ບົດຄວາມສຶກສາທີ 4
ພະເຢໂຫວາອວຍພອນເຮົາທີ່ພະຍາຍາມເຂົ້າຮ່ວມການປະຊຸມອະນຸສອນ
“ໃຫ້ເຮັດແບບນີ້ຕໍ່ໆໄປເພື່ອລະນຶກເຖິງຂ້ອຍ.”—ລກ. 22:19
ເພງ 19 ອາຫານຄ່ຳຂອງຜູ້ເປັນນາຍ
ໃຈຄວາມສຳຄັນ a
1-2. ເປັນຫຍັງເຮົາຈຶ່ງເຂົ້າຮ່ວມການປະຊຸມອະນຸສອນທຸກປີ?
ເກືອບ 2.000 ປີມາແລ້ວ ພະເຢຊູໄດ້ເສຍສະລະຊີວິດເພື່ອເຮົາທຸກຄົນ ເຊິ່ງເຮັດໃຫ້ເຮົາມີໂອກາດທີ່ຈະມີຊີວິດຕະຫຼອດໄປ. ໃນຄືນກ່ອນທີ່ພະເຢຊູຈະຕາຍ ເພິ່ນໄດ້ສັ່ງລູກສິດໃຫ້ລະນຶກເຖິງການເສຍສະລະຂອງເພິ່ນໂດຍວິທີງ່າຍໆທີ່ໃຊ້ແຕ່ເຂົ້າຈີ່ແລະເຫຼົ້າແວງ.—1ກຣ. 11:23-26
2 ເຮົາເຊື່ອຟັງຄຳສັ່ງຂອງພະເຢຊູຍ້ອນເຮົາຮັກເພິ່ນຫຼາຍ. (ຢຮ. 14:15) ໃນອາທິດກ່ອນແລະຫຼັງການປະຊຸມອະນຸສອນແຕ່ລະປີ ເຮົາສະແດງໃຫ້ເຫັນວ່າເຮົາເຫັນຄ່າສິ່ງທີ່ເພິ່ນເຮັດເພື່ອເຮົາໂດຍການໃຊ້ເວລາຄິດແລະອະທິດຖານກ່ຽວກັບຄວາມໝາຍຂອງການເສຍຊີວິດຂອງເພິ່ນ. ເຮົາຍັງມີສ່ວນຮ່ວມຫຼາຍຂຶ້ນໃນວຽກປະກາດແລະຊວນຄົນມາເຂົ້າຮ່ວມການປະຊຸມນີ້ໃຫ້ຫຼາຍທີ່ສຸດເທົ່າທີ່ເປັນໄປໄດ້. ແລະທີ່ສຳຄັນ ເຮົາຈະບໍ່ຍອມໃຫ້ອັນໃດກໍຕາມມາຂັດຂວາງເຮົາບໍ່ໃຫ້ເຂົ້າຮ່ວມການປະຊຸມນີ້.
3. ເຮົາຈະຮຽນຫຍັງໃນບົດຄວາມນີ້?
3 ໃນບົດຄວາມນີ້ເຮົາຈະມາເບິ່ງ 3 ຢ່າງທີ່ຜູ້ຮັບໃຊ້ຂອງພະເຢໂຫວາເຮັດເພື່ອຄິດເຖິງການຕາຍຂອງພະເຢຊູ: (1) ເຂົາເຈົ້າເຮັດແບບດຽວກັບທີ່ພະເຢຊູພາເຮັດ (2) ເຂົາເຈົ້າໄປຊວນຄົນໃຫ້ເຂົ້າຮ່ວມການປະຊຸມອະນຸສອນໃຫ້ຫຼາຍທີ່ສຸດເທົ່າທີ່ເປັນໄປໄດ້ ແລະ (3) ເຂົາເຈົ້າເຂົ້າຮ່ວມການປະຊຸມອະນຸສອນເຖິງວ່າສະພາບການຈະບໍ່ງ່າຍ.
