ບົດຄວາມສຶກສາທີ 20
ເຮົາຈະອະທິດຖານໃຫ້ດີຂຶ້ນໄດ້ແນວໃດ?
“ໃຫ້ລະບາຍຄວາມຮູ້ສຶກຂອງພວກເຈົ້າກັບເພິ່ນ.”—ເພງ. 62:8, ລ.ມ.
ເພງ 45 ສິ່ງທີ່ຄິດຕຶກຕອງໃນໃຈ
ໃຈຄວາມສຳຄັນ a
ເຮົາສາມາດອະທິດຖານເຖິງພະເຢໂຫວາໄດ້ຕະຫຼອດແລະຂໍຄຳແນະນຳຈາກເພິ່ນໄດ້ທຸກເລື່ອງໃນຊີວິດ (ເບິ່ງຂໍ້ 1)
1. ພະເຢໂຫວາຢາກໃຫ້ເຮົາເຮັດຫຍັງ? (ເບິ່ງຮູບພາບ)
ເວລາທີ່ເຮົາຢາກໄດ້ກຳລັງໃຈແລະຄຳແນະນຳ ເຮົາມັກຈະຂໍຄວາມຊ່ວຍເຫຼືອຈາກໃຜ? ເຮົາທຸກຄົນຮູ້ຄຳຕອບຢູ່ແລ້ວ. ເຮົາຈະອະທິດຖານຂໍຄວາມຊ່ວຍເຫຼືອຈາກພະເຢໂຫວາ ແລະເພິ່ນກໍຢາກໃຫ້ເຮົາເຮັດແບບນັ້ນເພາະເພິ່ນບອກໃຫ້ເຮົາ “ອະທິດຖານເປັນປະຈຳ.” (1ທຊ. 5:17) ເຮົາສາມາດອະທິດຖານເຖິງພະເຢໂຫວາເລື່ອງຫຍັງກໍໄດ້ແລະຕອນໃດກໍໄດ້. ແລະເຮົາຍັງຂໍຄຳແນະນຳຈາກເພິ່ນໄດ້ທຸກເລື່ອງໃນຊີວິດ. (ສຸພາ. 3:5, 6) ພະເຢໂຫວາເປັນພະເຈົ້າທີ່ໃຈກວ້າງ ແລະເພິ່ນບອກວ່າເຮົາຈະອະທິດຖານເຖິງເພິ່ນຈັກເທື່ອກໍໄດ້ຕາມທີ່ເຮົາຕ້ອງການ.
2. ເຮົາຈະລົມເລື່ອງຫຍັງໃນບົດຄວາມນີ້?
2 ເຮົາຂອບໃຈພະເຢໂຫວາຫຼາຍແທ້ໆທີ່ໃຫ້ເຮົາອະທິດຖານເຖິງເພິ່ນໄດ້. ແຕ່ບາງເທື່ອເຮົາກໍຮູ້ສຶກວ່າຈັດເວລາອະທິດຖານໄດ້ຍາກຫຼາຍ ແລະເຮົາອາດຮູ້ສຶກວ່າເຮົາຢາກອະທິດຖານໃຫ້ດີຂຶ້ນນຳ. ເຮົາດີໃຈທີ່ເຮົາມີຄຳແນະນຳດີໆກ່ຽວກັບເລື່ອງນີ້ໃນຄຳພີໄບເບິນ. ໃນບົດຄວາມນີ້ເຮົາຈະມາເບິ່ງວ່າ ຕົວຢ່າງຂອງພະເຢຊູຈະຊ່ວຍເຮົາໃຫ້ຈັດເວລາອະທິດຖານໄດ້ແນວໃດ. ແລະເຮົາຈະມາເບິ່ງ 5 ເລື່ອງທີ່ສຳຄັນທີ່ເຮົາຄວນເວົ້າໃນຄຳອະທິດຖານເຊິ່ງຈະຊ່ວຍເຮົາໃຫ້ອະທິດຖານດີຂຶ້ນ.
ພະເຢຊູຈັດເວລາອະທິດຖານ
3. ພະເຢຊູຮູ້ດີໃນເລື່ອງຫຍັງ?
3 ພະເຢຊູຮູ້ດີວ່າພະເຢໂຫວາຖືວ່າຄຳອະທິດຖານຂອງເຮົາມີຄ່າຫຼາຍ. ກ່ອນທີ່ຈະມາຢູ່ໂລກ ພະເຢຊູຢູ່ກັບພະເຢໂຫວາແລະເຫັນພໍ່ຂອງເພິ່ນຕອບຄຳອະທິດຖານຂອງຜູ້ຮັບໃຊ້ທີ່ສັດຊື່ ເຊັ່ນ: ຮັນນາ ດາວິດ ແລະເອລີຢາ ລວມເຖິງຜູ້ຮັບໃຊ້ຄົນອື່ນໆອີກຫຼາຍຄົນ. (1ຊມ. 1:10, 11, 20; 1ກສ. 19:4-6; ເພງ. 32:5) ຍ້ອນແນວນີ້ພະເຢຊູຈຶ່ງສອນພວກລູກສິດໃຫ້ອະທິດຖານຢູ່ເລື້ອຍໆແລະໝັ້ນໃຈວ່າພະເຢໂຫວາຈະຕອບຄຳອະທິດຖານ!—ມທ. 7:7-11
4. ເຮົາໄດ້ບົດຮຽນຫຍັງຈາກການອະທິດຖານຂອງພະເຢຊູ?
