ບົດຄວາມສຶກສາທີ 23
ເຮັດໃຫ້ “ໄຟຂອງເຢໂຫວາ” ລຸກໄໝ້ຢູ່ຕະຫຼອດ
“ຄວາມຮັກລຸກໄໝ້ແຮງຄືກັບແປວໄຟ ນັ້ນແມ່ນແປວໄຟຂອງເຢໂຫວາ.”—ພຊມ. 8:6, ລ.ມ.
ເພງ 131 “ພະເຈົ້າໄດ້ເຮັດໃຫ້ຜູກພັນກັນແລ້ວ”
ໃຈຄວາມສຳຄັນ a
1. ຄຳພີໄບເບິນບອກວ່າຄວາມຮັກເປັນຄືກັບຫຍັງ?
“ຄວາມຮັກລຸກໄໝ້ແຮງຄືກັບແປວໄຟ ນັ້ນແມ່ນແປວໄຟຂອງເຢໂຫວາ ນ້ຳທີ່ໄຫຼແຮງໆບໍ່ສາມາດມອດໄຟຂອງຄວາມຮັກໄດ້.” b (ພຊມ. 8:6, 7, ລ.ມ.) ນີ້ເປັນການພັນລະນາທີ່ໜ້າສົນໃຈຫຼາຍແທ້ໆ! ການພັນລະນານີ້ຮັບຮອງກັບຜູ້ທີ່ແຕ່ງດອງວ່າເຂົາເຈົ້າສາມາດມີຄວາມຮັກທີ່ໝັ້ນຄົງຕໍ່ກັນໄດ້.
2. ຜູ້ທີ່ແຕ່ງດອງແລ້ວຕ້ອງເຮັດຫຍັງເພື່ອບໍ່ໃຫ້ຄວາມຮັກຂອງເຂົາເຈົ້າຈືດຈາງລົງ?
2 ຄວາມຮັກຈະໝັ້ນຄົງຫຼືບໍ່ ແມ່ນຂຶ້ນຢູ່ກັບຜົວແລະເມຍ. ຂໍໃຫ້ເຮົາມາເບິ່ງຕົວຢ່າງນີ້. ຕອນທີ່ເຮົາກໍ່ກອງໄຟ ເພື່ອໄຟຈະລຸກໄໝ້ຢູ່ຕະຫຼອດ ເຮົາຕ້ອງໄດ້ຕື່ມຟືນລົງໄປເລື້ອຍໆ. ແຕ່ຖ້າເຮົາບໍ່ຕື່ມຟືນລົງໄປ ໃນທີ່ສຸດໄຟກໍຈະມອດ. ຄ້າຍກັນ ເພື່ອຄວາມຮັກລະຫວ່າງຜົວກັບເມຍຈະໝັ້ນຄົງ ເຂົາເຈົ້າຈະຕ້ອງໄດ້ເສີມສ້າງສາຍສຳພັນທີ່ແໜ້ນແຟ້ນຕໍ່ກັນຢູ່ສະເໝີ. ແຕ່ບາງເທື່ອຄູ່ຜົວເມຍອາດຮູ້ສຶກວ່າຄວາມຮັກຂອງເຂົາເຈົ້າເລີ່ມຈືດຈາງລົງ ໂດຍສະເພາະເມື່ອເຂົາເຈົ້າເຈິຄວາມຫຍຸ້ງຍາກ ເຊັ່ນ: ເມື່ອມີບັນຫາທາງການເງິນ ມີບັນຫາທາງດ້ານສຸຂະພາບ ຫຼືຖືກຄວາມກົດດັນຈາກການລ້ຽງລູກ. ດັ່ງນັ້ນ ຖ້າເຈົ້າແຕ່ງດອງແລ້ວ ເຈົ້າຈະເຮັດແນວໃດເພື່ອໃຫ້ “ແປວໄຟຂອງເຢໂຫວາ” ລຸກໄໝ້ຢູ່ຕະຫຼອດໃນຊີວິດຄູ່ຂອງເຈົ້າ? ໃນບົດຄວາມນີ້ເຮົາຈະມາເບິ່ງສາມຢ່າງທີ່ຈະຊ່ວຍເຈົ້າໃຫ້ຮັກສາສາຍສຳພັນລະຫວ່າງເຈົ້າກັບຄູ່ຂອງເຈົ້າໃຫ້ແໜ້ນແຟ້ນຢູ່ສະເໝີແລະມີຄວາມສຸກກັບຊີວິດຄູ່. c
ມີສາຍສຳພັນທີ່ແໜ້ນແຟ້ນກັບພະເຢໂຫວາຢູ່ສະເໝີ
ຄືກັບໂຢເຊັບແລະມາຣີ ຄູ່ຜົວເມຍຕ້ອງມີສາຍສຳພັນທີ່ແໜ້ນແຟ້ນກັບພະເຢໂຫວາ (ເບິ່ງຂໍ້ 3)
3. ການມີສາຍສຳພັນທີ່ແໜ້ນແຟ້ນກັບພະເຢໂຫວາຢູ່ສະເໝີຊ່ວຍໃຫ້ຄູ່ຜົວເມຍມີຄວາມຮັກທີ່ໝັ້ນຄົງໄດ້ແນວໃດ? (ຜູ້ເທສະໜາປ່າວປະກາດ 4:12) (ເບິ່ງຮູບພາບ)
