ບົດຄວາມສຶກສາທີ 21
ປຶ້ມພະນິມິດເວົ້າເຖິງອະນາຄົດຂອງເຮົາແນວໃດ?
“ອາແມນ! ເຊີນມາ ພະເຢຊູຜູ້ເປັນນາຍ.”—ພນມ. 22:20
ເພງ 142 ຍຶດໝັ້ນກັບຄວາມຫວັງຂອງເຮົາ
ໃຈຄວາມສຳຄັນ a
1. ເຮົາທຸກຄົນຕ້ອງຕັດສິນໃຈເລື່ອງຫຍັງທີ່ສຳຄັນຫຼາຍ?
ໃນທຸກມື້ນີ້ ເຮົາທຸກຄົນຕ້ອງຕັດສິນໃຈເລື່ອງທີ່ສຳຄັນທີ່ວ່າ ເຮົາຈະຢູ່ຝ່າຍພະເຢໂຫວາເຊິ່ງເປັນຜູ້ປົກຄອງເອກະພົບ ຫຼືຈະຢູ່ຝ່າຍຊາຕານເຊິ່ງເປັນສັດຕູຂອງເພິ່ນ. ເຮົາທຸກຄົນຕ້ອງໄດ້ເລືອກຝ່າຍໃດຝ່າຍໜຶ່ງ ຈະຢູ່ທັງສອງຝ່າຍບໍ່ໄດ້. ແລະການຕັດສິນໃຈຂອງເຮົາກໍຈະເປັນຕົວກຳນົດວ່າ ເຮົາຈະໄດ້ຮັບຊີວິດຕະຫຼອດໄປຫຼືບໍ່. (ມທ. 25:31-33, 46) ໃນຊ່ວງ “ຄວາມທຸກລຳບາກຄັ້ງໃຫຍ່” ເຮົາຈະຖືກໝາຍໄວ້ວ່າຈະໄດ້ຊີວິດຫຼືຈະຖືກທຳລາຍ.—ພນມ. 7:14; 14:9-11; ເອເຊກ. 9:4, 6
2. (ກ) ເຮັບເຣີ 10:35-39 ກະຕຸ້ນເຮົາໃຫ້ເຮັດຫຍັງ? (ຂ) ປຶ້ມພະນິມິດຊ່ວຍເຮົາແນວໃດ?
2 ອ່ານເຮັບເຣີ 10:35-39. ຖ້າເຈົ້າເລືອກຢູ່ຝ່າຍພະເຢໂຫວາ ເຈົ້າກໍເລືອກຖືກແລ້ວ ແລະເຈົ້າກໍຄືຊິຢາກຊ່ວຍຄົນອື່ນໃຫ້ເລືອກແບບນີ້ຄືກັນ. ເຈົ້າສາມາດໃຊ້ປຶ້ມພະນິມິດເພື່ອຊ່ວຍຄົນອື່ນໃຫ້ເລືອກທາງນີ້ ເພາະປຶ້ມນັ້ນບອກເຮົາໃຫ້ຮູ້ວ່າຈະເກີດຫຍັງຂຶ້ນກັບຜູ້ທີ່ຕໍ່ຕ້ານພະເຢໂຫວາ ແລະຜູ້ທີ່ເລືອກຢູ່ຝ່າຍເພິ່ນຈະໄດ້ຮັບພອນດີໆຫຍັງແດ່. ເປັນເລື່ອງສຳຄັນທີ່ເຮົາຈະສຶກສາປຶ້ມພະນິມິດເພາະຈະຊ່ວຍເຮົາໃຫ້ຮັບໃຊ້ພະເຢໂຫວາຕໍ່ໆໄປແລະຊ່ວຍຄົນອື່ນໃຫ້ເຮັດແບບນີ້ຄືກັນ.
3. ເຮົາຈະຮຽນຫຍັງໃນບົດຄວາມນີ້?
3 ໃນບົດຄວາມນີ້ ເຮົາຈະມາເບິ່ງສອງຄຳຖາມທີ່ວ່າ ຜູ້ທີ່ເລືອກຢູ່ຝ່າຍການປົກຄອງຂອງພະເຢໂຫວາຈະເປັນແນວໃດ? ແລະຜູ້ທີ່ເລືອກຢູ່ຝ່າຍສັດຮ້າຍສີແດງສົດທີ່ຢູ່ໃນປຶ້ມພະນິມິດຈະເປັນແນວໃດ?
