ບົດຄວາມສຶກສາທີ 24

ເຈົ້າສາມາດໄປເຖິງເປົ້າໝາຍດ້ານຄວາມເຊື່ອໄດ້

ເປີດ

“ຂໍໃຫ້ພວກເຮົາຢ່າເຊົາເຮັດດີເພາະຖ້າພວກເຮົາບໍ່ທໍ້ຖອຍໃນການເຮັດດີພວກເຮົາຈະເກັບກ່ຽວຜົນເມື່ອເຖິງເວລາ.”—ຄລຕ. 6:9

ເພງ 84 ຮັບໃຊ້ໃຫ້ຫຼາຍຂຶ້ນ

ໃຈຄວາມສຳຄັນ a

1. ພວກເຮົາຫຼາຍຄົນເຈິບັນຫາຫຍັງ?

ເຈົ້າເຄີຍຕັ້ງເປົ້າໝາຍດ້ານຄວາມເຊື່ອແລ້ວເຮັດຕາມບໍ່ໄດ້ບໍ? b ຖ້າເຄີຍ ເຈົ້າກໍບໍ່ແມ່ນຄົນດຽວທີ່ເປັນແບບນັ້ນ. ມີພີ່ນ້ອງຫຼາຍຄົນທີ່ເປັນຄືກັນກັບເຈົ້າ ເຊັ່ນ: ຟີລິບຢາກປັບປຸງການອະທິດຖານຂອງລາວໃຫ້ດີຂຶ້ນແລະຫຼາຍຂຶ້ນ. ແຕ່ລາວຮູ້ສຶກວ່າຍາກທີ່ຈະຫາເວລາເຮັດແບບນັ້ນ. ເອຣີກາຢາກໄປຮ່ວມການປະຊຸມເພື່ອການປະກາດໃຫ້ກົງເວລາແຕ່ລາວກໍຍັງມາຊ້າຄືເກົ່າ. ໂທມັດສ໌ພະຍາຍາມຫຼາຍເທື່ອທີ່ຈະອ່ານຄຳພີໄບເບິນໃຫ້ຈົບໝົດຫົວ. ລາວບອກວ່າ: ຂ້ອຍບໍ່ຄ່ອຍມັກອ່ານຄຳພີໄບເບິນ. ຂ້ອຍພະຍາຍາມມາສາມເທື່ອແລ້ວ ແລະແຕ່ລະເທື່ອກໍອ່ານຮອດແຕ່ລະບຽບພວກເລວີເທົ່ານັ້ນ.

2. ເປັນຫຍັງເຮົາບໍ່ຄວນທໍ້ໃຈຖ້າເຮົາຍັງເຮັດຕາມເປົ້າໝາຍບໍ່ໄດ້ເທື່ອ?

² ຖ້າເຈົ້າມີເປົ້າໝາຍແລ້ວຍັງເຮັດບໍ່ໄດ້ເທື່ອກໍຢ່າຟ້າວທໍ້ໃຈ. ການເຮັດຕາມເປົ້າໝາຍເຖິງວ່າຈະເປັນພຽງເປົ້າໝາຍນ້ອຍໆກໍຍັງຕ້ອງໃຊ້ຄວາມພະຍາຍາມແລະໃຊ້ເວລາ. ການທີ່ເຈົ້າຢາກເຮັດຕາມເປົ້າໝາຍນີ້ກໍສະແດງໃຫ້ເຫັນແລ້ວວ່າເຈົ້າຢາກໃຫ້ສິ່ງທີ່ດີທີ່ສຸດກັບພະເຢໂຫວາ ແລະເຈົ້າກໍຖືວ່າການໃກ້ຊິດກັບເພິ່ນເປັນເລື່ອງທີ່ສຳຄັນຫຼາຍພະເຢໂຫວາເຫັນຄ່າຄວາມພະຍາຍາມຂອງເຈົ້າເພິ່ນບໍ່ໄດ້ຄາດໝາຍຈາກເຈົ້າຫຼາຍກວ່າທີ່ເຈົ້າເຮັດໄດ້. (ເພງ. 103:14; ມກ. 6:8) ດັ່ງນັ້ນ ເຈົ້າຄວນມີເປົ້າໝາຍທີ່ສົມເຫດສົມຜົນທີ່ເຈົ້າສາມາດເຮັດໄດ້. ແລ້ວເຈົ້າຈະເຮັດແບບນັ້ນໄດ້ແນວໃດ? ເພື່ອຈະເຮັດຕາມເປົ້າໝາຍໄດ້ ໃຫ້ເຮົາມາເບິ່ງຄຳແນະນຳບາງຢ່າງນຳກັນ.

ແຮງກະຕຸ້ນເປັນສິ່ງທີ່ສຳຄັນ

ອະທິດຖານຂໍໃຫ້ມີແຮງກະຕຸ້ນຫຼາຍຂຶ້ນ (ເບິ່ງຂໍ້ 3-4)

3. ເປັນຫຍັງແຮງກະຕຸ້ນຈຶ່ງເປັນສິ່ງທີ່ສຳຄັນ?

³ ແຮງກະຕຸ້ນເປັນສິ່ງທີ່ສຳຄັນຫຼາຍ. ຄົນທີ່ມີແຮງກະຕຸ້ນຢາກຈະໄປໃຫ້ເຖິງເປົ້າໝາຍໃຫ້ໄດ້. ເຮົາອາດປຽບແຮງກະຕຸ້ນເປັນຄືກັບລົມທີ່ເຮັດໃຫ້ເຮືອໃບໄປເຖິງຈຸດໝາຍປາຍທາງ. ຖ້າມີລົມພັດຢູ່ຕະຫຼອດ ຜູ້ທີ່ຂີ່ເຮືອກໍຈະໄປເຖິງຈຸດໝາຍປາຍທາງໄດ້. ແລະຖ້າລົມພັດແຮງລາວກໍແຮ່ງຈະໄປເຖິງເປົ້າໝາຍໄດ້ໄວຂຶ້ນ. ຄ້າຍຄືກັນ ເມື່ອເຮົາມີແຮງກະຕຸ້ນຫຼາຍເຮົາກໍແຮ່ງຈະມີໂອກາດຫຼາຍທີ່ຈະເຮັດຕາມເປົ້າໝາຍໃຫ້ສຳເລັດໄດ້. ພີ່ນ້ອງເດວິດທີ່ຢູ່ຊານວາດໍບອກວ່າ “ຖ້າເຈົ້າມີແຮງກະຕຸ້ນຫຼາຍໆທີ່ຈະເຮັດບາງຢ່າງ ເຈົ້າກໍຢາກພະຍາຍາມຫຼາຍຂຶ້ນທີ່ຈະເຮັດໃຫ້ສຳເລັດ. ແລະເຈົ້າກໍຈະບໍ່ຍອມໃຫ້ສິ່ງໃດກໍຕາມມາຂັດຂວາງເຈົ້າຈາກການໄປເຖິງເປົ້າໝາຍ.” ແລ້ວເຈົ້າຈະເຮັດແນວໃດເພື່ອຈະໃຫ້ມີແຮງກະຕຸ້ນຫຼາຍຂຶ້ນ?

