ບົດຄວາມສຶກສາທີ 13
ພະເຢໂຫວາຈະປົກປ້ອງເຈົ້າແນວໃດ?
“ຜູ້ເປັນນາຍຈະໃຫ້ກຳລັງໃຈພວກເຈົ້າແລະປົກປ້ອງພວກເຈົ້າໄວ້ຈາກຕົວຊົ່ວຮ້າຍຍ້ອນເພິ່ນສັດຊື່.”—2 ທຊ. 3:3
ເພງ 124 ສັດຊື່ຕະຫຼອດໄປ
ໃຈຄວາມສຳຄັນ *
1. ເປັນຫຍັງພະເຢຊູຈຶ່ງຂໍໃຫ້ພະເຢໂຫວາປົກປ້ອງລູກສິດຂອງເພິ່ນ?
ໃນຄືນສຸດທ້າຍທີ່ພະເຢຊູມີຊີວິດຢູ່ໃນໂລກ ເພິ່ນໄດ້ຄິດເຖິງບັນຫາຕ່າງໆທີ່ພວກລູກສິດຈະຕ້ອງເຈິ. ຍ້ອນພະເຢຊູຮັກພວກລູກສິດ ເພິ່ນຈຶ່ງໄດ້ຂໍໃຫ້ພະເຢໂຫວາພໍ່ຂອງເພິ່ນຊ່ອຍ “ປົກປ້ອງພວກເຂົາຈາກຕົວຊົ່ວຮ້າຍ.” (ຢຮ 17:14, 15) ພະເຢຊູຮູ້ວ່າຫຼັງຈາກທີ່ເພິ່ນກັບຂຶ້ນໄປສະຫວັນ ຊາຕານຍັງຈະຕໍ່ຕ້ານທຸກຄົນທີ່ຢາກຮັບໃຊ້ພະເຢໂຫວາຢູ່. ດັ່ງນັ້ນ ປະຊາຊົນຂອງພະເຢໂຫວາຈຶ່ງຈຳເປັນຕ້ອງໄດ້ຮັບການປົກປ້ອງ.
2. ເປັນຫຍັງເຮົາຈຶ່ງໝັ້ນໃຈໄດ້ວ່າພະເຢໂຫວາຈະຕອບຄຳອະທິດຖານຂອງເຮົາ?
2 ພະເຢໂຫວາຕອບຄຳອະທິດຖານຂອງພະເຢຊູຍ້ອນວ່າເພິ່ນຮັກພະເຢຊູລູກຊາຍຂອງເພິ່ນ. ຖ້າເຮົາພະຍາຍາມເຮັດໃຫ້ພະເຢໂຫວາພໍໃຈ ເພິ່ນກໍຈະຮັກເຮົາແລະຕອບຄຳອະທິດຖານຂອງເຮົາຄືກັນ. ພະເຢໂຫວາເປັນຄືກັບຫົວໜ້າຄອບຄົວທີ່ຮັກຄອບຄົວແທ້ໆ ດັ່ງນັ້ນ ເພິ່ນຈຶ່ງຢາກຊ່ອຍລູກດ້ວຍຄວາມຮັກສະເໝີເພາະເພິ່ນກໍມີຊື່ສຽງທີ່ດີແບບນີ້ຢູ່ແລ້ວ!
3. ເປັນຫຍັງເຮົາຕ້ອງໃຫ້ພະເຢໂຫວາປົກປ້ອງເຮົາໃນທຸກມື້ນີ້?
3 ເຮົາຈຳເປັນຕ້ອງໃຫ້ພະເຢໂຫວາປົກປ້ອງເຮົາຫຼາຍກວ່າແຕ່ກ່ອນ. ຍ້ອນຊາຕານໄດ້ຖືກຖິ້ມລົງມາຈາກສະຫວັນແລະມັນກໍ “ຄຽດຮ້າຍຫຼາຍ.” (ພນມ. 12:12) ມັນໄດ້ເຮັດໃຫ້ບາງຄົນຄິດວ່າການຂົ່ມເຫງເຮົາເປັນ “ການຮັບໃຊ້ພະເຈົ້າ.” (ຢຮ. 16:2) ສ່ວນຄົນອື່ນທີ່ບໍ່ເຊື່ອໃນພະເຈົ້າກໍຂົ່ມເຫງເຮົາຍ້ອນເຮົາແຕກຕ່າງຈາກເຂົາເຈົ້າ. ແຕ່ບໍ່ວ່າເຂົາເຈົ້າຈະຂົ່ມເຫງເຮົາຍ້ອນເຫດຜົນຫຍັງ ເຮົາກໍບໍ່ຢ້ານ. ຍ້ອນຫຍັງ? ຍ້ອນຄຳພີໄບເບິນບອກວ່າ: “ຜູ້ເປັນນາຍຈະໃຫ້ກຳລັງໃຈພວກເຈົ້າແລະປົກປ້ອງພວກເຈົ້າໄວ້ຈາກຕົວຊົ່ວຮ້າຍຍ້ອນເພິ່ນສັດ ຊື່.” (2 ທຊ. 3:3) ແລ້ວພະເຢໂຫວາຈະປົກປ້ອງເຮົາແນວໃດ? ໃຫ້ເຮົາມາເບິ່ງສອງວິທີ.