ຜູ້ທີ່ຮັບໃຊ້ພະເຢໂຫວາຢ່າງສັດຊື່ຈະເປັນແນວໃດ?
4. ອັກຄະສາວົກໂຢຮັນເຫັນຄົນກຸ່ມໃດທີ່ຢູ່ກັບພະເຢຊູໃນສະຫວັນ?
4 ໃນນິມິດໜຶ່ງ ອັກຄະສາວົກໂຢຮັນເຫັນຄົນ 2 ກຸ່ມທີ່ຢູ່ຝ່າຍການປົກຄອງຂອງພະເຈົ້າແລະໄດ້ຮັບຊີວິດຕະຫຼອດໄປ. ຄົນກຸ່ມທຳອິດມີຈຳນວນ 144.000 ຄົນ. (ພນມ. 7:4) ເຂົາເຈົ້າມາຈາກໂລກນີ້ ແລະຈະໄດ້ຮ່ວມປົກຄອງໂລກກັບພະເຢຊູໃນສະຫວັນ. (ພນມ. 5:9, 10; 14:3, 4) ໃນນິມິດນັ້ນ ໂຢຮັນຍັງເຫັນເຂົາເຈົ້າຢືນຢູ່ຂ້າງພະເຢຊູເທິງພູເຂົາຊີໂອນທີ່ຢູ່ໃນສະຫວັນ.—ພນມ. 14:1
5. ອີກບໍ່ດົນຈະເກີດຫຍັງຂຶ້ນກັບຜູ້ຖືກເຈີມທີ່ຍັງມີຊີວິດຢູ່ໃນໂລກ?
5 ຕະຫຼອດຫຼາຍຮ້ອຍປີທີ່ຜ່ານມາ ຫຼາຍຄົນໄດ້ຖືກເລືອກໃຫ້ເຂົ້າມາເປັນ 144.000 ຄົນ. (ລກ. 12:32; ຣມ. 8:17) ແຕ່ໂຢຮັນບອກວ່າ ໃນສະໄໝສຸດທ້າຍ 144.000 ຄົນຈະມີຈຳນວນໜ້ອຍດຽວທີ່ເຫຼືອຢູ່ໃນໂລກ. “ຜູ້ທີ່ຍັງເຫຼືອ” ນີ້ຈະໄດ້ຮັບ “ກາປະທັບ” ຈາກພະເຢໂຫວາກ່ອນຄວາມທຸກລຳບາກຄັ້ງໃຫຍ່ຈະເລີ່ມຕົ້ນ. (ພນມ. 7:2, 3; 12:17) ແລະໃນລະຫວ່າງຄວາມທຸກລຳບາກຄັ້ງໃຫຍ່ ເຂົາເຈົ້າຈະຖືກຮັບຂຶ້ນໄປສະຫວັນເພື່ອໄປຢູ່ກັບຜູ້ຖືກເຈີມຄົນອື່ນໆທີ່ຕາຍໄປກ່ອນໜ້ານັ້ນ. ແລ້ວເຂົາເຈົ້າກໍຈະໄດ້ຮ່ວມປົກຄອງກັບພະເຢຊູໃນການປົກຄອງຂອງພະເຈົ້າ.—ມທ. 24:31; ພນມ. 5:9, 10
6-7. (ກ) ໂຢຮັນເຫັນຄົນກຸ່ມໃດອີກ ແລະເຮົາຮູ້ຫຍັງກ່ຽວກັບເຂົາເຈົ້າ? (ຂ) ເປັນຫຍັງ “ຜູ້ທີ່ຍັງເຫຼືອ” ແລະ “ຄົນຝູງໃຫຍ່” ຄວນສົນໃຈປຶ້ມພະນິມິດບົດ 7?
