ບົດຄວາມສຶກສາທີ 23
ຜູ້ທີ່ເປັນພໍ່ແມ່ ຂໍເຈົ້າຊ່ວຍລູກໃຫ້ຮັກພະເຢໂຫວາ
“ເຈົ້າຕ້ອງຮັກພະເຢໂຫວາພະເຈົ້າຂອງເຈົ້າສຸດຫົວໃຈ ສຸດຊີວິດ ແລະສຸດຄວາມຄິດ.”—ມທ. 22:37
ເພງ 134 ລູກເປັນຂອງຂວັນຈາກພະເຈົ້າ
ໃຈຄວາມສຳຄັນ a
1-2. ເມື່ອສະພາບການປ່ຽນໄປ ເປັນຫຍັງຫຼັກການໃນຄຳພີໄບເບິນຈຶ່ງມີຄວາມໝາຍຕໍ່ເຮົາຫຼາຍຂຶ້ນ?
ໃນມື້ແຕ່ງດອງ ເຈົ້າບ່າວເຈົ້າສາວຈະຕັ້ງໃຈຟັງຄຳບັນຍາຍກ່ຽວກັບການແຕ່ງດອງ. ຫຼັກການໃນຄຳພີໄບເບິນທີ່ຢູ່ໃນຄຳບັນຍາຍນັ້ນບໍ່ແມ່ນເລື່ອງໃໝ່ສຳລັບເຂົາເຈົ້າ. ແຕ່ຫຼັງຈາກທີ່ແຕ່ງດອງແລ້ວ ຫຼັກການເຫຼົ່ານັ້ນຈະມີຄວາມໝາຍຕໍ່ເຂົາເຈົ້າຫຼາຍຂຶ້ນ. ຍ້ອນຫຍັງ? ຍ້ອນເຂົາເຈົ້າຈະໄດ້ໃຊ້ຫຼັກການເຫຼົ່ານັ້ນໃນຊີວິດຄູ່.
2 ຜູ້ທີ່ເປັນພໍ່ແມ່ໃໝ່ໆກໍຄືກັນ ທີ່ຜ່ານມາເຂົາເຈົ້າອາດເຄີຍໄດ້ຍິນຫຼັກການເລື່ອງການລ້ຽງລູກທີ່ຢູ່ໃນຄຳບັນຍາຍ. ແຕ່ຕອນນີ້ຫຼັກການເຫຼົ່ານັ້ນຈະມີຄວາມໝາຍຕໍ່ເຂົາເຈົ້າຫຼາຍຂຶ້ນ ເພາະເຂົາເຈົ້າຈະຕ້ອງໄດ້ລ້ຽງລູກຂອງຕົວເອງ. ນີ້ເປັນໜ້າທີ່ຮັບຜິດຊອບທີ່ໃຫຍ່ແທ້ໆ! ເມື່ອສະພາບການປ່ຽນໄປ ວິທີທີ່ເຮົາເບິ່ງຫຼັກການໃນຄຳພີໄບເບິນກໍປ່ຽນໄປນຳ. ນີ້ຈຶ່ງເປັນເຫດຜົນທີ່ພະເຢໂຫວາບອກຜູ້ຮັບໃຊ້ຂອງເພິ່ນໃຫ້ອ່ານຄຳພີໄບເບິນທຸກມື້ ຄືກັບທີ່ເພິ່ນໄດ້ສັ່ງກະສັດອິດສະຣາເອນໃຫ້ອ່ານແລະຄິດຕຶກຕອງຄຳພີໄບເບິນ “ຕະຫຼອດ” ຊີວິດຂອງເຂົາເຈົ້າ.—ບັນຍັດ. 17:19, ລ.ມ.
3. ເຮົາຈະຮຽນຫຍັງໃນບົດຄວາມນີ້?