ພະເຢໂຫວາໃຫ້ເຮົາມີຊຸດຮົບທີ່ຄົບຊຸດ
4. ຕາມເອເຟໂຊ 6:13-17 ພະເຢໂຫວາໄດ້ໃຫ້ເຮົາມີຫຍັງເພື່ອຊ່ວຍປົກປ້ອງເຮົາ?
4 ພະເຢໂຫວາໃຫ້ເຮົາມີຊຸດຮົບທີ່ຄົບຊຸດເພື່ອຈະປົກປ້ອງເຮົາຈາກການໂຈມຕີຂອງຊາຕານ. (ອ່ານເອເຟໂຊ 6:13-17) ຊຸດຮົບທີ່ຄົບຊຸດຈາກພະເຈົ້າຈະຊ່ອຍເຮົາໃຫ້ເຂັ້ມແຂງແລະປົກປ້ອງເຮົາ! ແຕ່ມັນຈະປົກປ້ອງເຮົາໄດ້ກໍຕໍ່ເມື່ອເຮົາໃສ່ຄົບຊຸດ. ສ່ວນຕ່າງໆຂອງຊຸດຮົບໝາຍເຖິງຫຍັງແດ່? ໃຫ້ເຮົາມາເບິ່ງແຕ່ລະຢ່າງນຳກັນ.
5. ສາຍແອວໃນທີ່ນີ້ໝາຍເຖິງຫຍັງ ແລະເປັນຫຍັງເຮົາຕ້ອງໃສ່?
5 ເອົາຄວາມຈິງເປັນສາຍແອວ. ສາຍແອວນີ້ໝາຍເຖິງຄວາມຈິງທີ່ຢູ່ໃນຄຳພີໄບເບິນ. ເປັນຫຍັງເຮົາຕ້ອງໃສ່ສາຍແອວ? ກໍເພື່ອປົກປ້ອງຈາກຊາຕານທີ່ເປັນ “ພໍ່ຂອງການຕົວະ.” (ຢຮ. 8:44) ມັນໄດ້ໃຊ້ເວລາຫຼາຍພັນປີເພື່ອຕົວະແລະລໍ້ລວງຄົນທີ່ຢູ່ “ທົ່ວໂລກ”! (ພນມ. 12:9) ແຕ່ຄວາມຈິງໃນຄຳພີໄບເບິນຈະຊ່ອຍປົກປ້ອງເຮົາບໍ່ໃຫ້ຖືກຫຼອກ. ແລ້ວເຮົາຈະໃສ່ສາຍແອວທີ່ໝາຍເຖິງຄວາມຈິງໄດ້ແນວໃດ? ເຮົາຈະເຮັດແບບນັ້ນໄດ້ໂດຍຮຽນຄວາມຈິງກ່ຽວກັບພະເຢໂຫວາ ແລະນະມັດສະການເພິ່ນ “ໂດຍໃຫ້ພະລັງຂອງພະເຈົ້າຊີ້ນຳແລະນະມັດສະການແບບທີ່ສອດຄ່ອງກັບຄວາມຈິງ” ແລະໃຫ້ປະພຶດໂຕຢ່າງສັດຊື່ໃນທຸກໆເລື່ອງ.—ຢຮ. 4:24; ອຟຊ. 4:25; ຮຣ. 13:18
6. ເສື້ອເກາະປ້ອງກັນເອິກທີ່ຢູ່ໃນພະຄຳພີໝາຍເຖິງຫຍັງ ແລະເປັນຫຍັງເຮົາຕ້ອງໃສ່?