ເຮັດແບບດຽວກັບທີ່ພະເຢຊູພາເຮັດ
4. ການປະຊຸມອະນຸສອນໃນແຕ່ລະປີຊ່ວຍເຮົາໃຫ້ໄດ້ຮັບຄຳຕອບຫຍັງແດ່? ແລະເປັນຫຍັງເຮົາຄວນເຫັນຄວາມສຳຄັນຂອງຄວາມຈິງເຫຼົ່ານີ້? (ລູກາ 22:19, 20)
4 ໃນການປະຊຸມອະນຸສອນທຸກປີ ເຮົາຈະໄດ້ຟັງຄຳບັນຍາຍທີ່ໃຫ້ຄຳຕອບຢ່າງຊັດເຈນກ່ຽວກັບຄຳຖາມຕ່າງໆເຊັ່ນ: ເປັນຫຍັງມະນຸດເຮົາຈຶ່ງຕ້ອງມີຄ່າໄຖ່? ການຕາຍຂອງຄົນໆດຽວຈະສາມາດໄຖ່ບາບຂອງຄົນຈຳນວນຫຼາຍໄດ້ແນວໃດ? ເຂົ້າຈີ່ແລະເຫຼົ້າແວງໝາຍເຖິງຫຍັງ ແລະໃຜແດ່ທີ່ຄວນກິນ? (ອ່ານລູກາ 22:19, 20) ແລະເຮົາຍັງມີໂອກາດທີ່ຈະຄິດເຖິງສິ່ງດີໆຫຼາຍຢ່າງໃນອະນາຄົດສຳລັບຄົນທີ່ມີຄວາມຫວັງທີ່ຈະຢູ່ໃນໂລກ. (ອຊຢ. 35:5, 6; 65:17, 21-23) ເຮົາຄວນຖືວ່າຄວາມຈິງເຫຼົ່ານີ້ເປັນເລື່ອງສຳຄັນຫຼາຍ ເພາະຫຼາຍຕື້ຄົນບໍ່ເຂົ້າໃຈເລື່ອງນີ້ແລະບໍ່ຮູ້ວ່າຄ່າໄຖ່ຂອງພະເຢຊູມີຄ່າຫຼາຍຂະໜາດໃດສຳລັບເຂົາເຈົ້າ. ນອກຈາກນັ້ນ ເຂົາເຈົ້າຍັງບໍ່ໄດ້ຈັດການປະຊຸມອະນຸສອນຕາມແບບທີ່ພະເຢຊູພາເຮັດ. ເປັນຫຍັງຈຶ່ງເປັນແນວນັ້ນ?
5. ຫຼັງຈາກທີ່ອັກຄະສາວົກຂອງພະເຢຊູສ່ວນຫຼາຍຕາຍໄປແລ້ວ ຫຼາຍຄົນໄດ້ລະນຶກເຖິງການຕາຍຂອງພະເຢຊູແນວໃດ?
5 ຫຼັງຈາກທີ່ອັກຄະສາວົກສ່ວນຫຼາຍຂອງພະເຢຊູຕາຍໄປແລ້ວ ຄລິດສະຕຽນປອມກໍໄດ້ເຂົ້າມາໃນປະຊາຄົມ. (ມທ. 13:24-27, 37-39) ເຂົາເຈົ້າ “ເວົ້າບິດເບືອນຄວາມຈິງເພື່ອຊັກຈູງພວກລູກສິດໃຫ້ຕິດຕາມເຂົາເຈົ້າໄປ.” (ກຈກ. 20:29, 30) ຄຳສອນບິດເບືອນຢ່າງໜຶ່ງກໍຄື ເຂົາເຈົ້າບອກວ່າພະເຢຊູບໍ່ໄດ້ສະລະຊີວິດ “ພຽງເທື່ອດຽວເພື່ອຮັບບາບຂອງຄົນຈຳນວນຫຼາຍ” ຕາມທີ່ຄຳພີໄບເບິນສອນ ແຕ່ພະເຢຊູໄດ້ສະລະຊີວິດເພື່ອເຂົາເຈົ້າຫຼາຍເທື່ອ. (ຮຣ. 9:27, 28) ທຸກມື້ນີ້ຫຼາຍຄົນເຊື່ອຄຳສອນແບບນັ້ນ. ເຂົາເຈົ້າຈຶ່ງເຂົ້າໄປເຮັດ “ພິທີມິດຊາ” ຢູ່ໂບດເປັນປະຈຳ. ບາງຄົນເຖິງຂັ້ນເຮັດທຸກມື້. b ສ່ວນນິກາຍອື່ນໆບໍ່ໄດ້ເຮັດພິທີເພື່ອຄິດເຖິງການຕາຍຂອງພະເຢຊູດຸປານນັ້ນ ແຕ່ເຂົາເຈົ້າກໍບໍ່ໄດ້ເຂົ້າໃຈແທ້ໆວ່າຄ່າໄຖ່ຂອງພະເຢຊູໝາຍຄວາມວ່າແນວໃດ. ບາງຄົນອາດສົງໄສວ່າ ‘ການຕາຍຂອງພະເຢຊູເຮັດໃຫ້ຂ້ອຍໄດ້ຮັບການໃຫ້ອະໄພບາບແທ້ໆບໍ?’ ເປັນຫຍັງເຂົາເຈົ້າຈຶ່ງສົງໄສແບບນັ້ນ? ອາດເປັນຍ້ອນວ່າ ເຂົາເຈົ້າໄປຟັງຄົນທີ່ບໍ່ເຊື່ອໃນຄ່າໄຖ່ຂອງພະເຢຊູ. ແລ້ວພວກລູກສິດແທ້ຂອງພະເຢຊູເດເຮັດແນວໃດ?
