ບົດຄວາມສຶກສາທີ 4
ເປັນຫຍັງເຮົາຈຶ່ງເຂົ້າຮ່ວມປະຊຸມອະນຸສອນ?
“ໃຫ້ເຮັດແບບນີ້ຕໍ່ໆໄປເພື່ອລະນຶກເຖິງຂ້ອຍ.”—ລູກາ 22:19
ເພງ 20 ພະອົງເສຍສະລະລູກຊາຍສຸດທີ່ຮັກ
ໃຈຄວາມສຳຄັນ *
1-2. (ກ) ເຮົາຈະຄິດເຖິງຜູ້ທີ່ເຮົາຮັກເຊິ່ງຕາຍຈາກໄປຫຼາຍທີ່ສຸດຕອນໃດ? (ຂ) ພະເຢຊູໄດ້ເຮັດຫຍັງໃນຄືນກ່ອນທີ່ເພິ່ນຈະຕາຍ?
ບໍ່ວ່າຄົນທີ່ເຮົາຮັກຈະຕາຍຈາກໄປດົນປານໃດແລ້ວ ເຮົາກໍຍັງຄິດຮອດເຂົາເຈົ້າຢູ່. ແລະເມື່ອຄົບຮອບມື້ທີ່ເຂົາເຈົ້າຕາຍຈາກໄປ ເຮົາກໍແຮ່ງຄິດຮອດເຂົາເຈົ້າເປັນພິເສດ.
2 ໃນແຕ່ລະປີ ພວກເຮົາແລະຫຼາຍລ້ານຄົນທົ່ວໂລກໄດ້ມາເຂົ້າຮ່ວມມື້ຄົບຮອບການຕາຍຂອງຄົນທີ່ເຮົາຮັກນັ້ນກໍຄື ພະເຢຊູຄລິດ. (1 ປຕ. 1:8) ທີ່ພວກເຮົາຢາກລະນຶກເຖິງພະເຢຊູ ກໍຍ້ອນເພິ່ນໄດ້ສະລະຊີວິດເປັນຄ່າໄຖ່ເພື່ອຊ່ວຍເຮົາໃຫ້ຫຼຸດພົ້ນອອກຈາກບາບແລະຄວາມຕາຍ. (ມທ. 20:28) ທີ່ຈິງ ພະເຢຊູຢາກໃຫ້ພວກລູກສິດລະນຶກເຖິງການຕາຍຂອງເພິ່ນເພາະໃນຄືນກ່ອນທີ່ເພິ່ນຈະຕາຍ ເພິ່ນໄດ້ຕັ້ງການປະຊຸມ ພິເສດເຊິ່ງເອີ້ນວ່າອາຫານແລງຂອງພະຄລິດ ແລະສັ່ງພວກລູກສິດວ່າ: “ໃຫ້ເຮັດແບບນີ້ຕໍ່ໆໄປເພື່ອລະນຶກເຖິງຂ້ອຍ.”—ລູກາ 22:19
3. ເຮົາຈະມາເບິ່ງຫຍັງໃນບົດຄວາມນີ້?
3 ຜູ້ທີ່ເຂົ້າຮ່ວມການປະຊຸມອະນຸສອນເພື່ອລະນຶກເຖິງການຕາຍຂອງພະເຢຊູສ່ວນຫຼາຍແມ່ນຜູ້ທີ່ມີຄວາມຫວັງຢູ່ໃນໂລກນີ້ ສ່ວນຜູ້ທີ່ມີຄວາມຫວັງໃນສະຫວັນມີຈຳນວນໜ້ອຍດຽວ. ໃນບົດຄວາມນີ້ເຮົາຈະມາເບິ່ງວ່າ ເປັນຫຍັງທັງສອງກຸ່ມນີ້ຈຶ່ງຢາກເຂົ້າຮ່ວມການປະຊຸມອະນຸສອນທຸກປີ ແລະເບິ່ງວ່າເຮົາຈະໄດ້ຮັບປະໂຫຍດແນວໃດເມື່ອເຂົ້າຮ່ວມການປະຊຸມນີ້. ແຕ່ກ່ອນອື່ນໃຫ້ເຮົາມາເບິ່ງວ່າ ເປັນຫຍັງຜູ້ຖືກເຈີມຈຶ່ງເຂົ້າຮ່ວມການປະຊຸມອະນຸສອນ.
ເປັນຫຍັງຜູ້ຖືກເຈີມຈຶ່ງເຂົ້າຮ່ວມການປະຊຸມອະນຸສອນ?
4. ເປັນຫຍັງຜູ້ຖືກເຈີມຈຶ່ງກິນເຂົ້າຈີ່ແລະເຫຼົ້າແວງໃນການປະຊຸມອະນຸສອນ?