6 ເອົາຄວາມຖືກຕ້ອງຊອບທຳເປັນເສື້ອເກາະປ້ອງກັນເອິກ. ເສື້ອເກາະນີ້ໝາຍເຖິງຫຼັກການຂອງພະເຢໂຫວາທີ່ບອກໃຫ້ຮູ້ວ່າອັນໃດຖືກອັນໃດຜິດ. ເປັນຫຍັງເຮົາຕ້ອງໃສ່ເສື້ອເກາະນີ້? ຄືກັບເສື້ອເກາະທີ່ປົກປ້ອງຫົວໃຈຂອງທະຫານ ເສື້ອເກາະທີ່ໝາຍເຖິງຄວາມຖືກຕ້ອງຊອບທຳກໍຈະປົກປ້ອງເຮົາຈາກສິ່ງທີ່ບໍ່ດີຂອງໂລກນີ້. (ສຸພາ. 4:23) ພະເຢໂຫວາຢາກໃຫ້ເຮົາຮັກແລະຮັບໃຊ້ເພິ່ນສຸດຫົວໃຈ. (ມທ. 22:36, 37) ແຕ່ຊາຕານບໍ່ຢາກໃຫ້ເຮົາຮັບໃຊ້ພະເຢໂຫວາສຸດຫົວໃຈ. ດັ່ງນັ້ນ ມັນຈຶ່ງພະຍາຍາມເຮັດໃຫ້ເຮົາຮັກສິ່ງທີ່ພະເຢໂຫວາກຽດຊັງທີ່ໂລກນີ້ມັກສະເໜີໃຫ້. (ຢກບ. 4:4; 1 ຢຮ. 2:15, 16) ແລະຖ້າວິທີນີ້ບໍ່ໄດ້ຜົນ ມັນກໍຈະພະຍາຍາມຂົ່ມຂູ່ເຮົາໃຫ້ເຮັດສິ່ງທີ່ຂັດກັບຫຼັກການຂອງພະເຢໂຫວາ.
7. ເຮົາຈະໃສ່ເສື້ອເກາະປ້ອງກັນເອິກໂດຍເຮັດຫຍັງ?
7 ເຮົາໃສ່ເສື້ອເກາະປ້ອງກັນເອິກໂດຍຍອມຮັບຫຼັກການຂອງພະເຢໂຫວາວ່າອັນໃດຖືກອັນໃດຜິດແລະໃຊ້ຊີວິດຕາມຫຼັກການນັ້ນ. (ເພງ. 97:10) ບາງຄົນອາດຮູ້ສຶກວ່າຫຼັກການຂອງພະເຢໂຫວາເຄັ່ງຄັດຫຼາຍເກີນໄປ. ຖ້າເຮົາເຊົາເຮັດຕາມຫຼັກການໃນຄຳພີໄບເບິນ ເຮົາກໍຈະເປັນຄືກັບທະຫານທີ່ປົດເສື້ອເກາະປ້ອງກັນເອິກອອກກາງສະໜາມຮົບຍ້ອນຄິດວ່າມັນໜັກໂພດ. ການເຮັດແບບນັ້ນບໍ່ສະຫຼາດເລີຍ! ສຳລັບຜູ້ທີ່ຮັກພະເຢໂຫວາຈະບໍ່ໄດ້ຖືວ່າຄຳສັ່ງຂອງເພິ່ນ “ຍາກເກີນໄປ” ແຕ່ເຂົາເຈົ້າຖືວ່າເປັນສິ່ງທີ່ຊ່ອຍຊີວິດໃຫ້ລອດ.—1 ຢຮ. 5:3
8. ເອົາຄວາມພ້ອມທີ່ຈະປະກາດຂ່າວດີເລື່ອງສັນຕິສຸກມາໃສ່ເປັນເກີບໝາຍຄວາມວ່າແນວໃດ?