6. ເມື່ອຮອດປີ 1872 ກຸ່ມນັກສຶກສາຄຳພີໄບເບິນໄດ້ເຂົ້າໃຈເລື່ອງຫຍັງ?
6 ທ້າຍສະຕະວັດທີ 19 ມີກຸ່ມນັກສຶກສາຄຳພີໄບເບິນກຸ່ມໜຶ່ງທີ່ນຳໜ້າໂດຍຊາລ ເທດ ຣັດເຊວ ໄດ້ສຶກສາຄົ້ນຄວ້າຄຳພີໄບເບິນຢ່າງລະອຽດ ຍ້ອນເຂົາເຈົ້າຢາກຮູ້ຄວາມຈິງກ່ຽວກັບຄວາມໝາຍຂອງຄ່າໄຖ່ຂອງພະເຢຊູແລະຢາກຮູ້ວ່າຄວນຈະລະນຶກເຖິງການຕາຍຂອງພະເຢຊູແນວໃດ. ເມື່ອຮອດປີ 1872 ເຂົາເຈົ້າໄດ້ຂໍ້ສະຫຼຸບຈາກຄຳພີໄບເບິນວ່າ ພະເຢຊູໄດ້ມາສະລະຊີວິດເພື່ອເປັນຄ່າໄຖ່ໃຫ້ກັບມະນຸດທຸກຄົນ. ເມື່ອເຂົາເຈົ້າຮູ້ເລື່ອງນີ້ ເຂົາເຈົ້າກໍໄດ້ພະຍາຍາມບອກໃຫ້ຄົນອື່ນຮູ້ໂດຍທາງປຶ້ມ ໜັງສືພິມ ແລະວາລະສານຕ່າງໆ. ຈາກນັ້ນ ເຂົາເຈົ້າກໍໄດ້ເຮັດຄືກັບຄລິດສະຕຽນໃນສະຕະວັດທຳອິດໂດຍຈັດການປະຊຸມອະນຸສອນປີລະເທື່ອເພື່ອລະນຶກເຖິງການຕາຍຂອງພະເຢຊູ.
7. ສິ່ງທີ່ນັກສຶກສາຄຳພີໄບເບິນຄົ້ນຄວ້າເປັນປະໂຫຍດຕໍ່ເຮົາແນວໃດ?
7 ສິ່ງທີ່ນັກສຶກສາຄຳພີໄບເບິນຄົ້ນຄວ້າເປັນປະໂຫຍດຕໍ່ເຮົາແນວໃດ? ພະເຢໂຫວາຊ່ວຍເຮົາໃຫ້ເຂົ້າໃຈວ່າ ຄ່າໄຖ່ຂອງພະເຢຊູມີຄວາມໝາຍວ່າແນວໃດແລະເຮົາຈະໄດ້ຮັບປະໂຫຍດຈາກຄ່າໄຖ່ຂອງພະເຢຊູແນວໃດ. (1ຢຮ. 2:1, 2) ເຮົາຍັງໄດ້ຮຽນອີກວ່າ ຄຳພີໄບເບິນໃຫ້ຄວາມຫວັງສອງເລື່ອງກັບຜູ້ທີ່ພະເຢໂຫວາພໍໃຈ ເຊິ່ງກໍຄື: ບາງຄົນມີຄວາມຫວັງທີ່ຈະມີຊີວິດອະມະຕະໃນສະຫວັນ ແລະຫຼາຍລ້ານຄົນມີຄວາມຫວັງທີ່ຈະມີຊີວິດຕະຫຼອດໄປຢູ່ໃນໂລກ. ແລະເມື່ອເຮົາເຫັນວ່າພະເຢໂຫວາຮັກເຮົາຫຼາຍສ່ຳໃດແລະຄ່າໄຖ່ຂອງພະເຢຊູເປັນປະໂຫຍດຕໍ່ໂຕເຮົາແນວໃດ ເຮົາກໍຈະໃກ້ຊິດກັບພະເຢໂຫວາຫຼາຍຂຶ້ນ. (1ປຕ. 3:18; 1ຢຮ. 4:9) ດັ່ງນັ້ນ ເຮົາຈຶ່ງເຮັດຄືກັບຄລິດສະຕຽນໃນອະດີດໂດຍເຂົ້າຮ່ວມການປະຊຸມອະນຸສອນເພື່ອລະນຶກເຖິງການຕາຍຂອງພະເຢຊູແລະເຊີນຄົນອື່ນໆໃຫ້ເຂົ້າຮ່ວມການປະຊຸມນີ້ນຳ.