4 ພະເຢຊູເປັນຕົວຢ່າງໃຫ້ລູກສິດໃນເລື່ອງການອະທິດຖານ. ພະເຢຊູອະທິດຖານຫຼາຍແທ້ໆຕອນທີ່ເພິ່ນເຮັດວຽກຮັບໃຊ້ຢູ່ເທິງໂລກນີ້. ຍ້ອນເພິ່ນມີວຽກຫຼາຍແລະຫຼາຍຄົນກໍມັກມາຫາເພິ່ນ. ເພິ່ນຈຶ່ງຕ້ອງໄດ້ຈັດເວລາອະທິດຖານ. (ມຣກ. 6:31, 45, 46) ພະເຢຊູຕື່ນແຕ່ເຊົ້າເພື່ອຈະມີເວລາອະທິດຖານຄົນດຽວ. (ມຣກ. 1:35) ຢ່າງໜ້ອຍມີເທື່ອໜຶ່ງທີ່ພະເຢຊູອະທິດຖານໝົດຄືນກ່ອນທີ່ຈະຕັດສິນໃຈເລື່ອງສຳຄັນ. (ລກ. 6:12, 13) ແລະໃນຄືນສຸດທ້າຍກ່ອນທີ່ເພິ່ນຈະຕາຍ ເພິ່ນກໍໄດ້ອະທິດຖານຫຼາຍເທື່ອເພື່ອຈະເຮັດເລື່ອງທີ່ຍາກທີ່ສຸດໃນວຽກມອບໝາຍໃຫ້ສຳເລັດ.—ມທ. 26:39, 42, 44
5. ເຮົາຈະຮຽນແບບພະເຢຊູໄດ້ແນວໃດກ່ຽວກັບການອະທິດຖານ?
5 ຕົວຢ່າງຂອງພະເຢຊູສອນເຮົາວ່າ ບໍ່ວ່າເຮົາຈະມີວຽກຫຼາຍສ່ຳໃດເຮົາກໍຕ້ອງຈັດເວລາອະທິດຖານໃຫ້ໄດ້. ເຮົາອາດຕ້ອງເຮັດຄືກັບພະເຢຊູໂດຍຈັດເວລາເປັນປະຈຳເພື່ອອະທິດຖານ. ບາງເທື່ອເຮົາອາດຕ້ອງຕື່ນແຕ່ເຊົ້າ ຫຼືອາດຕ້ອງໃຊ້ເວລາອີກຈັກໜ້ອຍໜຶ່ງກ່ອນນອນເພື່ອຈະມີເວລາອະທິດຖານໃຫ້ຫຼາຍຂຶ້ນ. ຖ້າເຮົາເຮັດແບບນັ້ນ ເຮົາກໍຈະເຮັດໃຫ້ພະເຢໂຫວາເຫັນວ່າ ເຮົາເຫັນຄ່າສິດທິພິເສດໃນການອະທິດຖານແທ້ໆ. ພີ່ນ້ອງຍິງທີ່ຊື່ລິນຈື່ໄດ້ວ່າເມື່ອລາວເຂົ້າໃຈກ່ຽວກັບການອະທິດຖານ ລາວຮູ້ສຶກປະທັບໃຈຫຼາຍແທ້ໆ. ລາວບອກວ່າ “ຕອນທີ່ຂ້ອຍຮູ້ວ່າຂ້ອຍສາມາດອະທິດຖານຫາພະເຢໂຫວາຕອນໃດກໍໄດ້ ເຮັດໃຫ້ຂ້ອຍຮູ້ສຶກວ່າເພິ່ນເປັນໝູ່ສະໜິດຂອງຂ້ອຍ. ແລະນີ້ເຮັດໃຫ້ຂ້ອຍຢາກອະທິດຖານໃຫ້ດີຂຶ້ນ.” ພວກເຮົາຫຼາຍຄົນກໍຮູ້ສຶກແບບນີ້ແມ່ນບໍ? ໃຫ້ເຮົາມາເບິ່ງ 5 ເລື່ອງທີ່ສຳຄັນທີ່ເຮົາຈະເວົ້າໃນຄຳອະທິດຖານ.