8 ໂປໂລບອກເຮົາໃຫ້ເອົາຄວາມພ້ອມທີ່ຈະປະກາດຂ່າວດີເລື່ອງສັນຕິສຸກມາໃສ່ເປັນເກີບ. ນີ້ໝາຍຄວາມວ່າເຮົາຄວນພ້ອມສະເໝີທີ່ຈະປະກາດຂ່າວດີເລື່ອງການປົກຄອງຂອງພະເຈົ້າ. ເມື່ອເຮົາເວົ້າເລື່ອງພະຄຳພີໃຫ້ຄົນອື່ນຟັງ ຄວາມເຊື່ອຂອງເຮົາກໍຈະເຂັ້ມແຂງຂຶ້ນ. ເຮົາຮູ້ສຶກໄດ້ຮັບກຳລັງໃຈແທ້ໆທີ່ເຫັນວ່າປະຊາຊົນຂອງພະເຢໂຫວາທົ່ວໂລກໃຊ້ທຸກໂອກາດທີ່ຈະລົມເລື່ອງພະເຢໂຫວາກັບຄົນອື່ນບໍ່ວ່າຈະຢູ່ບ່ອນໃດກໍຕາມ ເຊັ່ນ: ຕອນທີ່ຢູ່ໂຮງຮຽນຫຼືບ່ອນເຮັດວຽກ ຕອນທີ່ປະກາດຕາມບ້ານຫຼືເຂດທຸລະກິດ ຕອນທີ່ໄປຊື້ເຄື່ອງ ໄປຢາມຍາດພີ່ນ້ອງ ຫຼືລົມກັບໝູ່ຄູ່ ແລະແມ່ນແຕ່ພີ່ນ້ອງ
ທີ່ອອກຈາກເຮືອນບໍ່ໄດ້ກໍຍັງຊອກທຸກໂອກາດທີ່ຈະລົມເລື່ອງພະເຢໂຫວາກັບຄົນອື່ນ. ຖ້າເຮົາຮູ້ສຶກຢ້ານຈົນເຖິງຂັ້ນເຊົາປະກາດ ເຮົາກໍຈະເປັນຄືກັບທະຫານທີ່ປົດເກີບຕອນທີ່ສູ້ກັບສັດຕູເຊິ່ງຈະເຮັດໃຫ້ຕີນລາວບາດເຈັບ. ເມື່ອເປັນແບບນີ້ ລາວກໍຈະຖືກໂຈມຕີໄດ້ງ່າຍ ແລະເຮັດຕາມຄຳສັ່ງຂອງຜູ້ບັນຊາການບໍ່ໄດ້.9. ເປັນຫຍັງເຮົາຕ້ອງຖືໂລ້ໃຫຍ່?
9 ເອົາຄວາມເຊື່ອເປັນໂລ້ໃຫຍ່. ໂລ້ໃຫຍ່ນີ້ໝາຍເຖິງຄວາມເຊື່ອທີ່ເຮົາມີກ່ຽວກັບເລື່ອງພະເຢໂຫວາ. ເຮົາເຊື່ອວ່າພະເຢໂຫວາຈະເຮັດຕາມທີ່ເພິ່ນສັນຍາ. ຄວາມເຊື່ອນີ້ຈະຊ່ອຍເຮົາໃຫ້ “ມອດລູກທະນູໄຟທຸກດອກຂອງຕົວຊົ່ວຮ້າຍໄດ້.” ແລ້ວເປັນຫຍັງເຮົາຕ້ອງຖືໂລ້ໃຫຍ່ນີ້? ກໍຍ້ອນວ່າມັນຈະຊ່ອຍປົກປ້ອງເຮົາບໍ່ໃຫ້ຖືກຫຼອກຈາກຄຳສອນຂອງພວກທີ່ທໍລະຍົດພະເຈົ້າ ແລະຊ່ອຍເຮົາບໍ່ໃຫ້ທໍ້ໃຈເມື່ອມີຄົນເວົ້າໃສ່ຫຼືເຍາະເຍີ້ຍຄວາມເຊື່ອຂອງເຮົາ. ຖ້າບໍ່ມີຄວາມເຊື່ອ ເຮົາກໍບໍ່ມີແຮງທີ່ຈະຕ້ານທານຄົນທີ່ພະຍາຍາມກົດດັນເຮົາໃຫ້ເຮັດສິ່ງທີ່ຂັດກັບຫຼັກການຂອງພະເຢໂຫວາ. ແຕ່ທຸກເທື່ອທີ່ເຮົາປະຕິເສດບໍ່ເຮັດສິ່ງທີ່ພະເຢໂຫວາບໍ່ມັກຕອນທີ່ຢູ່ໂຮງຮຽນຫຼືຢູ່ບ່ອນເຮັດວຽກ ນີ້ສະແດງວ່າເຮົາກຳລັງຖືໂລ້. (1 ປຕ. 3:15) ແລະທຸກເທື່ອທີ່ເຮົາປະຕິເສດວຽກທີ່ໄດ້ເງິນຫຼາຍໆເຊິ່ງເຮັດໃຫ້ເຮົາບໍ່ສາມາດຮັບໃຊ້ພະເຢໂຫວາໄດ້ເຕັມທີ ນີ້ສະແດງວ່າເຮົາກຳລັງຖືໂລ້. (ຮຣ. 13:5, 6) ແລະທຸກໆເທື່ອທີ່ເຮົາຍັງຮັບໃຊ້ພະເຢໂຫວາ ເຖິງວ່າຈະມີການຕໍ່ຕ້ານ ນີ້ສະແດງວ່າເຮົາກຳລັງຖືໂລ້.—1 ທຊ. 2:2
10. ໝວກເກາະໝາຍເຖິງຫຍັງ ແລະເປັນຫຍັງເຮົາຕ້ອງໃສ່?
