ບົດຄວາມສຶກສາທີ 12
ຄວາມຮັກຊ່ອຍເຮົາໃຫ້ອົດທົນເມື່ອຄົນອື່ນຊັງເຮົາ
“ຂ້ອຍສັ່ງສິ່ງເຫຼົ່ານີ້ກັບພວກເຈົ້າກໍເພື່ອໃຫ້ພວກເຈົ້າຮັກກັນ. ຖ້າໂລກນີ້ກຽດຊັງພວກເຈົ້າ ກໍໃຫ້ຮູ້ໄວ້ວ່າໂລກໄດ້ກຽດຊັງຂ້ອຍກ່ອນ.”—ຢຮ. 15:17, 18
ເພງ 129 ເຮົາຈະອົດທົນຕໍ່ໄປ
ໃຈຄວາມສຳຄັນ *
1. ຕາມມັດທາຍ 24:9 ເປັນຫຍັງເຮົາຈຶ່ງບໍ່ຄວນແປກໃຈເມື່ອຄົນໃນໂລກກຽດຊັງເຮົາ?
ພະເຢໂຫວາສ້າງເຮົາໃຫ້ມີຄວາມຮັກ ແລະຢາກໃຫ້ຄົນອື່ນຮັກເຮົາ. ດັ່ງນັ້ນເມື່ອຄົນອື່ນກຽດຊັງເຮົາ ເຮົາຈຶ່ງຮູ້ສຶກບໍ່ດີແລະບາງເທື່ອກໍຮູ້ສຶກຢ້ານ. ຕົວຢ່າງເຊັ່ນ: ພີ່ນ້ອງຍິງທີ່ຊື່ຈໍຈີນາຢູ່ເອີຣົບເວົ້າວ່າ: “ຕອນທີ່ຂ້ອຍອາຍຸ 14 ປີແມ່ຊັງຂ້ອຍທີ່ຂ້ອຍຮັບໃຊ້ພະເຢໂຫວາ. ຂ້ອຍຮູ້ສຶກເສຍໃຈຫຼາຍແລະຄິດວ່າ “ຂ້ອຍເປັນລູກທີ່ບໍ່ດີບໍ?” * ພີ່ນ້ອງຊາຍທີ່ຊື່ດານີໂລເວົ້າວ່າ: “ຕອນທີ່ທະຫານຕີຂ້ອຍ ດູຖູກຂ້ອຍ ແລະຂົ່ມຂູ່ວ່າຈະທຳຮ້າຍຂ້ອຍຍ້ອນເປັນພະຍານພະເຢໂຫວາ ຂ້ອຍຮູ້ສຶກຢ້ານຫຼາຍແທ້ໆ.” ເມື່ອເຮົາເຈິເລື່ອງແບບນີ້ກໍບໍ່ແມ່ນເລື່ອງແປກ ເພາະພະເຢຊູບອກລ່ວງໜ້າວ່າເຮົາຈະຖືກກຽດຊັງ.—ອ່ານມັດທາຍ 24:9
2-3. ເປັນຫຍັງເຮົາທີ່ເປັນລູກສິດຂອງພະເຢຊູຈຶ່ງຖືກກຽດຊັງ?
2 ຍ້ອນຫຍັງຄົນໃນໂລກຈຶ່ງກຽດຊັງເຮົາທີ່ເປັນລູກສິດຂອງພະເຢຊູ? ຍ້ອນວ່າເຮົາ “ບໍ່ໄດ້ເປັນຄົນຂອງໂລກນີ້” ຄືກັບທີ່ພະເຢຊູບໍ່ໄດ້ເປັນ. (ຢຮ. 15:17-19) ດັ່ງນັ້ນ ເຖິງວ່າເຮົານັບຖືການປົກຄອງຂອງມະນຸດ ແຕ່ເຮົາຈະບໍ່ນະມັດສະການຕົວແທນຫຼືສັນຍະລັກຂອງການປົກຄອງນັ້ນ. ເຮົາຈະນະມັດສະການພະເຢໂຫວາພຽງຜູ້ດຽວເທົ່ານັ້ນ. ເຮົາຖືວ່າມີແຕ່ພະເຈົ້າເທົ່ານັ້ນທີ່ມີສິດຈະປົກຄອງມະນຸດ. ແຕ່ຊາຕານແລະ “ລູກຫຼານ” ຂອງມັນບໍ່ຍອມຮັບວ່າພະເຈົ້າມີສິດປົກຄອງໂລກນີ້. (ຕົ້ນ. 3:1-5, 15, ລ.ມ.) ເຮົາປະກາດວ່າມີພຽງແຕ່ການປົກຄອງຂອງພະເຈົ້າເທົ່ານັ້ນທີ່ຈະແກ້ບັນຫາທັງໝົດຂອງມະນຸດ ແລະຈະທຳລາຍທຸກຄົນທີ່ຕໍ່ຕ້ານເພິ່ນ. (ດາ. 2:44; ພນມ. 19:19-21) ນີ້ເປັນຂ່າວດີສຳລັບຄົນທີ່ອ່ອນນ້ອມຖ່ອມຕົນ ແຕ່ເປັນຂ່າວຮ້າຍສຳລັບຄົນຊົ່ວ.—ເພງ. 37:10, 11
3 ເຮົາຍັງຖືກກຽດຊັງຍ້ອນເຮົາໃຊ້ຊີວິດຕາມຫຼັກການໃນຄຳພີໄບເບິນ. ຫຼັກສິນລະທຳຂອງພະເຈົ້າແຕກຕ່າງຫຼາຍຈາກຫຼັກສິນລະທຳຂອງໂລກນີ້. ຕົວຢ່າງເຊັ່ນ: ຫຼາຍຄົນໃນທຸກມື້ນີ້ຖືວ່າການເຮັດຜິດສິນລະທຳທາງເພດເປັນເລື່ອງທຳມະດາ. ເຂົາເຈົ້າຄິດຄືກັບຄົນທີ່ຢູ່ໃນເມືອງໂຊໂດມແລະໂກໂມຣາທີ່ຖືກພະເຈົ້າທຳລາຍ! (ຢດ. 7) ຍ້ອນເຮົາໃຊ້ຊີວິດຕາມຫຼັກການໃນຄຳພີໄບເບິນ ຫຼາຍຄົນຈຶ່ງເຍາະເຍີ້ຍເຮົາແລະບອກວ່າເຮົາເປັນຄົນໃຈແຄບ!—1 ປຕ. 4:3, 4
4. ມີຄຸນລັກສະນະຫຍັງແດ່ທີ່ຊ່ອຍເຮົາໃຫ້ອົດທົນໄດ້ເມື່ອມີຄົນກຽດຊັງເຮົາ?