6 ຫຼັງຈາກທີ່ໂຢຮັນເຫັນ 144.000 ຄົນທີ່ຈະໄດ້ໄປສະຫວັນ ລາວກໍເຫັນຄົນອີກກຸ່ມໜຶ່ງທີ່ເອີ້ນວ່າ “ຄົນຝູງໃຫຍ່” ເຊິ່ງນັບຈຳນວນບໍ່ໄດ້. (ພນມ. 7:9, 10) ເຮົາຮູ້ຫຍັງກ່ຽວກັບເຂົາເຈົ້າ? ໂຢຮັນບອກວ່າ: “ພວກເຂົາເປັນຄົນທີ່ຜ່ານຄວາມທຸກລຳບາກຄັ້ງໃຫຍ່ ແລະໄດ້ຊັກເສື້ອຄຸມຂອງຕົວເອງແລະເຮັດໃຫ້ຂາວດ້ວຍເລືອດຂອງລູກແກະຂອງພະເຈົ້າ.” (ພນມ. 7:14) ຫຼັງຈາກທີ່ຄົນຝູງໃຫຍ່ລອດຜ່ານຄວາມທຸກລຳບາກຄັ້ງໃຫຍ່ ເຂົາເຈົ້າຈະມີຊີວິດຢູ່ໃນໂລກແລະໄດ້ຮັບພອນດີໆຫຼາຍຢ່າງ.—ເພງ. 37:9-11, 27-29; ສຸພາ. 2:21, 22; ພນມ. 7:16, 17
7 ບໍ່ວ່າເຮົາຈະຖືກເລືອກໃຫ້ໄປສະຫວັນຫຼືຢູ່ໃນໂລກນີ້ ເຮົາທຸກຄົນກໍຄວນຈະເຫັນພາບຂອງຕົວເອງໃນສິ່ງທີ່ຂຽນໄວ້ໃນພະນິມິດບົດ 7. ເພາະນັ້ນຈະເປັນເວລາທີ່ໜ້າຕື່ນເຕັ້ນຫຼາຍແທ້ໆສຳລັບຜູ້ທີ່ເລືອກຮັບໃຊ້ພະເຢໂຫວາ! ເຮົາຈະດີໃຈຫຼາຍທີ່ໄດ້ເລືອກຢູ່ຝ່າຍການປົກຄອງຂອງເພິ່ນ. ແລ້ວປຶ້ມພະນິມິດຍັງບອກເຮົາໃຫ້ຮູ້ຫຍັງອີກກ່ຽວກັບຄວາມທຸກລຳບາກຄັ້ງໃຫຍ່?—ມທ. 24:21
ຜູ້ທີ່ຕໍ່ຕ້ານພະເຈົ້າຈະເປັນແນວໃດ?
8. ຄວາມທຸກລຳບາກຄັ້ງໃຫຍ່ຈະເລີ່ມຕົ້ນຕອນໃດ ແລະຄົນສ່ວນຫຼາຍຈະເຮັດຫຍັງ?
8 ໃນບົດຄວາມກ່ອນເຮົາໄດ້ຮຽນແລ້ວວ່າ ອີກບໍ່ດົນອຳນາດການປົກຄອງຈະທຳລາຍບາບີໂລນໃຫຍ່ເຊິ່ງກໍຄືສາສະໜາປອມທັງໝົດທີ່ຢູ່ທົ່ວໂລກ. (ພນມ. 17:16, 17) ນີ້ຈະເປັນຈຸດເລີ່ມຕົ້ນຂອງຄວາມທຸກລຳບາກຄັ້ງໃຫຍ່. ແລ້ວເຫດການນີ້ຈະເຮັດໃຫ້ຫຼາຍຄົນເຂົ້າມາຮັບໃຊ້ພະເຢໂຫວາບໍ? ບໍ່. ເພາະໃນປຶ້ມພະນິມິດບົດ 6 ບອກວ່າ ໃນເວລານັ້ນຄົນທີ່ບໍ່ໄດ້ຮັບໃຊ້ພະເຢໂຫວາຈະໄປໝາຍເພິ່ງການປົກປ້ອງຈາກລະບົບການເມືອງແລະລະບົບການຄ້າຂອງໂລກນີ້ເຊິ່ງປຽບຄືກັບພູເຂົາ. ນີ້ສະແດງວ່າເຂົາເຈົ້າບໍ່ໄດ້ເລືອກຢູ່ຝ່າຍການປົກຄອງຂອງພະເຢໂຫວາ ແລະເພິ່ນກໍຈະເບິ່ງວ່າເຂົາເຈົ້າເປັນຄືກັບຜູ້ທີ່ຕໍ່ຕ້ານເພິ່ນ.—ລກ. 11:23; ພນມ. 6:15-17
9. ໃນລະຫວ່າງຄວາມທຸກລຳບາກຄັ້ງໃຫຍ່ ຜູ້ຮັບໃຊ້ຂອງພະເຢໂຫວາຈະຕ່າງຈາກຄົນອື່ນແນວໃດ ແລະຜົນເປັນແນວໃດ?