10 ເອົາຄວາມລອດມາໃສ່ເປັນໝວກເກາະ. ໝວກເກາະນີ້ໝາຍເຖິງຄວາມຫວັງທີ່ພະເຢໂຫວາໃຫ້ເຮົາ ເຊິ່ງເປັນຄວາມຫວັງທີ່ວ່າພະເຢໂຫວາຈະຊ່ອຍເຮົາໃຫ້ລອດຈາກຄວາມຕາຍ ແລະຈະໃຫ້ລາງວັນກັບທຸກຄົນທີ່ເຮັດຕາມຄວາມຕ້ອງການຂອງເພິ່ນ. (1 ທຊ. 5:8; 1 ຕມ. 4:10; ຕຕ. 1:1, 2) ຄືກັບໝວກເກາະທີ່ປົກປ້ອງຫົວຂອງທະຫານ ຄວາມຫວັງກໍຈະປົກປ້ອງຄວາມຄິດຂອງເຮົາ. ປົກປ້ອງແນວໃດ? ຄວາມຫວັງຈະຊ່ອຍເຮົາໃຫ້ເບິ່ງໄປທີ່ຄຳສັນຍາຂອງພະເຢໂຫວາສະເໝີ ແລະຊ່ອຍເຮົາບໍ່ໃຫ້ອຸກໃຈກັບບັນຫາຫຼາຍເກີນໄປ. ແລ້ວເຮົາຈະໃສ່ໝວກນີ້ໄດ້ແນວໃດ? ໂດຍເຮັດໃຫ້ຄວາມຄິດຂອງເຮົາຄືກັບຄວາມຄິດຂອງພະເຢໂຫວາ. ຕົວຢ່າງເຊັ່ນ: ເຮົາຝາກຄວາມຫວັງໄວ້ກັບພະເຈົ້າ ບໍ່ແມ່ນຊັບສົມບັດ.—ເພງ. 26:2; 104:34; 1 ຕມ. 6:17
11. ດາບຂອງພະລັງບໍລິສຸດໝາຍເຖິງຫຍັງ ແລະເປັນຫຍັງເຮົາຕ້ອງໃຊ້ດາບນີ້?
11 ດາບຂອງພະລັງບໍລິສຸດ ໝາຍເຖິງຄຳພີໄບເບິນ. ດາບນີ້ມີພະລັງທີ່ຈະຊ່ອຍເຮົາໃຫ້ຫຼຸດພົ້ນອອກຈາກຄຳສອນຕົວະ ແລະນິດໄສທີ່ບໍ່ດີ. (2 ກຣ. 10:4, 5; 2 ຕມ. 3:16, 17; ຮຣ. 4:12) ເຮົາຝຶກທີ່ຈະໃຊ້ດາບນີ້ໂດຍການສຶກສາສ່ວນຕົວ ແລະຮັບການຝຶກອົບຮົມຈາກອົງການຂອງພະເຢໂຫວາ. (2 ຕມ. 2:15) ນອກຈາກຊຸດຮົບທີ່ຄົບຊຸດທີ່ພະເຢໂຫວາໃຫ້ເຮົາແລ້ວ ເພິ່ນຍັງໄດ້ໃຫ້ມີສິ່ງອື່ນອີກທີ່ຈະຊ່ອຍປົກປ້ອງເຮົາ. ສິ່ງນັ້ນແມ່ນຫຍັງ?