4 ສິ່ງໃດຈະຊ່ອຍເຮົາໃຫ້ອົດທົນໄດ້ເມື່ອຄົນອື່ນດູຖູກແລະກຽດຊັງເຮົາ? ເຮົາຕ້ອງເຊື່ອແທ້ໆວ່າພະເຢໂຫວາຈະຊ່ອຍເຮົາ. ຄວາມເຊື່ອເປັນຄືກັບໂລ້ທີ່ “ມອດລູກທະນູໄຟທຸກດອກຂອງຕົວຊົ່ວຮ້າຍໄດ້.” (ອຟຊ. 6:16) ແຕ່ເຮົາມີຄວາມເຊື່ອຢ່າງດຽວຍັງບໍ່ພໍ. ເຮົາຕ້ອງມີຄວາມຮັກນຳ. ຍ້ອງຫຍັງ? ຍ້ອນວ່າຄວາມຮັກ “ບໍ່ໃຈຮ້າຍງ່າຍ” ແຕ່ຄວາມຮັກຍອມທົນທຸກສິ່ງແລະອົດທົນກັບທຸກສິ່ງທີ່ເຮັດໃຫ້ເຈັບໃຈ. (1 ກຣ. 13:4-7, 13) ຕອນນີ້ໃຫ້ເຮົາມາເບິ່ງວ່າການຮັກພະເຢໂຫວາ ຮັກພີ່ນ້ອງ ແລະຮັກສັດຕູຈະຊ່ອຍເຮົາໃຫ້ອົດທົນໄດ້ແນວໃດເມື່ອມີຄົນກຽດຊັງເຮົາ.
ການຮັກພະເຢໂຫວາຊ່ອຍເຮົາໃຫ້ອົດທົນເມື່ອມີຄົນກຽດຊັງເຮົາ
5. ຄວາມຮັກທີ່ພະເຢຊູມີຕໍ່ພະເຢໂຫວາໄດ້ຊ່ອຍເພິ່ນແນວໃດ?
5 ໃນຄືນກ່ອນທີ່ພວກສັດຕູຈະມາຈັບພະເຢຊູ ເພິ່ນໄດ້ບອກກັບລູກສິດທີ່ສັດຊື່ຂອງເພິ່ນວ່າ: “ຂ້ອຍກຳລັງເຮັດທຸກຢ່າງຕາມທີ່ພະເຈົ້າຜູ້ເປັນພໍ່ສັ່ງໄວ້ [ຍ້ອນ] ຂ້ອຍຮັກພະອົງ.” (ຢຮ. 14:31) ຄວາມຮັກທີ່ພະເຢຊູມີຕໍ່ພະເຢໂຫວາຊ່ອຍເພິ່ນໃຫ້ອົດທົນກັບບັນຫາທີ່ຍາກໆໄດ້. ຄວາມຮັກທີ່ເຮົາມີຕໍ່ພະເຢໂຫວາຈະຊ່ອຍເຮົາໃຫ້ອົດທົນໄດ້ຄືກັນ.
6. ຕາມໂຣມ 5:3-5 ຜູ້ຮັບໃຊ້ຂອງພະເຢໂຫວາຮູ້ສຶກແນວໃດເມື່ອຄົນໃນໂລກກຽດຊັງເຂົາເຈົ້າ?