4 ທຸກປີ ຜູ້ຖືກເຈີມໄດ້ເຂົ້າຮ່ວມການປະຊຸມອະນຸສອນເພື່ອກິນເຂົ້າຈີ່ແລະເຫຼົ້າແວງ. ເປັນຫຍັງເຂົາເຈົ້າຈຶ່ງເຮັດແບບນັ້ນ? ເພື່ອຈະຮູ້ຄຳຕອບ ໃຫ້ເຮົາມາເບິ່ງສິ່ງທີ່ພະເຢຊູເຮັດໃນຄືນສຸດທ້າຍກ່ອນທີ່ເພິ່ນຈະຕາຍ. ຫຼັງຈາກທີ່ເພິ່ນກິນປັດສະຄາກັບພວກອັກຄະສາວົກແລ້ວ ເພິ່ນກໍໄດ້ຕັ້ງການປະຊຸມພິເສດທີ່ເອີ້ນວ່າອາຫານແລງຂອງພະຄລິດ ເພິ່ນໄດ້ຍື່ນເຂົ້າຈີ່ກັບເຫຼົ້າແວງໃຫ້ອັກຄະສາວົກ 11 ຄົນ ແລະບອກໃຫ້ເຂົາເຈົ້າກິນ. ຈາກນັ້ນ ເພິ່ນກໍໄດ້ເວົ້າເຖິງສັນຍາສອງຢ່າງທີ່ກ່ຽວຂ້ອງກັບເຂົາເຈົ້າເຊິ່ງກໍຄື ສັນຍາໃໝ່ແລະສັນຍາເລື່ອງການປົກຄອງ. * (ລກ. 22:19, 20, 28-30) ສັນຍາເຫຼົ່ານີ້ເປີດໂອກາດໃຫ້ພວກອັກຄະສາວົກແລະຄົນອື່ນໆທີ່ມີຈຳນວນຈຳກັດໄດ້ເປັນກະສັດແລະປະໂລຫິດໃນສະຫວັນ. (ພນມ. 5: 10; 14:1) ດັ່ງນັ້ນ ຈຶ່ງມີແຕ່ຜູ້ຖືກເຈີມທີ່ຢູ່ໃນສັນຍານັ້ນທີ່ຈະກິນເຂົ້າຈີ່ແລະເຫຼົ້າແວງໃນການປະຊຸມອະນຸສອນໄດ້.
5. ຜູ້ຖືກເຈີມຮູ້ວ່າຄວາມຫວັງຂອງເຂົາເຈົ້າເປັນແນວໃດ?
5 ອີກເຫດຜົນໜຶ່ງທີ່ຜູ້ຖືກເຈີມຢາກເຂົ້າຮ່ວມການປະຊຸມອະນຸສອນກໍຄື ເພື່ອເຂົາເຈົ້າຈະໄດ້ຄິດເຖິງຄວາມຫວັງ ທີ່ພະເຢໂຫວາໃຫ້ໃນສະຫວັນ. ພະເຢໂຫວາໃຫ້ເຂົາເຈົ້າມີຄວາມຫວັງທີ່ພິເສດແທ້ໆເພາະເຂົາເຈົ້າຈະມີຊີວິດທີ່ອະມະຕະໃນສະຫວັນ ໄດ້ຮັບໃຊ້ຮ່ວມກັບພະເຢຊູຄລິດແລະຜູ້ຖືກເຈີມຄົນອື່ນໆ ແລະສຳຄັນທີ່ສຸດກໍຄື ເຂົາເຈົ້າຈະໄດ້ຢູ່ກັບພະເຢໂຫວາ! (1 ກຣ. 15:51-53; 1 ຢຮ. 3:2) ການຄິດເຖິງເລື່ອງນີ້ເຮັດໃຫ້ຜູ້ຖືກເຈີມມີຄວາມສຸກຫຼາຍແທ້ໆ. ເຂົາເຈົ້າຮູ້ດີວ່າເຂົາເຈົ້າຈະໄດ້ຮັບສິດທິພິເສດຫຼາຍຢ່າງໃນສະຫວັນ ແຕ່ເພື່ອຈະໄດ້ຮັບສິ່ງເຫຼົ່ານັ້ນ ເຂົາເຈົ້າກໍຕ້ອງຮັກສາຄວາມສັດຊື່ຈົນຕາຍ. (ຕຕ. 2:13; 2 ຕມ. 4:7, 8) ແລ້ວແກະອື່ນເດ ເປັນຫຍັງເຂົາເຈົ້າຈຶ່ງເຂົ້າຮ່ວມການປະຊຸມອະນຸສອນ?—ຢຮ. 10:16
ເປັນຫຍັງແກະອື່ນຈຶ່ງເຂົ້າຮ່ວມການປະຊຸມອະນຸສອນ?