ເຮົາບໍ່ຕ້ອງຕໍ່ສູ້ຜູ້ດຽວ
12. ເພື່ອຈະຕໍ່ສູ້ກັບຊາຕານ ເຮົາຕ້ອງເຮັດຫຍັງແລະຍ້ອນຫຍັງ?
12 ທະຫານທີ່ມີປະສົບການຮູ້ວ່າ ລາວບໍ່ສາມາດຕໍ່ສູ້ກັບກອງທັບໃຫຍ່ໃຫ້ຊະນະໄດ້ດ້ວຍຕົວເອງ ລາວຕ້ອງຂໍຄວາມຊ່ວຍເຫຼືອຈາກໝູ່. ຄ້າຍຄືກັນ ເຮົາຈະຕໍ່ສູ້ກັບຊາຕານກັບພັກພວກຂອງມັນດ້ວຍຕົວເອງບໍ່ໄດ້ ເຮົາຕ້ອງຂໍຄວາມຊ່ວຍເຫຼືອຈາກພີ່ນ້ອງ. ພະເຢໂຫວາໄດ້ໃຫ້ເຮົາມີ “ພີ່ນ້ອງຄລິດສະຕຽນ” ທີ່ຢູ່ທົ່ວໂລກເຊິ່ງພ້ອມທີ່ຈະຊ່ອຍເຮົາສະເໝີ.—1 ປຕ. 2:17
13. ຕາມເຮັບເຣີ 10:24, 25 ເຈົ້າຈະໄດ້ຮັບປະໂຫຍດຫຍັງແດ່ຈາກການປະຊຸມ?
13 ວິທີໜຶ່ງທີ່ເຮົາຈະໄດ້ຮັບການຊ່ວຍເຫຼືອກໍຄືເຂົ້າຮ່ວມການປະຊຸມ. (ອ່ານເຮັບເຣີ 10:24, 25) ບາງເທື່ອເຮົາທຸກຄົນຮູ້ສຶກທໍ້ໃຈ ແຕ່ການປະຊຸມເຮັດໃຫ້ເຮົາມີກຳລັງໃຈ. ເຮົາໄດ້ຮັບກຳລັງໃຈເມື່ອພີ່ນ້ອງອອກຄຳຄິດເຫັນທີ່ມາຈາກຄວາມຮູ້ສຶກແທ້ໆ. ຄຳບັນລະຍາຍແລະສ່ວນສາທິດກໍຊ່ອຍເຮົາໃຫ້ຢາກຮັບໃຊ້ພະເຢໂຫວາຕໍ່ໆໄປ. ແລະເມື່ອໄດ້ລົມກັບພີ່ນ້ອງທັງກ່ອນແລະຫຼັງປະຊຸມ ກໍເຮັດໃຫ້ເຮົາໄດ້ຮັບກຳລັງໃຈຄືກັນ. (1 ທຊ. 5:14) ນອກຈາກນັ້ນ ການປະຊຸມຍັງຊ່ອຍເຮົາໃຫ້ມີຄວາມສຸກທີ່ໄດ້ຊ່ອຍຄົນອື່ນ. (ກຈກ. 20:35; ຣມ. 1:11, 12) ແລະການປະຊຸມຍັງຊ່ອຍເຮົາໃນເລື່ອງອື່ນອີກ ເຊັ່ນ: ຊ່ອຍເຮົາໃຫ້ປະກາດແລະສອນໄດ້ດີຂຶ້ນ. ເຮົາໄດ້ຝຶກໃຊ້ກ່ອງເຄື່ອງມືສຳລັບການສອນໄດ້ເປັນຢ່າງດີ. ດັ່ງນັ້ນ ໃຫ້ເຮົາກຽມສຳລັບການປະຊຸມດີໆ ແລະຕອນທີ່ປະຊຸມກໍໃຫ້ຕັ້ງໃຈຟັງ. ຈາກນັ້ນ ກໍໃຫ້ເອົາສິ່ງທີ່ໄດ້ຮຽນໄປໃຊ້. ເມື່ອເຈົ້າເຮັດແບບນີ້ ເຈົ້າກໍຈະເປັນ “ທະຫານທີ່ດີຂອງພະຄລິດເຢຊູ.”—2 ຕມ. 2:3
14. ເຮົາຍັງຈະໄດ້ຮັບການຊ່ວຍເຫຼືອຈາກທາງໃດອີກ?
