ຄຳຖາມຈາກຜູ້ອ່ານ
ເປັນຫຍັງຜູ້ຊາຍ “ທີ່ມີສິດໄຖ່ນັ້ນ” ບອກວ່າ “ມັນຈະມີຜົນ” ຕໍ່ມໍລະດົກຂອງລາວ ຖ້າລາວແຕ່ງດອງກັບຣຸດ? (ນຣ. 4:1, 6, ລ.ມ.)
ໃນສະໄໝທີ່ຂຽນຄຳພີໄບເບິນ ຖ້າຜູ້ຊາຍຄົນໜຶ່ງທີ່ແຕ່ງດອງແລ້ວຕາຍໄປໂດຍທີ່ຍັງບໍ່ມີລູກ ທີ່ດິນຂອງລາວຈະເປັນແນວໃດ? ຊື່ຂອງລາວຈະຖືກລຶບອອກຈາກວົງຕະກູນຕະຫຼອດໄປບໍ? ກົດໝາຍຂອງໂມເຊຈະຊ່ວຍເຮົາໃຫ້ໄດ້ຄຳຕອບໃນເລື່ອງນີ້.
ຈະເກີດຫຍັງຂຶ້ນກັບທີ່ດິນຂອງຜູ້ຊາຍທີ່ຕາຍໄປຫຼືຖ້າລາວກາຍເປັນຄົນທຸກຍາກແລະຕ້ອງໄດ້ຂາຍທີ່ດິນຕອນນັ້ນ? ອ້າຍນ້ອງຂອງລາວຫຼືພີ່ນ້ອງທີ່ໃກ້ຊິດທີ່ສຸດມີສິດໄຖ່ທີ່ດິນຕອນນັ້ນ ນີ້ຈຶ່ງເຮັດໃຫ້ທີ່ດິນຕອນນັ້ນຍັງເປັນຂອງວົງຕະກູນລາວ.—ລລວ. 25:23-28; ຈຊບ. 27:8-11
ມີການເຮັດແນວໃດເພື່ອບໍ່ໃຫ້ຊື່ຂອງຜູ້ຕາຍຖືກລຶບອອກໄປ? ມີການໃຫ້ອ້າຍຫຼືນ້ອງຊາຍຂອງຜູ້ຕາຍແຕ່ງດອງກັບເມຍຂອງຜູ້ຕາຍ ເຊິ່ງນີ້ເປັນກໍລະນີທີ່ເກີດຂຶ້ນກັບຣຸດ. ລູກຊາຍຄົນທຳອິດທີ່ເກີດຈາກການແຕ່ງດອງຄັ້ງນັ້ນກໍຖືວ່າເປັນລູກຂອງຄົນທີ່ຕາຍໄປແລະຈະໄດ້ຮັບມໍລະດົກທີ່ດິນຂອງລາວ. ການຈັດກຽມນີ້ຍັງເປັນການສະແດງຄວາມຮັກແລະເປັນປະໂຫຍດຕໍ່ເມຍຂອງຜູ້ທີ່ຕາຍນັ້ນ.—ພບຍ. 25:5-7; ມທ. 22:23-28
ໃຫ້ເຮົາມາເບິ່ງເລື່ອງຂອງນາໂອມີ. ລາວແຕ່ງດອງກັບເອລີເມເລັກ. ຕອນທີ່ເອລີເມເລັກກັບລູກຊາຍ 2 ຄົນຕາຍໄປ ກໍບໍ່ມີຜູ້ຊາຍຄົນໃດໃນຄອບຄົວເບິ່ງແຍງນາໂອມີອີກຕໍ່ໄປ. (ນຣ. 1:1-5) ຫຼັງຈາກທີ່ນາໂອມີກັບໄປຢູດາ ລາວກໍເລີຍຂໍໃຫ້ຣຸດເຊິ່ງເປັນລູກໃພ້ຂອງລາວໃຫ້ໄປຂໍໂບອາດໃຫ້ໄຖ່ທີ່ດິນຂອງລາວກັບຄືນມາ. ໂບອາດເປັນພີ່ນ້ອງທີ່ໃກ້ຊິດຂອງເອລີເມເລັກ. (ນຣ. 2:1, 19, 20; 3:1-4) ແຕ່ໂບອາດຮູ້ວ່າຍັງມີພີ່ນ້ອງອີກຄົນໜຶ່ງທີ່ໃກ້ຊິດກັບເອລີເມເລັກຫຼາຍກວ່າລາວເຊິ່ງຄຳພີໄບເບິນເອີ້ນວ່າ “ຄົນນັ້ນ.” ດັ່ງນັ້ນ ຜູ້ຊາຍຄົນນັ້ນຈຶ່ງເປັນຜູ້ທຳອິດທີ່ມີສິດໄຖ່.—ນຣ. 3:9, 12, 13, ລ.ມ.
ທຳອິດ “ຄົນນັ້ນ” ກໍຢາກຈະຊ່ວຍ. (ນຣ. 4:1-4, ລ.ມ.) ເຖິງລາວຈະຮູ້ວ່າຕ້ອງໃຊ້ເງິນຫຼາຍພໍສົມຄວນທີ່ຈະຊື້ທີ່ດິນຕອນນັ້ນ. ແຕ່ລາວກໍຮູ້ວ່ານາໂອມີອາຍຸຫຼາຍເກີນກວ່າທີ່ຈະມີລູກເພື່ອຮັບມໍລະດົກທີ່ດິນຂອງເອລີເມເລັກ. ທີ່ດິນນັ້ນອາດຈະກາຍມາເປັນມໍລະດົກຂອງລາວກໍໄດ້ ລາວຈຶ່ງຄິດວ່າຈະຊ່ວຍນາໂອມີເພາະລາວເອງຈະໄດ້ປະໂຫຍດຈາກການລົງທຶນຄັ້ງນີ້.
