ບົດຄວາມສຶກສາທີ 1
ໃຫ້ໝັ້ນໃຈວ່າຖ້ອຍຄຳຂອງພະເຈົ້າ “ເປັນຄວາມຈິງ”
ຂໍ້ພະຄຳພີປະຈຳປີ 2023: “ຖ້ອຍຄຳຂອງພະອົງທັງໝົດເປັນຄວາມຈິງ.”—ເພງ. 119:160, ລ.ມ.
ເພງ 96 ປຶ້ມຄຳພີໄບເບິນປຽບເໝືອນຊັບສົມບັດ
ໃຈຄວາມສຳຄັນ a
1. ເປັນຫຍັງຫຼາຍຄົນໃນທຸກມື້ນີ້ຈຶ່ງບໍ່ເຊື່ອຄຳພີໄບເບິນ?
ຫຼາຍຄົນໃນທຸກມື້ນີ້ບໍ່ໄວ້ໃຈກັນຍ້ອນເຂົາເຈົ້າບໍ່ຮູ້ວ່າຈະໄວ້ໃຈຜູ້ໃດໄດ້ແດ່. ແມ່ນແຕ່ຜູ້ທີ່ເຂົາເຈົ້ານັບຖືເຊັ່ນ ນັກການເມືອງ ນັກວິທະຍາສາດ ແລະນັກທຸລະກິດສົນໃຈຢາກຊ່ວຍເຫຼືອເຂົາເຈົ້າແທ້ໆບໍ? ແລະຫຼາຍຄົນບໍ່ເຊື່ອໃນຄຳພີໄບເບິນກໍຍ້ອນພວກຫົວໜ້າສາສະໜາທີ່ອ້າງວ່າເປັນຄລິດສະຕຽນເຮັດຕົວບໍ່ໜ້ານັບຖື.
2. ຕາມຄຳເພງ 119:160 ເຮົາຕ້ອງໝັ້ນໃຈໃນເລື່ອງຫຍັງ?
2 ເຮົາທຸກຄົນທີ່ເປັນຜູ້ຮັບໃຊ້ຂອງພະເຢໂຫວາເຊື່ອວ່າພະເຢໂຫວາເປັນພະເຈົ້າທີ່ເວົ້າແຕ່ຄວາມຈິງແລະເພິ່ນຢາກໃຫ້ເຮົາໄດ້ຮັບສິ່ງທີ່ດີທີ່ສຸດ. (ເພງ. 31:5; ອຊຢ. 48:17) ເຮົາສາມາດໝັ້ນໃຈໃນຄຳພີໄບເບິນໄດ້ ເພາະ “ຖ້ອຍຄຳຂອງພະອົງທັງໝົດເປັນຄວາມຈິງ.” (ອ່ານຄຳເພງ. 119:160, ລ.ມ.) ແລະເຮົາກໍເຫັນດີກັບຄຳເວົ້າຂອງນັກຄົ້ນຄວ້າດ້ານຄຳພີໄບເບິນຄົນໜຶ່ງທີ່ບອກວ່າ “ບໍ່ມີສິ່ງໃດທີ່ພະເຈົ້າເວົ້າຈະບໍ່ເປັນຄວາມຈິງ. ທຸກຢ່າງທີ່ພະອົງບອກໄວ້ຈະຕ້ອງເກີດຂຶ້ນແທ້. ຄົນຂອງພະເຈົ້າໄວ້ໃຈໃນສິ່ງທີ່ພະເຈົ້າເວົ້າ ເພາະເຂົາເຈົ້າເຊື່ອໃນພະເຈົ້າ.”
3. ເຮົາຈະຮຽນຫຍັງໃນບົດຄວາມນີ້?
3 ເຮົາຈະຊ່ວຍຄົນອື່ນໃຫ້ມີຄວາມໝັ້ນໃຈໃນຄຳພີໄບເບິນໄດ້ແນວໃດ? ເຮົາຈະມາເບິ່ງສາມເຫດຜົນທີ່ເຮົາສາມາດໄວ້ໃຈຄຳພີໄບເບິນໄດ້. ນັ້ນກໍຄື (1) ຄວາມຖືກຕ້ອງຂອງຄຳພີໄບເບິນ (2) ຄວາມສຳເລັດເປັນຈິງຂອງຄຳພະຍາກອນ ແລະ (3) ຄຳພີໄບເບິນມີພະລັງທີ່ສາມາດປ່ຽນແປງຊີວິດຄົນໄດ້.
ສິ່ງທີ່ຂຽນໄວ້ໃນຄຳພີໄບເບິນຖືກຕ້ອງ
4. ເປັນຫຍັງບາງຄົນໃນທຸກມື້ນີ້ຈຶ່ງສົງໄສວ່າຄຳພີໄບເບິນທີ່ເຂົາເຈົ້າອ່ານກົງກັບຕົ້ນສະບັບບໍ?