14 ເຮົາຍັງໄດ້ຮັບການຊ່ວຍເຫຼືອຈາກທູດສະຫວັນຫຼາຍລ້ານອົງ. ລອງຄິດເບິ່ງວ່າທູດສະຫວັນອົງໜຶ່ງເຮັດຫຍັງໄດ້ແດ່! (ເອຊາ. 37:36) ແລ້ວຖ້າທູດສະຫວັນເປັນກອງທັບເດ ກໍແຮ່ງຈະເຮັດໄດ້ຫຼາຍກວ່ານັ້ນອີກ. ບໍ່ວ່າຈະເປັນມະນຸດຫຼືປີສາດ ກໍບໍ່ສາມາດເອົາຊະນະກອງທັບຂອງພະເຢໂຫວາໄດ້. ພະເຢໂຫວາມີພະລັງອຳນາດຫຼາຍແທ້ໆ ຖ້າເພິ່ນຢູ່ກັບເຮົາ ເຮົາກໍຈະຊະນະຜູ້ທີ່ຕໍ່ຕ້ານເຮົາບໍ່ວ່າ ເຂົາເຈົ້າຈະມີກຳລັງຫຼາຍສ່ຳໃດກໍຕາມ. (ຕັດສິນ. 6:16) ເຮົາສາມາດໝັ້ນໃຈເລື່ອງນີ້ໄດ້! ດັ່ງນັ້ນ ເມື່ອເຮົາທໍ້ໃຈຍ້ອນໝູ່ທີ່ຢູ່ໃນໂຮງຮຽນ ຢູ່ບ່ອນເຮັດວຽກ ຫຼືຄົນໃນຄອບຄົວທີ່ບໍ່ໄດ້ເຊື່ອໃນພະເຢໂຫວາເວົ້າຫຼືເຮັດບໍ່ດີຕໍ່ເຮົາ ກໍຂໍໃຫ້ຈື່ໄວ້ວ່າເຮົາບໍ່ໄດ້ຕໍ່ສູ້ຜູ້ດຽວ. ພະເຢໂຫວາຈະຊ່ອຍເຮົາສະເໝີ ຍ້ອນເຮົາເຮັດຕາມການຊີ້ນຳຂອງເພິ່ນ.
ພະເຢໂຫວາຈະປົກປ້ອງເຮົາຕໍ່ໆໄປ
15. ຕາມເອຊາອີ 54:15, 17 ເປັນຫຍັງຈຶ່ງບໍ່ມີໃຜເຮັດໃຫ້ປະຊາຊົນຂອງພະເຈົ້າເຊົາປະກາດໄດ້?
15 ຍ້ອນຊາຕານປົກຄອງໂລກນີ້ ຈຶ່ງມີຫຼາຍເຫດຜົນທີ່ເຮັດໃຫ້ຫຼາຍຄົນຊັງເຮົາ ເຊັ່ນ: ເຮົາບໍ່ມີສ່ວນຮ່ວມທາງດ້ານການເມືອງ ແລະບໍ່ມີສ່ວນກ່ຽວຂ້ອງກັບສົງຄາມ. ເຮົາປະກາດນາມຊື່ຂອງພະເຈົ້າ ແລະບອກວ່າມີແຕ່ການປົກຄອງຂອງພະເຈົ້າເທົ່ານັ້ນທີ່ຈະເຮັດໃຫ້ໂລກນີ້ມີສັນຕິສຸກ. ແລະເຮົາຍັງເຮັດຕາມຫຼັກການຂອງພະເຈົ້າທີ່ບອກວ່າອັນໃດຖືກອັນໃດຜິດ. ແລະເຮົາຍັງເປີດເຜີຍວ່າຊາຕານເປັນຈອມຂີ້ຕົວະແລະເປັນຜູ້ທີ່ຂ້າຄົນ. (ຢຮ. 8:44) ເຮົາປະກາດວ່າອີກບໍ່ດົນໂລກຂອງຊາຕານຈະຖືກທຳລາຍ. ແລະເຮົາຈະບໍ່ຍອມໃຫ້ຊາຕານແລະພັກພວກຂອງມັນມາເຮັດໃຫ້ເຮົາເຊົາປະກາດ. ແຕ່ເຮົາຈະຍົກຍ້ອງສັນລະເສີນພະເຢໂຫວາຕໍ່ໆໄປໃນທຸກວິທີທີ່ເຮົາເຮັດໄດ້. ເຖິງວ່າຊາຕານຈະມີອຳນາດ ແຕ່ມັນກໍບໍ່ສາມາດຂັດຂວາງວຽກປະກາດທີ່ຢູ່ທົ່ວໂລກໄດ້. ນີ້ກໍເປັນຍ້ອນວ່າພະເຢໂຫວາປົກປ້ອງເຮົາ.—ອ່ານເອຊາອີ 54:15, 17
16. ພະເຢໂຫວາຈະປົກປ້ອງປະຊາຊົນຂອງເພິ່ນແນວໃດໃນໄລຍະຄວາມທຸກລຳບາກຄັ້ງໃຫຍ່?