3 ເພື່ອຈະເຮັດໃຫ້ຄວາມຮັກໃນຊີວິດຄູ່ໝັ້ນຄົງຢູ່ສະເໝີ ທັງຜົວແລະເມຍຕ້ອງມີສາຍສຳພັນທີ່ແໜ້ນແຟ້ນກັບພະເຢໂຫວາຢູ່ສະເໝີ. ສິ່ງນີ້ຊ່ວຍເຂົາເຈົ້າແນວໃດ? ຖ້າຜົວແລະເມຍເຫັນຄ່າສາຍສຳພັນທີ່ເຂົາເຈົ້າມີຕໍ່ພະເຢໂຫວາ ເຂົາເຈົ້າກໍພ້ອມທີ່ຈະເຮັດຕາມຄຳແນະນຳຂອງເພິ່ນ ເຊິ່ງຈະຊ່ວຍເຂົາເຈົ້າໃຫ້ຫຼີກລ່ຽງແລະແກ້ໄຂບັນຫາທີ່ອາດຈະເຮັດໃຫ້ຄວາມຮັກຂອງເຂົາເຈົ້າຈືດຈາງລົງ. (ອ່ານຜູ້ເທສະໜາປ່າວປະກາດ 4:12) ນອກຈາກນັ້ນ ຜູ້ທີ່ຮັກພະເຢໂຫວາຍັງຈະພະຍາຍາມຮຽນແບບພະເຢໂຫວາແລະສະແດງຄຸນລັກສະນະຕ່າງໆທີ່ເພິ່ນມີ ເຊັ່ນ: ຄວາມກະລຸນາ ຄວາມອົດທົນ ແລະການໃຫ້ອະໄພ. (ອຟຊ. 4:32–5:1) ເມື່ອຄູ່ຜົວເມຍສະແດງຄຸນລັກສະນະເຫຼົ່ານີ້ ມັນກໍງ່າຍທີ່ເຂົາເຈົ້າຈະຮັກກັນຫຼາຍຂຶ້ນ. ພີ່ນ້ອງຍິງຄົນໜຶ່ງທີ່ຊື່ລີນາເຊິ່ງແຕ່ງດອງມາດົນກວ່າ 25 ປີໄດ້ບອກວ່າ: “ມັນງ່າຍທີ່ຈະຮັກແລະນັບຖືຄົນທີ່ມີຄວາມເຊື່ອເຂັ້ມແຂງ.”
4. ເປັນຫຍັງພະເຢໂຫວາຈຶ່ງເລືອກໂຢເຊັບແລະມາຣີໃຫ້ເປັນພໍ່ແມ່ຂອງເມຊີອາ?
4 ໃຫ້ເຮົາມາເບິ່ງຕົວຢ່າງໜຶ່ງໃນຄຳພີໄບເບິນນຳກັນ. ເມື່ອພະເຢໂຫວາເລືອກຜູ້ທີ່ຈະມາເປັນພໍ່ແມ່ຂອງເມຊີອາທີ່ຈະມາໃນອະນາຄົດ ເພິ່ນໄດ້ເລືອກໂຢເຊັບແລະມາຣີຈາກລູກຫຼານຂອງດາວິດ. ຍ້ອນຫຍັງ? ຍ້ອນເຂົາເຈົ້າທັງສອງມີສາຍສຳພັນທີ່ແໜ້ນແຟ້ນກັບພະເຢໂຫວາ ແລະພະເຢໂຫວາກໍຮູ້ວ່າເຂົາເຈົ້າໃຫ້ເພິ່ນສຳຄັນທີ່ສຸດໃນຊີວິດຄູ່ຂອງເຂົາເຈົ້າ. ຜູ້ທີ່ແຕ່ງດອງແລ້ວ ເຈົ້າຈະຮຽນຫຍັງໄດ້ຈາກໂຢເຊັບແລະມາຣີ?
5. ຜູ້ທີ່ເປັນຜົວສາມາດຮຽນຫຍັງໄດ້ຈາກໂຢເຊັບ?
5 ໂຢເຊັບພ້ອມສະເໝີທີ່ຈະເຮັດຕາມການຊີ້ນຳຂອງພະເຢໂຫວາ. ເລື່ອງນີ້ຈຶ່ງເຮັດໃຫ້ລາວເປັນຜົວທີ່ດີ. ຢ່າງໜ້ອຍມີຢູ່ສາມເທື່ອທີ່ລາວໄດ້ຮັບຄຳແນະນຳຈາກພະເຢໂຫວາ ເຊິ່ງກ່ຽວຂ້ອງກັບຄອບຄົວຂອງລາວ. ແຕ່ລະເທື່ອທີ່ລາວໄດ້ຮັບຄຳແນະນຳ ລາວກໍໄດ້ເຮັດຕາມທັນທີ ເຖິງວ່າຈະເປັນເລື່ອງຍາກສຳລັບລາວ. (ມທ. 1:20, 24; 2:13-15, 19-21) ໂດຍການເຮັດຕາມການຊີ້ນຳຂອງພະເຢໂຫວາ ໂຢເຊັບສາມາດປົກປ້ອງແລະເບິ່ງແຍງມາຣີໄດ້. ລອງຄິດເບິ່ງວ່າ ສິ່ງທີ່ໂຢເຊັບເຮັດຈະເຮັດໃຫ້ມາຣີຮູ້ສຶກຮັກແລະນັບຖືໂຢເຊັບຫຼາຍຂະໜາດໃດ. ຜູ້ທີ່ເປັນຜົວ ເຈົ້າສາມາດຮຽນແບບໂຢເຊັບໄດ້ໂດຍຊອກຫາຄຳແນະນຳຈາກຄຳພີໄບເບິນກ່ຽວກັບເລື່ອງຄອບຄົວ. d ເມື່ອເຈົ້າເຮັດຕາມຄຳແນະນຳນັ້ນເຖິງວ່າຈະເປັນເລື່ອງຍາກ ກໍສະແດງວ່າເຈົ້າຮັກເມຍແລະຢາກໃຫ້ສາຍສຳພັນໃນຊີວິດຄູ່ຂອງເຈົ້າແໜ້ນແຟ້ນຂຶ້ນ. ພີ່ນ້ອງຍິງຄົນໜຶ່ງທີ່ຢູ່ໃນປະເທດວານົວຕູ ເຊິ່ງແຕ່ງດອງມາຫຼາຍກວ່າ 20 ປີແລ້ວບອກວ່າ “ເມື່ອຜົວຂອງຂ້ອຍຊອກຫາຄຳແນະນຳແລະເຮັດຕາມການຊີ້ນຳຂອງພະເຢໂຫວາ ກໍເຮັດໃຫ້ຂ້ອຍນັບຖືລາວຫຼາຍຂຶ້ນ ຮູ້ສຶກອຸ່ນໃຈແລະໝັ້ນໃຈໃນການຕັດສິນໃຈຂອງລາວ.”