4 ພະເຢໂຫວາໃຊ້ຜູ້ຊາຍທີ່ສັດຊື່ປະມານ 40 ຄົນໃຫ້ຂຽນຄຳພີໄບເບິນ. ແຕ່ສະບັບທີ່ເຂົາເຈົ້າຂຽນໃນຕອນນັ້ນເຫຼືອບໍ່ເທົ່າໃດສະບັບໃນປັດຈຸບັນ. b ຄຳພີໄບເບິນທີ່ເຮົາມີໃນຕອນນີ້ເປັນພຽງສຳເນົາທີ່ຖືກກ່າຍຕໍ່ໆກັນມາເທົ່ານັ້ນ. ນີ້ຈຶ່ງເຮັດໃຫ້ຫຼາຍຄົນສົງໄສວ່າ ຂໍ້ຄວາມທີ່ເຮົາອ່ານໃນຄຳພີໄບເບິນໃນທຸກມື້ນີ້ກົງກັບຕົ້ນສະບັບແທ້ບໍ? ໃຫ້ເຮົາມາເບິ່ງວ່າ ເຮົາຈະໝັ້ນໃຈໃນເລື່ອງນີ້ໄດ້ແນວໃດ.
ຜູ້ຄັດລອກທີ່ຊຳນານທີ່ກ່າຍຄືນຄຳພີໄບເບິນພາກພາສາເຮັບເຣີໄດ້ພະຍາຍາມເຮັດໃຫ້ແນ່ໃຈວ່າເຂົາເຈົ້າກ່າຍຄືນຢ່າງຖືກຕ້ອງແທ້ໆ (ເບິ່ງຂໍ້ 5)
5. ມີການຄັດລອກຄຳພີໄບເບິນພາກພາສາເຮັບເຣີແນວໃດ? (ເບິ່ງຮູບໜ້າປົກ)
5 ເພື່ອຈະມີຄຳພີໄບເບິນເຫຼືອລອດມາຮອດເຮົາໃນທຸກມື້ນີ້ ພະເຢໂຫວາໄດ້ສັ່ງໃຫ້ຄົນຂອງເພິ່ນກ່າຍຄືນຂໍ້ຄວາມໃນຄຳພີໄບເບິນ. ເພິ່ນໄດ້ສັ່ງໃຫ້ກະສັດຂອງອິດສະຣາເອນກ່າຍຄືນກົດໝາຍແລະຕັ້ງໃຫ້ຄົນເລວີສອນປະຊາຊົນໃຫ້ຮູ້ກ່ຽວກັບກົດໝາຍຂອງເພິ່ນ. (ພບຍ. 17:18; 31:24-26; ນຮຢ. 8:7) ຫຼັງຈາກຄົນຢິວຖືກປ່ອຍຕົວຈາກການເປັນຊະເລີຍໃນບາບີໂລນ ຜູ້ຄັດລອກທີ່ຊຳນານໄດ້ກ່າຍຄືນຄຳພີໄບເບິນພາກພາສາເຮັບເຣີ. (ອຊຣ. 7:6) ເຂົາເຈົ້າໄດ້ກ່າຍຄືນຢ່າງລະມັດລະວັງ. ເຂົາເຈົ້າບໍ່ພຽງແຕ່ນັບຈຳນວນຄຳເທົ່ານັ້ນ ແຕ່ໄດ້ນັບທຸກຕົວອັກສອນເພື່ອຈະໝັ້ນໃຈວ່າເຂົາເຈົ້າກ່າຍຄືນຢ່າງຖືກຕ້ອງແທ້ໆ. ເຖິງແນວໃດກໍຕາມ ຜູ້ຄັດລອກກໍເປັນຄົນບໍ່ສົມບູນແບບ. ສຳເນົາຄຳພີໄບເບິນທີ່ເຂົາເຈົ້າຄັດລອກຈຶ່ງມີຂໍ້ຜິດພາດເລັກໆນ້ອຍໆ. ແຕ່ຍ້ອນມີການກ່າຍຄືນຂໍ້ຄວາມດຽວກັນຫຼາຍສະບັບ ຈຶ່ງສາມາດສົມທຽບກັນໄດ້ວ່າມີຂໍ້ຜິດພາດຢູ່ຈຸດໃດແດ່. ໃຫ້ເຮົາມາເບິ່ງວິທີນີ້ນຳກັນ.
6. ເຮົາຈະເຫັນຂໍ້ຜິດພາດໃນການຄັດລອກຄຳພີໄບເບິນໄດ້ແນວໃດ?
6 ນັກວິຊາການໃນທຸກມື້ນີ້ມີວິທີທີ່ຈະຮູ້ວ່າມີການຄັດລອກຜິດພາດຢູ່ຈຸດໃດແດ່. ສົມມຸດວ່າມີ 100 ຄົນຖືກມອບໝາຍໃຫ້ຄັດລອກຂໍ້ຄວາມໃນໜ້າດຽວກັນ ແລ້ວມີຄົນໜຶ່ງຂຽນຜິດ. ວິທີໜຶ່ງທີ່ຈະກວດເບິ່ງວ່າລາວຂຽນຜິດຢູ່ບ່ອນໃດກໍຄືເອົາສຳເນົາທີ່ລາວຄັດລອກໄປທຽບກັບສຳເນົາຂອງຄົນອື່ນໆ. ນັກວິຊາການກໍເຮັດວິທີທີ່ຄ້າຍກັນນີ້. ເຂົາເຈົ້າເອົາສຳເນົາຄຳພີໄບເບິນຫຼາຍສະບັບມາທຽບກັນ ແລ້ວກໍຈະເຫັນວ່າມີບ່ອນໃດທີ່ຜິດຫຼືບ່ອນໃດທີ່ຂໍ້ຄວາມຫາຍໄປ.