4. ເຮົາສາມາດອະທິດຖານຂໍຫຍັງໄດ້ແດ່? (ຟີລິບປອຍ 2:13) (ເບິ່ງຮູບພາບ)

⁴ ອະທິດຖານຂໍໃຫ້ມີແຮງກະຕຸ້ນຫຼາຍຂຶ້ນ. ພະເຢໂຫວາສາມາດໃຫ້ພະລັງບໍລິສຸດກັບເຈົ້າເພື່ອຊ່ວຍໃຫ້ເຈົ້າມີແຮງກະຕຸ້ນທີ່ຈະໄປເຖິງເປົ້າໝາຍ. (ອ່ານຟີລິບປອຍ 2:13) ບາງເທື່ອທີ່ເຮົາຕັ້ງເປົ້າໝາຍກໍຍ້ອນເຮົາຮູ້ວ່າມັນເປັນສິ່ງທີ່ດີແລະຄວນເຮັດ. ແຕ່ແທ້ໆແລ້ວເຮົາອາດບໍ່ຢາກເຮັດປານໃດ. ພີ່ນ້ອງຍິງທີ່ຊື່ໂນຣິນາຢູ່ປະເທດອູກັນດາກໍຮູ້ສຶກແບບນັ້ນ. ລາວຕັ້ງເປົ້າໝາຍຢາກຈະສຶກສາໃຫ້ຈັກຄົນໜຶ່ງ. ແຕ່ລາວບໍ່ມີແຮງກະຕຸ້ນທີ່ຈະເຮັດໃຫ້ສຳເລັດຍ້ອນລາວຮູ້ສຶກວ່າຕົວເອງສອນບໍ່ເກັ່ງ. ລາວເລົ່າວ່າ: ຂ້ອຍໄດ້ອະທິດຖານເຖິງພະເຢໂຫວາທຸກມື້ຂໍໃຫ້ເພິ່ນຊ່ວຍຂ້ອຍໃຫ້ມີແຮງກະຕຸ້ນຫຼາຍຂຶ້ນທີ່ຢາກຈະນຳການສຶກສາ. ແລ້ວຂ້ອຍກໍໄດ້ເຮັດຕາມທີ່ໄດ້ອະທິດຖານໂດຍພະຍາຍາມຝຶກທີ່ຈະສອນຄຳພີໄບເບິນໃຫ້ເກັ່ງຂຶ້ນ. ບໍ່ເທົ່າໃດເດືອນຫຼັງຈາກນັ້ນ ຂ້ອຍກໍມີຄວາມຮູ້ສຶກຫຼາຍຂຶ້ນທີ່ຢາກຈະມີນັກສຶກສາ ແລະໃນປີດຽວກັນຂ້ອຍກໍໄດ້ເລີ່ມນຳການສຶກສາໃຫ້ກັບສອງຄົນ.

5. ເຮົາຄວນຄິດຕຶກຕອງເລື່ອງຫຍັງເຊິ່ງຈະຊ່ວຍເຮົາໃຫ້ມີແຮງກະຕຸ້ນທີ່ຈະເຮັດຕາມເປົ້າໝາຍຫຼາຍຂຶ້ນ?

⁵ ຄິດຕຶກຕອງເຖິງສິ່ງທີ່ພະເຢໂຫວາເຮັດເພື່ອເຈົ້າມາແລ້ວ. (ເພງ. 143:5) ອັກຄະສາວົກໂປໂລຄິດເຖິງຄວາມກະລຸນາທີ່ຍິ່ງໃຫຍ່ທີ່ພະເຢໂຫວາສະແດງຕໍ່ລາວ. ສິ່ງນີ້ເຮັດໃຫ້ລາວຢາກທຸ່ມເທຕົວເອງເພື່ອຮັບໃຊ້ພະເຢໂຫວາ. (1ກຣ. 15:9, 10; 1ຕມ. 1:12-14) ຄ້າຍຄືກັນ ແຮ່ງເຈົ້າຄິດເຖິງສິ່ງທີ່ພະເຢໂຫວາເຮັດເພື່ອເຈົ້າ ມັນກໍແຮ່ງເຮັດໃຫ້ເຈົ້າຢາກໄປເຖິງເປົ້າໝາຍຫຼາຍຂຶ້ນ. (ເພງ. 116:12) ໃຫ້ເຮົາມາເບິ່ງວ່າສິ່ງໃດຊ່ວຍພີ່ນ້ອງຍິງທີ່ຢູ່ຮົງດູຣາດໃຫ້ເຮັດຕາມເປົ້າໝາຍທີ່ຈະເປັນໄພໂອເນຍປະຈຳ. ລາວເວົ້າວ່າ: ຂ້ອຍຄິດຢູ່ເລື້ອຍໆວ່າພະເຢໂຫວາຮັກຂ້ອຍຫຼາຍສ່ຳໃດ. ເພິ່ນພາຂ້ອຍໃຫ້ມາເຈິຄົນຂອງເພິ່ນ. ເພິ່ນເບິ່ງແຍງແລະປົກປ້ອງຂ້ອຍ. ເມື່ອຂ້ອຍຄິດແບບນີ້ຂ້ອຍກໍຮູ້ສຶກຮັກເພິ່ນຫຼາຍຂຶ້ນ ແລະເຮັດໃຫ້ຂ້ອຍຢາກພະຍາຍາມຫຼາຍຂຶ້ນທີ່ຈະເປັນໄພໂອເນຍປະຈຳໃຫ້ໄດ້.