9 ໃນລະຫວ່າງຄວາມທຸກລຳບາກຄັ້ງໃຫຍ່ ຜູ້ຮັບໃຊ້ຂອງພະເຢໂຫວາຈະຕ່າງຈາກຄົນອື່ນ. ເພາະເຂົາເຈົ້າເປັນກຸ່ມດຽວທີ່ຍັງນະມັດສະການພະເຢໂຫວາແລະບໍ່ກ່ຽວຂ້ອງກັບ “ສັດຮ້າຍ.” (ພນມ. 13:14-17) ນີ້ຈະເຮັດໃຫ້ຜູ້ທີ່ຕໍ່ຕ້ານພະເຢໂຫວາໃຈຮ້າຍຫຼາຍ ແລະຊາດຕ່າງໆກໍຈະລວມຕົວກັນເພື່ອໂຈມຕີປະຊາຊົນຂອງພະເຢໂຫວາທົ່ວໂລກ. ຄຳພີໄບເບິນບອກວ່າ ນີ້ເປັນການໂຈມຕີຂອງໂຄກແຫ່ງມາໂຄກ.—ເອເຊກ. 38:14-16
10. ຕາມພະນິມິດ 19:19-21 ພະເຢໂຫວາຈະເຮັດແນວໃດເມື່ອປະຊາຊົນຂອງເພິ່ນຖືກໂຈມຕີ?
10 ພະເຢໂຫວາຈະເຮັດແນວໃດເມື່ອປະຊາຊົນຂອງເພິ່ນຖືກໂຈມຕີ? ເພິ່ນບອກວ່າ: “ເຮົາຈະໃຈຮ້າຍຫຼາຍ.” (ເອເຊກ. 38:18, 21-23, ລ.ມ.) ໃນພະນິມິດບົດ 19 ບອກວ່າ ພະເຢໂຫວາຈະສົ່ງພະເຢຊູມາປົກປ້ອງຜູ້ຮັບໃຊ້ຂອງເພິ່ນແລະທຳລາຍພວກສັດຕູ. ພະເຢຊູພ້ອມກັບ “ກອງທັບໃນສະຫວັນ” ເຊິ່ງລວມມີທູດສະຫວັນທີ່ສັດຊື່ ແລະ 144.000 ຄົນຈະມາຕໍ່ສູ້ກັບໂຄກແຫ່ງມາໂຄກ. (ພນມ. 17:14; 19:11-15) ສົງຄາມນີ້ຈະທຳລາຍຜູ້ຄົນແລະອົງການຕ່າງໆທີ່ຕໍ່ຕ້ານພະເຢໂຫວາ!—ອ່ານພະນິມິດ 19:19-21
ຫຼັງຈາກສົງຄາມ ຈະມີງານແຕ່ງດອງ
11. ເຫດການເດັ່ນທີ່ສຸດທີ່ຢູ່ໃນປຶ້ມພະນິມິດແມ່ນເຫດການຫຍັງ?