3 ຜູ້ທີ່ເປັນພໍ່ແມ່ ເຈົ້າໄດ້ຮັບວຽກມອບໝາຍທີ່ພິເສດຢ່າງໜຶ່ງນັ້ນກໍຄື ການສອນລູກໃຫ້ຮູ້ຈັກພະເຢໂຫວາ. ແຕ່ເຈົ້າຕ້ອງບໍ່ພຽງແຕ່ສອນລູກໃຫ້ຮູ້ຈັກພະເຢໂຫວາເທົ່ານັ້ນ ເພາະເຈົ້າຕ້ອງສອນໃຫ້ຮັກພະເຢໂຫວານຳ. ແລ້ວ ເຈົ້າຈະສອນລູກໃຫ້ຮັກພະເຢໂຫວາໄດ້ແນວໃດ? ໃນບົດຄວາມນີ້ເຮົາຈະມາເບິ່ງ 4 ຫຼັກການໃນຄຳພີໄບເບິນທີ່ຈະຊ່ວຍຜູ້ທີ່ເປັນພໍ່ແມ່ ແລະເບິ່ງວ່າພໍ່ແມ່ຈະໄດ້ຮັບປະໂຫຍດແນວໃດຈາກການເຮັດຕາມຫຼັກການນັ້ນ.—2 ຕມ. 3:16
4 ຫຼັກການທີ່ຈະຊ່ວຍພໍ່ແມ່
4. ຫຼັກການໜຶ່ງທີ່ຈະຊ່ວຍພໍ່ແມ່ໃຫ້ຊ່ວຍລູກໃຫ້ຮັກພະເຢໂຫວາແມ່ນຫຍັງ? (ຢາໂກໂບ 1:5)
4 ຫຼັກການທີ 1: ຂໍຄຳແນະນຳຈາກພະເຢໂຫວາ. ໃຫ້ເຈົ້າອະທິດຖານຂໍພະເຢໂຫວາຊ່ວຍໃຫ້ເຈົ້າມີສະຕິປັນຍາເພື່ອຈະສອນລູກໃຫ້ຮັກພະເຢໂຫວາຫຼາຍຂຶ້ນ. (ອ່ານຢາໂກໂບ 1:5) ພະເຢໂຫວາເປັນຜູ້ທີ່ໃຫ້ຄຳແນະນຳໄດ້ດີທີ່ສຸດ. ຍ້ອນຫຍັງ? ມີເຫດຜົນ 2 ຢ່າງຄື: (1) ພະເຢໂຫວາເປັນພໍ່ທີ່ມີປະສົບການຫຼາຍທີ່ສຸດ. (ເພງ. 36:9) (2) ຄຳແນະນຳຂອງເພິ່ນດີສະເໝີ.—ເອຊາ. 48:17
5. (ກ) ພະເຢໂຫວາໄດ້ຈັດກຽມຫຍັງແດ່ເພື່ອຊ່ວຍຜູ້ທີ່ເປັນພໍ່ແມ່? (ຂ) ຕາມທີ່ເຫັນໃນວິດີໂອ ເຈົ້າໄດ້ບົດຮຽນຫຍັງຈາກພີ່ນ້ອງອະບິລິໂອແລະອູລາ ອາໂມລິມໃນການລ້ຽງລູກ?
5 ພະເຢໂຫວາໄດ້ຈັດໃຫ້ມີຄວາມຮູ້ຫຼາຍຢ່າງຜ່ານທາງຄຳພີໄບເບິນແລະອົງການຂອງເພິ່ນເພື່ອຊ່ວຍເຈົ້າໃຫ້ຊ່ວຍລູກໃຫ້ຮັກພະເຢໂຫວາ. (ມທ. 24:45) ຕົວຢ່າງເຊັ່ນ: ເຈົ້າອາດຈະຊອກຫາຄຳແນະນຳໃນບົດຄວາມຊຸດທີ່ຊື່ວ່າ “ຄຳແນະນຳສຳລັບຄອບຄົວ” ທີ່ຢູ່ໃນປຶ້ມຕື່ນເຖີດ! (ພາສາໄທ) ແລະຕອນນີ້ກໍມີຢູ່ໃນເວັບໄຊ jw.org. ນອກຈາກນັ້ນ ໃນເວັບໄຊນີ້ຍັງມີວິດີໂອຫຼາຍເລື່ອງທີ່ຈະຊ່ວຍພໍ່ແມ່ໃຫ້ໃຊ້ຫຼັກການຂອງພະເຢໂຫວາໃນການລ້ຽງລູກ. b—ສຸພາ. 2:4-6
6. ພໍ່ຄົນໜຶ່ງຮູ້ສຶກແນວໃດຕໍ່ຄຳແນະນຳທີ່ໄດ້ຮັບຈາກອົງການຂອງພະເຢໂຫວາ?