ເຊີນຄົນອື່ນໃຫ້ເຂົ້າຮ່ວມການປະຊຸມອະນຸສອນ
ເຈົ້າສາມາດເຮັດຫຍັງໄດ້ແດ່ເພື່ອຈະມີສ່ວນຮ່ວມຢ່າງເຕັມທີໃນໂຄງການພິເສດເພື່ອຢາຍໃບເຊີນການປະຊຸມອະນຸສອນ? (ເບິ່ງຂໍ້ 8-10) e
8. ພະຍານພະເຢໂຫວາເຮັດແນວໃດເພື່ອເຊີນຄົນອື່ນໃຫ້ເຂົ້າຮ່ວມການປະຊຸມອະນຸສອນ? (ເບິ່ງຮູບພາບ)
8 ເປັນເວລາຫຼາຍປີທີ່ພະຍານພະເຢໂຫວາໄດ້ເຊີນຄົນອື່ນໃຫ້ເຂົ້າຮ່ວມການປະຊຸມອະນຸສອນ. ເລີ່ມແຕ່ປີ 1881 ພີ່ນ້ອງໃນສະຫະລັດອາເມຣິກາເຊີນແຕ່ຄົນທີ່ມີຄວາມເຊື່ອດຽວກັນເທົ່ານັ້ນໃຫ້ເຂົ້າຮ່ວມການປະຊຸມອະນຸສອນ ເຊິ່ງຈັດຢູ່ໃນເຮືອນຂອງພີ່ນ້ອງຄົນໃດຄົນໜຶ່ງໃນເມືອງອາເລເກນີ ລັດເພັນຊິນເວເນຍ. ຕໍ່ມາກໍມີການຈັດການປະຊຸມອະນຸສອນຢູ່ປະຊາຄົມໃຜລາວ. ໃນເດືອນມີນາປີ 1940 ເຂົາເຈົ້າໄດ້ຮັບຄຳແນະນຳໃຫ້ເຊີນຄົນອື່ນໆໃນເຂດປະກາດທີ່ສະແດງຄວາມສົນໃຈໃຫ້ເຂົ້າຮ່ວມການປະຊຸມອະນຸສອນ. ໃນປີ 1960 ເປັນເທື່ອທຳອິດທີ່ເບເທນໄດ້ຈັດພິມໃບເຊີນການປະຊຸມອະນຸສອນໃຫ້ປະຊາຄົມຕ່າງໆ. ຕັ້ງແຕ່ນັ້ນມາ ກໍໄດ້ມີການແຈກຢາຍໃບເຊີນການປະຊຸມອະນຸສອນຫຼາຍຕື້ໃບ. ເປັນຫຍັງເຮົາຈຶ່ງພະຍາຍາມຫຼາຍຂະໜາດນັ້ນທີ່ຈະເຊີນຄົນອື່ນໃຫ້ເຂົ້າຮ່ວມການປະຊຸມອະນຸສອນ?
9-10. ໃຜແດ່ທີ່ໄດ້ຮັບປະໂຫຍດເມື່ອເຮົາພະຍາຍາມເຊີນຄົນໃຫ້ເຂົ້າຮ່ວມການປະຊຸມອະນຸສອນ? (ໂຢຮັນ 3:16)
9 ເຫດຜົນໜຶ່ງທີ່ເຮົາເຊີນຄົນໃຫ້ເຂົ້າຮ່ວມການປະຊຸມອະນຸສອນກັບເຮົາກໍຄື ເຮົາຢາກໃຫ້ຄົນທີ່ມາເຂົ້າຮ່ວມເທື່ອທຳອິດຮູ້ວ່າພະເຢໂຫວາແລະພະເຢຊູໄດ້ເຮັດຫຍັງແດ່ເພື່ອເຮົາທຸກຄົນ. (ອ່ານໂຢຮັນ 3:16) ແລະເຮົາຫວັງວ່າສິ່ງທີ່ເຂົາເຈົ້າໄດ້ເຫັນແລະໄດ້ຍິນຈາກການປະຊຸມອະນຸສອນຈະກະຕຸ້ນເຂົາເຈົ້າໃຫ້ຢາກຮຽນຮູ້ຫຼາຍຂຶ້ນແລະເຂົ້າມາເປັນຜູ້ຮັບໃຊ້ຂອງພະເຢໂຫວາ. ນອກຈາກນັ້ນ ຄົນອື່ນໆກໍຈະໄດ້ຮັບປະໂຫຍດຄືກັນ.