6. ເປັນຫຍັງແກະອື່ນຈຶ່ງເຂົ້າຮ່ວມການປະຊຸມອະນຸສອນທຸກປີ?
6 ເຖິງວ່າແກະອື່ນທີ່ເຂົ້າຮ່ວມການປະຊຸມອະນຸສອນຈະບໍ່ໄດ້ກິນເຂົ້າຈີ່ແລະເຫຼົ້າແວງ ແຕ່ເຂົາເຈົ້າກໍມີຄວາມສຸກທີ່ໄດ້ເຂົ້າຮ່ວມ ການປະຊຸມນີ້. ໃນປີ 1938 ເປັນຄັ້ງທຳອິດທີ່ແກະອື່ນໄດ້ຖືກເຊີນໃຫ້ເຂົ້າຮ່ວມການປະຊຸມອະນຸສອນ. ຫໍສັງເກດການ ວັນທີ 1 ມີນາ ປີ 1938 (ພາສາອັງກິດ) ບອກວ່າ: “ເປັນເລື່ອງທີ່ເໝາະສົມທີ່ແກະອື່ນຈະມາເຂົ້າຮ່ວມໃນການປະຊຸມນີ້ແລະສັງເກດເບິ່ງສິ່ງທີ່ເກີດຂຶ້ນ . . . ນັ້ນເປັນເວລາທີ່ເຮັດໃຫ້ເຂົາເຈົ້າມີຄວາມສຸກຄືກັນ.” ຄືກັບທີ່ແຂກມີຄວາມສຸກເມື່ອໄດ້ມາຮ່ວມງານແຕ່ງດອງ ແກະອື່ນກໍມີຄວາມສຸກຄືກັນເມື່ອໄດ້ເຂົ້າຮ່ວມການປະຊຸມອະນຸສອນ.
7. ເປັນຫຍັງແກະອື່ນຈຶ່ງເຂົ້າຮ່ວມການປະຊຸມອະນຸສອນ?
7 ຄືກັບຜູ້ຖືກເຈີມ ແກະອື່ນກໍຄິດເຖິງຄວາມຫວັງ ທີ່ຈະໄດ້ຮັບໃນອະນາຄົດ. ເຂົາເຈົ້າຢາກເຂົ້າຮ່ວມການປະຊຸມອະນຸສອນເພື່ອຟັງຄຳບັນຍາຍທີ່ເວົ້າເຖິງສິ່ງທີ່ພະຄລິດແລະ 144.000 ຄົນຈະເຮັດເພື່ອມະນຸດທີ່ສັດຊື່ໃນການປົກຄອງໜຶ່ງພັນປີ. ໃນໄລຍະນັ້ນພະຄລິດຈະເປັນຜູ້ຊີ້ນຳຜູ້ທີ່ຮ່ວມປົກຄອງກັບເພິ່ນໃນການເຮັດໃຫ້ໂລກກາຍເປັນອຸທິຍານ ແລະຊ່ວຍໃຫ້ມະນຸດເປັນຄົນທີ່ສົມບູນແບບ. ລອງນຶກພາບວ່າ ຫຼາຍລ້ານຄົນທີ່ເຂົ້າຮ່ວມການປະຊຸມອະນຸສອນຈະມີຄວາມສຸກຫຼາຍສ່ຳໃດເມື່ອເຂົາເຈົ້າຄິດເຖິງຄຳສັນຍາຕ່າງໆທີ່ຈະເກີດຂຶ້ນໃນອະນາຄົດ ເຊັ່ນ ຄຳສັນຍາທີ່ຢູ່ ໃນເອຊາອີ 35:5, 6; 65:21-23 ແລະ ພະນິມິດ 21:3, 4. ເມື່ອເຂົາເຈົ້ານຶກພາບວ່າຕົວເອງແລະຄົນທີ່ເຂົາເຈົ້າຮັກຢູ່ໃນໂລກໃໝ່ ເຂົາເຈົ້າກໍຈະໝັ້ນໃຈຫຼາຍຂຶ້ນໃນຄຳສັນຍາເຫຼົ່ານັ້ນ ແລະບໍ່ຍອມໃຫ້ສິ່ງໃດກໍຕາມມາເຮັດໃຫ້ເຂົາເຈົ້າເຊົາຮັບໃຊ້ພະເຢໂຫວາ.—ມທ. 24:13; ຄລຕ. 6:9
8. ມີເຫດຜົນຫຍັງອີກທີ່ແກະອື່ນເຂົ້າຮ່ວມການປະຊຸມອະນຸສອນ?