11 ລອງນຶກພາບວ່າຜູ້ຮັບໃຊ້ທີ່ສັດຊື່ທີ່ຢູ່ໃນໂລກຈະດີໃຈຫຼາຍສ່ຳໃດເມື່ອສັດຕູຂອງພະເຈົ້າຖືກທຳລາຍໝົດແລ້ວ. ນັ້ນເປັນເວລາທີ່ເຮົາທຸກຄົນມີຄວາມສຸກຫຼາຍ! ແລະເຖິງວ່າໃນສະຫວັນຈະດີໃຈຫຼາຍເມື່ອບາບີໂລນໃຫຍ່ຖືກທຳລາຍ ແຕ່ຍັງມີອີກສິ່ງໜຶ່ງທີ່ເຮັດໃຫ້ເຂົາເຈົ້າດີໃຈຫຼາຍກວ່ານັ້ນອີກ. (ພນມ. 19:1-3) ນັ້ນກໍຄື “ງານລ້ຽງແຕ່ງດອງຂອງລູກແກະຂອງພະເຈົ້າ” ເຊິ່ງເປັນເຫດການເດັ່ນທີ່ສຸດທີ່ຢູ່ໃນປຶ້ມພະນິມິດ.—ພນມ. 19:6-9
12. ຕາມພະນິມິດ 21:1, 2 ການແຕ່ງດອງຂອງລູກແກະຂອງພະເຈົ້າຈະເກີດຂຶ້ນເມື່ອໃດ?
12 ເຖິງວ່າ 144.000 ຄົນທັງໝົດຈະຕ້ອງຢູ່ໃນສະຫວັນກ່ອນທີ່ຈະມີສົງຄາມອາມາເຄໂດນ ແຕ່ນັ້ນຍັງບໍ່ແມ່ນເວລາທີ່ຈະມີການແຕ່ງດອງຂອງລູກແກະຂອງພະເຈົ້າ. (ອ່ານພະນິມິດ 21:1, 2) ສະນັ້ນ ການແຕ່ງດອງນີ້ຈະເກີດຂຶ້ນເມື່ອໃດ? ຈະເກີດຂຶ້ນຫຼັງຈາກ ທີ່ສົງຄາມອາມາເຄໂດນຈົບລົງແລ້ວ ແລະພວກສັດຕູຂອງພະເຈົ້າກໍຖືກທຳລາຍ.—ເພງ. 45:3, 4, 13-17
13. ການແຕ່ງດອງຂອງລູກແກະຂອງພະເຈົ້າເປັນແນວໃດ?
13 ການແຕ່ງດອງຂອງລູກແກະຂອງພະເຈົ້າໝາຍເຖິງຫຍັງ? ຄືກັບການແຕ່ງດອງທົ່ວໄປທີ່ເຮັດໃຫ້ເຈົ້າບ່າວແລະເຈົ້າສາວເປັນໜຶ່ງດຽວກັນ ການແຕ່ງດອງຂອງລູກແກະຂອງພະເຈົ້າກໍເຮັດໃຫ້ພະເຢຊູເຊິ່ງເປັນກະສັດ ແລະ 144.000 ຄົນເຊິ່ງເປັນ “ເຈົ້າສາວ” ເປັນໜຶ່ງດຽວກັນ. ເຫດການນີ້ເປັນການເລີ່ມຕົ້ນທີ່ພະເຢຊູແລະ 144.000 ຄົນຈະປົກຄອງໂລກ 1.000 ປີ.—ພນມ. 20:6
ເມືອງທີ່ສະຫງ່າງາມແລະອະນາຄົດຂອງເຮົາ
ພະນິມິດບົດ 21 ເວົ້າເຖິງເຢຣູຊາເລັມໃໝ່ທີ່ “ກຳລັງລົງມາຈາກສະຫວັນ ເມືອງນັ້ນມາຈາກພະເຈົ້າ.” ໃນລະຫວ່າງ 1.000 ປີ ເມືອງນີ້ຈະເຮັດໃຫ້ຄົນທີ່ເຊື່ອຟັງໄດ້ຮັບພອນຫຼາຍຢ່າງ (ເບິ່ງຂໍ້ 14-16)