6. ຜູ້ເປັນເມຍຮຽນຫຍັງໄດ້ຈາກມາຣີ?
6 ມາຣີມີສາຍສຳພັນທີ່ແໜ້ນແຟ້ນກັບພະເຢໂຫວາເປັນສ່ວນຕົວ ຄວາມເຊື່ອຂອງລາວບໍ່ໄດ້ຂຶ້ນກັບໂຢເຊັບ. ລາວຮູ້ຈັກຂໍ້ພະຄຳພີເປັນຢ່າງດີ. (ລກ. 1:46) ລາວຍັງໄດ້ຈັດເວລາໄວ້ເພື່ອຈະຄິດຕຶກຕອງກ່ຽວກັບພະຄຳພີ. (ລກ. 2:19, 51) ຍ້ອນລາວມີສາຍສຳພັນທີ່ໃກ້ຊິດກັບພະເຢໂຫວາ ຈຶ່ງເຮັດໃຫ້ລາວເປັນເມຍທີ່ດີ. ເມຍຫຼາຍຄົນໃນທຸກມື້ນີ້ພະຍາຍາມທີ່ຈະຮຽນແບບມາຣີ. ຕົວຢ່າງເຊັ່ນ: ພີ່ນ້ອງຍິງທີ່ຊື່ເອມິໂກະບອກວ່າ “ຕອນທີ່ຂ້ອຍເປັນໂສດຂ້ອຍໄດ້ຈັດເວລາທີ່ຈະເສີມຄວາມເຊື່ອເປັນປະຈຳ. ແຕ່ຫຼັງຈາກທີ່ຂ້ອຍແຕ່ງດອງແລ້ວຂ້ອຍຮູ້ສຶກວ່າ ຄວາມເຊື່ອຂອງຂ້ອຍຂຶ້ນຢູ່ກັບຜົວຫຼາຍກວ່າ ເພາະຜົວໄດ້ນຳໜ້າໃນການອະທິດຖານແລະການນະມັດສະການ. ຕໍ່ມາຂ້ອຍກໍສັງເກດເຫັນວ່າ ຂ້ອຍຕ້ອງມີສາຍສຳພັນທີ່ແໜ້ນແຟ້ນກັບພະເຢໂຫວາເປັນສ່ວນຕົວ. ດັ່ງນັ້ນ ຂ້ອຍຈຶ່ງໄດ້ຈັດເວລາທີ່ຈະຢູ່ຄົນດຽວເພື່ອຈະອະທິດຖານເຖິງພະເຢໂຫວາ ອ່ານຄຳພີໄບເບິນແລະຄິດຕຶກຕອງ.” (ຄລຕ. 6:5) ຜູ້ທີ່ເປັນເມຍ ຖ້າເຈົ້າເສີມສ້າງຄວາມເຊື່ອຂອງເຈົ້າກັບພະເຢໂຫວາເປັນປະຈຳ ຜົວຂອງເຈົ້າກໍຈະຍົກຍ້ອງແລະຮັກເຈົ້າຫຼາຍຂຶ້ນ.—ສຸພາ. 31:30
7. ຄູ່ຜົວເມຍໄດ້ບົດຮຽນຫຍັງຈາກໂຢເຊັບແລະມາຣີກ່ຽວກັບການນະມັດສະການພະເຢໂຫວາຮ່ວມກັນເປັນຄູ່?
7 ໂຢເຊັບກັບມາຣີຍັງໄດ້ຊ່ວຍກັນຮັກສາສາຍສຳພັນຂອງເຂົາເຈົ້າກັບພະເຢໂຫວາໃຫ້ແໜ້ນແຟ້ນຢູ່ສະເໝີ. ເຂົາເຈົ້າເຂົ້າໃຈວ່າເປັນເລື່ອງສຳຄັນຫຼາຍທີ່ຈະນະມັດສະການພະເຢໂຫວາຮ່ວມກັນເປັນຄອບຄົວ. (ລກ. 2:22-24, 41; 4:16) ອາດເປັນເລື່ອງຍາກທີ່ຈະເຮັດແບບນັ້ນເມື່ອເຂົາເຈົ້າມີລູກຫຼາຍຄົນ ແຕ່ເຂົາເຈົ້າກໍສາມາດທີ່ຈະນະມັດສະການພະເຢໂຫວາເປັນຄອບຄົວໄດ້. ໂຢເຊັບກັບມາຣີເປັນຕົວຢ່າງທີ່ດີຫຼາຍແທ້ໆໃຫ້ກັບຄູ່ຜົວເມຍໃນທຸກມື້ນີ້! ຖ້າເຈົ້າມີລູກຄືກັບໂຢເຊັບແລະມາຣີ ອາດເປັນເລື່ອງຍາກທີ່ເຈົ້າຈະເຂົ້າຮ່ວມການປະຊຸມໄດ້ທຸກລາຍການ. ແລະແຮ່ງເປັນເລື່ອງຍາກຫຼາຍຂຶ້ນທີ່ເຈົ້າຈະມີເວລາສຶກສາແລະອະທິດຖານນຳກັນເປັນຄູ່. ຂໍໃຫ້ຈື່ໄວ້ວ່າ ຖ້າເຈົ້ານະມັດສະການພະເຢໂຫວາຮ່ວມກັນເປັນຄູ່ ເຈົ້າກໍຈະໃກ້ຊິດກັບພະເຢໂຫວາແລະຄູ່ຂອງເຈົ້າຫຼາຍຂຶ້ນ. ດັ່ງນັ້ນ ຂໍໃຫ້ເຈົ້າຈັດໃຫ້ການນະມັດສະການພະເຢໂຫວາເປັນສິ່ງທີ່ສຳຄັນທີ່ສຸດໃນຊີວິດ.