6. ມີສິ່ງໃດອີກທີ່ຈະຊ່ວຍເຮົາໃຫ້ມີແຮງກະຕຸ້ນຫຼາຍຂຶ້ນ?

⁶ ລອງຄິດວ່າຈະໄດ້ຮັບປະໂຫຍດຫຍັງຖ້າເຮັດຕາມເປົ້າໝາຍ. ໃຫ້ເຮົາມາເບິ່ງຕົວຢ່າງຂອງພີ່ນ້ອງເອຣີກາທີ່ເວົ້າເຖິງກ່ອນໜ້ານີ້. ລາວຕັ້ງເປົ້າໝາຍວ່າຈະເປັນຄົນກົງຕໍ່ເວລາ. ແລ້ວສິ່ງໃດຊ່ວຍລາວໃຫ້ເຮັດແບບນັ້ນໄດ້? ລາວບອກວ່າ: “ຂ້ອຍເຫັນວ່າເມື່ອຂ້ອຍໄປປະຊຸມເພື່ອການປະກາດຊ້າ ເຮັດໃຫ້ຂ້ອຍພາດສິ່ງດີໆຫຼາຍຢ່າງ. ແຕ່ຖ້າຂ້ອຍໄປຮອດໄວກວ່ານີ້ຂ້ອຍກໍຈະມີໂອກາດທັກທາຍພີ່ນ້ອງ ໄດ້ເວົ້າລົມກັບພີ່ນ້ອງ ແລະຍັງໄດ້ຟັງຄຳແນະນຳດີໆທີ່ຈະເອົາໄປນຳໃຊ້ໃນວຽກປະກາດເຊິ່ງຈະເຮັດໃຫ້ຂ້ອຍຮັບໃຊ້ຢ່າງມີຄວາມສຸກ.” ເອຣີກາຄິດວ່າຖ້າລາວກົງຕໍ່ເວລາລາວຈະໄດ້ຮັບປະໂຫຍດຫຍັງ ນີ້ກໍເລີຍເຮັດໃຫ້ລາວເຮັດຕາມເປົ້າໝາຍໄດ້. ເຈົ້ານຶກພາບອອກບໍວ່າ ເຈົ້າຈະໄດ້ຮັບປະໂຫຍດຫຍັງແດ່ຖ້າເຈົ້າເຮັດຕາມເປົ້າໝາຍຂອງເຈົ້າໄດ້. ຖ້າເປົ້າໝາຍຂອງເຈົ້າຄືການອ່ານຄຳພີໄບເບິນຫຼືອະທິດຖານ ໃຫ້ລອງຄິດວ່າສິ່ງເຫຼົ່ານີ້ຈະຊ່ວຍເຈົ້າໃຫ້ໃກ້ຊິດກັບພະເຢໂຫວາຫຼາຍຂຶ້ນຂະໜາດໃດ. (ເພງ. 145:18, 19) ຫຼືຖ້າເປົ້າໝາຍຂອງເຈົ້າຄືການພະຍາຍາມພັດທະນາຄຸນລັກສະນະແບບຄລິດສະຕຽນ ລອງຄິດເບິ່ງວ່າຖ້າເຈົ້າເຮັດໄດ້ມັນຈະຊ່ວຍເຈົ້າໃຫ້ສະໜິດກັບພີ່ນ້ອງຫຼາຍຂຶ້ນສ່ຳໃດ. (ກລຊ. 3:14) ໃຫ້ຂຽນປະໂຫຍດທັງໝົດທີ່ເຈົ້າຈະໄດ້ຮັບຖ້າເຈົ້າເຮັດຕາມເປົ້າໝາຍໄດ້ສຳເລັດ. ແລະໃຫ້ກັບມາເບິ່ງທີ່ເຈົ້າຈົດໄວ້ເລື້ອຍໆເພື່ອເຈົ້າຈະມີແຮງກະຕຸ້ນທີ່ຈະເຮັດຕາມເປົ້າໝາຍໄດ້. ໂທມັດສ໌ທີ່ເວົ້າເຖິງກ່ອນໜ້ານີ້ບອກວ່າ: “ແຮ່ງຂ້ອຍຮູ້ວ່າຂ້ອຍຈະໄດ້ຮັບປະໂຫຍດຫຼາຍສ່ຳໃດມັນກໍແຮ່ງເຮັດໃຫ້ຂ້ອຍພະຍາຍາມຫຼາຍຂຶ້ນທີ່ຈະເຮັດຕາມເປົ້າໝາຍໃຫ້ໄດ້.”

7. ສິ່ງໃດຊ່ວຍຮູລີໂອ້ກັບເມຍໃຫ້ເຮັດຕາມເປົ້າໝາຍໄດ້?

⁷ ໃຊ້ເວລາກັບຄົນທີ່ຈະຊ່ວຍກະຕຸ້ນເຈົ້າ. (ສຸພາ. 13:20) ໃຫ້ເຮົາມາເບິ່ງນຳກັນວ່າສິ່ງໃດຈະຊ່ວຍຮູລີໂອກັບເມຍໃຫ້ເຮັດຕາມເປົ້າໝາຍທີ່ຈະເຮັດວຽກຮັບໃຊ້ໃຫ້ຫຼາຍຂຶ້ນ. ຮູລີໂອເວົ້າວ່າ: “ເຮົາພະຍາຍາມເລືອກຄົບຫາກັບໝູ່ທີ່ຈະຊ່ວຍເຮົາໃຫ້ເຮັດຕາມເປົ້າໝາຍໄດ້. ແລ້ວເຮົາກໍຈະລົມເລື່ອງເປົ້າໝາຍໃຫ້ເຂົາເຈົ້າຟັງ. ໝູ່ຫຼາຍຄົນເຄີຍຕັ້ງເປົ້າໝາຍແບບດຽວກັບເຮົາແລະເຂົາເຈົ້າກໍເຮັດໄດ້ແລ້ວ. ເຂົາເຈົ້າຈຶ່ງສາມາດໃຫ້ຄຳແນະນຳທີ່ເປັນປະໂຫຍດກັບເຮົາໄດ້. ແລະໝູ່ມັກຈະຖາມເຮົາວ່າເຮົາເຮັດຕາມເປົ້າໝາຍໄດ້ຮອດໃສແລ້ວ ຈາກນັ້ນເຂົາເຈົ້າກໍໃຫ້ກຳລັງໃຈເຮົາ.”