8 ຍັງມີອີກເຫດຜົນໜຶ່ງທີ່ແກະອື່ນເຂົ້າຮ່ວມການປະຊຸມອະນຸສອນ ນັ້ນກໍຄືເຂົາເຈົ້າຢາກສະແດງຄວາມຮັກແລະສະໜັບສະໜູນຜູ້ຖືກເຈີມ. ຄຳພີໄບເບິນບອກລ່ວງໜ້າວ່າ ຜູ້ຖືກເຈີມແລະແກະອື່ນຈະໃກ້ຊິດແລະເປັນນ້ຳໜຶ່ງໃຈດຽວກັນ. ຈະເປັນແບບນັ້ນໄດ້ແນວໃດ? ໃຫ້ເຮົາມາເບິ່ງບາງຂໍ້ຈາກຄຳພີໄບເບິນນຳກັນ.
9. ຄຳພະຍາກອນທີ່ຢູ່ໃນຊາກາລີ 8:23 ສະແດງໃຫ້ເຫັນວ່າແກະອື່ນຮູ້ສຶກແນວໃດຕໍ່ຜູ້ຖືກເຈີມ?
9 ອ່ານຊາກາລີ 8:23. * ຄຳພະຍາກອນນີ້ຊ່ວຍເຮົາໃຫ້ເຫັນພາບວ່າແກະອື່ນຮູ້ສຶກແນວໃດຕໍ່ຜູ້ຖືກເຈີມ. ຄຳວ່າ “ຄົນຢິວ” ແລະ “ພວກເຈົ້າ” ໝາຍເຖິງຜູ້ຖືກເຈີມ. (ຣມ. 2:28, 29) ສ່ວນຄຳວ່າ “10 ຄົນຈາກທຸກຊາດທຸກພາສາ” ໝາຍເຖິງແກະອື່ນ. ເຂົາເຈົ້າ ‘ຈັບຍອຍເສື້ອຊາວຢິວ . . . ໄວ້ແໜ້ນ’ ເຊິ່ງກໍໝາຍເຖິງແກະອື່ນຈະເຂົ້າຮ່ວມໃນການນະມັດສະການທີ່ບໍລິສຸດກັບຜູ້ຖືກເຈີມຢ່າງໃກ້ຊິດ. ດັ່ງນັ້ນ ແກະອື່ນຈຶ່ງເຂົ້າຮ່ວມການປະຊຸມອະນຸສອນເພື່ອສະແດງວ່າເຂົາເຈົ້າໃກ້ຊິດກັບຜູ້ຖືກເຈີມ.
10. ພະເຢໂຫວາໄດ້ເຮັດໃຫ້ຄຳພະຍາກອນທີ່ຢູ່ໃນເອເຊກຽນ 37:15-19, 24, 25 ເກີດຂຶ້ນແທ້ແນວໃດ?
10 ອ່ານເອເຊກຽນ 37:15-19, 24, 25. ພະເຢໂຫວາເຮັດໃຫ້ຄຳພະຍາກອນນີ້ສຳເລັດເປັນຈິງໂດຍໃຫ້ແກະອື່ນແລະຜູ້ຖືກເຈີມຮັບໃຊ້ຢ່າງເປັນນ້ຳໜຶ່ງໃຈດຽວກັນ. ຄຳພະຍາກອນນີ້ເວົ້າເຖິງໄມ້ສອງທ່ອນ. ໄມ້ທ່ອນໜຶ່ງເປັນທ່ອນ “ສຳລັບຢູດາ” (ກະສັດຂອງອິດສະຣາເອນມາຈາກຕະກູນນີ້) ເຊິ່ງໝາຍເຖິງຜູ້ທີ່ມີຄວາມຫວັງໄປສະຫວັນ. ແລະອີກທ່ອນໜຶ່ງເປັນ “ຂອງເອຟຣາອິມ” ເຊິ່ງໝາຍເຖິງຜູ້ທີ່ມີຄວາມຫວັງຢູ່ໃນໂລກນີ້. ພະເຢໂຫວາໄດ້ເຮັດໃຫ້ໄມ້ສອງທ່ອນນີ້ກາຍເປັນ ‘ໄມ້ທ່ອນດຽວ’ * ນີ້ໝາຍຄວາມວ່າ ເຂົາເຈົ້າຈະຮັບໃຊ້ຢ່າງເປັນນ້ຳໜຶ່ງໃຈດຽວກັນໂດຍມີພະເຢຊູຄລິດເປັນຜູ້ຊີ້ນຳ. ໃນແຕ່ລະປີ ທັງຜູ້ຖືກເຈີມແລະແກະອື່ນໄດ້ເຂົ້າຮ່ວມການປະຊຸມອະນຸສອນຮ່ວມກັນ ເຂົາເຈົ້າບໍ່ໄດ້ແຍກກັນອອກເປັນສອງກຸ່ມ ແຕ່ເຂົາເຈົ້າຮ່ວມກັນເປັນ “ຝູງດຽວ” ແລະ “ມີຜູ້ລ້ຽງຄົນດຽວ.”—ຢຮ. 10:16
11. “ແກະ” ທີ່ເວົ້າເຖິງໃນມັດທາຍ 25:31-36, 40 ໄດ້ສະໜັບສະໜູນພີ່ນ້ອງຂອງພະຄລິດແນວໃດ?