6 ຄວາມຮັກທີ່ມີຕໍ່ພະເຢໂຫວາຊ່ອຍຜູ້ຮັບໃຊ້ຂອງເພິ່ນໃຫ້ອົດທົນກັບການຂົ່ມເຫງໄດ້. ຕົວຢ່າງເຊັ່ນ: ຕອນທີ່ສານສູງສຸດຂອງຊາວຢິວສັ່ງໃຫ້ພວກອັກຄະສາວົກເຊົາປະກາດ ແຕ່ຄວາມຮັກທີ່ເຂົາເຈົ້າມີຕໍ່ພະເຢໂຫວາກະຕຸ້ນເຂົາເຈົ້າໃຫ້ “ເຊື່ອຟັງພະເຈົ້າທີ່ເປັນຜູ້ປົກຄອງ ບໍ່ແມ່ນມະນຸດ.” (ກຈກ. 5:29; 1 ຢຮ. 5:3) ຄວາມຮັກທີ່ມີຕໍ່ພະເຈົ້າຍັງຊ່ອຍພີ່ນ້ອງຫຼາຍຄົນໃນທຸກມື້ນີ້ໃຫ້ຮັກສາຄວາມສັດຊື່ໄດ້ເມື່ອຖືກຂົ່ມເຫງຢ່າງຮຸນແຮງຈາກອຳນາດການປົກຄອງ. ເມື່ອຖືກຄົນໃນໂລກກຽດຊັງ ແທນທີ່ເຮົາຈະທໍ້ໃຈເຮົາພັດມີຄວາມສຸກທີ່ໄດ້ເຮັດໃຫ້ພະເຈົ້າພໍໃຈ.—ກຈກ. 5:41; ອ່ານໂຣມ 5:3-5
7. ເຮົາຄວນເຮັດແນວໃດເມື່ອຖືກຄົນໃນຄອບຄົວຕໍ່ຕ້ານ?
7 ເປັນເລື່ອງທີ່ອົດທົນໄດ້ຍາກທີ່ສຸດເມື່ອຄົນໃນຄອບຄົວຕໍ່ຕ້ານເຮົາ. ເມື່ອເຫັນວ່າເຮົາຮຽນເລື່ອງຂອງພະເຢໂຫວາເຂົາເຈົ້າອາດຢ້ານວ່າເຮົາຈະຖືກຫຼອກ ແລະຄົນອື່ນໆອາດຈະຄິດວ່າເຮົາເປັນບ້າໄປແລ້ວ. (ສົມທຽບກັບມາຣະໂກ 3:21) ເຂົາເຈົ້າອາດເຖິງຂັ້ນຕໍ່ຕ້ານເຮົາຢ່າງຮຸນແຮງ. ແຕ່ມັນກໍບໍ່ແມ່ນເລື່ອງແປກທີ່ຖືກຕໍ່ຕ້ານແບບນີ້ເພາະພະເຢຊູເວົ້າວ່າ: “ຄົນໃນຄອບຄົວດຽວກັນຈະເປັນສັດຕູກັນ.” (ມທ. 10:36) ເຖິງວ່າຄົນໃນຄອບຄົວຫຼືຍາດພີ່ນ້ອງຈະກຽດຊັງເຮົາ ແຕ່ເຮົາກໍບໍ່ໄດ້ຖືວ່າເຂົາເຈົ້າເປັນສັດຕູ. ແຕ່ກົງກັນຂ້າມ ເມື່ອເຮົາຮັກພະເຢໂຫວາຫຼາຍຂຶ້ນ ເຮົາກໍຈະຮັກເຂົາເຈົ້າຄືກັນ. (ມທ. 22:37-39) ເຮົາຈະບໍ່ຍອມເຮັດຜິດຫຼັກການຂອງພະເຢໂຫວາເພື່ອເຮັດໃຫ້ເຂົາເຈົ້າພໍໃຈ.
ເມື່ອເຮົາເຈິຄວາມຍາກລຳບາກ ພະເຢໂຫວາຈະຢູ່ຄຽງຂ້າງເຮົາສະເໝີເພື່ອໃຫ້ກຳລັງໃຈແລະຊ່ວຍເຫຼືອເຮົາ (ເບິ່ງຂໍ້ 8-10)
8-9. ສິ່ງໃດຊ່ອຍພີ່ນ້ອງຍິງຄົນໜຶ່ງໃຫ້ອົດທົນໄດ້ເຖິງວ່າຈະຖືກຕໍ່ຕ້ານໜັກຫຼາຍ?
8 ຈໍຈີນາທີ່ເວົ້າເຖິງກ່ອນໜ້ານີ້ສາມາດອົດທົນໄດ້ເຖິງວ່າແມ່ລາວຈະຕໍ່ຕ້ານໜັກຫຼາຍ. ລາວເລົ່າວ່າ: “ຂ້ອຍແລະແມ່ໄດ້ເລີ່ມສຶກສາຄຳພີໄບເບິນກັບພະຍານພະເຢໂຫວາ. ແຕ່ 6 ເດືອນຕໍ່ມາເມື່ອຂ້ອຍຢາກໄປເຂົ້າຮ່ວມການປະຊຸມ ແມ່ພັດເລີ່ມຕໍ່ຕ້ານຂ້ອຍ. ຫຼັງຈາກນັ້ນຂ້ອຍກໍໄດ້ຮູ້ວ່າແມ່ໄດ້ຕິດຕໍ່ພົວພັນກັບພວກທີ່ທໍລະຍົດພະເຈົ້າ ລາວມັກເອົາຄຳເວົ້າຂອງເຂົາເຈົ້າມາເວົ້າກັບຂ້ອຍ. ແລະລາວກໍດ່າ ຕີ ບີບຄໍ ແລະຍັງເອົາຄຳພີໄບເບິນກັບປຶ້ມຕ່າງໆຂອງຂ້ອຍໄປຖິ້ມ. ແຕ່ຫຼັງຈາກທີ່ຂ້ອຍອາຍຸໄດ້ 15 ປີຂ້ອຍກໍຮັບບັບເຕມາ. ແມ່ຂອງຂ້ອຍພະຍາຍາມເຮັດໃຫ້ຂ້ອຍເຊົາຮັບໃຊ້ພະເຢໂຫວາ ລາວຈຶ່ງເອົາຂ້ອຍໄປໄວ້ໃນສູນດັດສ້າງເຊິ່ງຢູ່ຫັ້ນມີແຕ່ພວກໄວລຸ້ນທີ່ຕິດຢາເສບຕິດແລະເປັນອາຊະຍາກອນ. ການຕໍ່ຕ້ານແບບນີ້ເຮັດໃຫ້ອົດທົນໄດ້ຍາກ ເພາະວ່າເປັນການຕໍ່ຕ້ານທີ່ມາຈາກຄົນໃນຄອບຄົວເຊິ່ງແທ້ຈິງແລ້ວເຂົາເຈົ້າຄວນຈະຮັກແລະຫ່ວງໃຍເຮົາ.”