5 ເລື່ອງທີ່ສຳຄັນທີ່ເຮົາຈະເວົ້າໃນຄຳອະທິດຖານ
6. ຈາກພະນິມິດ 4:10, 11 ພະເຢໂຫວາສົມຄວນໄດ້ຮັບຫຍັງ?
6 ສັນລະເສີນພະເຢໂຫວາ. ອັກຄະສາວົກໂຢຮັນເຫັນນິມິດທີ່ເຮັດໃຫ້ລາວຮູ້ສຶກປະທັບໃຈແລະໜ້າເກງຂາມ. ລາວເຫັນຜູ້ປົກຄອງ 24 ຄົນໃນສະຫວັນກຳລັງໝູບໜ້າລົງແລະນະມັດສະການພະເຢໂຫວາ. ເຂົາເຈົ້າສັນລະເສີນພະເຢໂຫວາແລະບອກວ່າ “ພະອົງສົມຄວນໄດ້ຮັບການຍົກຍ້ອງສັນລະເສີນ ຄວາມນັບຖື ແລະລິດເດດ.” (ອ່ານພະນິມິດ 4:10, 11) ນອກຈາກນັ້ນ ທູດສະຫວັນທີ່ສັດຊື່ກໍສັນລະເສີນພະເຢໂຫວາຄືກັນ. ເຂົາເຈົ້າຢູ່ໃນສະຫວັນແລະເຫັນສິ່ງທີ່ເພິ່ນເຮັດ ເຂົາເຈົ້າກໍເລີຍຮູ້ດີວ່າພະເຢໂຫວາເປັນພະເຈົ້າແບບໃດແລະມີຄຸນລັກສະນະຫຍັງແດ່. ນີ້ຈຶ່ງເຮັດໃຫ້ເຂົາເຈົ້າຢາກສັນລະເສີນເພິ່ນ.—ໂຢບ 38:4-7
7. ເຮົາສັນລະເສີນພະເຢໂຫວາໃນເລື່ອງຫຍັງໄດ້ແດ່?
7 ເຮົາກໍຄວນສັນລະເສີນພະເຢໂຫວາໃນຄຳອະທິດຖານຂອງເຮົາຄືກັນ. ບອກພະເຢໂຫວາໃຫ້ຮູ້ວ່າເຮົາຮັກແລະນັບຖືເພິ່ນຫຼາຍສ່ຳໃດ. ຕອນທີ່ເຈົ້າອ່ານແລະສຶກສາຄົ້ນຄວ້າຄຳພີໄບເບິນ ໃຫ້ເຈົ້າລອງສັງເກດວ່າ ເຈົ້າປະທັບໃຈຄຸນລັກສະນະອັນໃດຂອງພະເຢໂຫວາເປັນພິເສດ. (ໂຢບ 37:23; ຣມ. 11:33) ແລະເມື່ອເຈົ້າອະທິດຖານ ກໍໃຫ້ບອກພະເຢໂຫວາວ່າເຈົ້າຮູ້ສຶກແນວໃດກັບຄຸນລັກສະນະນີ້ຂອງເພິ່ນ. ນອກຈາກນັ້ນ ເຮົາຍັງສັນລະເສີນພະເຢໂຫວາຍ້ອນສິ່ງທີ່ເພິ່ນເຮັດເພື່ອເຮົາແລະເພື່ອພີ່ນ້ອງຂອງເຮົາທົ່ວໂລກ. ພະເຢໂຫວາເປັນຫ່ວງແລະປົກປ້ອງພວກເຮົາສະເໝີ.—1ຊມ. 1:27; 2:1, 2
8. ມີເຫດຜົນຫຍັງແດ່ທີ່ເຮົາຄວນຂອບໃຈພະເຢໂຫວາ? (1 ເທຊະໂລນິກ 5:18)
8 ຂອບໃຈພະເຢໂຫວາ. ມີເຫດຜົນຫຼາຍຢ່າງທີ່ເຮົາອະທິດຖານຂອບໃຈພະເຢໂຫວາໄດ້. (ອ່ານ 1 ເທຊະໂລນິກ 5:18) ເຮົາຄວນຂອບໃຈພະເຢໂຫວາສຳລັບທຸກສິ່ງທີ່ເຮົາມີ ຍ້ອນສິ່ງດີທຸກຢ່າງມາຈາກເພິ່ນ. (ຢກບ. 1:17) ຕົວຢ່າງເຊັ່ນ: ເຮົາຂອບໃຈພະເຢໂຫວາທີ່ສ້າງໂລກທີ່ສວຍງາມແລະສິ່ງຕ່າງໆທີ່ໜ້າງຶດງໍ້. ເຮົາຂອບໃຈທີ່ເພິ່ນໃຫ້ເຮົາມີຊີວິດ ມີຄອບຄົວ ມີໝູ່ ມີຄວາມຫວັງ ແລະເຮົາຍັງຂອບໃຈທີ່ເຮົາໄດ້ເປັນໝູ່ກັບເພິ່ນ.
