ເຈົ້າຮູ້ບໍ?
ໃນສະໄໝຂອງພະເຢຊູ ປະຊາຊົນຕ້ອງເສຍພາສີອາກອນຫຍັງແດ່?
ໃນສະໄໝກ່ອນ ຄົນອິດສະຣາເອນຕ້ອງສະໜັບສະໜູນການນະມັດສະການແທ້ດ້ວຍເງິນຄຳຂອງເຂົາເຈົ້າ. ແຕ່ໃນສະໄໝພະເຢຊູເລື່ອງນີ້ມັນສະຫຼັບຊັບຊ້ອນຫຼາຍ ແລະກາຍເປັນພາລະໜັກສຳລັບຄົນຢິວ.
ຜູ້ຊາຍຄົນຢິວທີ່ເປັນຜູ້ໃຫຍ່ທຸກຄົນຈະຕ້ອງຈ່າຍເງິນຄົນລະເຄິ່ງເຊເກນ (2 ດັກມາ) ເພື່ອສະໜັບສະໜູນການນະມັດສະການຢູ່ເຕັ້ນສັກສິດຫຼືຢູ່ວິຫານ. ໃນສະໄໝພະເຢຊູ ຄົນຢິວຕ້ອງໄດ້ຈ່າຍພາສີອາກອນເພື່ອໃຊ້ໃນການສ້ອມແຊມແລະບຳລຸງຮັກສາເຄື່ອງຂອງຢູ່ໃນວິຫານທີ່ກະສັດເຮໂຣດສ້າງຂຶ້ນ. ຄົນຢິວບາງຄົນໄດ້ຖາມເປໂຕວ່າ ພະເຢຊູຄິດແນວໃດກ່ຽວກັບເລື່ອງນີ້. ພະເຢຊູບອກວ່າບໍ່ຜິດທີ່ຈະເສຍພາສີອາກອນ ທີ່ຈິງ ພະເຢຊູຍັງໄດ້ບອກເປໂຕໃຫ້ໄປເອົາເງິນຫຼຽນເພື່ອມາຈ່າຍພາສີອາກອນ.—ມທ. 17:24-27
ນອກຈາກນັ້ນ ປະຊາຊົນຂອງພະເຈົ້າຍັງຕ້ອງເອົາ 1 ສ່ວນ 10 ຂອງຜົນລະປູກຫຼືລາຍໄດ້ທີ່ເຂົາເຈົ້າໄດ້ຮັບມາໃຫ້ພະເຢໂຫວາ. (ເລວີ. 27:30-32; ຈົດເຊັນ. 18:26-28) ແຕ່ພວກຫົວໜ້າສາສະໜາບອກວ່າ ປະຊາຊົນຈະຕ້ອງໃຫ້ 1 ສ່ວນ 10 ຂອງພືດຜັກທຸກຊະນິດ ບໍ່ວ່າຈະເປັນ ‘ຫອມລາບ ຜັກຊີ ແລະເມັດຄູມິນ.’ ພະເຢຊູບໍ່ໄດ້ຄິດວ່າການເສຍ 1 ສ່ວນ 10 ບໍ່ດີ ແຕ່ເພິ່ນຕຳໜິຄວາມຄິດຂອງພວກຄູສອນສາສະໜາແລະພວກຟາຣິຊາຍ.—ມທ. 23:23
ແຕ່ສະໄໝທີ່ໂຣມປົກຄອງ ຄົນຢິວຈະຕ້ອງຈ່າຍພາສີອາກອນຫຼາຍຢ່າງໃຫ້ກັບລັດຖະບານໂຣມ ເຊັ່ນ: ການເສຍພາສີທີ່ດິນ. ເຈົ້າຂອງດິນຈະຕ້ອງເສຍພາສີທີ່ດິນເປັນເງິນສົດຫຼືສິ່ງອື່ນໆທີ່ມີຄ່າຕາມອັດຕາ 20-25 ເປີເຊັນຂອງເນື້ອທີ່ທີ່ດິນ. ນອກຈາກນັ້ນ ຄົນຢິວຍັງຕ້ອງໄດ້ເສຍພາສີພິເສດອີກເຊິ່ງເອີ້ນວ່າ ພາສີລາຍບຸກຄົນ. ພາສີນີ້ແຫຼະທີ່ພວກຟາຣິຊາຍເອົາມາຖາມພະເຢຊູ. ແລ້ວພະເຢຊູກໍໄດ້ຕອບເຂົາເຈົ້າຢ່າງເໝາະສົມວ່າ: “ຖ້າເປັນແນວນັ້ນ ສິ່ງໃດທີ່ເປັນຂອງເຊຊາກໍໃຫ້ແກ່ເຊຊາ ແລະສິ່ງໃດທີ່ເປັນຂອງພະເຈົ້າກໍໃຫ້ແກ່ພະເຈົ້າ.”—ມທ. 22:15-22
ຍັງມີການເສຍພາສີສິນຄ້າ. ເມື່ອນຳສິນຄ້າເຂົ້າ-ອອກເຂດໃໝ່ຈະມີການເກັບພາສີຢູ່ທ່າເຮືອ, ຂົວ, ດ່ານທາງແຍກ, ປະຕູເຂົ້າເມືອງ ຫຼືຢູ່ຕະຫຼາດ.
ບັນດາເມືອງຂຶ້ນຂອງໂຣມຕ້ອງເສຍພາສີອາກອນທີ່ໜັກຫຼາຍ. ນັກປະຫວັດສາດຄົນໂຣມທີ່ຊື່ທາຊິທັດສ໌ໄດ້ບອກວ່າ ສະໄໝທີ່ຈອມຈັກກະພັດຕີເບຣີໂອປົກຄອງເຊິ່ງເປັນຕອນທີ່ພະເຢຊູມີຊີວິດຢູ່ເທິງໂລກນີ້ “ເມືອງຊີເຣຍແລະຢູດາຍຂໍໃຫ້ຫຼຸດຄ່າເສຍພາສີອາກອນຍ້ອນຮູ້ສຶກວ່າມັນໜັກໂພດສຳລັບເຂົາເຈົ້າ.”
ສິ່ງທີ່ເຮັດໃຫ້ການເສຍພາສີອາກອນໜັກຂຶ້ນຕື່ມອີກກໍຄື ອຳນາດການປົກຄອງຈະໃຫ້ຄົນມາປະມູນການເກັບພາສີອາກອນ. ຜູ້ທີ່ປະມູນໄດ້ກໍຈະຈ້າງຄົນອື່ນໃຫ້ໄປເກັບພາສີແລະຫາກຳໄລຈາກການເກັບພາສີນັ້ນໃຫ້ກັບລາວ. ຊັກຂ່າຍກໍເປັນຜູ້ໜຶ່ງທີ່ໄປຈ້າງຄົນອື່ນໃຫ້ມາເກັບພາສີໃຫ້ລາວ. (ລກ. 19:1, 2) ນີ້ຈຶ່ງເຮັດໃຫ້ປະຊາຊົນຊັງຄົນເກັບພາສີແລະວິທີການເກັບພາສີຂອງເຂົາເຈົ້າ.