6 ພໍ່ແມ່ຫຼາຍຄົນຮູ້ສຶກເຫັນຄ່າການຊ່ວຍເຫຼືອຈາກອົງການຂອງພະເຢໂຫວາ. ໂຈເຊິ່ງເປັນພໍ່ຄົນໜຶ່ງບອກວ່າ: “ການລ້ຽງລູກ 3 ຄົນໃຫ້ຢູ່ໃນຄວາມຈິງບໍ່ງ່າຍເລີຍ. ຂ້ອຍກັບເມຍໄດ້ອະທິດຖານຂໍຄວາມຊ່ວຍເຫຼືອຈາກພະເຢໂຫວາເລື້ອຍໆ ແລະເຮົາກໍຮູ້ສຶກວ່າວິດີໂອແລະບົດຄວາມຕ່າງໆມາໃນເວລາທີ່ເໝາະສົມແທ້ໆ ເພາະຊ່ວຍເຮົາໃຫ້ຮັບມືກັບບັນຫາທີ່ກຳລັງເຈິຢູ່. ນີ້ຈຶ່ງເຮັດໃຫ້ເຮົາມັກໝາຍເພິ່ງຄຳແນະນຳ ຂອງພະເຢໂຫວາ.” ໂຈກັບເມຍເຫັນວ່າວິດີໂອແລະບົດຄວາມຕ່າງໆໄດ້ຊ່ວຍລູກຂອງເຂົາເຈົ້າໃຫ້ໃກ້ຊິດກັບພະເຢໂຫວາຫຼາຍຂຶ້ນ.
7. ເປັນຫຍັງຈຶ່ງສຳຄັນທີ່ພໍ່ແມ່ຈະພະຍາຍາມເປັນຕົວຢ່າງທີ່ດີໃຫ້ລູກ? (ໂຣມ 2:21)
7 ຫຼັກການທີ 2: ສອນລູກໂດຍເປັນຕົວຢ່າງທີ່ດີ. ລູກມັກຈະເບິ່ງແລະຮຽນແບບສິ່ງທີ່ພໍ່ແມ່ເຮັດ. ດັ່ງນັ້ນ ພໍ່ແມ່ຄວນພະຍາຍາມເຮັດດີທີ່ສຸດເພື່ອຈະເປັນຕົວຢ່າງທີ່ດີໃຫ້ລູກ ເຖິງວ່າພໍ່ແມ່ຈະເປັນຄົນທີ່ບໍ່ສົມບູນແບບກໍຕາມ. (ອ່ານໂຣມ 2:21; ຣມ. 3:23) ພໍ່ຄົນໜຶ່ງໄດ້ເວົ້າກ່ຽວກັບລູກວ່າ: “ລູກເປັນຄືກັບຟອງນ້ຳທີ່ດູດຊຶມເອົາທຸກສິ່ງທີ່ຢູ່ໃກ້ໂຕ ແລະລູກກໍຈະເວົ້າໃຫ້ເຮົາເມື່ອເຮົາບໍ່ໄດ້ເຮັດຕາມສິ່ງທີ່ເຮົາສອນເຂົາເຈົ້າ.” ດັ່ງນັ້ນ ຖ້າເຮົາຢາກໃຫ້ລູກຮັກພະເຢໂຫວາ ເຮົາກໍຕ້ອງສະແດງໃຫ້ລູກເຫັນວ່າເຮົາຮັກພະເຢໂຫວາແທ້ໆ.
8-9. ເຈົ້າໄດ້ບົດຮຽນຫຍັງຈາກຄຳເວົ້າຂອງແອນດຣູແລະເອັມມາ?