9. ເປັນຫຍັງເຮົາຕ້ອງສ້າງນິດໄສທີ່ຈະເຫັນຄ່າແລະຂອບໃຈພະເຢໂຫວາ?
9 ເຮົາອາດຕ້ອງພະຍາຍາມຫຼາຍທີ່ຈະຄິດເຖິງເຫດຜົນທີ່ເຮົາຄວນຂອບໃຈພະເຢໂຫວາ ຍ້ອນເຮົາຢູ່ໃນໂລກທີ່ມີແຕ່ຄົນເຫັນແກ່ໂຕແລະບໍ່ຮູ້ຈັກຂອບໃຈ. ເຂົາເຈົ້າສົນໃຈແຕ່ວ່າຈະເຮັດແນວໃດເພື່ອໃຫ້ໄດ້ສິ່ງທີ່ໂຕເອງຕ້ອງການ ບໍ່ໄດ້ສົນໃຈວ່າຈະສະແດງຄວາມຂອບໃຈແນວໃດສຳລັບສິ່ງທີ່ໂຕເອງມີ. ຖ້າເຮົາເລີ່ມຄິດຄືກັບເຂົາເຈົ້າ ຄຳອະທິດຖານຂອງເຮົາກໍຈະມີແຕ່ການຂໍເທົ່ານັ້ນ. ເພື່ອຈະບໍ່ເປັນແບບນີ້ ເຮົາຕ້ອງພະຍາຍາມສ້າງນິດໄສທີ່ຈະເຫັນຄ່າແລະຂອບໃຈທຸກຢ່າງທີ່ພະເຢໂຫວາເຮັດເພື່ອເຮົາ.—ລກ. 6:45
ການຂອບໃຈພະເຢໂຫວາສະເໝີສຳລັບສິ່ງທີ່ເພິ່ນເຮັດເພື່ອເຮົາຈະຊ່ວຍໃຫ້ເຮົາອົດທົນກັບຄວາມຍາກລຳບາກໄດ້ (ເບິ່ງຂໍ້ 10)
10. ການຮູ້ຈັກຂອບໃຈຊ່ວຍພີ່ນ້ອງຍິງຄົນໜຶ່ງແນວໃດໃຫ້ອົດທົນກັບບັນຫາໄດ້? (ເບິ່ງຮູບພາບ)
10 ການທີ່ເຮົາເປັນຄົນຮູ້ຈັກຂອບໃຈຈະຊ່ວຍໃຫ້ເຮົາອົດທົນກັບຄວາມລຳບາກໄດ້. ໃຫ້ເຮົາມາເບິ່ງປະສົບການຂອງພີ່ນ້ອງຍິງຄົນໜຶ່ງທີ່ຊື່ຄີຢອງສຸກ ເຊິ່ງລົງໃນຫໍສັງເກດການສະບັບທີ 15 ມັງກອນ ປີ 2015. ໝໍບອກວ່າລາວເປັນມະເຮັງປອດໄລຍະສຸດທ້າຍ. ລາວບອກວ່າ “ຄວາມເຈັບປ່ວຍເທື່ອນີ້ເຮັດໃຫ້ຂ້ອຍຮູ້ສຶກບໍ່ດີຫຼາຍ. ຂ້ອຍຮູ້ສຶກສູນເສຍທຸກຢ່າງ ແລະຂ້ອຍກໍຢ້ານຫຼາຍ.” ແຕ່ອັນໃດຊ່ວຍຄີຢອງສຸກໃຫ້ຮັບມືໄດ້? ລາວບອກວ່າທຸກຄືນກ່ອນນອນ ລາວຈະຂຶ້ນໄປເທິງດາດຟ້າແລະອະທິດຖານໂດຍອອກສຽງ. ລາວຂອບໃຈພະເຢໂຫວາສຳລັບສິ່ງດີໆຫ້າຢ່າງທີ່ໄດ້ຮັບຈາກເພິ່ນໃນມື້ນັ້ນ. ນີ້ເຮັດໃຫ້ລາວຮູ້ສຶກຮັກພະເຢໂຫວາຫຼາຍແລະກັງວົນໜ້ອຍລົງ. ລາວເຫັນວ່າພະເຢໂຫວາຊ່ວຍຜູ້ຮັບໃຊ້ທີ່ສັດຊື່ຂອງເພິ່ນຕອນທີ່ເຈິບັນຫາໜັກ ແລະລາວກໍຮູ້ວ່າທີ່ຈິງແລ້ວພອນທີ່ໄດ້ຮັບໃນຊີວິດມີຫຼາຍກວ່າບັນຫາທີ່ລາວເຈິຫຼາຍເທົ່າ. ພວກເຮົາກໍຮູ້ສຶກຄືກັບພີ່ນ້ອງຄີຢອງສຸກ ແລະມີຫຼາຍເຫດຜົນແທ້ໆທີ່ເຮົາຈະຂອບໃຈພະເຢໂຫວາໄດ້ ແມ່ນແຕ່ຕອນທີ່ເຮົາກຳລັງເຈິບັນຫາ. ການອະທິດຖານຂອບໃຈພະເຢໂຫວາຊ່ວຍໃຫ້ເຮົາອົດທົນແລະສະຫງົບໃຈໄດ້.