ເມື່ອບໍ່ມີແຮງກະຕຸ້ນ

ພະຍາຍາມທຸກວິທີທາງເພື່ອໄປໃຫ້ເຖິງເປົ້າໝາຍ (ເບິ່ງຂໍ້ 8)

8. ຈະເປັນແນວໃດຖ້າເຮົາພະຍາຍາມເຮັດຕາມເປົ້າໝາຍສະເພາະຕອນທີ່ເຮົາມີແຮງກະຕຸ້ນເທົ່ານັ້ນ? (ເບິ່ງຮູບພາບ)

⁸ ໃນຕົວຈິງແລ້ວ ບາງມື້ເຮົາອາດບໍ່ມີແຮງກະຕຸ້ນທີ່ຈະເຮັດຕາມເປົ້າໝາຍ. ນີ້ໝາຍຄວາມວ່າເຮົາບໍ່ສາມາດເຮັດຕາມເປົ້າໝາຍໄດ້ສຳເລັດເລີຍບໍ? ບໍ່ແມ່ນແບບນັ້ນ. ລອງຄິດເຖິງຕົວຢ່າງຂອງເຮືອໃບອີກເທື່ອໜຶ່ງ. ລົມເປັນສິ່ງທີ່ສຳຄັນທີ່ເຮັດໃຫ້ເຮືອໃບໄປເຖິງຈຸດໝາຍ. ບາງມື້ມີລົມແຮງ ບາງມື້ກໍມີລົມພັດຄ່ອຍໆຫຼືບາງມື້ອາດບໍ່ມີລົມເລີຍ. ຖ້າເປັນແບບນັ້ນຜູ້ທີ່ຂີ່ເຮືອຈະບໍ່ສາມາດເຮັດໃຫ້ເຮືອແລ່ນໄປທາງໜ້າໄດ້ເລີຍບໍ? ບໍ່ແມ່ນ. ເຮືອບາງລຳອາດມີເຄື່ອງຈັກຫຼືບາງລຳອາດມີໄມ້ພາຍ. ຜູ້ທີ່ຂີ່ເຮືອຈະໃຊ້ສິ່ງເຫຼົ່ານີ້ເພື່ອເຮັດໃຫ້ເຮືອໄປເຖິງຈຸດໝາຍ. ເຮົາອາດປຽບແຮງກະຕຸ້ນຂອງເຮົາເປັນຄືກັບລົມ. ບາງມື້ເຮົາອາດມີແຮງກະຕຸ້ນຫຼາຍທີ່ຢາກຈະເຮັດຕາມເປົ້າໝາຍ. ບາງມື້ກໍອາດບໍ່ມີເລີຍ. ຖ້າເຮົາເຮັດຕາມເປົ້າໝາຍສະເພາະເມື່ອເຮົາມີແຮງກະຕຸ້ນເທົ່ານັ້ນເຮົາຈະບໍ່ມີທາງໄປເຖິງເປົ້າໝາຍໄດ້. ດັ່ງນັ້ນ ຄືກັບຜູ້ທີ່ຂີ່ເຮືອທີ່ຫາວິທີອື່ນທີ່ຈະໄປເຖິງຈຸດໝາຍ ເຮົາກໍຕ້ອງພະຍາຍາມຫາທາງທີ່ຈະເຮັດຕາມເປົ້າໝາຍຂອງເຮົາຕໍ່ໄປໃຫ້ໄດ້ເຖິງວ່າມື້ນັ້ນເຮົາຈະບໍ່ມີແຮງກະຕຸ້ນກໍຕາມ. ເຖິງວ່າເຮົາຈະອອກຄວາມພະຍາຍາມຫຼາຍແລະມີລະບຽບວິໄນກັບຕົວເອງ ແຕ່ມັນກໍຄຸ້ມຄ່າຫຼາຍເມື່ອເຮົາເຮັດແບບນັ້ນ. ກ່ອນທີ່ເຮົາຈະລົມກັນວ່າເຮົາຈະເຮັດຫຍັງ ໃຫ້ເຮົາມາເບິ່ງວ່າມີຄຳຖາມຫຍັງທີ່ອາດຈະເກີດຂຶ້ນ.

9. ຜິດບໍທີ່ເຮົາພະຍາຍາມເຮັດຕາມເປົ້າໝາຍເຖິງວ່າເຮົາອາດຮູ້ສຶກບໍ່ຢາກເຮັດ? ຂໍໃຫ້ອະທິບາຍ

⁹ ພະເຢໂຫວາຕ້ອງການໃຫ້ເຮົາຮັບໃຊ້ເພິ່ນຢ່າງມີຄວາມສຸກແລະດ້ວຍຄວາມເຕັມໃຈ. (ເພງ. 100:2; 2ກຣ. 9:7) ແຕ່ຖ້າເຮົາບໍ່ຢາກເຮັດຕາມເປົ້າໝາຍດ້ານຄວາມເຊື່ອເດ ເຮົາຍັງຕ້ອງພະຍາຍາມຢູ່ບໍ? ຂໍໃຫ້ຄິດເຖິງອັກຄະສາວົກໂປໂລ. ລາວບອກວ່າ: “ຂ້ອຍທຸບຕີຮ່າງກາຍຢ່າງໜັກຈົນຄວບຄຸ້ມໄດ້ຄືກັບຄວບຄຸ້ມທາດ.” (1ກຣ. 9:25-27) ເຫັນໄດ້ວ່າໂປໂລບັງຄັບຕົວເອງໃຫ້ເຮັດສິ່ງທີ່ຖືກຕ້ອງເຖິງວ່າບາງຄັ້ງລາວອາດຮູ້ສຶກບໍ່ຢາກເຮັດ. ແລ້ວພະເຢໂຫວາດີໃຈກັບສິ່ງທີ່ໂປໂລເຮັດເພື່ອເພິ່ນບໍ? ແນ່ນອນວ່າພະເຢໂຫວາດີໃຈ ແລະເພິ່ນໄດ້ໃຫ້ລາງວັນກັບລາວທີ່ພະຍາຍາມເຮັດແບບນັ້ນ.—2ຕມ. 4:7, 8

10. ເຮົາຈະໄດ້ປະໂຫຍດຫຍັງແດ່ຖ້າເຮົາພະຍາຍາມເຮັດຕາມເປົ້າໝາຍເຖິງວ່າເຮົາບໍ່ຢາກຈະເຮັດ?