11 ອ່ານມັດທາຍ 25:31-36, 40. “ແກະ” ທີ່ຢູ່ໃນຕົວຢ່າງປຽບທຽບຂອງພະເຢຊູໝາຍເຖິງຜູ້ທີ່ມີຄວາມຫວັງໃນໂລກນີ້ເຊິ່ງກໍຄື ແກະອື່ນ. ເຂົາເຈົ້າສະໜັບສະໜູນພີ່ນ້ອງຂອງພະຄລິດເຊິ່ງກໍຄື ຜູ້ຖືກເຈີມ ໃຫ້ເຮັດວຽກມອບໝາຍທີ່ສຳຄັນໃຫ້ສຳເລັດໂດຍຊ່ວຍເຮັດວຽກປະກາດໄປທົ່ວໂລກແລະສອນຄົນໃຫ້ເຂົ້າມາເປັນລູກສິດ.—ມທ. 24:14; 28:19, 20
12-13. ແກະອື່ນຍັງໄດ້ຊ່ວຍເຫຼືອພີ່ນ້ອງຂອງພະຄລິດໃນທາງໃດອີກ?
12 ສອງສາມອາທິດກ່ອນການປະຊຸມອະນຸສອນໃນແຕ່ລະປີ ແກະອື່ນໄດ້ຊ່ວຍເຫຼືອພີ່ນ້ອງຂອງພະຄລິດໂດຍມີສ່ວນຮ່ວມໃນໂຄງການພິເສດໃນການເຊີນຄົນທີ່ສົນໃຈໃຫ້ເຂົ້າມາຮ່ວມການປະຊຸມອະນຸສອນ. (ເບິ່ງຂອບ “ ເຈົ້າຈະເຮັດຫຍັງແດ່ໃນໄລຍະການປະຊຸມອະນຸສອນ?”) ເຂົາເຈົ້າຍັງໄດ້ຈັດກຽມຫຼາຍຢ່າງເພື່ອ ຈະຈັດການປະຊຸມອະນຸສອນໃນທຸກປະຊາຄົມທີ່ຢູ່ທົ່ວໂລກ ເຖິງວ່າສ່ວນຫຼາຍຈະບໍ່ມີຜູ້ທີ່ກິນເຂົ້າຈີ່ແລະເຫຼົ້າແວງກໍຕາມ. ແກະອື່ນຍັງມີຄວາມສຸກທີ່ໄດ້ຊ່ວຍເຫຼືອພີ່ນ້ອງຂອງພະຄລິດໃນທາງອື່ນນຳ. ເຂົາເຈົ້າຮູ້ວ່າພະເຢຊູຖືວ່າສິ່ງທີ່ເຂົາເຈົ້າເຮັດເພື່ອຊ່ວຍເຫຼືອຜູ້ຖືກເຈີມກໍສ່ຳກັບວ່າເຂົາເຈົ້າຊ່ວຍເຫຼືອພະເຢຊູຄືກັນ.—ມທ. 25:37-40
13 ບໍ່ວ່າເຮົາທຸກຄົນຈະມີຄວາມຫວັງຢູ່ໃສ ຍັງມີເຫດຜົນຫຍັງອີກທີ່ເຮັດໃຫ້ເຮົາເຂົ້າຮ່ວມການປະຊຸມອະນຸສອນ?
ເປັນຫຍັງເຮົາທຸກຄົນຈຶ່ງເຂົ້າຮ່ວມການປະຊຸມອະນຸສອນ?
14. ພະເຢໂຫວາແລະພະເຢຊູສະແດງຄວາມຮັກທີ່ຍິ່ງໃຫຍ່ຕໍ່ເຮົາແນວໃດ?
