ເຮົາຈະຮຽນເລື່ອງນີ້ໃນບົດຄວາມຕໍ່ໄປ.
ເພງ 23 ພະເຢໂຫວາປົກຄອງແລ້ວ
a ປຶ້ມພະນິມິດໃຊ້ສັນຍະລັກເພື່ອສະແດງເຖິງສັດຕູຂອງພະເຈົ້າ. ສ່ວນປຶ້ມດານຽນຊ່ວຍເຮົາໃຫ້ເຂົ້າໃຈຄວາມໝາຍຂອງສັນຍະລັກນັ້ນ. ໃນບົດຄວາມນີ້ ເຮົາຈະມາສົມທຽບຄຳພະຍາກອນບາງເລື່ອງທີ່ຄ້າຍຄືກັນທີ່ຢູ່ໃນປຶ້ມດານຽນແລະປຶ້ມພະນິມິດ ເຊິ່ງຈະຊ່ວຍເຮົາໃຫ້ເຂົ້າໃຈວ່າສັດຕູຂອງພະເຈົ້າແມ່ນໃຜ ແລະຈະເກີດຫຍັງຂຶ້ນກັບເຂົາເຈົ້າ.
b ອີກສິ່ງໜຶ່ງທີ່ສະແດງໃຫ້ເຫັນວ່າສັດຮ້າຍທີ່ມີ 7 ຫົວໝາຍເຖິງການປົກຄອງທັງໝົດກໍຍ້ອນວ່າມັນມີ “10 ເຂົາ.” ເລກ 10 ໃນຄຳພີໄບເບິນສ່ວນຫຼາຍໝາຍເຖິງຄວາມຄົບຖ້ວນ.
c ຮູບປັ້ນຂອງສັດຮ້າຍນີ້ບໍ່ຄືກັບສັດຮ້າຍໂຕທຳອິດ ເພາະມັນບໍ່ມີ “ມົງກຸດ” ຢູ່ເຂົາ. (ພນມ. 13:1) ທີ່ເປັນແບບນີ້ກໍຍ້ອນວ່າມັນ “ເກີດມາຈາກກະສັດ 7 ອົງ” ແລະໄດ້ຮັບອຳນາດຈາກກະສັດເຫຼົ່ານັ້ນ.—ເບິ່ງບົດຄວາມທີ່ມີຊື່ວ່າ “ສັດຮ້າຍສີແດງເຂັ້ມທີ່ຢູ່ໃນພະນິມິດບົດ 17 ແມ່ນຫຍັງ?” ໃນເວັບໄຊ jw.org (ພາສາໄທ)