7. ຜູ້ຄັດລອກຄຳພີໄບເບິນໄດ້ເຮັດວຽກຢ່າງລະອຽດແລະຖືກຕ້ອງແນວໃດ?
7 ຜູ້ຄັດລອກສຳເນົາຄຳພີໄບເບິນໄດ້ຕັ້ງໃຈເຮັດວຽກຢ່າງລະອຽດແລະຖືກຕ້ອງແທ້ໆ. ໃຫ້ເຮົາມາເບິ່ງຕົວຢ່າງນີ້ ສຳເນົາຄຳພີໄບເບິນພາກພາສາເຮັບເຣີທີ່ເກົ່າແກ່ທີ່ສຸດແລະຄົບຖ້ວນແມ່ນເລນິນກຣາດໂຄເດັກສ໌ເຊິ່ງຖືກຄັດລອກປະມານປີ ຄ.ສ 1008 ຫຼື 1009. ແຕ່ວ່າບໍ່ດົນມານີ້ມີການຄົ້ນພົບຊິ້ນສ່ວນຂອງຄຳພີໄບເບິນທີ່ມີອາຍຸເກົ່າແກ່ກວ່ານັ້ນປະມານ 1.000 ປີ. ບາງຄົນອາດຄິດວ່າຂໍ້ຄວາມໃນເລນິນກຣາດໂຄເດັກສ໌ຄືຊິຕ່າງຈາກຂໍ້ຄວາມທີ່ກ່າຍຄືນຫຼາຍເທື່ອໃນສຳເນົາທີ່ເກົ່າແກ່ເຫຼົ່ານັ້ນ. ແຕ່ບໍ່ໄດ້ເປັນແບບນັ້ນ ນັກວິຊາການໄດ້ເອົາສຳເນົາທີ່ເກົ່າແກ່ເຫຼົ່ານັ້ນກັບເລນິນກຣາດໂຄເດັກສ໌ມາທຽບໃສ່ກັນ ກໍເຫັນໄດ້ວ່າມີແຕ່ຄຳສັບເທົ່ານັ້ນທີ່ແຕກຕ່າງກັນໜ້ອຍໜຶ່ງ ແຕ່ເນື້ອໃນຍັງຄືເກົ່າ.
8. ສຳເນົາພະຄຳພີຄລິດສະຕຽນພາກພາສາກຣີກແຕກຕ່າງຈາກສຳເນົາປຶ້ມອື່ນໆແນວໃດ?
8 ຄລິດສະຕຽນໃນສະຕະວັດທຳອິດກໍໃຊ້ວິທີຄັດລອກພະຄຳພີພາກພາສາກຣີກຄືກັບການຄັດລອກພະຄຳພີພາກພາສາເຮັບເຣີ. ເຂົາເຈົ້າຕັ້ງໃຈຄັດລອກປຶ້ມ 27 ຫົວຂອງພາກພາສາກຣີກຢ່າງລະມັດລະວັງ ແລະໃຊ້ສຳເນົາເຫຼົ່ານີ້ໃນການປະຊຸມແລະການປະກາດ. ນັກວິຊາການຄົນໜຶ່ງໄດ້ປຽບທຽບສຳເນົາພະຄຳພີພາກພາສາກຣີກກັບສຳເນົາຂອງປຶ້ມອື່ນໆທີ່ຂຽນໃນສະໄໝນັ້ນ ກໍເຫັນໄດ້ວ່າ “ສຳເນົາພະຄຳພີພາກພາສາກຣີກມີຫຼາຍກວ່າ . . . ແລະຄົບຖ້ວນກວ່າສຳເນົາປຶ້ມອື່ນໆ.” ປຶ້ມຫົວໜຶ່ງທີ່ຊື່ແອັນແນັດໂຕມີອ໋ອບ ເດິ ນິວ ເທດສ໌ຕະເມັນ (Anatomy of the New Testament) ບອກວ່າ “ເຮົາໝັ້ນໃຈໄດ້ເລີຍວ່າ ຂໍ້ຄວາມທີ່ຢູ່ໃນພະຄຳພີພາກພາສາກຣີກທີ່ເຮົາອ່ານໃນປັດຈຸບັນແມ່ນເນື້ອໃນອັນດຽວກັນທີ່ຂຽນໄວ້ໃນສະຕະວັດທຳອິດ.”
9. ເອຊາຢາ 40:8 ໄດ້ເວົ້າແນວໃດກ່ຽວກັບຄຳພີໄບເບິນ?