¹⁰ ຄ້າຍຄືກັນ ພະເຢໂຫວາຈະດີໃຈຖ້າເຮົາພະຍາຍາມເຮັດຕາມເປົ້າໝາຍເຖິງວ່າເຮົາຮູ້ສຶກບໍ່ຢາກເຮັດ ເພາະເພິ່ນຮູ້ວ່າເຖິງເຮົາບໍ່ໄດ້ມັກທີ່ຈະເຮັດແບບນັ້ນແຕ່ເຮົາກໍເຮັດເພາະເຮົາຮັກເພິ່ນ. ພະເຢໂຫວາຈະອວຍພອນເຮົາຄືກັບທີ່ອວຍພອນໂປໂລ. (ເພງ. 126:5) ເມື່ອເຮົາໄດ້ຮັບພອນຈາກພະເຢໂຫວາເຮົາກໍມີແຮງກະຕຸ້ນຫຼາຍຂຶ້ນທີ່ຢາກຈະເຮັດ. ພີ່ນ້ອງລູຊີນາຈາກປະເທດໂປໂລຍບອກວ່າ: “ບາງຄັ້ງຂ້ອຍຮູ້ສຶກບໍ່ຢາກໄປປະກາດ ໂດຍສະເພາະຕອນທີ່ຂ້ອຍຮູ້ສຶກເມື່ອຍ. ແຕ່ຫຼັງຈາກທີ່ໄປປະກາດກັບມາ ຂ້ອຍກໍ່ສົດຊື່ນແລະມີຄວາມສຸກຫຼາຍແລະຮູ້ສຶກວ່ານີ້ແຫຼະເປັນລາງວັນທີ່ພິເສດຈາກພະເຢໂຫວາ.” ຕອນນີ້ໃຫ້ເຮົາມາເບິ່ງວ່າເຮົາຈະເຮັດຫຍັງໄດ້ແດ່ຖ້າເຮົາບໍ່ມີແຮງກະຕຸ້ນ.

11. ພະເຢໂຫວາຊ່ວຍເຮົາໃຫ້ຄວບຄຸມຕົວເອງໃຫ້ຫຼາຍຂຶ້ນໄດ້ແນວໃດ?

¹¹ ອະທິດຖານຂໍໃຫ້ຄວບຄຸມຕົວເອງໄດ້ ການຄວບຄຸມຕົວເອງມັກຈະໝາຍເຖິງການຄວບຄຸມຕົວເຮົາເອງບໍ່ໃຫ້ເຮັດສິ່ງທີ່ບໍ່ດີ ແລະກໍຍັງໝາຍເຖິງການບັງຄັບຕົວເອງໃຫ້ເຮັດສິ່ງທີ່ດີນຳໂດຍສະເພາະຖ້າມັນເປັນສິ່ງທີ່ເຮັດໄດ້ຍາກຫຼືເຮົາອາດບໍ່ຢາກຈະເຮັດ. ຂໍໃຫ້ຈື່ໄວ້ວ່າການຄວບຄຸມຕົວເອງເປັນຜົນທີ່ເກີດຈາກພະລັງຂອງພະເຈົ້າ. (ລກ. 11:13; ຄລຕ. 5:22, 23) ດັ່ງນັ້ນ ໃຫ້ເຈົ້າຂໍພະລັງບໍສຸດຈາກພະເຢໂຫວາເພື່ອຈະຊ່ວຍໃຫ້ເຈົ້າພັດທະນາຄຸນລັກສະນະທີ່ສຳຄັນນີ້ໃຫ້ຫຼາຍຂຶ້ນ. ພີ່ນ້ອງເດວິດທີ່ເວົ້າເຖິງກ່ອນໜ້ານີ້ຢາກຈະສຶກສາສ່ວນຕົວເປັນປະຈຳໃຫ້ຫຼາຍຂຶ້ນ. ລາວບອກວ່າການອະທິດຖານຊ່ວຍລາວແນວໃດ. ລາວບອກວ່າ: “ການອະທິດຖານຊ່ວຍລາວໃຫ້ຄວບຄຸມຕົວເອງໄດ້ຫຼາຍຂຶ້ນ. ລາວເລົ່າວ່າ: “ຂ້ອຍຂໍພະເຢໂຫວາໃຫ້ຊ່ວຍຂ້ອຍຄວບຄຸມຕົວເອງ. ແລະຍ້ອນເພິ່ນຊ່ວຍ ຂ້ອຍກໍເລີຍສາມາດຈັດຕາຕະລາງສຶກສາສ່ວນຕົວໄດ້ຢ່າງດີແລະເຮັດຢ່າງສະໝ່ຳສະເໝີ.”

12. ຫຼັກການທີ່ຢູ່ໃນຜູ້ເທສະໜາປ່າວປະກາດ 11:4 ຊ່ວຍເຮົາໃຫ້ໄປເຖິງເປົ້າໝາຍດ້ານຄວາມເຊື່ອແນວໃດ?

