ເຈົ້າຮູ້ບໍ?
ຫີນຈາລຶກບູຮານສອດຄ່ອງກັບຄຳພີໄບເບິນແນວໃດ?
ຫໍພິພິທະພັນໄບເບິນແລນມິວຊຽມ (Bible Land Museum) ໃນເຢຣູຊາເລັມມີຫີນຈາລຶກທີ່ເກົ່າແກ່ປະມານປີ 700-600 ກ່ອນ ຄ.ສ. ຫີນນີ້ຖືກຄົນພົບໃນຖ້ຳທີ່ໃຊ້ເປັນບ່ອນຝັງສົບ ເຊິ່ງຢູ່ບໍ່ໄກຈາກເມືອງເຫບໂຣນໃນອິດສະຣາເອນ. ຂໍ້ຄວາມໃນຫີນນັ້ນຂຽນວ່າ: “ຂໍໃຫ້ຢາເວຊາບົດລົງໂທດອາກາບຟ໌ລູກຂອງອາກາບວ໌.” ຂໍ້ຄວາມນີ້ສອດຄ່ອງກັບຄຳພີໄບເບິນແນວໃດ? ຂໍ້ຄວາມນີ້ມີຊື່ຂອງພະເຈົ້າ ເຢໂຫວາທີ່ຂຽນເປັນອັກສອນເຮັບເຣີບູຮານແມ່ນ ຢຫວຫ ເປັນທີ່ຮູ້ຈັກກັນດີແລະໃຊ້ໃນຊີວິດປະຈຳວັນໃນສະໄໝນັ້ນ. ໃນຖ້ຳນັ້ນຍັງມີຄຳຈາລຶກອື່ນໆຂອງຄົນທີ່ໄປເຈິກັນ ຫຼືຄົນທີ່ລີ້ຢູ່ຫັ້ນໄດ້ຂຽນໄວ້. ເຂົາເຈົ້າມັກຈະຂຽນຊື່ຂອງຕົວເອງກັບຊື່ຂອງພະເຈົ້າໃສ່ຝາ.
ປອ. ຣາເຊວ ນາບູຊີຜູ້ຊ່ຽວຊານຈາກມະຫາວິທະຍາໄລຈໍເຈຍ (University of Georgia) ບອກວ່າ: “ການໃຊ້ຊື່ ຢຫວຫ ເປັນເລື່ອງສຳຄັນເພາະມີການໃຊ້ຫຼາຍເທື່ອ. ຄົນອິດສະຣາເອນແລະຄົນຢູດາມັກໃຊ້ຄຳນີ້ໃນຊີວິດປະຈຳວັນ.” ເລື່ອງນີ້ສອດຄ່ອງກັບຄຳພີໄບເບິນເພາະໃນນັ້ນມີຊື່ຂອງພະເຈົ້າທີ່ຂຽນເປັນຕົວອັກສອນເຮັບເຣີ ຢຫວຫ ຫຼາຍພັນເທື່ອ ແລະຊື່ຂອງຄົນສະໄໝນັ້ນກໍມັກຈະໃຊ້ຊື່ຂອງພະເຈົ້າຢູ່ນຳ.
ຄຳວ່າ “ຢາເວຊາບົດ” ທີ່ຈາລຶກໄວ້ໃນຫີນນັ້ນແປວ່າ ‘ພະເຢໂຫວາຜູ້ເປັນຈອມທັບ’. ສະນັ້ນ ເບິ່ງຄືວ່າຄົນໃນສະໄໝນັ້ນບໍ່ພຽງແຕ່ໃຊ້ຊື່ພະເຈົ້າ ແຕ່ຍັງໃຊ້ສຳນວນທີ່ວ່າ ‘ພະເຢໂຫວາຜູ້ເປັນຈອມທັບ’ ນຳ. ແລະຄຳພີໄບເບິນກໍໃຊ້ສຳນວນນີ້ໃນພະຄຳພີພາກພາສາເຮັບເຣີຕັ້ງ 283 ເທື່ອເຊິ່ງສ່ວນຫຼາຍຢູ່ໃນເອຊາຢາ ເຢເຣມີ ແລະຊາກາລີ.