14-15. ປຶ້ມພະນິມິດບົດ 21 ໄດ້ສົມທຽບ 144.000 ຄົນເປັນຄືກັບຫຍັງ? (ເບິ່ງຮູບໜ້າປົກ)
14 ໃນປຶ້ມພະນິມິດບົດ 21 ຍັງໄດ້ສົມທຽບ 144.000 ຄົນເປັນຄືກັບເມືອງງາມໆທີ່ເອີ້ນວ່າ “ເຢຣູຊາເລັມໃໝ່.” (ພນມ. 21:2, 9) ເມືອງນີ້ມີ “ຫີນຮາກຖານ 12 ກ້ອນ ເທິງຫີນເຫຼົ່ານັ້ນມີຊື່ຂອງອັກຄະສາວົກ 12 ຄົນຂອງລູກແກະຂອງພະເຈົ້າ.” ໂຢຮັນສົນໃຈເລື່ອງນີ້ຫຼາຍ ເພາະລາວເຫັນຊື່ຂອງຕົວເອງຂຽນຢູ່ເທິງຫີນກ້ອນໜຶ່ງ. ຈັ່ງແມ່ນເປັນສິດທິພິເສດຫຼາຍແທ້ໆ!—ພນມ. 21:10-14; ອຟຊ. 2:20
15 ເມືອງເຢຣູຊາເລັມໃໝ່ນີ້ຕ່າງຈາກເມືອງອື່ນໆ ເພາະເມືອງນີ້ມີຖະໜົນສາຍຫຼັກທີ່ເປັນຄຳບໍລິສຸດ ປະຕູ 12 ປ່ອງກໍເປັນໄຂ່ມຸກ 12 ເມັດ ຝາຕ່າງໆແລະຮາກຖານກຳແພງເມືອງກໍປະກອບດ້ວຍຫີນແລະເພັດພອຍທີ່ມີຄ່າ. ແລະເມືອງນີ້ຍັງມີລວງຍາວ ລວງກວ້າງແລະລວງສູງເທົ່າກັນໝົດ. (ພນມ. 21:15-21) ແຕ່ໂຢຮັນສັງເກດວ່າມີບາງຢ່າງທີ່ຂາດຫາຍໄປໃນເມືອງນີ້. ລາວບອກວ່າ: “ຂ້ອຍບໍ່ເຫັນວ່າມີວິຫານໃນເມືອງນັ້ນ ເພາະພະເຢໂຫວາພະເຈົ້າຜູ້ມີລິດເດດສູງສຸດເປັນວິຫານຂອງເມືອງນັ້ນແລະລູກແກະຂອງພະອົງກໍເປັນຄືກັນ. ເມືອງນັ້ນບໍ່ຕ້ອງໃຊ້ແສງຈາກດວງຕາເວັນຫຼືດວງເດືອນ ຍ້ອນລັດສະໝີຂອງພະເຈົ້າເຮັດໃຫ້ເມືອງນັ້ນສະຫວ່າງສະໄຫວ ແລະລູກແກະຂອງພະເຈົ້າເປັນຕະກຽງຂອງເມືອງນັ້ນ.” (ພນມ. 21:22, 23) ເຫັນໄດ້ວ່າ ພະເຢໂຫວາແລະພະເຢຊູເປັນວິຫານຂອງເມືອງນີ້ ແລະ 144.000 ຄົນທີ່ປະກອບກັນເປັນເມືອງເຢຣູຊາເລັມໃໝ່ກໍສາມາດເຂົ້າຫາພະເຢໂຫວາໄດ້ໂດຍກົງ.—ຮຣ. 7:27; ພນມ. 22:3, 4
ໃຜຈະໄດ້ຮັບປະໂຫຍດຈາກພອນຕ່າງໆທີ່ປຽບຄືກັບ “ແມ່ນ້ຳ” ແລະ “ຕົ້ນໄມ້”? (ເບິ່ງຂໍ້ 16-17)
16. ຈະເກີດຫຍັງຂຶ້ນກັບມະນຸດໃນລະຫວ່າງການປົກຄອງ 1.000 ປີ?