8. ຄູ່ຜົວເມຍທີ່ມີບັນຫາກັນຈະເຮັດແນວໃດເພື່ອຈະໄດ້ຮັບປະໂຫຍດຫຼາຍຂຶ້ນຈາກການນະມັດສະການປະຈຳຄອບຄົວ?
8 ຈະວ່າແນວໃດຖ້າເຈົ້າມີບັນຫາກັບຄູ່ຂອງເຈົ້າ? ອາດເປັນເລື່ອງຍາກທີ່ເຈົ້າຢາກຈະນະມັດສະການປະຈຳຄອບຄົວນຳກັນ. ຖ້າເປັນແບບນັ້ນ ເຈົ້າອາດຈະເລີ່ມຈາກການນະມັດສະການຄອບຄົວສັ້ນໆນຳກັນ ໃນບັນຍາກາດທີ່ຜ່ອນຄາຍແລະເປັນເລື່ອງທີ່ເຈົ້າທັງສອງສົນໃຈ. ການເຮັດແບບນີ້ຈະຊ່ວຍໃຫ້ເຈົ້າແລະຄູ່ຂອງເຈົ້າໃກ້ຊິດກັນ ຮັກກັນຫຼາຍຂຶ້ນ ແລະຢາກນະມັດສະການພະເຢໂຫວາຮ່ວມກັນ.
ໃຊ້ເວລານຳກັນ
9. ເປັນຫຍັງຄູ່ຜົວເມຍຕ້ອງໃຊ້ເວລາຢູ່ນຳກັນ?
9 ຄູ່ຜົວເມຍ ເຈົ້າສາມາດເຮັດໃຫ້ຄວາມຮັກໝັ້ນຄົງຢູ່ສະເໝີໄດ້ໂດຍໃຊ້ເວລາຢູ່ນຳກັນ. ເມື່ອເຈົ້າເຮັດແບບນັ້ນ ມັນກໍຈະຊ່ວຍເຈົ້າໃຫ້ຮູ້ວ່າຄູ່ຂອງເຈົ້າຮູ້ສຶກແນວໃດແລະຄິດຫຍັງຢູ່. (ປຖກ. 2:24) ໃຫ້ເຮົາມາເບິ່ງຄູ່ຂອງລິລີຢາແລະຣູຊະລັນເຊິ່ງໄດ້ແຕ່ງດອງມາ 15 ປີແລ້ວ. ບໍ່ດົນຫຼັງຈາກທີ່ແຕ່ງດອງ ເຂົາເຈົ້າສັງເກດເຫັນບັນຫາໃນຊີວິດຄູ່ຂອງໂຕເອງ. ລິລີຢາເວົ້າວ່າ: “ເຮົາບໍ່ໄດ້ໃຊ້ເວລາຢູ່ນຳກັນຫຼາຍເທົ່າທີ່ຄວນ. ໃນແຕ່ລະມື້ເຮົາຫຍຸ້ງກັບການເຮັດວຽກອາຊີບ ວຽກເຮືອນ ແລະເບິ່ງແຍງລູກໆ. ແລະຕໍ່ມາເຮົາກໍສັງເກດເຫັນວ່າ ຖ້າເຮົາບໍ່ໄດ້ໃຊ້ເວລາຢູ່ນຳກັນ ເຮົາອາດຈະຄ່ອຍໆເຫີນຫ່າງຈາກກັນໄດ້.”
10. ຄູ່ຜົວເມຍຈະໃຊ້ຫຼັກການໃນເອເຟໂຊ 5:15, 16 ແນວໃດ?
10 ຄູ່ຜົວເມຍ ເຈົ້າຈະເຮັດແນວໃດເພື່ອຈະໃຊ້ເວລາຢູ່ນຳກັນ? ເຈົ້າອາດຈະຕ້ອງຈັດເວລາເພື່ອຈະໄດ້ຢູ່ນຳກັນຫຼາຍຂຶ້ນ. (ອ່ານເອເຟໂຊ 5:15, 16) ພີ່ນ້ອງຊາຍທີ່ຊື່ອູຊົນດູເຊິ່ງຢູ່ໃນປະເທດນີຊີເລຍບອກວ່າ: “ເມື່ອຂ້ອຍຈັດຕາຕະລາງຂອງໂຕເອງ ຂ້ອຍຈະຈັດເວລາໄວ້ສຳລັບຂ້ອຍກັບເມຍເພື່ອຈະຢູ່ນຳກັນແລະຖືວ່າການໃຊ້ເວລາຢູ່ນຳກັນເປັນເລື່ອງທີ່ສຳຄັນ.” (ຟລປ. 1:10) ພີ່ນ້ອງອານາຊະຕະເຊຍເຊິ່ງເປັນເມຍຂອງຜູ້ດູແລໝວດທີ່ຮັບໃຊ້ຢູ່ປະເທດໂມນດາວີໄດ້ໃຊ້ເວລາຢ່າງດີທີ່ສຸດແນວໃດ? ລາວບອກວ່າ: “ຕອນທີ່ຜົວຂອງຂ້ອຍຫຍຸ້ງຢູ່ກັບວຽກມອບໝາຍ ຂ້ອຍກໍໄດ້ໃຊ້ເວລານັ້ນເພື່ອເຮັດວຽກສ່ວນຕົວ ແລະຫຼັງຈາກທີ່ຜົວເຮັດວຽກແລ້ວເຮົາຈຶ່ງໃຊ້ເວລາຢູ່ນຳກັນ.” ແຕ່ຈະເຮັດແນວໃດຖ້າເຈົ້າຮູ້ສຶກວ່າຍາກທີ່ຈະຫາເວລາຢູ່ນຳກັນກັບຄູ່ຂອງເຈົ້າ?