9 ຍ້ອນຄວາມພະຍາຍາມແລະຄວາມຕັ້ງໃຈໃນການເຮັດວຽກຂອງຜູ້ຄັດລອກໃນສະໄໝກ່ອນຕະຫຼອດຫຼາຍຮ້ອຍປີທີ່ຜ່ານມາ ຈຶ່ງເຮັດໃຫ້ເຮົາມີຄຳພີໄບເບິນທີ່ຖືກຕ້ອງແລະກົງກັບຕົ້ນສະບັບໄວ້ອ່ານແລະສຶກສາໃນທຸກມື້ນີ້. c ເຮົາຮູ້ວ່າທີ່ເປັນແບບນີ້ກໍຍ້ອນພະເຢໂຫວາປົກປ້ອງຄຳພີໄບເບິນໄວ້. (ອ່ານເອຊາຢາ 40:8) ແຕ່ບາງຄົນອາດບອກວ່າການທີ່ຂໍ້ຄວາມໃນຄຳພີໄບເບິນບໍ່ປ່ຽນແປງ ບໍ່ໄດ້ໝາຍຄວາມວ່າຄຳພີໄບເບິນເປັນປຶ້ມທີ່ພະເຈົ້າດົນໃຈໃຫ້ຂຽນຂຶ້ນມາ. ຄັນຊັ້ນ ໃຫ້ເຮົາມາເບິ່ງຫຼັກຖານບາງຢ່າງນຳກັນວ່າ ເປັນຫຍັງເຮົາຈຶ່ງເວົ້າໄດ້ວ່າຄຳພີໄບເບິນເປັນປຶ້ມທີ່ພະເຈົ້າດົນໃຈໃຫ້ຂຽນຂຶ້ນມາ.
ຄຳພະຍາກອນໃນຄຳພີໄບເບິນເຊື່ອຖືໄດ້
Left: C. Sappa/DeAgostini/Getty Images; right: Image © Homo Cosmicos/Shutterstock
ຄຳພະຍາກອນໃນຄຳພີໄບເບິນເກີດຂຶ້ນແທ້ໃນອະດີດແລະກຳລັງເກີດຂຶ້ນແທ້ໃນທຸກມື້ນີ້ (ເບິ່ງຂໍ້ 10-11) e
10. ຂໍໃຫ້ຍົກຕົວຢ່າງຄຳພະຍາກອນທີ່ສະແດງໃຫ້ເຫັນວ່າ 2 ເປໂຕ 1:21 ເປັນຄວາມຈິງ. (ເບິ່ງຮູບພາບ)
10 ຄຳພີໄບເບິນມີຄຳພະຍາກອນຫຼາຍເລື່ອງທີ່ສຳເລັດເປັນຈິງ. ບາງຄຳພະຍາກອນກໍຂຽນໄວ້ຫຼາຍຮ້ອຍປີມາແລ້ວ. ປະຫວັດສາດກໍໄດ້ຢືນຢັນໃນເລື່ອງນີ້. ນີ້ບໍ່ໄດ້ເຮັດໃຫ້ເຮົາແປກໃຈ ເພາະເຮົາຮູ້ວ່າຄຳພະຍາກອນທັງໝົດທີ່ຢູ່ໃນຄຳພີໄບເບິນມາຈາກພະເຢໂຫວາ. (ອ່ານ 2 ເປໂຕ 1:21) ໃຫ້ເຮົາມາເບິ່ງຄຳພະຍາກອນໜຶ່ງນຳກັນກ່ຽວກັບການຫຼົ້ມຈົມຂອງເມືອງບາບີໂລນບູຮານ. ປະມານປີ 778-732 ກ່ອນ ຄ.ສ ຜູ້ພະຍາກອນເອຊາຢາໄດ້ຮັບການດົນໃຈໃຫ້ຂຽນລ່ວງໜ້າວ່າບາບີໂລນທີ່ແຂງແກ່ນຈະຖືກສັດຕູຍຶດ. ລາວເຖິງຂັ້ນບອກຊື່ຄົນທີ່ຈະມາຍຶດເມືອງນີ້ ເຊິ່ງກໍແມ່ນໄຊຣັດ ແລະຍັງບອກລາຍລະອຽດວ່າເມືອງນີ້ຈະຖືກຍຶດແນວໃດ. (ອຊຢ. 44:27–45:2) ນອກຈາກນັ້ນ ເອຊາຢາຍັງບອກວ່າເມືອງນີ້ຈະຖືກທຳລາຍແລະຈະກາຍເປັນເມືອງຮ້າງ ເຊິ່ງເລື່ອງນີ້ກໍໄດ້ເກີດຂຶ້ນແທ້. (ອຊຢ. 13:19, 20) ບາບີໂລນຖືກເມເດຍແລະເປີເຊຍທຳລາຍໃນປີ 539 ກ່ອນ ຄ.ສ. ໃນທຸກມື້ນີ້ເມືອງບາບີໂລນເຫຼືອແຕ່ຊາກຫັກພັງ. ເບິ່ງວິດີໂອຄຳພີໄບເບິນບອກລ່ວງໜ້າເລື່ອງການຫຼົ້ມຈົມຂອງບາບີໂລນ ທີ່ຢູ່ໃນປຶ້ມຊີວິດທີ່ມີຄວາມສຸກຕະຫຼອດໄປ! ບົດ 3 ຂໍ້ 5 ໃນຮູບແບບເອເລັກໂຕຣນິກ.