11. ຫຼັງຈາກທີ່ພະເຢຊູກັບໄປສະຫວັນແລ້ວ ເປັນຫຍັງພວກລູກສິດຂອງເພິ່ນຕ້ອງມີຄວາມກ້າຫານ?
11 ຂໍພະເຢໂຫວາຊ່ວຍໃຫ້ມີຄວາມກ້າຫານໃນວຽກປະກາດ. ກ່ອນທີ່ພະເຢຊູຈະກັບໄປສະຫວັນ ເພິ່ນໄດ້ບອກພວກລູກສິດປະກາດເລື່ອງຂອງເພິ່ນ “ໃນເມືອງເຢຣູຊາເລັມ ແລະທົ່ວແຂວງຢູດາຍກັບແຂວງຊາມາເຣຍ ແລະຈົນຮອດສຸດຂອບໂລກ.” (ກຈກ. 1:8; ລກ. 24:46-48) ຫຼັງຈາກນັ້ນບໍ່ດົນ ພວກຜູ້ນຳຄົນຢິວກໍຈັບເປໂຕກັບໂຢຮັນແລະພາໄປສານຊັນເຮດຣິນແລະສັ່ງໃຫ້ເຂົາເຈົ້າເຊົາປະກາດ ພວກຜູ້ນຳຄົນຢິວເຖິງກັບຂົ່ມຂູ່ສອງຄົນນີ້. (ກຈກ. 4:18, 21) ແລ້ວເປໂຕກັບໂຢຮັນເຮັດແນວໃດ?
12. ຈາກກິດຈະການ 4:29, 31 ພວກລູກສິດເຮັດຫຍັງ?
12 ເປໂຕກັບໂຢຮັນຕອບພວກຫົວໜ້າສາສະໜາຄົນຢິວວ່າ: “ພະເຈົ້າຈະຖືວ່າຖືກຕ້ອງບໍຖ້າພວກເຮົາເຊື່ອຟັງພວກເຈົ້າແທນທີ່ຈະເຊື່ອຟັງພະເຈົ້າ ໃຫ້ພວກເຈົ້າຕັດສິນເອົາເອງ. ແຕ່ພວກເຮົາບໍ່ສາມາດເຊົາເວົ້າເລື່ອງທີ່ໄດ້ເຫັນແລະໄດ້ຍິນນັ້ນ.” (ກຈກ. 4:19, 20) ເມື່ອເປໂຕກັບໂຢຮັນຖືກປ່ອຍອອກມາ ພວກລູກສິດທັງໝົດກໍອະທິດຖານເຖິງພະເຢໂຫວາກ່ຽວກັບການເຮັດຕາມຄວາມຕ້ອງການຂອງເພິ່ນ. ເຂົາເຈົ້າອະທິດຖານວ່າ: “ຂໍຊ່ວຍພວກເຮົາທີ່ເປັນທາດຂອງພະອົງໃຫ້ກ້າປະກາດຄຳສອນຂອງພະອົງຕໍ່ໆໄປ.” ແລະພະເຢໂຫວາກໍຕອບຄຳອະທິດຖານຂອງເຂົາເຈົ້າ.—ອ່ານກິດຈະການ 4:29, 31
13. ເຮົາຮຽນຫຍັງໄດ້ຈາກຕົວຢ່າງຂອງພີ່ນ້ອງຈິນຮຸກ?