8 ມີຫຼາຍວິທີທີ່ພໍ່ແມ່ຈະສອນລູກໃຫ້ຮັກພະເຢໂຫວາ. ພີ່ນ້ອງຊາຍຄົນໜຶ່ງຊື່ແອນດຣູ ອາຍຸ 17 ປີ ບອກວ່າ: “ພໍ່ແມ່ຂອງຂ້ອຍມັກຈະເນັ້ນຄວາມສຳຄັນຂອງການອະທິດຖານ. ພໍ່ຈະອະທິດຖານກັບຂ້ອຍທຸກຄືນ ເຖິງວ່າຂ້ອຍຈະອະທິດຖານສ່ວນຕົວແລ້ວກໍຕາມ. ພໍ່ແມ່ມັກຈະບອກເຮົາສະເໝີວ່າ ‘ລູກສາມາດລົມກັບພະເຢໂຫວາໃນເວລາໃດກໍໄດ້ທີ່ລູກຕ້ອງການ.’ ນີ້ຈຶ່ງເຮັດໃຫ້ຂ້ອຍເຫັນວ່າການອະທິດຖານເປັນເລື່ອງສຳຄັນຫຼາຍ ແລະຕອນນີ້ມັນຈຶ່ງງ່າຍທີ່ຂ້ອຍຈະອະທິດຖານເຖິງພະເຢໂຫວາແລະເບິ່ງວ່າເພິ່ນເປັນຄືກັບພໍ່ທີ່ຮັກຂ້ອຍ.” ພໍ່ແມ່ ຂໍໃຫ້ຈື່ໄວ້ວ່າຄວາມຮັກທີ່ເຈົ້າມີຕໍ່ພະເຢໂຫວາຈະຊ່ວຍລູກໃຫ້ຮັກພະເຢໂຫວາໄດ້ຄືກັນ.
9 ໃຫ້ເຮົາມາເບິ່ງປະສົບການຂອງເອັມມາ. ພໍ່ຂອງລາວໄດ້ຖິ້ມຄອບຄົວ ແຖມຍັງປະໃຫ້ແມ່ໃຊ້ໜີ້ບັກຫຼາຍໆ. ເອັມມາເວົ້າວ່າ: “ເຖິງວ່າຫຼາຍເທື່ອແມ່ຈະມີເງິນບໍ່ພໍໃຊ້ ແຕ່ແມ່ກໍມັກຈະເວົ້າເຖິງວິທີທີ່ພະເຢໂຫວາເບິ່ງແຍງຜູ້ຮັບໃຊ້ຂອງເພິ່ນ. ຂ້ອຍເຫັນວ່າການໃຊ້ຊີວິດຂອງແມ່ສະແດງວ່າແມ່ມີຄວາມເຊື່ອຫຼາຍແທ້ໆ! ແມ່ຈະເຮັດຕາມສິ່ງທີ່ແມ່ສອນຕະຫຼອດ.” ບົດຮຽນແມ່ນຫຍັງ? ພໍ່ແມ່ສາມາດສອນລູກໂດຍເປັນຕົວຢ່າງທີ່ດີໃຫ້ກັບລູກ ເຖິງວ່າຈະຢູ່ໃນສະພາບການທີ່ລຳບາກກໍຕາມ.—ຄລຕ. 6:9
10. ພໍ່ແມ່ໃນອິດສະຣາເອນສະໄໝກ່ອນມີໂອກາດໃດແດ່ທີ່ຈະລົມກັບລູກ? (ພະບັນຍັດ 6:6, 7)
10 ຫຼັກການທີ 3: ລົມກັບລູກເລື້ອຍໆ. ພະເຢໂຫວາໄດ້ສັ່ງໃຫ້ຊາວອິດສະຣາເອນສອນລູກໃຫ້ຮຽນຮູ້ກ່ຽວກັບເພິ່ນເລື້ອຍໆ. (ອ່ານພະບັນຍັດ 6:6, 7) ພໍ່ແມ່ໃນສະໄໝນັ້ນມີຫຼາຍໂອກາດທີ່ຈະລົມກັບລູກແລະສອນລູກໃຫ້ຮັກພະເຢໂຫວາ. ຕົວຢ່າງເຊັ່ນ: ພໍ່ອາດຈະລົມກັບລູກຊາຍຕອນທີ່ເຂົາເຈົ້າມາຊ່ວຍປູກແລະເກັບກ່ຽວພືດຜົນ. ສ່ວນແມ່ກໍອາດຈະລົມກັບລູກສາວຕອນທີ່ເຂົາເຈົ້າມາຊ່ວຍຫຍິບຜ້າ ຕ່ຳຜ້າ ແລະເຮັດວຽກເຮືອນ. ເມື່ອພໍ່ແມ່ແລະລູກເຮັດວຽກນຳກັນ ເຂົາເຈົ້າກໍມີເວລາລົມກັນຫຼາຍເລື່ອງ ເຊັ່ນ: ເຂົາເຈົ້າອາດຈະເວົ້າເຖິງຄວາມດີຂອງພະເຢໂຫວາແລະວິທີທີ່ພະເຢໂຫວາເຄີຍຊ່ວຍຄອບຄົວຂອງເຂົາເຈົ້າມາແລ້ວ.