14 ເຮົາເຫັນຄ່າຄວາມຮັກທີ່ພະເຢໂຫວາແລະພະເຢຊູສະແດງຕໍ່ເຮົາ. ພະເຢໂຫວາສະແດງຄວາມຮັກຕໍ່ເຮົາໃນຫຼາຍດ້ານ. ແລະດ້ານໜຶ່ງທີ່ສະແດງວ່າເພິ່ນຮັກເຮົາຫຼາຍທີ່ສຸດກໍຄືການທີ່ເພິ່ນສົ່ງລູກຊາຍທີ່ເພິ່ນຮັກໃຫ້ມາທົນທຸກແລະຕາຍເພື່ອເຮົາ. (ຢຮ. 3:16) ແລະພະເຢຊູກໍສະແດງຄວາມຮັກຕໍ່ເຮົາໂດຍເຕັມໃຈສະລະຊີວິດເພື່ອເປັນຄ່າໄຖ່ໃຫ້ເຮົາ. (ຢຮ. 15:13) ເຮົາບໍ່ມີວັນທີ່ຈະຕອບແທນບຸນຄຸນຄວາມຮັກທີ່ພະເຢໂຫວາແລະພະເຢຊູສະແດງຕໍ່ເຮົາໄດ້ ແຕ່ເຮົາສາມາດສະແດງຄວາມຮູ້ຄຸນຄ່າຕໍ່ສິ່ງທີ່ພວກເພິ່ນເຮັດໂດຍວິທີທີ່ເຮົາໃຊ້ຊີວິດໃນແຕ່ລະມື້. (ກລຊ. 3:15) ດັ່ງນັ້ນ ເຮົາຈຶ່ງເຂົ້າຮ່ວມການປະຊຸມອະນຸສອນເພື່ອຈະຄິດເຖິງຄວາມຮັກທີ່ພະເຢໂຫວາແລະພະເຢຊູສະແດງຕໍ່ເຮົາ ແລະເພື່ອສະແດງວ່າເຮົາຮັກພວກເພິ່ນນຳ.
15. ເປັນຫຍັງຜູ້ຖືກເຈີມແລະແກະອື່ນຈຶ່ງເຫັນຄຸນຄ່າຕໍ່ຄ່າໄຖ່ຂອງພະເຢຊູ?
15 ເຮົາເຫັນຄ່າຕໍ່ຄ່າໄຖ່ຂອງພະເຢຊູ. (ມທ. 20:28) ຄ່າໄຖ່ເປັນສິ່ງສຳຄັນຫຼາຍຕໍ່ຜູ້ຖືກເຈີມ. ຍ້ອນຄ່າໄຖ່ ພະເຢໂຫວາຈຶ່ງຍອມຮັບ ຜູ້ຖືກເຈີມເປັນລູກຂອງເພິ່ນ. (ຣມ. 5:1; 8:15-17, 23) ຄ່າໄຖ່ຍັງສຳຄັນຕໍ່ແກະອື່ນຄືກັນ. ຍ້ອນຄ່າໄຖ່ ຈຶ່ງເຮັດໃຫ້ແກະອື່ນ ເປັນຄົນທີ່ສະອາດໃນສາຍຕາຂອງພະເຈົ້າ ສາມາດຮັບໃຊ້ໃນບ່ອນທີ່ສັກສິດ ແລະມີຄວາມຫວັງທີ່ຈະລອດ “ຜ່ານຄວາມທຸກລຳບາກຄັ້ງໃຫຍ່.” (ພນມ. 7:13-15) ດັ່ງນັ້ນ ທັງສອງກຸ່ມນີ້ຈຶ່ງຮູ້ຄຸນຄ່າຕໍ່ຄ່າໄຖ່ ໂດຍເຂົ້າຮ່ວມການປະຊຸມອະນຸສອນທຸກປີ.
16. ອີກເຫດຜົນໜຶ່ງທີ່ເຮົາເຂົ້າຮ່ວມການປະຊຸມອະນຸສອນແມ່ນຫຍັງ?
16 ອີກເຫດຜົນໜຶ່ງທີ່ເຮົາເຂົ້າຮ່ວມການປະຊຸມອະນຸສອນກໍຍ້ອນເຮົາຢາກເຊື່ອຟັງຄຳສັ່ງຂອງພະເຢຊູ. ບໍ່ວ່າເຮົາຈະມີຄວາມຫວັງຢູ່ໃນສະຫວັນຫຼືຢູ່ໃນໂລກ ເຮົາກໍຢາກເຮັດຕາມຄຳສັ່ງຂອງພະເຢຊູໃນຄືນທີ່ເພິ່ນຕັ້ງການປະຊຸມອະນຸສອນທີ່ບອກວ່າ: “ໃຫ້ເຮັດແບບນີ້ຕໍ່ໆໄປເພື່ອລະນຶກເຖິງຂ້ອຍ.”—1 ກຣ. 11:23, 24
ເຮົາຈະໄດ້ຮັບປະໂຫຍດແນວໃດເມື່ອເຂົ້າຮ່ວມການປະຊຸມອະນຸສອນ?