ເຈົ້າສອງຄົນຈະເຮັດຫຍັງນຳກັນໄດ້ແດ່? (ເບິ່ງຂໍ້ 11-12)
11. ອາກີລາແລະປີຊະກີລາເຮັດຫຍັງນຳກັນ?
11 ຄູ່ຜົວເມຍ ເຈົ້າສາມາດຮຽນຈາກຕົວຢ່າງຂອງອາກີລາແລະປີຊະກີລາໄດ້. ເຂົາເຈົ້າເປັນຄູ່ໜຶ່ງທີ່ໄດ້ຮັບຄວາມນັບຖືຈາກພີ່ນ້ອງຄລິດສະຕຽນໃນສະຕະວັດທຳອິດ. (ຣມ. 16:3, 4) ເຖິງວ່າຄຳພີໄບເບິນບໍ່ໄດ້ເວົ້າລາຍລະອຽດກ່ຽວກັບຄູ່ນີ້ຫຼາຍປານໃດ ແຕ່ຄຳພີໄບເບິນກໍບອກເຮົາໃຫ້ຮູ້ວ່າເຂົາເຈົ້າເຮັດວຽກ ປະກາດ ແລະຊ່ວຍເຫຼືອຄົນອື່ນຮ່ວມກັນ. (ກຈກ. 18:2, 3, 24-26) ທີ່ຈິງ ທຸກເທື່ອທີ່ຄຳພີໄບເບິນເວົ້າເຖິງອາກີລາແລະປີຊະກີລາ ເຂົາເຈົ້າຈະຢູ່ນຳກັນຕະຫຼອດ.
12. ຜົວແລະເມຍຈະໃຊ້ເວລາຢູ່ນຳກັນຫຼາຍຂຶ້ນໄດ້ແນວໃດ? (ເບິ່ງຮູບພາບ)
12 ຄູ່ຜົວເມຍຈະຮຽນແບບອາກີລາແລະປີຊະກີລາໄດ້ແນວໃດ? ໃຫ້ຄິດເຖິງຫຼາຍຢ່າງທີ່ພວກເຈົ້າຕ້ອງເຮັດ. ມີບາງຢ່າງທີ່ພວກເຈົ້າຈະເຮັດນຳກັນໄດ້ບໍ? ຕົວຢ່າງ ອາກີລາແລະປີຊະກີລາໄປປະກາດນຳກັນ. ເຈົ້າຈະຈັດເວລາເພື່ອໄປປະກາດເປັນປະຈຳນຳກັນໄດ້ບໍ? ນອກຈາກນັ້ນ ອາກີລາແລະປີຊະກີລາຍັງໄດ້ເຮັດວຽກນຳກັນ. ແລ້ວເຈົ້າເດ ເຖິງວ່າເຈົ້າກັບຄູ່ຂອງເຈົ້າອາດຈະບໍ່ໄດ້ເຮັດວຽກນຳກັນ ແຕ່ເຈົ້າສາມາດເຮັດວຽກເຮືອນນຳກັນໄດ້ບໍ? (ຜູ້ປ. 4:9) ເມື່ອເຈົ້າຊ່ວຍກັນເຮັດວຽກ ເຈົ້າກໍຮູ້ສຶກວ່າເຮັດວຽກເປັນທີມແລະມີໂອກາດໄດ້ລົມກັນຫຼາຍຂຶ້ນ. ໂຣເບີດແລະລິນດາໄດ້ແຕ່ງດອງມາຫຼາຍກວ່າ 50 ປີແລ້ວ. ໂຣເບີດບອກວ່າ: “ພວກເຮົາບໍ່ຄ່ອຍມີເວລາໄປນີ້ໄປນັ້ນນຳກັນຫຼາຍປານໃດ. ແຕ່ເມື່ອຂ້ອຍລ້າງຖ້ວຍລ້າງຈານລິນດາຈະເປັນຜູ້ເກັບມ້ຽນ ຫຼືຕອນທີ່ຂ້ອຍເຮັດສວນ ລາວກໍໄດ້ມາຊ່ວຍ. ນີ້ເຮັດໃຫ້ຂ້ອຍມີຄວາມສຸກຫຼາຍ. ການເຮັດສິ່ງຕ່າງໆນຳກັນເຮັດໃຫ້ເຮົາໃກ້ຊິດກັນແລະຮັກກັນຫຼາຍຂຶ້ນ.”
13. ເພື່ອຈະໃກ້ຊິດກັນແທ້ໆຄູ່ຜົວເມຍຕ້ອງເຮັດຫຍັງ?