11. ຄຳພະຍາກອນໃນດານີເອນ 2:41-43 ກຳລັງເກີດຂຶ້ນແທ້ແນວໃດໃນທຸກມື້ນີ້?
11 ຄຳພະຍາກອນໃນຄຳພີໄບເບິນບໍ່ໄດ້ເກີດຂຶ້ນແຕ່ໃນອະດີດເທົ່ານັ້ນ ແຕ່ເຮົາເຫັນວ່າຄຳພະຍາກອນກຳລັງເກີດຂຶ້ນໃນປັດຈຸບັນນີ້ນຳ. ຕົວຢ່າງເຊັ່ນ ໃຫ້ເຮົາມາເບິ່ງຄວາມສຳເລັດເປັນຈິງຂອງຄຳພະຍາກອນຂອງດານີເອນກ່ຽວກັບມະຫາອຳນາດໂລກອັງກິດ-ອາເມຣິກາ. (ອ່ານດານີເອນ 2:41-43) ຄຳພະຍາກອນຂອງດານີເອນບອກຢ່າງຖືກຕ້ອງວ່າ ມະຫາອຳນາດໂລກຄູ່ນີ້ຈະມີສ່ວນທີ່ແຂງແກ່ນຄືເຫຼັກ ແລະສ່ວນທີ່ອ່ອນແອຄືດິນໜຽວ ແລະມັນກໍເປັນແບບນັ້ນແທ້. ອັງກິດກັບອາເມຣິກາມີອຳນາດທີ່ແຂງແກ່ນຄືກັບເຫຼັກ. ເຂົາເຈົ້າມີບົດບາດທີ່ສຳຄັນໃນການເອົາຊະນະສົງຄາມໂລກທັງສອງຄັ້ງແລະມີກອງທັບທີ່ເຂັ້ມແຂງຫຼາຍ. ແຕ່ອຳນາດຂອງເຂົາເຈົ້າກໍອ່ອນແອລົງຍ້ອນປະຊາຊົນພະຍາຍາມຮຽກຮ້ອງສິດຕ່າງໆຜ່ານທາງສະຫະພັນແຮງງານ ສິດທິພົນລະເມືອງ ແລະການປະທ້ວງເພື່ອຈະມີສິດເສລີພາບຫຼາຍຂຶ້ນ. ຜູ້ຊ່ຽວຊານດ້ານທິດສະດີການເມືອງຄົນໜຶ່ງບອກວ່າ “ໃນທຸກມື້ນີ້ ບໍ່ມີປະເທດອຸດສາຫະກຳໃດເຊິ່ງປົກຄອງດ້ວຍລະບົບປະຊາທິປະໄຕທີ່ແຕກແຍກຫຼາຍເທົ່າກັບສະຫະລັດອາເມຣິກາ.” ສ່ວນອັງກິດກໍມີຄວາມແຕກແຍກກັນຍ້ອນມີຄວາມຄິດທີ່ບໍ່ຄືກັນເລື່ອງການພົວພັນກັບປະເທດອື່ນໆໃນສະຫະພາບເອີຣົບ. ຄວາມແຕກແຍກເຫຼົ່ານີ້ຈຶ່ງເຮັດໃຫ້ຍາກທີ່ມະຫາອຳນາດໂລກອັງກິດ-ອາເມຣິກາຈະຕັດສິນໃຈໄດ້ຢ່າງເດັດຂາດ.
12. ຄຳພະຍາກອນໃນຄຳພີໄບເບິນເຮັດໃຫ້ເຮົາໝັ້ນໃຈໃນເລື່ອງຫຍັງ?
12 ຄຳພະຍາກອນຕ່າງໆທີ່ສຳເລັດເປັນຈິງໄປແລ້ວເຮັດໃຫ້ເຮົາໝັ້ນໃຈໃນຄຳສັນຍາຂອງພະເຢໂຫວາກ່ຽວກັບອະນາຄົດຫຼາຍຂຶ້ນ. ເຮົາຮູ້ສຶກຄືກັບຜູ້ຂຽນຄຳເພງທີ່ອະທິດຖານເຖິງພະເຢໂຫວາວ່າ “ຂ້ອຍລໍຖ້າພະອົງຊ່ວຍຂ້ອຍໃຫ້ລອດ ເພາະຂ້ອຍເຊື່ອໝັ້ນໃນຄຳຂອງພະອົງ.” (ເພງ. 119:81, ລ.ມ.) ໂດຍທາງຄຳພີໄບເບິນພະເຢໂຫວາໄດ້ໃຫ້ເຮົາ “ມີອະນາຄົດທີ່ດີແລະມີຄວາມຫວັງ.” (ຢເຣ. 29:11, ລ.ມ.) ຄວາມຫວັງຂອງເຮົາບໍ່ໄດ້ຂຶ້ນຢູ່ກັບຄວາມພະຍາຍາມຂອງມະນຸດ ແຕ່ຂຶ້ນຢູ່ກັບຄຳສັນຍາຂອງພະເຢໂຫວາ. ດັ່ງນັ້ນ ຂໍໃຫ້ເຮົາໄວ້ໃຈຄຳພີໄບເບິນຕໍ່ໆໄປໂດຍສຶກສາຄຳພະຍາກອນຢ່າງດີ.