11. ໃນທຸກມື້ນີ້ພໍ່ແມ່ທີ່ເປັນຄລິດສະຕຽນສາມາດລົມກັບລູກໃນໂອກາດໃດ?
11 ຊີວິດໃນທຸກມື້ນີ້ຕ່າງຈາກສະໄໝກ່ອນ. ໃນຫຼາຍປະເທດພໍ່ແມ່ແລະລູກບໍ່ຄ່ອຍໄດ້ໃຊ້ເວລາຢູ່ນຳກັນ ເພາະພໍ່ແມ່ອາດຈະໄປເຮັດວຽກແລະລູກກໍອາດຈະໄປໂຮງຮຽນ. ດັ່ງນັ້ນ ພໍ່ແມ່ຕ້ອງຊອກຫາໂອກາດທີ່ຈະລົມກັບລູກເລື້ອຍໆ. (ອຟຊ. 5:15, 16; ຟລປ. 1:10) ການນະມັດສະການປະຈຳຄອບຄົວເປັນໂອກາດ ໜຶ່ງທີ່ພໍ່ແມ່ຈະລົມກັບລູກໄດ້. ພີ່ນ້ອງຊາຍຄົນໜຶ່ງທີ່ຊື່ອາເລັກຊັນເດີບອກວ່າ: “ພໍ່ຂ້ອຍມັກຈະຈັດການນະມັດສະການປະຈຳຄອບຄົວ ແລະບໍ່ຍອມໃຫ້ສິ່ງໃດກໍຕາມມາຂັດຂວາງເວລານີ້. ຫຼັງຈາກທີ່ນະມັດສະການປະຈຳຄອບຄົວແລ້ວໆ ພວກເຮົາກໍຈະລົມກັນເລື່ອງອື່ນ.”
12. ຫົວໜ້າຄອບຄົວຄວນຈື່ຫຍັງໄວ້ຕອນທີ່ນະມັດສະການປະຈຳຄອບຄົວ?
12 ຖ້າເຈົ້າເປັນຫົວໜ້າຄອບຄົວ ເຈົ້າຈະຊ່ວຍລູກໃຫ້ມ່ວນກັບການນະມັດສະການປະຈຳຄອບຄົວໄດ້ແນວໃດ? ເຈົ້າອາດຈະໃຊ້ປຶ້ມຊີວິດທີ່ມີຄວາມສຸກຕະຫຼອດໄປ! ເພື່ອສຶກສາກັບລູກ ເພາະປຶ້ມນີ້ຈະຊ່ວຍເຈົ້າໃຫ້ລົມກັບລູກຢ່າງມີຊີວິດຊີວາ. ເຈົ້າຄືຊິຢາກໃຫ້ລູກບອກວ່າເຂົາເຈົ້າຮູ້ສຶກແນວໃດແລະກັງວົນເລື່ອງຫຍັງ. ດັ່ງນັ້ນ ຢ່າໃຊ້ການນະມັດສະການປະຈຳຄອບຄົວເພື່ອຕຳໜິຫຼືສັ່ງສອນລູກ. ແລະຖ້າລູກເວົ້າບາງຢ່າງທີ່ຂັດກັບຫຼັກການໃນຄຳພີໄບເບິນກໍຢ່າຟ້າວໃຈຮ້າຍ ແຕ່ໃຫ້ຊົມເຊີຍລູກທີ່ເຂົາເຈົ້າກ້າເວົ້າຄວາມຮູ້ສຶກຂອງຕົວເອງອອກມາ ແລະເຮັດໃຫ້ລູກຮູ້ສຶກສະດວກໃຈທີ່ຈະເວົ້າໃນເທື່ອໜ້າ. ເມື່ອເຈົ້າຮູ້ວ່າລູກຮູ້ສຶກແນວໃດແທ້ໆ ເຈົ້າກໍຈະຊ່ວຍລູກໄດ້ຫຼາຍຂຶ້ນ.
13. ມີໂອກາດໃດອີກທີ່ພໍ່ແມ່ຈະຊ່ວຍລູກໃຫ້ໃກ້ຊິດກັບພະເຢໂຫວາ?