13 ເຮົາສາມາດຮຽນແບບລູກສິດຂອງພະເຢຊູໄດ້ໂດຍປະກາດຕໍ່ໆໄປເຖິງວ່າເຈົ້າໜ້າທີ່ຈະສັ່ງຫ້າມ. ໃຫ້ເຮົາມາເບິ່ງຕົວຢ່າງຂອງພີ່ນ້ອງຈິນຮຸກທີ່ຕ້ອງຕິດຄຸກຍ້ອນບໍ່ຍອມເປັນທະຫານ. ຕອນທີ່ລາວຢູ່ໃນຄຸກ ລາວໄດ້ຮັບມອບໝາຍໃຫ້ເບິ່ງແຍງນັກໂທດບາງຄົນທີ່ຖືກຂັງດ່ຽວ. ເຈົ້າໜ້າທີ່ອະນຸຍາດໃຫ້ລາວຖາມນັກໂທດເຫຼົ່ານັ້ນວ່າຕ້ອງການຫຍັງ ແຕ່ບໍ່ອະນຸຍາດໃຫ້ລາວລົມກັບນັກໂທດເລື່ອງອື່ນໆເຊິ່ງລວມເຖິງເລື່ອງຄຳພີໄບເບິນນຳ. ຈິນຮຸກອະທິດຖານຂໍພະເຢໂຫວາຊ່ວຍໃຫ້ລາວມີຄວາມກ້າແລະຫາວິທີລົມເລື່ອງຄວາມຈິງໃຫ້ຫຼາຍທີ່ສຸດເທົ່າທີ່ຈະເປັນໄປໄດ້. (ກຈກ. 5:29) ລາວບອກວ່າ: “ພະເຢໂຫວາຕອບຄຳອະທິດຖານຂອງຂ້ອຍໂດຍໃຫ້ຂ້ອຍມີຄວາມກ້າຫານແລະມີສະຕິປັນຍາເພື່ອຈະຮູ້ວິທີເລີ່ມການສຶກສາຄຳພີໄບເບິນກັບຫຼາຍຄົນໂດຍໃຊ້ເວລາພຽງແຕ່ 5 ນາທີຢູ່ປະຕູຄຸກ. ຕອນກາງຄືນຂ້ອຍຈະຂຽນຈົດໝາຍເພື່ອເອົາໄປໃຫ້ພວກນັກໂທດໃນມື້ຕໍ່ໄປ.” ຄືກັບຈິນຮຸກ ເຮົາເອງກໍສາມາດອະທິດຖານຂໍຄວາມກ້າຫານແລະສະຕິປັນຍາໄດ້ ແລະເຮົາໝັ້ນໃຈວ່າພະເຢໂຫວາຈະຊ່ວຍເຮົາໃຫ້ເຮັດວຽກຮັບໃຊ້ຂອງເພິ່ນໄດ້.
14. ສິ່ງໃດຈະຊ່ວຍເຮົາໃຫ້ຮັບມືກັບບັນຫາໄດ້? (ຄຳເພງ 37:3, 5)
14 ຂໍພະເຢໂຫວາຊ່ວຍໃຫ້ຮັບມືກັບບັນຫາ. ພວກເຮົາຫຼາຍຄົນອາດມີບັນຫາທາງດ້ານຮ່າງກາຍຫຼືຈິດໃຈ ຄົນທີ່ເຮົາຮັກຕາຍຈາກໄປ ຖືກຂົ່ມເຫງ ມີບັນຫາໃນຄອບຄົວ ຫຼືບັນຫາອື່ນໆໃນຊີວິດ. ແລະຖ້າເກີດໂລກລະບາດຫຼືມີສົງຄາມ ການຮັບມືກັບບັນຫາເຫຼົ່ານີ້ກໍແຮ່ງຍາກຕື່ມອີກ. ຖ້າເຈົ້າເຈິແບບນີ້ຢູ່ ໃຫ້ເຈົ້າອະທິດຖານລະບາຍໃຫ້ພະເຢໂຫວາຟັງວ່າເຈົ້າກຳລັງເຈິກັບຫຍັງແລະຮູ້ສຶກແນວໃດຄືທີ່ເຈົ້າລະບາຍໃຫ້ໝູ່ສະໜິດຟັງ ແລະໃຫ້ໝັ້ນໃຈວ່າພະເຢໂຫວາ “ຈະຊ່ວຍເຈົ້າ.”—ອ່ານຄຳເພງ 37:3, 5 ລ.ມ.
15. ການອະທິດຖານຊ່ວຍເຮົາແນວໃດໃຫ້ອົດທົນເມື່ອເຈິຄວາມຍາກລຳບາກ? ຂໍໃຫ້ຍົກຕົວຢ່າງ.