9 ສິ່ງໃດຊ່ອຍຈໍຈີນາໃຫ້ອົດທົນໄດ້? ລາວບອກວ່າ: “ຕອນທີ່ແມ່ເລີ່ມຕໍ່ຕ້ານຂ້ອຍ ພໍດີຂ້ອຍຫາກໍອ່ານພະຄຳພີຈົບເຫຼັ້ມ. ສະນັ້ນ ຂ້ອຍໝັ້ນໃຈແລ້ວວ່າ ສິ່ງທີ່ຂ້ອຍໄດ້ອ່ານນັ້ນເປັນຄວາມຈິງແລະຂ້ອຍຮູ້ສຶກສະໜິດກັບພະເຢໂຫວາຫຼາຍຂຶ້ນ. ຂ້ອຍອະທິດຖານເຖິງພະເຢໂຫວາເລື້ອຍໆແລະເພິ່ນກໍຟັງຂ້ອຍ. ຕອນທີ່ຂ້ອຍຢູ່ສູນດັດສ້າງ ມີພີ່ນ້ອງຍິງຄົນໜຶ່ງໄດ້ຊວນຂ້ອຍໄປຫຼິ້ນເຮືອນຂອງລາວ ແລະເຮົາສຶກສາຄຳພີໄບເບິນນຳກັນ. ຕະຫຼອດໄລຍະນັ້ນຂ້ອຍໄດ້ຮັບກຳລັງໃຈຈາກພີ່ນ້ອງຢູ່ຫໍປະຊຸມນຳ. ເຂົາເຈົ້າປະຕິບັດກັບຂ້ອຍຄືກັບຄົນໃນຄອບຄົວ. ນີ້ເຮັດໃຫ້ຂ້ອຍໝັ້ນໃຈວ່າພະເຢໂຫວາມີກຳລັງຫຼາຍກວ່າຜູ້ທີ່ຕໍ່ຕ້ານຂ້ອຍ ບໍ່ວ່າເຂົາເຈົ້າຈະເປັນໃຜກໍຕາມ.”
10. ເຮົາໝັ້ນໃຈວ່າພະເຢໂຫວາຈະເຮັດຫຍັງ?
10 ອັກຄະສາວົກໂປໂລຂຽນວ່າບໍ່ມີສິ່ງໃດສາມາດ “ຂັດຂວາງຄວາມຮັກທີ່ພະເຈົ້າສະແດງຕໍ່ພວກເຮົາຜ່ານທາງພະຄລິດເຢຊູຜູ້ເປັນນາຍຂອງພວກເຮົາ.” (ຣມ. 8:38, 39) ເຖິງວ່າບາງເທື່ອເຮົາອາດຈະມີຄວາມທຸກ ແຕ່ພະເຢໂຫວາຈະຢູ່ຄຽງຂ້າງເຮົາສະເໝີເພື່ອຊ່ອຍເຮົາແລະໃຫ້ກຳລັງໃຈເຮົາ. ແລະຈາກປະສົບການຂອງຈໍຈີນາສະແດງໃຫ້ເຫັນວ່າ ພະເຢໂຫວາຈະຊ່ວຍເຫຼືອເຮົາໂດຍທາງພີ່ນ້ອງໃນປະຊາຄົມ.