13 ຜູ້ທີ່ເປັນພໍ່ແມ່ ຂໍໃຫ້ເຈົ້າຊອກຫາໂອກາດໃນແຕ່ລະມື້ເພື່ອຈະຊ່ວຍລູກໃຫ້ໃກ້ຊິດກັບພະເຢໂຫວາ. ເຈົ້າບໍ່ຕ້ອງລໍຖ້າໃຫ້ຮອດມື້ທີ່ຈະສຶກສາຄຳພີໄບເບິນ ແລ້ວຈຶ່ງສອນລູກກ່ຽວກັບພະເຢໂຫວາ. ແມ່ຄົນໜຶ່ງທີ່ຊື່ລິສາບອກວ່າ: “ເຮົາຈະໃຊ້ສິ່ງທີ່ຢູ່ອ້ອມຕົວເຮົາເພື່ອສອນລູກກ່ຽວກັບພະເຢໂຫວາ. ຕົວຢ່າງເຊັ່ນ ເມື່ອໂຕໝາເຮັດທ່າທາງບາງຢ່າງທີ່ເຮັດໃຫ້ລູກຍິ້ມແລະຫົວ ເຮົາກໍຈະບອກວ່າຍ້ອນພະເຢໂຫວາເປັນພະເຈົ້າທີ່ມີຄວາມສຸກ ສິ່ງຕ່າງໆທີ່ເພິ່ນສ້າງຈຶ່ງເຮັດໃຫ້ເຮົາມີຄວາມສຸກ.”
14. ເປັນຫຍັງຈຶ່ງສຳຄັນທີ່ພໍ່ແມ່ຈະຊ່ວຍລູກໃຫ້ມີໝູ່ທີ່ດີ? (ສຸພາສິດ 13:20)
14 ຫຼັກການທີ 4: ຊ່ວຍລູກໃຫ້ມີໝູ່ທີ່ດີ. ຄຳພີໄບເບິນບອກຢ່າງຈະແຈ້ງວ່າໝູ່ສົ່ງຜົນຕໍ່ເຮົາທັງດ້ານດີແລະດ້ານທີ່ບໍ່ດີ. (ອ່ານສຸພາສິດ 13:20) ຜູ້ທີ່ເປັນພໍ່ແມ່ ເຈົ້າຮູ້ຈັກໝູ່ຂອງລູກບໍ? ເຈົ້າເຄີຍ ເຫັນແລະລົມກັບເຂົາເຈົ້າບໍ? ເຈົ້າຈະເຮັດແນວໃດເພື່ອຈະຊ່ວຍລູກໃຫ້ເປັນໝູ່ກັບຜູ້ທີ່ຮັກພະເຢໂຫວາ? (1 ກຣ. 15:33) ເຈົ້າສາມາດຊ່ວຍລູກໃຫ້ເລືອກໝູ່ທີ່ດີໄດ້ໂດຍຊວນພີ່ນ້ອງທີ່ມີຄວາມເຊື່ອເຂັ້ມແຂງມາຫຼິ້ນແລະເຮັດກິດຈະກຳອື່ນໆກັບຄອບຄົວເຈົ້າ.—ເພງ. 119:63
15. ພໍ່ແມ່ຈະເຮັດແນວໃດເພື່ອຊ່ວຍລູກໃຫ້ມີໝູ່ທີ່ດີ?
15 ໃຫ້ເຮົາມາເບິ່ງປະສົບການຂອງພໍ່ຄົນໜຶ່ງທີ່ຊື່ໂທນີ. ລາວກັບເມຍໄດ້ເຮັດຫຼາຍຢ່າງເພື່ອຊ່ວຍລູກໃຫ້ມີໝູ່ທີ່ດີ. ລາວບອກວ່າ “ຫຼາຍປີທີ່ຜ່ານມາ ຂ້ອຍກັບເມຍໄດ້ຊວນພີ່ນ້ອງທີ່ມີອາຍຸແລະວັດທະນະທຳທີ່ແຕກຕ່າງກັນມາກິນເຂົ້ານຳກັນ ແລະມາຮ່ວມການນະມັດສະການປະຈຳຄອບຄົວ. ວິທີນີ້ຊ່ວຍເຮົາໃຫ້ຮູ້ຈັກຜູ້ທີ່ຮັກແລະຮັບໃຊ້ພະເຢໂຫວາຢ່າງມີຄວາມສຸກ. ເຮົາຍັງຮູ້ສຶກວ່າເປັນສິດທິພິເສດຫຼາຍທີ່ມີຜູ້ດູແລໝວດ ມິດຊັນນາຣີ ແລະພີ່ນ້ອງຄົນອື່ນໆມາພັກຢູ່ເຮືອນເຮົາ ເພາະປະສົບການ ຄວາມຫ້າວຫັນຕໍ່ວຽກປະກາດແລະນ້ຳໃຈເສຍສະລະຂອງເຂົາເຈົ້າມີຜົນຕໍ່ລູກຂອງເຮົາ ແລະຊ່ວຍລູກໃຫ້ໃກ້ຊິດກັບພະເຢໂຫວາ.” ຜູ້ທີ່ເປັນພໍ່ແມ່ ຂໍໃຫ້ເຈົ້າຕັ້ງໃຈຊ່ວຍລູກໃຫ້ມີໝູ່ທີ່ດີ.