10 ເຮົາຍັງໄດ້ເຊີນຄົນທີ່ເຊົາຮັບໃຊ້ພະເຢໂຫວາໃຫ້ເຂົ້າຮ່ວມການປະຊຸມອະນຸສອນນຳ. ເຮົາເຮັດແບບນັ້ນກໍເພື່ອຢາກບອກເຂົາເຈົ້າໃຫ້ຮູ້ວ່າພະເຢໂຫວາຍັງຮັກເຂົາເຈົ້າຄືເກົ່າ. ຫຼາຍຄົນໄດ້ຕອບຮັບຄຳເຊີນຂອງເຮົາ ແລະເຮົາກໍດີໃຈທີ່ເຫັນເຂົາເຈົ້າມາ. ການປະຊຸມອະນຸສອນເຮັດໃຫ້ເຂົາເຈົ້າຄິດເຖິງຄວາມສຸກທີ່ເຂົາເຈົ້າເຄີຍມີຕອນທີ່ຮັບໃຊ້ພະເຢໂຫວາ. ໃຫ້ເຮົາມາເບິ່ງປະສົບການຂອງໂມນິການຳກັນ. c ໃນຊ່ວງການລະບາດຂອງພະຍາດໂຄວິດ-19 ໂມນິກາໄດ້ກັບມາເຮັດວຽກປະກາດອີກເທື່ອໜຶ່ງ. ຫຼັງຈາກທີ່ໄດ້ເຂົ້າຮ່ວມການປະຊຸມອະນຸສອນປີ 2021 ລາວບອກວ່າ “ການປະຊຸມອະນຸສອນເທື່ອນີ້ພິເສດຫຼາຍ ເພາະເປັນເທື່ອທຳອິດໃນຮອບ 20 ປີ ທີ່ຂ້ອຍໄດ້ປະກາດກັບຄົນອື່ນແລະເຊີນເຂົາເຈົ້າໃຫ້ເຂົ້າຮ່ວມການປະຊຸມອະນຸສອນ. ຂ້ອຍພະຍາຍາມເຊີນຄົນໃຫ້ຫຼາຍທີ່ສຸດເທົ່າທີ່ເປັນໄປໄດ້ໃຫ້ເຂົ້າຮ່ວມການປະຊຸມອະນຸສອນເທື່ອນີ້ເພື່ອສະແດງໃຫ້ເຫັນວ່າ ຂ້ອຍເຫັນຄ່າສິ່ງທີ່ພະເຢໂຫວາແລະພະເຢຊູເຮັດເພື່ອຂ້ອຍ.” (ເພງ. 103:1-4) ບໍ່ວ່າຄົນຈະຕອບຮັບຄຳເຊີນຫຼືບໍ່ ເຮົາກໍຈະພະຍາຍາມເຊີນຄົນໃຫ້ຫຼາຍທີ່ສຸດໃຫ້ເຂົ້າຮ່ວມການປະຊຸມອະນຸສອນແລະເຮົາໝັ້ນໃຈວ່າພະເຢໂຫວາເຫັນຄ່າສິ່ງທີ່ເຮົາເຮັດ.
11. ພະເຢໂຫວາອວຍພອນເຮົາແນວໃດທີ່ພະຍາຍາມຊວນຄົນໃຫ້ເຂົ້າຮ່ວມການປະຊຸມອະນຸສອນ? (ອາກເກ 2:7)
11 ພະເຢໂຫວາອວຍພອນເຮົາທີ່ພະຍາຍາມເຊີນຄົນໃຫ້ເຂົ້າຮ່ວມການປະຊຸມອະນຸສອນ. ໃນປີ 2021 ເຖິງຈະມີຂໍ້ຈຳກັດຫຼາຍຢ່າງໃນຊ່ວງການລະບາດຂອງພະຍາດໂຄວິດ-19 ແຕ່ກໍມີ 21.367.603 ຄົນເຂົ້າຮ່ວມການປະຊຸມອະນຸສອນ ເຊິ່ງຫຼາຍກວ່າສອງເທົ່າຂອງພະຍານພະເຢໂຫວາທີ່ຢູ່ທົ່ວໂລກ! ພະເຢໂຫວາບໍ່ໄດ້ສົນໃຈສະເພາະແຕ່ຈຳນວນຄົນທີ່ເຂົ້າຮ່ວມເທົ່ານັ້ນ ແຕ່ເພິ່ນສົນໃຈແຕ່ລະຄົນເປັນສ່ວນໂຕນຳ. (ລກ. 15:7; 1ຕມ. 2:3, 4) ດັ່ງນັ້ນ ເຮົາກໍໝັ້ນໃຈໄດ້ເລີຍວ່າເມື່ອເຮົາພະຍາຍາມເຊີນຄົນອື່ນໃຫ້ເຂົ້າຮ່ວມການປະຊຸມອະນຸສອນ ພະເຢໂຫວາກໍຈະຊ່ວຍເຮົາໃຫ້ເຈິຄົນທີ່ຢາກຮຽນຮູ້ຄວາມຈິງກ່ຽວກັບເພິ່ນ.—ອ່ານອາກເກ 2:7