16 ເຖິງວ່າຈະເປັນເລື່ອງທີ່ໜ້າຕື່ນເຕັ້ນສຳລັບຜູ້ຖືກເຈີມເມື່ອຄິດເຖິງເມືອງນີ້. ແຕ່ຜູ້ທີ່ມີຄວາມຫວັງຢູ່ໃນໂລກກໍຮູ້ສຶກຕື່ນເຕັ້ນຄືກັນ ເພາະໃນລະຫວ່າງການປົກຄອງ 1.000 ປີ ເມືອງເຢຣູຊາເລັມໃໝ່ຈະໃຫ້ພອນທີ່ດີຫຼາຍຢ່າງ. ໂຢຮັນໄດ້ເຫັນພອນເຫຼົ່ານັ້ນໄຫຼມາຄືກັບແມ່ນ້ຳສາຍໜຶ່ງທີ່ມີ “ນ້ຳທີ່ໃຫ້ຊີວິດ” ແລະທັງສອງຟາກຂອງແມ່ນ້ຳກໍມີ “ຕົ້ນໄມ້ທີ່ໃຫ້ຊີວິດ” ເຊິ່ງມີໃບໄມ້ທີ່ “ປິ່ນປົວຜູ້ຄົນຈາກຊາດຕ່າງໆ.” (ພນມ. 22:1, 2) ມະນຸດທຸກຄົນຈະໄດ້ຮັບປະໂຫຍດຈາກສິ່ງດີໆເຫຼົ່ານີ້ ແລະໃນທີ່ສຸດທຸກຄົນທີ່ເຊື່ອຟັງພະເຢໂຫວາຈະກາຍເປັນຄົນທີ່ສົມບູນແບບ ເຂົາເຈົ້າຈະບໍ່ເຈັບປ່ວຍ ບໍ່ໂສກເສົ້າ ແລະຮ້ອງໄຫ້ເສຍໃຈ.—ພນມ. 21:3-5
17. ຕາມພະນິມິດ 20:11-13 ມີໃຜແດ່ທີ່ຈະໄດ້ຮັບປະໂຫຍດຈາກການປົກຄອງ 1.000 ປີ?
17 ມີໃຜແດ່ທີ່ຈະໄດ້ຮັບປະໂຫຍດຈາກສິ່ງດີໆທີ່ຈະເກີດຂຶ້ນໃນອະນາຄົດ? ກຸ່ມທຳອິດແມ່ນຄົນຝູງໃຫຍ່ທີ່ລອດຜ່ານສົງຄາມອາມາເຄໂດນແລະລູກຫຼານຂອງເຂົາເຈົ້າທີ່ຈະເກີດມາໃນໂລກໃໝ່. ແຕ່ຍັງມີອີກກຸ່ມໜຶ່ງເພາະໃນພະນິມິດບົດ 20 ສັນຍາວ່າຄົນຕາຍຈະຖືກປຸກໃຫ້ກັບຄືນມາມີຊີວິດອີກ. (ອ່ານພະນິມິດ 20:11-13) ທັງ “ຄົນດີ” ທີ່ຕາຍໄປດົນແລ້ວ ແລະ “ຄົນຊົ່ວ” ເຊິ່ງໝາຍເຖິງຜູ້ທີ່ບໍ່ມີໂອກາດໄດ້ຮຽນຮູ້ກ່ຽວກັບພະເຢໂຫວາຈະຖືກປຸກຄືນມາໃຫ້ມີຊີວິດອີກຄັ້ງ. (ກຈກ. 24:15; ຢຮ. 5:28, 29) ແຕ່ນີ້ໝາຍຄວາມວ່າທຸກຄົນຈະຖືກປຸກໃຫ້ຄືນມາຈາກຕາຍໃນລະຫວ່າງການປົກຄອງ 1.000 ປີບໍ? ບໍ່. ຜູ້ທີ່ປະຕິເສດການຮັບໃຊ້ພະເຢໂຫວາກ່ອນຕາຍຈະບໍ່ຖືກປຸກ ເພາະເຂົາເຈົ້າໄດ້ພິສູດແລ້ວວ່າຕົວເອງບໍ່ຄູ່ຄວນທີ່ຈະໄດ້ຊີວິດໃນໂລກໃໝ່.—ມທ. 25:46; 2 ທຊ. 1:9; ພນມ. 17:8; 20:15
ການທົດສອບຄັ້ງສຸດທ້າຍ
18. ຄົນທີ່ມີຊີວິດໃນທ້າຍ 1.000 ປີຈະເປັນແນວໃດ?