16 ແລ້ວໃນອະນາຄົດເດຈະເປັນແນວໃດ? ໃນໄລຍະຄວາມທຸກລຳບາກຄັ້ງໃຫຍ່ ພະເຢໂຫວາຈະຊ່ອຍເຮົາໃຫ້ລອດໃນ 2 ແບບທີ່ເປັນຕາງຶດ. ທຳອິດ ພະເຢໂຫວາຈະຊ່ອຍເຮົາໃຫ້ລອດຕອນທີ່ເພິ່ນເຮັດໃຫ້ກະສັດຕ່າງໆທີ່ຢູ່ທົ່ວໂລກທຳລາຍບາບີໂລນໃຫຍ່ເຊິ່ງກໍຄືສາສະໜາປອມທັງໝົດ. (ພນມ. 17:16-18; 18:2, 4) ແລະພະເຢໂຫວາຍັງຈະປົກປ້ອງປະຊາຊົນຂອງເພິ່ນຕອນທີ່ທຳລາຍໂລກຂອງຊາຕານໃນສົງຄາມອາມາເຄໂດນ.—ພນມ. 7:9, 10; 16:14, 16
17. ການສະໜິດກັບພະເຢໂຫວາຊ່ອຍເຮົາແນວໃດ?
17 ເມື່ອເຮົາສະໜິດກັບພະເຢໂຫວາ ຊາຕານກໍບໍ່ສາມາດທຳລາຍເຮົາຕະຫຼອດໄປໄດ້. ແຕ່ມັນຈະເປັນຜູ້ທີ່ຖືກທຳລາຍຕະຫຼອດໄປ. (ຣມ. 16:20) ດັ່ງນັ້ນ ຂໍໃຫ້ເຮົາໃສ່ຊຸດຮົບທີ່ຄົບຊຸດແລະບໍ່ຕ້ອງປົດອອກ! ຢ່າຕໍ່ສູ້ກັບຊາຕານແລະພັກພວກຂອງມັນດ້ວຍຕົວເອງ ແຕ່ໃຫ້ຂໍຄວາມຊ່ວຍເຫຼືອຈາກພີ່ນ້ອງ ແລະໃຫ້ເຮັດຕາມການຊີ້ນຳຂອງພະເຢໂຫວາ. ເມື່ອເຈົ້າເຮັດແບບນີ້ ເຈົ້າກໍໝັ້ນໃຈໄດ້ວ່າພະເຢໂຫວາພໍ່ທີ່ຢູ່ໃນສະຫວັນຈະໃຫ້ກຳລັງກັບເຈົ້າແລະປົກປ້ອງເຈົ້າ.—ເອຊາ. 41:10
ເພງ 149 ເພງສະຫຼອງໄຊຊະນະ
^ ຂໍ້ 5 ຄຳພີໄບເບິນສັນຍາວ່າພະເຢໂຫວາຈະໃຫ້ກຳລັງໃຈເຮົາແລະຈະປົກປ້ອງເຮົາຈາກສິ່ງທີ່ຈະທຳລາຍຄວາມເຊື່ອແລະຈາກສິ່ງອື່ນໆທີ່ຈະກໍຄວາມເສຍຫາຍທີ່ແກ້ໄຂບໍ່ໄດ້. ໃນບົດຄວາມນີ້ ເຮົາຈະມາຕອບຄຳຖາມຕໍ່ໄປນີ້: ເປັນຫຍັງເຮົາຕ້ອງໃຫ້ພະເຢໂຫວາປົກປ້ອງເຮົາ? ແລະພະເຢໂຫວາຈະປົກປ້ອງເຮົາແນວໃດ? ແລ້ວເຮົາຕ້ອງເຮັດຫຍັງແດ່ເພື່ອຈະໃຫ້ພະເຢໂຫວາປົກປ້ອງເຮົາ?