ເຂົ້າຮ່ວມການປະຊຸມອະນຸສອນເຖິງວ່າສະພາບການຈະບໍ່ງ່າຍ
ພະເຢໂຫວາອວຍພອນຄວາມພະຍາຍາມຂອງເຮົາທີ່ຈະເຂົ້າຮ່ວມການປະຊຸມອະນຸສອນ (ເບິ່ງຂໍ້ 12) f
12. ມີບັນຫາຫຍັງແດ່ເຊິ່ງເຮັດໃຫ້ຍາກທີ່ເຮົາຈະເຂົ້າຮ່ວມການປະຊຸມອະນຸສອນ? (ເບິ່ງຮູບພາບ)
12 ພະເຢຊູບອກລ່ວງໜ້າກ່ຽວກັບສະໄໝສຸດທ້າຍວ່າ ເຮົາຈະເຈິບັນຫາຫຼາຍຢ່າງ ເຊັ່ນ: ເຈິການຕໍ່ຕ້ານຈາກຄອບຄົວ ການຂົ່ມເຫງ ສົງຄາມ ໂລກລະບາດແລະອື່ນໆ. (ມທ. 10:36; ມຣກ. 13:9; ລກ. 21:10, 11) ບາງເທື່ອສະພາບການເຫຼົ່ານີ້ອາດເຮັດໃຫ້ເປັນເລື່ອງຍາກທີ່ເຮົາຈະເຂົ້າຮ່ວມການປະຊຸມອະນຸສອນ. ແລະໃຫ້ເຮົາມາເບິ່ງວ່າ ພີ່ນ້ອງໄດ້ເອົາຊະນະບັນຫາເຫຼົ່ານີ້ແນວໃດ ແລະພະເຢໂຫວາຊ່ວຍເຂົາເຈົ້າແນວໃດ.
13. ພະເຢໂຫວາໄດ້ອວຍພອນອາເທັມແນວໃດທີ່ມີຄວາມກ້າແລະຕັ້ງໃຈຈະການປະຊຸມອະນຸສອນເຖິງວ່າຈະຢູ່ໃນຄຸກ?
13 ຕິດຄຸກ. ພີ່ນ້ອງຂອງເຮົາທີ່ຕິດຄຸກຍ້ອນຄວາມເຊື່ອໄດ້ເຮັດບາງຢ່າງທີ່ເຮັດໄດ້ເພື່ອລະນຶກເຖິງການຕາຍຂອງພະເຢຊູ. ໃຫ້ເຮົາມາເບິ່ງຕົວຢ່າງຂອງອາເທັມ. ໃນການປະຊຸມອະນຸສອນປີ 2020 ອາເທັມຕິດຄຸກແລະຖືກຂັງຢູ່ໃນຫ້ອງທີ່ມີຂະໜາດປະມານ 4 ຄູນ 4 ແມັດ. ຄຸກຫ້ອງນ້ອຍໆນີ້ມີນັກໂທດທັງໝົດ 5 ຄົນ. ເຖິງວ່າຈະຢູ່ໃນຄຸກ ແຕ່ອາເທັມກໍສາມາດຫາເຂົ້າຈີ່ແລະເຫຼົ້າແວງມາໄດ້ແລະວາງແຜນທີ່ຈະບັນຍາຍເອງ. ແຕ່ບັນຫາອີກຢ່າງໜຶ່ງທີ່ລາວເຈິກໍຄື ໝູ່ທີ່ຢູ່ໃນຄຸກມັກສູບຢາແລະເວົ້າຄຳຫຍາບຄາຍ. ອາເທັມໄດ້ເຮັດແນວໃດ? ລາວໄດ້ຂໍໝູ່ໃຫ້ເຊົາສູບຢາແລະເຊົາເວົ້າຄຳຫຍາບຄາຍຈັກໜຶ່ງຊົ່ວໂມງຕອນທີ່ກຳລັງຈັດການປະຊຸມອະນຸສອນ. ອາເທັມກໍແປກໃຈຫຼາຍທີ່ເຂົາເຈົ້າຍອມເຮັດຕາມທີ່ລາວຂໍ. ອາເທັມຍັງໄດ້ບອກກັບເຂົາເຈົ້າວ່າ “ຂ້ອຍຢາກຂໍເວົ້າກ່ຽວກັບການປະຊຸມອະນຸສອນໃຫ້ພວກເຈົ້າຟັງໄດ້ບໍ?” ເຖິງວ່າເຂົາເຈົ້າບໍ່ຢາກຈະຟັງ ແຕ່ຫຼັງຈາກທີ່ເຂົາເຈົ້າເຫັນອາເທັມຈັດການປະຊຸມອະນຸສອນແລະໄດ້ຟັງຄຳບັນຍາຍແລ້ວ ເຂົາເຈົ້າກໍໄດ້ຖາມອາເທັມຫຼາຍຢ່າງກ່ຽວກັບການປະຊຸມນີ້.