13 ຂໍໃຫ້ຈື່ໄວ້ວ່າການຢູ່ນຳກັນບໍ່ໄດ້ໝາຍຄວາມວ່າຜົວແລະເມຍຈະໃກ້ຊິດກັນສະເໝີໄປ. ພີ່ນ້ອງຍິງຄົນໜຶ່ງໃນປະເທດເບຣຊິນເວົ້າວ່າ: “ໃນທຸກມື້ນີ້ມີຫຼາຍສິ່ງຫຼາຍຢ່າງທີ່ເຮົາຕ້ອງເຮັດ. ນີ້ຈຶ່ງເປັນເລື່ອງງ່າຍທີ່ຈະຫຼົງຄິດວ່າເຮົາໄດ້ໃກ້ຊິດກັນແລ້ວຍ້ອນວ່າເຮົາຢູ່ເຮືອນຫຼັງດຽວກັນ ແຕ່ທີ່ຈິງແລ້ວມັນບໍ່ແມ່ນ. ການຢູ່ນຳກັນຊື່ໆຍັງບໍ່ພໍ ຂ້ອຍຍັງຕ້ອງໄດ້ໃສ່ໃຈຄູ່ຂອງຂ້ອຍນຳ.” ໃຫ້ເຮົາມາເບິ່ງວ່າບຣູໂນແລະເທໄດ້ເຮັດແນວໃດເພື່ອຈະແນ່ໃຈວ່າເຂົາເຈົ້າສົນໃຈກັນແລະກັນແທ້ໆ. ບຣູໂນເວົ້າວ່າ: “ຕອນທີ່ເຮົາມີເວລາວ່າງເຮົາຈະໃຊ້ເວລາຢູ່ນຳກັນໂດຍທີ່ບໍ່ໃຫ້ໂທລະສັບມາຂັດຂວາງເຮົາ. ນີ້ເຮັດໃຫ້ເຮົາມີຄວາມສຸກໃນການໃຊ້ເວລາຢູ່ນຳກັນ.”
14. ຖ້າຜົວແລະເມຍບໍ່ມັກໃຊ້ເວລາຢູ່ນຳກັນ ເຂົາເຈົ້າຈະເຮັດແນວໃດ?
14 ແຕ່ຈະເຮັດແນວໃດຖ້າເຈົ້າກັບຄູ່ຂອງເຈົ້າບໍ່ມັກໃຊ້ເວລາຢູ່ນຳກັນ? ບາງທີອາດເປັນຍ້ອນວ່າເຈົ້າບໍ່ມັກຄືກັນ ຫຼືອາດຍ້ອນວ່າບໍ່ມັກສິ່ງທີ່ແຕ່ລະຝ່າຍເຮັດ. ຖ້າເປັນແບບນັ້ນ ເຈົ້າຈະເຮັດແນວໃດ? ຂໍໃຫ້ຄິດເຖິງກອງໄຟທີ່ເວົ້າເຖິງໃນຕອນຕົ້ນ. ຕອນທີ່ເຈົ້າເລີ່ມກໍ່ກອງໄຟໃໝ່ໆໄຟກໍບໍ່ໄດ້ລຸກແຮງທັນທີ. ເຈົ້າຕ້ອງໄດ້ໃສ່ຟືນດົ້ນນ້ອຍໆລົງໄປກ່ອນ. ຈາກນັ້ນ ຄ່ອຍໆໃສ່ຟືນດົ້ນໃຫຍ່ລົງໄປ ແລ້ວກອງໄຟກໍຈະລຸກແຮງຂຶ້ນ. ຄ້າຍຄືກັນ ເຈົ້າອາດຈະລອງໃຊ້ເວລາກັບຄູ່ຂອງເຈົ້າມື້ລະໜ້ອຍ ແລະເຮັດສິ່ງທີ່ທັງສອງມັກຄືກັນ. ຢ່າເຮັດສິ່ງທີ່ພວກເຈົ້າເຮັດແລ້ວຜິດກັນ. (ຢກບ. 3:18) ການພະຍາຍາມເລີ່ມຕົ້ນເຮັດເທື່ອລະເລັກເທື່ອລະນ້ອຍອາດຊ່ວຍໃຫ້ພວກເຈົ້າກັບມາຮັກກັນຄືເກົ່າໄດ້.
ນັບຖືແລະໃຫ້ກຽດກັນ
15. ເປັນຫຍັງການສະແດງຄວາມນັບຖືແລະໃຫ້ກຽດກັນຈະຊ່ວຍໃຫ້ຜົວກັບເມຍຮັກກັນຫຼາຍຂຶ້ນ?
15 ການນັບຖືແລະໃຫ້ກຽດກັນເປັນສິ່ງທີ່ສຳຄັນຫຼາຍໃນຊີວິດຄູ່. ຄືກັບກອງໄຟທີ່ລຸກໄດ້ດີຖ້າມີອົກຊີແຊນ ແຕ່ຖ້າບໍ່ມີອົກຊີແຊນ ໄຟກໍຈະມອດໄດ້ງ່າຍ. ຄ້າຍກັນ ຖ້າຜົວແລະເມຍບໍ່ນັບຖືແລະໃຫ້ກຽດກັນ ຄວາມຮັກກໍອາດຈະຈືດຈາງລົງ. ແຕ່ຖ້າເຂົາເຈົ້າພະຍາຍາມສະແດງຄວາມນັບຖືແລະໃຫ້ກຽດກັນຢູ່ສະເໝີ ເຂົາເຈົ້າກໍຈະຮັກກັນຫຼາຍຂຶ້ນ. ເຖິງຈະເປັນແບບນັ້ນກໍຕ້ອງຈື່ໄວ້ວ່າ ສິ່ງທີ່ສຳຄັນກໍຄືຄູ່ຂອງເຈົ້າຮູ້ສຶກບໍວ່າເຈົ້ານັບຖືແລະໃຫ້ກຽດລາວ ບໍ່ແມ່ນເຈົ້າຄິດເອົາເອງວ່າເຈົ້ານັບຖືແລະໃຫ້ກຽດລາວຢູ່ແລ້ວ. ໃຫ້ເຮົາມາເບິ່ງຕົວຢ່າງຂອງເພັນນີກັບອາເຣັດເຊິ່ງແຕ່ງດອງກັນຫຼາຍກວ່າ 25 ປີ. ພີ່ນ້ອງເພັນນີບອກວ່າ: “ເຮົາສອງຄົນນັບຖືແລະໃຫ້ກຽດກັນ ຄອບຄົວເຮົາຈຶ່ງອົບອຸ່ນ. ບໍ່ວ່າເຮົາຈະຮູ້ສຶກແນວໃດ ເຮົາກໍເວົ້າອອກມາໄດ້ເລີຍ ຍ້ອນຮູ້ວ່າຄູ່ຂອງເຮົາພ້ອມທີ່ຈະຟັງ.” ດັ່ງນັ້ນ ເຈົ້າຈະເຮັດແນວໃດເພື່ອຊ່ວຍຄູ່ຂອງເຈົ້າໃຫ້ຮູ້ສຶກວ່າເຈົ້ານັບຖືແລະໃຫ້ກຽດລາວ? ໃຫ້ເຮົາມາເບິ່ງຕົວຢ່າງຂອງອັບຣາຮາມກັບຊາຣານຳກັນ.