ຄຳແນະນຳໃນຄຳພີໄບເບິນຊ່ວຍຫຼາຍລ້ານຄົນ
13. ຕາມຄຳເພງ 119:66, 138 ມີຫຼັກຖານຫຍັງອີກທີ່ສະແດງວ່າຄຳພີໄບເບິນໄວ້ໃຈໄດ້?
13 ອີກເຫດຜົນໜຶ່ງທີ່ເຮົາສາມາດເຊື່ອຖືຄຳພີໄບເບິນໄດ້ກໍຄື ຄຳແນະນຳໃນຄຳພີໄບເບິນໄດ້ຊ່ວຍຫຼາຍຄົນໃຫ້ມີຊີວິດທີ່ດີຂຶ້ນ. (ອ່ານຄຳເພງ 119:66, 138) ຕົວຢ່າງເຊັ່ນ ຜົວເມຍຫຼາຍຄູ່ມີບັນຫາຈົນເຖິງຂັ້ນຈະຢ່າຮ້າງກັນ. ແຕ່ຕອນນີ້ເຂົາເຈົ້າມີຊີວິດທີ່ມີຄວາມສຸກຍ້ອນເຂົາເຈົ້າເຮັດຕາມຄຳແນະນຳໃນຄຳພີໄບເບິນ. ລູກຂອງເຂົາເຈົ້າກໍມີຄວາມສຸກທີ່ໃຫຍ່ມາໃນຄອບຄົວທີ່ມີຄວາມຮັກແລະອົບອຸ່ນ.—ອຟຊ. 5:22-29
14. ຂໍໃຫ້ເລົ່າປະສົບການທີ່ສະແດງໃຫ້ເຫັນວ່າຄຳພີໄບເບິນປ່ຽນແປງຊີວິດຄົນແນວໃດ.
14 ການເຮັດຕາມຄຳແນະນຳໃນຄຳພີໄບເບິນຊ່ວຍປ່ຽນແປງຊີວິດຂອງນັກໂທດທີ່ເຮັດຜິດຮ້າຍແຮງໃຫ້ດີຂຶ້ນໄດ້. ໃຫ້ເຮົາມາເບິ່ງຕົວຢ່າງຂອງນັກໂທດຄົນໜຶ່ງທີ່ຊື່ແຈັກ. d ລາວເປັນນັກໂທດທີ່ມັກໃຊ້ຄວາມຮຸນແຮງ ເປັນຄົນອັນຕະລາຍແລະຖືກຕັດສິນປະຫານຊີວິດ. ແຕ່ເມື່ອລາວໄດ້ນັ່ງຟັງພີ່ນ້ອງນຳການສຶກສາ ລາວກໍຮູ້ສຶກປະທັບໃຈຄວາມດີຂອງພີ່ນ້ອງແລະໄດ້ຂໍຮຽນຄຳພີໄບເບິນ. ຫຼັງຈາກທີ່ລາວເຮັດຕາມຫຼັກການໃນຄຳພີໄບເບິນ ລາວກໍໄດ້ປ່ຽນແປງການປະພຶດແລະນິດໄສທີ່ບໍ່ດີ. ຕໍ່ມາລາວກໍມີຄຸນສົມບັດທີ່ຈະເປັນຜູ້ປະກາດ ແລະໃນທີ່ສຸດກໍຮັບບັບເຕມາ. ລາວປະກາດກັບນັກໂທດຄົນອື່ນໆເລື່ອງການປົກຄອງຂອງພະເຈົ້າຢ່າງກະຕືລືລົ້ນແລະຊ່ວຍ 4 ຄົນໃຫ້ຮຽນຄຳພີໄບເບິນ. ເມື່ອຮອດມື້ປະຫານຊີວິດ ລາວກໍປ່ຽນເປັນຄົນລະຄົນແລ້ວ. ທະນາຍຄົນໜຶ່ງຂອງລາວເວົ້າວ່າ “ແຈັກບໍ່ແມ່ນຄົນເກົ່າທີ່ຂ້ອຍເຄີຍຮູ້ຈັກເມື່ອ 20 ປີກ່ອນ. ຄຳສອນຂອງພະຍານພະເຢໂຫວາໄດ້ປ່ຽນຊີວິດລາວ.” ເຖິງວ່າແຈັກຖືກປະຫານຊີວິດໄປແລ້ວ ແຕ່ຕົວຢ່າງຂອງລາວກໍສະແດງໃຫ້ເຫັນວ່າເຮົາໄວ້ໃຈຄຳພີໄບເບິນໄດ້ແລະຄຳພີໄບເບິນມີພະລັງທີ່ຈະປ່ຽນແປງຊີວິດຄົນ.—ອຊຢ. 11:6-9