ການຮັກພີ່ນ້ອງຊ່ອຍເຮົາໃຫ້ອົດທົນເມື່ອມີຄົນກຽດຊັງເຮົາ
11. ຄວາມຮັກທີ່ພະເຢຊູເວົ້າເຖິງຢູ່ໃນໂຢຮັນ 15:12, 13 ຊ່ອຍພວກລູກສິດແນວໃດ? ຂໍໃຫ້ຍົກຕົວຢ່າງ
11 ໃນຄືນກ່ອນທີ່ພະເຢຊູຈະຕາຍ ເພິ່ນໄດ້ສັ່ງໃຫ້ພວກລູກສິດຮັກກັນ. (ອ່ານໂຢຮັນ 15:12, 13) ເພິ່ນຮູ້ວ່າຄວາມຮັກທີ່ເສຍສະລະຈະຊ່ອຍເຂົາເຈົ້າໃຫ້ເປັນນ້ຳໜຶ່ງໃຈດຽວກັນ ແລະອົດທົນໄດ້ເມື່ອຄົນໃນໂລກກຽດຊັງເຂົາເຈົ້າ. ຂໍໃຫ້ເຮົາມາເບິ່ງຕົວຢ່າງຂອງພີ່ນ້ອງໃນເມືອງເທຊະໂລນິກ ຕັ້ງແຕ່ມີການເລີ່ມກໍ່ຕັ້ງປະຊາຄົມພີ່ນ້ອງກໍຖືກຂົ່ມເຫງ. ແຕ່ພີ່ນ້ອງເຫຼົ່ານັ້ນກໍເປັນຕົວຢ່າງທີ່ດີໃນການອົດທົນຢ່າງສັດຊື່ແລະສະແດງຄວາມຮັກຕໍ່ກັນ. (1 ທຊ. 1:3, 6, 7) ໂປໂລກະຕຸ້ນເຂົາເຈົ້າໃຫ້ສະແດງຄວາມຮັກຕໍ່ກັນ “ຫຼາຍຂຶ້ນເລື້ອຍໆ.” (1 ທຊ. 4:9, 10) ຄວາມຮັກຈະກະຕຸ້ນເຂົາເຈົ້າໃຫ້ເວົ້າປອບໃຈຄົນທີ່ໂສກເສົ້າແລະຊ່ວຍເຫຼືອຄົນທີ່ອ່ອນແອ. (1 ທຊ. 5:14) ເຂົາເຈົ້າໄດ້ເຮັດຕາມຄຳແນະນຳຂອງໂປໂລເພາະຈົດໝາຍສະບັບທີ 2 ທີ່ໂປໂລຂຽນໃນໜຶ່ງປີຕໍ່ມາບອກວ່າ: “ພວກເຈົ້າທຸກຄົນຮັກກັນຫຼາຍຂຶ້ນ.” (2 ທຊ. 1:3-5) ຄວາມຮັກຊ່ອຍເຂົາເຈົ້າໃຫ້ອົດທົນກັບຄວາມຫຍຸ້ງຍາກລຳບາກແລະການຂົ່ມເຫງ.
ເມື່ອພີ່ນ້ອງສະແດງຄວາມຮັກຕໍ່ກັນກໍຈະຊ່ອຍໃຫ້ອົດທົນໄດ້ເມື່ອມີຄົນກຽດຊັງ (ເບິ່ງຂໍ້ 12) *
12. ພີ່ນ້ອງໄດ້ສະແດງຄວາມຮັກຕໍ່ກັນແນວໃດຕອນທີ່ມີສົງຄາມ?
12 ຂໍໃຫ້ເຮົາມາເບິ່ງເລື່ອງຂອງດານີໂລກັບເມຍທີ່ເວົ້າເຖິງກ່ອນໜ້ານີ້. ຕອນທີ່ສົງຄາມລາມມາຮອດເມືອງທີ່ເຂົາເຈົ້າຢູ່ ເຂົາເຈົ້າກໍຍັງໄປປະກາດແລະໄປປະຊຸມເທົ່າທີ່ເຂົາເຈົ້າເຮັດໄດ້ ແລະແບ່ງປັນອາຫານໃຫ້ກັບພີ່ນ້ອງ. ມີມື້ໜຶ່ງທະຫານໄດ້ບຸກເຂົ້າມາໃນເຮືອນຂອງດານີໂລ. ລາວເວົ້າວ່າ: “ເຂົາເຈົ້າບອກໃຫ້ຂ້ອຍເຊົາເປັນພະຍານພະເຢໂຫວາ. ເຂົາເຈົ້າທັງຕີທັງເອົາປືນມາຍິງຂູ່ເກືອບຖືກຫົວຂ້ອຍ ແລະກ່ອນເຂົາເຈົ້າຈະອອກໄປ ເຂົາເຈົ້າຍັງຂູ່ວ່າຈະກັບມາຂົ່ມຂືນເມຍຂ້ອຍນຳ. ເມື່ອພີ່ນ້ອງຮູ້ເລື່ອງນີ້ ກໍຟ້າວພາເຮົາໄປຂຶ້ນລົດໄຟເພື່ອຍ້າຍໄປເມືອງໃໝ່. ຂ້ອຍຈະບໍ່ລືມຄວາມຮັກທີ່ພີ່ນ້ອງສະແດງຕໍ່ຂ້ອຍ. ແລະເມື່ອຂ້ອຍໄປຮອດບ່ອນໃໝ່ ພີ່ນ້ອງທີ່ຢູ່ຫັ້ນໄດ້ແບ່ງປັນອາຫານແລະຍັງຊ່ອຍຊອກວຽກຊອກເຮືອນໃຫ້ພວກເຮົານຳ! ຍ້ອນແນວນີ້ ເຮົາຈຶ່ງສາມາດຊ່ອຍພີ່ນ້ອງທີ່ໜີຈາກສົງຄາມໄດ້ໂດຍໃຫ້ເຂົາເຈົ້າມາພັກຢູ່ເຮືອນເຮົາ.” ເລື່ອງນີ້ສອນໃຫ້ຮູ້ວ່າ ຄວາມຮັກແບບຄລິດສະຕຽນຈະຊ່ອຍເຮົາໃຫ້ອົດທົນເມື່ອມີຄົນກຽດຊັງເຮົາ.
ການຮັກສັດຕູຊ່ອຍໃຫ້ເຮົາອົດທົນເມື່ອມີຄົນກຽດຊັງເຮົາ
13. ພະລັງບໍລິສຸດຂອງພະເຈົ້າຊ່ອຍເຮົາໃຫ້ອົດທົນໃນການຮັບໃຊ້ພະເຢໂຫວາໄດ້ແນວໃດເຖິງວ່າຄົນອື່ນຈະກຽດຊັງເຮົາ?