ຜົວຕ້ອງໃຫ້ຄວາມນັບຖືແລະຄິດເຖິງຄວາມຮູ້ສຶກຂອງເມຍໂດຍຕັ້ງໃຈຟັງລາວເວົ້າ (ເບິ່ງຂໍ້ 16)
16. ຜູ້ທີ່ເປັນຜົວໄດ້ບົດຮຽນຫຍັງຈາກຕົວຢ່າງຂອງອັບຣາຮາມ? (1 ເປໂຕ 3:7) (ເບິ່ງຮູບພາບ)
16 ອັບຣາຮາມໃຫ້ກຽດຊາຣາໂດຍຟັງຄວາມຄິດເຫັນແລະຄິດເຖິງຄວາມຮູ້ສຶກຂອງຊາຣາສະເໝີ. ມີເທື່ອໜຶ່ງຕອນທີ່ຊາຣາວຸ່ນວາຍໃຈ ລາວໄດ້ເວົ້າແບບໃສ່ອາລົມກັບອັບຣາຮາມ ແລະເຖິງຂັ້ນເວົ້າວ່າອັບຣາຮາມເປັນຝ່າຍຜິດ. ອັບຣາຮາມໃຈຮ້າຍໃຫ້ຊາຣາບໍ? ລາວບໍ່ໄດ້ໃຈຮ້າຍ. ລາວຮູ້ວ່າຊາຣາເປັນເມຍທີ່ຍອມຢູ່ໃຕ້ອຳນາດແລະພ້ອມຊ່ວຍລາວສະເໝີ. ອັບຣາຮາມຟັງແລະພະຍາຍາມແກ້ບັນຫາໃຫ້ກັບຊາຣາ. (ປຖກ. 16:5, 6) ຜູ້ທີ່ເປັນຜົວໄດ້ບົດຮຽນຫຍັງຈາກເລື່ອງນີ້? ເຈົ້າທີ່ເປັນຜົວ ພະເຈົ້າໃຫ້ອຳນາດເຈົ້າທີ່ຈະຕັດສິນໃຈໃນເລື່ອງຄອບຄົວ. (1ກຣ. 11:3) ແຕ່ຖ້າເຈົ້າຮັກເມຍ ເຈົ້າຈະຟັງຄວາມຄິດເຫັນຂອງລາວກ່ອນຈະຕັດສິນໃຈ ໂດຍສະເພາະຖ້າເລື່ອງນັ້ນມີຜົນກະທົບກັບເມຍ. (1ກຣ. 13:4, 5) ນອກຈາກນັ້ນ ຖ້າເມຍກຳລັງເຄັ່ງຕຶງຫຼືຢາກລະບາຍຄວາມຮູ້ສຶກອອກມາ ເຈົ້າຈະຄິດເຖິງຄວາມຮູ້ສຶກຂອງເມຍໂດຍຕັ້ງໃຈຟັງລາວບໍ? (ອ່ານ 1 ເປໂຕ 3:7) ໃຫ້ເຮົາມາເບິ່ງຕົວຢ່າງຂອງແອງເຈລາກັບດິມີທຣີທີ່ແຕ່ງດອງກັນເກືອບ 30 ປີແລ້ວ. ແອງເຈລາອະທິບາຍວ່າລາວຮູ້ສຶກວ່າຜົວໃຫ້ຄວາມນັບຖືລາວ. ລາວບອກວ່າ: “ບໍ່ວ່າຂ້ອຍກຳລັງຮູ້ສຶກເຄັ່ງຕຶງຫຼືຢາກເວົ້າຊື່ໆ ດິມີທຣີກໍພ້ອມຈະຟັງຂ້ອຍສະເໝີ. ລາວອົດທົນກັບຂ້ອຍແທ້ໆແມ່ນແຕ່ຕອນທີ່ຂ້ອຍອາລົມບໍ່ດີ.”
17. ຜູ້ເປັນເມຍຈະຮຽນຫຍັງໄດ້ຈາກຕົວຢ່າງຂອງຊາຣາ? (1 ເປໂຕ 3:5, 6)
17 ຊາຣາສະແດງຄວາມນັບຖືຕໍ່ອັບຣາຮາມໂດຍເຮັດຕາມການຕັດສິນໃຈຂອງຜົວ. (ປຖກ. 12:5) ມີເທື່ອໜຶ່ງທີ່ອັບຣາຮາມຢາກຕ້ອນຮັບແຂກ. ລາວຟ້າວໄປບອກຊາຣາໃຫ້ເຊົາເຮັດສິ່ງອື່ນແລ້ວໄປເຮັດເຂົ້າຈີ່ໄວ້ຫຼາຍໆເພື່ອແຂກ. (ປຖກ. 18:6) ຊາຣາລົງມືເຮັດຕາມທີ່ອັບຣາຮາມບອກທັນທີ. ເຈົ້າທີ່ເປັນເມຍ ເຈົ້າຮຽນແບບຊາຣາໄດ້ໂດຍເຮັດຕາມການຕັດສິນໃຈຂອງຜົວ. ຖ້າເຈົ້າເຮັດແບບນັ້ນ ເຈົ້າກໍກຳລັງເຮັດໃຫ້ຊີວິດຄູ່ຂອງເຈົ້າໝັ້ນຄົງ. (ອ່ານ 1 ເປໂຕ 3:5, 6) ດິມີທຣີທີ່ເວົ້າເຖິງກ່ອນໜ້ານີ້ອະທິບາຍວ່າເມຍເຮັດໃຫ້ລາວຮູ້ສຶກໄດ້ຮັບຄວາມນັບຖືແນວໃດ. ລາວບອກວ່າ: “ຂ້ອຍຮູ້ສຶກຂອບໃຈແອງເຈລາຫຼາຍແທ້ໆທີ່ລາວພະຍາຍາມເຮັດຕາມການຕັດສິນໃຈຂອງຂ້ອຍ ເຖິງວ່າບາງເທື່ອລາວຈະບໍ່ເຫັນດີນຳ. ແລະຖ້າຂ້ອຍຕັດສິນໃຈແລ້ວຜົນອອກມາບໍ່ຄ່ອຍດີ ແອງເຈລາກໍບໍ່ໄດ້ຕຳໜິຂ້ອຍ.” ເຈົ້າເຫັນດີນຳບໍວ່າ ບໍ່ຍາກທີ່ເຮົາຈະຮັກຄົນທີ່ນັບຖືແລະໃຫ້ກຽດເຮົາ!