¹² ຢ່າລໍຖ້າຈົນທຸກຢ່າງພ້ອມແລ້ວຈຶ່ງເຮັດ. ໃນໂລກທີ່ຊາຕານປົກຄອງນີ້ບໍ່ມີທາງທີ່ຊີວິດເຮົາຈະບໍ່ມີອຸປະສັກຂັດຂວາງເລີຍ ຖ້າເຮົາລໍຖ້າຈົນທຸກຢ່າງພ້ອມເຮົາອາດບໍ່ມີທາງທີ່ຈະໄປເຖິງເປົ້າໝາຍໄດ້. (ອ່ານຜູ້ເທສະໜາປ່າວປະກາດ 11:4) ພີ່ນ້ອງຊາຍທີ່ຊື່ແດນນຽວບອກວ່າ: “ຫາກລໍຖ້າໃຫ້ທຸກຢ່າງພ້ອມກ່ອນ ເຮົາຄືຊີບໍ່ໄດ້ລົງມືເຮັດຫຍັງຈັກເທື່ອ. ຖ້າເຮົາຢາກເຮັດຫຍັງ ກໍໃຫ້ລົງມືເຮັດເລີຍບໍ່ຕ້ອງລໍຖ້າ.” ພີ່ນ້ອງພໍທີ່ຢູ່ໃນປະເທດອູກັນດາເວົ້າເຖິງອີກເຫດຜົນໜຶ່ງທີ່ເຮົາບໍ່ຄວນເລື່ອນມື້ເລື່ອນຍາມ. ລາວບອກວ່າ: “ຖ້າເຮົາເລີ່ມລົງມືເຮັດເຖິງວ່າຈະມີອຸປະສັກຂັດຂວາງພະເຢໂຫວາກໍຈະອວຍພອນເຮົາ.”—ມລກີ. 3:10

13. ການເລີ່ມຕົ້ນຈາກຈຸດນ້ອຍໆມີຂໍ້ດີຫຍັງແດ່?

¹³ ເລີ່ມຕົ້ນຈາກຈຸດນ້ອຍໆ. ບາງເທື່ອເຮົາອາດບໍ່ມີແຮງກະຕຸ້ນທີ່ຢາກຈະເຮັດຕາມເປົ້າໝາຍ ຍ້ອນເປົ້າໝາຍເຮົາເບິ່ງຄືວ່າເຮັດໄດ້ຍາກຫຼາຍ. ຖ້າເຈົ້າຮູ້ສຶກແບບນັ້ນກໍໃຫ້ເລີ່ມລອງເຮັດຫຍັງບາງຢ່າງທີ່ເປັນສິ່ງນ້ອຍໆແລະບໍ່ຍາກເກີນໄປກ່ອນ. ຖ້າເປົ້າໝາຍຂອງເຈົ້າຄືການພັດທະນາຄຸນລັກສະນະແບບຄລິດສະຕຽນ ກໍໃຫ້ເຈົ້າລອງຕັ້ງເປົ້າໝາຍວ່າເຈົ້າຈະສະແດງຄຸນລັກສະນະນີ້ໃນເລື່ອງເລັກໆນ້ອຍໆກ່ອນໄດ້ບໍ? ຫຼືຖ້າເຈົ້າຕັ້ງເປົ້າໝາຍທີ່ຈະອ່ານຄຳພີໄບເບິນໃຫ້ຈົບໝົດຫົວ ກໍໃຫ້ເລີ່ມໂດຍຈັດເວລາສັ້ນໆເພື່ອຈະອ່ານແລະເຮັດເປັນປະຈຳ. ພີ່ນ້ອງໂທມັດສ໌ທີ່ເວົ້າເຖິງໃນຕອນຕົ້ນຮູ້ສຶກວ່າການອ່ານຄຳພີໄບເບິນໃຫ້ຈົບໝົດຫົວພາຍໃນໜຶ່ງປີເປັນເລື່ອງທີ່ຍາກຫຼາຍ. ລາວບອກວ່າ: “ຂ້ອຍຮູ້ສຶກວ່າເປົ້າໝາຍການອ່ານຄຳພີໄບເບິນໃຫ້ຈົບໝົດຫົວພາຍໃນໜຶ່ງປີເຮັດໃຫ້ຂ້ອຍຕ້ອງອ່ານແບບຟ້າວຟັ່ງ ມັນກໍເລີຍຍາກເກີນໄປສຳລັບຂ້ອຍ. ຂ້ອຍຈຶ່ງປ່ຽນເປົ້າໝາຍໃໝ່. ເທື່ອນີ້ຂ້ອຍຕັ້ງໃຈທີ່ຈະອ່ານພຽງບໍ່ເທົ່າໃດຂໍ້ທຸກໆມື້ແລ້ວຄິດຕຶກຕອງນຳ. ຕອນນີ້ຂ້ອຍເລີ່ມມັກອ່ານຄຳພີໄບເບິນແລ້ວ.” ເມື່ອໂທມັດສ໌ມັກອ່ານຄຳພີໄບເບິນ ລາວກໍໃຊ້ເວລາອ່ານດົນຂຶ້ນ. ແລະໃນທີ່ສຸດລາວກໍສາມາດອ່ານຄຳພີໄບເບິນໄດ້ຈົບໝົດຫົວ. c

ບໍ່ຟ້າວທໍ້ໃຈຖ້າຍັງເຮັດຕາມເປົ້າໝາຍບໍ່ໄດ້

14. ມີອຸປະສັກຫຍັງແດ່ທີ່ອາດເຮັດໃຫ້ເຮົາເຮັດຕາມເປົ້າໝາຍບໍ່ໄດ້?

¹⁴ ບໍ່ວ່າເຮົາຈະມີແຮງກະຕຸ້ນທີ່ຢາກຈະເຮັດຕາມເປົ້າໝາຍຫຼາຍສ່ຳໃດ ຫຼືມີລະບຽບວິໄນກັບຕົວເອງຫຼາຍສ່ຳໃດກໍຕາມ ເຮົາອາດຍັງຕ້ອງເຈິອຸປະສັກຂັດຂວາງທີ່ເຮັດໃຫ້ເຮົາເຮັດຕາມເປົ້າໝາຍບໍ່ໄດ້. ຕົວຢ່າງເຊັ່ນ: ເຮົາອາດເຈິກັບ “ເຫດການທີ່ບໍ່ຄາດຄິດ” ເຊິ່ງເຮັດໃຫ້ເຮົາບໍ່ໄດ້ຈົດຈໍ່ຢູ່ກັບເປົ້າໝາຍ ແລະບໍ່ມີເວລາທີ່ຈະເຮັດຕາມເປົ້າໝາຍທີ່ຕັ້ງໃຈໄວ້. (ຜູ້ປ. 9:11, ລ.ມ.) ຫຼືເຮົາອາດເຈິບັນຫາທີ່ເຮັດໃຫ້ເຮົາຮູ້ສຶກທໍ້ໃຈແລະໝົດແຮງ. (ສຸພາ. 24:10) ຫຼືຄວາມບໍ່ສົມບູນແບບຂອງເຮົາອາດເຮັດໃຫ້ເຮົາເຮັດຜິດພາດເຊິ່ງເຮັດໃຫ້ຍາກທີ່ຈະເຮັດຕາມເປົ້າໝາຍ. (ຣມ. 7:23) ຫຼືເຮົາອາດຮູ້ສຶກເມື່ອຍ. (ມທ. 26:43) ແລ້ວສິ່ງໃດຈະຊ່ວຍເຮົາໄດ້?