13 ພະເຢຊູບອກພວກລູກສິດໃຫ້ຮັກສັດຕູ. (ມທ. 5:44, 45) ການເຮັດແບບນີ້ງ່າຍບໍ? ບໍ່ງ່າຍເລີຍ! ແຕ່ພະລັງບໍລິສຸດຂອງພະເຈົ້າຊ່ອຍເຮົາໃຫ້ເຮັດໄດ້. ຜົນທີ່ເກີດຈາກພະລັງບໍລິສຸດຂອງພະເຈົ້າແມ່ນຄວາມຮັກ ຄວາມອົດທົນ ຄວາມກະລຸນາ ຄວາມອ່ອນໂຍນ ແລະການຄວບຄຸມຕົວເອງ. (ຄລຕ. 5:22, 23) ຄຸນລັກສະນະເຫຼົ່ານີ້ຈະຊ່ອຍເຮົາໃຫ້ອົດທົນເມື່ອມີຄົນກຽດຊັງເຮົາ. ຫຼາຍຄົນທີ່ເຄີຍຕໍ່ຕ້ານໄດ້ປ່ຽນໃຈຍ້ອນເຫັນວ່າພີ່ນ້ອງເຊິ່ງອາດຈະເປັນຜົວ ເມຍ ລູກ ຫຼືເພື່ອນບ້ານໄດ້ສະແດງຄຸນລັກສະນະທີ່ດີເຫຼົ່ານີ້ຕໍ່ເຂົາເຈົ້າ ແລະເຂົາເຈົ້າຫຼາຍຄົນກໍໄດ້ເຂົ້າມາເປັນພີ່ນ້ອງ. ດັ່ງນັ້ນ ຖ້າເຈົ້າເຫັນວ່າເປັນເລື່ອງຍາກທີ່ຈະຮັກບາງຄົນທີ່ກຽດຊັງເຈົ້າຍ້ອນວ່າເຈົ້າຮັບໃຊ້ພະເຢໂຫວາ ໃຫ້ອະທິດຖານຂໍພະລັງບໍລິສຸດຈາກພະເຢໂຫວາ. (ລກ. 11:13) ແລະຂໍໃຫ້ໝັ້ນໃຈວ່າການເຮັດຕາມທີ່ພະເຢໂຫວາບອກເປັນສິ່ງທີ່ດີທີ່ສຸດສະເໝີ.—ສຸພາ. 3:5-7
14-15. ໂຣມ 12:17-21 ໄດ້ຊ່ອຍຢັດຊ໌ມິນໃຫ້ສະແດງຄວາມຮັກຕໍ່ຜົວແນວໃດເມື່ອຜົວຕໍ່ຕ້ານ?
14 ຂໍໃຫ້ມາເບິ່ງຕົວຢ່າງຂອງພີ່ນ້ອງຢັດຊ໌ມິນທີ່ຢູ່ແຖວຕາເວັນອອກກາງ. ຕອນທີ່ລາວເຂົ້າມາເປັນພະຍານພະເຢໂຫວາ ຜົວຂອງລາວຄິດວ່າລາວຖືກຫຼອກ ແລະພະຍາຍາມເຮັດໃຫ້ລາວເຊົາຮັບໃຊ້ພະເຢໂຫວາ. ຜົວໄດ້ດູຖູກລາວ ແລະເອີ້ນຍາດພີ່ນ້ອງລວມທັງຄຸນພໍ່ແລະໝໍຜີເພື່ອມາຂູ່ລາວແລະກ່າວຫາວ່າລາວເຮັດໃຫ້ຄອບຄົວແຕກແຍກ. ຜົວຂອງລາວເຖິງຂັ້ນຮ້ອງດ່າພີ່ນ້ອງຕອນທີ່ກຳລັງປະຊຸມຢູ່. ຢັດຊ໌ມິນຮ້ອງໄຫ້ຕະຫຼອດຍ້ອນຜົວເຮັດບໍ່ດີກັບລາວ.
15 ຢັດຊ໌ມິນໄດ້ຮັບກຳລັງໃຈແລະການປອບໃຈຈາກພີ່ນ້ອງຕອນທີ່ຢູ່ຫໍປະຊຸມ. ຜູ້ດູແລກໍໄດ້ກະຕຸ້ນລາວໃຫ້ໃຊ້ຫຼັກການທີ່ຢູ່ໃນໂຣມ 12:17-21 (ອ່ານ). ຢັດຊ໌ມິນບອກວ່າ: “ການເຮັດຕາມຫຼັກການນີ້ຍາກຫຼາຍ. ແຕ່ຂ້ອຍໄດ້ຂໍໃຫ້ພະເຢໂຫວາຊ່ອຍ ແລະຂ້ອຍກໍໄດ້ພະຍາຍາມເຮັດຕາມສິ່ງທີ່ຄຳພີໄບເບິນບອກ. ດັ່ງນັ້ນ ເມື່ອຜົວຂ້ອຍເຮັດໃຫ້ເຮືອນຄົວເປື້ອນ ຂ້ອຍກໍອະນາໄມ ເມື່ອຜົວດ່າ ຂ້ອຍກໍຕອບຢ່າງອ່ອນໂຍນ ແລະເມື່ອຜົວເປັນໄຂ້ ຂ້ອຍກໍເບິ່ງແຍງຜົວ.”