18 ເມື່ອຮອດທ້າຍ 1.000 ປີ ທຸກຄົນທີ່ມີຊີວິດຢູ່ໃນໂລກຈະກາຍເປັນຄົນທີ່ສົມບູນແບບ. ບໍ່ມີໃຜທີ່ຈະໄດ້ຮັບຜົນຈາກບາບຂອງອາດາມອີກແລ້ວ (ຣມ. 5:12) ເພາະບາບຈາກອາດາມຈະຖືກລົບລ້າງອອກໄປໝົດ. ນີ້ສະແດງວ່າໃນຕອນທ້າຍ 1.000 ປີ ທຸກຄົນທີ່ຢູ່ໃນໂລກຈະ “ໄດ້ຊີວິດ” ເພາະເຂົາເຈົ້າຈະກາຍເປັນຄົນທີ່ສົມບູນແບບ.—ພນມ. 20:5
19. ເປັນຫຍັງຈຶ່ງມີການທົດສອບຄັ້ງສຸດທ້າຍ?
19 ເຮົາຮູ້ວ່າພະເຢຊູຮັກສາຄວາມສັດຊື່ຕໍ່ພະເຢໂຫວາເມື່ອຊາຕານທົດສອບເພິ່ນຫຼາຍເທື່ອ. ແຕ່ຖ້າຊາຕານເຮັດແບບນີ້ກັບມະນຸດທີ່ສົມບູນແບບທຸກຄົນເດ ເຂົາເຈົ້າຈະສັດຊື່ບໍ? ແຕ່ລະຄົນຕ້ອງໄດ້ພິສູດຄວາມສັດຊື່ຕໍ່ພະເຢໂຫວາເມື່ອຊາຕານຖືກປ່ອຍອອກຈາກບ່ອນກັກຂັງໃນຕອນທ້າຍ 1.000 ປີ. (ພນມ. 20:7) ຄົນທີ່ພິສູດວ່າສັດຊື່ໃນລະຫວ່າງການທົດສອບຄັ້ງສຸດທ້າຍຈະໄດ້ຮັບຊີວິດຕະຫຼອດໄປແລະມີເສລີພາບແທ້ໆ. (ຣມ. 8:21) ແຕ່ຜູ້ບໍ່ສັດຊື່ຈະຖືກທຳລາຍໄປພ້ອມກັບຊາຕານແລະພັກພວກຂອງມັນ.—ພນມ. 20:8-10
20. ເຈົ້າຮູ້ສຶກແນວໃດຕໍ່ຄຳພະຍາກອນຕ່າງໆທີ່ຢູ່ໃນປຶ້ມພະນິມິດ?
20 ຫຼັງຈາກທີ່ໄດ້ເບິ່ງພາບລວມຂອງປຶ້ມພະນິມິດ ເຈົ້າຮູ້ສຶກແນວໃດ? ເຈົ້າຄືຊິຮູ້ສຶກຕື່ນເຕັ້ນແມ່ນບໍທີ່ໄດ້ເຫັນພາບຂອງຕົວເອງທີ່ຢູ່ໃນຄຳພະຍາກອນນັ້ນ? ແລະເຈົ້າກໍຄືຊິຢາກຊວນຄົນອື່ນໃຫ້ມານະມັດສະການພະເຢໂຫວາຄືກັນແມ່ນບໍ? (ພນມ. 22:17) ສິ່ງທີ່ຈະເກີດຂຶ້ນໃນອະນາຄົດເຮັດໃຫ້ເຮົາຮູ້ສຶກຄືກັບໂຢຮັນທີ່ບອກວ່າ: “ອາແມນ! ເຊີນມາ ພະເຢຊູຜູ້ເປັນນາຍ.”—ພນມ. 22:20
ເພງ 27 ລູກຂອງພະເຈົ້າໄດ້ຮັບກຽດ
[ຂໍ້ຄວາມໄຂເງື່ອນ]
a ນີ້ເປັນບົດຄວາມທີສາມຂອງບົດຄວາມຊຸດກ່ຽວກັບປຶ້ມພະນິມິດ. ໃນບົດຄວາມນີ້ ເຮົາຈະເຫັນວ່າຜູ້ທີ່ສັດຊື່ຕໍ່ພະເຢໂຫວາຈະມີອະນາຄົດທີ່ດີ ແຕ່ຜູ້ທີ່ຕໍ່ຕ້ານການປົກຄອງຂອງເພິ່ນຈະມີຈຸດຈົບທີ່ບໍ່ດີ.