15. ຖ້າເຮົາຍັງເຮັດຕາມເປົ້າໝາຍບໍ່ໄດ້ ເປັນຫຍັງເຮົາບໍ່ຄວນລົ້ມເລີກຄວາມຕັ້ງໃຈ? (ຄຳເພງ 145:14)

¹⁵ ຈື່ໄວ້ວ່າເຖິງວ່າຍັງເຮັດຕາມເປົ້າໝາຍບໍ່ໄດ້ ກໍຢ່າຟ້າວລົ້ມເລີກຄວາມຕັ້ງໃຈ. ຄຳພີໄບເບິນບອກວ່າເຮົາອາດຕ້ອງເຈິບັນຫາຫຼາຍຢ່າງຊ້ຳແລ້ວຊ້ຳອີກ. ແຕ່ເຮົາກໍຍັງຈະເຮັດຕາມເປົ້າໝາຍຂອງເຮົາໄດ້ຖ້າເຮົາໄດ້ຮັບຄວາມຊ່ວຍເຫຼືອຈາກພະເຢໂຫວາ. (ອ່ານຄຳເພງ 145:14) ຟີລິບທີ່ເວົ້າເຖິງກ່ອນໜ້ານີ້ບອກວ່າ: “ຄວາມສຳເລັດຂອງຂ້ອຍຂຶ້ນຢູ່ກັບວ່າຂ້ອຍລຸກຂຶ້ນໄດ້ຈັກເທື່ອ ບໍ່ແມ່ນຂ້ອຍລົ້ມຈັກເທື່ອແລ້ວ.” ສ່ວນເດວິດທີ່ເວົ້າເຖິງກ່ອນໜ້ານີ້ກໍບອກວ່າ: “ຂ້ອຍພະຍາຍາມທີ່ຈະເບິ່ງມື້ທີ່ບໍ່ດີຫຼືອັນໃດກໍຕາມທີ່ເຮັດໃຫ້ຂ້ອຍເຮັດຕາມເປົ້າໝາຍບໍ່ໄດ້ວ່າມັນບໍ່ໄດ້ເປັນອຸປະສັກ. ແຕ່ມັນເປັນໂອກາດທີ່ຂ້ອຍຈະສະແດງໃຫ້ພະເຢໂຫວາເຫັນວ່າຂ້ອຍຮັກເພິ່ນຫຼາຍສ່ຳໃດ.” ຖ້າເຈົ້າຍັງພະຍາຍາມຕໍ່ໆໄປທີ່ຈະໄປໃຫ້ເຖິງເປົ້າໝາຍເຖິງວ່າມັນຈະຍາກ ນີ້ກໍສະແດງໃຫ້ເຫັນວ່າເຈົ້າຢາກເຮັດໃຫ້ພະເຢໂຫວາມີຄວາມສຸກ. ແລະລອງຄິດເບິ່ງວ່າ ພະເຢໂຫວາຈະຮູ້ສຶກພູມໃຈໃນຕົວເຈົ້າຫຼາຍສ່ຳໃດທີ່ເຫັນວ່າເຈົ້າພະຍາຍາມເຮັດແບບນັ້ນ!

16. ການທີ່ຍັງເຮັດຕາມເປົ້າໝາຍບໍ່ໄດ້ເປັນບົດຮຽນແນວໃດສຳລັບເຮົາ?

¹⁶ ໃຫ້ເບິ່ງວ່າການທີ່ຍັງເຮັດຕາມເປົ້າໝາຍບໍ່ໄດ້ເປັນບົດຮຽນ. ລອງຄິດເບິ່ງວ່າອັນໃດທີ່ເຮັດໃຫ້ເຈົ້າໄປເຖິງເປົ້າໝາຍບໍ່ໄດ້. ແລ້ວຖາມໂຕເອງວ່າ ‘ຂ້ອຍຈະເຮັດແນວໃດເພື່ອຈະບໍ່ກັບໄປເຮັດແບບເກົ່າອີກ?’ (ສຸພາ. 27:12) ແຕ່ບາງເທື່ອການເຮັດຕາມເປົ້າໝາຍບໍ່ໄດ້ ອາດເປັນຍ້ອນເຮົາຕັ້ງເປົ້າໝາຍສູງເກີນໄປ. ຖ້າເຈົ້າຮູ້ສຶກວ່າເຈົ້າຕົກຢູ່ໃນກໍລະນີນີ້ ກໍໃຫ້ລອງຄິດເຖິງເປົ້າໝາຍຂອງເຈົ້າອີກເທື່ອໜຶ່ງວ່າເຈົ້າ dຍັງຈະສາມາດເຮັດຕາມເປົ້າໝາຍນັ້ນໄດ້ຢູ່ບໍ. ຖ້າເປົ້າໝາຍທີ່ເຈົ້າຕັ້ງໄວ້ມັນຍາກເກີນໄປສຳລັບເຈົ້າ ກໍໃຫ້ປ່ຽນເປົ້າໝາຍໃໝ່. ເມື່ອເຈົ້າເຮັດແບບນັ້ນ ພະເຢໂຫວາເຂົ້າໃຈເຈົ້າແລະເພິ່ນບໍ່ໄດ້ເບິ່ງວ່າເຈົ້າເປັນຄົນທີ່ລົ້ມເຫຼວ.—2ກຣ. 8:12

17. ເປັນຫຍັງເຮົາບໍ່ຄວນລືມສິ່ງທີ່ເຮົາເຮັດສຳເລັດໄປແລ້ວ?