ຄຳແນະນຳໃນຄຳພີໄບເບິນປ່ຽນແປງຊີວິດຄົນໃຫ້ດີຂຶ້ນ ບໍ່ວ່າເຂົາເຈົ້າຈະມາຈາກວັດທະນະທຳໃດ (ເບິ່ງຂໍ້ 15) f
15. ການເອົາຄຳແນະນຳຈາກຄຳພີໄບເບິນໄປໃຊ້ເຮັດໃຫ້ປະຊາຊົນຂອງພະເຢໂຫວາຕ່າງຈາກຄົນທົ່ວໄປແນວໃດ? (ເບິ່ງຮູບພາບ)
15 ປະຊາຊົນຂອງພະເຢໂຫວາມີສັນຕິສຸກແລະເປັນນ້ຳໜຶ່ງໃຈດຽວກັນ ຍ້ອນເຂົາເຈົ້າເຮັດຕາມຄຳແນະນຳໃນຄຳພີໄບເບິນ. (ຢຮ. 13:35; 1 ກຣ. 1:10) ສັນຕິສຸກແລະຄວາມເປັນນ້ຳໜຶ່ງໃຈດຽວກັນຂອງພວກເຮົາແຕກຕ່າງກັນຫຼາຍຈາກຄົນສ່ວນຫຼາຍໃນທຸກມື້ນີ້ ຍ້ອນວ່າເຂົາເຈົ້າມີຄວາມແຕກແຍກກັນທາງດ້ານຄວາມຄິດ ເຊື້ອຊາດ ວັດທະນະທຳ ແລະການເມືອງ. ໄວລຸ້ນຄົນໜຶ່ງທີ່ຊື່ຢີນໄດ້ສັງເກດເຫັນໃນເລື່ອງນີ້. ຢີນໃຫຍ່ມາໃນປະເທດໜຶ່ງທີ່ຢູ່ທະວີບອາຝຼິກກາ. ຕອນທີ່ປະເທດຂອງລາວມີສົງຄາມການເມືອງ ລາວໄດ້ເປັນທະຫານເພື່ອຮ່ວມສູ້ຮົບນຳເຂົາເຈົ້າ. ແຕ່ຕໍ່ມາລາວກໍໄດ້ໜີໄປຢູ່ປະເທດອື່ນ. ຕອນທີ່ລາວຢູ່ປະເທດໃໝ່ ລາວໄດ້ພົບກັບພະຍານພະເຢໂຫວາ. ລາວບອກວ່າ “ຂ້ອຍເຂົ້າໃຈແລ້ວວ່າ ຄົນທີ່ນັບຖືສາສະໜາແທ້ຈະຮັກກັນແລະບໍ່ເຂົ້າໄປຫຍຸ້ງກ່ຽວກັບການເມືອງຫຼືແຕກແຍກກັນ.” ລາວຍັງໄດ້ເວົ້າຕື່ມວ່າ “ຂ້ອຍເຄີຍອຸທິດຊີວິດເພື່ອປ້ອງກັນປະເທດຊາດ ແຕ່ເມື່ອມາຮຽນຄຳພີໄບເບິນ ຂ້ອຍກໍຕັດສິນໃຈອຸທິດຊີວິດໃຫ້ພະເຢໂຫວາ.” ຢີນໄດ້ປ່ຽນແປງຕົວເອງຢ່າງຮອບດ້ານ. ແທນທີ່ລາວຈະຕໍ່ສູ້ກັບຄົນທີ່ມີວັດທະນະທຳທີ່ແຕກຕ່າງຈາກລາວ ຕອນນີ້ລາວໄດ້ບອກຄວາມຈິງໃນຄຳພີໄບເບິນໃຫ້ກັບທຸກຄົນຮູ້ ບໍ່ວ່າເຂົາເຈົ້າຈະມາຈາກວັດທະນະທຳໃດ. ການທີ່ຄຳແນະນຳໃນຄຳພີໄບເບິນເປັນປະໂຫຍດຕໍ່ທຸກຄົນບໍ່ວ່າຈະມາຈາກວັດທະນະທຳໃດກໍພິສູດໃຫ້ເຫັນວ່າ ເຮົາສາມາດໄວ້ໃຈຄຳພີໄບເບິນໄດ້.
ໃຫ້ໝັ້ນໃຈວ່າຄຳພີໄບເບິນເປັນຄວາມຈິງຕໍ່ໆໄປ
16. ເປັນຫຍັງຈຶ່ງເປັນເລື່ອງສຳຄັນທີ່ເຮົາຈະໝັ້ນໃຈໃນຄຳພີໄບເບິນໃຫ້ຫຼາຍຂຶ້ນ?