15 ການອະທິດຖານເລື້ອຍໆຈະຊ່ວຍໃຫ້ເຮົາ “ອົດທົນເມື່ອພົບຄວາມທຸກລຳບາກ.” (ຣມ. 12:12) ພະເຢໂຫວາຮູ້ວ່າຜູ້ຮັບໃຊ້ຂອງເພິ່ນກຳລັງເຈິບັນຫາຫຍັງ ແລະ “ເພິ່ນຟັງສຽງຮ້ອງຂໍຄວາມຊ່ວຍເຫຼືອຂອງເຂົາເຈົ້າ.” (ເພງ. 145:18, 19, ລ.ມ.) ໄພໂອເນຍຄົນໜຶ່ງຊື່ຄຣິດສ໌ຕີ້ອາຍຸ 29 ປີໄດ້ເຈິເລື່ອງນີ້ກັບໂຕເອງ. ລາວມີບັນຫາສຸຂະພາບຮ້າຍແຮງທີ່ບໍ່ຄາດຄິດ ແລະນີ້ເຮັດໃຫ້ລາວຊຶມເສົ້າຫຼາຍ. ບໍ່ແມ່ນແຕ່ເທົ່ານັ້ນ ຕໍ່ມາແມ່ຂອງລາວກໍເຈັບປ່ວຍຮ້າຍແຮງທີ່ອາດຈະຕ້ອງຕາຍ. ລາວບອກວ່າ: “ຂ້ອຍອະທິດຖານເຖິງພະເຢໂຫວາຢ່າງຈິງຈັງ ຂໍເພິ່ນໃຫ້ກຳລັງກັບຂ້ອຍທີ່ຈະຜ່ານແຕ່ລະມື້ໄປໄດ້. ແລະຂ້ອຍກໍພະຍາຍາມໄປປະຊຸມເປັນປະຈຳແລະສຶກສາສ່ວນຕົວສະໝ່ຳສະເໝີໃຫ້ໄດ້.” ລາວຍັງບອກອີກວ່າ: “ການອະທິດຖານຊ່ວຍຂ້ອຍໃຫ້ຮັບມືກັບຊ່ວງເວລາທີ່ຍາກລຳບາກ. ຂ້ອຍຮູ້ວ່າພະເຢໂຫວາຢູ່ກັບຂ້ອຍຕະຫຼອດ ແລະມັນເຮັດໃຫ້ຂ້ອຍຮູ້ສຶກດີຂຶ້ນຫຼາຍແບບທີ່ບໍ່ໜ້າເຊື່ອ. ເຖິງພະເຢໂຫວາບໍ່ໄດ້ເຮັດໃຫ້ບັນຫາສຸຂະພາບຂອງຂ້ອຍຫາຍໄປທັນທີ ແຕ່ເພິ່ນກໍຕອບຄຳອະທິດຖານຂອງຂ້ອຍແລະຊ່ວຍຂ້ອຍໃຫ້ສະຫງົບໃຈໄດ້ແທ້ໆ.” ຂໍໃຫ້ເຮົາຈື່ໄວ້ສະເໝີວ່າ “ພະເຢໂຫວາຮູ້ວິທີຊ່ວຍຄົນທີ່ເຫຼື້ອມໃສພະອົງໃຫ້ຜ່ານການທົດສອບ.”—2ປຕ. 2:9
ເພື່ອຈະເອົາຊະນະການລໍ້ໃຈ ເຈົ້າຕ້ອງ (1) ອະທິດຖານຂໍໃຫ້ພະເຢໂຫວາຊ່ວຍ (2) ເຮັດຕາມທີ່ເຈົ້າອະທິດຖານ (3) ເຮັດສິ່ງທີ່ຊ່ວຍໃຫ້ເຈົ້າສະໜິດກັບພະເຢໂຫວາຫຼາຍຂຶ້ນ (ເບິ່ງຂໍ້ 16-17)
16. ເປັນຫຍັງເຮົາຕ້ອງຂໍພະເຢໂຫວາຊ່ວຍເຮົາໃຫ້ເອົາຊະນະການລໍ້ໃຈ?
16 ຂໍພະເຢໂຫວາຊ່ວຍໃຫ້ເອົາຊະນະການລໍ້ໃຈ. ເຮົາເປັນມະນຸດທີ່ບໍ່ສົມບູນແບບ. ເຮົາຈຶ່ງຕ້ອງຕໍ່ສູ້ຢູ່ເລື້ອຍໆເພື່ອຈະບໍ່ເຮັດຜິດ. ແຕ່ບໍ່ພຽງເທົ່ານັ້ນ ຊາຕານມັນພະຍາຍາມເຮັດທຸກວິທີເພື່ອຈະເຮັດໃຫ້ເຮົາສູ້ກັບການລໍ້ໃຈໄດ້ຍາກຂຶ້ນ. ວິທີໜຶ່ງທີ່ຊາຕານໃຊ້ກໍຄື ມັນພະຍາຍາມເຮັດໃຫ້ເຮົາຄິດເຖິງການພັກຜ່ອນຢ່ອນໃຈທີ່ບໍ່ດີເຊິ່ງອາດເຮັດໃຫ້ເຮົາເກີດມີຄວາມຄິດທີ່ບໍ່ສະອາດ. ຄວາມຄິດແບບນີ້ເຮັດໃຫ້ເຮົາບໍ່ສະອາດໃນສາຍຕາຂອງພະເຈົ້າ ແລະໃນທີ່ສຸດອາດເຮັດໃຫ້ເຮົາເຮັດບາບຮ້າຍແຮງໄດ້.—ມຣກ. 7:21-23; ຢກບ. 1:14, 15