17. ການປະຊຸມອະນຸສອນຊ່ວຍເຮົາໃຫ້ໃກ້ຊິດກັບພະເຢໂຫວາຫຼາຍຂຶ້ນໄດ້ແນວໃດ?
17 ເຮົາໃກ້ຊິດກັບພະເຢໂຫວາຫຼາຍຂຶ້ນ. (ຢກບ. 4:8) ຕາມທີ່ເຮົາໄດ້ຮຽນມາແລ້ວ ການປະຊຸມອະນຸສອນເປັນໂອກາດທີ່ເຮົາຈະຄິດເຖິງຄວາມຫວັງທີ່ດີເລີດທີ່ພະເຢໂຫວາໃຫ້ເຮົາແລະຄວາມຮັກທີ່ຍິ່ງໃຫຍ່ທີ່ເພິ່ນສະແດງຕໍ່ເຮົາ. (ຢເຣ. 29:11; 1 ຢຮ. 4:8-10) ເມື່ອເຮົາຄິດຕຶກຕອງເຖິງເລື່ອງນີ້ ເຮົາກໍຈະຮູ້ສຶກຮັກພະເຢໂຫວາຫຼາຍຂຶ້ນແລະໃກ້ຊິດກັບເພິ່ນຫຼາຍຂຶ້ນ.—ຣມ. 8:38, 39
18. ການຄິດຕຶກຕອງເລື່ອງຂອງພະເຢຊູກະຕຸ້ນເຮົາໃຫ້ເຮັດຫຍັງ?
18 ເຮົາຖືກກະຕຸ້ນທີ່ຈະຮຽນແບບພະເຢຊູ. (1 ປຕ. ) ກ່ອນການປະຊຸມອະນຸສອນ ເຮົາຈະໄດ້ອ່ານເລື່ອງຂອງພະເຢຊູທີ່ເກີດຂຶ້ນໃນອາທິດສຸດທ້າຍທີ່ເພິ່ນມີຊີວິດຢູ່ ຈົນຮອດຕອນທີ່ເພິ່ນຕາຍແລະຄືນມາຈາກຕາຍ. ແລ້ວໃນມື້ ປະຊຸມອະນຸສອນເຮົາກໍຈະໄດ້ຟັງຄຳບັນຍາຍທີ່ຈະຊ່ວຍເຮົາໃຫ້ຄິດເຖິງຄວາມຮັກທີ່ພະເຢຊູມີຕໍ່ເຮົາ. ( 2:21ອຟຊ. 5:2; 1 ຢຮ. 3:16) ເມື່ອເຮົາອ່ານແລະຄິດຕຶກຕອງວ່າພະເຢຊູເສຍສະລະເພື່ອເຮົາຫຼາຍສ່ຳໃດ ເຮົາກໍຖືກກະຕຸ້ນທີ່ຈະ “ໃຊ້ຊີວິດແບບດຽວກັບເພິ່ນ.”—1 ຢຮ. 2:6
19. ເຮົາຈະເຮັດແນວໃດຖ້າເຮົາຢາກໃຫ້ພະເຈົ້າຮັກເຮົາຕະຫຼອດໄປ?
19 ເຮົາຢາກເຮັດທຸກຢ່າງເພື່ອໃຫ້ພະເຈົ້າຮັກເຮົາຕະຫຼອດໄປ. (ຢດ. 20, 21) ເພື່ອພະເຢໂຫວາຈະຮັກເຮົາຕະຫຼອດໄປ ເຮົາຕ້ອງເຮັດທຸກສິ່ງເພື່ອຈະເຊື່ອຟັງເພິ່ນ ເຮັດໃຫ້ຊື່ຂອງເພິ່ນເປັນທີ່ເຄົາລົບນັບຖື ແລະເຮັດສິ່ງອື່ນໆທີ່ຈະເຮັດໃຫ້ເພິ່ນມີຄວາມສຸກ. (ສຸພາ. 27:11; ມທ. 6:9; 1 ຢຮ. 5:3) ການປະຊຸມອະນຸສອນຈະຊ່ວຍເຮົາໃຫ້ຢາກໃຊ້ຊີວິດໃນແຕ່ລະມື້ຄືກັບທີ່ເຮົາກຳລັງບອກພະເຢໂຫວາວ່າ ‘ຂ້ອຍຢາກໃຫ້ພະເຢໂຫວາຮັກຂ້ອຍຕະຫຼອດໄປ!’