16 ແຮງສະພາບການໃນໂລກທຸກມື້ນີ້ເສື່ອມຊາມເລື້ອຍໆມັນກໍແຮງເປັນເລື່ອງຍາກທີ່ເຮົາຈະໄວ້ໃຈຄຳພີໄບເບິນ. ຫຼາຍຄົນພະຍາຍາມເຮັດໃຫ້ເຮົາສົງໄສວ່າ ຄຳພີໄບເບິນເປັນຄວາມຈິງແທ້ບໍ? ຫຼືພະເຢໂຫວາໄດ້ແຕ່ງຕັ້ງໃຫ້ທາດທີ່ສັດຊື່ແລະສຸຂຸມຊີ້ນຳເຮົາໃນທຸກມື້ນີ້ແທ້ໆບໍ? ຖ້າເຮົາໝັ້ນໃຈວ່າຄຳພີໄບເບິນເປັນຄວາມຈິງ ເຮົາກໍຈະສາມາດຕ້ານທານການໂຈມຕີທຸກຮູບແບບຈາກຊາຕານໄດ້. ເຮົາຈະ “ຕັ້ງໃຈເຮັດຕາມຂໍ້ກຳນົດຂອງ [ພະເຢໂຫວາ] ຕະຫຼອດຊີວິດຈົນກວ່າເຮົາຈະຕາຍ.” (ເພງ. 119:112, ລ.ມ.) ແລະເຮົາຈະ “ບໍ່ອາຍ” ທີ່ຈະບອກຄົນອື່ນກ່ຽວກັບຄວາມຈິງໃນຄຳພີໄບເບິນແລະກະຕຸ້ນເຂົາເຈົ້າໃຫ້ເອົາຫຼັກການໃນຄຳພີໄບເບິນໄປໃຊ້ໃນຊີວິດ. (ເພງ. 119:46, ລ.ມ.) ເຮົາກໍຈະສາມາດອົດທົນກັບບັນຫາທີ່ຍາກຫຼາຍ ເຊິ່ງລວມເຖິງການຂົ່ມເຫງ “ດ້ວຍຄວາມຍິນດີ” ໄດ້.—ກລຊ. 1:11; ເພງ. 119:143, 157
17. ຂໍ້ພະຄຳພີປະຈຳປີ 2023 ຊ່ວຍເຮົາໃຫ້ຄິດເຖິງຫຍັງ?
17 ເຮົາຮູ້ສຶກຂອບໃຈພະເຢໂຫວາຫຼາຍແທ້ໆທີ່ໃຫ້ເຮົາຮູ້ຈັກຄວາມຈິງໃນຄຳພີໄບເບິນ! ຄວາມຈິງນີ້ຊ່ວຍເຮົາໃຫ້ຮູ້ສຶກສະຫງົບໃຈແລະມີຈຸດມຸ່ງໝາຍໃນຊີວິດ. ແລະຄຳພີໄບເບິນຍັງໃຫ້ຄຳແນະນຳທີ່ຈະແຈ້ງກັບເຮົາວ່າ ເຮົາຄວນໃຊ້ຊີວິດແນວໃດໃນໂລກທີ່ສັບສົນວຸ່ນວາຍນີ້. ຄວາມຈິງນີ້ເຮັດໃຫ້ເຮົາມີຄວາມຫວັງວ່າພາຍໃຕ້ການປົກຄອງຂອງພະເຈົ້າ ເຮົາຈະມີອະນາຄົດທີ່ດີ. ດັ່ງນັ້ນ ຂໍໃຫ້ຂໍ້ພະຄຳພີປະຈຳປີ 2023 ຊ່ວຍເຮົາໃຫ້ໝັ້ນໃຈວ່າຖ້ອຍຄຳຂອງພະເຈົ້າທັງໝົດເປັນຄວາມຈິງ.—ເພງ. 119:160
ເພງ 94 ເຮົາຂອບໃຈພະເຈົ້າສຳລັບພະຄຳພີ
a ຂໍ້ພະຄຳພີປະຈຳປີ 2023 ຍົກມາຈາກຄຳເພງ 119:160, ລ.ມ. ທີ່ບອກວ່າ “ຖ້ອຍຄຳຂອງພະອົງທັງໝົດເປັນຄວາມຈິງ.” ພວກເຮົາເຫັນດີກັບຂໍ້ນີ້ ແຕ່ຫຼາຍຄົນບໍ່ເຫັນດີນຳ ເພາະເຂົາເຈົ້າບໍ່ເຊື່ອວ່າຄຳແນະນຳໃນຄຳພີໄບເບິນເປັນປະໂຫຍດແລະບາງຄົນເຖິງຂັ້ນບໍ່ເຊື່ອໃນຄຳພີໄບເບິນເລີຍ. ໃນບົດຄວາມນີ້ເຮົາຈະເບິ່ງນຳກັນສາມຢ່າງທີ່ຈະຊ່ວຍໃຫ້ຄົນທີ່ສົນໃຈຄຳພີໄບເບິນໝັ້ນໃຈວ່າຄຳພີໄບເບິນເປັນຄວາມຈິງ ແລະຄຳແນະນຳໃນຄຳພີໄບເບິນຈະຊ່ວຍເຂົາເຈົ້າໄດ້.
b ສະບັບສຳເນົາຫຼືກ໋ອບປີ້ເປັນສະບັບທີ່ຂຽນດ້ວຍມື
c ຂໍ້ມູນເພີ່ມເຕີມກ່ຽວກັບການປົກປ້ອງຄຳພີໄບເບິນບໍ່ໃຫ້ສູນຫາຍໄປ ເຂົ້າໄປທີ່ເວັບໄຊ jw.org ແລ້ວພິມຄຳວ່າ “ປະຫວັດສາດກັບຄຳພີໄບເບິນ” ໃນປ່ອງຄົ້ນຫາ. (ພາສາໄທ)
d ຊື່ສົມມຸດ