17. ນອກຈາກອະທິດຖານຂໍຄວາມຊ່ວຍເຫຼືອຈາກພະເຢໂຫວາແລ້ວ ເຮົາຍັງຕ້ອງເຮັດຫຍັງອີກ? (ເບິ່ງຮູບພາບ)
17 ເພື່ອເຮົາຈະເອົາຊະນະການລໍ້ໃຈໄດ້ ເຮົາຕ້ອງໃຫ້ພະເຢໂຫວາຊ່ວຍ. ໃນຕົວຢ່າງຄຳອະທິດຖານຂອງພະເຢຊູ ເພິ່ນບອກໃຫ້ພວກລູກສິດເວົ້າເຖິງເລື່ອງນີ້ນຳ. ເພິ່ນບອກວ່າ: “ຂໍພະອົງຊ່ວຍພວກເຮົາຢ່າໃຫ້ຍອມແພ້ຕໍ່ການລໍ້ໃຈ ແລະຂໍຊ່ວຍພວກເຮົາໃຫ້ພົ້ນຈາກຕົວຊົ່ວຮ້າຍ.” (ມທ. 6:13) ພະເຢໂຫວາຢາກຊ່ວຍເຮົາ ແຕ່ເຮົາຕ້ອງຂໍໃຫ້ເພິ່ນຊ່ວຍ. ແລະໂຕເຮົາເອງກໍຕ້ອງເຮັດໃຫ້ສອດຄ່ອງກັບຄຳອະທິດຖານນຳ. ເຮົາຕ້ອງພະຍາຍາມບໍ່ອ່ານແລະບໍ່ຟັງຄວາມຄິດທີ່ບໍ່ດີເຖິງວ່າຈະເປັນເລື່ອງທີ່ຫຼາຍຄົນກຳລັງສົນໃຈ. (ເພງ. 97:10) ນອກຈາກນັ້ນ ໃຫ້ເຮົາພະຍາຍາມເອົາສິ່ງດີໆໃສ່ໄວ້ໃນຄວາມຄິດຂອງເຮົາ ໂດຍອ່ານແລະສຶກສາຄຳພີໄບເບິນ ໄປປະຊຸມ ແລະໄປປະກາດເປັນປະຈຳ. ຖ້າເຮົາເຮັດແບບນີ້ພະເຢໂຫວາສັນຍາວ່າ ເພິ່ນຈະບໍ່ຍອມປ່ອຍໃຫ້ເຮົາຖືກລໍ້ໃຈຈົນທົນບໍ່ໄດ້.—1ກຣ. 10:12, 13
18. ເຮົາທຸກຄົນຢາກເຮັດຫຍັງໃນເລື່ອງການອະທິດຖານ?
18 ເຮົາທຸກຄົນຕ້ອງອະທິດຖານໃຫ້ຫຼາຍຂຶ້ນເພື່ອຈະສັດຊື່ຕໍ່ພະເຢໂຫວາໃນສະໄໝສຸດທ້າຍທີ່ຍາກລຳບາກແບບນີ້. ໃຫ້ຈັດເວລາເພື່ອອະທິດຖານຈາກໃຈເຖິງພະເຢໂຫວາເປັນປະຈຳ. ພະເຢໂຫວາຢາກໃຫ້ເຮົາລະບາຍຄວາມຮູ້ສຶກກັບເພິ່ນໂດຍການອະທິດຖານ. (ເພງ. 62:8) ໃຫ້ສັນລະເສີນພະເຢໂຫວາແລະຂອບໃຈເພິ່ນສຳລັບທຸກສິ່ງທີ່ເພິ່ນເຮັດເພື່ອເຈົ້າ. ອະທິດຖານຂໍເພິ່ນຊ່ວຍເຈົ້າໃຫ້ມີຄວາມກ້າຫານໃນວຽກປະກາດ ໃຫ້ຮັບມືກັບບັນຫາ ແລະເອົາຊະນະການລໍ້ໃຈທີ່ເຈົ້າກຳລັງເຈິຢູ່. ຢ່າໃຫ້ໃຜຫຼືສິ່ງໃດມາຂັດຂວາງເຈົ້າບໍ່ໃຫ້ອະທິດຖານເປັນປະຈຳ. ແລ້ວພະເຢໂຫວາຕອບຄຳອະທິດຖານຂອງເຮົາແນວໃດ? ເຮົາຈະມາເບິ່ງກ່ຽວກັບເລື່ອງທີ່ສຳຄັນນີ້ໃນບົດຄວາມຕໍ່ໄປ.
ເພງ 42 ຄຳອະທິດຖານຂອງຜູ້ຮັບໃຊ້ພະເຈົ້າ
a ເຮົາຢາກໃຫ້ຄຳອະທິດຖານຂອງເຮົາເປັນຄືກັບຈົດໝາຍທີ່ຂຽນເຖິງໝູ່ທີ່ຮັກ. ແຕ່ມັນກໍບໍ່ແມ່ນເລື່ອງງ່າຍທີ່ຈະຈັດເວລາອະທິດຖານ ແລະບາງເທື່ອເຮົາກໍບໍ່ຮູ້ວ່າຈະອະທິດຖານເລື່ອງຫຍັງ. ບົດຄວາມນີ້ເຮົາຈະມາລົມກັນກ່ຽວກັບເລື່ອງເຫຼົ່ານີ້.