20. ເຮົາມີເຫດຜົນຫຍັງແດ່ທີ່ຈະເຂົ້າຮ່ວມການປະຊຸມອະນຸສອນ?
20 ບໍ່ວ່າເຮົາຈະມີຄວາມຫວັງຢູ່ໃນສະຫວັນຫຼືໃນໂລກນີ້ ເຮົາກໍມີເຫດຜົນທີ່ຈະເຂົ້າຮ່ວມການປະຊຸມອະນຸສອນ. ທຸກປີ ເຮົາເຂົ້າຮ່ວມການປະຊຸມອະນຸສອນເພື່ອ ລະນຶກເຖິງການຕາຍຂອງຜູ້ທີ່ເຮົາຮັກຫຼາຍເຊິ່ງກໍຄື ພະເຢຊູຄລິດ ແລະທີ່ສຳຄັນກວ່ານັ້ນ ເຮົາຈະໄດ້ຄິດເຖິງຄວາມຮັກທີ່ຍິ່ງໃຫຍ່ທີ່ພະເຢໂຫວາສະແດງຕໍ່ເຮົາໂດຍໃຫ້ພະເຢຊູລູກຊາຍຂອງເພິ່ນມາເປັນຄ່າໄຖ່. ການປະຊຸມອະນຸສອນປີນີ້ຈະຈັດຂຶ້ນໃນຕອນແລງຂອງວັນສຸກວັນທີ 15 ເມສາ 2022. ຍ້ອນເຮົາຮັກພະເຢໂຫວາແລະພະເຢຊູ ເຮົາຈຶ່ງບໍ່ຍອມໃຫ້ສິ່ງໃດກໍຕາມມາຂັດຂວາງເຮົາບໍ່ໃຫ້ເຂົ້າຮ່ວມການປະຊຸມອະນຸສອນ.
ເພງ 16 ສັນເສີນພະເຢໂຫວາສຳລັບລູກຊາຍທີ່ຖືກແຕ່ງຕັ້ງ
^ ບໍ່ວ່າເຮົາຈະມີຄວາມຫວັງຢູ່ສະຫວັນຫຼືຢູ່ໃນໂລກ ເຮົາກໍຢາກເຂົ້າຮ່ວມການປະຊຸມອະນຸສອນທຸກປີ. ໃນບົດຄວາມນີ້ ເຮົາຈະມາເບິ່ງເຫດຜົນຈາກພະຄຳພີວ່າ ເປັນຫຍັງເຮົາຈຶ່ງເຂົ້າຮ່ວມປະຊຸມອະນຸສອນ ແລະເຮົາຈະໄດ້ຮັບປະໂຫຍດແນວໃດເມື່ອເຂົ້າຮ່ວມການປະຊຸມນີ້.
^ ຂໍ້ມູນເພີ່ມເຕີມກ່ຽວກັບສັນຍາໃໝ່ແລະສັນຍາເລື່ອງການປົກຄອງ ໃຫ້ເບິ່ງບົດຄວາມທີ່ຊື່ວ່າ “ເຈົ້າທັງຫຼາຍຈະເປັນ ‘ອານາຈັກແຫ່ງປະໂລຫິດ’” ໃນຫໍສັງເກດການ 15 ຕຸລາ 2014 ໜ້າ 15-17 (ພາສາໄທ)
^ ຊາກາລີ 8:23 (ລ.ມ.) ອ່ານວ່າ: “ພະເຢໂຫວາຜູ້ເປັນຈອມທັບບອກວ່າ ‘ໃນວັນນັ້ນຈະມີ 10 ຄົນຈາກທຸກຊາດທຸກພາສາມາຈັບຍອຍເສື້ອຊາວຢິວຄົນໜຶ່ງໄວ້ແໜ້ນ ແລະບອກວ່າ “ພວກເຮົາຢາກໄປນຳເຈົ້າ ເພາະພວກເຮົາໄດ້ຍິນວ່າພະເຈົ້າຢູ່ກັບພວກເຈົ້າ.”’”
^ ຂໍ້ມູນເພີ່ມເຕີມກ່ຽວກັບຄຳພະຍາກອນເລື່ອງໄມ້ສອງທ່ອນທີ່ຢູ່ໃນເອເຊກຽນບົດ 37 ໃຫ້ເບິ່ງປຶ້ມ ການນະມັດສະການທີ່ບໍລິສຸດຂອງພະເຢໂຫວາໄດ້ຮັບການຟື້ນຟູ! ໜ້າ 130-135 ຂໍ້ 3-17 (ພາສາໄທ)