ແຕ່ເມື່ອຄົນນັ້ນຮູ້ວ່າລາວຈະຕ້ອງແຕ່ງດອງກັບຣຸດ ລາວກໍປ່ຽນໃຈ. ລາວເວົ້າວ່າ: “ຂ້ອຍໄຖ່ນານັ້ນບໍ່ໄດ້ດອກ ເພາະຖ້າເຮັດແບບນັ້ນ ມັນຈະມີຜົນກະທົບຕໍ່ມໍລະດົກຂອງຂ້ອຍ.” (ນຣ. 4:5, 6, ລ.ມ.) ເປັນຫຍັງຄົນນັ້ນຈຶ່ງປ່ຽນໃຈ?
ຖ້າຄົນນັ້ນຫຼືຜູ້ຊາຍຄົນອື່ນແຕ່ງດອງກັບຣຸດແລະມີລູກຊາຍ ລູກຊາຍທີ່ເກີດມາກໍຈະໄດ້ທີ່ດິນຂອງເອລີເມເລັກເປັນມໍລະດົກ. ແລ້ວມັນຈະ “ມີຜົນກະທົບຕໍ່ມໍລະດົກ” ຂອງຄົນນັ້ນແນວໃດ? ຄຳພີໄບເບິນບໍ່ໄດ້ບອກເຮົາໃນເລື່ອງນີ້ ແຕ່ອາດມີບາງເຫດຜົນທີ່ເປັນໄປໄດ້ ເຊັ່ນ:
ເຫດຜົນທຳອິດ: ເງິນທີ່ລາວລົງທຶນຊື້ທີ່ດິນກໍຈະເສຍໄປລ້າໆເພາະວ່າໃນທີ່ສຸດທີ່ດິນນັ້ນກໍບໍ່ໄດ້ເປັນຂອງລາວ. ແຕ່ມັນຈະກາຍເປັນຂອງລູກຊາຍຂອງຣຸດ.
ເຫດຜົນທີສອງ: ລາວຈະຕ້ອງໄດ້ລ້ຽງດູທັງນາໂອມີແລະຣຸດ.
ເຫດຜົນທີສາມ: ລາວອາດຢ້ານວ່າ ຖ້າມີລູກກັບຣຸດຫຼາຍຄົນ ລູກຂອງຣຸດກໍມີສິດໄດ້ຮັບມໍລະດົກຄືກັບລູກເມຍຄົນອື່ນໆຂອງລາວ.
ເຫດຜົນທີສີ່: ຖ້າຄົນນັ້ນບໍ່ມີລູກ ລູກທີ່ລາວມີກັບຣຸດກໍມີສິດທີ່ຈະໄດ້ທີ່ດິນແລະມໍລະດົກຂອງເອລີເມເລັກແລະຂອງລາວ. ແລະຖ້າວ່າລາວຕາຍ ທີ່ດິນຂອງລາວກໍຕ້ອງກາຍເປັນຂອງວົງຕະກູນເອລີເມເລັກ ບໍ່ແມ່ນຂອງລາວ. ລາວບໍ່ກ້າເອົາຊັບສິນຂອງລາວໄປສ່ຽງເພື່ອຈະຊ່ວຍນາໂອມີ. ລາວຢາກໃຫ້ຜູ້ມີສິດໄຖ່ຄົນຕໍ່ໄປເຮັດໜ້າທີ່ນີ້. ໂບອາດໄດ້ເຮັດໜ້າທີ່ນີ້ແທ້ເພາະລາວຢາກໃຫ້ຣຸດ “ມີລູກໄວ້ສືບຕະກູນແລະສືບມູນມໍລະດົກຂອງຄົນທີ່ຕາຍ ເພື່ອ . . . ຈະບໍ່ລືມຊື່ລາວ [ຜູ້ທີ່ຕາຍ].”—ນຣ 4:10, ລ.ມ.
ເຫັນໄດ້ແຈ້ງວ່າຄົນນັ້ນສົນໃຈແຕ່ຈະຮັກສາຊື່ແລະຊັບສິນຂອງຕົວເອງໄວ້. ຍ້ອນຄວາມເຫັນແກ່ຕົວ ຊື່ຂອງລາວຈຶ່ງຖືກລຶບອອກແລະໃນທຸກມື້ນີ້ບໍ່ມີໃຜຮູ້ຈັກຊື່ຂອງລາວ. ລາວຍັງພາດສິດທິພິເສດທີ່ໂບອາດໄດ້ຮັບນຳອີກ. ໂບອາດໄດ້ເປັນບັນພະບູລຸດຂອງເມຊີອາຫຼືພະເຢຊູຄລິດ. ຈັ່ງແມ່ນເປັນຕາໜ້າເສຍດາຍແທ້ໆຍ້ອນຄວາມເຫັນແກ່ຕົວ ຜູ້ຊາຍຄົນນັ້ນຈຶ່ງເສຍໂອກາດທີ່ຈະໄດ້ຊ່ວຍຄົນທີ່ຂັດສົນຫຼືຄົນທີ່ລຳບາກ!—ມທ 1:5; ລກ. 3:23, 32