ເມື່ອເຮົາສະແດງຄວາມຮັກຕໍ່ຜູ້ທີ່ຂົ່ມເຫງເຮົາ ເຂົາເຈົ້າກໍອາດຈະປ່ຽນໃຈ (ເບິ່ງຂໍ້ 16-17) *
16-17. ເຈົ້າໄດ້ບົດຮຽນຫຍັງຈາກເລື່ອງຂອງຢັດຊ໌ມິນ?
16 ການສະແດງຄວາມຮັກຕໍ່ຜົວເຮັດໃຫ້ຢັດຊ໌ມິນໄດ້ຮັບສິ່ງທີ່ດີ. ລາວບອກວ່າ: “ຜົວເລີ່ມໄວ້ໃຈຂ້ອຍຫຼາຍຂຶ້ນຍ້ອນລາວຮູ້ວ່າຂ້ອຍເວົ້າຄວາມຈິງສະເໝີ. ລາວເລີ່ມຟັງຂ້ອຍດ້ວຍຄວາມນັບຖືເມື່ອຂ້ອຍເວົ້າກ່ຽວກັບເລື່ອງສາສະໜາ ແລະລາວຊ່ວຍໃຫ້ຄອບຄົວມີສັນຕິສຸກ. ຕອນນີ້ລາວຍັງບອກໃຫ້ຂ້ອຍມ່ວນກັບການໄປປະຊຸມ. ຂ້ອຍກັບຜົວກໍໃກ້ຊິດກັນຫຼາຍຂຶ້ນແລະຄອບຄົວຂອງເຮົາກໍມີຄວາມສຸກຫຼາຍຂຶ້ນ. ຂ້ອຍຫວັງວ່າມື້ໜຶ່ງຜົວຂ້ອຍຈະເປີດໃຈຮັບເອົາຄວາມຈິງແລະມາຮັບໃຊ້ພະເຢໂຫວາຮ່ວມກັນກັບຂ້ອຍ.”
17 ຕົວຢ່າງຂອງຢັດຊ໌ມິນສະແດງໃຫ້ເຫັນວ່າຄວາມຮັກ “ຍອມທົນຮັບທຸກສິ່ງ . . . ຫວັງໃນທຸກສິ່ງ ອົດທົນໄດ້ທຸກສິ່ງ.” (1 ກຣ. 13:4, 7) ຄວາມກຽດຊັງມີພະລັງແລະເຮັດໃຫ້ເຈັບປວດໃຈ. ແຕ່ຄວາມຮັກມີພະລັງຫຼາຍກວ່າ ເພາະຄວາມຮັກສາມາດເອົາຊະນະໃຈຄົນໄດ້ ແລະເຮົາກໍຈະເຮັດໃຫ້ພະເຢໂຫວາພໍໃຈ. ແຕ່ຖ້າຫາກວ່າຜູ້ຕໍ່ຕ້ານຍັງກຽດຊັງເຮົາຢູ່ ເຮົາກໍມີຄວາມສຸກໄດ້. ແຕ່ຈະເປັນໄປໄດ້ແນວໃດ?
ມີຄວາມສຸກເຖິງວ່າຄົນອື່ນຈະກຽດຊັງເຮົາ
18. ເປັນຫຍັງເຮົາຈຶ່ງມີຄວາມສຸກເມື່ອຄົນອື່ນກຽດຊັງເຮົາ?
18 ພະເຢຊູບອກວ່າ: “ເມື່ອມີຄົນກຽດຊັງພວກເຈົ້າ . . . ພວກເຈົ້າກໍມີຄວາມສຸກ.” (ລກ. 6:22) ເຮົາບໍ່ຢາກໃຫ້ຄົນອື່ນກຽດຊັງເຮົາ ແລະເຮົາກໍບໍ່ຢາກໃຫ້ຄົນອື່ນຍົກຍ້ອງເຮົາທີ່ຖືກຂົ່ມເຫງຍ້ອນຄວາມເຊື່ອ. ຄັນຊັ້ນ ເປັນຫຍັງເຮົາຈຶ່ງມີຄວາມສຸກເມື່ອຄົນອື່ນກຽດຊັງເຮົາ? ມີສາມເຫດຜົນທີ່ເຮັດໃຫ້ເຮົາມີຄວາມສຸກ. (1) ເມື່ອເຮົາອົດທົນເຮົາກໍຈະເຮັດໃຫ້ພະເຢໂຫວາພໍໃຈ. (1 ປຕ. 4:13, 14) (2) ຄວາມເຊື່ອຂອງເຮົາຈະເຂັ້ມແຂງຫຼາຍຂຶ້ນ. (1 ປຕ. 1:7) (3) ເຮົາຈະໄດ້ຮັບລາງວັນເຊິ່ງກໍຄືຊີວິດຕະຫຼອດໄປ.—ຣມ. 2:6, 7
19. ເປັນຫຍັງພວກອັກຄະສາວົກຈຶ່ງມີຄວາມສຸກຫຼັງຈາກຖືກຂ້ຽນຕີ?