14. ໃນຊ່ວງການລະບາດຂອງພະຍາດໂຄວິດ-19 ພະຍານພະເຢໂຫວາໄດ້ເຮັດແນວໃດເພື່ອຈັດປະຊຸມອະນຸສອນ?
14 ພະຍາດໂຄວິດ-19 ລະບາດ. ໃນຊ່ວງການລະບາດຂອງພະຍາດໂຄວິດ-19 ພະຍານພະເຢໂຫວາບໍ່ສາມາດໄປປະຊຸມແບບເຈິໜ້າກັນໄດ້. ແຕ່ນັ້ນກໍບໍ່ໄດ້ຂັດຂວາງເຂົາເຈົ້າບໍ່ໃຫ້ເຂົ້າຮ່ວມການປະຊຸມອະນຸສອນ. d ປະຊາຄົມຕ່າງໆໄດ້ຈັດການປະຊຸມອະນຸສອນແບບອອນລາຍ. ແຕ່ຫຼາຍລ້ານຄົນທີ່ບໍ່ມີອິນເຕີເນັດເດ ຈະເຂົ້າຮ່ວມການປະຊຸມອະນຸສອນແນວໃດ? ໃນບາງປະເທດໄດ້ມີການຖ່າຍທອດຄຳບັນຍາຍທັງທາງໂທລະທັດແລະວິທະຍຸ. ນອກຈາກນັ້ນ ສຳນັກງານສາຂາຕ່າງໆຍັງໄດ້ອັດຄຳບັນຍາຍອະນຸສອນໄວ້ລ່ວງໜ້າຫຼາຍກວ່າ 500 ພາສາ ແລະສົ່ງຄຳບັນຍາຍເຫຼົ່ານັ້ນໃຫ້ກັບພີ່ນ້ອງທີ່ຢູ່ຫ່າງໄກສອກຫຼີກ.
15. ເຮົາໄດ້ຮຽນຫຍັງຈາກຕົວຢ່າງຂອງນັກສຶກສາທີ່ຊື່ຊູ?
15 ຄອບຄົວຕໍ່ຕ້ານ. ສຳລັບບາງຄົນແລ້ວ ບັນຫາທີ່ໃຫຍ່ທີ່ສຸດເຊິ່ງອາດເຮັດໃຫ້ບໍ່ສາມາດເຂົ້າຮ່ວມການປະຊຸມອະນຸສອນໄດ້ກໍຄື ການຕໍ່ຕ້ານຈາກຄອບຄົວ. ໃຫ້ເຮົາມາເບິ່ງຕົວຢ່າງຂອງນັກສຶກສາຄົນໜຶ່ງທີ່ຊື່ຊູ. ໃນປີ 2021 ກ່ອນການປະຊຸມອະນຸສອນມື້ໜຶ່ງ ລາວໄດ້ບອກຜູ້ນຳການສຶກສາວ່າ ລາວບໍ່ສາມາດທີ່ຈະເຂົ້າຮ່ວມການປະຊຸມອະນຸສອນໄດ້ເນື່ອງຈາກຖືກຄອບຄົວຕໍ່ຕ້ານ. ຜູ້ນຳການສຶກສາໄດ້ເປີດຂໍ້ພະຄຳພີໃນລູກາ 22:44 ໃຫ້ລາວອ່ານແລະອະທິບາຍວ່າ ເມື່ອເຮົາເຈິຄວາມຫຍຸ້ງຍາກເຮົາຄວນເຮັດຕາມຕົວຢ່າງຂອງພະເຢຊູໃນການອະທິດຖານແລະໄວ້ວາງໃຈພະເຢໂຫວາ. ແລະໃນມື້ຕໍ່ມາ ຊູກໍໄດ້ກຽມເຂົ້າຈີ່ແລະເຫຼົ້າແວງແລະເບິ່ງການນະມັດສະການຕອນເຊົ້າໃນເວັບໄຊ jw.org. ແລະໃນຕອນແລງຂອງມື້ນັ້ນຕອນທີ່ລາວຢູ່ໃນຫ້ອງຄົນດຽວ ລາວໄດ້ຟັງການປະຊຸມອະນຸສອນທາງໂທລະສັບ. ຫຼັງຈາກນັ້ນ ຊູກໍໄດ້ບອກຜູ້ນຳການສຶກສາວ່າ: “ມື້ວານນີ້ເຈົ້າໄດ້ໃຫ້ກຳລັງໃຈຂ້ອຍຫຼາຍ. ຂ້ອຍເຮັດທຸກຢ່າງທີ່ເຮັດໄດ້ເພື່ອຈະເຂົ້າຮ່ວມການປະຊຸມອະນຸສອນ ແລະຂ້ອຍກໍເຫັນວ່າພະເຢໂຫວາໄດ້ຊ່ວຍເຫຼືອຂ້ອຍ. ຂ້ອຍຂອບໃຈພະເຢໂຫວາຫຼາຍແທ້ໆແລະຂ້ອຍມີຄວາມສຸກຈົນບໍ່ຮູ້ຈະອະທິບາຍອອກມາເປັນຄຳເວົ້າແນວໃດ!” ຖ້າເຈິສະຖານະການແບບດຽວກັນນີ້ ເຈົ້າຄິດວ່າພະເຢໂຫວາສາມາດຊ່ວຍເຈົ້າໄດ້ບໍ?