ຢ່າໝົດຫວັງ!
16. ເຈົ້າຈະເຮັດແນວໃດຖ້າລູກບອກວ່າບໍ່ຢາກຮັບໃຊ້ພະເຢໂຫວາ?
16 ເຈົ້າຈະເຮັດແນວໃດຖ້າເຈົ້າເຮັດດີທີ່ສຸດແລ້ວ ແຕ່ລູກຍັງບອກວ່າບໍ່ຢາກຮັບໃຊ້ພະເຢໂຫວາ? ເຈົ້າບໍ່ຄວນໂທດຕົວເອງວ່າຍັງລ້ຽງລູກບໍ່ດີພໍ ເພາະພະເຢໂຫວາໃຫ້ເຮົາທຸກຄົນເຊິ່ງລວມເຖິງລູກຂອງເຈົ້າມີສິດເລືອກວ່າຈະຮັບໃຊ້ເພິ່ນຫຼືບໍ່. ຖ້າລູກປະຖິ້ມພະເຢໂຫວາກໍຢ່າຟ້າວໝົດຫວັງ ແຕ່ຂໍໃຫ້ຄິດວ່າຈັກມື້ໜຶ່ງລາວຈະກັບມາ. ຄືກັບຕົວຢ່າງປຽບທຽບເລື່ອງລູກທີ່ຫຼົງຫາຍ ເຖິງວ່າລາວຈະເຮັດບໍ່ດີຫຼາຍຢ່າງແຕ່ໃນທີ່ສຸດລາວກໍກັບມາຫາພໍ່. (ລກ. 15:11-19, 22-24) ບາງຄົນອາດຈະເວົ້າວ່າ: “ນີ້ເປັນຕົວຢ່າງປຽບທຽບຊື່ໆ ແຕ່ໃນຕົວຈິງແລ້ວລູກຈະກັບມາຫາພະເຢໂຫວາແທ້ບໍ?” ລາວອາດຈະກັບມາກໍໄດ້! ເພາະເລື່ອງນີ້ໄດ້ເກີດຂຶ້ນກັບຜູ້ຊາຍຄົນໜຶ່ງທີ່ຊື່ເອລີ.
17. ປະສົບການຂອງເອລີໃຫ້ກຳລັງໃຈເຈົ້າແນວໃດ?
17 ເອລີໄດ້ເວົ້າກ່ຽວກັບພໍ່ແມ່ວ່າ: “ພໍ່ແມ່ໄດ້ພະຍາຍາມເຮັດດີທີ່ສຸດເພື່ອຊ່ວຍຂ້ອຍໃຫ້ຮັກພະເຢໂຫວາແລະມັກຄຳພີໄບເບິນ. ແຕ່ຕອນທີ່ເປັນໄວລຸ້ນ ຂ້ອຍເລີ່ມເຮັດສິ່ງທີ່ຂັດກັບສິ່ງທີ່ພໍ່ແມ່ສອນ.” ບໍ່ດົນ ເອລີກໍເລີ່ມໃຊ້ຊີວິດແບບຕີສອງໜ້າແລະບໍ່ຍອມຮັບການຊ່ວຍເຫຼືອຈາກພໍ່ແມ່. ລາວໄດ້ອອກຈາກບ້ານແລະເຮັດສິ່ງທີ່ບໍ່ດີ. ມີເທື່ອໜຶ່ງ ລາວໄດ້ລົມກັບໝູ່ເລື່ອງຄຳພີໄບເບິນ. ລາວບອກວ່າ: “ແຮ່ງຂ້ອຍລົມເລື່ອງພະເຢໂຫວາກັບໝູ່ຫຼາຍເທົ່າໃດ ຂ້ອຍກໍແຮ່ງຄິດເຖິງພະເຢໂຫວາຫຼາຍເທົ່ານັ້ນ. ໃນທີ່ສຸດ ຄວາມຈິງໃນຄຳພີໄບເບິນທີ່ປຽບຄືກັບເມັດພືດທີ່ພໍ່ແມ່ປູກໄວ້ໃນໃຈຂ້ອຍກໍຄ່ອຍໆໃຫຍ່ຂຶ້ນ.” ສຸດທ້າຍເອລີກໍກັບມາຫາພະເຢໂຫວາ. c ລອງນຶກພາບວ່າພໍ່ແມ່ຊິຮູ້ສຶກດີໃຈຫຼາຍສ່ຳໃດທີ່ໄດ້ພະຍາຍາມສອນລູກໃຫ້ຮັກພະເຢໂຫວາຕັ້ງແຕ່ຍັງນ້ອຍ!—2 ຕມ. 3:14, 15
18. ເຈົ້າຮູ້ສຶກແນວໃດກັບຜູ້ທີ່ເປັນພໍ່ແມ່ທີ່ໄດ້ພະຍາຍາມສອນລູກໃຫ້ຮັກພະເຢໂຫວາ?