¹⁷ ໃຫ້ຄິດເຖິງສິ່ງທີ່ເຈົ້າໄດ້ເຮັດສຳເລັດມາແລ້ວ. ຄຳພີໄບເບິນບອກວ່າ “ພະເຈົ້າຍຸຕິທຳ ພະອົງຈຶ່ງບໍ່ລືມວຽກທີ່ພວກເຈົ້າເຮັດ.” (ຮຣ. 6:10) ດັ່ງນັ້ນ ເຈົ້າກໍບໍ່ຄວນລືມສິ່ງທີ່ເຈົ້າເຮັດຜ່ານມາຄືກັນ. ໃຫ້ຄິດເຖິງເປົ້າໝາຍທີ່ເຈົ້າໄດ້ເຮັດສຳເລັດຜ່ານມາແລ້ວ ເຊັ່ນ: ເຈົ້າໄດ້ສ້າງສາຍສຳພັນທີ່ດີກັບພະເຢໂຫວາ ໄດ້ບອກຄົນອື່ນເລື່ອງຂອງເພິ່ນ ແລະໄດ້ຮັບບັບເຕມາ. ຄືກັບທີ່ເຈົ້າເຄີຍຕັ້ງເປົ້າໝາຍຕາມຄວາມເຊື່ອແລະເຮັດສຳເລັດໄປແລ້ວ ເຈົ້າກໍຈະສາມາດເຮັດຕາມເປົ້າໝາຍທີ່ຕັ້ງໄວ້ໃນຕອນນີ້ໄດ້ຄືກັນ.—ຟລປ. 3:16

ສັງເກດເບິ່ງວ່າພະເຢໂຫວາຊ່ວຍເຈົ້າແລະອວຍພອນເຈົ້າແນວໃດຕອນທີ່ພະຍາຍາມໄປໃຫ້ເຖິງເປົ້າໝາຍ (ເບິ່ງຂໍ້ 18)

18. ຕອນທີ່ເຮົາພະຍາຍາມໄປເຖິງເປົ້າໝາຍ ເຮົາຄວນສັງເກດເບິ່ງຫຍັງ? (ເບິ່ງຮູບພາບ)

¹⁸ ຄືກັບນັກເດີນເຮືອທີ່ໄປເຖິງເປົ້າໝາຍໄດ້ ເຈົ້າກໍເຮັດຕາມເປົ້າໝາຍໄດ້ ຖ້າໃຫ້ພະເຢໂຫວາຊ່ວຍ. ນອກຈາກນັ້ນ ຜູ້ທີ່ຂີ່ເຮືອຍັງມີຄວາມສຸກກັບການຊົມວິວໃນລະຫວ່າງການເດີນທາງ. ຄ້າຍກັນ ເຈົ້າກໍຈະມີຄວາມສຸກໃນລະຫວ່າງທີ່ເຈົ້າພະຍາຍາມໄປເຖິງເປົ້າໝາຍ ຖ້າເຈົ້າສັງເກດເບິ່ງວ່າພະເຢໂຫວາກຳລັງຊ່ວຍເຈົ້າແລະອວຍພອນເຈົ້າແນວໃດ. (2ກຣ. 4:7) ແລະຖ້າເຈົ້າບໍ່ຍອມແພ້ ເຈົ້າກໍຈະໄດ້ຮັບພອນຢ່າງຫຼວງຫຼາຍ.—ຄລຕ. 6:9

ເພງ 126 ຈົ່ງຕື່ນຕົວ ເຂັ້ມແຂງ ໝັ້ນຄົງ

a ອົງການຂອງເຮົາມັກຈະແນະນຳເຮົາໃຫ້ຕັ້ງເປົ້າໝາຍເລື້ອຍໆ. ຖ້າເຮົາຕັ້ງເປົ້າໝາຍແລ້ວແຕ່ຍັງເຮັດຕາມເປົ້າໝາຍບໍ່ໄດ້ຈັກເທື່ອເດ ເຮົາຈະເຮັດແນວໃດ? ບົດຄວາມນີ້ມີຄຳແນະນຳຫຼາຍຢ່າງທີ່ຈະຊ່ວຍເຮົາໃຫ້ເຮັດຕາມເປົ້າໝາຍໄດ້.

b ການອະທິບາຍຄຳສັບ: ເປົ້າໝາຍດ້ານຄວາມເຊື່ອອາດເປັນສິ່ງໃດກໍໄດ້ທີ່ເຮົາພະຍາຍາມເຮັດໃຫ້ດີຂຶ້ນຫຼືພະຍາຍາມເຮັດໃຫ້ໄດ້ເພື່ອຈະຮັບໃຊ້ພະເຢໂຫວາໃຫ້ຫຼາຍຂຶ້ນ ແລະເຮັດໃຫ້ພະເຢໂຫວາມີຄວາມສຸກ ຕົວຢ່າງເຊັ່ນ: ເຮົາອາດຈະຕັ້ງເປົ້າໝາຍທີ່ຈະພັດທະນາຄຸນລັກສະນະແບບຄລິດສະຕຽນຫຼືປັບປຸງບາງຢ່າງທີ່ເຮັດໃນການນະມັດສະການພະເຢໂຫວາເຊັ່ນ: ການອ່ານຄຳພີໄບເບິນ ການສຶກສາສ່ວນຕົວ ຫຼືການປະກາດ.

c ເບິ່ງປຶ້ມການຮັບປະໂຫຍດຈາກໂຮງຮຽນການຮັບໃຊ້ຕາມລະບອບຂອງພະເຈົ້າ ໜ້າ 10-11 ຫຍໍ້ໜ້າ 4 (ພາສາໄທ)

d ເບິ່ງຂໍ້ມູນເພີ່ມເຕີມໃນບົດຄວາມ “ຈົ່ງຄາດໝາຍຢ່າງສົມເຫດຜົນແລະຊື່ນຊົມຍິນດີ” ໃນຫໍສັງເກດການ 15 ກໍລະກົດ 2008 (ພາສາໄທ)

ຫໍສັງເກດການສະບັບສຶກສາ