19 ບໍ່ດົນຫຼັງຈາກທີ່ພະເຢຊູຄືນມາຈາກຕາຍ ພວກອັກຄະສາວົກກໍໄດ້ເຂົ້າໃຈວ່າ ຄວາມສຸກທີ່ພະເຢຊູເວົ້າເຖິງເປັນແນວໃດ. ເຂົາເຈົ້າມີຄວາມສຸກຫຼັງຈາກທີ່ຖືກຂ້ຽນຕີແລະຖືກສັ່ງຫ້າມບໍ່ໃຫ້ປະກາດ. ຍ້ອນຫຍັງ? “ເພາະພວກເຂົາຖືວ່າການທີ່ຖືກດູຖູກຢຽດຫຍາມຍ້ອນຊື່ຂອງພະເຢຊູນັ້ນເປັນກຽດຢ່າງສູງ.” (ກຈກ. 5:40-42) ເຂົາເຈົ້າຮັກພະເຢຊູຫຼາຍກວ່າຢ້ານພວກສັດຕູ. ເຂົາເຈົ້າສະແດງຄວາມຮັກຕໍ່ພະເຢຊູໂດຍການປະກາດຂ່າວດີ “ທຸກໆມື້.” ພີ່ນ້ອງຫຼາຍຄົນໃນທຸກມື້ນີ້ຍັງຮັບໃຊ້ພະເຢໂຫວາຢ່າງສັດຊື່ຕໍ່ໆໄປເຖິງວ່າຈະມີຄວາມຫຍຸ້ງຍາກ. ເຂົາເຈົ້າຮູ້ວ່າພະເຢໂຫວາຈະບໍ່ລືມວຽກທີ່ເຂົາເຈົ້າເຮັດແລະຄວາມຮັກທີ່ເຂົາເຈົ້າໄດ້ສະແດງຕໍ່ນາມຊື່ຂອງເພິ່ນ.—ຮຣ. 6:10
20. ເຮົາຈະຮຽນຫຍັງໃນບົດຄວາມຕໍ່ໄປ?
20 ຄົນໃນໂລກຈະກຽດຊັງເຮົາຈົນກວ່າໂລກນີ້ຈະເຖິງຈຸດຈົບ. (ຢຮ. 15:19) ແຕ່ເຮົາບໍ່ຕ້ອງຢ້ານ ເພາະພະເຢໂຫວາ “ຈະໃຫ້ກຳລັງໃຈ . . . ແລະປົກປ້ອງ” ຜູ້ຮັບໃຊ້ທີ່ສັດຊື່ຂອງເພິ່ນແລະເຮົາຈະໄດ້ຮຽນເລື່ອງນີ້ໃນບົດຄວາມຕໍ່ໄປ. (2 ທຊ. 3:3) ດັ່ງນັ້ນ ຂໍໃຫ້ເຮົາຮັກພະເຢໂຫວາ ຮັກພີ່ນ້ອງ ແລະຮັກສັດຕູຕໍ່ໆໄປ. ຖ້າເຮົາເຮັດຕາມຄຳແນະນຳນີ້ເຮົາກໍຈະເປັນນ້ຳໜຶ່ງໃຈດຽວກັນ ມີຄວາມເຊື່ອທີ່ເຂັ້ມແຂງ ເຮັດໃຫ້ພະເຢໂຫວາໄດ້ຮັບກຽດ ແລະພິສູດໃຫ້ເຫັນວ່າຄວາມຮັກມີພະລັງຫຼາຍກວ່າຄວາມກຽດຊັງ.
ເພງ 106 ປູກຝັງຄວາມຮັກແບບພະເຈົ້າ
^ ຂໍ້ 5 ໃນບົດຄວາມນີ້ເຮົາຈະມາເບິ່ງວ່າ ການຮັກພະເຢໂຫວາ ຮັກພີ່ນ້ອງ ແລະຮັກສັດຕູຈະຊ່ອຍເຮົາໃຫ້ອົດທົນໄດ້ແນວໃດເມື່ອຄົນໃນໂລກກຽດຊັງເຮົາ. ແລະເຮົາຍັງຈະມາເບິ່ງອີກວ່າ ເປັນຫຍັງພະເຢຊູຈຶ່ງບອກວ່າເຮົາຈະມີຄວາມສຸກເຖິງວ່າຄົນອື່ນຈະກຽດຊັງເຮົາ.
^ ຂໍ້ 1 ບາງຊື່ເປັນຊື່ສົມມຸດ.
^ ຂໍ້ 58 ຄຳອະທິບາຍຮູບພາບ: ຫຼັງຈາກທີ່ທະຫານໄດ້ມາຂົ່ມຂູ່ດານີໂລ ພີ່ນ້ອງກໍໄດ້ຊ່ອຍລາວໃຫ້ຍ້າຍໄປຢູ່ບ່ອນໃໝ່. ພີ່ນ້ອງຢູ່ທີ່ນັ້ນໄດ້ຕ້ອນຮັບລາວແລະຊ່ວຍເຫຼືອລາວ.
^ ຂໍ້ 60 ຄຳອະທິບາຍຮູບພາບ: ພີ່ນ້ອງຢັດຊ໌ມິນຖືກຜົວຕໍ່ຕ້ານ ແຕ່ຜູ້ດູແລໄດ້ໃຫ້ຄຳແນະນຳທີ່ດີກັບລາວ. ລາວໄດ້ພິສູດໃຫ້ເຫັນວ່າລາວເປັນເມຍທີ່ດີ ແລະເບິ່ງແຍງຜົວຕອນທີ່ຜົວເປັນໄຂ້.