18 ຜູ້ທີ່ເປັນພໍ່ແມ່ ເຈົ້າໄດ້ຮັບວຽກມອບໝາຍທີ່ພິເສດຫຼາຍ ນັ້ນກໍຄືການສອນລູກໃຫ້ນະມັດສະການພະເຢໂຫວາ. (ເພງ. 78:4-6) ນີ້ບໍ່ແມ່ນວຽກທີ່ງ່າຍເລີຍ ດັ່ງນັ້ນ ເຮົາຢາກຊົມເຊີຍເຈົ້າທີ່ຕັ້ງໃຈແລະອົດທົນໃນການສອນລູກມາຕະຫຼອດ. ຖ້າເຈົ້າພະຍາຍາມເຮັດດີທີ່ສຸດເພື່ອຊ່ວຍລູກໃຫ້ຮັກພະເຢໂຫວາ ເຂົ້າໃຈຄຳສອນຂອງເພິ່ນ ແລະເຊື່ອຟັງເພິ່ນ ເຈົ້າກໍໝັ້ນໃຈໄດ້ວ່າພະເຢໂຫວາຈະພໍໃຈເຈົ້າ.—ອຟຊ. 6:4
ເພງ 135 ພະເຢໂຫວາເຊີນຢ່າງອົບອຸ່ນວ່າ ລູກຂອງເຮົາຈົ່ງມີປັນຍາເຖີດ
a ພໍ່ແມ່ທີ່ເປັນຄລິດສະຕຽນຮັກລູກຫຼາຍແລະພະຍາຍາມຫຼາຍແທ້ໆທີ່ຈະເບິ່ງແຍງລູກທາງດ້ານຮ່າງກາຍແລະອາລົມຄວາມຮູ້ສຶກ ແລະທີ່ສຳຄັນກວ່ານັ້ນ ເຂົາເຈົ້າກໍຢາກຊ່ວຍລູກໃຫ້ຮັກພະເຢໂຫວາ. ໃນບົດຄວາມນີ້ເຮົາຈະມາເບິ່ງ 4 ຫຼັກການທີ່ຈະຊ່ວຍພໍ່ແມ່ໃຫ້ຊ່ວຍລູກໃຫ້ຮັກພະເຢໂຫວາ.
b ເບິ່ງວິດີໂອເລື່ອງ ພະເຢໂຫວາສອນເຮົາວ່າຈະລ້ຽງລູກແນວໃດ ໃນເວັບໄຊ jw.org (ພາສາໄທ)
c ເບິ່ງບົດຄວາມທີ່ຊື່ວ່າ “ຄຳພີໄບເບິນປ່ຽນຊີວິດຄົນ” ໃນຫໍສັງເກດການ 1 ເມສາ 2012 (ພາສາໄທ)
d ຄຳອະທິບາຍຮູບພາບ: ເພື່ອຈະຮູ້ຈັກໝູ່ຂອງລູກດີຂຶ້ນ ຜູ້ເປັນພໍ່ໄດ້ຫຼິ້ນກິລາກັບລູກແລະໝູ່ຂອງລູກ.