18. ຖ້າຜົວແລະເມຍພະຍາຍາມເຮັດໃຫ້ຄວາມຮັກໝັ້ນຄົງຢູ່ສະເໝີ ຈະເກີດຜົນດີແນວໃດ?
18 ຊາຕານຢາກໃຫ້ຜົວເມຍທີ່ເປັນຄລິດສະຕຽນເຊົາຮັກກັນ. ມັນຮູ້ວ່າຖ້າເປັນແບບນັ້ນ ເຂົາເຈົ້າອາດຈະບໍ່ສະໜິດກັບພະເຢໂຫວາອີກຕໍ່ໄປ. ແຕ່ຖ້າເຈົ້າມີຄວາມຮັກແທ້ ເຈົ້າຈະບໍ່ເປັນແບບນັ້ນ ຍ້ອນບໍ່ມີຫຍັງຈະທຳລາຍຄວາມຮັກແທ້ໄດ້. ດັ່ງນັ້ນ ຂໍໃຫ້ຄວາມຮັກຂອງເຈົ້າເປັນຄືກັບທີ່ບອກໄວ້ໃນເພງຂອງໂຊໂລໂມນ. ຂໍໃຫ້ເຈົ້າພະຍາຍາມທີ່ຈະໃຫ້ພະເຢໂຫວາສຳຄັນທີ່ສຸດໃນຊີວິດ. ໃຫ້ເວລາກັບຄູ່ຂອງເຈົ້າ ສະແດງຄວາມນັບຖືແລະໃຫ້ກຽດກັນ ລວມທັງການຄິດເຖິງຄວາມຮູ້ສຶກແລະຄວາມຕ້ອງການຂອງຄູ່ຂອງເຈົ້າສະເໝີ. ຖ້າເຈົ້າເຮັດແບບນັ້ນ ຊີວິດຄູ່ຂອງເຈົ້າກໍຈະເຮັດໃຫ້ພະເຢໂຫວາໄດ້ຮັບການຍ້ອງຍໍສັນລະເສີນ ຍ້ອນເພິ່ນເປັນແຫຼ່ງຂອງຄວາມຮັກແທ້. ແລະຄືກັບກອງໄຟທີ່ມີການຕື່ມຟືນຢູ່ຕະຫຼອດ ຄວາມຮັກຂອງເຈົ້າກໍຈະໝັ້ນຄົງຕໍ່ກັນຕະຫຼອດໄປ.
ເພງ 132 ເຮົາສອງຄົນກາຍເປັນຄົນດຽວກັນ
a ການແຕ່ງດອງເປັນຂອງຂວັນຈາກພະເຢໂຫວາ ຄວາມສຳພັນນີ້ຈະເຮັດໃຫ້ຜົວແລະເມຍສາມາດສະແດງຄວາມຮັກຕໍ່ກັນ. ແຕ່ບາງເທື່ອຄວາມຮັກນີ້ອາດຈືດຈາງລົງໄດ້. ຖ້າເຈົ້າແຕ່ງດອງແລ້ວ ບົດຄວາມນີ້ຈະຊ່ວຍເຈົ້າໃຫ້ມີຄວາມຮັກທີ່ແໜ້ນແຟ້ນຕໍ່ໄປແລະມີຄວາມສຸກໃນການໃຊ້ຊີວິດຄູ່.
b ຄວາມຮັກແທ້ຄືຄວາມຮັກທີ່ໝັ້ນຄົງ ສະໝ່ຳສະເໝີ ບໍ່ປ່ຽນແປງ. ຄວາມຮັກແບບນີ້ຖືກເອີ້ນວ່າ “ແປວໄຟຂອງເຢໂຫວາ” ເພາະພະເຢໂຫວາເປັນແຫຼ່ງຂອງຄວາມຮັກ.
c ເຖິງວ່າຄູ່ຂອງເຈົ້າບໍ່ໄດ້ເປັນພະຍານພະເຢໂຫວາ ເຈົ້າກໍສາມາດນຳໃຊ້ຄຳແນະນຳເຫຼົ່ານີ້ໄດ້ເພື່ອເຮັດໃຫ້ສາຍສຳພັນໃນຊີວິດຄູ່ຂອງເຈົ້າແໜ້ນແຟ້ນຂຶ້ນ.—1ກຣ. 7:12-14; 1ປຕ. 3:1, 2
d ເຈົ້າສາມາດເບິ່ງຄຳແນະນຳເພີ່ມເຕີມໃນບົດຄວາມຊຸດທີ່ຊື່ວ່າ “ຄຳແນະນຳສຳລັບຄອບຄົວ” ທີ່ຢູ່ໃນເວັບໄຊ jw.org ແລະໃນແອັບ JW Library® (ພາສາໄທ).