16. ເປັນຫຍັງເຮົາຈຶ່ງໝັ້ນໃຈໄດ້ວ່າ ພະເຢໂຫວາຈະອວຍພອນຄວາມພະຍາຍາມຂອງເຮົາທີ່ຈະເຂົ້າຮ່ວມການປະຊຸມອະນຸສອນ? (ໂຣມ 8:31, 32)
16 ພະເຢໂຫວາເຫັນຄ່າເຮົາຫຼາຍແທ້ໆທີ່ພະຍາຍາມເຂົ້າຮ່ວມການປະຊຸມອະນຸສອນ. ເຮົາໝັ້ນໃຈວ່າພະເຢໂຫວາຈະອວຍພອນເຮົາທີ່ເຮົາເຫັນຄ່າສິ່ງຕ່າງໆທີ່ເພິ່ນເຮັດເພື່ອເຮົາ. (ອ່ານໂຣມ 8:31, 32) ດັ່ງນັ້ນ ຂໍໃຫ້ເຮົາຕັ້ງໃຈທີ່ຈະເຂົ້າຮ່ວມການປະຊຸມອະນຸສອນປີນີ້ໃຫ້ໄດ້ແລະເຮັດທຸກສິ່ງທີ່ເຮັດໄດ້ເພື່ອຮັບໃຊ້ໃຫ້ຫຼາຍຂຶ້ນໃນຊ່ວງການປະຊຸມອະນຸສອນ.
ເພງ 18 ຂອບໃຈສຳລັບຄ່າໄຖ່
a ໃນວັນອັງຄານທີ 4 ເມສາ 2023 ຫຼາຍລ້ານຄົນທົ່ວໂລກຈະເຂົ້າຮ່ວມການປະຊຸມເພື່ອລະນຶກເຖິງການຕາຍຂອງພະເຢຊູ. ຄົນທີ່ຈະເຂົ້າຮ່ວມການປະຊຸມນີ້ມີທັງຄົນໃໝ່ ຄົນທີ່ເຊົາຮັບໃຊ້ພະເຢໂຫວາແລະບໍ່ໄດ້ເຂົ້າຮ່ວມການປະຊຸມນີ້ມາຫຼາຍປີແລ້ວ ແລະຄົນທີ່ມີສະພາບການທີ່ຫຍຸ້ງຍາກ. ແຕ່ບໍ່ວ່າສະພາບການຂອງເຈົ້າຈະເປັນແນວໃດ ເຈົ້າກໍໝັ້ນໃຈໄດ້ເລີຍວ່າ ພະເຢໂຫວາຈະພໍໃຈຫຼາຍເມື່ອເຈົ້າພະຍາຍາມເຂົ້າຮ່ວມການປະຊຸມນີ້.
b ຄົນທີ່ເຂົ້າຮ່ວມພິທີນີ້ເຊື່ອວ່າເຂົ້າຈີ່ແລະເຫຼົ້າແວງຈະປ່ຽນເປັນເລືອດແລະຮ່າງກາຍຂອງພະເຢຊູແທ້ໆແລະທຸກເທື່ອທີ່ເຂົາເຈົ້າກິນເຂົ້າຈີ່ແລະເຫຼົ້າແວງ ເຂົາເຈົ້າກໍຄິດວ່າພະເຢຊູໄດ້ຕາຍເພື່ອເຂົາເຈົ້າອີກ.
c ຊື່ສົມມຸດ
d ເບິ່ງບົດຄວາມທີ່ຊື່ວ່າ “ການປະຊຸມອະນຸສອນປີ 2021” ໃນເວັບໄຊ jw.org (ພາສາໄທ)
